‘അവർ തങ്ങളുടെ വാളുകളെ കൊഴുക്കളായി അടിച്ചുതീർക്കും’—എപ്പോൾ?
‘അവർ തങ്ങളുടെ വാളുകളെ കൊഴുക്കളായി അടിച്ചുതീർക്കും’—എപ്പോൾ?
ഒരു മനുഷ്യൻ വാൾ കൊഴുവായി അടിച്ചുതീർക്കുന്നതിനെ ചിത്രീകരിക്കുന്ന പ്രശസ്തമായ ഒരു പ്രതിമ ന്യൂയോർക്ക് നഗരത്തിലെ ഐക്യരാഷ്ട്രസംഘടനയുടെ ആസ്ഥാനത്തുണ്ട്. യെശയ്യാവു 2-ാം അധ്യായത്തിന്റെ 4-ാം വാക്യത്തിലെയും മീഖാ 4-ാം അധ്യായത്തിന്റെ 3-ാം വാക്യത്തിലെയും ബൈബിൾ പ്രവചനങ്ങളിൽ അധിഷ്ഠിതമാണ് അത്. ഈ വാക്കുകൾ എപ്പോൾ, എങ്ങനെ നിവൃത്തിയേറും?
“ആഗോള ആയുധ വിൽപ്പന 3,000 കോടി ഡോളറായി വർധിക്കുന്നു” എന്നായിരുന്നു ദ ന്യൂയോർക്ക് ടൈംസിൽ അടുത്ത കാലത്തു പ്രത്യക്ഷപ്പെട്ട ഒരു റിപ്പോർട്ടിന്റെ ശീർഷകം! 1999-ൽ, ഇത്രയധികം ആയുധങ്ങൾ വിൽക്കുന്നതിൽ മുൻപന്തിയിൽ നിന്നിരുന്നത് ആരൊക്കെയായിരുന്നു? 1,180 കോടി ഡോളറിന്റെ ആയുധം വിറ്റ ഐക്യനാടുകൾ ആയിരുന്നു ഒന്നാം സ്ഥാനത്ത്. അതിന്റെ പകുതിയിൽ താഴെ വിറ്റ റഷ്യ രണ്ടാം സ്ഥാനത്ത് എത്തി. എന്നിരുന്നാലും റഷ്യ കഴിഞ്ഞ വർഷം ആയുധ വിൽപ്പന ഇരട്ടിയോളമായി വർധിപ്പിക്കുകയുണ്ടായി. ജർമനി, ചൈന, ഫ്രാൻസ്, ബ്രിട്ടൻ, ഇറ്റലി എന്നീ രാജ്യങ്ങൾ ആയിരുന്നു പിന്നീടുള്ള സ്ഥാനങ്ങൾ കയ്യടക്കിയത്. അതേ റിപ്പോർട്ട് ഇങ്ങനെ കൂട്ടിച്ചേർത്തു: “കഴിഞ്ഞ കാലത്തെപ്പോലെ തന്നെ ഇത്തവണയും മൊത്തം ആയുധങ്ങളുടെ ഏകദേശം മൂന്നിൽ രണ്ട് ഭാഗവും വിറ്റത് വികസ്വര രാഷ്ട്രങ്ങൾക്ക് ആയിരുന്നു.”
കോടിക്കണക്കിന് ആളുകളെ കൊന്നൊടുക്കുകയും പരിക്കേൽപ്പിക്കുകയും ചെയ്ത 20-ാം നൂറ്റാണ്ടിലെ രണ്ട് ലോകമഹായുദ്ധങ്ങൾക്കും മറ്റനേകം വലിയ യുദ്ധങ്ങൾക്കും ശേഷം ഇപ്രകാരം ചോദിക്കാൻ നാം പ്രേരിതരായിത്തീരുന്നു, “യുദ്ധം ചെയ്യുന്നതിനു പകരം സമാധാനം ആചരിക്കാൻ രാഷ്ട്രങ്ങൾ ഇനി എന്നാണു പഠിക്കുക?” സമാധാനത്തിലേക്കുള്ള ഈ പരിവർത്തനം ‘അന്ത്യകാലത്ത്’ ആയിരിക്കുമെന്ന് ബൈബിൾ സൂചിപ്പിക്കുന്നു. (യെശയ്യാവു 2:2) വാസ്തവത്തിൽ ഈ പ്രവചനം ഇപ്പോൾത്തന്നെ നിവൃത്തിയേറിക്കൊണ്ടിരിക്കുകയാണ്. 60 ലക്ഷത്തോളം യഹോവയുടെ സാക്ഷികൾ ‘യഹോവയാൽ ഉപദേശിക്കപ്പെടാൻ’ തങ്ങളെത്തന്നെ അനുവദിച്ചിരിക്കുന്നു. തത്ഫലമായി അവർ ‘വലിയ സമാധാനം’ ആസ്വദിക്കുന്നു.—യെശയ്യാവു 54:13.
പെട്ടെന്നുതന്നെ യഹോവ സകല ആയുധങ്ങൾക്കും യുദ്ധങ്ങൾക്കും അവയെ പ്രോത്സാഹിപ്പിക്കുന്നവർക്കും അറുതിവരുത്തും. എന്തെന്നാൽ അവൻ ‘ഭൂമിയെ നശിപ്പിക്കുന്നവരെ നശിപ്പിക്കും.’ അത്ഭുതകരമായ ഈ മാറ്റത്തെ കുറിച്ച് കൂടുതൽ അറിയാൻ നിങ്ങൾ ആഗ്രഹിക്കുന്നെങ്കിൽ ദയവായി നിങ്ങളുടെ പ്രദേശത്തുള്ള യഹോവയുടെ സാക്ഷികളുമായി ബന്ധപ്പെടുകയോ 5-ാം പേജിൽ കൊടുത്തിരിക്കുന്ന ഉചിതമായ മേൽവിലാസത്തിൽ എഴുതുകയോ ചെയ്യുക.—വെളിപ്പാടു 11:18. (g01 3/8)