നിങ്ങൾ സോളോയിറ്റ്സ്ക്വിന്റ്ലിയെ കണ്ടിട്ടുണ്ടോ?
നിങ്ങൾ സോളോയിറ്റ്സ്ക്വിന്റ്ലിയെ കണ്ടിട്ടുണ്ടോ?
മെക്സിക്കോയിലെ ഉണരുക! ലേഖകൻ
ആദ്യമായി ഒരു സോളോയിറ്റ്സ്ക്വിന്റ്ലിയെ—നമുക്ക് അതിനെ സോളോ എന്ന ചുരുക്കപ്പേരിൽ വിളിക്കാം—തൊട്ടപ്പോൾ ഞാൻ ശരിക്കും അതിശയിച്ചുപോയി. രോമമില്ലാത്ത അതിന്റെ കറുത്ത ശരീരം വളരെ മൃദുലവും ചൂടുള്ളതും ആയിരുന്നു. ശ്വാനപ്രദർശനങ്ങളിൽ മിക്കപ്പോഴും ചാമ്പ്യൻപട്ടം നേടാറുള്ള ഈ നായ, തന്റെ കൃശഗാത്രത്തെ പുകഴ്ത്താൻ ഞങ്ങൾക്കൊരു അവസരം നൽകിക്കൊണ്ട് യജമാനനോടൊപ്പം രാജകീയമായി റോന്തുചുറ്റുകയായിരുന്നു. വെളുത്ത രോമങ്ങൾ എഴുന്നു നിൽക്കുന്ന അതിന്റെ വാലു കണ്ടാൽ വെള്ള പൂശുന്ന ബ്രഷിന്റെ അഗ്രം പോലെയുണ്ട്. അതിന്റെ മൃദുലമായ കറുത്ത ശരീരവും വാലും തമ്മിൽ എന്ത് അന്തരമാണെന്നോ?
സ്പെയിൻകാരുടെ ആഗമനത്തിനു മുമ്പ് മെസോ-അമേരിക്കയിൽ ഓമനമൃഗങ്ങൾ എന്ന നിലയിൽ നായകൾക്കു വലിയ സ്ഥാനം ഉണ്ടായിരുന്നു. യജമാനൻ മരിക്കുമ്പോൾ ‘പരലോകത്തിലും ചങ്ങാതിമാരായിരിക്കാൻ വേണ്ടി’ ചിലപ്പോഴൊക്കെ നായയെ, അദ്ദേഹത്തോടൊപ്പം അടക്കം ചെയ്യുകപോലും ചെയ്തിരുന്നു. സോളോകൾക്ക് സമൂഹത്തിൽ ഒരു പ്രത്യേക സ്ഥാനം ഉണ്ടായിരുന്നു. അവയ്ക്ക് ഔഷധഗുണമുണ്ടെന്നു വിശ്വസിക്കപ്പെട്ടിരുന്നു. കാരണം ഈ കൊച്ചുചങ്ങാതിയുടെ ചൂടുള്ള ശരീരവുമായി സമ്പർക്കത്തിൽ വന്നാൽ വാതരോഗികൾക്ക് ആശ്വാസം കിട്ടുമത്രേ. തണുത്തു മരവിച്ച ഒരു രാത്രിയിൽ നിങ്ങളുടെ കാലുകൾക്കു ചൂടു പകരാൻ ഒരു സോളോയ്ക്ക് കഴിയും എന്നതിനു സംശയമില്ല!
ഇക്കാലത്ത് ഓമനിച്ചു വളർത്താൻ പറ്റിയ ഒരു മൃഗമാണ് സോളോ എന്ന് അനേകർ കണ്ടെത്തിയിരിക്കുന്നു. മറ്റു പല ഇനങ്ങളെയും പോലെതന്നെ സോളോയെയും പരിശീലിപ്പിച്ചെടുക്കാവുന്നതാണ്. വ്യത്യസ്ത വലിപ്പത്തിലുള്ള സോളോകൾ ഉണ്ട്, ചിലതു തീരെ ചെറുതായിരിക്കും. ഇതിന്റെ ഏറ്റവും വലിയ മേന്മ എന്തെന്നോ? രോമം ഇല്ലാത്തതിനാൽ ചെള്ള് ഉണ്ടാവില്ല എന്നതുതന്നെ. നായയുടെ രോമത്തോട് അലർജിയുള്ളവർക്കു വളർത്താൻ പറ്റിയ ഇനം. സോളോയെ പരിപാലിക്കാനും വളരെ എളുപ്പമാണ്. ചർമം മാർദവമുള്ളതായിരിക്കാൻ വേണ്ടി ഇടയ്ക്കൊക്കെ ഒരൽപ്പം എണ്ണയോ ക്രീമോ പുരട്ടിക്കൊടുക്കണം, അത്രമാത്രം. മിഗെൽ ആഞ്ചെൽ മോറേനോ എന്ന നായവളർത്തലുകാരൻ സോളോയുടെ മറ്റൊരു മേന്മയെക്കുറിച്ചു പറയുന്നതു കേൾക്കൂ: “ഒരു മിനിട്ടു മതി അതിനെ കുളിപ്പിക്കാൻ. രണ്ടു മിനിട്ടു കൊണ്ട് ഉണങ്ങുകയും ചെയ്യും.” സോളോയുടെ ഔഷധമൂല്യത്തെ കുറിച്ചെന്ത്? വാതരോഗമുള്ള ഭാഗത്ത് കുറേനേരം ഒരു സോളോയെ ചേർത്തുപിടിച്ചു കൊണ്ടിരുന്നതിന്റെ ഫലമായി തങ്ങൾക്ക് ആശ്വാസം ലഭിച്ചിട്ടുണ്ടെന്ന് ചിലർ പറയുന്നു. എന്നിരുന്നാലും മോറേനോയുടെ അഭിപ്രായത്തിൽ “ചൂടുവെള്ളം നിറച്ച ഒരു ബാഗിന്റെ” a ഫലമേ സോളോയ്ക്കുള്ളൂ.
കുറേനാൾ മുമ്പ്, സോളോ വംശനാശ ഭീഷണി നേരിടുന്നതായി കണക്കാക്കപ്പെട്ടിരുന്നു. അതുകൊണ്ടുതന്നെ ഇവയുടെ സംരക്ഷണത്തിനായി ധാരാളം ശ്രമങ്ങളും നടത്തുകയുണ്ടായി. തത്ഫലമായി ഇന്ന് സോളോകളെ മെക്സിക്കോയിൽ മാത്രമല്ല, പെറു, ഐക്യനാടുകൾ മുതലായ രാജ്യങ്ങളിലും കാണാൻ കഴിയും. എന്താ, ഒരു സോളോയിറ്റ്സ്ക്വിന്റ്ലിയെ കാണണമെന്നു തോന്നുന്നുണ്ടോ? ഒരൊറ്റത്തവണ കണ്ടാൽ മതി, ഈ വിശിഷ്ട മൃഗവുമായുള്ള കൂടിക്കാഴ്ച നിങ്ങളൊരിക്കലും മറക്കാൻ ഇടയില്ല. (g01 1/08)
[അടിക്കുറിപ്പ്]
a സോളോയുടെ ശരീരോഷ്മാവ് മറ്റു നായകളുടെതിനെക്കാളും അത്ര കൂടുതലൊന്നുമല്ല. അവയ്ക്ക് രോമമില്ലാത്തതിനാൽ സ്പർശിക്കുമ്പോൾ കൂടുതൽ ചൂട് അനുഭവപ്പെടുന്നു എന്നുമാത്രം.