മനുഷ്യാവകാശങ്ങളെക്കുറിച്ചു പഠിപ്പിക്കാനുള്ള ഒരു ഉപകരണം
മനുഷ്യാവകാശങ്ങളെക്കുറിച്ചു പഠിപ്പിക്കാനുള്ള ഒരു ഉപകരണം
സ്‌പെയിനിലെ ഗ്രനാഡയിൽ താമസിക്കുന്ന രൂറ്റ്‌ ഹിമേനേത്ത്‌ ഹിലാ എന്ന പതിനേഴുകാരിയോട്‌, മനുഷ്യാവകാശങ്ങളെക്കുറിച്ച്‌ ഒരു ഉപന്യാസം എഴുതാൻ അവളുടെ അധ്യാപിക ആവശ്യപ്പെട്ടു. ഉപന്യാസം എഴുതി ഏതാനും ആഴ്‌ചകൾക്കു ശേഷം, സ്‌പെയിനിൽ നിന്നുള്ള മറ്റുചില വിദ്യാർഥികളോടൊപ്പം അവളും തങ്ങളുടെ രാജ്യത്തെ പ്രതിനിധീകരിക്കാനായി തിരഞ്ഞെടുക്കപ്പെട്ടിരിക്കുന്നുവെന്ന്‌ ബെൽജിയത്തിലെ ബ്രസ്സൽസിലുള്ള യൂറോപ്യൻ പരിശോധകാസംഘം അവളെ അറിയിച്ചു. അവൾ പിന്നീട്‌ ഉണരുക!യുടെ പ്രസാധകർക്ക്‌ പിൻവരുന്ന പ്രകാരം എഴുതി:
“മനുഷ്യാവകാശങ്ങളെ സംബന്ധിച്ച ഏറ്റവും പുതിയ വിവരങ്ങൾക്കായി ഞാൻ അന്വേഷിക്കുകയായിരുന്നു. അപ്പോഴാണ്‌, ‘സകലരും മനുഷ്യാവകാശങ്ങൾ ആസ്വദിക്കുന്ന ഒരു കാലം എന്നെങ്കിലും വരുമോ?’ എന്ന 1998 നവംബർ 22 ലക്കം ‘ഉണരുക!’ എനിക്കു ലഭിച്ചത്‌. അതിൽ എനിക്ക്‌ ആവശ്യമായിരുന്ന വിവരങ്ങൾ തന്നെയാണ്‌ ഉണ്ടായിരുന്നത്‌. മനുഷ്യാവകാശ ധ്വംസനത്തിന്‌ ഉദാഹരണങ്ങൾ നൽകാനായി, സ്‌ത്രീകളുടെ ഭാവിയെ സംബന്ധിച്ചും കൂട്ടക്കൊലയെ സംബന്ധിച്ചും ‘ഉണരുക!’യുടെ മറ്റു ലക്കങ്ങളിൽ വന്ന വിവരങ്ങളും ഞാൻ തിരഞ്ഞെടുത്തു. [1998 ഏപ്രിൽ 8, ആഗസ്റ്റ്‌ 8 എന്നീ ലക്കങ്ങൾ കാണുക.] മറ്റു മാസികകളിലോ പരാമർശക ഗ്രന്ഥങ്ങളിലോ കണ്ടെത്താനാകാത്ത വിവരങ്ങൾ ‘ഉണരുക!’യിൽ ഉണ്ടെന്ന്‌ എന്റെ ഗവേഷണത്തിനിടയിൽ ഞാൻ മനസ്സിലാക്കി. എനിക്ക്‌ അതിലെ ചിത്രങ്ങളും വളരെ ഇഷ്ടമായി, ഞാൻ അവയിൽ ചിലത്‌ എന്റെ ഉപന്യാസത്തിന്റെ കൂടെ ഉൾപ്പെടുത്തി.
“ഈ ഉപന്യാസം സമ്മാനാർഹമായതിനാൽ, എനിക്ക്‌ ഒരാഴ്‌ച ഫിൻലൻഡിൽ ചെലവഴിക്കാൻ കഴിഞ്ഞു. അവിടെവെച്ച്‌, മനുഷ്യാവകാശങ്ങളെ കുറിച്ച്‌ കൂടുതലായി സംസാരിക്കാനും ഇതുപോലുള്ള പ്രധാനപ്പെട്ട വിഷയങ്ങൾ പ്രസിദ്ധീകരിക്കുന്നതിൽ ‘ഉണരുക!’ വഹിക്കുന്ന മൂല്യവത്തായ പങ്കിനെക്കുറിച്ചു വിശദീകരിക്കാനും എനിക്കു സാധിച്ചു.
“ലോകസംഭവങ്ങളെക്കുറിച്ച്‌ എല്ലായ്‌പോഴും ഞങ്ങളെ ഏറ്റവുമാദ്യം അറിയിക്കുന്ന നിങ്ങൾക്ക്‌ അകമഴിഞ്ഞ നന്ദി. ദശലക്ഷക്കണക്കിനാളുകൾ ഇത്തരം വിവരങ്ങളിൽ നിന്ന്‌ ഇനിയും പ്രയോജനം അനുഭവിക്കാനായി യഹോവ നിങ്ങളെ തുടർന്നും അനുഗ്രഹിക്കട്ടെ.”
[15-ാം പേജിലെ ചിത്രം]
രൂറ്റും അവൾ ഉപന്യാസ രചനയിൽ പങ്കെടുത്തതിന്റെ സർട്ടിഫിക്കറ്റും