“സ്‌ഫോടക നഗരങ്ങൾ”
“സ്‌ഫോടക നഗരങ്ങൾ”
“മുമ്പത്തെക്കാൾ അധികമായി ആളുകൾ ഇന്ന്‌ മറ്റു സ്ഥലങ്ങളിലേക്കു മാറിത്താമസിക്കാൻ ഇഷ്ടപ്പെടുന്നു. ഒരു മെച്ചപ്പെട്ട ജീവിതം തേടി വീടുവിടുന്ന മിക്കയാളുകളും പോകുന്നത്‌ ഏതെങ്കിലും നഗരത്തിലേക്കാണ്‌.”
“വികസ്വര ലോകത്തിലെ സ്‌ഫോടക നഗരങ്ങൾ” എന്ന ശീർഷകത്തിലുള്ള ഒരു ലേഖനത്തിന്റെ ആമുഖത്തിൽ വിദേശ കാര്യങ്ങൾ (ഇംഗ്ലീഷ്‌) എന്ന പ്രസിദ്ധീകരണം പ്രസ്‌താവിച്ചതാണ്‌ അത്‌. ആ ലേഖനം പറയുന്നതനുസരിച്ച്‌, നഗരങ്ങളിലെ ‘ശോഭനമായ അവസരങ്ങളാൽ ആകർഷിക്കപ്പെട്ട്‌ അനേകർ അങ്ങോട്ടു പോകുന്നു. മറ്റുചിലരാകട്ടെ, ഗ്രാമപ്രദേശത്തെ രാഷ്‌ട്രീയവും സാമ്പത്തികവുമായ പ്രശ്‌നങ്ങളും ജനസംഖ്യാ സമ്മർദങ്ങളും പരിസ്ഥിതി തകർച്ചയും നിമിത്തം നഗരങ്ങളിലേക്കു പോകാൻ നിർബന്ധിതരാകുന്നു.’
എത്ര വേഗത്തിലാണ്‌ നഗരങ്ങൾ വളരുന്നത്‌? ഓരോ ആഴ്‌ചയിലും ലോകത്തിലെ നഗരങ്ങളിൽ എത്തുന്നവരുടെ എണ്ണം പത്തു ലക്ഷത്തിലേറെ ആണെന്ന്‌ ചിലർ കണക്കാക്കുന്നു! വികസ്വര രാജ്യങ്ങളിലെ 200-ലധികം നഗരങ്ങളിൽ ഓരോന്നിലും ഇപ്പോൾ ജനസംഖ്യ പത്തു ലക്ഷത്തിലധികമാണ്‌. 20-ഓളം നഗരങ്ങളിൽ, ആളുകളുടെ എണ്ണം ഒരു കോടിയിൽ എത്തിയിരിക്കുന്നു! നഗരങ്ങളിലേക്കുള്ള ജനങ്ങളുടെ ഒഴുക്കിൽ യാതൊരു കുറവും ഉണ്ടാകുമെന്നു തോന്നുന്നില്ല. ഉദാഹരണത്തിന്‌, നൈജീരിയയിലെ ലേഗോസ്‌ എന്ന നഗരത്തിന്റെ കാര്യമെടുക്കുക. വേൾഡ്‌വാച്ച്‌ ഇൻസ്റ്റിറ്റ്യൂട്ടിന്റെ ഒരു റിപ്പോർട്ടനുസരിച്ച്‌, “2015 എന്ന വർഷം ആകുമ്പോഴേക്ക്‌ ലേഗോസിൽ 2.5 കോടിയോളം ആളുകൾ ഉണ്ടായിരിക്കാനിടയുണ്ട്‌. അങ്ങനെ അത്‌ ലോകത്തിലെ ഏറ്റവും വലിയ നഗരങ്ങളിൽ പതിമൂന്നാമത്തെ സ്ഥാനത്തുനിന്ന്‌ മൂന്നാമത്തെ സ്ഥാനത്തേക്ക്‌ ഉയരും.”
ഇതു ഭാവിയെ സംബന്ധിച്ച ശുഭകരമായ ഒരു സൂചന അല്ലെന്ന്‌ പല വിദഗ്‌ധരും കരുതുന്നു. ഐക്യരാഷ്‌ട്ര വിദ്യാഭ്യാസ, ശാസ്‌ത്രീയ, സാംസ്‌കാരിക സംഘടനയുടെ മുൻ ഡയറക്‌ടർ ജനറലായ ഫേഡേറിക്കോ മായോർ, 2035 എന്ന വർഷമാകുമ്പോഴേക്ക്‌ “ഇന്നു നിലവിലുള്ള നഗരങ്ങളിൽ മുന്നൂറ്‌ കോടി ആളുകൾ കൂടി വസിക്കുന്നുണ്ടായിരിക്കും” എന്നു മുന്നറിയിപ്പു നൽകുന്നു. ഇത്രയധികം ആളുകളെ പാർപ്പിക്കാൻ “അടുത്ത നാൽപ്പതു വർഷം കഴിയുമ്പോഴേക്കും ഓരോന്നിലും 30 ലക്ഷം ആളുകളുള്ള ആയിരം നഗരങ്ങൾ കൂടി നാം നിർമിക്കേണ്ടിവരും, വർഷത്തിൽ ഇരുപത്തഞ്ചു വീതം.”
നഗരജനതയുടെ എണ്ണം അതിവേഗം വർധിക്കുന്നത്‌ ലോകമെങ്ങുമുള്ള നഗരങ്ങളുടെമേൽ വിനാശകമായ ഒരു ഫലം ചെലുത്തുന്നുവെന്നും വിദഗ്‌ധർ പറയുന്നു. സമ്പദ്‌സമൃദ്ധമായ വ്യവസായവത്‌കൃത രാജ്യങ്ങളിലെ നഗരങ്ങളും ഇതിൽ പെടും. നഗരങ്ങൾ നേരിടുന്ന പ്രശ്‌നങ്ങൾ എന്തൊക്കെയാണ്‌? ഇതു നിങ്ങളെ എങ്ങനെയായിരിക്കാം ബാധിക്കുന്നത്‌? ഇതിന്‌ എന്തെങ്കിലും പരിഹാര മാർഗങ്ങൾ ഉണ്ടോ? പിൻവരുന്ന ലേഖനങ്ങൾ ഈ സുപ്രധാന ചോദ്യങ്ങൾക്ക്‌ ഉത്തരം നൽകുന്നു. (g01 4/8)