ചീനവ​ലകൾ ഇന്ത്യയിൽ

ഇന്ത്യയിലെ ഉണരുക! ലേഖകൻ

കൊച്ചി. ഇന്ത്യൻ ഉപഭൂ​ഖ​ണ്ഡ​ത്തി​ന്റെ തെക്കേ​യ​റ്റ​ത്തു​നിന്ന്‌ 250 കിലോ​മീ​റ്റർ അകലെ​യാ​യി, ഇന്ത്യയു​ടെ പശ്ചിമ​തീ​രത്ത്‌ സ്ഥിതി​ചെ​യ്യുന്ന നഗരം. അവിടത്തെ കായ​ലോ​ര​ങ്ങളെ അലങ്കരി​ച്ചു​കൊണ്ട്‌ നിരനി​ര​യാ​യി നിൽക്കുന്ന ചൈനീസ്‌ മാതൃ​ക​യി​ലുള്ള മത്സ്യബന്ധന വലകൾ. ഒരറ്റം താങ്ങി​ല്ലാ​തെ സ്വത​ന്ത്ര​മാ​യി നിൽക്ക​ത്ത​ക്ക​വി​ധം നിർമി​ക്ക​പ്പെ​ട്ടി​ട്ടുള്ള അസാധാ​ര​ണ​മായ ഈ ചൈനീസ്‌ വലകൾ എങ്ങനെ​യാ​ണു കൊച്ചി​യിൽ എത്തിയത്‌?

പൊ.യു. എട്ടാം നൂറ്റാണ്ടു മുതൽ ചൈനാ​ക്കാർ കൊച്ചി​യിൽ താമസ​മു​ണ്ടാ​യി​രു​ന്നു. ചൈന​യി​ലെ കുബ്‌ള​യ്‌ഖാ​ന്റെ ഭരണകാ​ലത്ത്‌, അവി​ടെ​നി​ന്നെ​ത്തിയ വ്യാപാ​രി​ക​ളാ​ണ​ത്രെ ഇത്തരം വലകൾ കൊണ്ടു​വ​ന്നത്‌. പൊ.യു. 1400-നു മുമ്പു​തന്നെ അവ കൊച്ചി​യിൽ എത്തി​ച്ചേർന്ന​താ​യി കരുത​പ്പെ​ടു​ന്നു. ഇവിടെ, തീര​ത്തോ​ടു ചേർന്നുള്ള വെള്ളത്തിൽ ധാരാളം മത്സ്യങ്ങ​ളുണ്ട്‌. അങ്ങനെ, നല്ല ഉയരമുള്ള, മനുഷ്യ​ശ​ക്തി​കൊ​ണ്ടു പ്രവർത്തി​ക്കുന്ന ഈ ‘മത്സ്യബന്ധന യന്ത്രങ്ങൾ’, ഒരു നൂറ്റാ​ണ്ടി​ല​ധി​കം കാലം—അറബികൾ ചൈനാ​ക്കാ​രെ കൊച്ചി​യിൽ നിന്നു തുരത്തു​ന്ന​തു​വരെ—മത്സ്യബ​ന്ധ​ന​ത്തി​നാ​യി നന്നായി ഉതകി.

ചൈനാ​ക്കാർ പോയ​തോ​ടെ ചീനവ​ല​ക​ളും അപ്രത്യ​ക്ഷ​മാ​യി. എന്നാൽ 16-ാം നൂറ്റാ​ണ്ടി​ന്റെ തുടക്ക​ത്തിൽ പോർച്ചു​ഗീ​സു​കാർ അറബി​ക​ളു​ടെ സ്ഥാനം കയ്യടക്കി. തെളി​വ​നു​സ​രിച്ച്‌, കൊച്ചി​യിൽ വീണ്ടും ചീനവ​ലകൾ സ്ഥാപി​ച്ചത്‌ അവരാണ്‌. തെക്കു​കി​ഴക്കൻ ചൈന​യി​ലെ അന്നത്തെ പോർച്ചു​ഗീസ്‌ കോള​നി​യായ മാകൗ ദ്വീപിൽ നിന്നാണ്‌ അവർ ചീനവ​ലകൾ കൊണ്ടു​വ​ന്നത്‌.

മത്സ്യബ​ന്ധ​ന​ത്തിൽ ചീനവ​ലകൾ ഉപയോ​ഗി​ക്കാൻ തുടങ്ങി​യി​ട്ടു നൂറ്റാ​ണ്ടു​ക​ളാ​യി. എന്നിട്ടും, തുടക്ക​ത്തി​ലെ രൂപമാ​തൃ​ക​യ്‌ക്കോ പ്രവർത്ത​ന​രീ​തി​ക്കോ പറയത്തക്ക ഒരു വ്യത്യാ​സ​വും വരുത്താ​തെ​തന്നെ അവ ഇപ്പോ​ഴും ഫലപ്ര​ദ​മാ​യി പ്രവർത്തി​ക്കു​ന്നു എന്നതു ശ്രദ്ധേ​യ​മാണ്‌. ചീനവ​ലകൾ കൊണ്ടാണ്‌ ഇന്നും അനേകം മുക്കുവ കുടും​ബ​ങ്ങ​ളും കഴിഞ്ഞു​കൂ​ടു​ന്നത്‌. ഒപ്പം, അവ അനേകർക്ക്‌ ആഹാര​വും നൽകുന്നു. വല നിറയെ മത്സ്യം ലഭിച്ചാൽ ഒരൊ​റ്റ​ത്തവണ കിട്ടുന്ന മത്സ്യം​മതി ഒരു ഗ്രാമ​ത്തി​നു മുഴുവൻ ഭക്ഷണത്തിന്‌. അങ്ങേയറ്റം ഉപകാ​ര​പ്ര​ദ​മാ​ണെ​ന്ന​തി​നു പുറമേ, വലകൾ കാഴ്‌ച​യ്‌ക്ക്‌ അതീവ​സു​ന്ദ​ര​ങ്ങ​ളു​മാണ്‌. ആകാശത്തെ പൊന്നാട അണിയി​ച്ചു​കൊണ്ട്‌ പ്രഭാ​ത​സൂ​ര്യൻ ഉദിച്ചു​യ​രു​മ്പോ​ഴും അസ്‌തമയ സൂര്യൻ പടിഞ്ഞാ​റെ ചക്രവാ​ള​ത്തിൽ ചെഞ്ചായം പൂശു​മ്പോ​ഴും തെളി​ഞ്ഞു​വ​രുന്ന അവയുടെ ഗാംഭീ​ര്യ​മേ​റിയ നിഴൽച്ചി​ത്രങ്ങൾ പ്രത്യേ​കി​ച്ചും അവർണ​നീ​യ​മായ ഒരു കാഴ്‌ച​യാണ്‌.

അവ എങ്ങനെ​യാ​ണു പ്രവർത്തി​ക്കു​ന്നത്‌?

തടി​കൊ​ണ്ടു​ണ്ടാ​ക്കിയ ഒരു പ്ലാറ്റ്‌ഫാ​റ​ത്തി​ന്റെ മുന്നറ്റ​ത്തുള്ള കുറ്റി​ക​ളും പ്ലാറ്റ്‌ഫാ​റ​ത്തി​ന്റെ പിന്നറ്റത്തു സമതു​ല​ന​ത്തി​നാ​യി കയറു​ക​ളിൽ കെട്ടി​യി​ട്ടി​രി​ക്കുന്ന ഭാരവും ആണ്‌ ഈ ഭീമൻ വലയു​ടെ​യും—ഒരറ്റം താങ്ങി​ല്ലാ​തെ സ്വത​ന്ത്ര​മാ​യി നിൽക്ക​ത്ത​ക്ക​വി​ധം നിർമി​ക്ക​പ്പെ​ട്ടി​ട്ടുള്ള—അതിൽ കുരു​ങ്ങുന്ന മത്സ്യങ്ങ​ളു​ടെ​യും ഭാരം ബാലൻസ്‌ ചെയ്യു​ന്നത്‌. വല ഉപയോ​ഗി​ക്കാത്ത സമയങ്ങ​ളിൽ, വലയും അതു ഘടിപ്പി​ച്ചി​രി​ക്കുന്ന നീണ്ട കഴകളും (ബ്രാസ്‌) വെള്ളത്തിൽ നിന്ന്‌ ഉയർത്തി​വെ​ച്ചി​രി​ക്കും. കിഴക്ക്‌ വെള്ള കീറു​ന്ന​തിന്‌ ഏറെ മുമ്പേ തുടങ്ങുന്ന മീൻപി​ടി​ത്തം അവസാ​നി​ക്കുക നാലോ അഞ്ചോ മണിക്കൂർ കഴിഞ്ഞാണ്‌. വളരെ സാവധാ​ന​മാണ്‌ വല വെള്ളത്തി​ലേക്കു താഴ്‌ത്തു​ന്നത്‌. അതിനു​വേണ്ടി, ഒന്നുകിൽ പ്ലാറ്റ്‌ഫാ​റ​ത്തി​ന്റെ പിൻഭാ​ഗത്ത്‌ കെട്ടി​യി​ട്ടി​രി​ക്കുന്ന ഭാരം ക്രമീ​ക​രി​ക്കു​ക​യാ​കും ചെയ്യുക. അല്ലെങ്കിൽ, മുക്കുവ മുഖ്യൻ പ്ലാറ്റ്‌ഫാ​റ​ത്തി​ന്റെ മധ്യഭാ​ഗ​ത്തുള്ള കഴു​ക്കോ​ലി​ലൂ​ടെ നടക്കുന്നു. 5 മുതൽ 20 വരെ മിനിട്ട്‌ വല വെള്ളത്തിൽ താഴ്‌ത്തി​വെ​ക്കും. എന്നിട്ട്‌ അതു സാവധാ​നം ഉയർത്തു​ന്നു. അപ്പോ​ഴേ​ക്കും തീര​ത്തോ​ടു ചേർന്നു നീന്തി​യി​രുന്ന മത്സ്യങ്ങൾ അതിൽ കുടു​ങ്ങി​യി​ട്ടു​ണ്ടാ​കും. വർഷങ്ങ​ളി​ലെ അനുഭ​വ​പ​രി​ച​യം​കൊണ്ട്‌, വല ഉയർത്തേണ്ട കൃത്യ​സ​മയം മുഖ്യനു നന്നായി അറിയാം.

മുഖ്യ​നിൽ നിന്നുള്ള സൂചന കിട്ടേണ്ട താമസം, മുക്കുവ സംഘത്തി​ലെ ബാക്കി​യുള്ള അഞ്ചോ ആറോ പേർ ചേർന്ന്‌, ഭാരം കെട്ടി​യി​ട്ടി​രി​ക്കുന്ന ആ കയറുകൾ—ഇതു വലയു​മാ​യും ബന്ധിപ്പി​ച്ചി​ട്ടുണ്ട്‌—വലിച്ചു​താ​ഴ്‌ത്തി വല മെല്ലെ പൊന്തി​ക്കു​ന്നു. ആദ്യം പ്രത്യ​ക്ഷ​പ്പെ​ടു​ന്നത്‌ വലയുടെ കോണു​ക​ളാണ്‌. അങ്ങനെ, പിടയ്‌ക്കുന്ന മീനു​ക​ളു​മാ​യി വല മുഴു​വ​നാ​യി പൊങ്ങി​ക്ക​ഴി​യു​മ്പോൾ അതു ഒരു വലിയ കോപ്പ​യു​ടെ ആകൃതി​യിൽ കാണ​പ്പെ​ടു​ന്നു. ആ സമയത്തെ മുക്കു​വ​ന്മാ​രു​ടെ ആവേശം പറഞ്ഞറി​യി​ക്കാ​നാ​കില്ല! ഒരു നല്ല കോള്‌ ഒത്തതു​കൊണ്ട്‌ അവർ പരസ്‌പരം പുറത്തു​തട്ടി സന്തോഷം പ്രകടി​പ്പി​ക്കു​ന്നു. പിന്നീട്‌, മീൻ കച്ചവട​ക്കാർക്കും വീട്ടമ്മ​മാർക്കും നഗരം കാണാ​നെ​ത്തുന്ന വിനോ​ദ​സ​ഞ്ചാ​രി​കൾക്കു​മൊ​ക്കെ​യാ​യി ഈ മത്സ്യങ്ങൾ വിറ്റഴി​ക്കും.

ചൈനാ​ക്കാ​രും അറബി​ക​ളും പോർച്ചു​ഗീ​സു​കാ​രു​മെ​ല്ലാം വരിക​യും പോകു​ക​യും ചെയ്‌തു. പക്ഷേ, കൊച്ചി​യു​ടെ കായ​ലോ​ര​ങ്ങ​ളിൽ ചീനവ​ലകൾ ഇപ്പോ​ഴു​മുണ്ട്‌. കായലു​ക​ളിൽ നിന്ന്‌ ഒഴുകി​യെ​ത്തുന്ന കാറ്റിന്റെ തലോ​ട​ലിൽ മെല്ലെ പൊന്തി​ക്ക​ളിച്ച്‌ അവ ഇന്നും നിൽക്കു​ന്നു, 600-ലധികം വർഷം മുമ്പ​ത്തെ​പോ​ലെ തന്നെ.

[31-ാം പേജിലെ ചിത്രം]

കൊച്ചി

[കടപ്പാട്‌]

Mountain High Maps® Copyright © 1997 Digital Wisdom, Inc.