ടെലിവിഷൻ കാണുന്നതിൽ ജാഗ്രത പുലർത്തുക
ടെലിവിഷൻ കാണുന്നതിൽ ജാഗ്രത പുലർത്തുക
ടെലിവിഷൻ “മുഖ്യ കാഥികനും ശിശുപാലകനും പൊതുജനാഭിപ്രായ രൂപകർത്താവു”മായി വർത്തിക്കുന്നു എന്ന് ഐക്യനാടുകളിലുള്ള ഒരു മാധ്യമ നിരീക്ഷണ സംഘം സമാഹരിച്ച അമേരിക്കയിലെ പ്രാദേശിക ടെലിവിഷൻ വാർത്ത—പൊതുജന താത്പര്യത്തെ മുൻനിറുത്തിയുള്ളതല്ല (ഇംഗ്ലീഷ്) എന്ന റിപ്പോർട്ട് പറയുന്നു. “ടിവി നമുക്കു ചുറ്റും എല്ലായിടത്തുമുണ്ട് . . . ഊതിവിടുന്ന സിഗരറ്റ് പുകപോലെ അതു വായുവിലുണ്ട്.” ഊതിവിടുന്ന പുക ശ്വസിക്കുന്നതു പോലെതന്നെ ഹാനികരമാണ് ശ്രദ്ധാപൂർവം തിരഞ്ഞെടുക്കാത്ത ടിവി പരിപാടികൾ മണിക്കൂറുകളോളം വീക്ഷിക്കുന്നതും—വിശേഷിച്ചും കുട്ടികളുടെ കാര്യത്തിൽ.
ടിവിയിലെ കുറ്റകൃത്യത്തെയും അക്രമത്തെയും പരാമർശിച്ചുകൊണ്ട് ആ റിപ്പോർട്ട് ഇങ്ങനെ തുടരുന്നു: “അക്രമാസക്ത രംഗങ്ങൾ വീക്ഷിക്കുന്നതു കുട്ടികളുടെ പഠനത്തെയും സമാനുഭാവത്തെയും ദോഷകരമായി ബാധിക്കുന്നുവെന്നും അവരിൽ അക്രമവാസന ഉണർത്തുന്നുവെന്നും നൂറുകണക്കിനു ഗവേഷണ പഠനങ്ങൾ തെളിയിച്ചിരിക്കുന്നു.” ദി അമേരിക്കൻ മെഡിക്കൽ അസ്സോസിയേഷൻ 1992-ൽ പ്രസ്താവിച്ച പ്രകാരം, “യുവജനങ്ങളുടെ ആരോഗ്യത്തിനു ഭീഷണി ഉയർത്തുന്ന ഒരു ഘടകമാണ് ടെലിവിഷനിലെ അക്രമം.”
ദ്രോഹകരമായ ടിവി പരിപാടികൾക്കു കുട്ടികളുടെ മേലുള്ള സ്വാധീനത്തെ നിങ്ങൾക്ക് എങ്ങനെ നിയന്ത്രിക്കാൻ കഴിയും? ടെലിവിഷൻ കാണുന്നതിൽ എങ്ങനെ കൂടുതൽ ജാഗ്രത പുലർത്താനാകും എന്നതു സംബന്ധിച്ച് അനേകം പൊതുജനാരോഗ്യ സംഘടനകളിൽ നിന്നു ലഭിച്ച ഏതാനും ചില നിർദേശങ്ങളെ അധികരിച്ചു തയ്യാറാക്കിയ ചില വിദഗ്ധാഭിപ്രായങ്ങൾ മേൽപ്പറഞ്ഞ റിപ്പോർട്ടിൽ നൽകിയിട്ടുണ്ട്. അവയിൽ ചിലതു താഴെ കൊടുത്തിരിക്കുന്നു:
◼ കാണേണ്ട പരിപാടി ഏതെന്ന് മുൻകൂട്ടി നിശ്ചയിക്കുക, കാണുന്ന സമയം വെട്ടിക്കുറയ്ക്കുക. കുട്ടികൾക്ക് എപ്പോൾ കാണാമെന്നതു സംബന്ധിച്ചു പരിധികൾ വെക്കുക. കുട്ടികളുടെ മുറിയിൽ ടിവി വെക്കരുത്.
◼പരിപാടിയിൽ കാണുന്ന സ്ഥലങ്ങൾ കുട്ടികൾക്കു കണ്ടുപിടിക്കാൻവേണ്ടി ടിവിക്ക് അടുത്തായി ഒരു ഭൂഗോളം വെക്കുക.
◼യാഥാർഥ്യവും മിഥ്യയും തമ്മിലുള്ള വ്യത്യാസം പോലുള്ള കാര്യങ്ങൾ കുട്ടികൾക്കു പറഞ്ഞുകൊടുക്കാനായി അവരോടൊപ്പമിരുന്നു ടിവി കാണുക. പത്തു വയസ്സിൽ താഴെയുള്ള മിക്ക കുട്ടികൾക്കും ആ വ്യത്യാസം അറിയില്ല.
◼ടിവി പെട്ടെന്ന് ശ്രദ്ധിക്കപ്പെടുന്ന സ്ഥലത്തുനിന്നു മാറ്റി ഒരു കാബിനെറ്റിൽ അടച്ചു വെക്കുക. അങ്ങനെ ചെയ്യുന്നത് ടിവി ഓൺ ചെയ്യാനും കൂടെക്കൂടെ ചാനലുകൾ മാറ്റാനുമുള്ള പ്രവണത അൽപ്പം കുറയ്ക്കും.