ചിറാപുഞ്ചി—ലോകത്തിൽ ഏറ്റവും കൂടുതൽ മഴ ലഭിക്കുന്ന പ്രദേശങ്ങളിൽ ഒന്ന്‌
ചിറാപുഞ്ചി—ലോകത്തിൽ ഏറ്റവും കൂടുതൽ മഴ ലഭിക്കുന്ന പ്രദേശങ്ങളിൽ ഒന്ന്‌
ഇന്ത്യയിലെ ഉണരുക! ലേഖകൻ
ലോകത്തിൽ ഏറ്റവും കൂടുതൽ മഴ ലഭിക്കുന്ന പ്രദേശങ്ങളിൽ ഒന്നോ? അതും ജലദൗർലഭ്യം ഇത്ര സാധാരണമായിരിക്കുന്ന, കുടയുടെ ആവശ്യം വരുന്ന ദിവസങ്ങൾതന്നെ വിരളമായിരിക്കുന്ന ഇന്ത്യയിൽ. ഏതാണ്‌ ഈ വിചിത്ര സ്ഥലം? ചിറാപുഞ്ചി. ബംഗ്ലാദേശിനോട്‌ തൊട്ടു ചേർന്നു സ്ഥിതിചെയ്യുന്ന ഇന്ത്യയുടെ ഒരു വടക്കുകിഴക്കൻ സംസ്ഥാനമായ മേഘാലയയിലെ ഒരു പട്ടണമാണിത്‌. അതിമനോഹരമായ ഒരു പ്രദേശമായതിനാൽ “കിഴക്കിന്റെ സ്‌കോട്ട്‌ലൻഡ്‌” എന്നാണ്‌ മേഘാലയയെ വിളിച്ചിരിക്കുന്നത്‌. മേഘാലയ എന്ന പേരിന്റെ അർഥം തന്നെ “മേഘങ്ങളുടെ ആലയം” എന്നാണ്‌. എന്നാൽ ചിറാപുഞ്ചിയെ ലോകത്തിൽ ഏറ്റവും കൂടുതൽ മഴ ലഭിക്കുന്ന പ്രദേശങ്ങളിൽ ഒന്നായി പണ്ടു മുതലേ കണക്കാക്കിവരുന്നത്‌ എന്തുകൊണ്ടാണ്‌? കൗതുകമുണർത്തുന്ന ഈ അത്ഭുതനാട്ടിലേക്ക്‌ നമുക്ക്‌ ഒരു ഹ്രസ്വ പര്യടനം നടത്താം. a
മേഘാലയയുടെ തലസ്ഥാനമായ ഷില്ലോങ്ങിൽനിന്നാണ്‌ നാം യാത്ര ആരംഭിക്കുന്നത്‌. ഒരു ടൂറിസ്റ്റ്‌ ബസ്സിൽ നാം തെക്കോട്ടു തിരിക്കുന്നു. മലമടക്കുകളും വിശാലമായ പുൽമേടുകളും പിന്നിട്ട്‌ മുന്നോട്ടു നീങ്ങവേ, പെയ്‌തൊഴിയാൻ വെമ്പിനിൽക്കുന്ന മഴമേഘങ്ങൾ നമ്മുടെ മുന്നിലായി സ്ഥാനം പിടിച്ചിരിക്കുന്നതു നാം കാണുന്നു. മേഘാലയ ഈ സ്ഥലത്തിനു യോജിച്ച പേരു തന്നെയാണല്ലോ എന്നു നാം പെട്ടെന്ന്‌ ഓർത്തുപോകുന്നു.
മരങ്ങൾ ഇടതൂർന്നു വളരുന്ന ആഴമുള്ള ഒരു മലയിടുക്കിന്റെ ഓരം ചേർന്ന്‌ വളഞ്ഞുപുളഞ്ഞു മുകളിലോട്ടു പോകുന്ന ഒരു പാതയിലൂടെ നമ്മുടെ ബസ്‌ മുന്നോട്ടു നീങ്ങുകയാണ്‌. വളരെ ഉയരത്തിൽനിന്ന്‌ വെള്ളം കുത്തിമറിഞ്ഞൊഴുകിവരുന്നതു നാം കാണുന്നു. താഴ്‌വരയിലൂടെ കൂലംകുത്തിയൊഴുകുന്ന നദിയെ പരിപോഷിപ്പിക്കുന്നത്‌ ഈ വെള്ളച്ചാട്ടങ്ങളാണ്‌. മൗഡോക്കിൽ ബസ്‌ നിറുത്തുമ്പോൾ കുന്നുകളിലൂടെ താണു നീങ്ങുന്ന ഒരുകൂട്ടം മേഘങ്ങൾ നമ്മുടെ കണ്ണിനു വിരുന്നൊരുക്കുന്നു. പെട്ടെന്ന്‌ അവ ഒരു വലിയ പ്രദേശത്തെ മുഴുവൻ നമ്മുടെ കാഴ്‌ചയിൽനിന്നു മറയ്‌ക്കുന്നു. എന്നിട്ട്‌ അതേ വേഗത്തിൽ ഉയർന്ന്‌ അതെല്ലാം നമുക്കു വീണ്ടും ദൃശ്യവേദ്യമാക്കുന്നു. ഒരു നിമിഷത്തേക്ക്‌ നാമും അദൃശ്യതയുടെ നനുനനുത്ത ഒരു വെള്ള കമ്പളത്തിനു പിന്നിൽ, മേഘക്കൂട്ടത്തിൽ അപ്രത്യക്ഷരാകുന്നു. എന്നാൽ, പെട്ടെന്നുതന്നെ ആ മേഘച്ചുരുളുകൾ അവിടെനിന്നു മാറിത്തരുന്നു. പകലോന്റെ കിരണങ്ങൾ ചേതോഹരമായ പ്രകൃതിദൃശ്യത്തെ പ്രകാശമാനമാക്കിത്തീർക്കുന്നു.
ചിറാപുഞ്ചി സമുദ്ര നിരപ്പിൽനിന്ന്‌ 1,300 മീറ്റർ ഉയരത്തിലാണ്‌. ആ പട്ടണത്തിൽ എത്തിച്ചേരുന്ന നമുക്ക്‌ മഴമേഘത്തെ കാണാനേ കഴിയുന്നില്ല. ആരുടെയും കൈയിൽ കുടയുമില്ല. കനത്ത മഴയ്‌ക്കായുള്ള തയ്യാറെടുപ്പുകൾ നടത്തിയിരിക്കുന്നത്‌ സന്ദർശകരായ നാം മാത്രമാണ്‌! ഇനി എപ്പോഴാണ്‌ മഴ പെയ്യുക?
സമുദ്രങ്ങളിലെ ചൂടുകൂടിയ ഭാഗങ്ങളിൽനിന്ന്‌ സൂര്യന്റെ ചൂടേറ്റ്‌ വളരെയേറെ ജലം ആവിയായി പൊങ്ങുമ്പോഴാണ്‌ ഉഷ്‌ണമേഖലാ പ്രദേശങ്ങളിൽ കനത്ത മഴയുണ്ടാകുന്നത്‌. ഇന്ത്യൻ മഹാസമുദ്രത്തിൽനിന്നുള്ള നീരാവി തിങ്ങിയ കാറ്റ്‌ ഹിമാലയ പർവതത്തിന്റെ തെക്കൻ ചെരിവുകളിൽ തട്ടുകയും മേൽപ്പോട്ട്‌ ഉയരാൻ നിർബന്ധിതമാകുകയും ചെയ്യുമ്പോൾ കോരിച്ചൊരിയുന്ന മഴയുടെ രൂപത്തിൽ ഈർപ്പം വർഷിച്ചുകൊണ്ട്‌ കാറ്റ്‌ അതിന്റെ ഭാരം ലഘൂകരിക്കുന്നു. മഴവെള്ളത്തിന്റെ നല്ലൊരു പങ്കും പതിക്കുന്നത്‌ മേഘാലയ പീഠഭൂമിയിലാണ്‌. പകൽ നേരത്ത്‌, ഈ ഉയർന്ന പ്രദേശം കത്തിക്കാളുന്ന ഉഷ്‌ണമേഖലാ സൂര്യന്റെ ചൂടു മുഴുവൻ ഏറ്റുവാങ്ങുന്നതിനാൽ മഴ മേഘങ്ങൾ മേൽപ്പോട്ട്‌ ഉയരുകയും വൈകുന്നേരം വായു തണുക്കുന്നതുവരെ പീഠഭൂമിക്കു മുകളിൽ ഉഴറി നടക്കുകയും ചെയ്യുന്നതായി കാണുന്നു. ഇതുകൊണ്ടാകാം മഴ ഏറെയും ലഭിക്കുന്നത്‌ രാത്രികാലങ്ങളിലായത്‌.
ചിറാപുഞ്ചിയിൽ 1861 ജൂലൈയിൽ 930 സെന്റിമീറ്റർ മഴ പെയ്‌തു! 1860 ആഗസ്റ്റ്‌ 1 മുതൽ 1861 ജൂലൈ 31 വരെയുള്ള 12 മാസ കാലയളവിൽ 2,646 സെന്റിമീറ്റർ മഴയും. ഇന്ന്‌ ചിറാപുഞ്ചിയിൽ വർഷത്തിൽ ശരാശരി 180 ദിവസം മഴ ലഭിക്കുന്നുണ്ട്‌. ഏറ്റവും കനത്ത മഴയുള്ളത്‌ ജൂൺ മുതൽ സെപ്‌റ്റംബർ വരെയുള്ള മാസങ്ങളിലാണ്‌. മഴ ഏറെയും രാത്രിയിൽ പെയ്യുന്നതുകൊണ്ട്‌ സന്ദർശകർക്ക്‌ നനഞ്ഞുകുതിരാതെ പ്രകൃതിസൗന്ദര്യം മതിയാവോളം നുകരാൻ കഴിയുന്നു.
ഇത്രയും മഴ ലഭിക്കുന്ന ഒരു സ്ഥലത്ത്‌ ജലദൗർലഭ്യം ഉണ്ടാവുക എന്നത്‌ വിശ്വസിക്കാൻ ബുദ്ധിമുട്ടാണ്‌. എന്നാൽ ശൈത്യകാല മാസങ്ങളിൽ പലപ്പോഴും അതാണു സംഭവിക്കുന്നത്‌. പെയ്‌തുവീഴുന്ന മഴവെള്ളമെല്ലാം എങ്ങോട്ടാണു പോകുന്നത്‌? ചിറാപുഞ്ചിക്കു തൊട്ട്‌ വെളിയിലുള്ള ഭാഗത്ത്‌ വ്യാപകമായി വനനശീകരണം സംഭവിച്ചിരിക്കുന്നതിനാൽ ഉന്നത പീഠഭൂമിയിൽ വീഴുന്ന മഴവെള്ളത്തിൽ അധികവും താഴേക്ക്‌ ഒഴുകി സമതലങ്ങളിലെ നദികളിൽ പതിക്കുന്നു. ഈ നദികളാണെങ്കിൽ മുഖ്യമായും ബംഗ്ലാദേശിലേക്കാണ്‌ ഒഴുകുന്നത്‌. അണക്കെട്ടിന്റെയും ജലസംഭരണികളുടെയും നിർമാണം പരിഗണനയിലുണ്ട്‌. എന്നാൽ മൗസിൻറാമിലെ ഗോത്ര രാജാവായ ജി. എസ്‌. മാൻഗ്യാങ്‌ പറയുന്നത്‌ “ജലദൗർലഭ്യം പരിഹരിക്കാനായി കാര്യമായ ശ്രമങ്ങളൊന്നും” നടന്നിട്ടില്ല എന്നാണ്‌.
നമ്മുടെ ചിറാപുഞ്ചി സന്ദർശനം ശരിക്കും ആവേശജനകവും വിദ്യാഭ്യാസമൂല്യം ഉള്ളതും ആയിരുന്നു. പ്രകൃതിസൗന്ദര്യത്തിന്റെ സമസ്‌ത ഭാവങ്ങളും ഒത്തിണങ്ങിയ ഒരു ഭൂപ്രദേശമാണ്‌ ഇത്‌! 300-ഓളം ഇനം ഓർക്കിഡുകൾ ഉൾപ്പെടെ, മനോഹരമായ പൂക്കൾ ചൂടി നിൽക്കുന്ന പല സസ്യങ്ങളും ഇവിടെയുണ്ട്‌. ഒരിനം കീടഭോജി സസ്യവും ഇവിടെയുണ്ട്‌. ഭൂമിയുടെ ഈ കോണിൽ മാത്രമാണ്‌ ഇതു കണ്ടുവരുന്നത്‌. നിരവധി ഇനം വന്യജീവികളും ഈ പ്രദേശത്തിനു സ്വന്തമാണ്‌. പര്യവേക്ഷണം നടത്താൻ പറ്റിയ ചുണ്ണാമ്പുകൽ ഗുഹകളും ഗവേഷണ വിധേയമാക്കാൻ പറ്റിയ കൂറ്റൻ കല്ലുകളും ഇവിടെയുണ്ട്‌. ഈ പ്രദേശത്തെ വലിയ ഓറഞ്ചു തോട്ടങ്ങൾ നല്ല നീരുള്ള ഓറഞ്ചുകൾ വിളയിക്കുന്നതിനു പുറമേ സ്വാദൂറുന്ന ഓറഞ്ച്‌ തേനിന്റെ പ്രകൃത്യായുള്ള ഉത്‌പാദനം സാധ്യമാക്കുകയും ചെയ്യുന്നു. “മേഘങ്ങളുടെ ആലയ”മായ മേഘാലയയിലേക്കും ലോകത്തിൽ ഏറ്റവും കൂടുതൽ മഴ ലഭിക്കുന്ന പ്രദേശങ്ങളിൽ ഒന്നായ ചിറാപുഞ്ചിയിലേക്കും ചെല്ലുന്നവരെ കാത്തിരിക്കുന്ന വിസ്‌മയങ്ങൾ ഇതൊക്കെയാണ്‌. (g01 5/8)
[അടിക്കുറിപ്പ്‌]
a ഹവായിയൻ ദ്വീപായ കൗഐയിലെ വയാലീൽ കൊടുമുടിയിലും മൗസിൻറാമിലും—ചിറാപുഞ്ചിയിൽനിന്ന്‌ ഏതാണ്ട്‌ 16 കിലോമീറ്റർ അകലെയായി സ്ഥിതിചെയ്യുന്ന ഒരു ഗ്രാമമാണ്‌ അത്‌—ചിറാപുഞ്ചിയിലേക്കാൾ ഉയർന്ന ശരാശരി വർഷപാതം ഇടയ്‌ക്കൊക്കെ രേഖപ്പെടുത്തപ്പെട്ടിട്ടുണ്ട്‌.
[22-ാം പേജിലെ ഭൂപടം]
(പൂർണരൂപത്തിൽ കാണുന്നതിന്‌ പ്രസിദ്ധീകരണം നോക്കുക)
ഇന്ത്യ
ചിറാപുഞ്ചി
[കടപ്പാട്‌]
Mountain High Maps® Copyright © 1997 Digital Wisdom, Inc.
[23-ാം പേജിലെ ചിത്രം]
വെള്ളച്ചാട്ടങ്ങൾ താഴ്‌വരയിലൂടെ കൂലംകുത്തി ഒഴുകുന്ന നദിയെ പരിപോഷിപ്പിക്കുന്നു
[23-ാം പേജിലെ ചിത്രം]
ഈ കീടഭോജി സസ്യം ഭൂമിയുടെ ഈ കോണിൽ മാത്രമാണ്‌ കണ്ടുവരുന്നത്‌
[കടപ്പാട്‌]
Photograph by Matthew Miller