ലോകത്തെ വീക്ഷിക്കൽ

പ്രാണ​വാ​യു​വി​നാ​യി കേഴുന്ന കണ്ണുകൾ

കോൺടാക്ട്‌ ലെൻസ്‌ (സ്‌പർശ​കാ​ചം) ധരിക്കുന്ന ചിലർ തങ്ങളുടെ കണ്ണുകൾക്ക്‌ ഓക്‌സി​ജൻ നൽകാതെ പട്ടിണി​ക്കി​ടു​ക​യാ​ണെന്ന്‌ ദ ഗ്ലോബ്‌ ആൻഡ്‌ മെയിൽ റിപ്പോർട്ടു ചെയ്യുന്നു. “കോർണി​യ​യ്‌ക്ക്‌ [കണ്ണിന്റെ മുൻഭാ​ഗത്തെ ആവരണം ചെയ്യുന്ന സുതാ​ര്യ​മായ പടലം] വായു​സ​മ്പർക്ക​ത്തി​ലൂ​ടെ ലഭിക്കേണ്ട ഓക്‌സി​ജൻ ലഭിക്കാ​തെ വരു​മ്പോൾ ഈ നഷ്ടം നികത്തു​ന്ന​തി​നാ​യി അതിന്റെ ഉള്ളിൽ രക്തക്കു​ഴ​ലു​കൾ വളരാൻ തുടങ്ങു​ന്നു.” ഇത്‌ കാഴ്‌ച​ശക്തി ക്ഷയിക്കു​ന്ന​തി​നോ അന്ധതയ്‌ക്കു പോലു​മോ ഇടയാ​ക്കി​യേ​ക്കാം. ടൊറ​ന്റോ​യി​ലെ ഒരു ആശുപ​ത്രി​യിൽ നേത്ര​രോ​ഗ​ചി​കി​ത്സാ വിഭാഗം തലവനായ ഡോ. റെയ്‌മണ്ട്‌ സ്റ്റെയ്‌ൻ ഇങ്ങനെ പറയുന്നു: “ഒരു രോഗി തന്റെ ലെൻസ്‌ ശരിയാ​യി സൂക്ഷി​ക്കാ​തി​രി​ക്കു​ക​യും കണ്ണട വിദഗ്‌ധനെ സന്ദർശിച്ച്‌ ഇടയ്‌ക്കി​ടെ പരി​ശോ​ധ​നകൾ നടത്താ​തി​രി​ക്കു​ക​യും ചെയ്യു​മ്പോൾ സംഗതി വഷളാ​കു​ന്നു.” ഒരു നേത്ര​ചി​കി​ത്സാ വിദഗ്‌ധനെ സന്ദർശിച്ച്‌ തങ്ങളുടെ കണ്ണുകൾക്ക്‌ അനു​യോ​ജ്യ​മായ കോൺടാക്ട്‌ ലെൻസ്‌ ഏതെന്ന്‌ ഉറപ്പാ​ക്കാ​നും അത്‌ ധരിക്കു​ന്ന​തും സംരക്ഷി​ക്കു​ന്ന​തും സംബന്ധിച്ച നിർദേ​ശങ്ങൾ പിൻപ​റ്റാ​നും കണ്ണട വിദഗ്‌ധർ രോഗി​കളെ പ്രോ​ത്സാ​ഹി​പ്പി​ക്കു​ന്നു. (g01 1/08)

“ഒട്ടിപ്പി​ടി​ക്കുന്ന” പാദങ്ങൾ

പല്ലികൾക്ക്‌ കണ്ണാടി​പോ​ലെ മിനു​സ​മുള്ള മച്ചിലൂ​ടെ നിഷ്‌പ്ര​യാ​സം ഓടാൻ കഴിയും. അവയ്‌ക്ക്‌ എങ്ങനെ അതിനു കഴിയു​ന്നു? ഈ ചോദ്യ​ത്തിന്‌ ഉത്തരം കണ്ടെത്താൻ പതിറ്റാ​ണ്ടു​ക​ളാ​യി ശാസ്‌ത്രജ്ഞർ ശ്രമിച്ചു വരിക​യാ​യി​രു​ന്നു. എന്നാൽ ഇപ്പോൾ അവർക്ക്‌ ഒരു വിശദീ​ക​രണം ലഭിച്ചി​രി​ക്കു​ന്ന​ത്രേ. “പല്ലിയു​ടെ പാദങ്ങ​ളി​ലുള്ള കൊച്ചു​രോ​മങ്ങൾ ഏതെങ്കി​ലും പ്രതല​ത്തിൽ ഉരസു​മ്പോൾ വളരെ ശക്തമായ ഒരു ഒട്ടൽബലം ഉണ്ടാകു​ന്ന​താ​യി ഒരു സംഘം ശാസ്‌ത്രജ്ഞർ കണ്ടെത്തി,” എന്ന്‌ സയൻസ്‌ ന്യൂസ്‌ മാസിക റിപ്പോർട്ടു ചെയ്യുന്നു. “ഓരോ രോമ​ത്തിൽ നിന്നും ‘സ്‌പാ​റ്റു​ലാ’ എന്ന്‌ വിളി​ക്ക​പ്പെ​ടുന്ന അതിസൂക്ഷ്‌മ രോമങ്ങൾ മുളയ്‌ക്കു​ന്നു. പല്ലി അതിന്റെ പാദം തറയിൽ വെക്കു​മ്പോൾ അതിന്റെ പാദത്തെ ആവരണം ചെയ്‌തി​രി​ക്കുന്ന കോടി​ക്ക​ണ​ക്കി​നു ചെറു​രോ​മങ്ങൾ ആ പ്രതല​ത്തോട്‌ ഒട്ടി​ച്ചേ​രു​ന്ന​തി​ന്റെ ഫലമായി അന്തർ തന്മാത്രാ ബലങ്ങൾ . . . ഉണ്ടാകു​ന്നു.” വേറൊ​രു സംഗതി​യും ഗവേഷ​ക​രു​ടെ ശ്രദ്ധ ആകർഷി​ച്ചി​രി​ക്കു​ന്നു. പല്ലി തന്റെ പാദങ്ങൾ തറയിൽ ഉറപ്പി​ക്കു​മ്പോൾ “രോമങ്ങൾ തറയിൽ പതിപ്പി​ക്കു​ന്ന​തോ​ടൊ​പ്പം അവയെ തറയ്‌ക്കു സമാന്ത​ര​മാ​യി മുമ്പോ​ട്ടു വലിക്കു​ക​യും ചെയ്യുന്നു.” “വെറുതെ പ്രതല​ത്തിൽ വെക്കു​മ്പോൾ കിട്ടു​ന്ന​തി​നെ​ക്കാൾ 10 മടങ്ങ്‌ കൂടുതൽ പിടിത്തം ഓരോ രോമ​ത്തി​നും ലഭിക്കാൻ” ഈ പ്രവർത്തനം ഇടയാ​ക്കു​ന്നു എന്ന്‌ പ്രസ്‌തുത മാസിക പറയുന്നു. (g01 1/22)

ഇന്റർനെറ്റ്‌ അശ്ലീല​ത്തി​ന്റെ അടിമകൾ

“കുറഞ്ഞത്‌ 2,00,000 ഇന്റർനെറ്റ്‌ ഉപയോ​ക്താ​ക്ക​ളെ​ങ്കി​ലും അശ്ലീല വെബ്‌​സൈ​റ്റു​കൾക്കും പ്രായ​പൂർത്തി​യാ​യ​വർക്കു വേണ്ടി മാത്ര​മുള്ള ചാറ്റ്‌ റൂമു​കൾക്കും ഇന്റർനെ​റ്റിൽ ലഭ്യമാ​യി​രി​ക്കുന്ന മറ്റു ലൈം​ഗിക പരിപാ​ടി​കൾക്കും അടിമ​ക​ളാണ്‌” എന്ന്‌ ഗവേഷകർ കണ്ടെത്തി​യി​രി​ക്കു​ന്ന​താ​യി ദ ന്യൂ​യോർക്ക്‌ ടൈംസ്‌ റിപ്പോർട്ടു ചെയ്യുന്നു. സ്റ്റാൻഫൊർഡ്‌ ആൻഡ്‌ ഡ്യൂ​ക്കെയ്‌ൻ സർവക​ലാ​ശാ​ല​യി​ലെ മനശ്ശാ​സ്‌ത്ര​ജ്ഞ​രാണ്‌ ഈ പഠനത്തിന്‌ നേതൃ​ത്വം വഹിച്ചത്‌. ആദ്യമാ​യി “സൈബർ സെക്‌സ്‌ ആസക്തരു​ടെ” അതായത്‌, ഇന്റർനെറ്റ്‌ ലൈം​ഗിക ആസക്‌ത​രു​ടെ കണക്ക്‌ എടുത്ത​വ​രിൽ ഇവർ ഉൾപ്പെ​ടു​ന്നു. ഇന്റർനെറ്റ്‌ അശ്ലീല​ത്തിന്‌ അടിമ​ക​ളാ​യവർ അശ്ലീല-വെബ്‌​സൈ​റ്റു​കൾ സന്ദർശി​ക്കു​ന്ന​തി​നാ​യി ആഴ്‌ച​യിൽ 11 മണിക്കൂ​റി​ല​ധി​കം സമയം ചെലവ​ഴി​ക്കു​ന്ന​താ​യി ഗവേഷകർ പറയുന്നു. ഗവേഷ​കരെ ഉദ്ധരി​ച്ചു​കൊണ്ട്‌ പ്രസ്‌തുത ദിനപ്പ​ത്രം ഇങ്ങനെ പറയുന്നു: “അനുദി​നം വളർന്നു​കൊ​ണ്ടി​രി​ക്കു​ന്ന​തും മറഞ്ഞി​രി​ക്കു​ന്ന​തു​മായ ഒരു സാമൂ​ഹിക ആരോ​ഗ്യ​പ്ര​ശ്‌ന​മാണ്‌ ഇത്‌. വളരെ​ക്കു​റച്ചു പേർ മാത്രമേ ഈ പ്രശ്‌നം മനസ്സി​ലാ​ക്കു​ന്നു​ള്ളു അഥവാ ഗുരു​ത​ര​മാ​യി കണക്കാ​ക്കു​ന്നു​ള്ളു എന്നതാണ്‌ അതിനുള്ള ഭാഗി​ക​മായ കാരണം.” (g01 1/08)

ആഫ്രി​ക്ക​യിൽ എയ്‌ഡ്‌സി​ന്റെ തേർവാ​ഴ്‌ച

ഐക്യ​രാ​ഷ്‌ട്ര​ങ്ങ​ളു​ടെ സെക്ര​ട്ടറി ജനറലായ കോഫി ആന്നൻ പറയു​ന്ന​ത​നു​സ​രിച്ച്‌, ആഫ്രി​ക്ക​യിൽ കഴിഞ്ഞ വർഷം യുദ്ധത്തിൽ മരണമ​ട​ഞ്ഞ​തി​നെ​ക്കാൾ കൂടുതൽ പേരെ എയ്‌ഡ്‌സ്‌ കൊ​ന്നൊ​ടു​ക്കി. കോം​ഗോ ജനാധി​പത്യ റിപ്പബ്ലിക്ക്‌, സിയെറാ ലിയോൺ, അംഗോള, കോം​ഗോ റിപ്പബ്ലിക്ക്‌, എത്യോ​പ്യ, സൊമാ​ലിയ, എറി​ട്രിയ, സുഡാൻ എന്നിവി​ട​ങ്ങ​ളിൽ ഉണ്ടായ യുദ്ധങ്ങൾ ഇതിൽ ഉൾപ്പെ​ടു​ന്നു. ലോക​മെ​മ്പാ​ടു​മുള്ള 3.6 കോടി എയ്‌ഡ്‌സ്‌ രോഗി​ക​ളിൽ മൂന്നിൽ രണ്ടു ഭാഗവും സഹാറ​യ്‌ക്കു തെക്കുള്ള ആഫ്രിക്കൻ പ്രദേ​ശ​ത്താ​ണു ജീവി​ക്കു​ന്നത്‌. ഐവറി​കോ​സ്റ്റിൽ ഓരോ അധ്യയന ദിവസ​വും ഒരു അധ്യാ​പകൻ അല്ലെങ്കിൽ അധ്യാ​പിക എയ്‌ഡ്‌സ്‌ മൂലം മരണമ​ട​യു​ന്നു. ബോട്‌സ്വാ​ന​യിൽ ആയുർപ്ര​തീക്ഷ 70-ൽനിന്ന്‌ 41 ആയി കുറഞ്ഞി​രി​ക്കു​ന്നു. സിംബാ​ബ്‌വേ​യു​ടെ കാര്യ​ത്തി​ലാ​ണെ​ങ്കിൽ, 2005 ആകു​മ്പോ​ഴേ​ക്കും അവരുടെ ആരോ​ഗ്യ​ക്ഷേമ ബജറ്റിന്റെ 60 ശതമാ​ന​വും എയ്‌ഡ്‌സി​നോ​ടും എച്ച്‌ഐ​വി​യോ​ടും ബന്ധപ്പെട്ട കാര്യ​ങ്ങൾക്കാ​യി ഉപയോ​ഗി​ച്ചു തീർക്കാ​നി​ട​യുണ്ട്‌, ഒരുപക്ഷേ അതിൽ കൂടു​ത​ലും വേണ്ടി വന്നേക്കാം. എയ്‌ഡ്‌സ്‌ രോഗി​കൾ ഏറ്റവും കൂടു​ത​ലുള്ള സാംബി​യ​യും മലാവി​യും ഈ വിഷയം ഏതാണ്ട്‌ ഉപേക്ഷി​ച്ച​മ​ട്ടാണ്‌. ദക്ഷിണാ​ഫ്രി​ക്ക​യി​ലാ​കട്ടെ, എയ്‌ഡ്‌സ്‌ രോഗി​കളെ പാടേ അവഗണി​ച്ചി​രി​ക്കു​ക​യാണ്‌ എന്ന്‌ ഒരു ലണ്ടൻ പത്രമായ ദ ഗാർഡി​യൻ റിപ്പോർട്ടു ചെയ്യുന്നു. “ഈ മാരക​രോ​ഗം ആഫ്രി​ക്ക​യി​ലെ ജീവി​ത​നി​ല​വാ​ര​ത്തെ​യും സാമ്പത്തിക പുരോ​ഗ​തി​യെ​യും സാമൂ​ഹിക-രാഷ്‌ട്രീയ സ്ഥിരത​യെ​യും എത്രമാ​ത്രം പ്രതി​കൂ​ല​മാ​യി  ബാധി​ക്കു​ന്നു എന്നു നമുക്കാർക്കും ഇതുവരെ പൂർണ​മാ​യി മനസ്സി​ലാ​ക്കാൻ കഴിഞ്ഞി​ട്ടില്ല,” കോഫി ആന്നൻ പറയുന്നു. (g01 1/08)

വേദന​യി​ല്ലാത്ത ഹൃദയാ​ഘാ​തം

ഹൃദയാ​ഘാ​ത​ത്തി​ന്റെ ഏറ്റവും സാധാ​ര​ണ​മായ ലക്ഷണങ്ങ​ളിൽ ഒന്നാണ്‌ നെഞ്ചി​നു​ള്ളിൽ അനുഭ​വ​പ്പെ​ടുന്ന ഞെരി​ക്കുന്ന തരത്തി​ലുള്ള വേദന. അതുണ്ടാ​കു​മ്പോൾ മിക്ക ആളുക​ളും ജാഗ്രത പുലർത്തു​ന്നു. എന്നിരു​ന്നാ​ലും, “ഹൃദയാ​ഘാ​തം ഉണ്ടാകു​മ്പോൾ മൂന്നി​ലൊ​രു ഭാഗം രോഗി​കൾക്ക്‌ വേദനയേ അനുഭ​വ​പ്പെ​ടാ​റില്ല” എന്ന കാര്യം വളരെ കുറച്ചു​പേർക്കു മാത്രമേ അറിയാ​വൂ എന്ന്‌ ടൈം മാസിക റിപ്പോർട്ടു ചെയ്യുന്നു. “ഹൃദയാ​ഘാ​തം ഉണ്ടാകു​മ്പോൾ വേദന അനുഭ​വ​പ്പെ​ടാത്ത രോഗി​കൾ ആശുപ​ത്രി​യിൽ പോകു​ന്നത്‌ പിന്ന​ത്തേക്ക്‌—കുറഞ്ഞത്‌ രണ്ടു മണിക്കൂർ നേര​ത്തേക്ക്‌—നീട്ടി​വെ​ക്കു​ന്നത്‌” എന്തു​കൊ​ണ്ടാ​ണെന്നു വിശദീ​ക​രി​ക്കാൻ ഇത്‌ സഹായി​ക്കു​ന്നു എന്ന്‌ ദ ജേർണൽ ഓഫ്‌ ദി അമേരി​ക്കൻ മെഡിക്കൽ അസ്സോ​സി​യേഷൻ പ്രസി​ദ്ധീ​ക​രിച്ച ഒരു പഠന​ലേ​ഖനം പറയുന്നു. ജീവര​ക്ഷാ​ക​ര​മായ ചികിത്സ ലഭ്യമാ​ക്കു​ന്ന​തിൽ വരുത്തുന്ന ഏതൊരു അമാന്ത​വും അപകട​ക​ര​മാണ്‌. അങ്ങനെ​യെ​ങ്കിൽ, നിങ്ങൾ ശ്രദ്ധി​ക്കേണ്ട സംഗതി എന്താണ്‌? “മിക്കവ​രു​ടെ​യും കാര്യ​ത്തിൽ അടുത്ത പ്രധാന മുന്നറി​യിപ്പ്‌ കടുത്ത ശ്വാസം മുട്ടലാണ്‌,” ടൈം പറയുന്നു. സാധ്യ​ത​യുള്ള മറ്റു ലക്ഷണങ്ങൾ മനംപി​രട്ടൽ, അമിത​മായ വിയർക്കൽ, “നടക്കു​മ്പോ​ഴോ കായി​കാ​ധ്വാ​ന​ത്തിൽ ഏർപ്പെ​ടു​മ്പോ​ഴോ അധിക​രി​ക്കുന്ന ‘നെഞ്ചെ​രി​ച്ചിൽ’” എന്നിവ​യാ​ണെന്ന്‌ അതു കൂട്ടി​ച്ചേർക്കു​ന്നു. (g01 1/22)

“കുളിച്ചു വൃത്തി​യാ​കുന്ന” താമര

പൗരസ്‌ത്യ​ദേ​ശത്തെ മതങ്ങൾ വിശു​ദ്ധ​മാ​യി വീക്ഷി​ക്കുന്ന താമര എപ്പോ​ഴും നല്ല വൃത്തി​യു​ള്ള​താ​യി കാണ​പ്പെ​ടു​ന്നത്‌ എന്തു​കൊ​ണ്ടാണ്‌? വർഷങ്ങ​ളാ​യി ജീവശാ​സ്‌ത്ര​ജ്ഞ​രു​ടെ ജിജ്ഞാസ ഉണർത്തി​യി​രുന്ന ഈ ചോദ്യ​ത്തിന്‌ ഇപ്പോൾ ഉത്തരം ലഭിച്ചി​രി​ക്കു​ന്ന​താ​യി ജർമൻ ശാസ്‌ത്രജ്ഞർ അവകാ​ശ​പ്പെ​ടു​ന്നു. “ഇലയുടെ പ്രതല​ത്തിൽ നിന്ന്‌ വെള്ളം നീക്കി​ക്ക​ള​യാ​നുള്ള ഈ ചെടി​യു​ടെ കഴിവ്‌ നേരത്തേ തന്നെ അറിവു​ള്ള​താണ്‌,” ജർമൻ ശാസ്‌ത്ര​ജ്ഞ​രായ വിൽഹെം ബാർത്‌ലോ​ട്ടും ക്രി​സ്റ്റോഫ്‌ നൈൻഹ്യൂ​സും പറയുന്നു. “എന്നാൽ സ്വയം ശുചി​യാ​ക്കാ​നുള്ള അതിന്റെ കഴിവ്‌ . . . ആരും ഒട്ടും ശ്രദ്ധി​ച്ചി​രു​ന്നില്ല.” ദ സൺഡേ ടൈംസ്‌ ഓഫ്‌ ഇൻഡ്യ വിശദീ​ക​രി​ക്കുന്ന പ്രകാരം, “താമര​യി​ല​യി​ലൂ​ടെ ഒഴുകി വീഴുന്ന ജലകണങ്ങൾ അതിലെ മാലി​ന്യ​ങ്ങളെ നീക്കം ചെയ്യുന്നു, അങ്ങനെ അതിന്റെ പ്രതലം നന്നായി വൃത്തി​യാ​കു​ന്നു.” താമര​യി​ല​യു​ടെ പ്രതലം മിനു​സ​മു​ള്ള​താണ്‌ എന്ന്‌ അത്‌ അർഥമാ​ക്കു​ന്നില്ല. ഒരു മൈ​ക്രോ​സ്‌കോ​പ്പി​ലൂ​ടെ നോക്കി​യാൽ “വെള്ളം തെറി​പ്പി​ച്ചു കളയാൻ കഴിവുള്ള, ഉരുണ്ട​തോ ഉന്തിനിൽക്കു​ന്ന​തോ ആയ, മുഴക​ളും മടക്കു​ക​ളും ഉള്ള” പരുപ​രുത്ത പ്രതല​മാണ്‌ ഈ ഇലകളു​ടേ​തെന്ന്‌ നമുക്കു മനസ്സി​ലാ​കും. ഇതിനു പുറമേ, മെഴു​കു​കൊ​ണ്ടുള്ള ഒരുതരം ആവരണ​വും ഈ ചെടി​ക്കുണ്ട്‌. ഇലയുടെ ഉപരി​ത​ല​ത്തിൽനിന്ന്‌ വെള്ളം വേഗം വാർന്നു പോകാൻ ഈ മെഴുക്‌ സഹായി​ക്കു​ന്നു. ഗവേഷകർ പറയുന്ന പ്രകാരം ‘താമര​യു​ടെ ഈ സവി​ശേഷത’ വെള്ളവും മറ്റു മാലി​ന്യ​ങ്ങ​ളും തങ്ങിനിൽക്കു​ന്നത്‌ ഫലപ്ര​ദ​മാ​യി തടയുന്നു. പ്രതി​കൂല കാലാ​വ​സ്ഥ​യിൽ പോലും മെഴുക്‌ ഉത്‌പാ​ദി​പ്പി​ക്കാൻ അവയ്‌ക്കു കഴിയു​മെ​ന്നും അവർ കൂട്ടി​ച്ചേർക്കു​ന്നു. താമര​യു​ടെ ഈ പ്രകൃ​തി​ദത്ത കഴിവ്‌, മനുഷ്യർ നിർമി​ച്ചി​രി​ക്കുന്ന ജലരോ​ധക പെയി​ന്റു​കൾ, ഡിറ്റർജ​ന്റു​കൾ എന്നിവ​യെ​ക്കാ​ളൊ​ക്കെ അവയെ മേൽത്ത​ര​മാ​ക്കി തീർക്കു​ന്നു. (g01 1/08)

ബാക്ടീ​രി​യ​യ്‌ക്കെ​തി​രെ​യുള്ള യുദ്ധം അനാവ​ശ്യം

“അമേരി​ക്കൻ ഉപഭോ​ക്താ​ക്കൾ തങ്ങളുടെ വീടു​ക​ളി​ലുള്ള കീടാ​ണു​ക്കൾക്കെ​തി​രെ അനാവ​ശ്യ​മാ​യി യുദ്ധം പ്രഖ്യാ​പി​ച്ചി​രി​ക്കു​ക​യാണ്‌,” എന്ന്‌ യുഎസ്‌എ ടുഡേ പറയുന്നു. ടഫ്‌റ്റ്‌സ്‌ യൂണി​വേ​ഴ്‌സി​റ്റി​യി​ലെ ഫിസി​ഷ്യ​നും മൈ​ക്രോ​ബ​യോ​ള​ജി​സ്റ്റു​മായ സ്റ്റുവാർട്ട്‌ ലീവി ഇങ്ങനെ പറയു​ന്ന​താ​യി അത്‌ റിപ്പോർട്ടു ചെയ്‌തു, “ബാക്ടീ​രി​യാ​നാ​ശി​നി​കൾ ഇത്ര​യേറെ പെരു​കി​യി​രി​ക്കു​ന്നത്‌ . . . ബാക്ടീ​രി​യാ​നാ​ശക സോപ്പു​കളെ മാത്രമല്ല, ആന്റിബ​യോ​ട്ടി​ക്കു​ക​ളെ​ക്കൂ​ടി നിർവീ​ര്യ​മാ​ക്കാൻ കഴിവുള്ള ബാക്ടീ​രി​യ​ക​ളു​ടെ ആവിർഭാ​വ​ത്തി​നു വഴി തെളി​ച്ചി​രി​ക്കു​ന്നു.” വീടും പരിസ​ര​വും അണുവി​മു​ക്ത​മാ​ക്കു​ന്ന​തിന്‌ ബാക്ടീ​രി​യാ​നാ​ശി​നി​കൾ ഉപയോ​ഗി​ക്കു​ന്നത്‌ “ഈച്ചയെ കൊല്ലാൻ ചുറ്റിക ഉപയോ​ഗി​ക്കു​ന്ന​തി​നു” സമാന​മാ​ണെന്ന്‌ ലീവി പറയുന്നു. എന്നാൽ ബ്ലീച്ച്‌, ഹൈ​ഡ്രജൻ പെറോ​ക്‌​സൈഡ്‌, ചൂടു​വെള്ളം, സോപ്പ്‌ എന്നിവ ഉപയോ​ഗി​ക്കു​ന്നത്‌ മാലി​ന്യ​ങ്ങളെ നീക്കം ചെയ്യാൻ സഹായി​ക്കു​ന്നു​വെന്നു മാത്രമല്ല, കൂടുതൽ പ്രതി​രോ​ധ​ശ​ക്തി​യുള്ള ബാക്ടീ​രി​യ​യാ​യി ഉത്‌പ​രി​വർത്തനം സംഭവി​ക്കാ​തെ തടയു​ക​യും ചെയ്യുന്നു. “ബാക്ടീ​രിയ നമ്മുടെ മിത്ര​ങ്ങ​ളാണ്‌, അവയെ വെറു​പ്പി​ക്കാ​തി​രി​ക്കു​ന്ന​താ​ണു നല്ലത്‌,” ലീവി പറയുന്നു. (g01 1/22)

ടിവി കാണു​ന്ന​തിൽ ഒന്നാം സ്ഥാനം ബ്രിട്ടീ​ഷു​കാർക്ക്‌

“ബ്രിട്ട​നി​ലെ ഏകദേശം 25 ശതമാനം ആളുക​ളും സാധാരണ ഒരാഴ്‌ച​യിൽ ജോലി ചെയ്യാ​നെ​ടു​ക്കുന്ന അത്രയും സമയം തന്നെ ടിവി കാണാ​നും ചെലവ​ഴി​ക്കു​ന്നു” എന്ന്‌ ലണ്ടൻ ദിനപ്പ​ത്ര​മായ ദി ഇൻഡി​പ്പെൻഡന്റ്‌ റിപ്പോർട്ടു ചെയ്യുന്നു. ഗവേഷകർ പറയു​ന്ന​ത​നു​സ​രിച്ച്‌ ഒരു സാധാരണ ബ്രിട്ടീ​ഷു​കാ​രൻ ടെലി​വി​ഷൻ കാണു​ന്ന​തിന്‌ ആഴ്‌ച​യിൽ 25 മണിക്കൂർ ചെലവ​ഴി​ക്കു​മ്പോൾ 21 ശതമാനം പേർ 36 മണിക്കൂ​റി​ല​ധി​കം സമയം അതിനാ​യി ചെലവ​ഴി​ക്കു​ന്നു. “അമിത​മാ​യി ടിവി കാണു​ന്ന​വ​രു​ടെ കൂട്ടത്തിൽ ചെറു​പ്പ​ക്കാർ മാത്രമല്ല, സ്‌ത്രീ​ക​ളും പുരു​ഷ​ന്മാ​രും പ്രായ​മാ​യ​വ​രും ഒക്കെ ഉൾപ്പെ​ടു​ന്നു” എന്ന്‌ പ്രസ്‌തുത പത്രം പറയുന്നു. ടെലി​വി​ഷൻ കാണു​ന്ന​തി​നാ​യി ആഴ്‌ച​യിൽ ഏകദേശം 30 മണിക്കൂർ ചെലവ​ഴി​ക്കുന്ന ഒരു കുടും​ബം പറഞ്ഞത്‌ “തിരക്കു പിടിച്ച ജീവി​ത​ത്തിൽനിന്ന്‌ താത്‌കാ​ലി​ക​മാ​യി​ട്ടെ​ങ്കി​ലും രക്ഷപ്പെ​ടാൻ ഇതു കൂടിയേ തീരൂ” എന്നാണ്‌. കൂടുതൽ സമയം ടിവി കാണുന്ന ഈ ശീലത്തിന്‌ കനത്ത വില ഒടു​ക്കേണ്ടി വരുന്നു. 20 രാജ്യ​ങ്ങളെ ഉൾപ്പെ​ടു​ത്തി​ക്കൊണ്ട്‌ നടത്തിയ ഒരു പഠനം അനുസ​രിച്ച്‌ “ടിവി കാണു​ന്ന​വ​രു​ടെ പട്ടിക​യിൽ ബ്രിട്ടൻ ഒന്നാമത്‌ എത്തി” എന്ന്‌ ലണ്ടനിലെ ദ ഗാർഡി​യൻ വീക്ക്‌ലി റിപ്പോർട്ടു ചെയ്യുന്നു. എന്നാൽ “സാക്ഷര​ത​യു​ടെ മൂന്നു നിർണാ​യക ഘടകങ്ങ​ളു​ടെ കാര്യ​ത്തിൽ ബ്രിട്ടൻ വളരെ പിന്നി​ലാ​യി​രു​ന്നു.” (g01 1/08)