മാരബൂ തെറ്റി​ദ്ധ​രി​ക്ക​പ്പെ​ടുന്ന ഒരു പക്ഷി

കെനിയയിലെ ഉണരുക! ലേഖകൻ

 “മാരബൂ​വി​നെ​ക്കാൾ അശുഭ ലക്ഷണമുള്ള ഒരു പക്ഷിയെ ഞാൻ കണ്ടിട്ടില്ല.”—ലോക​ത്തി​ന്റെ വന്യ പ്രദേ​ശങ്ങൾ—ആഫ്രി​ക്ക​യി​ലെ ഭ്രംശ​താ​ഴ്‌വര (ഇംഗ്ലീഷ്‌).

അനേകം പക്ഷിക​ളു​ടെ വാസസ്ഥ​ല​മാണ്‌ ആഫ്രിക്ക. എന്നാൽ മാരബൂ​വി​നെ പോലെ കടുത്ത വിമർശ​ന​ത്തി​നു പാത്ര​മാ​യി​ട്ടുള്ള പക്ഷികൾ അവിടെ വേറെ​യി​ല്ലെ​ന്നു​തന്നെ പറയാം. നന്മയുടെ കണിക​പോ​ലും ഇല്ലാത്ത, ആക്രമണ സ്വഭാ​വ​മുള്ള ഒരു വികൃത പക്ഷിയാ​യി​ട്ടാണ്‌ പൊതു​വെ അത്‌ ചിത്രീ​ക​രി​ക്ക​പ്പെ​ടു​ന്നത്‌. മാരബൂ​വിന്‌ അത്ര ജനസമ്മതി ഇല്ല എന്നതു വളരെ വ്യക്തം.

അഴകും സ്വരമാ​ധു​ര്യ​വു​മുള്ള പക്ഷികളെ നിങ്ങൾക്ക്‌ ഇഷ്ടമാ​ണോ? എന്നാൽ മാരബൂ​വിന്‌ ഇവ രണ്ടുമില്ല. തൂവലു​കൾ ഇല്ലാത്ത പിങ്ക്‌ നിറത്തി​ലുള്ള തലയും കഴുത്തു​മുള്ള ഈ പക്ഷിക്ക്‌ എപ്പോ​ഴും മ്ലാനത​യും നിരാ​ശ​യും കലർന്ന ഒരു ഭാവമാണ്‌. മുതിർന്ന പക്ഷിക​ളു​ടെ തൊണ്ട​യിൽനിന്ന്‌ ഒരു ടൈ പോലെ തോന്നി​ക്കുന്ന ഇളം ചെമപ്പു നിറത്തി​ലുള്ള തടിച്ചു​രുണ്ട ഒരു സഞ്ചി തൂങ്ങി​ക്കി​ട​ക്കു​ന്നു. ചില സമയങ്ങ​ളിൽ ഇതു വീർത്തു​വ​രും. മിക്കവ​രു​ടെ​യും അഭി​പ്രാ​യ​ത്തിൽ ഈ സഞ്ചി പക്ഷിയെ കൂടുതൽ വിരൂ​പ​മാ​ക്കു​ന്നതേ ഉള്ളൂ. എന്നാൽ കെനി​യ​യി​ലെ ദേശീയ കാഴ്‌ച​ബം​ഗ്ലാ​വു​ക​ളു​ടെ പക്ഷിശാ​സ്‌ത്ര വിഭാ​ഗ​ത്തി​ന്റെ തലവനായ ഡോ. ലിയോൺ ബെനൂൻ നമ്മെ ഇങ്ങനെ ഓർമി​പ്പി​ക്കു​ന്നു: “ഈ സഞ്ചി വിരൂ​പ​മാ​ണെന്ന്‌ നമുക്കു തോന്നു​ന്നു എന്നു കരുതി മാരബൂ​വിന്‌ അങ്ങനെ തോന്ന​ണ​മെ​ന്നില്ല.” എന്നിരു​ന്നാ​ലും ഈ സഞ്ചിയു​ടെ ജൈവ​ശാ​സ്‌ത്ര​പ​ര​മായ ഉപയോ​ഗം എന്താ​ണെന്നു കണ്ടുപി​ടി​ക്കാൻ ഇതേവരെ ആർക്കും കഴിഞ്ഞി​ട്ടില്ല.

അതു​പോ​ലെ ഈ പക്ഷിയു​ടെ തീറ്റി​ശീ​ല​ങ്ങ​ളും കാഴ്‌ച​ക്കാർക്ക്‌ അതി​നോ​ടു വെറുപ്പു തോന്നാ​നേ ഇടയാക്കൂ. ചീഞ്ഞ മാംസ​മാണ്‌ അതിന്റെ ഭക്ഷണം എന്നതാണ്‌ ഒരു സംഗതി. ശവം കിട്ടി​യി​ല്ലെ​ങ്കിൽ തന്റെ കടുത്ത വിശപ്പ്‌ അടക്കാൻ അത്‌ മറ്റു പക്ഷികളെ കൊന്നു​തി​ന്നും. പലരും അതിനെ അങ്ങേയറ്റം വെറു​ക്കു​ന്ന​തിൽ അതിശ​യി​ക്കാ​നില്ല.

എന്നാൽ വികൃ​ത​മായ രൂപവും സ്വഭാ​വ​വി​ശേ​ഷ​ത​ക​ളും ഉണ്ടെങ്കി​ലും, മാരബൂ​വിന്‌ പ്രശം​സ​നീ​യ​മായ പല ഗുണങ്ങ​ളു​മുണ്ട്‌. ഇത്രമാ​ത്രം വെറു​ക്ക​പ്പെ​ടുന്ന ഈ പക്ഷിയെ നമുക്ക്‌ ഇപ്പോൾ ഒന്ന്‌ അടുത്തു പരിച​യ​പ്പെ​ട്ടാ​ലോ?

പക്ഷികൾക്ക്‌ ഇടയിലെ ഒരു അതികാ​യൻ

സാധ്യ​ത​യ​നു​സ​രിച്ച്‌ ബകവർഗ​ത്തി​ലെ ഏറ്റവും വലിയ പക്ഷിയാണ്‌ മാരബൂ. പൂർണ വളർച്ച​യെ​ത്തിയ ഒരു പൂവന്‌ 150 സെന്റി​മീ​റ്റർ ഉയരവും 8 കിലോ​ഗ്രാം വരെ തൂക്കവും വെക്കും. പിട കുറച്ചു കൂടെ ചെറു​താണ്‌. ആപ്പിന്റെ ആകൃതി​യുള്ള നല്ല കട്ടിയുള്ള ഇവയുടെ കൊക്കിന്‌ 30 സെന്റി​മീ​റ്റ​റി​ലും അധികം നീളം വെച്ചേ​ക്കാം—ശവശരീ​ര​ങ്ങ​ളിൽനിന്ന്‌ ഇറച്ചി കൊത്തി​പ്പ​റി​ക്കാൻ പറ്റിയതു തന്നെ.

ഇത്ര​യൊ​ക്കെ വലിപ്പം ഉണ്ടെങ്കി​ലും ഇതിനു പറക്കാൻ ഒരു ബുദ്ധി​മു​ട്ടു​മില്ല. 2.5 മീറ്ററി​ല​ധി​കം ചിറകു​വി​രി​വുള്ള മാരബൂ ചിറകു വിടർത്തി​പ്പി​ടിച്ച്‌ ഒഴുകി പറക്കുന്ന കാര്യ​ത്തിൽ മറ്റു പറക്കൽ വിദഗ്‌ധർക്ക്‌ ഒപ്പം നിൽക്കും. തല തോളി​നോട്‌ അൽപ്പം അടുപ്പി​ച്ചു​പി​ടിച്ച്‌ നീണ്ട കാലുകൾ ശരീര​ത്തി​ന്റെ പിന്നി​ലേക്കു നീട്ടി പറക്കുന്ന മാരബൂ​വി​നെ കാണാൻ നല്ല ചന്തമാണ്‌. തെർമ​ലു​ക​ളു​ടെ അഥവാ ഉഷ്‌ണ​വാ​യു​വി​ന്റെ സഹായ​ത്താൽ മുകളി​ലേക്ക്‌ അനായാ​സം പറന്നു​യ​രാൻ മാരബൂ​വി​നു കഴിയും. വളരെ ഉയരത്തിൽ, ചില​പ്പോൾ കണ്ണെത്താ​ത്തത്ര ഉയരത്തിൽ പോലും അതിന്‌ എത്താനാ​കും! എന്തിന്‌, 4,000 മീറ്ററി​ലും അധികം ഉയരത്തിൽപ്പോ​ലും മാരബൂ പറക്കു​ന്ന​താ​യി നിരീ​ക്ഷി​ക്ക​പ്പെ​ട്ടി​ട്ടുണ്ട്‌!

 ഉത്തരവാ​ദി​ത്വ​ബോ​ധ​മുള്ള മാതാ​പി​താ​ക്കൾ

മാതാ​പി​താ​ക്കൾ എന്ന നിലയി​ലുള്ള തങ്ങളുടെ ഉത്തരവാ​ദി​ത്വം നിർവ​ഹി​ക്കുന്ന കാര്യ​ത്തിൽ മാരബൂ പ്രത്യേക പ്രശംസ അർഹി​ക്കു​ന്നു. മാതാ​പി​താ​ക്കൾക്ക്‌ വളരെ​യ​ധി​കം ചുമത​ലകൾ നിർവ​ഹി​ക്കാ​നുണ്ട്‌. അതിൽ ആദ്യ​ത്തേത്‌ കൂട്‌ നിർമി​ക്കുക എന്നതാണ്‌. പറ്റിയ ഒരു ഇടം കണ്ടെത്തി​ക്ക​ഴി​ഞ്ഞാൽ പൂവൻ കൂടിന്റെ നിർമാ​ണം തുടങ്ങും. പിന്നീട്‌ ഇതിൽ സഹായി​ക്കാൻ പിടയും എത്തും. ചില​പ്പോൾ നിലത്തു​നിന്ന്‌ 30 മീറ്റർ ഉയരത്തിൽ നിർമി​ക്കുന്ന കൂട്‌ വലിയ വിശേ​ഷ​ത​യാർന്ന​താണ്‌ എന്നൊ​ന്നും പറയാ​നാ​വില്ല. ഉണക്ക കമ്പുക​ളും മരച്ചി​ല്ല​ക​ളും ഇലകളും കൂട്ടി​വെച്ച്‌ ഉണ്ടാക്കുന്ന ഒരു മീറ്റർ വിസ്‌തൃ​തി​യുള്ള ഒരു തുറന്ന പരുക്കൻ തട്ടാണ്‌ അതിന്റെ കൂട്‌. ചില​പ്പോൾ മാരബൂ പഴയ ഒരു കൂട്‌ കുറച്ച്‌ ചുള്ളി​ക്ക​മ്പു​ക​ളും മറ്റും ചേർത്ത്‌ പുതു​ക്കി​പ്പ​ണി​യുക മാത്രമേ ചെയ്യൂ. ചിലയി​ട​ങ്ങ​ളിൽ മാരബൂ പക്ഷികൾ 50 വർഷമാ​യി ഒരു സ്ഥലത്തു​ത​ന്നെ​യുള്ള കൂടു നിലനി​റു​ത്തു​ക​യും ഉപയോ​ഗി​ക്കു​ക​യും ചെയ്യു​ന്ന​താ​യി അറിയാം.

പുതിയ കൂടിന്റെ പണി തുടങ്ങി​ക്ക​ഴിഞ്ഞ്‌, ആൺ മാരബൂ ഒരു ഇണയെ കണ്ടെത്താ​നുള്ള ശ്രമം ആരംഭി​ക്കും. അനേകം പക്ഷിക​ളി​ലും സാധാരണ കണ്ടുവ​രാ​റുള്ള രീതി​യിൽനി​ന്നു വ്യത്യ​സ്‌ത​മാ​യി പിട തന്നെ സമീപി​ക്കാൻ പൂവൻ കാത്തി​രി​ക്കു​ന്നു. പൂവൻ തന്നെ കടാക്ഷി​ക്കു​മെന്ന പ്രതീ​ക്ഷ​യിൽ അനേകം പിടകൾ എത്താറുണ്ട്‌. പലപ്പോ​ഴും അവയ്‌ക്ക്‌ നിരാ​ശ​യോ​ടെ മടങ്ങേണ്ടി വരുന്നു. എന്നാൽ ശ്രമം തുടരുന്ന പക്ഷം തന്നെ സ്വീക​രി​ക്കാൻ തയ്യാറാ​കുന്ന ഒരു പൂവനെ പിട ഒടുവിൽ കണ്ടുമു​ട്ടുക തന്നെ ചെയ്യും. തുടർന്നുള്ള പ്രണയ​കാ​ലത്ത്‌ രണ്ടു പക്ഷിക​ളു​ടെ​യും കഴുത്തി​ലെ സഞ്ചികൾ മുഴു​വ​നാ​യും വീർത്തി​രി​ക്കും. നുഴഞ്ഞു​ക​യ​റ്റ​ക്കാ​രെ വിരട്ടി​യോ​ടി​ക്കു​ന്ന​തിന്‌ അവ ചില ശബ്ദങ്ങൾ പുറ​പ്പെ​ടു​വി​ക്കു​ക​യും ചെയ്യും. ഈ ശബ്ദങ്ങളെ അമറൽ, മോങ്ങൽ, ചൂളമടി എന്നൊക്കെ വിശേ​ഷി​പ്പി​ച്ചി​ട്ടുണ്ട്‌. ഇടയ്‌ക്കി​ട​യ്‌ക്ക്‌ തന്റെ വലിയ കൊക്ക്‌ കൂട്ടി​യ​ടിച്ച്‌ ഉണ്ടാക്കുന്ന ശബ്ദമൊ​ഴി​ച്ചാൽ മാരബൂ പുറ​പ്പെ​ടു​വി​ക്കു​ന്ന​താ​യി അറിവാ​യി​ട്ടുള്ള ശബ്ദങ്ങൾ ഇവ മാത്ര​മാണ്‌. ഓരോ തവണയും ഒരു ഇണ പുറത്തു പോയി തിരികെ വരു​മ്പോൾ ഒരു പ്രത്യേക രീതി​യിൽ അവ പരസ്‌പരം അഭിവാ​ദനം ചെയ്യുന്നു. ഇത്‌ ഇണകൾക്കി​ട​യിൽ ഉടലെ​ടു​ക്കുന്ന ദൃഢബ​ന്ധത്തെ അരക്കി​ട്ടു​റ​പ്പി​ക്കാൻ സഹായി​ക്കു​ന്നു. തല പുറ​കോ​ട്ടാ​ക്കി, അതിനു​ശേഷം താഴേക്കു കുനിച്ച്‌ കുറേ സമയ​ത്തേക്ക്‌ കൊക്ക്‌ കൂട്ടി​യ​ടിച്ച്‌ കടകട ശബ്ദം പുറ​പ്പെ​ടു​വി​ക്കു​ന്ന​താണ്‌ ഈ അഭിവാ​ദ​ന​രീ​തി.

ഇണകൾ ഒരുമി​ച്ചു കൂടിന്റെ പണി പൂർത്തി​യാ​ക്കു​ന്നു. മുട്ടകൾക്ക്‌ അടയി​രി​ക്കുന്ന ജോലി​യും രണ്ടു​പേ​രും കൂടെ​യാണ്‌ നിർവ​ഹി​ക്കു​ന്നത്‌. ഒരു മാസം​കൊണ്ട്‌ മങ്ങിയ വെള്ള നിറമുള്ള രണ്ടോ മൂന്നോ മുട്ടകൾ വിരിഞ്ഞ്‌ കുഞ്ഞുങ്ങൾ പുറത്തു വരും. ഇവയ്‌ക്കു പേരിനു മാത്രമേ തൂവൽ ഉണ്ടായി​രി​ക്കൂ. ഏതാ​ണ്ടൊ​രു പിങ്ക്‌ നിറമുള്ള ഈ കുഞ്ഞു​ങ്ങ​ളു​ടെ പരിപാ​ലനം മാതാ​പി​താ​ക്കൾ രണ്ടു​പേ​രും ഏറ്റെടു​ക്കു​ന്നു. മാരബൂ കുഞ്ഞു​ങ്ങൾക്ക്‌ അതിവി​ശി​ഷ്ട​മായ പരിച​ര​ണ​മാ​ണു ലഭിക്കു​ന്നത്‌. മത്സ്യം പോലെ നല്ല പോഷ​ക​ഗു​ണ​മുള്ള ആഹാര​സാ​ധ​നങ്ങൾ അടങ്ങിയ ഊർജി​ത​മായ ഒരു പോഷണ പരിപാ​ടി ഉടൻ ആരംഭി​ക്കു​ന്നു. മാരബൂ പക്ഷികൾ കൂടെ​ക്കൂ​ടെ സന്ദർശി​ക്കാ​റുള്ള ചതുപ്പു പ്രദേ​ശ​ങ്ങ​ളിൽ നിന്ന്‌ അവയ്‌ക്ക്‌ തങ്ങളുടെ ഭക്ഷണ​ക്ര​മ​ത്തി​ലെ ഒരു പതിവ്‌ ഇനമായ തവളയെ ധാരാ​ള​മാ​യി ലഭിക്കും. അച്ഛനും അമ്മയും കൂട്ടി​ലേക്കു തികട്ടി​ക്കൊ​ടു​ക്കുന്ന ഭക്ഷണം കുഞ്ഞുങ്ങൾ കഴിക്കു​ന്നു. കുഞ്ഞു​ങ്ങ​ളു​ടെ വളർച്ച മെല്ലെ​യാണ്‌. നാലു മാസം​കൊ​ണ്ടേ സ്വന്തം കാലിൽ നിൽക്കാ​നുള്ള പ്രാപ്‌തി അവ നേടൂ. അപ്പോൾ മാത്രമേ കൂടു വിട്ടു പറന്നു പോകാ​നും അവയ്‌ക്കു സാധിക്കൂ.

 ശുചീ​കരണ പ്രവർത്ത​കർ

ശവംതീ​നി എന്ന നിലയിൽ പലപ്പോ​ഴും അവമതി​ക്ക​പ്പെ​ടാ​റു​ണ്ടെ​ങ്കി​ലും മാരബൂ യഥാർഥ​ത്തിൽ വളരെ പ്രയോ​ജ​ന​പ്ര​ദ​മായ ഒരു സേവന​മാ​ണു ചെയ്യു​ന്നത്‌. ഇരപി​ടി​യ​ന്മാ​രായ ജന്തുക്കൾ കൊല്ലുന്ന മൃഗങ്ങ​ളു​ടെ ശരീരങ്ങൾ ആഫ്രിക്കൻ സമതല​ങ്ങ​ളി​ലെ​ങ്ങും ചിതറി കിടന്നാൽ അത്‌ രോഗങ്ങൾ പടരു​ന്ന​തിന്‌ ഇടയാ​ക്കു​ക​യും മനുഷ്യ​നും മൃഗങ്ങൾക്കും ഭീഷണി ആയിത്തീ​രു​ക​യും ചെയ്യും. എന്നാൽ മാരബൂ, ഉച്ഛിഷ്ടം നീക്കം ചെയ്യുക എന്ന പ്രയോ​ജ​ന​പ്ര​ദ​മായ ജോലി ചെയ്യുന്നു. തങ്ങളെ​പ്പോ​ലെ​തന്നെ ശവംതീ​നി​ക​ളും തീറ്റി​പ്രി​യ​രു​മായ കഴുക​ന്മാ​രോ​ടൊ​പ്പം ഇവ മൃഗങ്ങ​ളു​ടെ ശവശരീ​ര​ങ്ങൾക്കാ​യി സമതല​ങ്ങ​ളി​ലെ​ങ്ങും പരതുന്നു. ഒരു ശവം കണ്ടെത്തി​ക്ക​ഴി​ഞ്ഞാൽ കൂടുതൽ ആക്രമ​ണ​കാ​രി​ക​ളായ കഴുക​ന്മാർ തങ്ങളുടെ ബലമുള്ള വളഞ്ഞ കൊക്കു​കൾ കൊണ്ട്‌ അത്‌ കൊത്തി​ക്കീ​റു​ന്നതു വരെ മാരബൂ കാത്തു​നിൽക്കും. എന്നിട്ട്‌ തക്കം കിട്ടു​മ്പോൾ ശവത്തിന്റെ അടു​ത്തേക്ക്‌ പാഞ്ഞു​ചെന്ന്‌ ഒരു ശസ്‌ത്ര​ക്രി​യാ കത്തി പോലെ മൂർച്ച​യുള്ള തന്റെ നീണ്ട കൊക്കു കൊണ്ട്‌ ഒരു കഷണം ഇറച്ചി കൊത്തി​യെ​ടുത്ത്‌ മടങ്ങും. പിന്നെ, അടുത്ത അവസര​വും കാത്ത്‌ അവ കുറച്ച്‌ അകലെ മാറി നിൽക്കും. കഴുക​ന്മാർ വയറു​നി​റച്ചു കഴിയു​ന്ന​തോ​ടെ ശേഷി​ക്കുന്ന ഇറച്ചി​ക്കാ​യി മാരബൂ അടിപി​ടി തുടങ്ങും. എല്ല്‌ ഒഴികെ തൊണ്ട​യി​ലൂ​ടെ കടന്നു​പോ​കുന്ന എന്തും മാരബൂ അകത്താ​ക്കും. ഏകദേശം 600 ഗ്രാം വരുന്ന ഇറച്ചി കഷണങ്ങൾപോ​ലും അനായാ​സം വിഴു​ങ്ങാൻ അവയ്‌ക്കു കഴിയും.

തന്റെ ശുചീ​കരണ പ്രവർത്തനം സ്വാഭാ​വിക ചുറ്റു​പാ​ടിൽ മാത്രം ഒതുക്കി​നി​റു​ത്താ​തെ അടുത്ത കാലത്ത്‌ മാരബൂ അത്‌ മറ്റിട​ങ്ങ​ളി​ലേ​ക്കും വ്യാപി​പ്പി​ച്ചി​രി​ക്കു​ന്നു. ഈ പക്ഷിക്ക്‌ മനുഷ്യ​നോ​ടുള്ള ഭയം ഏതാണ്ട്‌ ഇല്ലാതാ​യി​രി​ക്കു​ന്ന​തി​നാൽ ഇപ്പോൾ അവ പതിവാ​യി നഗരങ്ങ​ളി​ലെ​യും ഗ്രാമ​ങ്ങ​ളി​ലെ​യും കുപ്പക്കൂ​നകൾ സന്ദർശി​ക്കാ​റുണ്ട്‌. ഫലമോ? കൂടുതൽ വൃത്തി​യുള്ള ചുറ്റു​പാട്‌. ഇറച്ചി​യു​ടെ അവശി​ഷ്ടങ്ങൾ കിട്ടു​മെന്ന പ്രതീ​ക്ഷ​യോ​ടെ അവ കശാപ്പു​ശാ​ല​ക​ളിൽനി​ന്നു പുറ​ത്തേക്ക്‌ ഒഴുകുന്ന അഴുക്കു​വെള്ളം പോലും പരി​ശോ​ധി​ക്കാ​റുണ്ട്‌. ഈ പക്ഷി ആളത്ര നിസ്സാ​ര​ന​ല്ലെന്നു കാണി​ക്കുന്ന ഒരു ദൃഷ്ടാന്തം ഇതാ: പടിഞ്ഞാ​റൻ കെനി​യ​യി​ലെ ഒരു കശാപ്പു​ശാ​ല​യ്‌ക്ക​ടുത്ത്‌ ഇറച്ചി കഷണങ്ങൾക്കാ​യി പരതി​ക്കൊ​ണ്ടി​രി​ക്കെ ഒരു മാരബൂ എങ്ങനെ​യോ ഒരു കശാപ്പു​കത്തി അകത്താക്കി. ഏതാനും ദിവസം കഴിഞ്ഞ​പ്പോൾ അവിടെ അടുത്തു​തന്നെ വൃത്തി​യുള്ള തിളങ്ങുന്ന ആ കത്തി കിടക്കു​ന്നതു കണ്ടു. കത്തി വിഴു​ങ്ങിയ മാരബൂ​വാ​കട്ടെ കുഴപ്പ​മൊ​ന്നും കൂടാതെ പതിവു പരിപാ​ടി​ക​ളിൽ മുഴു​കു​ക​യും ചെയ്‌തു!

മാരബൂ​വി​ന്റെ ഭാവി

ആഫ്രിക്കൻ മാരബൂ​വി​ന്റെ ഏറ്റവും അടുത്ത ബന്ധുവായ ഏഷ്യൻ മഹാബകം എണ്ണത്തിൽ കുറഞ്ഞു വരിക​യാണ്‌. എന്നാൽ മാരബൂ​വി​ന്റെ എണ്ണമാ​കട്ടെ വർധി​ക്കു​ക​യാണ്‌. തന്റെ സ്വാഭാ​വിക ചുറ്റു​പാ​ടിൽ അതിന്‌ അറിയ​പ്പെ​ടുന്ന ശത്രു​ക്ക​ളാ​രും ഇല്ല. കഴിഞ്ഞ​കാ​ല​ങ്ങ​ളിൽ മാരബൂ​വി​ന്റെ ഏറ്റവും വലിയ ശത്രു മനുഷ്യൻ ആയിരു​ന്നു. ഈ വലിയ പക്ഷിയെ വെടി​വെച്ചു വീഴ്‌ത്തു​ക​യും അവയുടെ പിൻഭാ​ഗത്തെ പഞ്ഞി​പോ​ലുള്ള തൂവലു​കൾ പറിച്ച്‌ സ്‌ത്രീ​ക​ളു​ടെ തൊപ്പി​കൾക്കു ഭംഗി​കൂ​ട്ടാ​നാ​യി ഉപയോ​ഗി​ക്കു​ക​യും ചെയ്‌തി​ട്ടുണ്ട്‌. സ്റ്റോർക്‌സ്‌, ഐബി​സസ്‌ ആൻഡ്‌ സ്‌പൂൺബിൽസ്‌ ഓഫ്‌ ദ വേൾഡ്‌ എന്ന പുസ്‌തകം ഇങ്ങനെ പറയുന്നു: “വിശറി​കൾക്കോ ഒരു സ്‌ത്രീ​യു​ടെ മനംക​വ​രുന്ന വേഷഭൂ​ഷാ​ദി​കൾക്കോ മോടി​കൂ​ട്ടുന്ന മൃദു​ല​വും സുന്ദര​വു​മായ ഈ തൂവലു​കൾ കോലു​പോ​ലെ നീണ്ട, വികൃ​ത​രൂ​പ​മുള്ള ഭീമാ​കാ​ര​നായ ഈ ശവംതീ​നി​യിൽനി​ന്നു ലഭിച്ച​താ​ണെന്നു വിശ്വ​സി​ക്കാൻ വളരെ പ്രയാ​സ​മാണ്‌.” മാരബൂ​വി​ന്റെ നല്ലകാലം എന്നു പറയട്ടെ, അവയ്‌ക്കു നേരെ​യുള്ള നിഷ്‌ഠു​ര​മായ ആക്രമണം കുറഞ്ഞി​രി​ക്കു​ക​യാണ്‌. അങ്ങനെ അവയുടെ എണ്ണം കൂടി​യി​രി​ക്കു​ന്നു. നാം ഇപ്പോൾ പരി​ശോ​ധിച്ച വസ്‌തു​തകൾ വ്യക്തമാ​ക്കു​ന്നത്‌ നമ്മുടെ അവജ്ഞയ്‌ക്കും വെറു​പ്പി​നും ഒന്നും പാത്ര​മാ​കേണ്ട പക്ഷിയല്ല മാരബൂ എന്നാണ്‌. ചുറ്റു​പാ​ടു​കൾ ശുചീ​ക​രി​ക്കു​ന്ന​തി​ലെ അതിന്റെ കഠിന​വേ​ല​യും മിടു​ക്കും നമുക്കു വലിയ പ്രയോ​ജനം ചെയ്യുന്നു. അത്‌ ഏറ്റവും അഴകാർന്ന പക്ഷി​യൊ​ന്നും അല്ലെങ്കി​ലും, തന്റേതായ എളിയ വിധത്തിൽ അത്‌ തന്റെ സ്രഷ്ടാ​വി​നു മഹത്ത്വം കരേറ്റു​ന്നു.—സങ്കീർത്തനം 148:7, 10.(g01 8/8)

[22-ാം പേജിലെ ചിത്രം]

ആപ്പിന്റെ ആകൃതി​യുള്ള മാരബൂ​വി​ന്റെ കട്ടിയുള്ള കൊക്കിന്‌ 30 സെന്റി​മീ​റ്റ​റി​ലും അധികം നീളം വെച്ചേ​ക്കാം

[22, 23 പേജു​ക​ളി​ലെ ചിത്രം]

മാരബൂവിന്‌ 2.5 മീറ്ററി​ല​ധി​കം ചിറകു​വി​രി​വുണ്ട്‌

[കടപ്പാട്‌]

© Joe McDonald

[23-ാം പേജിലെ ചിത്രം]

മാരബൂ കുഞ്ഞു​ങ്ങൾക്ക്‌ അതിവി​ശി​ഷ്ട​മായ പരിച​രണം ലഭിക്കു​ന്നു

[കടപ്പാട്‌]

© M.P. Kahl/VIREO

[24-ാം പേജിലെ ചിത്രം]

മാരബൂവിന്റെ സഞ്ചിയു​ടെ ജൈവ​ശാ​സ്‌ത്ര​പ​ര​മായ ഉപയോ​ഗം എന്തെന്ന്‌ കണ്ടുപി​ടി​ച്ചി​ട്ടില്ല

[25-ാം പേജിലെ ചിത്രം]

ചിലപ്പോൾ നിലത്തു​നിന്ന്‌ 30 മീറ്റർ ഉയരത്തി​ലാണ്‌ മാരബൂ കൂടു കെട്ടുക