ലോകത്തെ വീക്ഷിക്കൽ

സമ്മർദം അനുഭ​വി​ക്കുന്ന വിദ്യാർഥി​കൾ

വർഷാ​വ​സാന പരീക്ഷാ സമയത്ത്‌ ഇന്ത്യയിൽ മിക്ക കുട്ടി​ക​ളും വർധിച്ച സമ്മർദം അനുഭ​വി​ക്കു​ന്നു എന്ന്‌ മും​ബൈ​യി​ലെ ദി ഏഷ്യൻ ഏജ്‌ റിപ്പോർട്ടു ചെയ്യുന്നു. പരീക്ഷ​യ്‌ക്കു മുമ്പുള്ള തിരക്കിട്ട പഠനവും ഉയർന്ന മാർക്കു നേടാ​നുള്ള സമ്മർദ​വും താങ്ങാൻ കഴിയാ​തെ വരുന്ന​തി​ന്റെ ഫലമായി പരീക്ഷാ​ക്കാ​ലത്ത്‌ മനോ​രോഗ വിദഗ്‌ധരെ സന്ദർശി​ക്കുന്ന വിദ്യാർഥി​ക​ളു​ടെ എണ്ണം ഇരട്ടി​ക്കു​ന്നു. തങ്ങളുടെ മക്കൾക്കു നല്ല മാർക്കു ലഭിച്ചു കാണാ​നുള്ള വ്യഗ്ര​ത​യിൽ ചില മാതാ​പി​താ​ക്കൾ എല്ലാത്തരം വിനോ​ദ​വും കർശന​മാ​യി നിരോ​ധി​ക്കു​ന്നു. മനോ​രോഗ വിദഗ്‌ധ​നായ വി. കെ. മുന്ദ്ര ഇങ്ങനെ പറയുന്നു: “മാതാ​പി​താ​ക്കൾ കുട്ടി​ക​ളു​ടെ​മേൽ വലിയ സമ്മർദം ചെലു​ത്തു​ന്നു. അതു​പോ​ലെ മറ്റു വിദ്യാർഥി​ക​ളു​മാ​യുള്ള മത്സരവു​മുണ്ട്‌.” അദ്ദേഹം ഇങ്ങനെ കൂട്ടി​ച്ചേർത്തു: “അൽപ്പം വിനോ​ദ​വും വിശ്ര​മ​വും കുട്ടിക്ക്‌ ഉന്മേഷം പകരു​ക​യും കൂടുതൽ നന്നായി പഠിക്കാൻ സഹായി​ക്കു​ക​യും ചെയ്യു​മെന്ന കാര്യം [മിക്ക മാതാ​പി​താ​ക്ക​ളും] മനസ്സി​ലാ​ക്കു​ന്നില്ല.” പരീക്ഷാ സമയത്തെ ഈ സമ്മർദം “ഒന്നു മുതൽ ഏഴു വരെയുള്ള ക്ലാസ്സു​ക​ളി​ലെ കുട്ടി​കളെ പോലും ബാധി​ക്കാൻ തുടങ്ങി​യി​രി​ക്കു​ന്നു” എന്ന്‌ ഡോ. ഹരീഷ്‌ ഷെട്ടി ചൂണ്ടി​ക്കാ​ണി​ച്ചു.

കാട്ടു​പ​ന്നി​കൾ നഗരം ചുറ്റാ​നി​റ​ങ്ങു​മ്പോൾ

കാട്ടു​പ​ന്നി​കൾ സ്വതവെ നാണം​കു​ണു​ങ്ങി​ക​ളായ വനവാ​സി​കൾ ആണെങ്കി​ലും അവ ഇപ്പോൾ നഗരങ്ങൾ ധാരാളം ഭക്ഷണവും ഇരപി​ടി​യ​ന്മാ​രിൽ നിന്നുള്ള സംരക്ഷ​ണ​വും പ്രദാനം ചെയ്യു​ന്ന​താ​യി കണ്ടെത്തി​യി​രി​ക്കു​ക​യാണ്‌ എന്നു ജർമൻ വാരി​ക​യായ ഡി വൊചെ പറയുന്നു. കാട്ടു​പ​ന്നി​കൾ ബെർലിൻ നഗരത്തിൽ പ്രസവി​ക്കുക പോലും ചെയ്‌തി​രി​ക്കു​ന്നു. വൃക്ഷനി​ബി​ഡ​മായ സ്ഥലങ്ങളി​ലും പൊതു പാർക്കു​ക​ളി​ലും മാത്രമല്ല വിശന്നു​വ​ല​യുന്ന ഈ മൃഗങ്ങൾ റോന്തു​ചു​റ്റു​ന്നത്‌. ചെടികൾ പിഴു​തെ​ടുത്ത്‌ അവയുടെ കിഴങ്ങു​ക​ളും മറ്റും തിന്നു​കൊണ്ട്‌ അവ സ്വകാര്യ ഉദ്യാ​ന​ങ്ങ​ളും നശിപ്പി​ക്കു​ന്നു. 350 കിലോ​ഗ്രാം വരെ തൂക്കമുള്ള കാട്ടു​പ​ന്നി​കളെ കണ്ട്‌ പേടി​ച്ചരണ്ട ആളുകൾ മരത്തിൽ ഓടി​ക്ക​യ​റു​ക​യും ടെലി​ഫോൺ ബൂത്തു​ക​ളിൽ അഭയം തേടു​ക​യു​മൊ​ക്കെ ചെയ്‌ത സംഭവങ്ങൾ ഉണ്ടായി​ട്ടുണ്ട്‌. ഈ മൃഗങ്ങൾ കണക്കറ്റ വാഹനാ​പ​ക​ട​ങ്ങൾക്കും ഇടയാ​ക്കി​യി​രി​ക്കു​ന്നു. ജോലി കഴിഞ്ഞ്‌ വീട്ടിൽ മടങ്ങി​യെ​ത്തുന്ന പലർക്കും കുറ്റി​രോ​മ​ങ്ങ​ളുള്ള ഈ അതി​ക്ര​മി​കളെ നേരി​ടേ​ണ്ടി​വ​ന്നി​ട്ടുണ്ട്‌. ഒരു വ്യക്തി ഇങ്ങനെ ചോദി​ക്കു​ന്നു: “കാറി​നും വീടിന്റെ വാതി​ലി​നും ഇടയ്‌ക്ക്‌ 20 കാട്ടു​പ​ന്നി​കൾ നിൽക്കു​മ്പോൾ ഞാൻ എങ്ങനെ അകത്തു കടക്കാ​നാണ്‌?”

പുതിയ ജൈവ​യി​ന​ങ്ങൾക്കു നിങ്ങളു​ടെ പേരു നൽകാം

“യാതൊ​ന്നി​ന്റെ​യും കുറവില്ല എന്നു തോന്നുന്ന പ്രിയ​പ്പെട്ട ഒരാൾക്കു കൊടു​ക്കാൻ പറ്റിയ ഒരു അപൂർവ സമ്മാന​ത്തി​നാ​യി തിരയു​ക​യാ​ണോ നിങ്ങൾ?” സയൻസ്‌ മാസി​ക​യാണ്‌ ആ ചോദ്യം ചോദി​ച്ചത്‌. അതിങ്ങനെ തുടർന്നു: “എങ്കിൽ വഴിയുണ്ട്‌. നിങ്ങൾ ചെയ്യേ​ണ്ടത്‌ ഇത്രമാ​ത്രം, ജൈവ​വൈ​വി​ധ്യ ഗവേഷ​ണ​ത്തി​നാ​യി ഒരു സംഭാവന അടയ്‌ക്കുക. ഓർക്കി​ഡി​ന്റെ​യോ കൊതു​കി​ന്റെ​യോ തോടി​ല്ലാത്ത കടൽ ഒച്ചി​ന്റെ​യോ മുമ്പ്‌ അറിയ​പ്പെ​ടാത്ത ഒരിന​ത്തി​നു നിങ്ങളു​ടെ പ്രിയ​പ്പെ​ട്ട​യാ​ളു​ടെ പേരു നൽകാൻ കഴിയും. മാത്രമല്ല, അത്‌ ശാസ്‌ത്ര ഗ്രന്ഥങ്ങ​ളിൽ ശാശ്വ​ത​മാ​യി എഴുത​പ്പെ​ടു​ക​യും ചെയ്യും.” അല്ല, ഇനി അവയ്‌ക്കു നിങ്ങളു​ടെ പേരു നൽകാ​നാണ്‌ ആഗ്രഹ​മെ​ങ്കിൽ അതുമാ​കാം. ഇന്നുള്ള ജൈവ​യി​ന​ങ്ങ​ളു​ടെ പത്തി​ലൊ​ന്നോ അതിൽ കുറവോ മാത്രമേ ശാസ്‌ത്ര പ്രസി​ദ്ധീ​ക​ര​ണ​ങ്ങ​ളിൽ സ്ഥാനം പിടി​ച്ചി​ട്ടു​ള്ളു എന്ന്‌ സമീപ​കാല ഗവേഷ​ണങ്ങൾ സൂചി​പ്പി​ക്കു​ന്നു. കണ്ടെത്ത​പ്പെ​ട്ടി​ട്ടുള്ള ആയിര​ക്ക​ണ​ക്കിന്‌ ഇനങ്ങൾ തങ്ങൾക്കൊ​രു പേരും ശാസ്‌ത്ര പ്രസി​ദ്ധീ​ക​ര​ണ​ങ്ങ​ളിൽ ഇടവും ലഭിക്കു​ന്നതു കാത്ത്‌ കാഴ്‌ച​ബം​ഗ്ലാ​വു​ക​ളി​ലെ വലിപ്പു​ക​ളിൽ കഴിയു​ക​യാണ്‌. ഇന്ന്‌ ഒരു വെബ്‌ സൈറ്റി​ലേക്കു തിരി​യുന്ന ഒരാൾക്ക്‌ പേരി​ടാത്ത ഇത്തരം ജൈവ​യി​ന​ങ്ങ​ളു​ടെ—അവയെ കുറിച്ചു പ്രസി​ദ്ധീ​ക​രി​ക്കേണ്ട വിവരണം നേര​ത്തേ​തന്നെ തയ്യാറാ​ക്കി വെച്ചി​ട്ടുണ്ട്‌—ചിത്രങ്ങൾ നിരീ​ക്ഷി​ക്കാൻ കഴിയും. പിന്നെ, 2,800-ഓ അതിൽ കൂടു​ത​ലോ ഡോളർ സംഭാവന അടച്ച്‌ താൻ തിര​ഞ്ഞെ​ടുത്ത ഇനത്തിന്‌ ഇഷ്ടമുള്ള ലാറ്റിൻ നാമം നൽകാം. ഇതുവഴി പുതിയ ജൈവ​യി​ന​ങ്ങ​ളു​ടെ വർഗീ​ക​ര​ണ​ത്തി​നും പരിര​ക്ഷ​യ്‌ക്കും വേണ്ട പണം സ്വരൂ​പി​ക്കാ​നാ​കു​മെന്ന്‌ ബയോ​പാറ്റ്‌ എന്ന സംഘടന പ്രത്യാ​ശി​ക്കു​ന്നു.

കൗമാര വിവാഹം

അടുത്ത​കാ​ലത്തെ ഒരു ദേശീയ കുടും​ബാ​രോ​ഗ്യ സർവേ വെളി​പ്പെ​ടു​ത്തി​യത്‌ അനുസ​രിച്ച്‌, ഇന്ത്യയി​ലെ വിവാ​ഹി​ത​രായ കൗമാ​ര​പ്രാ​യ​ക്കാ​രിൽ 36 ശതമാനം പേർക്കും 13-നും 16-നും ഇടയ്‌ക്കു പ്രായ​മേ​യു​ള്ളു. 17-നും 19-നും ഇടയ്‌ക്കുള്ള പെൺകു​ട്ടി​ക​ളിൽ 64 ശതമാനം പേർക്കും ഇപ്പോൾത്തന്നെ ഒരു കുട്ടി​യുണ്ട്‌ അല്ലെങ്കിൽ അവർ ഗർഭി​ണി​ക​ളാണ്‌ എന്നും പഠനം കണ്ടെത്തി​യ​താ​യി മും​ബൈ​യി​ലെ വർത്തമാ​ന​പ​ത്ര​മായ ഏഷ്യൻ ഏജ്‌ റിപ്പോർട്ടു ചെയ്യുന്നു. 15-നും 19-നും ഇടയ്‌ക്കു പ്രായ​മുള്ള പെൺകു​ട്ടി​കൾ ഗർഭസം​ബ​ന്ധ​മായ പ്രശ്‌ന​ങ്ങ​ളു​ടെ ഫലമായി മരിക്കാ​നുള്ള സാധ്യത 20-നും 24-നും ഇടയ്‌ക്ക്‌ പ്രായ​മു​ള്ള​വരെ അപേക്ഷിച്ച്‌ ഇരട്ടി​യാ​ണെന്നു റിപ്പോർട്ട്‌ പറയുന്നു. കൂടാതെ 15-നും 24-നും മധ്യേ പ്രായ​മുള്ള, ലൈം​ഗിക രോഗങ്ങൾ ബാധി​ച്ചി​രി​ക്കുന്ന യുവാ​ക്ക​ളു​ടെ എണ്ണം കഴിഞ്ഞ ഏതാനും വർഷങ്ങൾകൊണ്ട്‌ ഇരട്ടി​ച്ചി​രി​ക്കു​ന്നു. വർധിച്ചു വരുന്ന ഈ പ്രശ്‌നങ്ങൾ അറിവി​ല്ലാ​യ്‌മ​യു​ടെ​യും സുഹൃ​ത്തു​ക്ക​ളിൽനി​ന്നും മാധ്യ​മ​ങ്ങ​ളിൽനി​ന്നും ലഭിക്കുന്ന തെറ്റായ വിവര​ങ്ങ​ളു​ടെ​യും ഫലമാ​ണെന്നു വിദഗ്‌ധർ അഭി​പ്രാ​യ​പ്പെ​ടു​ന്നു.

ഒരു രോഗ​ത്തി​നു പകരം മറ്റൊന്ന്‌

“വെള്ളത്തിൽ ജീവി​ക്കുന്ന ഒച്ചുക​ളു​ടെ ശരീര​ത്തി​ലുള്ള പരാദങ്ങൾ ഉണ്ടാക്കുന്ന ബിൽഹാർസിയ (ഒച്ചുപനി) എന്ന മാരക രോഗം മുപ്പതു വർഷം മുമ്പ്‌ അഞ്ച്‌ ഈജി​പ്‌തു​കാ​രിൽ മൂന്നു പേരെ ബാധി​ച്ചി​രു​ന്നു” എന്ന്‌ ദി ഇക്കണോ​മിസ്റ്റ്‌ മാസിക പറയുന്നു. ബിൽഹാർസിയ വിരുദ്ധ പ്രചാരണ പരിപാ​ടി​ക​ളു​ടെ ഫലമായി ഇപ്പോൾ ഈ ഭീഷണി ഇല്ലാതാ​യി​രി​ക്കു​ന്നു എന്നുതന്നെ പറയാം. എന്നാൽ പ്രചാരണ പരിപാ​ടി​യു​ടെ ഭാഗമാ​യി നടത്തപ്പെട്ട കുത്തി​വെ​പ്പു​കൾ “ദശലക്ഷ​ക്ക​ണ​ക്കിന്‌ ആളുകൾക്ക്‌ മാരക​മായ ഹെപ്പ​റ്റൈ​റ്റിസ്‌-സി പിടി​പെ​ടാൻ ഇടയാ​ക്കി​യി​രി​ക്കാ​മെന്നു” തെളി​ഞ്ഞി​രി​ക്കു​ന്നു. “ബിൽഹാർസി​യ​യു​ടെ സ്ഥാനത്ത്‌ ഇത്‌ ഈജി​പ്‌തി​ലെ മുഖ്യ ആരോ​ഗ്യ​പ്ര​ശ്‌ന​മാ​യി​ത്തീർന്നേ​ക്കാം.” ബിൽഹാർസി​യ​യ്‌ക്ക്‌ എതി​രെ​യുള്ള കുത്തി​വെ​പ്പു​കൾ നടത്തി​യ​പ്പോൾ, ഉപയോ​ഗിച്ച സിറി​ഞ്ചു​കൾതന്നെ “വീണ്ടും ഉപയോ​ഗി​ക്കു​ക​യും പലപ്പോ​ഴും ശരിക്കും അണുവി​മു​ക്ത​മാ​ക്കാ​തി​രി​ക്കു​ക​യും” ചെയ്‌ത​താണ്‌ ഇതിനു കാരണം എന്നു മാസിക പറയുന്നു. “രക്തത്തി​ലൂ​ടെ പകരുന്ന ഹെപ്പ​റ്റൈ​റ്റിസ്‌-സി വൈറ​സി​നെ (എച്ച്‌സി​വി) കുറിച്ച്‌ ശാസ്‌ത്രജ്ഞർ മനസ്സി​ലാ​ക്കി​യ​തു​തന്നെ 1988-ലാണ്‌.” “ലോക​ത്തിൽ ഏറ്റവും കൂടുതൽ ഹെപ്പ​റ്റൈ​റ്റിസ്‌-സി ബാധിതർ” ഉള്ളത്‌ ഈജി​പ്‌തി​ലാ​ണെന്ന്‌ പഠനങ്ങൾ കാണി​ക്കു​ന്നു.  ഏകദേശം 11 ദശലക്ഷം ഈജി​പ്‌തു​കാർക്ക്‌—ഏതാണ്ട്‌ ആറിൽ ഒരാൾക്കു വീതം—ഈ രോഗ​മു​ള്ള​താ​യി കണക്കാ​ക്ക​പ്പെ​ടു​ന്നു. 70 ശതമാനം കേസു​ക​ളി​ലും ഇത്‌ വിട്ടു​മാ​റാത്ത കരൾ രോഗ​മാ​യി പരിണ​മി​ക്കു​ന്നു, 5 ശതമാ​ന​ത്തി​ന്റെ കാര്യ​ത്തിൽ മരണം സംഭവി​ക്കു​ന്നു. “ഡോക്ടർമാ​രു​ടെ അനാസ്ഥ മൂലം ഒരു വൈറസ്‌ രോഗം ഇത്രയും വ്യാപ​ക​മാ​യി പകരാ​നി​ട​യാ​കു​ന്നത്‌ ഇതാദ്യ​മാ​യി​ട്ടാണ്‌” എന്ന്‌ ആ മാസിക പറയുന്നു. അത്‌ ഇങ്ങനെ​യും കൂട്ടി​ച്ചേർത്തു: “കൂടുതൽ ആളുകൾ ബിൽഹാർസി​യ​യു​ടെ ഫലമായി മരിക്കു​ന്നതു തടയാൻ ഈ വൻ പ്രചാരണ പരിപാ​ടി​കൾ മൂലം കഴിഞ്ഞു എന്നതാണ്‌ ഇപ്പോ​ഴുള്ള ഏക ആശ്വാസം.”

ബലിയാ​ടു​ക​ളാ​കുന്ന കുരു​ന്നു​കൾ

“ഓരോ ദിവസ​വും . . . അഞ്ചു വയസ്സിനു താഴെ​യുള്ള 30,500 കുട്ടികൾ, ഒഴിവാ​ക്കാ​നാ​കു​മാ​യി​രുന്ന കാരണ​ങ്ങ​ളാൽ മരിക്കു​ന്നു” എന്ന്‌ ഐക്യ​രാ​ഷ്‌ട്ര ശിശു​ക്ഷേമ നിധി​യു​ടെ റിപ്പോർട്ടായ ലോക​ത്തി​ലെ കുട്ടി​ക​ളു​ടെ അവസ്ഥ 2000 പറഞ്ഞു. ദി ഇൻഡ്യൻ എക്‌സ്‌പ്ര​സ്സിൽ വന്ന ഒരു റിപ്പോർട്ട്‌ അനുസ​രിച്ച്‌ “കഴിഞ്ഞ ദശകത്തിൽ സായുധ പോരാ​ട്ട​ങ്ങ​ളിൽ 20 ലക്ഷം കുട്ടികൾ കൊല്ല​പ്പെ​ട്ടു​വെ​ന്നും 60 ലക്ഷം കുട്ടി​കൾക്ക്‌ പരി​ക്കേൽക്കു​ക​യോ അംഗഭം​ഗം സംഭവി​ക്കു​ക​യോ ചെയ്‌തെ​ന്നും കണക്കാ​ക്ക​പ്പെ​ടു​ന്നു. മനുഷ്യാ​വ​കാശ ലംഘന​ത്തിന്‌ ഇരകളായ കുട്ടി​ക​ളു​ടെ എണ്ണം ഇതിലും കൂടു​ത​ലാണ്‌.” 1 കോടി 50 ലക്ഷത്തി​ല​ധി​കം കുട്ടികൾ അഭയാർഥി​ക​ളാ​ണെ​ങ്കിൽ പത്തുല​ക്ഷ​ത്തി​ല​ധി​കം പേർ മാതാ​പി​താ​ക്കളെ പിരിഞ്ഞു കഴി​യേണ്ടി വന്നിരി​ക്കു​ന്ന​വ​രോ അനാഥ​രോ ആണ്‌. കൂടാതെ, 5-നും 14-നും ഇടയ്‌ക്കു പ്രായ​മുള്ള 25 കോടി കുട്ടി​ക​ളെ​ങ്കി​ലും നിർബന്ധ തൊഴിൽ ചെയ്യു​ന്ന​വ​രാ​ണെ​ന്നും അവരിൽ 20 ശതമാനം വളരെ അപകട​ക​ര​മായ സാഹച​ര്യ​ങ്ങ​ളി​ലാണ്‌ ജോലി ചെയ്യു​ന്ന​തെ​ന്നും കാണി​ക്കുന്ന അന്താരാ​ഷ്‌ട്ര തൊഴിൽ സംഘട​ന​യു​ടെ പഠനങ്ങളെ കുറി​ച്ചുള്ള പരാമർശ​വും ആ റിപ്പോർട്ടിൽ ഉണ്ടായി​രു​ന്നു. ലോക​വ്യാ​പ​ക​മാ​യി ഏകദേശം പത്തുലക്ഷം കുട്ടികൾ വേശ്യാ​വൃ​ത്തി​യി​ലേക്കു വലിച്ചി​ഴ​യ്‌ക്ക​പ്പെ​ടു​ന്നുണ്ട്‌. ഓരോ മാസവും 2,50,000 കുട്ടി​കൾക്കു എച്ച്‌ഐവി ബാധയു​ണ്ടാ​കു​ന്നു. കൂടാതെ 13 കോടി കുട്ടി​കൾക്ക്‌—മൂന്നിൽ രണ്ടു പേരും പെൺകു​ട്ടി​ക​ളാണ്‌—സ്‌കൂൾ വിദ്യാ​ഭ്യാ​സം ലഭിക്കു​ന്നില്ല.

ചൈന​യു​ടെ വിശിഷ്ട ഭോജ്യ​ങ്ങൾ

“മാറുന്ന ജീവി​ത​ശൈ​ലി​യും ആഹാര​ശീ​ല​ങ്ങ​ളും” ചൈന​യു​ടെ വന്യജീ​വനു ഭീഷണി ഉയർത്തു​ന്നു​വെന്ന്‌ ഡൗൺ ടു എർത്ത്‌ മാസിക പറയുന്നു. ചിലതരം കാട്ടി​റച്ചി മറ്റ്‌ ഭക്ഷണ പദാർഥ​ങ്ങളെ അപേക്ഷിച്ച്‌ ആരോ​ഗ്യ​ത്തിന്‌ ഏറെ നല്ലതാ​ണെന്ന വിശ്വാ​സം വന്യജീ​വി​ക​ളു​ടെ മാംസ​ത്തിന്‌ ആവശ്യ​ക്കാർ വർധി​ക്കാൻ ഇടയാ​ക്കി​യി​രി​ക്കു​ന്നു. പാമ്പു​കൾക്കാണ്‌ ഏറ്റവും പ്രിയം, അതും വിഷമു​ള്ള​വ​യ്‌ക്ക്‌. വിഷപ്പാ​മ്പു​ക​ളു​ടെ ഇറച്ചിക്ക്‌ വിഷമി​ല്ലാ​ത്ത​വ​യു​ടെ ഇരട്ടി വില വരും. കാട്ടു​പന്നി, വെരുക്‌, ചൊറി​ത്തവള, തവള, പെരു​മ്പാമ്പ്‌, ശൽക്കങ്ങ​ളുള്ള ഉറുമ്പു​തീ​നി, ടിബെറ്റൻ മാൻ, അപൂർവ പക്ഷികൾ എന്നിവ​യെ​ല്ലാം ഇഷ്ടഭോ​ജ്യ​ങ്ങ​ളു​ടെ പട്ടിക​യിൽ പെടുന്നു. അതു​കൊണ്ട്‌ ചൈന​യിൽ ഉടനീ​ള​മുള്ള ഹോട്ട​ലു​ക​ളി​ലെ മെനു​കാർഡു​ക​ളിൽ അവ സ്ഥാനം പിടി​ച്ചി​രി​ക്കു​ന്നു. വംശനാശ ഭീഷണി നേരി​ടുന്ന ജീവി​ക​ളു​ടെ പട്ടിക​യിൽ പെടുന്ന ഇവയെ വേട്ടയാ​ടു​ന്നത്‌ ഗവൺമെന്റ്‌ നിരോ​ധി​ച്ചി​രി​ക്കു​ക​യാണ്‌. എന്നിട്ടും ചില ഹോട്ടൽ ഉടമകൾ തങ്ങൾ വിളമ്പു​ന്നത്‌ യഥാർഥ​ത്തിൽ കാട്ടി​റച്ചി തന്നെയാ​ണെ​ന്നും മെരു​ക്കി​യെ​ടു​ത്ത​തോ സങ്കരവർഗ​ത്തിൽ പെട്ടതോ ആയ മൃഗങ്ങ​ളു​ടേ​ത​ല്ലെ​ന്നും പറയുന്ന ബോർഡു​കൾ സ്ഥാപി​ച്ചി​ട്ടുണ്ട്‌. ഈ ‘ഇഷ്ടഭോ​ജ്യ ആസക്തരിൽ’നിന്നു വന്യജീ​വി​കളെ രക്ഷിക്കാ​നാ​യി ചൈനീസ്‌ ഗവൺമെന്റ്‌ ഒരു യത്‌നം തുടങ്ങി​യി​രി​ക്കു​ക​യാണ്‌. “കാട്ടി​റച്ചി വേണ്ടേ വേണ്ട” എന്നതാണ്‌ അതിന്റെ മുദ്രാ​വാ​ക്യം.

പുകവ​ലി​ക്കു​ന്ന​വ​രെ​യും അല്ലാത്ത​വ​രെ​യും ബാധി​ക്കുന്ന മലിനീ​ക​ര​ണം

ഇന്ത്യയി​ലെ പുകവ​ലി​ക്കുന്ന കുട്ടി​ക​ളിൽ മിക്കവ​രും തീരെ ചെറു​പ്പ​ത്തിൽത്തന്നെ ആ ശീലം തുടങ്ങു​ന്നു​വെന്ന്‌ മും​ബൈ​യി​ലെ ടാറ്റാ ഇൻസ്റ്റി​റ്റ്യൂട്ട്‌ ഓഫ്‌ ഫണ്ടമെന്റൽ റിസർച്ചി​ന്റെ ഒരു റിപ്പോർട്ട്‌ വെളി​പ്പെ​ടു​ത്തി. ശരാശരി എടുത്താൽ, മാതാ​പി​താ​ക്ക​ളു​ടെ മേൽനോ​ട്ട​മി​ല്ലാത്ത തെരുവു കുട്ടികൾ 8 വയസ്സാ​കു​മ്പോ​ഴും രക്ഷിതാ​ക്ക​ളുള്ള സ്‌കൂൾ കുട്ടികൾ 11 വയസ്സാ​കു​മ്പോ​ഴും പുകവലി തുടങ്ങു​ന്നു. എന്നിരു​ന്നാ​ലും, മും​ബൈ​യിൽ നടത്തിയ മറ്റൊരു സർവേ അനുസ​രിച്ച്‌, മാതാ​പി​താ​ക്ക​ളു​ടെ ശ്രദ്ധാ​പൂർവ​മായ പരിപാ​ല​ന​മുള്ള, ഒരിക്ക​ലും പുകവ​ലി​ക്കാത്ത കുട്ടികൾ ഓരോ ദിവസ​വും രണ്ടു പായ്‌ക്കറ്റ്‌ സിഗരറ്റ്‌ വലിക്കു​ന്ന​തി​നു തുല്യ​മായ മലിന വായു​വാണ്‌ ശ്വസി​ക്കു​ന്നത്‌! മും​ബൈ​യും ഡൽഹി​യും ലോക​ത്തി​ലെ ഏറ്റവും അധികം മലിനീ​ക​ര​ണ​മുള്ള അഞ്ചു നഗരങ്ങ​ളിൽ പെടു​ന്നു​വെന്ന്‌ ദി ഏഷ്യൻ ഏജ്‌ വർത്തമാ​ന​പ​ത്രം റിപ്പോർട്ടു ചെയ്യുന്നു. മുംബൈ നഗരത്തി​ന്റെ നിരത്തു​ക​ളി​ലൂ​ടെ സ്ഥിരം ഓടുന്ന 9,00,000-ത്തോളം വാഹന​ങ്ങ​ളും ദിവസ​വും വന്നു​പോ​കുന്ന വേറെ 3,00,000 വാഹന​ങ്ങ​ളും വലിയ മലിനീ​ക​ര​ണ​ത്തിന്‌ ഇടയാ​ക്കു​ന്നു. അതിന്റെ ഫലമായി മും​ബൈ​യി​ലെ ഇപ്പോ​ഴത്തെ വായു മലിനീ​കരണ നിരക്കു​കൾ ലോകാ​രോ​ഗ്യ സംഘടന വെച്ചി​രി​ക്കുന്ന പരിധി​യെ​ക്കാൾ 600 മുതൽ 800 വരെ ശതമാനം കൂടു​ത​ലാണ്‌.

പക്ഷികൾ അപകട​ത്തിൽ

“വടക്കേ അമേരി​ക്ക​യി​ലെ അംബര​ചും​ബി​ക​ളായ ഓഫീസ്‌ കെട്ടി​ട​ങ്ങ​ളും വാർത്താ​വി​നി​മയ ഗോപു​ര​ങ്ങ​ളും നിശ്ശബ്ദ കൊല​യാ​ളി​ക​ളാണ്‌” എന്ന്‌ കാനഡ​യി​ലെ ടൊറ​ന്റോ​യിൽ നിന്നുള്ള ദ ഗ്ലോബ്‌ ആൻഡ്‌ മെയിൽ പ്രസ്‌താ​വി​ക്കു​ന്നു. “വീടു​ക​ളു​ടെ​യും മറ്റു കെട്ടി​ട​ങ്ങ​ളു​ടെ​യും ജനാലകൾ പോലുള്ള ഭാഗങ്ങ​ളിൽ ഇടിച്ചു വീഴു​ന്ന​തി​ന്റെ ഫലമായി ഓരോ വർഷവും ആ ഭൂഖണ്ഡ​ത്തിൽ പത്തു കോടി പക്ഷികൾ ചാകു​ന്ന​താ​യി കണക്കാ​ക്ക​പ്പെ​ടു​ന്നു.” രാത്രി​യിൽ അണയ്‌ക്കാ​തെ ഇടുന്ന ഓഫീസ്‌ ലൈറ്റു​കൾ ദേശാടന പക്ഷികളെ വലിയ ആശയക്കു​ഴ​പ്പ​ത്തി​ലാ​ക്കു​ന്നു. ഈ പ്രശ്‌നം വളരെ വ്യാപ​ക​മാ​ണെ​ന്നാണ്‌ വിദഗ്‌ധർ പറയു​ന്നത്‌. “ഈ രാജ്യ​ത്തോ ഭൂഖണ്ഡ​ത്തിൽത്ത​ന്നെ​യോ ഇതിന്‌ ഉദാഹ​ര​ണങ്ങൾ നൽകാൻ കഴിയാത്ത ഒരു പ്രദേശം പോലും ഉള്ളതാ​യിട്ട്‌ എനിക്ക​റി​യില്ല” എന്നു പക്ഷിശാ​സ്‌ത്ര​ജ്ഞ​നായ ഡേവിഡ്‌ വില്ലർഡ്‌ പറയുന്നു. ടൊറ​ന്റോ​യി​ലെ ഫേറ്റൽ ലൈറ്റ്‌ എവേർനസ്‌ പ്രോ​ഗ്രാം പോലുള്ള സംഘട​നകൾ രാത്രി​യിൽ ഓഫീസ്‌ ദീപങ്ങൾ അണയ്‌ക്കേ​ണ്ട​തി​ന്റെ ആവശ്യത്തെ കുറിച്ച്‌ ഓഫീസ്‌ ജീവന​ക്കാ​രെ ബോധ​വ​ത്‌ക​രി​ക്കാ​നുള്ള ശ്രമത്തി​ലാണ്‌.

കൂടാതെ “സ്‌കൈ-ബീമറു​കൾ” അഥവാ ഡിസ്‌കോ ക്ലബ്ബുക​ളി​ലേ​ക്കും മറ്റു വിനോദ കേന്ദ്ര​ങ്ങ​ളി​ലേ​ക്കും ആളുകളെ ആകർഷി​ക്കു​ന്ന​തി​നു വേണ്ടി ആകാശ​ത്തി​ലൂ​ടെ വീശി​യ​ടി​ക്കുന്ന വെളി​ച്ച​മുള്ള സ്‌പോ​ട്ട്‌​ലൈ​റ്റു​കൾ ഇരുട്ടിൽ മാത്രം പുറത്തി​റ​ങ്ങുന്ന മൃഗങ്ങളെ വിരട്ടി​യോ​ടി​ക്കു​ന്നു എന്ന്‌ ഫ്രാങ്ക്‌ഫർട്ടർ ആൾജി​മൈന റ്റ്‌​സൈ​ടുങ്‌ എന്ന ജർമൻ ദിനപ്പ​ത്രം റിപ്പോർട്ടു ചെയ്യുന്നു. ഈ പ്രകാശം പക്ഷിക​ളു​ടെ​യും വവ്വാലു​ക​ളു​ടെ​യും ദേശാടന പ്രാപ്‌തി​യെ പ്രതി​കൂ​ല​മാ​യി ബാധി​ക്കു​ന്നു. തന്നിമി​ത്തം, ആശയക്കു​ഴ​പ്പ​ത്തി​ലാ​കുന്ന പക്ഷികൾ കൂട്ടം തെറ്റി​പ്പോ​കു​ക​യും തങ്ങളുടെ ഗതി മാറ്റു​ക​യും പരി​ഭ്രാ​ന്തി​യിൽ ചിലയ്‌ക്കു​ക​യും ദേശാ​ടനം മുഴു​മി​പ്പി​ക്കാ​തി​രി​ക്കു​ക​യു​മൊ​ക്കെ ചെയ്യു​ന്ന​താ​യി ശ്രദ്ധയിൽപ്പെ​ട്ടി​ട്ടുണ്ട്‌. ചില​പ്പോൾ ദിശാ​ബോ​ധം നഷ്ടപ്പെ​ടുന്ന പക്ഷികൾ മണിക്കൂ​റു​ക​ളോ​ളം ചുറ്റി​ത്തി​രി​ഞ്ഞ​ശേഷം ക്ഷീണിച്ച്‌ താഴെ​യി​റ​ങ്ങു​ന്നു. അത്തരം പക്ഷിക​ളിൽ ചിലവ ചാകുക പോലും ചെയ്യുന്നു. ഫ്രാങ്ക്‌ഫർട്ടി​ലെ പക്ഷി സംരക്ഷണ ഇൻസ്റ്റി​റ്റ്യൂട്ട്‌ “സ്‌കൈ-ബീമറു​കൾ” നിരോ​ധി​ക്കാൻ ആവശ്യ​പ്പെ​ട്ടി​രി​ക്കു​ക​യാണ്‌.