മെഡി​റ്റ​റേ​നി​യൻ സന്ന്യാസി സീലുകൾ അവ അതിജീ​വി​ക്കു​മോ?

ഗ്രീസിലെ ഉണരുക! ലേഖകൻ

സൂര്യ​പ്ര​കാ​ശ​ത്തിൽ കുളി​ച്ചു​നിൽക്കുന്ന ഗ്രീസി​ന്റെ കടൽത്തീ​ര​ങ്ങ​ളിൽ അവ വെയിൽ കാഞ്ഞു​കി​ട​ക്കു​ന്ന​താ​യി ഹോമർ തന്റെ ഇതിഹാ​സ​കാ​വ്യ​മായ ഒഡീസി​യിൽ വർണി​ക്കു​ന്നു. പുരാതന ഏഷ്യാ​മൈ​ന​റി​ലെ ഒരു നഗരത്തിൽ അവയുടെ ചിത്രം മുദ്രണം ചെയ്‌ത നാണയങ്ങൾ പുറത്തി​റ​ക്കി​യി​രു​ന്നു. മെഡി​റ്റ​റേ​നി​യൻ കടലി​ലും കരിങ്ക​ട​ലി​ലും ഒരുകാ​ലത്ത്‌ ഇവ ധാരാ​ള​മാ​യി ഉണ്ടായി​രു​ന്നു. എന്നാൽ ഇന്ന്‌, നാണം​കു​ണു​ങ്ങി​യായ ഈ ജീവിയെ—മെഡി​റ്റ​റേ​നി​യൻ സന്ന്യാ​സി​സീ​ലി​നെ—നിങ്ങൾ കാണാൻ സാധ്യ​ത​യില്ല.

രോമാ​വൃ​ത ചർമമുള്ള മറ്റു പലയിനം കടൽസ​സ്‌ത​നി​ക​ളെ​യും പോലെ 18-ഉം 19-ഉം നൂറ്റാ​ണ്ടു​ക​ളി​ലു​ട​നീ​ളം മെഡി​റ്റ​റേ​നി​യൻ സന്ന്യാ​സി​സീ​ലു​ക​ളും വൻതോ​തിൽ വേട്ടയാ​ട​പ്പെട്ടു. രോമാ​വൃത ചർമത്തി​നും എണ്ണയ്‌ക്കും മാംസ​ത്തി​നു​മാ​യി ഇത്തരം ആയിര​ക്ക​ണ​ക്കി​നു ജീവി​കളെ കൊ​ന്നൊ​ടു​ക്കു​ക​യു​ണ്ടാ​യി.

ഇവയെ കൊ​ന്നൊ​ടു​ക്കു​ന്ന​തി​ന്റെ ഭവിഷ്യത്ത്‌ ഇപ്പോൾ വളരെ വ്യക്തമാണ്‌. 379-നും 530-നും ഇടയ്‌ക്കു മെഡി​റ്റ​റേ​നി​യൻ സന്ന്യാ​സി​സീ​ലു​കളേ അവശേ​ഷി​ക്കു​ന്നു​ള്ളൂ എന്നാണു കണക്കാ​ക്ക​പ്പെ​ടു​ന്നത്‌. ഈ ജീവികൾ ഒരുപക്ഷേ വംശനാ​ശ​ത്തി​ന്റെ വക്കിൽ എത്തിനിൽക്കു​ക​യാ​കാം. എന്നാൽ ഇവയുടെ എണ്ണം സംബന്ധിച്ച കണക്കെ​ടു​പ്പു​കൾ “തീരെ കൃത്യ​ത​യി​ല്ലാ​ത്ത​വ​യാണ്‌” എന്നു പറയേ​ണ്ടി​യി​രി​ക്കു​ന്നു എന്ന്‌ മൊണാ​ക്കസ്‌ ഗാർഡി​യൻ എന്ന വാർത്താ​പ​ത്രിക റിപ്പോർട്ടു ചെയ്യുന്നു.

ഇവയെ രക്ഷി​ച്ചെ​ടു​ക്കാ​നാ​വാത്ത വിധം സമയം യഥാർഥ​ത്തിൽ അതി​ക്ര​മി​ച്ചി​രി​ക്കു​ന്നു​വോ? സന്ന്യാ​സി​സീ​ലു​കളെ സംരക്ഷി​ക്കു​ന്ന​തി​നാ​യി എന്തൊക്കെ ശ്രമങ്ങ​ളാ​ണു നടക്കു​ന്നത്‌?

ദുഷ്‌ക​ര​മായ ഒരു പോരാ​ട്ടം

സന്ന്യാ​സി​സീ​ലിന്‌ ആ പേര്‌ ലഭിച്ചത്‌ ഒരുപക്ഷേ അവയുടെ രോമ​ക്കു​പ്പാ​യ​ത്തി​ന്റെ നിറം ചില മതസന്ന്യാ​സി​ക​ളു​ടെ വസ്‌ത്ര​ത്തി​ന്റെ നിറ​ത്തോ​ടു സമാന​മാ​യ​തു​കൊ​ണ്ടാ​കാം. ഈജിയൻ കടലി​ലുള്ള വടക്കൻ സ്‌പൊ​റേ​ഡിസ്‌ ദ്വീപു​ക​ളി​ലെ എത്തി​ച്ചേ​രാൻ പ്രയാ​സ​മായ ചെങ്കു​ത്തായ പാറ​ക്കെ​ട്ടു​ക​ളി​ലും കടൽത്തീ​രത്തെ പാറക​ളിൽ തിരമാ​ലകൾ തീർത്ത ഗുഹക​ളി​ലു​മാണ്‌ പ്രധാ​ന​മാ​യും ഇവയുടെ വാസം. വടക്കു​പ​ടി​ഞ്ഞാ​റൻ ആഫ്രി​ക്ക​യു​ടെ​യും പോർച്ചു​ഗ​ലി​ലെ ഡെസെർട്ടാഷ്‌ ദ്വീപു​ക​ളു​ടെ​യും തീരങ്ങ​ളി​ലു​ട​നീ​ളം കുറേ​ക്കൂ​ടെ ചെറിയ കൂട്ടങ്ങളെ കാണാൻ സാധി​ക്കും. 3 മീറ്റർ വരെ നീളവും 275 കിലോ​ഗ്രാ​മി​ന​ടു​ത്തു തൂക്കവും വരുന്ന സന്ന്യാ​സി​സീ​ലു​കൾ ലോക​ത്തി​ലെ ഏറ്റവും വലിയ ഇനം സീലു​ക​ളിൽ പെടുന്നു.

ബൾബിന്റെ ആകൃതി​യി​ലുള്ള, വെള്ളി​നി​റ​മുള്ള രോമങ്ങൾ നിറഞ്ഞ തല, കരി പോലെ കറുത്ത കണ്ണുകൾ, വലിയ നാസാ​ര​ന്ധ്ര​ങ്ങ​ളോ​ടു കൂടിയ മോന്ത, ചെറിയ വിടവു​കൾ പോ​ലെ​യുള്ള ചെവി, താഴേക്കു തൂങ്ങി​നിൽക്കുന്ന ഇടതൂർന്ന മീശ​രോ​മങ്ങൾ, പല മടക്കു​ക​ളുള്ള കുറു​കിയ താടി എന്നിവ ഇവയുടെ വ്യതി​രി​ക്ത​മായ സവി​ശേ​ഷ​ത​ക​ളിൽപ്പെ​ടു​ന്നു. ശരീര​ത്തി​ന്റെ മേൽഭാ​ഗത്ത്‌ കറുപ്പു​നി​റ​ത്തി​ലോ ചോക്ക​ലേറ്റു തവിട്ടു നിറത്തി​ലോ ഉള്ളതും അടിഭാ​ഗത്ത്‌ ഇളംനി​റ​ത്തി​ലു​ള്ള​തു​മായ ചെറിയ രോമങ്ങൾ ഉണ്ടായി​രി​ക്കും. എന്നാൽ, ജനിച്ച ഉടനെ സീൽ കുഞ്ഞു​ങ്ങൾക്ക്‌, മേൽഭാ​ഗത്ത്‌ നീളമുള്ള ഇരുണ്ട നിറത്തി​ലുള്ള രോമ​ങ്ങ​ളും വയറി​ന്മേൽ വെളുത്ത രോമ​ങ്ങ​ളും ആണ്‌ ഉണ്ടായി​രി​ക്കുക.

സന്ന്യാ​സി​സീ​ലു​ക​ളു​ടെ താണ പ്രത്യു​ത്‌പാ​ദന നിരക്ക്‌ അതിജീ​വ​ന​ത്തി​നു വേണ്ടി​യുള്ള അവയുടെ പോരാ​ട്ടത്തെ തടസ്സ​പ്പെ​ടു​ത്തു​ന്നു. പെൺസീ​ലു​കൾ ഒരു വർഷത്തിൽ ഒന്നിൽ കൂടുതൽ കുഞ്ഞു​ങ്ങൾക്കു ജന്മമേ​കാ​റില്ല. മാത്രമല്ല, പ്രായ​പൂർത്തി​യായ പെൺസീ​ലു​കൾ എല്ലാ​മൊ​ന്നും വർഷം​തോ​റും കുഞ്ഞു​ങ്ങളെ പ്രസവി​ക്കാ​റു​മില്ല. ഇത്‌ കാര്യ​ങ്ങളെ കൂടുതൽ വഷളാ​ക്കു​ന്നു.

എന്നാൽ താണ പ്രത്യു​ത്‌പാ​ദന നിരക്കു​മാ​ത്രമല്ല എണ്ണം കുറയു​ന്ന​തി​നു കാരണം. വന്യജീ​വി സംരക്ഷ​ണ​ത്തി​നുള്ള ന്യൂ​യോർക്ക്‌ അക്വേ​റി​യ​ത്തി​ന്റെ ജനറൽ ക്യു​റേറ്റർ (മേൽനോ​ട്ട​ക്കാ​രൻ) ആയ ഡോ. ഡെന്നിസ്‌ തോണി ഇപ്രകാ​രം പറയുന്നു: “മെഡി​റ്റ​റേ​നി​യൻ  സന്ന്യാ​സി​സീ​ലു​ക​ളു​ടെ പ്രത്യു​ത്‌പാ​ദന നിരക്ക്‌ വളരെ താണതാണ്‌ എന്നതു ശരിതന്നെ. എന്നാൽ അതേ പ്രത്യു​ത്‌പാ​ദന നിരക്ക്‌ തന്നെയുള്ള ഹാർബർ സീലു​ക​ളു​ടെ എണ്ണത്തിൽ കുറ​വൊ​ന്നും സംഭവി​ക്കു​ന്നില്ല. അതു​കൊണ്ട്‌, സന്ന്യാ​സി​സീ​ലു​ക​ളു​ടെ എണ്ണം കുറയു​ന്ന​തി​നു പിന്നിൽ തീർച്ച​യാ​യും മറ്റെ​ന്തെ​ങ്കി​ലും കാരണങ്ങൾ ഉണ്ടാകും.”

ആക്രമ​ണ​ത്തിൻ കീഴിൽ

നിങ്ങളു​ടെ വീടിനു തീപി​ടി​ച്ചാൽ ഉണ്ടാകാ​വുന്ന നാശന​ഷ്ട​ങ്ങ​ളെ​ക്കു​റിച്ച്‌ ഒന്നു സങ്കൽപ്പി​ക്കുക. ഫർണിച്ചർ, വസ്‌ത്രങ്ങൾ, സ്വകാര്യ സമ്പാദ്യ​ങ്ങൾ, സ്‌മാരക വസ്‌തു​ക്കൾ തുടങ്ങി എല്ലാം നിങ്ങൾക്ക്‌ നഷ്ടമാ​കും. നിങ്ങളു​ടെ ജീവി​ത​ത്തി​നു​തന്നെ ആകെപ്പാ​ടെ മാറ്റം സംഭവി​ച്ചേ​ക്കാം. മെഡി​റ്റ​റേ​നി​യൻ സന്ന്യാ​സി​സീ​ലു​ക​ളു​ടെ വാസസ്ഥ​ല​ത്തി​നും ഫലത്തിൽ അതുത​ന്നെ​യാണ്‌ സംഭവി​ച്ചി​രി​ക്കു​ന്നത്‌. മലിനീ​ക​രണം, വിനോ​ദ​സ​ഞ്ചാ​രം, വ്യവസാ​യം, മനുഷ്യ​രു​ടെ മറ്റു പ്രവർത്ത​നങ്ങൾ എന്നിവ അവയുടെ പ്രകൃ​തി​ദത്ത വാസസ്ഥ​ല​ത്തി​ന്റെ നല്ലൊരു ഭാഗവും നശിക്കു​ന്ന​തിന്‌ ഇടയാ​ക്കി​യി​രി​ക്കു​ന്നു.

കൂടാതെ, അമിത മത്സ്യബ​ന്ധ​ന​ത്തി​ന്റെ ഫലമായി സന്ന്യാ​സി​സീ​ലു​ക​ളു​ടെ ഭക്ഷ്യ​ശേ​ഖ​ര​വും നന്നേ കുറഞ്ഞി​രി​ക്കു​ന്നു. ജന്തുശാ​സ്‌ത്ര​ജ്ഞ​യായ ഡോ. സൂസാൻ കെന്നഡി സ്റ്റോസ്‌കോ​പ്‌ഫ്‌ ഇങ്ങനെ പറയുന്നു: “തീറ്റ കുറവാ​യി​രി​ക്കു​മ്പോൾ, വയറു നിറയ്‌ക്കു​ന്ന​തി​നാ​യി സീലു​കൾക്കു കൂടുതൽ ഊർജം ചെലവ​ഴി​ക്കേണ്ടി വരുന്നു.” അങ്ങനെ, സീലു​കൾക്ക്‌ അവയുടെ വാസസ്ഥാ​നം നഷ്ടപ്പെ​ട്ടി​രി​ക്കു​ന്നു എന്നതിനു പുറമേ, വയറു നിറയ്‌ക്കു​ന്ന​തി​നു പോലും കഠിന​പോ​രാ​ട്ടം നടത്തേണ്ട ഗതിയും വന്നിരി​ക്കു​ന്നു!

അമിത മത്സ്യബ​ന്ധ​ന​ത്തി​ന്റെ മറ്റൊരു ദൂഷ്യ​ഫലം സീലുകൾ ഇടയ്‌ക്കി​ടെ മത്സ്യബന്ധന വലകളിൽ കുടുങ്ങി ശ്വാസം കിട്ടാതെ വെള്ളത്തിൽ കിടന്നു​തന്നെ ചത്തു​പോ​കാ​നി​ട​യാ​കു​ന്നു എന്നതാണ്‌. എന്നാൽ, അതിലും കൂടുതൽ എണ്ണത്തെ മത്സ്യബ​ന്ധ​ന​ത്തിൽ ഏർപ്പെ​ട്ടി​രി​ക്കു​ന്നവർ കൊല്ലാ​റു​മുണ്ട്‌. അതിന്റെ കാരണം, മത്സ്യബ​ന്ധ​ന​വ​ലകൾ നശിപ്പി​ച്ചു​കൊണ്ട്‌ അതിൽനിന്ന്‌ ഭക്ഷണം തട്ടി​യെ​ടു​ക്കാൻ സീലുകൾ പഠിച്ചി​രി​ക്കു​ന്നു എന്നതാണ്‌. അങ്ങനെ, കുറഞ്ഞു​വ​രുന്ന മത്സ്യ​ശേ​ഖ​ര​ത്തി​നാ​യി മനുഷ്യൻ മൃഗവു​മാ​യി പോര​ടി​ക്കു​ന്നു. ഈ അസന്തു​ലി​ത​മായ പോരാ​ട്ടം സന്ന്യാ​സി​സീ​ലു​കളെ വംശനാ​ശ​ത്തി​ന്റെ വക്കോളം കൊ​ണ്ടെ​ത്തി​ച്ചി​രി​ക്കു​ന്നു.

ഭക്ഷ്യശൃം​ഖ​ല​യിൽ സന്ന്യാ​സി​സീ​ലു​ക​ളു​ടെ സ്ഥാനം മുകൾഭാ​ഗ​ത്തോട്‌ അടുത്താ​യ​തി​നാൽ, അവ ഒരു “സൂചക ജീവി​വർഗം” ആണെന്ന്‌ ചില ശാസ്‌ത്രജ്ഞർ അഭി​പ്രാ​യ​പ്പെ​ടു​ന്നു. അതായത്‌, അവയുടെ അവസ്ഥ മോശ​മാ​ണെ​ങ്കിൽ ഭക്ഷ്യശൃം​ഖ​ല​യി​ലെ ബാക്കി​യുള്ള അംഗങ്ങ​ളു​ടെ അവസ്ഥയും മോശ​മാ​യി​രി​ക്കു​മെന്ന്‌ അർഥം. ഇത്‌ ശരിയാ​ണെ​ങ്കിൽ മെഡി​റ്റ​റേ​നി​യ​നി​ലെ പരിസ്ഥി​തി​വ്യ​വ​സ്ഥ​യു​ടെ സംരക്ഷ​ണ​ത്തിന്‌ സാഹച​ര്യം തീരെ അനുകൂ​ലമല്ല. കാരണം, യൂറോ​പ്പിൽ ഏറ്റവും കൂടുതൽ വംശനാ​ശ​ഭീ​ഷണി നേരി​ടുന്ന ജീവി​വർഗ​മാണ്‌ സന്ന്യാ​സി​സീ​ലു​കൾ.

അവ അതിജീ​വി​ക്കു​മോ?

മെഡി​റ്റ​റേ​നി​യൻ സന്ന്യാ​സി​സീ​ലി​ന്റെ മുഖ്യ​ശ​ത്രു​ക്ക​ളും മുഖ്യ​സം​ര​ക്ഷ​ക​രും മനുഷ്യർ തന്നെയാണ്‌. എന്തൊരു വൈരു​ദ്ധ്യം അല്ലേ? ഇവയുടെ സംരക്ഷ​ണ​ത്തി​നാ​യി ഗവൺമെന്റ്‌ ഏജൻസി​ക​ളും സ്വകാര്യ ഏജൻസി​ക​ളും രൂപീ​ക​രി​ക്ക​പ്പെ​ട്ടി​ട്ടുണ്ട്‌. ഇവയ്‌ക്ക്‌ അഭയം നൽകു​ന്ന​തി​നാ​യി ചില പ്രദേ​ശങ്ങൾ തന്നെ മാറ്റി​വെ​ച്ചി​ട്ടുണ്ട്‌. അതിജീ​വ​ന​ത്തി​നാ​യുള്ള പോരാ​ട്ട​ത്തിൽ ഈ വിശി​ഷ്ട​മൃ​ഗത്തെ നമു​ക്കെ​ങ്ങനെ സഹായി​ക്കാൻ കഴിയും എന്നു കണ്ടെത്താ​നാ​യി ഇവയുടെ സ്വാഭാ​വിക വാസസ്ഥാ​ന​ങ്ങ​ളിൽ വെച്ചു​തന്നെ ധാരാളം പഠനങ്ങൾ നടത്ത​പ്പെ​ട്ടി​രി​ക്കു​ന്നു.

1988-ൽ മെഡി​റ്റ​റേ​നി​യൻ സന്ന്യാ​സി​സീ​ലു​കളെ കുറി​ച്ചുള്ള പഠനത്തി​നും അവയുടെ സംരക്ഷ​ണ​ത്തി​നു​മാ​യുള്ള ഹെലെ​നിക്‌ സൊ​സൈറ്റി (MOm) രൂപീ​ക​രി​ക്ക​പ്പെട്ടു. ഈ സൊ​സൈ​റ്റി​യി​ലെ ഗവേഷകർ സന്ന്യാ​സി​സീ​ലു​ക​ളു​ടെ എണ്ണമെ​ടു​ക്കു​ന്ന​തി​നും അവയുടെ സംരക്ഷ​ണ​ത്തി​നു​ത​കുന്ന മറ്റു വിവരങ്ങൾ ശേഖരി​ക്കു​ന്ന​തി​നു​മാ​യി പതിവാ​യി അവയുടെ സ്വാഭാ​വിക വാസസ്ഥാ​നങ്ങൾ സന്ദർശി​ക്കു​ന്നു.

ഒരു സംരക്ഷ​ക​സം​ഘം സ്‌പീ​ഡ്‌ബോ​ട്ടിൽ സംരക്ഷിത മേഖല​ക​ളിൽ റോന്തു ചുറ്റുന്നു. ഈ സംഘം, ഗ്രീസി​ലെ  വടക്കൻ സ്‌പൊ​റേ​ഡിസ്‌ ദ്വീപു​ക​ളി​ലെ ആലോ​നി​സോ​സി​ലുള്ള നാഷണൽ മറൈൻ പാർക്കി​ലേക്കു പോകുന്ന സന്ദർശ​കർക്കും മീൻപി​ടി​ത്ത​ക്കാർക്കും ആവശ്യ​മായ വിവര​ങ്ങ​ളും നിർദേ​ശ​ങ്ങ​ളും പ്രദാനം ചെയ്യു​ന്നു​മുണ്ട്‌. രോഗം ബാധി​ച്ച​തോ മുറി​വേ​റ്റ​തോ ആയ സീലു​കളെ കണ്ടെത്തി​യാൽ അവയ്‌ക്ക്‌ ആവശ്യ​മായ ചികിത്സ നൽകു​ക​യും അവയെ MOm പുനര​ധി​വാ​സ​കേ​ന്ദ്ര​ത്തിൽ എത്തിക്കു​ക​യും ചെയ്യു​ന്നത്‌ അവരാണ്‌.

സീൽ ചികിത്സാ പുനര​ധി​വാ​സ​കേ​ന്ദ്ര​ത്തിൽ മാതാ​പി​താ​ക്കൾ നഷ്ടപ്പെ​ട്ട​തും രോഗം ബാധി​ച്ച​തും മുറി​വേ​റ്റ​തു​മായ സീൽ കുഞ്ഞു​ങ്ങളെ താമസി​പ്പി​ക്കാ​നുള്ള സൗകര്യ​ങ്ങ​ളുണ്ട്‌. തനിയെ ജീവി​ക്കാ​നുള്ള പ്രാപ്‌തി​യാ​കു​ന്ന​തു​വരെ അവയെ അവി​ടെ​ത്തന്നെ ചികി​ത്സി​ക്കു​ക​യും സംരക്ഷി​ക്കു​ക​യും ചെയ്യുന്നു. ഇതുവരെ ലഭിച്ചി​രി​ക്കുന്ന ഫലങ്ങൾ ആശാവ​ഹ​മാണ്‌. വർഷങ്ങ​ളാ​യി കുത്തനെ കുറഞ്ഞു​കൊ​ണ്ടി​രുന്ന വടക്കൻ സ്‌പൊ​റേ​ഡി​സി​ലെ സന്ന്യാ​സി​സീ​ലു​ക​ളു​ടെ എണ്ണത്തിൽ പുരോ​ഗ​തി​യു​ടെ ആദ്യല​ക്ഷ​ണങ്ങൾ കണ്ടുതു​ട​ങ്ങി​യി​രി​ക്കു​ന്നു.

ഈ ശ്രമങ്ങൾ തുടർന്നും വിജയി​ക്കു​മോ? അതു കാലം തെളി​യി​ക്കും. എന്നിരു​ന്നാ​ലും, വംശനാ​ശ​ഭീ​ഷ​ണി​യിൽ ആയിരി​ക്കുന്ന ഈ ജീവി​വർഗം അതിജീ​വി​ക്ക​ണ​മെ​ങ്കിൽ ഇനിയും വളരെ​യേറെ ശ്രമങ്ങൾ ചെയ്യേ​ണ്ട​തുണ്ട്‌ എന്നത്‌ വ്യക്തമാണ്‌. സ്‌മി​ത്ത്‌സോ​ണി​യൻ ഇൻസ്റ്റി​റ്റ്യൂ​ഷ​നി​ലെ ഡോ. ഡേവിഡ്‌ വിൽഡ്‌ ഉണരുക!യോട്‌ ഇങ്ങനെ പറഞ്ഞു: “സമു​ദ്ര​ജീ​വി​ക​ളു​ടെ അവസ്ഥ പൊതു​വെ അത്ര മെച്ചമല്ല. സമു​ദ്ര​ങ്ങ​ളിൽ എന്താണു​ള്ള​തെന്നു നമുക്ക്‌ വ്യക്തമാ​യി അറിയില്ല, അവയെ എങ്ങനെ സംരക്ഷി​ക്കണം എന്നതിനെ സംബന്ധി​ച്ചാ​കട്ടെ യാതൊ​ന്നും അറിയില്ല എന്നതാണ്‌ വാസ്‌തവം.” (g01 3/8)

[13-ാം പേജിലെ ചതുരം]

മറ്റു സന്ന്യാ​സ​സീ​ലു​ക​ളും അപകട​ത്തിൽ

ലോക​ത്തി​നു ചുറ്റു​മാ​യി മറ്റു സമു​ദ്ര​ങ്ങ​ളി​ലും സന്ന്യാ​സി​സീ​ലു​കൾ കാണ​പ്പെ​ടു​ന്നുണ്ട്‌. എന്നാൽ അവയും വംശനാ​ശ​ഭീ​ഷ​ണി​യി​ലാണ്‌. നാഷണൽ ജിയോ​ഗ്ര​ഫിക മാസിക പറയു​ന്ന​പ്ര​കാ​രം കരീബി​യൻ അഥവാ വെസ്റ്റ്‌ ഇൻഡ്യൻ സന്ന്യാ​സി​സീ​ലാണ്‌ “പുതിയ ലോക​ത്തിൽ [അമേരിക്ക] കൊളം​ബസ്‌ ആദ്യമാ​യി കണ്ടെത്തിയ സീൽ. തീര​ത്തോ​ട​ടു​ത്തു കഴിയാൻ ഇഷ്ടപ്പെ​ടു​ന്ന​തും ചൂഷണം ചെയ്യ​പ്പെ​ടാൻ സാധ്യ​ത​യു​ള്ള​തു​മായ സന്ന്യാ​സി​സീ​ലു​കൾ വളരെ പെട്ടെ​ന്നു​തന്നെ വൻതോ​തിൽ കൊ​ന്നൊ​ടു​ക്ക​പ്പെട്ടു. . . . രേഖ​പ്പെ​ടു​ത്ത​പ്പെട്ട അവസാ​നത്തെ കരീബി​യൻ സന്ന്യാ​സി​സീ​ലി​നെ കണ്ടത്‌ 1952-ലായി​രു​ന്നു.”

ഹവായി​യൻ അഥവാ ലൈസാൻ സന്ന്യാ​സി​സീ​ലു​ക​ളു​ടെ അവസാ​നത്തെ അഭയം ഹവായ്‌ ദ്വീപു​ക​ളി​ലെ ദേശീയ വന്യജീ​വി സങ്കേത​ത്തി​ലെ കൊച്ചു​ദ്വീ​പു​ക​ളു​ടെ സമൂഹ​മായ ഫ്രഞ്ച്‌ ഫ്രി​ഗേറ്റ്‌ ഷോൾസ്‌ ആയിരു​ന്നേ​ക്കാം. എന്നാൽ, അതിജീ​വി​ച്ചു​കൊ​ണ്ടി​രി​ക്കുന്ന ഏതാണ്ട്‌ 1,300 സീലു​ക​ളും “പ്രശ്‌ന​ങ്ങ​ളാൽ വലയം ചെയ്യ​പ്പെ​ട്ടി​രി​ക്കു​ക​യാണ്‌,” അവയുടെ സംരക്ഷ​ണ​ത്തി​നാ​യി അശ്രാന്ത പരി​ശ്രമം ചെയ്‌തി​ട്ടു​കൂ​ടി.

പശ്ചിമാ​ഫ്രി​ക്ക​യി​ലെ മോറി​റ്റാ​നി​യൻ തീരത്തെ 270 മെഡി​റ്റ​റേ​നി​യൻ സന്ന്യാ​സി​സീ​ലു​ക​ളിൽ മുക്കാൽഭാ​ഗ​ത്തോ​ള​വും 1997-ലെ വസന്തകാ​ലം മുതൽ ഒരു പകർച്ച​വ്യാ​ധി​യാൽ തുടച്ചു​നീ​ക്ക​പ്പെ​ട്ടി​രി​ക്കു​ന്നു. സയൻസ്‌ ന്യൂസി​ലെ ഒരു റിപ്പോർട്ട്‌ അനുസ​രിച്ച്‌, പരി​ശോ​ധ​ന​യ്‌ക്കു വിധേ​യ​മാ​ക്ക​പ്പെട്ട സീലു​ക​ളിൽ ഭൂരി​ഭാ​ഗ​ത്തെ​യും “നായ്‌ക്ക​ളിൽ ജലദോ​ഷ​ത്തി​നും പനിക്കും മറ്റും ഇടയാ​ക്കുന്ന വൈറ​സി​നോ​ടു സമാന​മായ ഡോൾഫിൻ മോർബി​ല്ലി വൈറസ്‌” ബാധി​ച്ചി​രു​ന്നു.

[12-ാം പേജിലെ ചിത്രങ്ങൾ]

സന്ന്യാസിസീലുകൾക്ക്‌ ബൾബിന്റെ ആകൃതി​യി​ലുള്ള തലയും വലിയ നാസാ​ര​ന്ധ്ര​ങ്ങ​ളും പോലെ അനന്യ​സാ​ധാ​ര​ണ​മായ അനേകം സവി​ശേ​ഷ​ത​ക​ളുണ്ട്‌

സീലുകളുടെ സംരക്ഷ​ണ​ത്തി​നാ​യി ഏജൻസി​കൾ രൂപീ​ക​രി​ക്ക​പ്പെ​ട്ടി​രി​ക്കു​ന്നു

[കടപ്പാട്‌]

Panos Dendrinos/HSSPMS

[13-ാം പേജിലെ ചിത്രങ്ങൾ]

വർഷങ്ങളായി കുത്തനെ കുറഞ്ഞു​കൊ​ണ്ടി​രുന്ന വടക്കൻ സ്‌പൊ​റേ​ഡി​സി​ലെ സന്ന്യാ​സി​സീ​ലു​ക​ളു​ടെ എണ്ണത്തിൽ പുരോ​ഗ​തി​യു​ടെ ആദ്യല​ക്ഷ​ണങ്ങൾ കണ്ടുതു​ട​ങ്ങി​യി​രി​ക്കു​ന്നു

[കടപ്പാട്‌]

P. Dendrinos/MOm

D. Kanellos/MOm

[13-ാം പേജിലെ ചിത്രം]

ഹവായിയൻ സന്ന്യാ​സി​സീൽ

[12-ാം പേജിലെ ചിത്ര​ങ്ങൾക്ക്‌ കടപ്പാട്‌]

Panos Dendrinos/HSSPMS