മനസ്സാക്ഷി സംബന്ധ​മായ പ്രശ്‌നം

ആർസെ​നിക്‌ ആൻഡ്‌ ഓൾഡ്‌ ലേസ്‌ എന്ന 1944-ലെ ക്ലാസിക്‌ ചലച്ചി​ത്ര​ത്തിൽ ആർസെ​നിക്‌ ചേർത്ത എൽഡർബെറി വീഞ്ഞ്‌ കുടിച്ച ഉടനെ കുറേ പ്രായ​മായ ആളുകൾ മരിക്കുന്ന രംഗമു​ണ്ടാ​യി​രു​ന്നു. നിമി​ഷ​നേരം കൊണ്ട്‌ ആളുടെ കഥകഴി​ക്കുന്ന ഒരു വിഷമാണ്‌ ആർസെ​നിക്‌ എന്ന പൊതു ധാരണ​യെ​യാണ്‌ ആ ചലച്ചി​ത്രം ദൃശ്യ​വ​ത്‌ക​രി​ച്ചത്‌. എന്നാൽ, ചിത്ര​ത്തി​ലെ തത്‌ക്ഷ​ണ​മുള്ള ആ മരണങ്ങൾക്കു കാരണം വാസ്‌ത​വ​ത്തിൽ ആർസെ​നിക്‌ അല്ലായി​രു​ന്നു, മറിച്ച്‌ അതോ​ടൊ​പ്പം വീഞ്ഞിൽ ചേർത്തി​രുന്ന സ്‌ട്രി​ക്‌​നൈ​നും സയ​നൈ​ഡും ആയിരു​ന്നു.

“സാധാ​ര​ണ​ഗ​തി​യിൽ, പെട്ടെ​ന്നുള്ള മരണത്തിന്‌ ഇടയാ​ക്കുന്ന ഒരു മാരക വിഷ​മൊ​ന്നു​മല്ല ആർസെ​നിക്‌” എന്ന്‌ ദ ന്യൂ ഇംഗ്ലണ്ട്‌ ജേർണൽ ഓഫ്‌ മെഡി​സി​നിൽ ഡോ. റോബർട്ട്‌ ഇ. ഗാല്ലഗർ എഴുതി. എന്നിരു​ന്നാൽത്ത​ന്നെ​യും “കുടി​വെ​ള്ള​ത്തി​ലൂ​ടെ​യും വ്യാവ​സാ​യിക മലിനീ​കാ​രി​ക​ളി​ലൂ​ടെ​യും ഉണ്ടാകുന്ന ആർസെ​നിക്‌ വിഷബാധ പലയി​ട​ങ്ങ​ളി​ലും ഗുരു​ത​ര​മായ ആരോ​ഗ്യ​പ്ര​ശ്‌നങ്ങൾ സൃഷ്ടി​ക്കു​ന്നു, അതായത്‌ ത്വക്ക്‌, മൂത്ര​സഞ്ചി, ശ്വാസ​കോ​ശം, കരൾ എന്നിവയെ ബാധി​ക്കുന്ന അർബുദം പോ​ലെ​യുള്ള രോഗ​ങ്ങൾക്ക്‌ അത്‌ ഇടയാ​ക്കി​യേ​ക്കാം” എന്ന്‌ അദ്ദേഹം കൂട്ടി​ച്ചേർത്തു.

മേൽപ്പറഞ്ഞ വിവര​ങ്ങ​ളു​ടെ അടിസ്ഥാ​ന​ത്തിൽ നോക്കു​മ്പോൾ ഡോക്‌ടർമാർ ആർസെ​നിക്‌ ഉപയോ​ഗി​ച്ചുള്ള ഒരു ചികി​ത്സയെ കുറിച്ച്‌ ചിന്തി​ക്കാ​ത്ത​തി​ന്റെ കാരണം നമുക്ക്‌ മനസ്സി​ലാ​ക്കാ​വു​ന്ന​തേ​യു​ള്ളൂ. എന്നാൽ കാനഡ​യിൽനി​ന്നുള്ള പിൻവ​രുന്ന അനുഭവം ശ്രദ്ധി​ക്കുക. രക്തപ്പകർച്ച​യും ആർസെ​നി​ക്കും ചികി​ത്സ​യ്‌ക്കാ​യി നിർദേ​ശി​ക്ക​പ്പെ​ട്ട​പ്പോൾ ഡാർളിൻ എന്ന രോഗി​യു​ടെ മനസ്സാ​ക്ഷി​യും അവരുടെ ഡോക്ടർമാ​രു​ടെ​യും നഴ്‌സു​മാ​രു​ടെ​യും ഫാർമ​സി​സ്റ്റി​ന്റെ​യും മനസ്സാ​ക്ഷി​യും തമ്മിലു​ണ്ടായ ഏറ്റുമു​ട്ടൽ അതിൽ വിവരി​ച്ചി​രി​ക്കു​ന്നു. ഡാർളിൻ തന്റെ അനുഭവം പറയുന്നു:

“1996 മേയി​ലാണ്‌ സംഭവം. എന്റെ മോണ​ക​ളിൽനിന്ന്‌ കടുത്ത രക്തസ്രാ​വം ഉണ്ടാകാൻ തുടങ്ങി. ഒൺടേ​റി​യോ​യി​ലെ കിങ്‌സ്റ്റ​ണി​ലുള്ള രക്തശാ​സ്‌ത്ര വിദഗ്‌ധ​നായ ഡോ. ജോൺ മാത്യൂസ്‌ എന്റെ രോഗം എന്താ​ണെന്നു കണ്ടുപി​ടി​ച്ചു. അക്യൂട്ട്‌ പ്രോ​മൈ​യെ​ലോ​സൈ​റ്റിക്‌ ലൂക്കി​മിയ അഥവാ എപിഎൽ എന്ന പേരിൽ അറിയ​പ്പെ​ടുന്ന ഒരു അപൂർവ​തരം കാൻസർ ആയിരു​ന്നു എനിക്ക്‌. മജ്ജ പരി​ശോ​ധന ഉൾപ്പെടെ ഒട്ടേറെ പരി​ശോ​ധ​ന​കൾക്കു ശേഷം ഡോ. മാത്യൂസ്‌ എപിഎൽ എന്താ​ണെ​ന്നും അതിനുള്ള ചികിത്സ എന്താ​ണെ​ന്നും വളരെ അനുക​മ്പാ​പൂർവം വിവരി​ച്ചു​തന്നു. ഈ രോഗ​ത്തി​നു സാധാരണ നിർദേ​ശി​ക്ക​പ്പെ​ടുന്ന ചികി​ത്സ​യിൽ രക്തം മാറ്റലും കീമോ​തെ​റാ​പ്പി​യും ഉൾപ്പെ​ട്ടി​രു​ന്നു. എന്നാൽ എന്റെ ബൈബിൾ പരിശീ​ലിത മനസ്സാക്ഷി രക്തം സ്വീക​രി​ക്കാൻ എന്നെ അനുവ​ദി​ക്കു​മാ​യി​രു​ന്നില്ല.

“ഡോക്‌ടർമാർ ജ്ഞാനപൂർവം പ്രവർത്തി​ച്ചു. എന്റെ മനസ്സു മാറ്റാൻ ശ്രമി​ച്ചു​കൊണ്ട്‌ വിലപ്പെട്ട സമയം നഷ്ടപ്പെ​ടു​ത്തു​ന്ന​തി​നു പകരം അവർ ആ രോഗ​ത്തിന്‌ മറ്റേ​തെ​ങ്കി​ലും വൈദ്യ​ചി​കിത്സ ലഭ്യമാ​ണോ എന്ന്‌ അന്വേ​ഷി​ച്ചു. വിറ്റാ​മിൻ-എ ഉത്‌പ​ന്ന​വും ഒരുവി​ധം ശക്തമായ കീമോ​തെ​റാ​പ്പി​യും ഉൾപ്പെ​ടുന്ന ഒരു ചികിത്സ നടത്താൻ ഒടുവിൽ അവർ തീരു​മാ​നി​ച്ചു. മൂന്നു മാസ​ത്തേക്ക്‌ എന്റെ രോഗം അപ്രത്യ​ക്ഷ​മാ​യി. എന്നാൽ അത്‌ പൂർവാ​ധി​കം ശക്തി​യോ​ടെ തിരി​ച്ചു​വന്നു. മസ്‌തി​ഷ്‌കം നീരു​വെ​ച്ച​തി​നെ തുടർന്ന്‌ എനിക്ക്‌ സഹിക്കാ​നാ​വാത്ത തലവേദന ഉണ്ടായി. മാത്രമല്ല, എന്റെ ശരീരം ചികി​ത്സ​യോട്‌ പ്രതി​രോ​ധ​ശേഷി ആർജി​ച്ചെ​ടു​ത്തി​രു​ന്ന​തു​മൂ​ലം ആ ചികിത്സ വീണ്ടും ഫലിക്കി​ല്ലെന്ന സ്ഥിതി​യാ​യി. രക്തപ്പകർച്ച​യ​ല്ലാ​തെ ഇനി മറ്റൊരു മാർഗ​വു​മി​ല്ലെന്ന്‌ ഡോക്‌ടർമാർ അറിയി​ച്ചു. ഈ സ്ഥിതി തുടർന്നാൽ രണ്ടാഴ്‌ച പോലും ഞാൻ ജീവി​ച്ചി​രി​ക്കി​ല്ലെന്ന്‌ അവർ ഞങ്ങളോ​ടു പറഞ്ഞു.

“പിന്നീ​ടുള്ള ഏതാനും ദിവസങ്ങൾ വൈകാ​രി​ക​മാ​യി വല്ലാതെ തളർത്തുന്ന തരത്തി​ലു​ള്ള​താ​യി​രു​ന്നു. വക്കീലി​നെ ചെന്നു​കണ്ട്‌ വിൽപ്പ​ത്രം എഴുതി​ക്കേ​ണ്ട​തു​ണ്ടാ​യി​രു​ന്നു, ശവസം​സ്‌കാ​ര​ത്തി​നു വേണ്ട ക്രമീ​ക​ര​ണങ്ങൾ ചെയ്‌തു​വെ​ക്കേ​ണ്ട​തു​ണ്ടാ​യി​രു​ന്നു. അതിനു​പു​റമേ എനിക്ക്‌ കൂടുതൽ രക്തപരി​ശോ​ധ​ന​ക​ളും നടത്തണ​മാ​യി​രു​ന്നു. അതിനി​ട​യി​ലാണ്‌ ഡോ. മാത്യൂസ്‌ അസാധാ​ര​ണ​മായ ഒരു വൈദ്യ ചികി​ത്സയെ കുറിച്ച്‌ ഞങ്ങളോ​ടു പറയു​ന്നത്‌. ചൈന​യി​ലെ ഡോക്ടർമാർ എപിഎൽ-നു വേണ്ടി ഈ ചികി​ത്സാ​രീ​തി നടത്തി വിജയി​ക്കു​ക​യു​ണ്ടാ​യെന്ന്‌ അദ്ദേഹം പറഞ്ഞു. ബ്ലഡ്‌, പ്രൊ​സീ​ഡി​ങ്‌സ്‌ ഓഫ്‌ ദ നാഷണൽ അക്കാഡമി ഓഫ്‌  സയൻസസ്‌ എന്നീ പേരു​കേട്ട ശാസ്‌ത്ര ജേർണ​ലു​ക​ളിൽ അതേക്കു​റിച്ച്‌ റിപ്പോർട്ട്‌ വരിക​യും ചെയ്‌തി​രു​ന്നു. ‘ആർസെ​നിക്‌ ട്രയോ​ക്‌​സൈഡ്‌,

ശരീര​ത്തിന്‌ ഹാനി​ക​ര​മ​ല്ലാ​ത്ത​വി​ധം അത്രയും കുറഞ്ഞ അളവിൽ കുത്തി​വെ​ക്കു​ക​വഴി അക്യൂട്ട്‌ പ്രോ​മൈ​യെ​ലോ​സൈ​റ്റിക്‌ ലൂക്കി​മിയ (എപിഎൽ) ചികി​ത്സി​ച്ചു ഭേദമാ​ക്കാൻ സാധി​ച്ചി​ട്ടു​ണ്ടെന്ന്‌ അറിയു​ന്നത്‌ പലരെ​യും അത്ഭുത​പ്പെ​ടു​ത്തി​യേ​ക്കാം’ എന്ന്‌ ഗവേഷണം നടത്തു​ന്ന​തി​നി​ട​യിൽ ഡോക്ട​റും അദ്ദേഹ​ത്തി​ന്റെ സഹകാ​രി​യും ഒരു മെഡിക്കൽ ജേർണ​ലിൽ വായി​ക്കാൻ ഇടയായി.

“ഇപ്പോൾ എന്റെ മുന്നിൽ രണ്ടു വഴികൾ ഉണ്ടായി​രു​ന്നു—ഒന്നുകിൽ എന്റെ മനസ്സാ​ക്ഷി​യെ വഞ്ചിച്ച്‌ ഒരു രക്തപ്പകർച്ച​യ്‌ക്ക്‌ വിധേ​യ​യാ​കുക, അല്ലെങ്കിൽ ആർസെ​നിക്‌ ഉപയോ​ഗി​ച്ചുള്ള, ഒട്ടും​തന്നെ അറിയ​പ്പെ​ടാത്ത ഈ ചികിത്സ സ്വീക​രി​ക്കുക. ഞാൻ ആർസെ​നിക്‌ ചികിത്സ തിര​ഞ്ഞെ​ടു​ത്തു. a എന്നാൽ എന്റെ ഈ തീരു​മാ​നം ഡോക്ടർമാർക്കും നഴ്‌സു​മാർക്കും ഫാർമ​സി​സ്റ്റി​നും ആശുപ​ത്രി അധികൃ​തർക്കു​മെ​ല്ലാം മനസ്സാക്ഷി സംബന്ധ​മായ പ്രശ്‌നം സൃഷ്ടി​ക്കു​മെന്ന്‌ ഞാൻ കരുതി​യ​തേ​യില്ല.

“ആർസെ​നിക്‌ ട്രയോ​ക്‌​സൈഡ്‌ എനിക്കു നൽകാ​മോ​യെന്ന്‌ ആശുപ​ത്രി അധികൃ​തർ റെഗു​ലേ​റ്ററി അതോ​റി​റ്റി​യോട്‌ ആരാഞ്ഞു. അവരിൽനിന്ന്‌ അനുവാ​ദം കിട്ടി​യാ​ലേ അത്തരം ചികി​ത്സകൾ നടപ്പാ​ക്കാൻ കഴിയു​മാ​യി​രു​ന്നു​ള്ളൂ. ആദ്യം ഫാർമ​സിസ്റ്റ്‌ സഹകരി​ക്കാൻ വിസമ്മ​തി​ച്ചു. അദ്ദേഹം അതിന്റെ സുരക്ഷി​ത​ത്വ​ത്തെ ചോദ്യം ചെയ്‌തു, കാരണം അദ്ദേഹ​ത്തി​ന്റെ മനസ്സാക്ഷി അതിന്‌ അനുവ​ദി​ക്കു​മാ​യി​രു​ന്നില്ല. എന്നാൽ, എന്നെ ചികി​ത്സി​ക്കുന്ന ഡോക്ടർമാ​രായ ഡോ. മാത്യൂ​സും ഡോ. ഗാൽ​ബ്രെ​യ്‌ത്തും ഈ ചികി​ത്സയെ സംബന്ധിച്ച്‌ ഉറച്ച വിശ്വാ​സ​ത്തോ​ടെ സംസാ​രി​ക്കു​ക​യും ബോധ്യം വരുത്തുന്ന തെളി​വു​കൾ നിരത്തു​ക​യും ചെയ്‌തു. ഒടുവിൽ, ചികിത്സ സംബന്ധിച്ച്‌ വൈദ്യ​ശാ​സ്‌ത്ര​പ​ര​മായ വേണ്ടത്ര തെളി​വു​കൾ ലഭിച്ചു​ക​ഴി​ഞ്ഞ​പ്പോൾ ആശുപ​ത്രി അധികൃ​ത​രും ഫാർമ​സി​സ്റ്റും സഹകരി​ക്കാ​മെ​ന്നാ​യി.

“ഉടനടി ഉപയോ​ഗി​ക്കാൻ പാകത്തിന്‌ ആർസെ​നിക്‌ ഉത്‌പന്നം തയ്യാറാ​ക്കാ​മെ​ന്നും അത്‌ അണുവി​മു​ക്ത​മാ​ക്കാ​മെ​ന്നും ഫാർമ​സിസ്റ്റ്‌ സമ്മതിച്ചു. എന്നാൽ, വിവാദം ഉയർത്തിയ ആ ഉത്‌പന്നം അടങ്ങുന്ന ലായനി നിറച്ച സഞ്ചി എന്റെ തലയ്‌ക്കു മുകളിൽ തൂക്കാൻ നഴ്‌സു​മാ​രു​ടെ മനസ്സാക്ഷി അനുവ​ദി​ച്ചില്ല. അതു​കൊണ്ട്‌ ഡോക്‌ടർമാർത​ന്നെ​യാണ്‌ അതു ചെയ്‌തത്‌. നഴ്‌സു​മാർ നോക്കി​നിൽക്കു​കയേ ചെയ്‌തു​ള്ളൂ. രക്തം സ്വീക​രി​ക്കാൻ നഴ്‌സു​മാർ എന്നോട്‌ കേണ​പേ​ക്ഷി​ച്ചു. ഞാൻ മരിക്കു​മെന്ന്‌ അവർക്ക്‌ ഉറപ്പാ​യി​രു​ന്നു. എന്നാൽ, രക്തം സ്വീക​രി​ക്കു​ക​യി​ല്ലെന്ന എന്റെ മനസ്സാ​ക്ഷി​പൂർവ​ക​മായ തീരു​മാ​നത്തെ മാനി​ക്കുക എന്നുള്ളത്‌ അവരുടെ തൊഴിൽപ​ര​മായ കടമയാ​ണെന്ന്‌ ഞാൻ സൂചി​പ്പി​ച്ചു. ഞാൻ അവർക്കു നന്ദി പറഞ്ഞു, അവരെ ചേർത്തു​പി​ടി​ച്ചു, വ്യക്തി​പ​ര​മായ വികാ​ര​ങ്ങളെ മാറ്റി​നിർത്തി ചിന്തി​ക്കാൻ അവരോട്‌ അഭ്യർഥി​ച്ചു. ഞങ്ങൾ തമ്മിൽ നല്ലൊരു ബന്ധം നിലനിർത്തി പോന്നു. ആർസെ​നിക്‌ ട്രയോ​ക്‌​സൈഡ്‌ ഉപയോ​ഗി​ച്ചു​കൊ​ണ്ടുള്ള ചികിത്സ ആറു മാസ​ത്തേക്കു തുടർന്നു. ഞാൻ ശരിക്കും സുഖം​പ്രാ​പി​ച്ചു. ഇനിയുള്ള ചികിത്സ വീട്ടിൽവെച്ചു ചെയ്‌താൽ മതി​യെന്ന്‌ ഡോക്‌ടർമാർ പറഞ്ഞു.

“വീട്ടിൽ വന്ന്‌ എനിക്ക്‌ പരിച​രണം നൽകാൻ വിക്ടോ​റിയ ഓർഡ​റി​ലെ നഴ്‌സു​മാ​രെ ഏർപ്പാ​ടാ​ക്കി. പിന്നെ​യും മനസ്സാക്ഷി സംബന്ധ​മായ പ്രശ്‌നം പൊങ്ങി​വന്നു. അവരും ആ ലായനി എനിക്കു നൽകു​ന്ന​തിൽ വൈമു​ഖ്യം കാട്ടി. യോഗങ്ങൾ, കത്തുകൾ, പേരു​കേട്ട വൈദ്യ​ശാ​സ്‌ത്ര ജേർണ​ലു​ക​ളി​ലെ ലേഖനങ്ങൾ എന്നിവ കാര്യങ്ങൾ നേരെ​യാ​ക്കാൻ സഹായി​ച്ചു. നഴ്‌സു​മാർ ഒടുവിൽ സഹകരി​ക്കാ​മെന്നു സമ്മതിച്ചു. 1997 സെപ്‌റ്റം​ബ​റിൽ എന്റെ ചികിത്സ പൂർത്തി​യാ​യി.

“എന്റെ രോഗം തിരി​ച്ചു​വ​രാം. ഏതു സമയത്തും പൊട്ടി​ത്തെ​റി​ക്കാ​വുന്ന ഒരു ടൈം​ബോബ്‌ പോ​ലെ​യാണ്‌ അതെന്ന്‌ ഡോക്‌ടർ പറയുന്നു. എന്നാൽ ക്രിസ്‌തീയ യോഗ​ങ്ങൾക്കു ക്രമമാ​യി ഹാജരാ​യി​ക്കൊ​ണ്ടും “എനിക്കു ദീനം എന്നു യാതൊ​രു നിവാ​സി​യും പറക”യില്ലാത്ത കാലത്തെ കുറി​ച്ചുള്ള ബൈബി​ള​ധി​ഷ്‌ഠിത പ്രത്യാശ മറ്റുള്ള​വ​രു​മാ​യി പങ്കു​വെ​ക്കു​ന്ന​തിൽ തിര​ക്കോ​ടെ ഏർപ്പെ​ട്ടു​കൊ​ണ്ടും ഓരോ ദിവസ​വും സന്തോ​ഷ​ത്തോ​ടെ​യി​രി​ക്കാൻ ഞാൻ പഠിച്ചി​രി​ക്കു​ന്നു.”—യെശയ്യാ​വു 33:24.

ഏറ്റവും മെച്ചമായ ചികിത്സ പ്രദാനം ചെയ്യുക എന്ന ഭാരിച്ച ഉത്തരവാ​ദി​ത്വം വഹിക്കു​ന്ന​വ​രാ​ണു ഡോക്‌ടർമാർ. സാധാ​ര​ണ​ഗ​തി​യിൽ അവർ അത്‌ ഗൗരവ​ത്തോ​ടെ വീക്ഷി​ക്കു​ക​യും മനസ്സാ​ക്ഷി​പൂർവം, തങ്ങളുടെ കഴിവി​ന്റെ​യും നിലവി​ലുള്ള അറിവി​ന്റെ​യും പരിധി​ക്കു​ള്ളിൽനി​ന്നു​കൊണ്ട്‌ ചികിത്സ നടത്തു​ക​യും ചെയ്യുന്നു. ഈ അനുഭവം കാണി​ക്കു​ന്ന​തു​പോ​ലെ ഡോക്‌ടർമാ​രും നഴ്‌സു​മാ​രും ചികി​ത്സാ​രം​ഗത്ത്‌ പ്രവർത്തി​ക്കുന്ന മറ്റു വിദഗ്‌ധ​രും പ്രായ​പൂർത്തി​യായ രോഗി ഉറച്ചു വിശ്വ​സി​ക്കുന്ന കാര്യ​ങ്ങ​ളെ​യും മനസ്സാക്ഷി അനുസ​രിച്ച്‌ എടുക്കുന്ന തീരു​മാ​ന​ങ്ങ​ളെ​യും ആദരി​ക്കു​ക​യും അതനു​സ​രിച്ച്‌ വഴക്കമു​ള്ള​വ​രാ​യി​രി​ക്കു​ക​യും ചെയ്യു​ന്ന​പക്ഷം അവർക്ക്‌ ചികി​ത്സ​യിൽ വളരെ​യ​ധി​കം നേട്ടങ്ങൾ കൈവ​രി​ക്കാ​നാ​കും.

[അടിക്കു​റിപ്പ്‌]

[20-ാം പേജിലെ ചിത്രം]

ഡാർളിൻ ഷെപ്പാർഡ്‌