യുവജ​നങ്ങൾ ചോദി​ക്കു​ന്നു . . .

ഞാൻ എന്റെ മുത്തശ്ശീ​മു​ത്ത​ശ്ശ​ന്മാ​രെ അടുത്ത​റി​യേ​ണ്ടത്‌ എന്തു​കൊണ്ട്‌?

“പരസ്‌പരം ആശയവി​നി​മയം നടത്തു​ന്ന​തിൽ എനിക്കും അമ്മയ്‌ക്കും ബുദ്ധി​മുട്ട്‌ അനുഭ​വ​പ്പെ​ട്ട​പ്പോൾ, കാര്യ​ങ്ങ​ളൊ​ക്കെ നേരെ​യാ​ക്കാൻ മുത്തശ്ശി ഞങ്ങളെ സഹായി​ച്ചു.”—ഡാമരിസ്‌.

“കുടും​ബ​ത്തി​ന്റെ ഒരുമ നിലനി​റു​ത്തു​ക​യും കുടുംബ പാരമ്പ​ര്യ​ങ്ങ​ളും മറ്റും ഇളം തലമു​റ​യ്‌ക്കു കൈമാ​റു​ക​യും ചെയ്യുന്ന ഒരു പ്രധാ​ന​പ്പെട്ട കണ്ണിയാ​യി ചരി​ത്ര​ത്തി​ലു​ട​നീ​ളം മുത്തശ്ശീ​മു​ത്ത​ശ്ശ​ന്മാർ വർത്തി​ച്ചി​രി​ക്കു​ന്നു” എന്ന്‌ മുത്തശ്ശീ​മു​ത്ത​ശ്ശ​ന്മാ​രു​ടെ പ്രഭാവം! (ഇംഗ്ലീഷ്‌) എന്ന തന്റെ പുസ്‌ത​ക​ത്തിൽ ഡോ. ആർതർ കോൺഹാ​ബർ എഴുതു​ന്നു. അദ്ദേഹം ഇങ്ങനെ കൂട്ടി​ച്ചേർക്കു​ന്നു: “അധ്യാ​പ​ക​രാ​യും മാതാ​പി​താ​ക്ക​ളു​ടെ സഹായി​ക​ളാ​യും ചരി​ത്ര​കാ​ര​ന്മാ​രാ​യും പരിപാ​ല​ക​രാ​യും ഉപദേ​ഷ്ടാ​ക്ക​ളാ​യും എന്തിന്‌, വിനോ​ദി​പ്പി​ക്കു​ന്നവർ പോലും ആയി വർത്തി​ക്കുന്ന അവരുടെ മനശ്ശാ​സ്‌ത്ര​പ​ര​വും സാമൂ​ഹി​ക​വും ആത്മീയ​വു​മായ റോളു​കൾ അത്യന്തം പ്രധാ​ന​പ്പെട്ടവ ആയിരു​ന്നു. ശക്തമായ പ്രഭാവം ചെലു​ത്തു​ന്ന​തും അനേകം തലങ്ങളെ സ്‌പർശി​ക്കു​ന്ന​തു​മായ മുത്തശ്ശീ​മു​ത്ത​ശ്ശ​ന്മാ​രു​ടെ റോൾ നമ്മുടെ സമൂഹ​ത്തിന്‌ എങ്ങനെ അവഗണി​ക്കാൻ കഴിഞ്ഞു എന്നു ഞാൻ ചോദി​ച്ചു​പോ​കു​ക​യാണ്‌.”

പോയ നാളു​ക​ളിൽ, മുത്തശ്ശീ​മു​ത്ത​ശ്ശ​ന്മാർ കുടുംബ ജീവി​ത​ത്തി​ന്റെ ഒരു അടിസ്ഥാന ഘടകമാ​യി വർത്തി​ച്ചി​രു​ന്നു. യഹോ​വ​യാം ദൈവ​ത്തി​ന്റെ ആരാധ​ക​രു​ടെ കാര്യ​ത്തിൽ ഇതു വിശേ​ഷി​ച്ചും സത്യമാ​യി​രു​ന്നു. പ്രായ​മാ​യ​വരെ ആദരി​ക്കാ​നും അവരോ​ടു വിലമ​തി​പ്പു പ്രകടി​പ്പി​ക്കാ​നും ബൈബിൾ ഇസ്രാ​യേ​ല്യ​രോ​ടു കൽപ്പി​ച്ചി​രു​ന്നു. (ലേവ്യ​പു​സ്‌തകം 19:32) മുത്തശ്ശീ​മു​ത്ത​ശ്ശ​ന്മാർ വിശേ​ഷി​ച്ചും ആദരവ്‌ അർഹി​ക്കു​ന്ന​വ​രാ​യി കണക്കാ​ക്ക​പ്പെ​ട്ടി​രു​ന്നു.—1 തിമൊ​ഥെ​യൊസ്‌ 5:4, NW.

എന്നാൽ സങ്കടക​ര​മെന്നു പറയട്ടെ, കാലം മാറി​യി​രി​ക്കു​ന്നു. ദൂരം പലപ്പോ​ഴും കുടും​ബാം​ഗ​ങ്ങളെ തമ്മിൽ അകറ്റുന്നു. പല യുവജ​ന​ങ്ങൾക്കും തങ്ങളുടെ മുത്തശ്ശീ​മു​ത്ത​ശ്ശ​ന്മാ​രു​മാ​യി ഒരു സമ്പർക്ക​വു​മില്ല. ആളുക​ളു​ടെ മനോ​ഭാ​വ​ങ്ങൾക്കും മാറ്റം വന്നിരി​ക്കു​ന്നു. ഇന്ന്‌ ലോക​ത്തി​ന്റെ പല ഭാഗങ്ങ​ളി​ലും ചെറു​പ്പ​ക്കാർ പ്രായ​മാ​യ​വ​രോട്‌—ബന്ധുക്കൾ ഉൾപ്പെ​ടെ​യു​ള്ള​വ​രോട്‌—ആദര​വോ​ടെ അല്ല പെരു​മാ​റു​ന്നത്‌. (2 തിമൊ​ഥെ​യൊസ്‌ 3:1-3) തലമു​റകൾ തമ്മിലുള്ള അന്തരത്തെ വർണി​ക്കാൻ മുമ്പ്‌ തലമുറ വിടവ്‌ എന്ന പ്രയോ​ഗ​മാണ്‌ ഉപയോ​ഗി​ച്ചി​രു​ന്ന​തെ​ങ്കിൽ ഇന്ന്‌ അതിനെ തലമുറ ഗർത്തം എന്നു വിശേ​ഷി​പ്പി​ക്കു​ന്ന​താണ്‌ കൂടുതൽ ഉചിതം എന്നു തോന്നു​ന്നു. ജീവി​ത​ത്തി​ന്റെ പുതിയ മുഖങ്ങളെ കുറിച്ച്‌ തികച്ചും അജ്ഞരായ വെറും പഴഞ്ചൻ ചിന്താ​ഗ​തി​ക്കാ​രാ​യി​ട്ടാണ്‌ മിക്ക യുവജ​ന​ങ്ങ​ളും തങ്ങളുടെ മുത്തശ്ശീ​മു​ത്ത​ശ്ശ​ന്മാ​രെ കാണു​ന്നത്‌. ഇന്നു യുവജ​നങ്ങൾ നേരി​ടുന്ന സമ്മർദ​ങ്ങ​ളും പ്രശ്‌ന​ങ്ങ​ളും മനസ്സി​ലാ​ക്കാൻ ഈ പ്രായ​മാ​യ​വർക്കു കഴിയു​മെന്ന്‌ അവർക്കു സങ്കൽപ്പി​ക്കാൻ കൂടി കഴിയു​ന്നില്ല.

അങ്ങനെ​യാ​ണു നിങ്ങൾ കരുതു​ന്ന​തെ​ങ്കിൽ, നിങ്ങളു​ടെ ചിന്താ​ഗ​തി​യെ ഒന്നുകൂ​ടി പരി​ശോ​ധി​ക്കാൻ ഒരുങ്ങി​ക്കൊ​ള്ളുക! കാരണം, മുത്തശ്ശീ​മു​ത്ത​ശ്ശ​ന്മാ​രെ അടുത്ത​റി​യു​ന്നതു കൊണ്ട്‌ ഒട്ടേറെ പ്രയോ​ജ​ന​ങ്ങ​ളുണ്ട്‌—പ്രത്യേ​കി​ച്ചും അവർ ദൈവ​ഭയം ഉള്ളവരാ​ണെ​ങ്കിൽ. അവരു​മാ​യി നിങ്ങൾ ഇതുവരെ ഒരു അടുത്ത ബന്ധം നട്ടുവ​ളർത്തി​യി​ട്ടി​ല്ലെ​ങ്കിൽ അതൊരു വലിയ നഷ്ടമാ​യി​രു​ന്നേ​ക്കാം. അങ്ങനെ പറയാൻ കാരണ​മെ​ന്താണ്‌?

ജ്ഞാനത്തി​ന്റെ​യും ഉപദേ​ശ​ത്തി​ന്റെ​യും ഒരു ഉറവ്‌

കാറ്റും കോളും നിറഞ്ഞ യൗവന വർഷങ്ങ​ളിൽ മുത്തശ്ശീ​മു​ത്ത​ശ്ശ​ന്മാർക്ക്‌ ഒരു അഭയസ്ഥാ​നം ആയി വർത്തി​ക്കാൻ കഴിയും എന്ന്‌ പല യുവജ​ന​ങ്ങ​ളും കണ്ടെത്തി​യി​രി​ക്കു​ന്നു. സെവന്റീൻ മാസിക ഇപ്രകാ​രം പറയുന്നു: “പതിറ്റാ​ണ്ടു​ക​ളി​ലെ ജീവിത പരിചയം കൈമു​ത​ലാ​യുള്ള അവർക്കാണ്‌ പലപ്പോ​ഴും നിങ്ങളു​ടെ അതേ പ്രശ്‌ന​ങ്ങ​ളു​മാ​യി മല്ലിടുന്ന സമപ്രാ​യ​ക്കാ​രായ സുഹൃ​ത്തു​ക്ക​ളെ​ക്കാ​ളും പ്രശ്‌നങ്ങൾ കൈകാ​ര്യം ചെയ്യു​ന്ന​തിൽ നിങ്ങളെ ഏറെ സഹായി​ക്കാ​നാ​കുക. ജീവി​ത​ത്തിൽ മാറ്റത്തി​ന്റെ ആദ്യ ഘട്ടങ്ങൾ കടക്കു​ന്ന​തി​ന്റെ നൊമ്പ​ര​ത്തി​ലാണ്‌ നിങ്ങളും കൂട്ടു​കാ​രും. എന്നാൽ നിങ്ങളു​ടെ മുത്തശ്ശീ​മു​ത്ത​ശ്ശ​ന്മാർ  ജീവി​ത​ത്തിൽ അത്തരം അനേകം ഘട്ടങ്ങൾ വിജയ​ക​ര​മാ​യി കടന്നി​ട്ടു​ള്ള​വ​രാണ്‌. അവർ പലപ്പോ​ഴും ജ്ഞാനികൾ മാത്രമല്ല, സമർഥ​രും കൂടി​യാണ്‌.” മേൽപ്പറഞ്ഞ ബുദ്ധി​യു​പ​ദേശം നൽകി​യ​പ്പോൾ, ആ മാസിക, നൂറ്റാ​ണ്ടു​കൾക്കു മുമ്പ്‌ ബൈബിൾ പറഞ്ഞ കാര്യം ആവർത്തി​ക്കുക മാത്ര​മാണ്‌ ചെയ്‌തത്‌. ബൈബി​ളിൽ നാം ഇങ്ങനെ വായി​ക്കു​ന്നു: “നരച്ച തല ശോഭ​യുള്ള കിരീ​ട​മാ​കു​ന്നു; നീതി​യു​ടെ മാർഗ്ഗ​ത്തിൽ അതിനെ പ്രാപി​ക്കാം.”—സദൃശ​വാ​ക്യ​ങ്ങൾ 16:31.

നിങ്ങൾ ഇന്നു ജീവി​ക്കു​ന്ന​തിൽനി​ന്നു വളരെ വ്യത്യ​സ്‌ത​മായ ഒരു ലോക​ത്തി​ലാ​യി​രി​ക്കാം നിങ്ങളു​ടെ മുത്തശ്ശീ​മു​ത്ത​ശ്ശ​ന്മാർ വളർന്നു​വ​ന്നത്‌ എന്നതു ശരിതന്നെ. എങ്കിലും ഒരു കാര്യം സംബന്ധിച്ച്‌ നിങ്ങൾക്ക്‌ ഉറപ്പു​ണ്ടാ​യി​രി​ക്കാൻ കഴിയും: നിങ്ങൾ ഇപ്പോൾ ഏതു തരം വികാ​ര​ങ്ങ​ളു​മാ​യാ​ണോ മല്ലിടു​ന്നത്‌, അതേ വികാ​ര​ങ്ങൾതന്നെ ഒരിക്കൽ അല്ലെങ്കിൽ മറ്റൊ​രി​ക്കൽ അവർക്കും തോന്നി​യി​ട്ടുണ്ട്‌. ഈ വികാ​രങ്ങൾ കൈകാ​ര്യം ചെയ്യു​ന്ന​തിൽ നിങ്ങൾക്ക്‌ ഇപ്പോ​ഴും അനുഭ​വ​പ​രി​ചയം കുറവാ​യി​രി​ക്കാ​മെ​ന്നി​രി​ക്കെ, ഒരായു​ഷ്‌കാ​ലത്തെ ജീവിത പരിച​യ​ത്തി​ലൂ​ടെ ഇത്തരം വികാ​ര​ങ്ങളെ എങ്ങനെ തരണം ചെയ്യാ​മെന്നു മനസ്സി​ലാ​ക്കി​യി​ട്ടു​ള്ള​വ​രാണ്‌ നിങ്ങളു​ടെ മുത്തശ്ശീ​മു​ത്ത​ശ്ശ​ന്മാർ. (സദൃശ​വാ​ക്യ​ങ്ങൾ 1:4, NW) “വൃദ്ധന്മാ​രു​ടെ പക്കൽ ജ്ഞാനവും വയോ​ധി​ക​ന്മാ​രിൽ വിവേ​ക​വും ഉണ്ടു” എന്ന്‌ നീതി​മാ​നായ ഇയ്യോബ്‌ പറഞ്ഞു. (ഇയ്യോബ്‌ 12:12) അതു​കൊണ്ട്‌, യുവജ​ന​ങ്ങൾക്ക്‌ സന്തുലിത ബുദ്ധി​യു​പ​ദേ​ശ​മോ പ്രോ​ത്സാ​ഹ​ന​മോ പിന്തു​ണ​യോ ആവശ്യ​മാ​യി വരുന്ന പല സാഹച​ര്യ​ങ്ങ​ളി​ലും മുത്തശ്ശീ​മു​ത്ത​ശ്ശ​ന്മാർക്ക്‌ ഒരു യഥാർഥ സഹായ​മാ​യി​രി​ക്കാൻ കഴിയും.

ഡാമരി​സി​ന്റെ മുത്തശ്ശി​യു​ടെ കാര്യം​തന്നെ എടുക്കാം. അവർ ഡാമരി​സി​നോ​ടും അമ്മയോ​ടും ഒപ്പം നഗരത്തി​ലുള്ള അപ്പാർട്ട്‌മെ​ന്റി​ലാണ്‌ പാർത്തി​രു​ന്നത്‌. “പരസ്‌പരം ആശയവി​നി​മയം നടത്തു​ന്ന​തിൽ എനിക്കും അമ്മയ്‌ക്കും ബുദ്ധി​മുട്ട്‌ അനുഭ​വ​പ്പെ​ട്ട​പ്പോൾ, കാര്യ​ങ്ങ​ളൊ​ക്കെ നേരെ​യാ​ക്കാൻ മുത്തശ്ശി ഞങ്ങളെ സഹായി​ച്ചു. കാര്യ​ങ്ങളെ വ്യത്യ​സ്‌ത​മായ ഒരു വിധത്തിൽ വീക്ഷി​ക്കാൻ മുത്തശ്ശി എന്നെ സഹായി​ച്ചി​രു​ന്നു,” ഡാമരിസ്‌ അനുസ്‌മ​രി​ക്കു​ന്നു.

അലിക്‌സാ​ണ്ട്രി​യ​യ്‌ക്കും സമാന​മായ അനുഭ​വ​മു​ണ്ടാ​യി. അവളുടെ കുടും​ബം മറ്റൊ​രി​ട​ത്തേക്ക്‌ താമസം മാറ്റു​ക​യും അവൾക്ക്‌ മറ്റൊരു സ്‌കൂ​ളിൽ ചേരേണ്ടി വരിക​യും ചെയ്‌ത​പ്പോ​ഴാ​യി​രു​ന്നു അത്‌. “എന്റെ പുതിയ ടീച്ചർ പരുക്കൻ സ്വഭാ​വ​ക്കാ​രി​യാ​യി​രു​ന്നെന്നു മാത്രമല്ല ഇടയ്‌ക്കൊ​ക്കെ പൊട്ടി​ത്തെ​റി​ക്കു​ന്ന​വ​രും ആയിരു​ന്നു,” അലിക്‌സാ​ണ്ട്രിയ പറയുന്നു. അതു​കൊണ്ട്‌ പുതിയ സ്‌കൂ​ളു​മാ​യി പൊരു​ത്ത​പ്പെ​ടു​ന്നത്‌ അലിക്‌സാ​ണ്ട്രി​യയെ സംബന്ധി​ച്ചി​ട​ത്തോ​ളം ബുദ്ധി​മു​ട്ടുള്ള കാര്യ​മാ​യി​രു​ന്നു. എന്നാൽ ആ സമയത്ത്‌ മുത്തശ്ശി അവൾക്ക്‌ വലി​യൊ​രു സഹായ​മാ​യി​രു​ന്നു. സാഹച​ര്യ​ത്തെ കൂടുതൽ ശുഭാ​പ്‌തി​വി​ശ്വാ​സ​ത്തോ​ടെ നോക്കി​ക്കാ​ണാൻ പ്രോ​ത്സാ​ഹി​പ്പി​ച്ചു​കൊണ്ട്‌ അവർ അലിക്‌സാ​ണ്ട്രി​യയെ പൊരു​ത്ത​പ്പെ​ടാൻ സഹായി​ച്ചു. “ഇപ്പോൾ ഞാൻ എന്റെ സ്‌കൂൾ ഇഷ്ടപ്പെ​ടു​ന്നു. അതു​പോ​ലെ അധ്യാ​പി​ക​യെ​യും,” അലിക്‌സാ​ണ്ട്രിയ പറയുന്നു.

ഹൈസ്‌കൂൾ പാസായ ശേഷം അനുബന്ധ വിദ്യാ​ഭ്യാ​സം നടത്തി​ക്കൊ​ണ്ടി​രുന്ന സമയത്ത്‌ തന്റെ മുത്തശ്ശീ​മു​ത്ത​ശ്ശ​ന്മാർ നൽകിയ സഹായ​ത്തെ​ക്കു​റിച്ച്‌ ബ്രസീ​ലി​ലെ റാഫാ​യെൽ എന്ന ചെറു​പ്പ​ക്കാ​രൻ അനുസ്‌മ​രി​ക്കു​ന്നു: “കൂട്ടു​കെട്ട്‌ സംബന്ധി​ച്ചും മയക്കു​മ​രു​ന്നു​മാ​യി ബന്ധപ്പെട്ട പ്രശ്‌ന​ങ്ങളെ ചെറുത്തു നിൽക്കേ​ണ്ടത്‌ എങ്ങനെ​യെ​ന്ന​തി​നെ കുറി​ച്ചു​മൊ​ക്കെ അവർ എനിക്ക്‌ ധാരാളം ബുദ്ധി​യു​പ​ദേശം നൽകി.” റാഫാ​യെൽ ഇപ്പോൾ ഒരു മുഴു​സമയ സുവി​ശേ​ഷ​ക​നാ​യി സേവി​ക്കു​ന്നു.

ഗ്രാൻഡ്‌പാ​ര​ന്റിങ്‌ ഇൻ എ ചേഞ്ചിങ്‌ വേൾഡ്‌ എന്ന തന്റെ പുസ്‌ത​ക​ത്തിൽ ഇഡ ലെഷേൻ ഒരു മുത്തശ്ശി എന്ന നിലയി​ലുള്ള തന്റെ സ്വന്തം അനുഭവം വിവരി​ക്കു​ന്നു. അവർ എഴുതു​ന്നു: “ഒരു ദിവസം എന്റെ കൊച്ചു​മകൾ എന്നെ വിളി​ച്ചി​ട്ടു പറഞ്ഞു, ‘മുത്തശ്ശീ, കൂട്ടു​കാ​രിൽനി​ന്നുള്ള സമ്മർദത്തെ തരണം ചെയ്യാൻ എനിക്കു സഹായം വേണമാ​യി​രു​ന്നു.’ അവളുടെ സഹപാ​ഠി​ക​ളിൽ ചിലർ ആൺകു​ട്ടി​ക​ളു​മാ​യി ഡേറ്റി​ങ്ങിൽ ഏർപ്പെ​ടാൻ അവളെ പ്രേരി​പ്പി​ച്ചു​കൊ​ണ്ടി​രി​ക്കു​ക​യാ​യി​രു​ന്നു. ആൺകു​ട്ടി​ക​ളിൽ ചിലർ അവളെ ഫോണിൽ വിളിച്ച്‌ സംസാ​രി​ക്കു​ന്നു​മു​ണ്ടാ​യി​രു​ന്നു.” പേരക്കു​ട്ടി ആവശ്യ​പ്പെ​ട്ടതു നിമിത്തം ആവശ്യ​മായ ബുദ്ധി​യു​പ​ദേശം നൽകി സഹായി​ക്കാൻ മുത്തശ്ശി​ക്കു സാധിച്ചു. സമാന​മാ​യി, സ്‌നേ​ഹ​നി​ധി​യായ ഒരു മുത്തശ്ശ​നു​മാ​യി അല്ലെങ്കിൽ മുത്തശ്ശി​യു​മാ​യി നടത്തുന്ന ഹ്രസ്വ​നേ​രത്തെ സംഭാ​ഷണം വളരെ​യ​ധി​കം ധാർമിക പിന്തുണ നേടി​ത്ത​രു​ന്ന​താ​യി നിങ്ങളും കണ്ടെത്തി​യേ​ക്കാം.

പലപ്പോ​ഴും, കുടും​ബ​ത്തിൽ രോഗ​മോ മരണമോ പോലുള്ള പ്രതി​സ​ന്ധി​കൾ ഉണ്ടാകുന്ന സമയത്ത്‌ മുത്തശ്ശീ​മു​ത്ത​ശ്ശ​ന്മാർ പ്രത്യേ​കി​ച്ചും വലി​യൊ​രു സഹായ​മാ​ണെന്നു തെളി​യു​ന്നു. ലേസി​യു​ടെ പിതാവ്‌ ഗുരു​ത​ര​മായ ഒരു രോഗം പിടി​പെട്ട്‌ മരണമ​ട​ഞ്ഞ​പ്പോൾ ആ സാഹച​ര്യ​വു​മാ​യി പൊരു​ത്ത​പ്പെ​ടാൻ അവളുടെ മുത്തശ്ശി അവളെ സഹായി​ച്ചു. “ഇപ്പോൾ ഞങ്ങൾ മുമ്പ​ത്തേ​തി​ലും ഒന്നും​കൂ​ടി അടുത്തി​രി​ക്കു​ന്നു,” ലേസി പറയുന്നു.

ഒരു പ്രത്യേക സ്‌നേ​ഹ​ബ​ന്ധം

യുവജ​ന​ങ്ങൾക്കും മാതാ​പി​താ​ക്കൾക്കും ഇടയിൽ ചില​പ്പോ​ഴൊ​ക്കെ ഉണ്ടാകുന്ന ഉരസലു​ക​ളും പിരി​മു​റു​ക്ക​ങ്ങ​ളും മുത്തശ്ശീ​മു​ത്ത​ശ്ശ​ന്മാ​രും പേരക്കു​ട്ടി​ക​ളും തമ്മിലുള്ള ബന്ധത്തിൽ സാധാ​ര​ണ​മാ​യി കാണാ​റില്ല എന്നതും ഒരു വസ്‌തു​ത​യാണ്‌. എന്തായി​രി​ക്കാം ഇതിനു കാരണം?  മുത്തശ്ശീ​മു​ത്ത​ശ്ശ​ന്മാർ പലപ്പോ​ഴും തങ്ങളുടെ പേരക്കു​ട്ടി​ക​ളു​മാ​യി ഒരു പ്രത്യേക ബന്ധം ആസ്വദി​ക്കു​ന്നു എന്നതാണ്‌ ഒരു കാരണം. “വൃദ്ധർ തങ്ങളുടെ കൊച്ചു​മ​ക്ക​ളിൽ അത്യാ​നന്ദം കൊള്ളു​ന്നു” എന്നു ബൈബിൾ പറയുന്നു.—സദൃശ​വാ​ക്യ​ങ്ങൾ 17:6, ടുഡേ​യ്‌സ്‌ ഇംഗ്ലീഷ്‌ ഭാഷാ​ന്തരം.

നിങ്ങളെ “കർത്താ​വി​ന്റെ ബാലശി​ക്ഷ​യി​ലും പത്ഥ്യോ​പ​ദേ​ശ​ത്തി​ലും” വളർത്തി​ക്കൊ​ണ്ടു വരാനുള്ള ഭാരിച്ച ഉത്തരവാ​ദി​ത്വം നിങ്ങളു​ടെ മുത്തശ്ശീ​മു​ത്ത​ശ്ശ​ന്മാ​രു​ടെ ചുമലി​ലല്ല, പിന്നെ​യോ മാതാ​പി​താ​ക്ക​ളു​ടെ ചുമലി​ലാണ്‌ എന്ന കാര്യ​വും ഓർമി​ക്കുക. (എഫെസ്യർ 6:4) മുത്തശ്ശീ​മു​ത്ത​ശ്ശ​ന്മാ​രു​ടെ റോൾ മാതാ​പി​താ​ക്ക​ളു​ടെ​യ​ത്ര​യും ഭാരി​ച്ച​ത​ല്ലാ​ത്ത​തി​നാൽ അവർ നിങ്ങളെ കുറ്റ​പ്പെ​ടു​ത്താ​നും വഴക്കു പറയാ​നും ഉള്ള സാധ്യത കുറവാ​യി​രി​ക്കാം. കൂടാതെ, കുടും​ബ​കാ​ര്യ​ങ്ങൾ ദിവസേന നോക്കി​ന​ട​ത്തു​ന്ന​തി​ന്റെ ഉത്തരവാ​ദി​ത്വ​ങ്ങ​ളും സമ്മർദ​ങ്ങ​ളും ഒന്നും സാധാ​ര​ണ​ഗ​തി​യിൽ മുത്തശ്ശീ​മു​ത്ത​ശ്ശ​ന്മാർക്ക്‌ അനുഭ​വി​ക്കേണ്ടി വരുന്നില്ല. അവർ അത്തരം സമ്മർദ​ങ്ങ​ളിൽനി​ന്നൊ​ക്കെ മിക്കവാ​റും മോചി​ത​രാ​യ​തി​നാൽ നിങ്ങളു​ടെ ആവശ്യ​ങ്ങ​ളോ​ടു പ്രതി​ക​രി​ക്കു​ന്ന​തും നിങ്ങളു​ടെ കാര്യങ്ങൾ ശ്രദ്ധി​ക്കു​ന്ന​തും അവർക്കു കൂടുതൽ എളുപ്പ​മാ​യി​രു​ന്നേ​ക്കാം. മുത്തശ്ശീ​മു​ത്ത​ശ്ശ​ന്മാർ തന്റെ കാര്യ​ങ്ങ​ളിൽ എത്രമാ​ത്രം ശ്രദ്ധി​ച്ചി​രു​ന്നു​വെന്ന്‌ പതി​നേഴു വയസ്സുള്ള റ്റോം അനുസ്‌മ​രി​ക്കു​ന്നു. “നല്ല റിപ്പോർട്ട്‌ കാർഡു​കൾ ലഭിക്കു​മ്പോൾ” അവർ അവന്‌ “കൊച്ചു കൊച്ചു സമ്മാനങ്ങൾ” അയച്ചു​കൊ​ടു​ക്കു​മാ​യി​രു​ന്നു. പിയാ​നോ പഠിക്കാൻ വേണ്ട പണം മുടക്കി​യി​രു​ന്ന​തും അവരാ​യി​രു​ന്നു.

എല്ലാ മുത്തശ്ശീ​മു​ത്ത​ശ്ശ​ന്മാർക്കും ഇത്തരം സമ്മാനങ്ങൾ തരാൻ കഴി​ഞ്ഞെന്നു വരില്ല. എങ്കിലും മറ്റു വിധങ്ങ​ളിൽ അവർ നിങ്ങളി​ലുള്ള താത്‌പ​ര്യം പ്രകടി​പ്പി​ച്ചേ​ക്കാം. നിങ്ങൾക്ക്‌ അഭിന​ന്ദ​ന​മോ പ്രോ​ത്സാ​ഹ​ന​മോ നൽകി​ക്കൊ​ണ്ടോ നിങ്ങൾ പറയു​ന്നത്‌ ശ്രദ്ധാ​പൂർവം കേട്ടു​കൊ​ണ്ടോ ഒക്കെ ആയിരി​ക്കാം ഒരുപക്ഷേ അവർ ഇതു ചെയ്യു​ന്നത്‌. ഇത്‌ നിങ്ങളു​ടെ ഇടയിൽ ആഴമായ സൗഹൃദം വളർന്നു​വ​രാൻ ഇടയാ​ക്കും. ഡാമരിസ്‌ തന്റെ മുത്തശ്ശി​യെ കുറിച്ച്‌ ഇങ്ങനെ പറയുന്നു: “മുത്തശ്ശി​യു​ടെ അടുത്താ​യി​രി​ക്കു​മ്പോൾ എനിക്ക്‌ ഒട്ടും പിരി​മു​റു​ക്കം അനുഭ​വ​പ്പെ​ടു​ന്നില്ല. ഏതു സമയത്തു വേണ​മെ​ങ്കി​ലും എനിക്ക്‌ മുത്തശ്ശി​യു​ടെ അടുത്തു പോയി സംസാ​രി​ക്കാൻ കഴിയും. കാരണം ഞാൻ പറയു​ന്നതു കേൾക്കാൻ മുത്തശ്ശി എപ്പോ​ഴും ഒരുക്ക​മാണ്‌—ചില​പ്പോ​ഴൊ​ക്കെ ഞാൻ പറയു​ന്ന​തിൽ ഒരു കഴമ്പും ഇല്ലെങ്കിൽ കൂടി.” ജോനാ​റ്റ​സി​ന്റെ അനുഭ​വ​വും സമാന​മാണ്‌. അവന്‌ തന്റെ മുത്തശ്ശീ​മു​ത്ത​ശ്ശ​ന്മാ​രു​മാ​യി എന്തും ഏതു സമയത്തും സംസാ​രി​ക്കാ​നുള്ള സ്വാത​ന്ത്ര്യം ഉണ്ട്‌. ഗൗരവ​മേ​റിയ വിഷയ​ങ്ങളെ കുറി​ച്ചു​പോ​ലും അവരു​മാ​യി ചർച്ച​ചെ​യ്യാൻ അവനു കഴിയു​ന്നു.

ഇരുകൂ​ട്ടർക്കും പ്രയോ​ജ​നം

നിങ്ങൾക്കു വേണ്ടുന്ന ജ്ഞാനവും സ്‌നേ​ഹ​വും പകർന്നു തരാൻ മുത്തശ്ശീ​മു​ത്ത​ശ്ശ​ന്മാർക്കു കഴിയു​മെ​ന്നി​രി​ക്കെ, നിങ്ങളു​ടെ സഖിത്വ​ത്തിൽനി​ന്നും യൗവന​ത്തി​ന്റെ പ്രസരി​പ്പിൽനി​ന്നും അവർക്കും പ്രയോ​ജനം അനുഭ​വി​ക്കാ​നാ​കു​ന്നു. അതെങ്ങനെ? അനേക വിധങ്ങ​ളിൽ നിങ്ങൾക്ക്‌ നിങ്ങളു​ടെ മുത്തശ്ശീ​മു​ത്ത​ശ്ശ​ന്മാർക്ക്‌ സഹായ​വും പിന്തു​ണ​യും പ്രദാനം ചെയ്യാൻ കഴി​ഞ്ഞേ​ക്കാം. അവരുടെ ശാരീ​രിക ബലം ക്ഷയിച്ചു​കൊ​ണ്ടി​രി​ക്കു​ക​യാ​യി​രി​ക്കാം. അല്ലെങ്കിൽ അവർ രോഗ​ങ്ങ​ളു​മാ​യി മല്ലിടു​ക​യാ​യി​രി​ക്കാം. സാധനങ്ങൾ വാങ്ങാ​നും വീട്ടു​ജോ​ലി​കൾ ചെയ്യാ​നും നിങ്ങൾ അവരെ സഹായി​ക്കുന്ന പക്ഷം അവർക്ക്‌ അതു വളരെ പ്രോ​ത്സാ​ഹ​ന​മേ​കും എന്നതിനു സംശയ​മില്ല.

മുത്തശ്ശീ​മു​ത്ത​ശ്ശ​ന്മാ​രിൽ പലരും ഇണയെ മരണത്തിൽ നഷ്ടപ്പെ​ട്ട​വ​രാണ്‌. അതു​കൊണ്ട്‌ ചില​പ്പോ​ഴൊ​ക്കെ അവർക്ക്‌ ഏകാന്തത അനുഭ​വ​പ്പെ​ടു​ന്നു. അവരിൽ സജീവ​മായ താത്‌പ​ര്യം എടുത്തു​കൊണ്ട്‌, ഏകാന്ത​തയെ തരണം ചെയ്യാ​നും ജീവി​ത​ത്തി​ന്റെ ആസ്വാ​ദ്യത നിലനി​റു​ത്താ​നും അവരെ സഹായി​ക്കു​ന്ന​തിൽ നിങ്ങൾക്കു വളരെ വലിയ പങ്കു വഹിക്കാൻ കഴിയും. അപ്രകാ​രം ചെയ്യു​ന്നത്‌, ‘[നിങ്ങളു​ടെ] അമ്മയപ്പ​ന്മാർക്കു [“അമ്മയപ്പ​ന്മാർക്കും വല്യമ്മ​വ​ല്യ​പ്പ​ന്മാർക്കും,” NW] പ്രത്യു​പ​കാ​രം ചെയ്യണം’ എന്ന ബൈബി​ളി​ന്റെ കൽപ്പന​യോട്‌ അനുസ​രണം പ്രകട​മാ​ക്കാൻ കഴിയുന്ന ഒരു വിധമാണ്‌.—1 തിമൊ​ഥെ​യൊസ്‌ 5:4.

മുത്തശ്ശീ​മു​ത്ത​ശ്ശ​ന്മാ​രു​മാ​യി അടുക്കു​ന്നത്‌ നിങ്ങളു​ടെ​യും അവരു​ടെ​യും ജീവിതം സമ്പുഷ്ട​മാ​ക്കും എന്നതിനു സംശയ​മില്ല! ഒരുപക്ഷേ നിങ്ങൾ ഇതുവ​രെ​യും അവരു​മാ​യി ഒരു അടുത്ത ബന്ധം ആസ്വദി​ച്ചി​ട്ടി​ല്ലാ​യി​രി​ക്കാം. അതിനു മാറ്റം വരുത്താൻ ആഗ്രഹ​മു​ണ്ടാ​യി​രി​ക്കാ​മെ​ങ്കി​ലും എവിടെ തുടങ്ങ​ണ​മെന്ന്‌ നിങ്ങൾക്കു നിശ്ചയ​മി​ല്ലാ​യി​രി​ക്കാം. ഒരുപക്ഷേ നിങ്ങളു​ടെ മുത്തശ്ശീ​മു​ത്ത​ശ്ശ​ന്മാർ താമസി​ക്കു​ന്നത്‌ വളരെ ദൂരെ​യാണ്‌ എന്നതാ​യി​രി​ക്കാം പ്രശ്‌നം. അല്ലെങ്കിൽ നിങ്ങളു​ടെ മാതാ​പി​താ​ക്കൾ മേലാൽ ഒന്നിച്ച​ല്ലാ​ത്തത്‌ നിങ്ങളെ മുത്തശ്ശീ​മു​ത്ത​ശ്ശ​ന്മാ​രിൽനിന്ന്‌ അകറ്റി​യി​രി​ക്കാം. ഇത്തരം സാഹച​ര്യ​ങ്ങളെ നിങ്ങൾക്ക്‌ എങ്ങനെ കൈകാ​ര്യം ചെയ്യാൻ കഴിയും എന്നതു സംബന്ധിച്ച്‌ ചില പ്രാ​യോ​ഗിക നിർദേ​ശങ്ങൾ ഉണരുക!-യുടെ ഒരു ഭാവി ലക്കം പ്രദാനം ചെയ്യു​ന്ന​താ​യി​രി​ക്കും. (g01 4/22)

[17-ാം പേജിലെ ചിത്രം]

മുത്തശ്ശീമുത്തശ്ശന്മാർക്ക്‌ നല്ല ശ്രോ​താ​ക്ക​ളും ഉപദേ​ശ​ത്തി​ന്റെ​യും പിന്തു​ണ​യു​ടെ​യും ഒരു ഉറവും ആയിരി​ക്കാൻ കഴിയും

[18-ാം പേജിലെ ചിത്രം]

നിങ്ങളുടെ മുത്തശ്ശീ​മു​ത്ത​ശ്ശ​ന്മാ​രെ സഹായി​ക്കു​ക