ലോകത്തെ വീക്ഷിക്കൽ

യൂറോ​പ്പി​ലെ ചെങ്കര​ടി​കൾ വംശനാ​ശ​ത്തി​ന്റെ വക്കിലോ?

ആഗോള പ്രകൃതി സംരക്ഷണ നിധി റിപ്പോർട്ടു ചെയ്യു​ന്ന​ത​നു​സ​രിച്ച്‌, പശ്ചിമ യൂറോ​പ്പി​ലെ ചെങ്കര​ടി​കൾ വംശനാ​ശ​ത്തി​ന്റെ വക്കിലാണ്‌. അവയുടെ എണ്ണം വെറും ആറ്‌ ആയി കുറഞ്ഞി​രി​ക്കു​ന്നു. “ഫ്രാൻസ്‌, സ്‌പെ​യിൻ, ഇറ്റലി എന്നിവി​ട​ങ്ങ​ളി​ലെ ചെങ്കര​ടി​ക​ളാണ്‌ ഏറ്റവു​മ​ധി​കം വംശ ഭീഷണി​യെ നേരി​ടു​ന്നത്‌. മറ്റ്‌ എവിടെ നിന്നെ​ങ്കി​ലും കൂടുതൽ കരടി​കളെ കൊണ്ടു​വ​രാ​ത്ത​പക്ഷം അവ നാമാ​വ​ശേ​ഷ​മാ​കും എന്ന്‌ പ്രകൃതി സംരക്ഷണ വാദികൾ മുന്നറി​യി​പ്പു നൽകുന്ന”തായി ലണ്ടനിലെ ദ ഡെയ്‌ലി ടെലി​ഗ്രാഫ്‌ പ്രസ്‌താ​വി​ക്കു​ന്നു. “ഇറ്റലി​യി​ലെ ദക്ഷിണ ആൽപ്‌സിൽ വെറും നാലു കരടി​കളേ ഉള്ളൂ” എന്ന്‌ ആ വർത്തമാ​ന​പ​ത്രം കൂട്ടി​ച്ചേർക്കു​ന്നു. ഗ്രീസിൽ, ഈ കരടികൾ ആടുമാ​ടു​കളെ പിടി​ക്കു​ക​യും തേനീ​ച്ച​ക്കൂ​ടു​കൾ നശിപ്പി​ക്കു​ക​യും ചെയ്യു​ന്നതു നിമിത്തം രോഷാ​കു​ല​രായ കർഷക​രും തേനീ​ച്ച​വ​ളർത്തു​കാ​രും അവയെ നിയമ​വി​രു​ദ്ധ​മാ​യി വേട്ടയാ​ടു​ന്നു. നേരെ മറിച്ച്‌, പൂർവ യൂറോ​പ്പി​ലെ ചിലയി​ട​ങ്ങ​ളിൽ കരടി​ക​ളു​ടെ എണ്ണം പെരു​കു​ന്ന​താ​യി റിപ്പോർട്ടു ചെയ്യ​പ്പെ​ടു​ന്നു. റൊ​മേ​നി​യ​യി​ലെ കർശന​മായ സംരക്ഷണ നടപടി​ക​ളും കരടി​ക​ളു​ടെ എണ്ണം വർധി​പ്പി​ക്കാ​നുള്ള പദ്ധതി​ക​ളും അവ പെരു​കാൻ ഇടയാ​ക്കി​യി​രി​ക്കു​ന്നു. കരടി​കൾക്കു സംരക്ഷണം നൽകുന്ന റഷ്യയിൽ അവയുടെ എണ്ണം ഏകദേശം 36,000 ആയിരി​ക്കു​ന്നു. “പശ്ചിമ യൂറോ​പ്പിൽ അവശേ​ഷി​ച്ചി​രി​ക്കുന്ന ഏതാനും കരടി​കളെ രക്ഷിക്കു​ന്ന​തിന്‌ അടിയ​ന്തിര നടപടി​കൾ സ്വീക​രി​ക്കു​ന്നതു മർമ​പ്ര​ധാ​ന​മാണ്‌” എന്ന്‌ യൂറോ​പ്പി​ലെ മാംസ​ഭു​ക്കു​ക​ളായ ജന്തുക്കൾക്കു വേണ്ടി​യുള്ള ആഗോള പ്രകൃതി സംരക്ഷണ നിധി​യു​ടെ പ്രചാരണ പരിപാ​ടി​ക്കു നേതൃ​ത്വം വഹിക്കുന്ന കല്ലം റാങ്കിൻ അഭി​പ്രാ​യ​പ്പെ​ടു​ന്നു. “ഉചിത​മായ നടപടി സ്വീക​രി​ക്കാ​ത്ത​പക്ഷം ഈ കരടികൾ നാമാ​വ​ശേ​ഷ​മാ​കും.”

ചെല​വേ​റിയ ദാനധർമം

ദാനം ചെയ്യപ്പെട്ട മരുന്നു​കൾ, അപകട​സ​ന്ധി​യിൽ ആയിരു​ന്നി​ട്ടുള്ള കോടി​ക്ക​ണ​ക്കിന്‌ ആളുകൾക്കു പ്രയോ​ജനം ചെയ്‌തി​ട്ടുണ്ട്‌. എന്നുവ​രി​കി​ലും, ഈയിടെ ലോകാ​രോ​ഗ്യ സംഘടന നടത്തിയ ഒരു സർവേ അനുസ​രിച്ച്‌, ദാനം ചെയ്യ​പ്പെ​ടുന്ന മരുന്നു​കൾ മിക്ക​പ്പോ​ഴും തിരി​ച്ച​റി​യി​ക്കൽ ലേബലു​കൾ ഇല്ലാത്ത​വ​യോ കാലാ​വധി കഴിഞ്ഞ​വ​യോ ആണ്‌. മരുന്നു​കൾ അയയ്‌ക്കു​ന്നതു സദു​ദ്ദേ​ശ്യ​ത്തോ​ടെ ആണെങ്കി​ലും മിക്ക മരുന്നു​ക​ളും “സത്വര ചികിത്സ ആവശ്യ​മാ​യി​രി​ക്കുന്ന ആരോഗ്യ പ്രശ്‌നം പരിഹ​രി​ക്കാൻ അപര്യാ​പ്‌ത​മാണ്‌. ഒരു രാജ്യത്ത്‌ എത്തിക്ക​ഴി​ഞ്ഞാൽ അവ, അവിടെ അതി​നോ​ടകം തന്നെ കുന്നു​കൂ​ടി​ക്കി​ട​ക്കുന്ന മരുന്നു​ക​ളു​ടെ വിതര​ണത്തെ തടസ്സ​പ്പെ​ടു​ത്തു​ന്നു” എന്ന്‌ ലോകാ​രോ​ഗ്യ സംഘട​ന​യി​ലെ ഒരു ഉദ്യോ​ഗ​സ്ഥ​നായ ഡോ. ജോനഥൻ ക്വിക്ക്‌ പറയുന്നു. ബോസ്‌നി​യ​യി​ലേക്കു കയറ്റി അയച്ച മരുന്നി​ന്റെ പകുതി​യി​ല​ധി​ക​വും വാസ്‌ത​വ​ത്തിൽ രോഗി​കൾക്കു വേണ്ടി​യി​രുന്ന മരുന്നു​കൾ ആയിരു​ന്നില്ല. ആ മരുന്നു​കൾ നശിപ്പി​ച്ചു കളയാൻ ഒരു പ്രത്യേക സംഘ​ത്തെ​തന്നെ അർമേ​നിയ, മോസ്റ്റാർ, ബോസ്‌നിയ-ഹെർസെ​ഗോ​വിന എന്നിവി​ട​ങ്ങ​ളി​ലേക്ക്‌ ലോകാ​രോ​ഗ്യ സംഘട​ന​യ്‌ക്ക്‌ അയയ്‌ക്കേ​ണ്ടി​വന്നു. ക്രൊ​യേ​ഷ്യ​യി​ലുള്ള, ഉപയോ​ഗ​പ്ര​ദ​മ​ല്ലാത്ത അത്തരം 1,000 ടൺ മരുന്നു​കൾ നശിപ്പി​ച്ചു കളയേ​ണ്ട​തി​നാ​യി അവിടെ നിന്നു കയറ്റി അയയ്‌ക്കു​ന്ന​തിന്‌ ഏകദേശം 20 മുതൽ 40 വരെ ലക്ഷം ഡോളർ ചെലവു വരു​മെന്നു കണക്കാ​ക്ക​പ്പെ​ടു​ന്നു.

വശീകരണ നാദം

മിക്ക ചെടി​ക​ളും നിറമോ ഗന്ധമോ ഉപയോ​ഗിച്ച്‌ പരാഗി​കളെ വശീക​രി​ക്കു​മ്പോൾ ഉഷ്‌ണ​മേ​ഖലാ പ്രദേ​ശത്തെ മുക്കുന ഹൊൾട്ടോ​ണി ആ കൃത്യം നിർവ​ഹി​ക്കു​ന്ന​തി​നാ​യി ശബ്ദ പ്രതി​ഫ​ല​നത്തെ ആശ്രയി​ക്കു​ന്നു​വെന്ന്‌ ജർമൻ മാസി​ക​യായ ഡാസ്‌ ടിർ റിപ്പോർട്ടു ചെയ്യുന്നു. ഈ വള്ളി​ച്ചെ​ടി​യിൽ വന്നെത്തുന്ന വവ്വാലു​കൾ അൾട്രാ​സൗണ്ട്‌ സംജ്ഞകൾ പുറ​പ്പെ​ടു​വി​ച്ചു​കൊ​ണ്ടു തങ്ങളുടെ സാന്നി​ധ്യം ചെടിയെ അറിയി​ക്കു​ന്നു. ആ ചെടി​യു​ടെ പൂന്തേൻ ഒരു ശബ്ദ പ്രതി​ഫ​ല​നി​യാ​യി വർത്തി​ക്കു​ന്ന​താ​യി എർലാങ്കൻ യൂണി​വേ​ഴ്‌സി​റ്റി​യി​ലെ ശാസ്‌ത്ര​ജ്ഞ​ന്മാർ കണ്ടെത്തി. “ഈ വിധത്തിൽ പ്രസ്‌തുത ചെടി, അതിന്റെ പൂക്കൾ കണ്ടെത്താൻ വവ്വാലു​കളെ സഹായി​ക്കു​ന്നു” എന്ന്‌ ആ മാസിക പറയുന്നു.

കൂൺ വരുത്തുന്ന അപകടങ്ങൾ

“കൂണുകൾ പറി​ച്ചെ​ടു​ക്കു​ന്നത്‌ ഒരു പരമ്പരാ​ഗത രീതി​യാ​യി​രി​ക്കുന്ന പൂർവ ഇറ്റലി​യിൽ വർഷം തോറും നിരവധി ആളുകൾ മരിക്കു​ക​യും അനേകർക്കു വിഷബാധ ഏൽക്കു​ക​യും ചെയ്യുന്നു” എന്ന്‌ ലണ്ടനിലെ ദ ടൈംസ്‌ റിപ്പോർട്ടു ചെയ്യുന്നു. കാട്ടു​കൂൺ കൊണ്ടുള്ള വിഭവ​ങ്ങൾക്കു പ്രചാരം വർധി​ച്ചി​രി​ക്കു​ന്നു. അതു കണക്കി​ലെ​ടു​ത്തു​കൊണ്ട്‌ ബ്രിട്ടന്റെ ഗ്രാമ​പ്ര​ദേ​ശത്തു വളരുന്ന ഏതാണ്ട്‌ 250 ഇനം കൂണുകൾ വിഷക്കൂ​ണു​ക​ളാ​ണെന്നു വിദഗ്‌ധർ മുന്നറി​യി​പ്പു നൽകുന്നു. ഡെത്ത്‌ ക്യാപ്‌, ഡിസ്‌​ട്രോ​യിങ്‌ എയ്‌ഞ്ചൽ എന്നീ കൂണുകൾ ഭക്ഷിക്കു​ന്നതു മരണത്തിന്‌ ഇടയാ​ക്കി​യേ​ക്കാം. അപകടം ഒഴിവാ​ക്കാൻ, കൂൺ പറിക്കു​ന്ന​തിൽ വൈദ​ഗ്‌ധ്യ​മു​ള്ള​വ​രോ​ടൊ​പ്പം അതു ചെയ്യാൻ ആളുകൾ പ്രോ​ത്സാ​ഹി​പ്പി​ക്ക​പ്പെ​ടു​ന്നു. “ഒരു [കൂൺ] വിഷക്കൂ​ണാ​ണോ അല്ലയോ എന്നു തീരു​മാ​നി​ക്കാൻ ലളിത​മായ വിദ്യ​ക​ളൊ​ന്നു​മില്ല. അതിനാൽ, വിദഗ്‌ധ സഹായ​മി​ല്ലാ​തെ തനിയെ കൂൺ പറിക്കാൻ പോകു​ന്നതു ബുദ്ധി​മോ​ശ​മാ​യി​രി​ക്കും” എന്ന്‌ ബ്രിട്ടീഷ്‌ മൈക്ക​ളോ​ജി​ക്കൽ സൊ​സൈ​റ്റി​യി​ലെ ഒരു മുതിർന്ന അംഗം മുന്നറി​യി​പ്പു നൽകുന്നു.

എയ്‌ഡ്‌സി​ന്റെ സാമ്പത്തിക പ്രഹരം

ആഫ്രി​ക്ക​യിൽ എയ്‌ഡ്‌സ്‌ ഒരു ആരോഗ്യ വിപത്താ​യി മാത്രമല്ല, സാമ്പത്തിക മഹാവി​പ​ത്താ​യും പരിണ​മി​ച്ചു വരുക​യാണ്‌ എന്ന്‌ ല മോൺട്‌ റിപ്പോർട്ടു ചെയ്യുന്നു. അവിടെ 2.3 കോടി ആളുകൾക്ക്‌ എയ്‌ഡ്‌സ്‌ വൈറസ്‌ ബാധി​ച്ചി​രി​ക്കു​ന്നു. കൂടാതെ, ഓരോ വർഷവും 20 ലക്ഷം പേർ അതു നിമിത്തം മരിക്കു​ന്നു. ആ സ്ഥിതിക്ക്‌ “എയ്‌ഡ്‌സ്‌ മഹാമാ​രി താമസി​യാ​തെ ആഫ്രി​ക്ക​യി​ലെ വികസന ഫലങ്ങളെ അസാധു​വാ​ക്കും.” ആഫ്രിക്കൻ കമ്പനികൾ പലതും പ്രതി​സ​ന്ധി​യി​ലാണ്‌. കാരണം, പ്രസ്‌തുത രോഗം നിമിത്തം അവിടത്തെ പല ജോലി​ക്കാ​രും മരണമ​ട​ഞ്ഞി​രി​ക്കു​ന്നു അല്ലെങ്കിൽ കിടപ്പി​ലാണ്‌. ഒരു ദേശീയ റയിൽവേ കമ്പനിക്ക്‌ 10 ശതമാനം ജോലി​ക്കാ​രെ നഷ്ടമായി. 11,500 ജോലി​ക്കാ​രുള്ള മറ്റൊരു വലിയ കമ്പനി​യിൽ 3,400 പേർ എയ്‌ഡ്‌സ്‌ ബാധി​ത​രാണ്‌. കർഷകർ എയ്‌ഡ്‌സിന്‌ ഇരയാ​കു​ന്നതു നിമിത്തം കൃഷി അവതാ​ള​ത്തി​ലാ​കു​ന്നു. കുട്ടി​കളെ സ്‌കൂ​ളിൽ അയയ്‌ക്കാൻ മാതാ​പി​താ​ക്കൾക്കു പണമോ സമയമോ ഇല്ലാത്ത​തി​നാ​ലും നൂറു​ക​ണ​ക്കിന്‌ അധ്യാ​പകർ എയ്‌ഡ്‌സ്‌ ബാധിച്ച്‌ മരണമ​ട​ഞ്ഞ​തി​നാ​ലും വിദ്യാ​ഭ്യാ​സം താറു​മാ​റാ​കു​ന്നു, നിരക്ഷരത വർധി​ക്കു​ന്നു.

 ജ്യോ​തി​ശ്ശാ​സ്‌ത്രജ്ഞർ നിശ്ശബ്ദ​ത​യ്‌ക്കാ​യി കേഴുന്നു

ആദ്യ താരാ​പം​ക്തി​ക​ളു​ടെ​യും നക്ഷത്ര​ങ്ങ​ളു​ടെ​യും പിറവി​യെ​പ്പറ്റി അറിവു പകരുന്ന സൂചന​കൾക്കാ​യി കാതോർക്കുന്ന, റേഡി​യോ വികി​ര​ണ​ങ്ങളെ കുറിച്ചു പഠനം നടത്തുന്ന ജ്യോ​തി​ശ്ശാ​സ്‌ത്രജ്ഞർ “ആധുനിക സംസ്‌കാ​ര​ത്തി​ന്റെ സങ്കീർണ ഉപകര​ണങ്ങൾ” നിമിത്തം തികച്ചും ഭഗ്നാശ​രാണ്‌ എന്ന്‌ ഇന്റർനാ​ഷണൽ ഹെറാൾഡ്‌ ട്രിബ്യൂൺ റിപ്പോർട്ടു ചെയ്യുന്നു. ടെലി​വി​ഷൻ സ്റ്റേഷനു​കൾ, റേഡി​യോ ട്രാൻസ്‌മി​റ്റ​റു​കൾ, വാർത്താ​വി​നി​മയ ഉപഗ്ര​ഹങ്ങൾ, മൊ​ബൈൽ ഫോണു​കൾ എന്നിവ ആ ശാസ്‌ത്ര​ജ്ഞ​ന്മാർ കാതോർക്കുന്ന വികി​ര​ണ​ങ്ങളെ അടിച്ച​മർത്തു​ന്നു. തങ്ങളുടെ ഗവേഷണം മുന്നോ​ട്ടു കൊണ്ടു​പോ​കു​ന്ന​തി​നു വേണ്ടി ജ്യോ​തി​ശ്ശാ​സ്‌ത്രജ്ഞർ, “സകല വിധ റേഡി​യോ തരംഗ​ങ്ങ​ളു​ടെ പ്രക്ഷേ​പ​ണ​ങ്ങ​ളും നിരോ​ധി​ച്ചി​രി​ക്കുന്ന” ശാന്തമായ ഒരു ഇടം തേടു​ക​യാണ്‌. അവിടെ, നൂറു കണക്കിനു കിലോ​മീ​റ്റർ വ്യാപി​ച്ചു​കി​ട​ക്കുന്ന, “ഇന്ന്‌ ഉപയോ​ഗ​ത്തി​ലുള്ള ഉപകര​ണ​ങ്ങ​ളെ​ക്കാൾ 100 ഇരട്ടി ശക്തിയുള്ള” നിരവധി റേഡി​യോ ഡിഷ്‌ ആന്റിനകൾ ഘടിപ്പി​ക്കാൻ അവർ പദ്ധതി​യി​ടു​ക​യാണ്‌. അങ്ങനെ ലഭിക്കുന്ന വിവരങ്ങൾ സമയത്തി​ന്റെ​യും ബഹിരാ​കാ​ശ​ത്തി​ന്റെ​യും ദ്രവ്യ​ത്തി​ന്റെ​യും ഉത്ഭവം സംബന്ധിച്ച ചോദ്യ​ങ്ങൾക്ക്‌ ഉത്തരം കണ്ടെത്താൻ സഹായി​ക്കു​മെന്നു ശാസ്‌ത്ര​ജ്ഞ​ന്മാർ വിശ്വ​സി​ക്കു​ന്നു.

മെക്‌സി​ക്കോ നഗരത്തിൽ പക്ഷിസം​ഖ്യാ വിസ്‌ഫോ​ട​നം

മെക്‌സി​ക്കോ നഗരത്തിൽ പക്ഷിക​ളു​ടെ എണ്ണം നിയ​ന്ത്ര​ണാ​തീ​ത​മാ​യി പെരു​കു​ക​യാണ്‌. റിഫോർമാ എന്ന വർത്തമാ​ന​പ​ത്ര​ത്തിൽ റിപ്പോർട്ടു ചെയ്യപ്പെട്ട പ്രകാരം, 13,35,000-ത്തോളം പ്രാവു​കൾ ഇപ്പോൾ ആ വൻ നഗരത്തി​ലുണ്ട്‌. സ്‌മാ​ര​ക​ങ്ങ​ളും പ്രതി​മ​ക​ളു​മാണ്‌ അവയ്‌ക്ക്‌ ഇഷ്ടപ്പെട്ട വിശ്രമ സ്ഥാനങ്ങൾ. “തലസ്ഥാന നഗരി കയ്യടക്കി​യി​രി​ക്കുന്ന ഈ പക്ഷികൾ മൂന്നു ഘട്ടങ്ങളി​ലാ​യാണ്‌ അനുദിന യാത്രകൾ ക്രമീ​ക​രി​ച്ചി​രി​ക്കു​ന്നത്‌” എന്നു പക്ഷി നിയന്ത്രണ വിദഗ്‌ധർ അഭി​പ്രാ​യ​പ്പെ​ടു​ന്ന​താ​യി പ്രസ്‌തുത പത്രം റിപ്പോർട്ടു ചെയ്യുന്നു. “ചേക്കേ​റാൻ ഒരു സ്ഥലവും തീറ്റി​തേ​ടാൻ മറ്റൊരു സ്ഥലവും വിശ്ര​മി​ക്കാൻ വേറൊ​രു സ്ഥലവും അവ തിര​ഞ്ഞെ​ടു​ക്കു​ന്നു. എന്നാൽ, ഈ മൂന്നു സ്ഥലങ്ങളിൽ [ഓരോ​ന്നി​ലും] തങ്ങളുടെ സാന്നി​ധ്യം അറിയി​ക്കാൻ അവ കാഷ്‌ഠി​ച്ചി​ട്ടു പോകു​ന്നു.” ആ പ്രാവു​കൾ പല രോഗ​ങ്ങ​ളും വരുത്തി​വെ​ക്കു​ന്നു. ബാക്‌ടീ​രിയ, ഫംഗസ്‌ അലർജി​കൾക്കും വൈറസ്‌ ബാധയ്‌ക്കും അവ കാരണ​ക്കാ​രാണ്‌. ‘പരിസ്ഥി​തി സംരക്ഷ​ണ​ത്തി​നും നഗരത്തി​ലെ പ്രാവു​കളെ നിരു​പ​ദ്ര​വ​ക​ര​മാ​യി മാറ്റി​പ്പാർപ്പി​ക്കു​ന്ന​തി​നും വേണ്ടി​യുള്ള അന്താരാ​ഷ്‌ട്ര സംഘടന’ “പൊതു സ്ഥലങ്ങളിൽ വെച്ചു പ്രാവു​കൾക്കു തീറ്റി കൊടു​ക്കു​ന്ന​തി​നെ നിരോ​ധി​ക്കുന്ന ഒരു നിയമം രൂപീ​ക​രി​ക്കാൻ പദ്ധതി​യി​ടു​ന്നു.” എന്നാൽ, “ആ പക്ഷിക​ളു​ടെ എണ്ണം പെരു​കു​ന്നതു തടയാ​നുള്ള ഒരു നടപടി​യെന്ന നിലയിൽ അവയെ കൊല്ലുന്ന ഏതൊ​രാ​ളെ​യും ശിക്ഷി​ക്കാ​നുള്ള നിയമം” നിർമി​ക്കാ​നും അതു പദ്ധതി​യി​ടു​ന്നു.

‘പുണർന്നു കൊല്ലു​ന്നു’

“ലോക​ത്തി​ലേ​ക്കും വെച്ച്‌ ഏറ്റവും പഴയതും വലിയ​തു​മായ മരങ്ങളി​ലൊ​ന്നി​നെ ആളുകൾ പുണർന്നു കൊല്ലു​ക​യാണ്‌,” ദി ഓസ്‌​ട്രേ​ലി​യൻ വർത്തമാ​ന​പ​ത്രം റിപ്പോർട്ടു ചെയ്യുന്നു. ദിവസ​വും ആയിര​ക്ക​ണ​ക്കി​നു വിനോ​ദ​സ​ഞ്ചാ​രി​ക​ളാ​ണു ന്യൂസി​ലൻഡി​ലെ ഓക്‌ലൻഡി​നു വടക്കു സ്ഥിതി ചെയ്യുന്ന കൗരി മരത്തെ സന്ദർശി​ക്കാൻ എത്തി​ച്ചേ​രു​ന്നത്‌. ഒരു ചടങ്ങെ​ന്നോ​ണം ആ മരത്തെ പുണരുന്ന സന്ദർശകർ അതിന്റെ വേരുകൾ ചവിട്ടി​മെ​തി​ക്കു​ന്നു. “ലോക​ത്തി​ലേ​ക്കും വെച്ച്‌ ഏറ്റവും ഉയരമുള്ള മരം ഇതല്ല. എങ്കിലും, ഇതിന്‌ 160 അടി [50 മീറ്റർ] ഉയരമുണ്ട്‌,” ആ പത്രം പറയുന്നു. “എന്നിരു​ന്നാ​ലും, ഇത്‌ ഏറ്റവും കൂടുതൽ തടി പ്രദാനം ചെയ്യുന്ന മരങ്ങളിൽപ്പെ​ടും.” “വനത്തിലെ വൃദ്ധൻ” എന്ന്‌ അറിയ​പ്പെ​ടുന്ന ഈ മരത്തിന്‌ 2,000 വർഷം പഴക്കമു​ള്ള​താ​യാണ്‌ ഔദ്യോ​ഗിക കണക്കുകൾ പറയു​ന്ന​തെ​ങ്കി​ലും അതിലും ഇരട്ടി പഴക്കമു​ള്ള​താ​യി കണക്കാ​ക്ക​പ്പെ​ടു​ന്നു. വർഷങ്ങ​ളിൽ ഉടനീളം പ്രകൃതി വിപത്തു​ക​ളെ​യും, ക്ഷുദ്ര പ്രാണി​ക​ളു​ടെ ആക്രമ​ണ​ത്തെ​യും കോടാ​ലി​യെ​യും അതിജീ​വിച്ച ഈ മരത്തെ ഇപ്പോൾ ആളുകൾ പുണർന്നു കൊല്ലു​ക​യാണ്‌. അതേക്കു​റിച്ച്‌ ഒരു പ്രകൃതി സംരക്ഷണ ഉദ്യോ​ഗസ്ഥൻ ഇങ്ങനെ പറയുന്നു: “അതു മരണത്തി​ന്റെ പാതയി​ലാ​ണെന്നു തോന്നു​ന്നു; ചില​പ്പോൾ അല്ലെന്നും വരാം, നമു​ക്കൊ​ന്നും ഉറപ്പിച്ചു പറയാ​നാ​വില്ല.”

മുലയൂ​ട്ടൽ വണ്ണം കുറയ്‌ക്കു​ന്നു​വെ​ന്നോ?

മുലയൂ​ട്ട​ലി​ന്റെ മറ്റൊരു പ്രയോ​ജനം തങ്ങൾ കണ്ടുപി​ടി​ച്ചി​രി​ക്കു​ന്ന​താ​യി ഗവേഷകർ അവകാ​ശ​പ്പെ​ടു​ന്നു: പിൽക്കാ​ലത്തു കുട്ടിക്ക്‌ അമിത വണ്ണം ഉണ്ടാകാ​തി​രി​ക്കാൻ അതു സഹായി​ച്ചേ​ക്കാം. ഫോക്കസ്‌ എന്ന ജർമൻ വാർത്താ​പ​ത്രി​ക​യിൽ റിപ്പോർട്ടു ചെയ്യപ്പെട്ട പ്രകാരം, മ്യൂണിക്ക്‌ യൂണി​വേ​ഴ്‌സി​റ്റി​യി​ലെ ഒരു ഗവേഷക സംഘം അഞ്ചിനും ആറിനും ഇടയ്‌ക്കു പ്രായ​മുള്ള 9,357 കുട്ടി​ക​ളു​ടെ തൂക്കം പരി​ശോ​ധി​ച്ചു. അവരിൽ ഓരോ​രു​ത്തർക്കും ശൈശ​വ​ഘ​ട്ട​ത്തിൽ ഏതു തരം ഭക്ഷണമാ​ണു ലഭിച്ചി​രു​ന്നത്‌ എന്നും അന്വേ​ഷി​ച്ച​റി​ഞ്ഞു. മൂന്നു മുതൽ അഞ്ചു വരെ മാസക്കാ​ലം മുലപ്പാൽ കുടിച്ച കുട്ടി​കൾക്ക്‌ ഒരിക്ക​ലും മുലകു​ടി​ക്കാത്ത കുട്ടി​കളെ അപേക്ഷിച്ച്‌ സ്‌കൂൾ പ്രായ​മെ​ത്തു​മ്പോൾ അമിത​തൂ​ക്കം ഉണ്ടാകാ​നുള്ള സാധ്യത 35 ശതമാനം കുറവാ​യി​രു​ന്നു എന്ന്‌ ഗവേഷണ ഫലം കാണിച്ചു. കുട്ടി എത്രകാ​ലം മുലകു​ടി​ക്കു​ന്നു​വോ അമിത​വണ്ണം ഉണ്ടാകാ​നുള്ള സാധ്യ​ത​യും അതിന​നു​സ​രി​ച്ചു കുറവാ​യി​രി​ക്കും. അമ്മയുടെ മുലപ്പാ​ലിൽ അടങ്ങി​യി​രി​ക്കുന്ന, ഉപാപ​ച​യ​പ്ര​വർത്ത​നത്തെ സഹായി​ക്കുന്ന ഘടകങ്ങ​ളാണ്‌ അതിനു കാരണം എന്ന്‌ ഒരു ഗവേഷകൻ അഭി​പ്രാ​യ​പ്പെട്ടു.

കുട്ടികൾ എന്തുമാ​ത്രം വെള്ളം കുടി​ക്കണം?

ഒന്നിനും നാലി​നും ഇടയ്‌ക്കു പ്രായ​മുള്ള കുട്ടികൾ വളരെ കുറച്ചു വെള്ളമേ കുടി​ക്കു​ന്നു​ള്ളൂ. ജർമനി​യി​ലെ ഡോർട്ട്‌മുൺടി​ലുള്ള ‘ശിശു​പോ​ഷണ ഗവേഷണ സ്ഥാപനം’ നടത്തിയ ഒരു പഠനം അപ്രകാ​രം വെളി​പ്പെ​ടു​ത്തി​യ​താ​യി ഉപഭോ​ക്തൃ മാസി​ക​യായ ടെസ്റ്റ്‌ റിപ്പോർട്ടു ചെയ്‌തു. ഒന്നിനും നാലി​നും ഇടയ്‌ക്കു പ്രായ​മുള്ള കുട്ടി​കൾക്കു നിർജ​ലീ​ക​രണം സംഭവി​ക്കാൻ കൂടുതൽ സാധ്യ​ത​യുണ്ട്‌. തന്മൂലം, ഭക്ഷണത്തിൽ നിന്നു ലഭിക്കു​ന്ന​തി​നു പുറമേ അവർ ദിവസേന ഏകദേശം ഒരു ലിറ്റർ വെള്ളം കുടി​ക്കേ​ണ്ട​തുണ്ട്‌. സാധാ​ര​ണ​ഗ​തി​യിൽ അവർ അതിന്റെ മൂന്നി​ലൊ​ന്നു വെള്ളമേ കുടി​ക്കു​ന്നു​ള്ളൂ, അതും നിർബ​ന്ധി​ക്കു​ന്നതു കൊണ്ടു​മാ​ത്രം. എന്തെങ്കി​ലും കുടി​ക്കാ​നുള്ള 5 കുട്ടി​ക​ളിൽ ഒരാളു​ടെ വീതം ആഗ്രഹത്തെ മാതാ​പി​താ​ക്കൾ അവഗണി​ക്കുക ആയിരു​ന്നു എന്നു ഗവേഷകർ കണ്ടെത്തി. ഏറ്റവും നല്ല പാനീയം ഏതാണ്‌? ശുദ്ധമാ​യി​രി​ക്കു​ന്ന​പക്ഷം വെറും വെള്ളമാണ്‌ ഏറ്റവും ഉത്തമം എന്ന്‌ ടെസ്റ്റ്‌ പ്രസ്‌താ​വി​ക്കു​ന്നു.