ഭൂമി​യി​ലെ ജീവി​വർഗ​ങ്ങളെ സംരക്ഷി​ക്കാ​നാ​കു​മോ?

“ആൾക്കു​ര​ങ്ങു​കൾ, ആൽബ​ട്രോസ്‌ പക്ഷികൾ, ആനത്തു​മ്പി​കൾ തുടങ്ങി നിരവധി ജീവി​വർഗ​ങ്ങളെ മനുഷ്യൻ വംശനാ​ശ​ത്തി​ന്റെ വക്കി​ലേക്ക്‌ അതി​വേഗം വലിച്ചി​ഴ​ച്ചു​കൊ​ണ്ടി​രി​ക്കു​ക​യാണ്‌, അതാകട്ടെ അവന്റെ​തന്നെ നിലനിൽപ്പിന്‌ ഭീഷണി ഉയർത്തു​ക​യും ചെയ്‌തി​രി​ക്കു​ന്നു,” കാനഡ​യി​ലെ ദ ഗ്ലോബ്‌ ആൻഡ്‌ മെയ്‌ൽ പറയുന്നു. സ്വിറ്റ്‌സർലൻഡി​ലുള്ള ജനീവ​യി​ലെ വേൾഡ്‌ കൺസർവേഷൻ യൂണിയൻ (ഐയു​സി​എൻ) പ്രസി​ദ്ധീ​ക​രിച്ച 2000 ഐയു​സി​എൻ റെഡ്‌ ലിസ്റ്റ്‌ ഓഫ്‌ ത്രെറ്റൻഡ്‌ സ്‌പീ​ഷീ​സി​നെ ആസ്‌പ​ദ​മാ​ക്കി​യാ​യി​രു​ന്നു പത്രം അങ്ങനെ​യൊ​രു പ്രസ്‌താ​വന നടത്തി​യത്‌. സസ്യ-ജന്തുജാ​ല​ങ്ങ​ളു​ടെ 11,000-ത്തിൽപ്പരം വർഗങ്ങൾ കടുത്ത വംശനാശ ഭീഷണി നേരി​ടു​ന്ന​താ​യി റെഡ്‌ ലിസ്റ്റ്‌ മുന്നറി​യി​പ്പു നൽകുന്നു. ഏറ്റവും അപകട​ത്തിൽ ആയിരി​ക്കു​ന്നത്‌ സസ്‌ത​നി​ക​ളാണ്‌. “ഇന്ന്‌ ഭൂമി​യിൽ ജീവി​ക്കുന്ന സസ്‌ത​നി​വർഗ​ങ്ങ​ളിൽ ഏതാണ്ട്‌ നാലി​ലൊന്ന്‌, അതായത്‌ 24 ശതമാനം, വംശനാശ ഭീഷണി​യെ നേരി​ടു​ന്നു” എന്ന്‌ ഗ്ലോബ്‌ റിപ്പോർട്ടു ചെയ്യുന്നു.

ഈ പ്രതി​സ​ന്ധിക്ക്‌ ഇടയാ​ക്കി​യി​രി​ക്കു​ന്നത്‌ എന്താണ്‌? ഓമന​മൃ​ഗ​ങ്ങ​ളു​ടെ അന്താരാ​ഷ്‌ട്ര വാണി​ജ്യം, ആയിരം​ചൂണ്ട ഉപയോ​ഗി​ച്ചുള്ള മീൻപി​ടി​ത്തം, അനു​യോ​ജ്യ​മായ ആവാസ​ങ്ങ​ളു​ടെ നാശം എന്നിവ​യാണ്‌ ഈ ജീവി​വർഗ​ങ്ങ​ളു​ടെ ഉന്മൂല​നാ​ശത്തെ ത്വരി​ത​പ്പെ​ടു​ത്തു​ന്നത്‌ എന്ന്‌ ശാസ്‌ത്രജ്ഞർ ചൂണ്ടി​ക്കാ​ട്ടു​ന്നു. മുമ്പൊ​ന്നും മനുഷ്യർക്ക്‌ എത്തി​പ്പെ​ടാൻ സാധി​ക്കാ​തി​രുന്ന വനങ്ങളി​ലൂ​ടെ ഇന്ന്‌ തടി കടത്തി​ക്കൊ​ണ്ടു പോകാ​നാ​യി കൂടുതൽ കൂടുതൽ റോഡു​കൾ നിർമി​ച്ചു​കൊ​ണ്ടി​രി​ക്കു​ക​യാണ്‌. അങ്ങനെ, “ഒരിക്കൽ തങ്ങളുടെ കയ്യിൽ പെടാ​തി​രുന്ന വന്യമൃ​ഗ​ങ്ങളെ മനുഷ്യർക്ക്‌ ഇന്ന്‌ നിഷ്‌പ്ര​യാ​സം പിടി​കൂ​ടാ​മെ​ന്നാ​യി​രി​ക്കു​ന്നു. അവർ അവയെ കൊന്നു​തി​ന്നു​ന്നു. ഈ നില തുടർന്നാൽ ജീവി​വർഗ​ങ്ങൾക്ക്‌ വംശനാ​ശം സംഭവി​ക്കും.”

ഇത്‌ മനുഷ്യ​നും അപകട​ഭീ​ഷണി ഉയർത്തു​ന്ന​താ​യി ശാസ്‌ത്രജ്ഞർ മുന്നറി​യി​പ്പു നൽകുന്നു. “ജീവി​വർഗ​ങ്ങൾക്ക്‌ വംശനാ​ശം വരുത്തു​ക​വഴി നാം നമ്മുടെ ജീവസ​ന്ധാ​രണ വ്യവസ്ഥയെ തകിടം മറിക്കു​ക​യാ​ണു ചെയ്യു​ന്നത്‌” എന്ന്‌ ലോക പരിസ്ഥി​തി സംരക്ഷണ യൂണി​യന്റെ ജീവി​വർഗ അതിജീ​വന കമ്മീഷന്റെ അധ്യക്ഷ​നായ ഡേവിഡ്‌ ബ്രാ​ക്കെറ്റ്‌ പറയുന്നു. “ഭൂമി​യി​ലെ ജീവി​ക​ളെ​ല്ലാം മൃഗശാ​ല​യിൽ മാത്ര​മാ​യി ഒതുങ്ങി​യാൽ ഭൂഗ്രഹം നിലനിൽക്കു​ക​യില്ല.”

“ഈ പ്രതി​സ​ന്ധി​യെ നേരി​ടാ​നാ​യി നമ്മുടെ മനുഷ്യ, സാമ്പത്തിക വിഭവങ്ങൾ ഇന്നുള്ള​തി​ന്റെ 10 മുതൽ 100 വരെ മടങ്ങു വർധി​പ്പി​ക്കണം” എന്ന്‌ പ്രസ്‌താ​വി​ച്ചു​കൊണ്ട്‌ ഐയു​സി​എൻ ആഗോള സമൂഹ​ത്തോട്‌ ഉണർന്നു പ്രവർത്തി​ക്കാൻ ആഹ്വാനം ചെയ്യുന്നു. എന്നാൽ സങ്കടക​ര​മെന്നു പറയട്ടെ, നമ്മുടെ പ്രകൃതി വിഭവ​ങ്ങളെ പരിര​ക്ഷി​ക്കാ​നുള്ള ആത്മാർഥ ശ്രമങ്ങൾക്ക്‌ അത്യാ​ഗ്രഹം മിക്ക​പ്പോ​ഴും ഒരു വിലങ്ങു​ത​ടി​യാ​യി നില​കൊ​ള്ളു​ന്നു.

ഭൂമി​യി​ലെ ജീവി​വർഗ​ങ്ങളെ രക്ഷിക്കാ​നാ​കു​മോ? ഭൂമി​യി​ലെ ജൈവ​വൈ​വി​ധ്യ​ത്തെ കാത്തു​പ​രി​പാ​ലി​ക്കാ​നുള്ള ഉത്തരവാ​ദി​ത്വം ആദ്യ മനുഷ്യ ജോടി​ക്കും അവരുടെ സന്താന​ങ്ങൾക്കും നൽക​പ്പെട്ടു. “യഹോ​വ​യായ ദൈവം മനുഷ്യ​നെ കൂട്ടി​ക്കൊ​ണ്ടു പോയി ഏദെൻതോ​ട്ട​ത്തിൽ വേല ചെയ്‌വാ​നും അതിനെ കാപ്പാ​നും അവിടെ ആക്കി” എന്ന്‌ ബൈബിൾ പറയുന്നു. (ഉല്‌പത്തി 2:15) തന്റെ ആ ഉത്തരവാ​ദി​ത്വം നിർവ​ഹി​ക്കാൻ മനുഷ്യൻ പരാജ​യ​പ്പെ​ടു​ന്നെ​ങ്കി​ലും, ഭൂമിയെ സംബന്ധിച്ച ദൈവ​ത്തി​ന്റെ ഉദ്ദേശ്യ​ത്തി​നു യാതൊ​രു മാറ്റവു​മില്ല. അവൻ നമ്മുടെ ഗ്രഹത്തെ പരിപാ​ലി​ക്കു​ന്നു, മനുഷ്യ​ന്റെ അശ്രദ്ധ​യാ​ലോ അത്യാ​ഗ്ര​ഹ​ത്താ​ലോ അതു നശിപ്പി​ക്ക​പ്പെ​ടാൻ അവൻ അനുവ​ദി​ക്കു​ക​യില്ല. (വെളി​പ്പാ​ടു 11:18) “നീതി​മാ​ന്മാർ ഭൂമിയെ അവകാ​ശ​മാ​ക്കി എന്നേക്കും അതിൽ വസിക്കും” എന്ന്‌ അവന്റെ വചനം നമുക്ക്‌ ഉറപ്പു നൽകുന്നു.—സങ്കീർത്തനം 37:29.(g01 6/8)

[31-ാം പേജിലെ ചിത്ര​ങ്ങൾക്ക്‌ കടപ്പാട്‌]

U.S. Fish & Wildlife Service, Washington, D.C./J.D. Pittillo