എൽ നിന്യോ അത്‌ എന്താണ്‌?

പെറു​വി​ലെ ലിമയ്‌ക്കു സമീപം വരണ്ടു​ണങ്ങി കിടന്നി​രുന്ന ആപുരി​മാക്‌ നദി പൊടു​ന്നനെ അലറി​പ്പാ​ഞ്ഞൊ​ഴു​കാൻ തുടങ്ങി. അതിന്റെ ശക്തമായ ഒഴുക്കിൽപ്പെട്ട്‌ കാർമെന്‌ ഉണ്ടായി​രുന്ന സകലതും ഒലിച്ചു പോയി. അവൾ പറയുന്നു: “എന്റെ മാത്രമല്ല, മറ്റു പലരു​ടെ​യും ഗതി ഇതുത​ന്നെ​യാ​യി​രു​ന്നു.” കുറച്ചു​കൂ​ടെ വടക്ക്‌, സെക്കൂരാ മണലാ​ര​ണ്യ​ത്തി​ലെ 5,000 ചതുരശ്ര കിലോ​മീ​റ്റർ വരുന്ന ഒരു പ്രദേ​ശത്തെ, താത്‌കാ​ലി​ക​മാ​യി പെറു​വി​ലെ രണ്ടാമത്തെ വലിയ തടാകം ആക്കിത്തീർത്തു​കൊ​ണ്ടു മഴ തകർത്തു​പെ​യ്‌തു. ഭൂമി​യിൽ മറ്റു പലയി​ട​ങ്ങ​ളി​ലും കനത്ത വെള്ള​പ്പൊ​ക്ക​ത്തി​ന്റെ​യും ശക്തമായ ചുഴലി​ക്കൊ​ടു​ങ്കാ​റ്റി​ന്റെ​യും കൊടിയ വരൾച്ച​യു​ടെ​യും ഫലമായി ഭക്ഷ്യക്ഷാ​മ​വും മഹാമാ​രി​യും കാട്ടു​തീ​യും ഉണ്ടായി​രി​ക്കു​ന്നു. അങ്ങനെ, വിളവു​കൾക്കും വസ്‌തു​വ​ക​കൾക്കും പരിസ്ഥി​തി​ക്കും നാശം സംഭവി​ച്ചി​രി​ക്കു​ന്നു. അതി​നെ​ല്ലാം കാരണം എന്തായി​രു​ന്നു? ഉഷ്‌ണ​മേ​ഖ​ല​യി​ലോ ഭൂമധ്യ​രേ​ഖ​യ്‌ക്ക​ടു​ത്തോ ആയി പസിഫിക്‌ സമു​ദ്ര​ത്തിൽ, 1997-ന്റെ അവസാ​ന​ത്തോ​ടെ രൂപം​കൊണ്ട്‌ എട്ടു മാസക്കാ​ലം നീണ്ടു​നിന്ന എൽ നിന്യോ​യെ​യാ​ണു പലരും പഴിക്കു​ന്നത്‌.

വാസ്‌ത​വ​ത്തിൽ, എൽ നിന്യോ എന്താണ്‌? അത്‌ എങ്ങനെ​യാ​ണു വികാസം പ്രാപി​ക്കു​ന്നത്‌? അത്‌ ഇത്ര ദൂരവ്യാ​പക ഫലങ്ങൾ ഉളവാ​ക്കു​ന്നത്‌ എന്തു​കൊണ്ട്‌? അതിന്റെ അടുത്ത രംഗ​പ്ര​വേശം എന്നായി​രി​ക്കു​മെന്നു കൃത്യ​മാ​യി പ്രവചി​ച്ചു​കൊണ്ട്‌ മരണസം​ഖ്യ​യും നാശന​ഷ്ട​വും കുറയ്‌ക്കാ​നും കഴിയു​മോ?

സമു​ദ്ര​ജലം ചൂടു​പി​ടി​ക്കു​ന്നു

“കൃത്യ​മാ​യി പറഞ്ഞാൽ, രണ്ടു മുതൽ ഏഴു വരെ വർഷ​മെ​ത്തു​മ്പോൾ പെറു​വി​ലെ തീരക്ക​ട​ലിൽ ഉണ്ടാകുന്ന ഉഷ്‌ണജല പ്രവാ​ഹ​മാണ്‌ എൽ നിന്യോ” എന്ന്‌ ന്യൂസ്‌വീക്ക്‌ മാസിക പറയുന്നു. നൂറി​ല​ധി​കം വർഷങ്ങ​ളാ​യി പെറു​വി​ന്റെ തീരക്ക​ട​ലി​ലൂ​ടെ സഞ്ചരി​ച്ചി​രുന്ന നാവികർ സമു​ദ്ര​ജലം ചൂടു​പി​ടി​ക്കു​ന്നതു ശ്രദ്ധി​ച്ചി​ട്ടുണ്ട്‌. ഈ ഉഷ്‌ണ​ജ​ല​പ്ര​വാ​ഹം സാധാ​ര​ണ​മാ​യി ഉണ്ടാകു​ന്നത്‌ ക്രിസ്‌തു​മസ്‌ കാലത്താ​യ​തി​നാൽ അതിനു സ്‌പാ​നി​ഷിൽ ‘ഉണ്ണി​യേശു’ എന്ന്‌ അർഥമുള്ള എൽ നിന്യോ എന്ന പേരു ലഭിച്ചു.

പെറു​വി​ന്റെ തീര​പ്ര​ദേ​ശ​ത്തോ​ടു ചേർന്നു സമു​ദ്ര​ജലം ചൂടു​പി​ടി​ക്കു​ന്ന​തി​ന്റെ ഫലമായി ആ ദേശത്തു ധാരാളം മഴ പെയ്യുന്നു. സമൃദ്ധ​മായ മഴ നിമിത്തം മരുഭൂ​മി​കൾ പുഷ്‌പി​ക്കു​ക​യും കന്നുകാ​ലി​കൾ തടിച്ചു​കൊ​ഴു​ക്കു​ക​യും ചെയ്യുന്നു. പക്ഷേ, ചില​പ്പോ​ഴൊ​ക്കെ കനത്ത മഴ ആ പ്രദേ​ശത്തെ വെള്ളത്തിൽ മുക്കാ​റു​മുണ്ട്‌. കൂടാതെ, ചൂടുള്ള സമു​ദ്രോ​പ​രി​തലം, പോഷ​ക​സ​മൃ​ദ്ധ​മായ തണുത്ത വെള്ളം മുകളി​ലേക്കു വരാതെ തടയുന്നു. തന്നിമി​ത്തം, സമുദ്ര ജീവി​ക​ളിൽ മിക്കവ​യും ചില പക്ഷിക​ളും ആഹാരം തേടി ദേശാ​ന്ത​ര​ഗ​മനം നടത്തുക പതിവാണ്‌. പെറു​വി​ന്റെ തീര​പ്ര​ദേ​ശത്തു നിന്നു വളരെ അകലെ സ്ഥിതി​ചെ​യ്യുന്ന സ്ഥലങ്ങളും എൽ നിന്യോ​യു​ടെ ദൂഷ്യ​ഫ​ലങ്ങൾ അനുഭ​വി​ക്കാ​റുണ്ട്‌. a

കാറ്റി​ന്റെ​യും വെള്ളത്തി​ന്റെ​യും പ്രഭാവം

പെറു​വി​ലെ തീരക്ക​ട​ലി​നോ​ടു ചേർന്ന്‌ താപനില ക്രമാ​തീ​ത​മാ​യി ഉയരാൻ കാരണ​മെ​ന്താണ്‌? അതു മനസ്സി​ലാ​ക്കാൻ ആദ്യമാ​യി, വാക്കർ സംവഹനം എന്ന്‌ അറിയ​പ്പെ​ടുന്ന ഒരു വലിയ സംവഹന വലയത്തെ കുറിച്ച്‌  പരിചി​ന്തി​ക്കാം. b ഉഷ്‌ണ​മേ​ഖ​ല​യി​ലെ കിഴക്കൻ പസിഫി​ക്കി​നും പടിഞ്ഞാ​റൻ പസിഫി​ക്കി​നും ഇടയ്‌ക്കുള്ള അന്തരീ​ക്ഷ​ത്തി​ലാണ്‌ അതു സ്ഥിതി​ചെ​യ്യു​ന്നത്‌. ഇന്തൊ​നീ​ഷ്യ​ക്കും ഓസ്‌​ട്രേ​ലി​യ​യ്‌ക്കും അടുത്ത്‌, പസിഫി​ക്കി​ന്റെ പടിഞ്ഞാ​റു ഭാഗത്തെ സമു​ദ്ര​ജ​ല​പ്പ​രപ്പ്‌ സൂര്യ​പ്ര​കാ​ശ​ത്താൽ ചൂടു​പി​ടി​ക്കു​ന്ന​തി​ന്റെ ഫലമായി ഈർപ്പ​മുള്ള ഉഷ്‌ണ​വാ​യു അന്തരീ​ക്ഷ​ത്തി​ലേക്ക്‌ ഉയരുന്നു. തന്നിമി​ത്തം ജലോ​പ​രി​ത​ല​ത്തി​ന​ടു​ത്തു മർദം ഗണ്യമാ​യി കുറയു​ന്നു. അന്തരീ​ക്ഷ​ത്തി​ലേക്ക്‌ ഉയരുന്ന വായു തണുത്ത്‌ അതിന്റെ ഈർപ്പം പുറത്തു​വി​ടു​ന്ന​തു​കൊണ്ട്‌ ആ പ്രദേ​ശത്തു മഴ ലഭിക്കു​ന്നു. ഈർപ്പ​ര​ഹി​ത​മായ വായു​വി​നെ കാറ്റ്‌ ഉയർന്ന അന്തരീ​ക്ഷ​ത്തി​ലേക്കു പറത്തി​ക്കൊ​ണ്ടു പോകു​ന്നു. കിഴ​ക്കോ​ട്ടു സഞ്ചരി​ക്കു​ന്തോ​റും വായു തണുത്ത്‌ കൂടുതൽ ഭാരമു​ള്ള​താ​യി തീരുന്നു. പെറു​വി​ലും ഇക്വ​ഡോ​റി​ലും എത്തുന്ന​തോ​ടെ അതു താഴാൻ തുടങ്ങു​ന്നു. സമു​ദ്ര​ജ​ല​പ്പ​ര​പ്പിൽ ഉയർന്ന മർദം ഉണ്ടാകാൻ ഇത്‌ ഇടവരു​ത്തു​ന്നു. ഉയരം കുറഞ്ഞ പ്രദേ​ശ​ങ്ങ​ളിൽ നിന്നു വാണി​ജ്യ​വാ​തം എന്ന്‌ അറിയ​പ്പെ​ടുന്ന കാറ്റ്‌ ഇന്തൊ​നീ​ഷ്യ​യെ ലക്ഷ്യമാ​ക്കി തിരികെ പടിഞ്ഞാ​റേക്ക്‌ വീശുന്നു. അങ്ങനെ ആ സംവഹന വലയം പൂർത്തി​യാ​കു​ന്നു.

വാണി​ജ്യ​വാ​ത​ങ്ങൾ, ഉഷ്‌ണ​മേ​ഖലാ പസിഫി​ക്കി​ന്റെ ജലോ​പ​രി​തല താപത്തെ ബാധി​ക്കു​ന്നത്‌ എങ്ങനെ​യാണ്‌? ന്യൂസ്‌വീക്ക്‌ പറയുന്നു: “ഈ കാറ്റുകൾ സാധാ​ര​ണ​മാ​യി, കൊച്ചു കുളങ്ങ​ളിൽ അടിക്കുന്ന ഇളങ്കാറ്റു പോ​ലെ​യാ​ണു പ്രവർത്തി​ക്കു​ന്നത്‌. ഇവ ചൂടുള്ള സമു​ദ്ര​ജ​ലത്തെ പടിഞ്ഞാ​റൻ പസിഫി​ക്കി​ലേക്ക്‌ ഒഴുക്കി​ക്കൊ​ണ്ടു പോകും. തത്‌ഫ​ല​മാ​യി അവിടെ സമു​ദ്ര​ജ​ല​നി​ര​പ്പിൽ 60 സെന്റി​മീ​റ്റ​റും സമു​ദ്രോ​പ​രി​തല താപനി​ല​യിൽ എട്ടു ഡിഗ്രി സെൽഷ്യ​സും വർധന​വു​ണ്ടാ​കു​ന്നു. അതിന്‌ ഉദാഹ​ര​ണ​മാണ്‌ ഇക്വ​ഡോർ.” കിഴക്കൻ പസിഫി​ക്കിൽ പോഷക സമൃദ്ധ​മായ തണുത്ത ജലം മുകളി​ലേക്ക്‌ ഉയരു​ന്ന​തു​കൊണ്ട്‌ അവിടം സമു​ദ്ര​ജീ​വി​ക​ളാൽ സമ്പുഷ്ട​മാണ്‌. അങ്ങനെ, എൽ നിന്യോ ഉണ്ടാകാത്ത സാധാരണ വർഷങ്ങ​ളിൽ പടിഞ്ഞാ​റൻ പസിഫി​ക്കി​നെ അപേക്ഷിച്ച്‌ കിഴക്കൻ പസിഫി​ക്കിൽ സമു​ദ്രോ​പ​രി​തല താപനില കുറവാ​യി​രി​ക്കും.

എൽ നിന്യോ​യ്‌ക്ക്‌ ഇടയാ​ക്കുന്ന അന്തരീക്ഷ വ്യതി​യാ​നങ്ങൾ എന്തെല്ലാ​മാണ്‌? “വർഷങ്ങൾ കഴിയു​ന്തോ​റും വാണി​ജ്യ​വാ​തങ്ങൾ ശമിക്കു​ക​യോ അപ്രത്യ​ക്ഷ​മാ​കു​ക​യോ ചെയ്യുന്നു. അതിന്റെ കാരണം ശാസ്‌ത്ര​ജ്ഞർക്ക്‌ ഇതുവരെ പിടി​കി​ട്ടി​യി​ട്ടില്ല” എന്ന്‌ നാഷണൽ ജിയോ​ഗ്ര​ഫിക്‌ പ്രസ്‌താ​വി​ക്കു​ന്നു. വാണി​ജ്യ​വാ​ത​ങ്ങ​ളു​ടെ ശക്തി കുറയു​ന്ന​തോ​ടെ ഇന്തൊ​നീ​ഷ്യ​ക്കു സമീപം സംഭരി​ക്ക​പ്പെ​ട്ടി​രി​ക്കുന്ന ഉഷ്‌ണ​ജലം വീണ്ടും കിഴ​ക്കോട്ട്‌ ഒഴുകു​ന്നു. തത്‌ഫ​ല​മാ​യി, പെറു​വി​ലും മറ്റു കിഴക്കൻ പ്രദേ​ശ​ങ്ങ​ളി​ലും സമു​ദ്രോ​പ​രി​തല താപനില ഉയരുന്നു. ഈ വ്യതി​യാ​നം അന്തരീ​ക്ഷ​സ്ഥി​തി​യിൽ കാര്യ​മായ മാറ്റം വരുത്തു​ന്നു. “കിഴക്കൻ ഉഷ്‌ണ​മേ​ഖലാ പസിഫി​ക്കിൽ താപനി​ല​യി​ലു​ണ്ടാ​കുന്ന വർധനവ്‌ വാക്കർ സംവഹന വലയത്തെ ക്ഷയിപ്പി​ക്കു​ക​യും കനത്ത  വർഷപാ​ത​മു​ണ്ടാ​കുന്ന സംവഹന മേഖല കിഴ​ക്കോ​ട്ടു നീങ്ങാൻ ഇടവരു​ത്തു​ക​യും ചെയ്യുന്നു. അത്‌ ഉഷ്‌ണ​മേ​ഖലാ പസിഫി​ക്കി​ന്റെ പടിഞ്ഞാ​റു നിന്നു മധ്യഭാ​ഗ​ത്തോ​ട്ടും കിഴ​ക്കോ​ട്ടും നീങ്ങുന്നു” എന്ന്‌ ഒരു പരാമർശ​ഗ്രന്ഥം പറയുന്നു. അങ്ങനെ, ഭൂമധ്യ​രേ​ഖ​യോട്‌ അടുത്ത പസിഫിക്ക്‌ മേഖല​യി​ലെ​ല്ലാം ഗണ്യമായ അന്തരീക്ഷ വ്യതി​യാ​നങ്ങൾ സംഭവി​ക്കു​ന്നു.

അരുവി​യി​ലെ ഉരുളൻ പാറ പോലെ

ഉഷ്‌ണ​മേ​ഖലാ പസിഫി​ക്കി​ലെ ജലപ്ര​വാ​ഹ​ത്തിൽ നിന്നു ബഹുദൂ​ര​ത്തിൽ സ്ഥിതി​ചെ​യ്യുന്ന പ്രദേ​ശ​ങ്ങ​ളി​ലെ കാലാ​വ​സ്ഥയെ തകിടം മറിക്കാ​നും എൽ നിന്യോ​യ്‌ക്കു കഴിയും. എങ്ങനെ? അന്തരീക്ഷ സംവഹ​ന​വ്യ​വ​സ്ഥയെ ഒരു മാധ്യ​മ​മാ​യി ഉപയോ​ഗി​ച്ചു​കൊണ്ട്‌. അന്തരീക്ഷ സംവഹ​ന​വ്യ​വ​സ്ഥ​യിൽ ഉണ്ടാകുന്ന പ്രാ​ദേ​ശിക പ്രക്ഷു​ബ്‌ധ​ത​യു​ടെ ദൂരവ്യാ​പക ഫലങ്ങളെ, ഒരു അരുവി​യു​ടെ മധ്യത്തി​ലുള്ള ഉരുളൻ പാറ അരുവി​യി​ലു​ട​നീ​ളം ഓളങ്ങൾ സൃഷ്ടി​ക്കു​ന്ന​തി​നോ​ടു താരത​മ്യ​പ്പെ​ടു​ത്താ​വു​ന്ന​താണ്‌. ഉഷ്‌ണ​മേ​ഖ​ല​യി​ലെ ചൂടു​പി​ടിച്ച സമു​ദ്ര​ത്തി​നു മുകളിൽ ഉയർന്നു നിൽക്കുന്ന കനത്ത മേഘപാ​ളി​കൾ, ഒരു ഉരുളൻ പാറ​പോ​ലെ അന്തരീ​ക്ഷ​ത്തിൽ വിഘ്‌നം സൃഷ്ടി​ക്കു​ന്നു. അത്‌ ആയിര​ക്ക​ണ​ക്കി​നു കിലോ​മീ​റ്റർ അകലെ വരെ അന്തരീക്ഷ സ്ഥിതിയെ ബാധി​ക്കു​ന്നു.

ഉയർന്ന അക്ഷാം​ശ​ങ്ങ​ളിൽ എൽ നിന്യോ, ‘ജെറ്റ്‌ നീരൊ​ഴു​ക്കു​കൾ’ എന്നറി​യ​പ്പെ​ടുന്ന കിഴ​ക്കോ​ട്ടുള്ള ജലപ്ര​വാ​ഹ​ത്തിന്‌ ആക്കംകൂ​ട്ടു​ക​യും അതിനു ഗതി​ഭ്രം​ശം വരുത്തു​ക​യും ചെയ്യുന്നു. ഈ അക്ഷാം​ശ​ങ്ങ​ളിൽ വെച്ച്‌ ജെറ്റ്‌ നീരൊ​ഴു​ക്കു​കൾ മിക്ക കൊടു​ങ്കാ​റ്റു​ക​ളു​ടെ​യും ഗതി തിരി​ച്ചു​വി​ടു​ന്നു. ജെറ്റ്‌ നീരൊ​ഴു​ക്കു​ക​ളു​ടെ ഗതി​വേ​ഗ​ത്തി​ന്റെ​യും ഗതി​ഭ്രം​ശ​ത്തി​ന്റെ​യും ഫലമായി കാലാ​വസ്ഥാ വ്യതി​യാ​നങ്ങൾ രൂക്ഷമാ​കു​ക​യോ മിതമാ​കു​ക​യോ ചെയ്യുന്നു. ഉദാഹ​ര​ണ​ത്തിന്‌, എൽ നിന്യോ​യു​ടെ ഫലമായി ഐക്യ​നാ​ടു​ക​ളു​ടെ ചില വടക്കൻ ഭാഗങ്ങ​ളിൽ പതിവി​ലും മിതമായ ശൈത്യ​മാണ്‌ ഉണ്ടാകുക. അതേസ​മയം, അതിന്റെ ഫലമായി ഐക്യ​നാ​ടു​ക​ളു​ടെ ചില ദക്ഷിണ ഭാഗങ്ങ​ളിൽ ശൈത്യ​കാ​ലത്തു കൊടിയ തണുപ്പി​നൊ​പ്പം മഴയും ഉണ്ടാകു​ന്നു.

എത്ര​ത്തോ​ളം പ്രവചി​ക്കാ​നാ​കും?

ഒരു കൊടു​ങ്കാറ്റ്‌ ഉണ്ടാകു​ന്ന​തിന്‌ ഏതാനും ദിവസ​ങ്ങൾക്കു മുമ്പു മാത്രമേ അതിന്റെ രൂക്ഷതയെ കുറിച്ച്‌ മുൻകൂ​ട്ടി പറയാ​നാ​കൂ. എൽ നിന്യോ​യു​ടെ കാര്യ​ത്തി​ലും അത്‌ അങ്ങനെ​യാ​ണോ? അല്ല. അതിന്റെ കാര്യ​ത്തിൽ, താത്‌കാ​ലിക കാലാ​വസ്ഥാ വ്യതി​യാ​ന​ങ്ങൾക്കു പകരം പല പ്രദേ​ശ​ങ്ങ​ളി​ലും മാസങ്ങ​ളോ​ളം അസാധാ​രണ കാലാ​വസ്ഥാ വ്യതി​യാ​നങ്ങൾ ഉണ്ടായി​ക്കൊ​ണ്ടി​രി​ക്കും. എൽ നിന്യോ​യെ കുറിച്ചു പ്രവചി​ക്കു​ന്ന​തിൽ കാലാ​വസ്ഥാ ഗവേഷകർ ഒരു പരിധി​വരെ വിജയി​ച്ചി​ട്ടുണ്ട്‌.

ദൃഷ്ടാ​ന്ത​ത്തിന്‌, 1997-98-ലെ എൽ നിന്യോ​യെ കുറിച്ച്‌ അത്‌ ഉണ്ടാകു​ന്ന​തിന്‌ ഏതാണ്ട്‌ ആറുമാ​സം മുമ്പ്‌, 1997 മേയിൽ, മുന്നറി​യി​പ്പു നൽക​പ്പെട്ടു. ഇപ്പോൾ ഉഷ്‌ണ​മേ​ഖലാ പസിഫി​ക്കി​ലു​ട​നീ​ളം, ഉപരി​ത​ല​ത്തി​ലെ കാറ്റിന്റെ തീവ്ര​ത​യും 500 മീറ്റർ താഴെ സമുദ്ര താപനി​ല​യും അളക്കാ​നാ​യി 70 ബോയാ​കൾ (buoys) സ്ഥാപി​ക്ക​പ്പെ​ട്ടി​ട്ടുണ്ട്‌. അങ്ങനെ ലഭിക്കുന്ന വിവരങ്ങൾ കമ്പ്യൂട്ടർ ഡേറ്റയി​ലേക്ക്‌ ചേർക്കു​ന്നു, അത്‌ ഉപയോ​ഗിച്ച്‌ പിന്നീട്‌ കാലാ​വസ്ഥാ വ്യതി​യാ​ന​ങ്ങളെ കുറിച്ചു മുന്നറി​യി​പ്പു നൽകാൻ സാധി​ക്കു​ന്നു.

എൽ നിന്യോ​യെ കുറിച്ചു മുന്നറി​യി​പ്പു​കൾ ലഭിക്കു​ന്നത്‌, അതിന്റെ പ്രത്യാ​ഘാ​ത​ങ്ങളെ നേരി​ടു​ന്ന​തി​നു തയ്യാ​റെ​ടു​പ്പു​കൾ നടത്താൻ ആളുകളെ സഹായി​ക്കും. ദൃഷ്ടാ​ന്ത​ത്തിന്‌, 1983 മുതൽ പെറു​വിൽ എൽ നിന്യോ​യെ കുറി​ച്ചുള്ള മുന്നറി​യി​പ്പു​കൾ നൽകി​യി​രു​ന്ന​തി​ന്റെ ഫലമായി കാലാ​വ​സ്ഥ​യ്‌ക്കു യോജി​ച്ച​വണ്ണം കൃഷി ഇറക്കാൻ പല കർഷകർക്കും കഴിഞ്ഞു. മീൻ പിടി​ക്കാൻ പോകു​ന്ന​തി​നു പകരം മുക്കു​വ​ന്മാർ, ഉഷ്‌ണ​ജ​ല​ത്തോ​ടൊ​പ്പം എത്തി​ച്ചേർന്ന ചെമ്മീ​നു​കൾ പിടിച്ച്‌ കൃഷി നടത്തി​യി​രി​ക്കു​ന്നു. അതേ, കൃത്യ​മായ പ്രവച​ന​വും മുൻകൂ​ട്ടി​യുള്ള തയ്യാ​റെ​ടു​പ്പും കൊണ്ട്‌ എൽ നിന്യോ​യു​ടെ ഫലമായി ഉണ്ടാകുന്ന മരണസം​ഖ്യ​യും സാമ്പത്തിക നഷ്ടവും കുറയ്‌ക്കാൻ സാധി​ക്കും.

ഭൗമാ​ന്ത​രീ​ക്ഷ​ത്തെ നിയ​ന്ത്രി​ക്കുന്ന പ്രക്രി​യ​കളെ കുറി​ച്ചുള്ള ശാസ്‌ത്രീയ ഗവേഷണം, ഏകദേശം 3,000 വർഷം മുമ്പു ശലോ​മോൻ രാജാവ്‌ രേഖ​പ്പെ​ടു​ത്തിയ നിശ്വസ്‌ത വചനങ്ങ​ളു​ടെ കൃത്യ​തയെ സാക്ഷ്യ​പ്പെ​ടു​ത്തു​ന്നു. അവൻ ഇങ്ങനെ എഴുതി: “കാററു തെക്കോ​ട്ടു ചെന്നു വടക്കോ​ട്ടു ചുററി​വ​രു​ന്നു; അങ്ങനെ കാററു ചുററി​ച്ചു​ററി തിരി​ഞ്ഞു​കൊ​ണ്ടു പരിവർത്തനം ചെയ്യുന്നു.” (സഭാ​പ്ര​സം​ഗി 1:6) ആധുനിക മനുഷ്യൻ കാറ്റിന്റെ ഗതി​യെ​യും സമു​ദ്ര​ജ​ല​പ്ര​വാ​ഹ​ങ്ങ​ളെ​യും കുറിച്ചു പഠിച്ചു​കൊണ്ട്‌ കാലാ​വസ്ഥാ വ്യതി​യാ​ന​ങ്ങ​ളു​മാ​യി ബന്ധപ്പെട്ട്‌ വളരെ​യ​ധി​കം കാര്യങ്ങൾ മനസ്സി​ലാ​ക്കി​യി​രി​ക്കു​ന്നു. എൽ നിന്യോ പോലത്തെ പ്രതി​ഭാ​സ​ങ്ങളെ കുറി​ച്ചുള്ള മുന്നറി​യി​പ്പു​കൾക്കു ചെവി കൊടു​ത്തു​കൊണ്ട്‌ അത്തരം വിവര​ങ്ങ​ളിൽ നിന്നു നമുക്കു പ്രയോ​ജനം നേടാം.

[അടിക്കു​റി​പ്പു​കൾ]

[27-ാം പേജിലെ ചതുരം]

എൽ നിന്യോ​യു​ടെ സംഹാര യാത്ര

■ 1525: പെറു​വിൽ എൽ നിന്യോ ഉണ്ടായ​തി​ന്റെ ആദ്യത്തെ ചരിത്ര രേഖ.

■ 1789-93: എൽ നിന്യോ ഇന്ത്യയിൽ 6,00,000-ത്തിലധി​കം പേരുടെ ജീവൻ അപഹരി​ച്ചു, ആഫ്രി​ക്ക​യു​ടെ തെക്കു​ഭാ​ഗത്തു കൊടിയ ക്ഷാമത്തി​നും ഇടവരു​ത്തി.

■ 1982-83: 2,000 പേരെ കൊ​ന്നൊ​ടു​ക്കിയ എൽ നിന്യോ 1,300 കോടി ഡോള​റി​ന്റെ നാശന​ഷ്ടങ്ങൾ വരുത്തി. കൂടു​ത​ലും ഉഷ്‌ണ​മേ​ഖലാ പ്രദേ​ശ​ങ്ങ​ളാണ്‌ അതിന്റെ പിടി​യി​ല​മർന്നത്‌.

■ 1990-95: മൂന്നു സംഭവങ്ങൾ ഒന്നിനു പുറകെ ഒന്നായി നടന്ന​പ്പോൾ അത്‌, രേഖ​പ്പെ​ടു​ത്ത​പ്പെ​ട്ടി​ട്ടു​ള്ള​തി​ലേ​ക്കും ഏറ്റവും ദീർഘിച്ച എൽ നിന്യോ ആയിത്തീർന്നു.

■ 1997-98: എൽ നിന്യോ​യു​ടെ ഫലമായ വെള്ള​പ്പൊ​ക്ക​ത്തെ​യും വരൾച്ച​യെ​യും കുറിച്ച്‌ ആദ്യമാ​യി വിജയ​പ്ര​ദ​മായ മുന്നറി​യി​പ്പു​കൾ നൽക​പ്പെ​ട്ടി​ട്ടും ലോക​മെ​മ്പാ​ടു​മാ​യി 2,100 പേർ മരണ​പ്പെട്ടു, 3,300 കോടി ഡോള​റി​ന്റെ നാശന​ഷ്ട​ങ്ങ​ളും ഉണ്ടായി.

[24, 25 പേജു​ക​ളി​ലെ രേഖാ​ചി​ത്രം/ഭൂപടം]

(പൂർണ​രൂ​പ​ത്തിൽ കാണു​ന്ന​തിന്‌ പ്രസി​ദ്ധീ​ക​രണം നോക്കുക)

 സാധാ​ര​ണ​മാ​യു​ള്ള

വാക്കർ സംവഹന മാതൃക

ശക്തമായ വാണി​ജ്യ​വാ​ത​ങ്ങൾ

ചൂടുള്ള സമു​ദ്ര​ജ​ലം

തണുത്ത സമു​ദ്ര​ജ​ലം

[24, 25 പേജു​ക​ളി​ലെ രേഖാ​ചി​ത്രം/ഭൂപടം]

(പൂർണ​രൂ​പ​ത്തിൽ കാണു​ന്ന​തിന്‌ പ്രസി​ദ്ധീ​ക​രണം നോക്കുക)

എൽ നിന്യോ

ജെറ്റ്‌ നീരൊ​ഴു​ക്കി​ന്റെ ഗതി​ഭ്രം​ശം

ദുർബലമായ വാണി​ജ്യ​വാ​ത​ങ്ങൾ

ഉഷ്‌ണജലം കിഴ​ക്കോട്ട്‌ ഒഴുകു​ന്നു

പതിവിലും ചൂടു​ള്ളത്‌ അല്ലെങ്കിൽ ഈർപ്പ​ര​ഹി​തം

സാധാരണയിലും തണുപ്പു​ള്ളത്‌ അല്ലെങ്കിൽ ഈർപ്പ​മു​ള്ളത്‌

[26-ാം പേജിലെ രേഖാ​ചി​ത്രം/ചിത്രങ്ങൾ]

(പൂർണ​രൂ​പ​ത്തിൽ കാണു​ന്ന​തിന്‌ പ്രസി​ദ്ധീ​ക​രണം നോക്കുക)

എൽ നിന്യോ

മുകളിൽ കൊടു​ത്തി​രി​ക്കുന്ന ഗ്ലോബി​ലെ ചെമന്ന നിറങ്ങൾ സാധാ​ര​ണ​യി​ലും കൂടിയ ജലോ​ഷ്‌മാ​വി​നെ സൂചി​പ്പി​ക്കു​ന്നു

സാധാരണമായുള്ളത്‌

ഉഷ്‌ണ​ജലം പടിഞ്ഞാ​റൻ പസിഫി​ക്കിൽ സംഭരി​ക്ക​പ്പെ​ടു​ന്നു. തന്നിമി​ത്തം കിഴക്കൻ പസിഫി​ക്കിൽ പോഷക സമൃദ്ധ​മായ തണുത്ത വെള്ളം ഉപരി​ത​ല​ത്തി​ലേക്ക്‌ ഉയരുന്നു

എൽ നിന്യോ

ദുർബല വാണി​ജ്യ​വാ​തങ്ങൾ ഉഷ്‌ണ​ജലം തിരിച്ച്‌ കിഴ​ക്കോ​ട്ടു പ്രവഹി​ക്കാൻ ഇടവരു​ത്തു​ന്ന​തി​നാൽ തണുത്ത വെള്ളം ഉപരി​ത​ല​ത്തി​ലേക്ക്‌ ഉയരു​ന്നതു തടയുന്നു

[24, 25 പേജു​ക​ളി​ലെ ചിത്രങ്ങൾ]

പെറു വെള്ള​പ്പൊ​ക്ക​ത്തി​നി​ര​യായ സെക്കൂരാ മണലാ​ര​ണ്യം

മെക്‌സിക്കോ ലിൻഡ ചുഴലി​ക്കൊ​ടു​ങ്കാറ്റ്‌

കാലിഫോർണിയ മണ്ണിടി​ച്ചിൽ

[കടപ്പാട്‌]

24-5 പേജു​ക​ളി​ലെ ചിത്രങ്ങൾ, ഇടത്തു​നിന്ന്‌ വലത്തോട്ട്‌: Fotografía por Beatrice Velarde; Image produced by Laboratory for Atmospheres, NASA Goddard Space Flight Center; FEMA photo by Dave Gatley