തലമുടി—ഒരു അടുത്ത വീക്ഷണം

“യുഗ-സംസ്‌കാര ഭേദമ​ന്യേ, തലമു​ടി അതിന്റെ ഉടമയെ കുറിച്ച്‌ ചില കാര്യങ്ങൾ വെളി​പ്പെ​ടു​ത്തു​ന്നു” എന്ന്‌ ഒരു പരാമർശ ഗ്രന്ഥം പറയുന്നു. മുടി ആരോ​ഗ്യ​മു​ള്ള​തും ആകർഷ​ക​വു​മാ​ക്കി സൂക്ഷി​ക്കു​ന്ന​തിൽ മിക്കവ​രും അതീവ താത്‌പ​ര്യം കാണി​ക്കു​ന്ന​തിൽ അപ്പോൾ അതിശ​യി​ക്കാ​നില്ല.

ഉണരുക! അനുഭ​വ​സ​മ്പ​ന്ന​രായ നാലു കേശാ​ല​ങ്കാ​ര​വി​ദ​ഗ്‌ധ​രോട്‌ മുടി​യു​ടെ ഘടനയെ കുറി​ച്ചും പരിച​ര​ണത്തെ കുറി​ച്ചും സാധാ​ര​ണ​മാ​യി ഉയർന്നു​വ​രാ​റുള്ള ചില ചോദ്യ​ങ്ങൾ ചോദി​ക്കു​ക​യു​ണ്ടാ​യി. പുറമേ കാണു​ന്ന​തി​നെ​ക്കാ​ളൊ​ക്കെ സങ്കീർണ​മാണ്‌ തലമുടി എന്ന്‌ അവരുടെ ഉത്തരങ്ങൾ വെളി​പ്പെ​ടു​ത്തി.

മുടി വളർച്ച​യും മുടി കൊഴി​ച്ചി​ലും

ചോ: മുടിയുടെ ഘടന ഒന്നു വിവരിക്കാമോ?

ഉ: മുടിയിൽ കെരാ​റ്റിൻ എന്ന നാരു​രൂ​പ​ത്തി​ലുള്ള മാംസ്യം അടങ്ങി​യി​രി​ക്കു​ന്നു. തലയോ​ട്ടി​യെ ആവരണം ചെയ്യുന്ന ചർമത്തി​ലെ ഒരു കുഴി​യിൽനി​ന്നാണ്‌ ഓരോ മുടി​യും വളരു​ന്നത്‌. ഈ കുഴിക്ക്‌ രോമ​കൂ​പം (follicle) എന്നാണ്‌ പറയു​ന്നത്‌. ഓരോ രോമ​കൂ​പ​ത്തി​ന്റെ​യും ചുവട്ടിൽ പാപില എന്ന ഭാഗമുണ്ട്‌. ഇതിൽ ധാരാളം രക്തക്കു​ഴ​ലു​കൾ ഉണ്ട്‌. പാപില ഉത്‌പാ​ദി​പ്പി​ക്കുന്ന രോമ​കോ​ശങ്ങൾ രോമ​കൂ​പ​ത്തി​ന്റെ മുകളി​ലേക്കു നീങ്ങു​ക​യും കട്ടിയാ​യി​ത്തീർന്ന്‌ മുടി​യു​ടെ രൂപം കൈവ​രി​ക്കു​ക​യും ചെയ്യുന്നു.

ചോ: മുടി മുറി​ച്ചാൽ അതു കൂടുതൽ വേഗത്തിൽ വളരും എന്നതു പരക്കെ​യുള്ള വിശ്വാ​സ​മാണ്‌. ഇതു ശരിയാ​ണോ?

ഉ: അല്ല. മരത്തിന്റെ ശാഖകൾക്ക്‌ തായ്‌ത്ത​ടി​യിൽനി​ന്നു പോഷണം ലഭിക്കു​ന്ന​തു​പോ​ലെ മുടിക്ക്‌ ശരീര​ത്തിൽനി​ന്നു പോഷണം ലഭിക്കു​ന്നു​ണ്ടെ​ന്നാണ്‌ ചില ആളുകൾ  കരുതു​ന്നത്‌. എന്നാൽ മുടി തലയോ​ട്ടി​യി​ലെ ചർമത്തിൽനി​ന്നു പുറത്തു​വന്നു കഴിഞ്ഞാൽ പിന്നെ അത്‌ ഒരു മൃത വസ്‌തു​വാണ്‌. അതു​കൊണ്ട്‌, മുടി മുറി​ക്കു​ന്നത്‌ അതിന്റെ വളർച്ചയെ ബാധി​ക്കു​ന്നില്ല.

ചോ: എന്തുകൊണ്ടാണ്‌ മുടി നരയ്‌ക്കു​ന്നത്‌?

ഉ: മുടിയുടെ ഉൾഭാ​ഗ​ത്താ​യി അതിനു നിറം പകരുന്ന ഒരു വർണകം അടങ്ങി​യി​ട്ടുണ്ട്‌. വർണ​കോ​ശങ്ങൾ മൃതി​യ​ട​യു​മ്പോൾ മുടി നരയ്‌ക്കു​ന്നു. അതു വാർധക്യ പ്രക്രി​യ​യു​ടെ ഭാഗമാണ്‌. അകാല നരയ്‌ക്കു കാരണം ജനിതക ഘടകങ്ങ​ളോ രോഗ​മോ ആയിരി​ക്കാം. എന്നാൽ ഒറ്റ രാത്രി​കൊ​ണ്ടു മുടി നരയ്‌ക്കും എന്നതു വെറും അബദ്ധധാ​ര​ണ​യാണ്‌. ചർമത്തിന്‌ അടിയിൽ വെച്ചാണ്‌ മുടിക്കു നിറം കൊടു​ക്ക​പ്പെ​ടു​ന്നത്‌. അതു​കൊണ്ട്‌ നരച്ച മുടി വളർന്ന്‌ (മാസത്തിൽ ഏകദേശം 1.25 സെന്റി​മീ​റ്റർ എന്ന നിരക്കി​ലാണ്‌ മുടി വളരു​ന്നത്‌) പുറ​ത്തേക്കു വരാൻ സമയ​മെ​ടു​ക്കും.

ചോ: മുടി കൊഴി​ച്ചി​ലി​നുള്ള കാരണങ്ങൾ എന്തൊ​ക്കെ​യാണ്‌?

ഉ: മുടി കൊഴി​ച്ചിൽ മുടി​യു​ടെ സ്വാഭാ​വിക പരിവൃ​ത്തി​യു​ടെ ഭാഗമാണ്‌. എല്ലാവ​രു​ടെ​യും തലയിൽനിന്ന്‌ ശരാശരി 50 മുതൽ 80 വരെ മുടി ദിവസേന കൊഴി​ഞ്ഞു​പോ​കു​ന്നു​ണ്ടെ​ന്നാണ്‌ കണക്ക്‌. എന്നാൽ പുരു​ഷ​ന്മാ​രിൽ കണ്ടുവ​രുന്ന, തലയുടെ മുൻഭാ​ഗ​ത്തെ​യും ഉച്ചിയി​ലെ​യും മുടി കൊഴി​ച്ചിൽ പാരമ്പ​ര്യ​മാണ്‌. ഇതിന്റെ കാരണം ഹോർമോൺ അസന്തു​ലനം ആണെന്നു കാണ​പ്പെ​ടു​ന്നു. ഇങ്ങനെ കൊഴി​യുന്ന മുടി  പിന്നീട്‌ മുളച്ചു​വ​രു​ന്നില്ല. ക്രമാ​തീ​ത​മായ മുടി കൊഴി​ച്ചി​ലിന്‌ കഷണ്ടി (alopecia) എന്നു പറയുന്നു. a

ചോ: മുടി ആരോ​ഗ്യ​ത്തി​ന്റെ കണ്ണാടി​യാണ്‌ എന്ന്‌ ചിലർ പറയാ​റുണ്ട്‌. നിങ്ങൾ ഇതു നിരീ​ക്ഷി​ച്ചി​ട്ടു​ണ്ടോ?

ഉ: ഉണ്ട്‌. തലയോ​ട്ടി​യി​ലെ ചർമത്തിന്‌ അടിയിൽ മുടി വളർച്ച​യ്‌ക്ക്‌ ആവശ്യ​മായ പോഷകം എത്തിക്കുന്ന രക്തക്കു​ഴ​ലു​ക​ളു​ടെ ഒരു ശേഖര​മുണ്ട്‌. അതു​കൊണ്ട്‌ രക്തത്തി​ലൂ​ടെ ധാരാളം പോഷകം ലഭിക്കു​ന്നുണ്ട്‌ എന്നതിന്റെ സൂചന ആയിരു​ന്നേ​ക്കാം ആരോ​ഗ്യ​മുള്ള തലമുടി. എന്നാൽ, നന്നായി ഭക്ഷണം കഴിക്കാത്ത അല്ലെങ്കിൽ അമിത​മാ​യി മദ്യപി​ക്കുന്ന ആളുക​ളു​ടെ തലമുടി ആരോ​ഗ്യ​മി​ല്ലാ​ത്ത​തും ദുർബ​ല​വും ആയിത്തീ​രാ​നി​ട​യുണ്ട്‌. മുടിക്ക്‌ ആവശ്യ​മായ പോഷ​കങ്ങൾ രക്തത്തി​ലൂ​ടെ ലഭിക്കാ​ത്ത​താണ്‌ അതിനു കാരണം. മുടി കൊഴി​യു​ന്ന​തും മുടി​യു​ടെ ആരോ​ഗ്യം ക്ഷയിക്കു​ന്ന​തും രോഗ​ത്തി​ന്റെ​യോ ഗർഭധാ​ര​ണ​ത്തി​ന്റെ​യോ പ്രാരംഭ ലക്ഷണവും ആയിരി​ക്കാ​വു​ന്ന​താണ്‌.

മുടി​യും ചർമവും ആരോ​ഗ്യ​മു​ള്ള​താ​യി സൂക്ഷിക്കൽ

ചോ: മുടിയിലും തലയോ​ട്ടി​യി​ലെ ചർമത്തി​ലും ഷാംപൂ ഉപയോ​ഗി​ക്കേ​ണ്ടത്‌ എങ്ങനെ​യെന്നു വിശദീ​ക​രി​ക്കുക.

ഉ: തലയോട്ടിയിലെ ചർമം വരണ്ടു​ണ​ങ്ങു​ന്ന​തു​മാ​യി ബന്ധപ്പെട്ട പ്രശ്‌നങ്ങൾ അനുഭ​വി​ക്കുന്ന ഭൂരി​പക്ഷം ആളുക​ളും ഷാംപൂ ആവശ്യ​ത്തി​ലേറെ പ്രാവ​ശ്യം ഉപയോ​ഗി​ക്കു​ന്ന​വ​രാ​ണെന്ന്‌ അനുഭ​വങ്ങൾ കാണി​ക്കു​ന്നു. മുടി​യി​ലെ എണ്ണമയം, അഴുക്കും ചർമത്തി​ന്റെ പൊളി​ഞ്ഞു​പോ​രുന്ന ശകലങ്ങ​ളും തലയിൽ പറ്റിപ്പി​ടി​ക്കാൻ ഇടയാ​ക്കു​ക​യും രോമ​കൂ​പ​ങ്ങ​ളി​ലേക്കു തുറക്കുന്ന സ്‌നേ​ഹ​നാ​ളി​കളെ (oil ducts) അടച്ചു​ക​ള​യു​ക​യും ചെയ്‌തേ​ക്കാം എന്നതു​കൊണ്ട്‌ പതിവാ​യി ഷാംപൂ ഉപയോ​ഗി​ക്കേ​ണ്ടത്‌ ആവശ്യ​മാ​ണെ​ന്നതു ശരിയാണ്‌. എന്നാൽ ഈ പ്രകൃ​തി​ദത്ത എണ്ണ ഉപദ്ര​വ​കാ​രി​ക​ളായ ബാക്ടീ​രി​യ​യിൽനിന്ന്‌ നിങ്ങളു​ടെ ചർമത്തെ സംരക്ഷി​ക്കു​ക​യും അതിനാ​വ​ശ്യ​മായ ഈർപ്പം നഷ്ടപ്പെ​ടാ​തെ സൂക്ഷി​ക്കു​ക​യും ചെയ്യു​ന്നുണ്ട്‌. കൂടെ​ക്കൂ​ടെ ഷാംപൂ ഉപയോ​ഗി​ക്കു​മ്പോൾ തലയോ​ട്ടി​യി​ലെ ചർമത്തി​ന്റെ ഈ സംരക്ഷ​കാ​വ​രണം നീക്കം ചെയ്യ​പ്പെ​ടു​ന്നു. ഇത്‌ ചർമം വരണ്ടു​ണ​ങ്ങു​ന്നതു പോലുള്ള പ്രശ്‌നങ്ങൾ ഉണ്ടാകു​ന്ന​തിന്‌ ഇടയാ​ക്കു​ന്നു. തലമു​ടി​യി​ലോ തലയോ​ട്ടി​യി​ലെ ചർമത്തി​ലോ അഴുക്കു​ള്ള​പ്പോൾ ഷാംപൂ ഉപയോ​ഗി​ക്കാ​നാണ്‌ മിക്ക വിദഗ്‌ധ​രും ശുപാർശ ചെയ്യു​ന്നത്‌. എണ്ണമയ​മുള്ള മുടി​യു​ള്ളവർ സാധാരണ മുടി​യോ വരണ്ട മുടി​യോ ഉള്ളവ​രെ​ക്കാ​ളും കൂടുതൽ പ്രാവ​ശ്യം ഷാംപൂ ഉപയോ​ഗി​ക്കണം.

ഷാംപൂ ഇടു​മ്പോൾ തലയോ​ട്ടി നന്നായി തിരു​മ്മുക. ഇത്‌ തലയോ​ട്ടി​യി​ലെ ചർമത്തിൽനിന്ന്‌ മൃത​കോ​ശ​ങ്ങ​ളും മറ്റും നീക്കം ചെയ്യ​പ്പെ​ടാൻ ഇടയാ​ക്കു​ന്ന​തോ​ടൊ​പ്പം രക്തചം​ക്ര​മ​ണത്തെ ത്വരി​ത​പ്പെ​ടു​ത്തു​ക​യും ചെയ്യും, രക്തമാ​ണ​ല്ലോ മുടിക്ക്‌ ആവശ്യ​മായ പോഷകം എത്തിക്കു​ന്നത്‌. ഷാംപൂ ഉപയോ​ഗി​ച്ച​ശേഷം തലയിൽനിന്ന്‌ അതു നന്നായി കഴുകി കളയാൻ ശ്രദ്ധി​ക്കുക! കയ്യിൽ സോപ്പു തേച്ച​ശേഷം കൈ കഴുകു​ന്നി​ല്ലെ​ങ്കിൽ ചർമം വരണ്ടു​പൊ​ട്ടും. അതു​പോ​ലെ​തന്നെ തലയിൽനിന്ന്‌ ഷാംപൂ നന്നായി കഴുകി കളയു​ന്നി​ല്ലെ​ങ്കിൽ തലയിലെ ചർമം വരണ്ടു​ണ​ങ്ങു​ക​യും പൊളി​ഞ്ഞു​പോ​കു​ക​യും ചെയ്യും.

ചോ: തലയോട്ടിയിലെ വരണ്ടു​ണ​ങ്ങിയ ചർമത്തിന്‌ എന്താണു പ്രതി​വി​ധി?

ഉ: ധാരാളം വെള്ളം കുടി​ക്കുക, പോഷ​ക​സ​മൃ​ദ്ധ​മായ ആഹാരം കഴിക്കുക. ഇത്‌ നിങ്ങളു​ടെ ചർമത്തെ ഈർപ്പ​മു​ള്ള​തും രക്തത്തെ പോഷ​ക​സ​മൃ​ദ്ധ​വും ആക്കിത്തീർക്കു​ന്നു. വീര്യം കുറഞ്ഞ ഷാംപൂ ഉപയോ​ഗി​ക്കുക, തലയോ​ട്ടി പതിവാ​യി തിരു​മ്മുക. തലയിലെ ചർമം ഈർപ്പ​മു​ള്ള​താ​ക്കു​ന്ന​തിന്‌ ചിലർ, കഴുകി കളയേ​ണ്ട​തി​ല്ലാ​ത്ത​തരം കണ്ടീഷ​ന​റു​ക​ളും ലോഷ​നു​ക​ളും ഉപയോ​ഗി​ക്കു​ന്നു.

കേശാ​ല​ങ്കാ​രം

ചോ: ഒരു കേശാ​ല​ങ്കാ​ര​വി​ദ​ഗ്‌ധന്റെ/വിദഗ്‌ധ​യു​ടെ അടുത്തു പോകു​മ്പോൾ എന്താണ്‌ മനസ്സിൽ പിടി​ക്കേ​ണ്ടത്‌?

ഉ: നിങ്ങൾ ഹെയർ സ്റ്റൈൽ മാറ്റാൻ ആഗ്രഹി​ക്കു​ന്നെ​ങ്കിൽ നിങ്ങൾ ആഗ്രഹി​ക്കുന്ന സ്റ്റൈലി​ന്റെ ചിത്ര​വും ഒരുപക്ഷേ നിങ്ങൾ ആഗ്രഹി​ക്കാ​ത്ത​തി​ന്റെ ചിത്രവും കരുതുക. നിങ്ങളു​ടെ ആഗ്രഹ​ങ്ങ​ളും ഓരോ ദിവസ​വും മുടി​യു​ടെ പരിച​ര​ണ​ത്തി​നാ​യി എത്രസ​മയം നീക്കി​വെ​ക്കാൻ ഉദ്ദേശി​ക്കു​ന്നു​വെ​ന്ന​തും അവരോ​ടു വ്യക്തമാ​യി പറയുക. കാരണം ചില ഹെയർ സ്റ്റൈലു​കൾക്ക്‌ മറ്റുള്ള​വ​യെ​ക്കാൾ ശ്രദ്ധയാ​വ​ശ്യ​മാണ്‌. സാധാ​ര​ണ​ഗ​തി​യിൽ രണ്ടു മൂന്നു തവണത്തെ സന്ദർശനം കൊണ്ടേ കേശാ​ല​ങ്കാ​ര​വി​ദ​ഗ്‌ധന്‌/വിദഗ്‌ധ​യ്‌ക്ക്‌ നിങ്ങളു​ടെ മുടി​യു​മാ​യി പരിച​യ​ത്തി​ലാ​കാ​നും നിങ്ങളു​മാ​യി നല്ല ആശയവി​നി​മയ ബന്ധം സ്ഥാപി​ച്ചെ​ടു​ക്കാ​നും കഴിയൂ എന്ന കാര്യം മനസ്സിൽ പിടി​ക്കുക. അതു​കൊണ്ട്‌ പുതിയ ഒരു കേശാ​ല​ങ്കാ​ര​വി​ദ​ഗ്‌ധനെ/വിദഗ്‌ധയെ തേടി​പ്പോ​കാൻ ഒരിക്ക​ലും തിടുക്കം കൂട്ടരുത്‌!

നിങ്ങളു​ടെ മുടി എന്തു വെളി​പ്പെ​ടു​ത്തു​ന്നു?

മുടി​യു​ടെ പരിച​ര​ണ​വും കേശാ​ല​ങ്കാ​ര​വും നമ്മെ കുറിച്ച്‌ പലതും വെളി​പ്പെ​ടു​ത്തു​ന്നു. ഫാഷൻ തരംഗ​ങ്ങൾക്കും മത വിശ്വാ​സ​ങ്ങൾക്കും സാമൂ​ഹി​ക​വും രാഷ്‌ട്രീ​യ​വും ആയ ആശയങ്ങൾക്കും അനുസൃ​ത​മാ​യി ആളുകൾ തങ്ങളുടെ മുടി മുറി​ക്കു​ക​യും വളർത്തു​ക​യും നീട്ടു​ക​യും ചുരു​ട്ടു​ക​യും നിറം പിടി​പ്പി​ക്കു​ക​യും പല രീതി​യിൽ അലങ്കരി​ക്കു​ക​യും ഒക്കെ ചെയ്‌തി​രി​ക്കു​ന്നു. നിങ്ങളു​ടെ മുടി ഒന്ന്‌ അടുത്തു നിരീ​ക്ഷി​ക്കുക. അത്‌ നിങ്ങളെ കുറിച്ച്‌ എന്താണു വെളി​പ്പെ​ടു​ത്തു​ന്നത്‌? ഭംഗി​യാ​യി ചീകി​യൊ​തു​ക്കിയ ആരോ​ഗ്യ​മുള്ള മുടി ഒരു വ്യക്തിക്ക്‌ അഴകു ചാർത്തു​ന്ന​തോ​ടൊ​പ്പം മറ്റുള്ള​വ​രു​ടെ പ്രശം​സ​യും പിടി​ച്ചു​പ​റ്റു​ന്നു. (g01 4/8)

[അടിക്കു​റിപ്പ്‌]

[20-ാം പേജിലെ ചിത്രങ്ങൾ]

• പോഷകസമൃദ്ധമായ ആഹാരം കഴിക്കു​ന്ന​തും ധാരാളം വെള്ളം കുടി​ക്കു​ന്ന​തും വരണ്ടു​ണ​ങ്ങിയ ചർമം ആരോ​ഗ്യ​മു​ള്ള​താ​യി​ത്തീ​രു​ന്ന​തിന്‌ സഹായി​ച്ചേ​ക്കാം

[20-ാം പേജിലെ ചിത്രം]

• മുടി നരയ്‌ക്കു​ന്നത്‌ വാർധക്യ പ്രക്രി​യ​യു​ടെ സ്വാഭാ​വിക ഭാഗമാണ്‌

[20-ാം പേജിലെ ചിത്രം]

• ആവശ്യത്തിലേറെ പ്രാവ​ശ്യം ഷാംപൂ ഉപയോ​ഗി​ക്കു​ന്നത്‌ തലയോ​ട്ടി​യി​ലെ ചർമത്തിന്‌ സംരക്ഷ​ണ​മേ​കുന്ന എണ്ണ നഷ്ടപ്പെ​ടു​ന്ന​തിന്‌ ഇടയാ​ക്കും