പുതിയ കിടക്ക വാങ്ങാ​നുള്ള സമയമാ​യോ?

ബ്രിട്ടനിലെ ഉണരുക! ലേഖകൻ

ഈയിടെയായി കട്ടിലിൽ തിരി​ഞ്ഞും മറിഞ്ഞും കിടന്ന്‌ നേരം വെളു​പ്പി​ക്കു​ന്നത്‌ ഒരു പതിവാ​യി മാറി​യെന്നു നിങ്ങൾക്കു തോന്നു​ന്നു​ണ്ടോ? ക്ഷീണവും ശരീര​മാ​സ​കലം വേദന​യു​മാ​യാ​ണോ നിങ്ങൾ രാവിലെ എഴു​ന്നേൽക്കു​ന്നത്‌? ആണെങ്കിൽ, കുഴപ്പ​ക്കാ​രൻ നിങ്ങളു​ടെ കിടക്ക ആയിരു​ന്നേ​ക്കാം.

കിടക്ക​യ്‌ക്ക്‌ നിങ്ങളു​ടെ ശത്രു​വോ മിത്ര​മോ ആയിരി​ക്കാൻ കഴിയും. കാരണം, സാധ്യ​ത​യ​നു​സ​രിച്ച്‌ ജീവി​ത​ത്തി​ന്റെ മൂന്നി​ലൊ​രു ഭാഗവും നിങ്ങൾ അതിലാ​ണു ചെലവ​ഴി​ക്കു​ന്നത്‌. പക്ഷേ, നിങ്ങളു​ടെ കിടക്ക എക്കാല​ത്തേ​ക്കും നിലനിൽക്കു​ക​യൊ​ന്നു​മില്ല. അതു​കൊണ്ട്‌, നിങ്ങളു​ടെ ഇപ്പോ​ഴത്തെ കിടക്ക എങ്ങനെ​യു​ണ്ടെന്ന്‌ ഒന്നു പരി​ശോ​ധി​ച്ചാ​ലോ?

നിങ്ങൾക്ക്‌ ഒരു പുതിയ കിടക്ക​യു​ടെ ആവശ്യ​മു​ണ്ടോ?

സാധാ​ര​ണ​ഗ​തി​യിൽ ഒരു കിടക്ക ഏതാണ്ട്‌ പത്തുവർഷ​ത്തേക്ക്‌ യാതൊ​രു കുഴപ്പ​വു​മി​ല്ലാ​തെ ഉപയോ​ഗി​ക്കാൻ കഴിയും. കിടക്ക ഉപയോ​ഗി​ക്കുന്ന ആൾക്കു നല്ല ഭാരമു​ണ്ടെ​ങ്കിൽ, അതിനു മുമ്പു​തന്നെ കേടു​പാ​ടു​കൾ സംഭവി​ച്ചേ​ക്കാം. കൂടാതെ, പ്രായം ചെല്ലു​ന്ന​തി​ന​നു​സ​രിച്ച്‌ നിങ്ങളു​ടെ ആവശ്യ​ങ്ങ​ളും ഇഷ്ടാനി​ഷ്ട​ങ്ങ​ളും മാറും എന്നതും ഓർമി​ക്കുക. ഒരു പുതിയ കിടക്ക വേണോ എന്നു തീരു​മാ​നി​ക്കു​ന്ന​തിന്‌ നിങ്ങ​ളോ​ടു​തന്നെ ഇങ്ങനെ ചോദി​ക്കു​ന്നതു നന്നായി​രി​ക്കും: ‘പുറം​വേ​ദ​ന​യോ കഴുത്തു​വേ​ദ​ന​യോ ഒക്കെ ആയിട്ടാ​ണോ ഞാൻ കാലത്ത്‌ ഉണരു​ന്നത്‌? എന്റെ കിടക്ക​യ്‌ക്ക്‌ വലിപ്പം തീരെ കുറവാ​ണോ? സ്‌പ്രി​ങ്ങു​ക​ളോ പൊങ്ങി നിൽക്കുന്ന ഏതെങ്കി​ലും ഭാഗങ്ങ​ളോ എന്റെ ദേഹത്തു കൊള്ളു​ന്നു​ണ്ടോ? കിടക്ക​യിൽ കിടന്ന്‌ അങ്ങോ​ട്ടു​മി​ങ്ങോ​ട്ടും തിരി​യു​മ്പോൾ കിറു​കി​റാ ശബ്ദം വല്ലതും കേൾക്കു​ന്നു​ണ്ടോ? കട്ടിലി​ന്റെ ബേസ്‌ (അതായത്‌, മെത്തയി​ടുന്ന ഭാഗം) നിരപ്പു​ള്ള​താ​ണോ? കട്ടിലി​ന്റെ കാലു​കൾക്കോ ഉരുട്ടി​മാ​റ്റാൻ പാകത്തി​നു പിടി​പ്പി​ച്ചി​രി​ക്കുന്ന ചെറു​ച​ക്ര​ങ്ങൾക്കോ തേയ്‌മാ​നം സംഭവി​ച്ചി​ട്ടു​ണ്ടോ?’ ഈ ചോദ്യ​ങ്ങൾക്കുള്ള ഉത്തരങ്ങ​ളു​ടെ അടിസ്ഥാ​ന​ത്തിൽ ഒരു പുതിയ കിടക്ക​യു​ടെ ആവശ്യ​മു​ണ്ടോ എന്നു തീരു​മാ​നി​ക്കാൻ കഴിയും.

ഒരു നല്ല കിടക്ക എന്നു​വെ​ച്ചാൽ . . .

ഒരു നല്ല കിടക്ക നിങ്ങളു​ടെ ശരീര​ത്തി​നു സുഖവും താങ്ങും നൽകി​ക്കൊണ്ട്‌ നിങ്ങളു​ടെ പ്രത്യേക ആവശ്യ​ങ്ങൾക്കും ഇഷ്ടാനി​ഷ്ട​ങ്ങൾക്കും വളരെ നന്നായി ഇണങ്ങുന്ന ഒന്നായി​രി​ക്കും. കിടക്ക സാധാ​ര​ണ​ഗ​തി​യിൽ കട്ടിലും മെത്തയും ചേർന്ന​താണ്‌. കട്ടിലി​ലെ കിടപ്പ്‌ സുഖക​ര​മാ​ക്കി​ത്തീർക്കു​ന്നത്‌ മെത്തയാണ്‌. അതിനു പല ഭാഗങ്ങ​ളുണ്ട്‌. അതിൽ ആദ്യ​ത്തേതു മെത്തയു​റ​യാണ്‌. എല്ലാ ഭാഗങ്ങ​ളെ​യും ഒരുമി​ച്ചു നിറു​ത്തു​ന്നത്‌ ഇതാണ്‌. പഞ്ഞിയോ മറ്റോ നിറച്ച ഒരു ഭാഗമാണ്‌ അടുത്തത്‌. ഇത്‌ മെത്തയ്‌ക്കു മാർദവം നൽകു​ക​യും ശരീര​ത്തി​ന്റെ ഈർപ്പം വലി​ച്ചെ​ടു​ക്കു​ക​യും ചെയ്യുന്നു. മൂന്നാ​മത്തെ ഭാഗമാണ്‌ മെത്തയ്‌ക്ക്‌ ദൃഢത​യും താങ്ങും നൽകു​ന്നത്‌. ദൃഢീ​ക​രിച്ച (tempered) ഉരുക്കി​ന്റെ കോയി​ലു​ക​ളോ സ്‌പ്രി​ങ്ങു​ക​ളോ ആണ്‌ സാധാ​ര​ണ​മാ​യി ഇതിന്റെ പ്രധാന ഘടകങ്ങൾ. ഇതുതന്നെ പലതര​ത്തി​ലു​ള്ള​തുണ്ട്‌. എന്നാൽ, ഉപയോ​ഗി​ക്കുന്ന സ്‌പ്രി​ങ്ങു​ക​ളു​ടെ എണ്ണവും കോയി​ലു​ക​ളു​ടെ കട്ടിയും കൂടു​ന്ന​തി​ന​നു​സ​രിച്ച്‌ മെത്തയു​ടെ ദൃഢത​യും കൂടു​ത​ലാ​യി​രി​ക്കും. എന്നാൽ ഇത്തരം മെത്തകൾക്കു പകരം പോളി​യു​റി​ഥെയ്‌ൻ ഫോം മെത്തക​ളോ റബർ ഫോം മെത്തക​ളോ ആണ്‌ ഇന്നു കൂടു​ത​ലാ​യി ഉപയോ​ഗി​ക്കു​ന്നത്‌. ഉള്ളിൽ സ്‌പ്രിങ്‌ ഘടിപ്പിച്ച മെത്തക​ളെ​ക്കാൾ ഭാരം വളരെ കുറവാ​ണി​തിന്‌.

മെത്ത എത്ര നല്ലതാ​ണെ​ങ്കി​ലും ശരി, കട്ടിൽ അനു​യോ​ജ്യ​മാ​യ​ത​ല്ലെ​ങ്കിൽ ഒരു പ്രയോ​ജ​ന​വു​മില്ല. അത്‌ മെത്തയ്‌ക്കു​വേ​ണ്ടി​ത്തന്നെ രൂപകൽപ്പന ചെയ്‌ത​താ​ണെ​ങ്കിൽ ഏറ്റവും നല്ലത്‌. ദിവാൻ കോട്ട്‌ സാധാരണ ഒരു സെറ്റ്‌ ആയിട്ടാ​ണു വിൽക്കാ​റു​ള്ളത്‌. അതായത്‌, മെത്തയും അതിനു പറ്റിയ കട്ടിലും കൂടെ. ദിവാൻ കോട്ടി​ന്റെ, വീതി​യുള്ള വശങ്ങ​ളോ​ടു കൂടിയ, പെട്ടി​യു​ടെ ആകൃതി​യി​ലുള്ള അടിഭാ​ഗം ഒരു വലിയ ഷോക്ക്‌ അബ്‌സോർബർ ആയി വർത്തി​ക്കു​ന്നു. ഇത്‌, മെത്തയിൽ വായു​സ​ഞ്ചാ​രം ഉണ്ടാകു​ന്ന​തി​നും അങ്ങനെ അതു കൂടുതൽ കാലം ഉപയോ​ഗി​ക്കു​ന്ന​തി​നും സഹായി​ക്കു​ന്നു. ഇനി, കട്ടിലും അതിനു ചേരുന്ന മെത്തയും വെവ്വേ​റെ​യാ​ണു വാങ്ങി​ക്കു​ന്ന​തെ​ങ്കിൽ, പലകയ​ടിച്ച കട്ടിലു​കൾ വാങ്ങാൻ ശ്രദ്ധി​ക്കുക. പലകകൾക്കി​ട​യിൽ വിടവു​കൾ  ഉള്ളതു​കൊ​ണ്ടും ഒപ്പം കട്ടിലു​ക​ളു​ടെ അടിഭാ​ഗം തുറന്നി​രി​ക്കു​ന്ന​തു​കൊ​ണ്ടും മെത്തയ്‌ക്ക്‌ നല്ല വായു​സ​ഞ്ചാ​രം കിട്ടും. ഉറപ്പുള്ള, വഴങ്ങാ​ത്ത​തരം ബേസ്‌ ആണെങ്കിൽ നല്ല ദൃഢത കാണും. സ്‌പ്രിങ്‌ പിടി​പ്പി​ച്ചവ കൂടുതൽ വഴക്കമു​ള്ള​വ​യാണ്‌.

അനു​യോ​ജ്യ​മായ കിടക്ക തിര​ഞ്ഞെ​ടു​ക്കാ​വുന്ന വിധം

ഒരു കിടക്ക വാങ്ങു​മ്പോൾ എന്തെല്ലാം കാര്യങ്ങൾ മനസ്സിൽ പിടി​ക്കണം? സെക്കൻഡ്‌-ഹാൻഡ്‌ കിടക്ക വാങ്ങി​യാൽ പല പ്രശ്‌ന​ങ്ങ​ളുണ്ട്‌. മറ്റ്‌ ആളുക​ളു​ടെ വിയർപ്പും ചർമത്തി​ന്റെ ശകലങ്ങ​ളു​മൊ​ക്കെ അവ വലി​ച്ചെ​ടു​ത്തി​ട്ടു​ണ്ടാ​യി​രി​ക്കും. മാത്രമല്ല, അവയിൽ ഒരുപക്ഷേ, നിറയെ മൂട്ടക​ളും ഉണ്ടായി​രു​ന്നേ​ക്കാം. ഇതൊക്കെ, അലർജി​യോ ആസ്‌ത്‌മ​യോ വരട്ടു​ചൊ​റി​യോ പിടി​പെ​ടു​ന്ന​തിന്‌ ഇടയാ​ക്കി​യേ​ക്കാം. ആരോഗ്യ-സുരക്ഷാ നിലവാ​ര​ങ്ങ​ളിൽ എത്തുന്ന​വ​യും ആയിരി​ക്ക​ണ​മെ​ന്നില്ല അവ.

ഒരു പുതിയ കിടക്ക വാങ്ങു​ന്ന​തി​നു മുമ്പ്‌, വില, ആരോ​ഗ്യ​പ​ര​മായ പ്രത്യേ​കാ​വ​ശ്യ​ങ്ങൾ, കിടക്ക​യു​ടെ വലിപ്പം ഇവയിൽ ഏതിനാണ്‌ മുൻഗണന നൽകാൻ പോകു​ന്നത്‌ എന്നു തീരു​മാ​നി​ക്കു​ന്നതു നല്ലതാ​യി​രി​ക്കും. പേരു​കേട്ട കടകൾവേണം സന്ദർശി​ക്കാൻ. അതിനു വേണ്ടി ധാരാളം സമയം നീക്കി​വെ​ക്കുക. ഓരോ കിടക്ക​യെ​യും കുറിച്ച്‌ പരമാ​വധി വിവരങ്ങൾ അറിയാൻ ശ്രമി​ക്കുക. കിടക്ക​കൾക്കു മിക്ക​പ്പോ​ഴും നല്ല വിലയു​ള്ള​തു​കൊണ്ട്‌ എടുത്തു​ചാ​ടി ഒരു തീരു​മാ​ന​മെ​ടു​ക്ക​രുത്‌.

നിങ്ങൾ ക്ഷീണി​ച്ചി​രി​ക്കുന്ന ഒരു സന്ദർഭ​ത്തിൽ ശരിയായ തീരു​മാ​ന​മെ​ടു​ക്കാൻ വലിയ ബുദ്ധി​മു​ട്ടാ​യി​രു​ന്നേ​ക്കാം. സൗകര്യ​പ്ര​ദ​മായ വസ്‌ത്രങ്ങൾ ധരിക്കുക. ഒരു കിടക്ക എങ്ങനെ​യുണ്ട്‌ എന്നു പരീക്ഷി​ച്ചു നോക്കു​ന്ന​തിന്‌ മടിച്ചു​നിൽക്ക​രുത്‌, മറ്റുള്ളവർ എന്തു കരുതും എന്നു വിചാ​രി​ച്ചു നിന്നിട്ടു കാര്യ​മില്ല. ചെരി​പ്പൊ​ക്കെ ഊരി​യി​ട്ടിട്ട്‌ ഏതാനും മിനിട്ടു നേരം ഓരോ കിടക്ക​യി​ലും കിടന്നു​നോ​ക്കുക. പല രീതി​ക​ളിൽ കിടന്നു നോക്കുക. ചുമലു​കൾക്കും ഇടുപ്പു​കൾക്കും നടുവി​നും താങ്ങു കിട്ടു​ന്നു​ണ്ടോ എന്ന കാര്യം പ്രത്യേ​കം ശ്രദ്ധി​ക്കണം.—“ഏതു കിടക്ക​യാണ്‌ നിങ്ങൾക്കു നല്ലത്‌” എന്ന ചതുരം കാണുക.

നിങ്ങളു​ടെ കിടക്ക നല്ല രീതി​യിൽ സൂക്ഷി​ക്കു​ക

കിടക്ക നന്നായി സൂക്ഷി​ക്കു​ക​യാ​ണെ​ങ്കിൽ അത്‌ ഏറെക്കാ​ലം നിലനിൽക്കു​മെന്ന കാര്യം തീർച്ച. വിൽപ്പ​ന​ക്കാ​രോട്‌ ഉപദേശം ആരായുക. മാത്രമല്ല, കിടക്ക സൂക്ഷി​ക്കു​ന്നതു സംബന്ധിച്ച നിർമാ​താ​വി​ന്റെ നിർദേ​ശങ്ങൾ സമയ​മെ​ടു​ത്തു വായി​ച്ചു​നോ​ക്കുക. പുതിയ കിടക്ക വീട്ടിൽ കൊണ്ടു​വ​രു​മ്പോൾ കഴിയു​ന്ന​തും പെട്ടെന്ന്‌ അതിന്റെ പോളി​എ​ഥി​ലിൻ പൊതി​യ​ലു​ക​ളെ​ല്ലാം അഴിച്ചു​മാ​റ്റുക. ഈർപ്പം തങ്ങിനിന്ന്‌  പൂപ്പൽ പിടിച്ച്‌ കിടക്ക ജീർണി​ച്ചു​പോ​കു​ന്നതു തടയാൻ അങ്ങനെ കഴിയും. കൂടു​ത​ലായ ഏതാനും നിർദേ​ശങ്ങൾ ചുവടെ ചേർക്കു​ന്നു.

● ആദ്യത്തെ ഏതാനും മാസങ്ങ​ളിൽ, ഒന്നോ രണ്ടോ ആഴ്‌ച കൂടു​മ്പോ​ഴും പിന്നീട്‌ മൂന്നു​മാ​സം കൂടു​മ്പോ​ഴും പുതിയ സ്‌പ്രിങ്‌ മെത്ത വശങ്ങൾ മറിച്ചി​ട്ടും അതു​പോ​ലെ കാൽവെ​ച്ചി​രുന്ന ഭാഗം തലഭാ​ഗ​ത്തും തല വെച്ചി​രുന്ന ഭാഗം കാൽഭാ​ഗ​ത്തും വരത്തക്ക​വ​ണ്ണ​മി​ട്ടും ഉപയോ​ഗി​ക്കണം. മെത്തയ്‌ക്കു​ള്ളിൽ നിറച്ചി​രി​ക്കു​ന്നവ യഥാസ്ഥാ​നത്ത്‌ ആകുന്ന​തി​നും മെത്തയു​ടെ എല്ലാ ഭാഗവും ഒരു​പോ​ലെ​യാ​കു​ന്ന​തി​നും ഇത്‌ ആവശ്യ​മാണ്‌. നിങ്ങൾക്കു നടുവി​നോ മുതു​കി​നോ എന്തെങ്കി​ലും പ്രശ്‌ന​മു​ണ്ടെ​ങ്കിൽ ഒരു ഫോം മെത്ത വാങ്ങു​ന്ന​താ​വും നല്ലത്‌. അതാകു​മ്പോൾ കൂടെ​ക്കൂ​ടെ തിരി​ച്ചും മറിച്ചും ഇടേണ്ട ആവശ്യ​മില്ല.

● മെത്ത ഒരിക്ക​ലും വളയ്‌ക്കു​ക​യോ ചുരു​ട്ടി​വെ​ക്കു​ക​യോ ചെയ്യരുത്‌. മെത്തയ്‌ക്ക്‌ ഒരു കൈപ്പി​ടി​യു​ണ്ടെ​ങ്കിൽ, അതിൽ പിടിച്ച്‌ ഒരിക്ക​ലും മെത്ത ഉയർത്താൻ ശ്രമി​ക്ക​രുത്‌. കട്ടിലിൽ മെത്ത നേരെ​യാ​ക്കി​യി​ടു​ന്ന​തിന്‌ വേണ്ടി മാത്രമേ കൈപ്പി​ടി ഉപയോ​ഗി​ക്കാ​വൂ.

● എന്നും രാവിലെ, 20 മിനിട്ടു നേര​ത്തേ​ക്കെ​ങ്കി​ലും കിടക്ക​വി​രി​കൾ കട്ടിലിൽ നിന്നു മാറ്റി​യി​ടണം. കിടക്ക​യിൽ കാറ്റു കൊള്ളു​ന്ന​തി​നും കിടന്ന​പ്പോൾ ഉണ്ടായ ഈർപ്പം പോകു​ന്ന​തി​നും വേണ്ടി​യാ​ണിത്‌.

● അലക്കാ​വുന്ന തരം ഒരു കവർ ഉണ്ടാക്കി നിങ്ങളു​ടെ മെത്ത വൃത്തി​യാ​യി സൂക്ഷി​ക്കുക. മുടി​യോ നൂലോ പൊടി​യോ പോലുള്ള എന്തും നീക്കം​ചെ​യ്യാൻ മെത്തയും കട്ടിലി​ലെ മെത്തയി​ടുന്ന ഭാഗവും സ്ഥിരമാ​യി വാക്വം ചെയ്യണം. മെത്തയിൽ എന്തെങ്കി​ലും വീണാൽ കറയാ​കു​ന്ന​തി​നു മുമ്പേ വീര്യം​കു​റഞ്ഞ തരം സോപ്പും തണുത്ത വെള്ളവും ഉപയോ​ഗിച്ച്‌ അതു തുടച്ചു​ക​ള​യാൻ ശ്രദ്ധി​ക്കണം.

● എല്ലായ്‌പോ​ഴും മെത്തയിൽ ഒരേ സ്ഥാനത്തു​തന്നെ ഇരിക്ക​രുത്‌. കിടക്ക​യിൽ ചാടി​മ​റി​യാൻ കുട്ടി​കളെ അനുവ​ദി​ക്ക​രുത്‌.

ഒരു കിടക്ക വാങ്ങു​മ്പോൾ നാം മുടക്കുന്ന പണം വാസ്‌ത​വ​ത്തിൽ നമ്മുടെ ജീവി​ത​ത്തി​ന്റെ മൂന്നി​ലൊ​രു ഭാഗത്തി​നു വേണ്ടി നിക്ഷേ​പി​ക്കുന്ന പണമാണ്‌—മറ്റു രണ്ടു ഭാഗങ്ങ​ളു​ടെ​മേൽ ശ്രദ്ധേ​യ​മായ ഫലം ഉളവാ​ക്കാൻ കഴിയുന്ന ഒരു നിക്ഷേപം. നിങ്ങൾക്കു താങ്ങാ​കുന്ന ഈ സുഹൃ​ത്തി​നെ ജ്ഞാനപൂർവം തിര​ഞ്ഞെ​ടു​ക്കു​ക​യും അതിനെ നന്നായി സൂക്ഷി​ക്കു​ക​യും ചെയ്യു​ന്നെ​ങ്കിൽ അതും നിങ്ങളെ നന്നായി നോക്കും.

[24-ാം പേജിലെ ചതുരം]

ഏതു കിടക്ക​യാണ്‌ നിങ്ങൾക്കു​ന​ല്ലത്‌?

സുഖം പകരു​ന്ന​തും താങ്ങു നൽകു​ന്ന​തും. മെത്ത പലക പോലെ ഉറപ്പു​ള്ളത്‌ ആണെങ്കിൽ മാത്രമേ ഗുണമു​ള്ളൂ എന്നു വിചാ​രി​ക്ക​രുത്‌. ഉറപ്പു കൂടി​യാ​ലും പ്രശ്‌ന​മാണ്‌. വാസ്‌ത​വ​ത്തിൽ, മെത്ത ഒട്ടും വഴങ്ങാ​ത്തത്‌ ആണെങ്കിൽ അതു നടുവി​നും മുതു​കി​നും പ്രശ്‌നം ഉണ്ടാക്കി​യേ​ക്കാം. ഏറ്റവും നല്ല മെത്ത ഏതെന്ന്‌ നിങ്ങളു​ടെ ശരീരം​തന്നെ നിങ്ങ​ളോ​ടു പറയട്ടെ. മലർന്നു കിടക്കുക. എന്നിട്ട്‌ നടുവി​ന്റെ വിടവി​ലേക്ക്‌ കൈ കടത്തി​വെ​ച്ചിട്ട്‌ ഒരു വശത്തേക്കു തിരി​യാൻ ശ്രമി​ക്കുക. എളുപ്പ​ത്തിൽ അങ്ങനെ കമിഴ്‌ന്നു കിടക്കാൻ സാധി​ക്കു​ന്നെ​ങ്കിൽ, നിങ്ങൾക്കു വേണ്ടു​ന്നത്ര ദൃഢത​യുള്ള മെത്തയാ​ണത്‌. നല്ല താങ്ങു നൽകുന്ന മെത്തയാ​ണെ​ങ്കിൽ, ചെരി​ഞ്ഞു​കി​ട​ക്കു​മ്പോൾ നിങ്ങളു​ടെ നട്ടെല്ല്‌ നേർരേ​ഖ​യി​ലാ​യി​രി​ക്കും. ഭാരക്കൂ​ടു​ത​ലുള്ള ഒരു വ്യക്തിക്ക്‌ ദൃഢത കൂടിയ ഒരു മെത്ത വേണ്ടി​വ​രും.

വലിപ്പം. കിടന്ന കിടപ്പിൽ തിരി​യാ​നും മറിയാ​നും ഒക്കെ പറ്റുന്ന തരത്തി​ലുള്ള കിടക്ക വേണം വാങ്ങാൻ. രണ്ടു​പേ​രാണ്‌ ഒരു കിടക്ക​യിൽ കിടക്കാൻ പോകു​ന്ന​തെ​ങ്കിൽ ഒരു കാര്യം ഓർക്കു​ന്നതു നന്നായി​രി​ക്കും. ഒരു സ്റ്റാൻഡേർഡ്‌-സൈസ്‌ ഡബിൾ ബെഡ്‌ ഉപയോ​ഗി​ക്കുന്ന രണ്ട്‌ മുതിർന്ന ആളുകൾക്ക്‌, തൊട്ടി​ലിൽ ഒരു കുഞ്ഞിന്‌ എന്തുമാ​ത്രം സ്ഥലം കിട്ടു​മോ അത്രയും സ്ഥലമേ കിട്ടു​ക​യു​ള്ളൂ.

കട്ടിലും അതിനു ചേരുന്ന മെത്തയും. സാധി​ക്കു​മെ​ങ്കിൽ, കട്ടിലും അതിനു ചേരുന്ന ഒരു മെത്തയും വാങ്ങു​ന്ന​താ​വും നല്ലത്‌. പഴയ കട്ടിലിൽ ഒരു പുതിയ മെത്ത ഇട്ട്‌ ഉപയോ​ഗി​ച്ചാൽ മെത്ത പെട്ടെന്ന്‌ കേടാ​യി​പ്പോ​യേ​ക്കാം. അത്‌, മെത്തയു​ടെ ഗാരണ്ടി​യെ​യോ വാറണ്ടി​യെ​യോ പ്രതി​കൂ​ല​മാ​യി ബാധി​ക്കു​ക​യും ചെയ്‌തേ​ക്കാം.

വില. മുടക്കുന്ന പണത്തെ ആശ്രയി​ച്ചി​രി​ക്കും മിക്ക​പ്പോ​ഴും നിങ്ങൾക്കു കിട്ടുന്ന മെത്തയു​ടെ ഗുണനി​ല​വാ​രം. അതു​കൊണ്ട്‌, നിങ്ങളു​ടെ കയ്യിലുള്ള പണം​കൊണ്ട്‌ കിട്ടാ​വു​ന്ന​തി​ലേ​ക്കും നല്ല മെത്ത വാങ്ങാൻ ശ്രമി​ക്കുക.

സ്ഥലം. സ്ഥലം കുറവാ​ണെ​ങ്കിൽ, ഒരു മർഫി കിടക്ക​യോ ഭിത്തി​യി​ലേക്കു പൊക്കി വെക്കാ​വുന്ന തരം കിടക്ക​യോ സോഫാ-കം-ബെഡോ ചുരു​ട്ടി​വെ​ക്കാ​വുന്ന തരം പഞ്ഞി​മെ​ത്ത​യോ പരീക്ഷി​ച്ചു നോക്കാ​വു​ന്ന​താണ്‌.

ആരോഗ്യ പ്രശ്‌നങ്ങൾ. സാധാരണ കട്ടിൽ ഉപയോ​ഗി​ക്കു​ന്നതു സുഖ​പ്ര​ദ​മ​ല്ലെ​ങ്കിൽ, നമ്മുടെ ഇഷ്ടത്തി​ന​നു​സ​രിച്ച്‌ ക്രമീ​ക​രി​ക്കാ​വുന്ന തരം കട്ടിലു​കൾ ഉപയോ​ഗി​ക്കു​ന്നതു നല്ലതാണ്‌. ഉദാഹ​ര​ണ​ത്തിന്‌, വെള്ളം നിറച്ച കിടക്ക, ശരീര​ത്തി​ന്റെ ഭാരത്തെ ഒരു​പോ​ലെ താങ്ങു​ക​യും അങ്ങനെ പ്രഷർ പോയ​ന്റു​കൾകൊ​ണ്ടു ദുരി​ത​മ​നു​ഭ​വി​ക്കു​ന്ന​വർക്ക്‌ ആശ്വാ​സ​മേ​കു​ക​യും ചെയ്യും.

അലർജിയുള്ളവർ. പൊടി​യോട്‌ അല്ലെങ്കിൽ പഞ്ഞി പോലുള്ള പദാർഥ​ങ്ങ​ളോട്‌ അലർജി​യു​ണ്ടെ​ങ്കിൽ, കൃത്രിമ നാരുകൾ ഉപയോ​ഗി​ച്ചുള്ള മെത്തയോ ഫോം മെത്തയോ ഉപയോ​ഗി​ക്കു​ന്ന​താ​കും നല്ലത്‌. വെള്ളം നിറച്ച കിടക്ക​യി​ലോ പലകയോ മറ്റോ അടിച്ച കട്ടിലു​ക​ളി​ലോ അലർജി ഉണ്ടാക്കുന്ന വസ്‌തു​ക്കൾ അത്രയ്‌ക്ക്‌ കുമി​ഞ്ഞു​കൂ​ടു​ക​യില്ല എന്നതു ശ്രദ്ധേ​യ​മാണ്‌.

പ്രായമായവർ. കിടക്ക​യു​ടെ അറ്റത്ത്‌ ഇരിക്കു​മ്പോൾ നിങ്ങളു​ടെ കാൽ നിലത്തു മുട്ടു​ന്നു​ണ്ടെന്ന്‌ ഉറപ്പു​വ​രു​ത്തുക. കട്ടിലിന്‌ ഉറപ്പുള്ള അരികു​ക​ളോ​ടു കൂടിയ ബേസാണ്‌ ഉള്ളതെ​ങ്കിൽ ഇരുന്നു​കൊണ്ട്‌ കിടക്ക​യിൽ കയറാ​നും ഇറങ്ങാ​നും എളുപ്പ​മാ​യി​രി​ക്കും.

[25-ാം പേജിലെ ചതുരം]

സുരക്ഷാ നിർദേ​ശ​ങ്ങൾ

◼ രാത്രി​യിൽ ധരിക്കുന്ന വസ്‌ത്രങ്ങൾ എളുപ്പം തീ പിടി​ക്കാത്ത തരത്തി​ലു​ള്ളവ ആയിരി​ക്കണം.

◼ തീയു​ടെ​യോ ഹീറ്ററി​ന്റെ​യോ അടുത്തല്ല നിങ്ങളു​ടെ കിടക്ക എന്ന്‌ ഉറപ്പാ​ക്കണം.

◼ ഇലക്‌ട്രിക്‌ ബ്ലാങ്കറ്റ്‌ ഉപയോ​ഗി​ക്കു​ന്നു​ണ്ടെ​ങ്കിൽ, അതിന്റെ അറ്റമെ​ല്ലാം വിട്ടു​തു​ട​ങ്ങി​യോ വല്ലാതെ ചുളു​ങ്ങി​യി​ട്ടു​ണ്ടോ കരിഞ്ഞ പാടുകൾ ഉണ്ടോ അല്ലെങ്കിൽ ഇലക്‌ട്രിക്‌ കോഡിന്‌ തേയ്‌മാ​നം സംഭവി​ച്ചി​ട്ടു​ണ്ടോ എന്നെല്ലാം പരി​ശോ​ധി​ച്ചു നോക്കണം. ബ്ലാങ്കറ്റ്‌ നനഞ്ഞി​രി​ക്കു​മ്പോൾ ഒരിക്ക​ലും അത്‌ ഉപയോ​ഗി​ക്ക​രുത്‌. അതു തന്നെ ഉണങ്ങാൻ അനുവ​ദി​ക്കണം. ബ്ലാങ്കറ്റ്‌ ഓൺ ചെയ്‌തി​രി​ക്കു​മ്പോൾ ഒരിക്ക​ലും കട്ടിലിൽ ഭാരമുള്ള സാധനങ്ങൾ വെക്കരുത്‌.

◼ തിളച്ചു​കൊ​ണ്ടി​രി​ക്കുന്ന വെള്ളം ഹോട്ട്‌ വാട്ടർ ബോട്ടി​ലിൽ നിറയ്‌ക്ക​രുത്‌. അത്‌ ഇലക്‌ട്രിക്‌ ബ്ലാങ്കറ്റി​ന്റെ കൂടെ ഉപയോ​ഗി​ക്കു​ക​യും ചെയ്യരുത്‌. കുട്ടി കിടക്ക​യിൽ കിടക്കു​ന്ന​തി​നു​മു​മ്പേ അതു മാറ്റുക.

[23-ാം പേജിലെ രേഖാ​ചി​ത്രം]

(പൂർണ​രൂ​പ​ത്തിൽ കാണു​ന്ന​തിന്‌ പ്രസി​ദ്ധീ​ക​രണം നോക്കുക)

മെത്തയുറ

ഡീപ്പ്‌-സ്റ്റിച്ച്‌ ഡയമണ്ട്‌ ക്വിൽറ്റിങ്‌

മൈ​ക്രോ​ക്വിൽറ്റിങ്‌

റ്റഫ്‌റ്റിങ്‌

പഞ്ഞിയോ മറ്റോ നിറച്ച ഭാഗം

മെത്തയ്‌ക്ക്‌ ദൃഢത​യും താങ്ങും നൽകുന്ന ഉള്ളിലത്തെ ഭാഗം

ഫോം

കൺടി​ന്യു​വസ്‌ സ്‌പ്രി​ങ്ങു​കൾ

ഓപ്പൺ സ്‌പ്രി​ങ്ങു​കൾ

പോക്കറ്റ്‌ സ്‌പ്രി​ങ്ങു​കൾ

[കടപ്പാട്‌]

Reproduced by courtesy of the Sleep Council

[25-ാം പേജിലെ ചിത്രം]

Reproduced by courtesy of the Sleep Council