വിദ്വേ​ഷ​ത്തി​ന്റെ ചങ്ങല പൊട്ടി​ച്ചെ​റി​യൽ

“നിങ്ങളു​ടെ ശത്രു​ക്കളെ സ്‌നേ​ഹി​പ്പിൻ.”—മത്തായി 5:44.

രണ്ടു ശത്രു രാഷ്‌ട്ര​ങ്ങ​ളു​ടെ നേതാ​ക്ക​ന്മാർ ദിവസ​ങ്ങ​ളോ​ളം സജീവ​മായ സമാധാന ചർച്ചകൾ നടത്തി. ശക്തമായ ഒരു വ്യവസാ​യ​വ​ത്‌കൃത രാജ്യ​ത്തി​ന്റെ പ്രസി​ഡന്റ്‌ അതിൽ സംബന്ധി​ക്കു​ക​യും ഇരു​നേ​താ​ക്ക​ന്മാ​രെ​യും രമ്യത​യി​ലാ​ക്കാൻ തന്റെ ഗണ്യമായ സ്വാധീ​ന​വും കഴിവു​ക​ളും ഉപയോ​ഗി​ക്കു​ക​യും ചെയ്‌തു. എങ്കിലും, ഒടുവിൽ ഫലം ഏറെ നിരാ​ശാ​ജ​ന​ക​മാ​യി​രു​ന്നു. ആഴ്‌ച​കൾക്കു​ള്ളിൽ പ്രശ്‌നങ്ങൾ വീണ്ടും തലപൊ​ക്കി. “രണ്ടു ദശാബ്‌ദ​ങ്ങൾക്കു​ള്ളിൽ ഇരുകൂ​ട്ട​രും തമ്മിൽ ഉണ്ടായി​ട്ടുള്ള ഏറ്റവും വലിയ അക്രമം” എന്നാണ്‌ ന്യൂസ്‌വീക്ക്‌ മാസിക അതിനെ വിളി​ച്ചത്‌.

വിവിധ വംശീയ, ദേശീയ വിഭാ​ഗങ്ങൾ തമ്മിലുള്ള വിദ്വേ​ഷ​വും ശത്രു​ത​യും ഇല്ലാതാ​ക്കാൻ രാഷ്‌ട്ര​നേ​താ​ക്കൾ കിണഞ്ഞു ശ്രമി​ക്കു​ന്നു​ണ്ടെ​ങ്കി​ലും അവ ഇപ്പോ​ഴും ലോക​മെ​ങ്ങും അടക്കി​വാ​ഴു​ന്നു. വിദ്വേ​ഷ​പൂ​രി​ത​മായ സംഭവ​ങ്ങ​ളു​ടെ എണ്ണവും തീവ്ര​ത​യും വർധി​ക്കു​ക​യാണ്‌. അജ്ഞതയും രൂഢമൂ​ല​മായ മുൻവി​ധി​യും ദുഷ്‌പ്ര​ചാ​ര​ണ​വും അതിനു വളം​വെ​ക്കു​ക​യും ചെയ്യുന്നു. ഇന്നത്തെ നേതാ​ക്ക​ന്മാർ പുത്തൻ പരിഹാര മാർഗങ്ങൾ കണ്ടെത്താൻ വൃഥാ ശ്രമി​ക്കവേ, ഏറ്റവും നല്ല പരിഹാ​രം പഴയ ഒന്നാ​ണെന്ന്‌, ഗിരി​പ്ര​ഭാ​ഷ​ണ​ത്തി​ന്റെ അത്ര പഴക്കമു​ള്ള​താ​ണെന്ന്‌, കാണാൻ അവർ പരാജ​യ​പ്പെ​ടു​ന്നു. ആ പ്രഭാ​ഷണം നടത്തി​യ​പ്പോൾ, ദൈവ​ത്തി​ന്റെ വഴികൾ അനുസ​രി​ച്ചു ജീവി​ക്കാൻ യേശു​ക്രി​സ്‌തു തന്റെ ശ്രോ​താ​ക്കളെ പ്രോ​ത്സാ​ഹി​പ്പി​ക്കു​ക​യു​ണ്ടാ​യി. പ്രസ്‌തുത അവസര​ത്തി​ലാണ്‌ മുകളിൽ ഉദ്ധരിച്ച “നിങ്ങളു​ടെ ശത്രു​ക്കളെ സ്‌നേ​ഹി​പ്പിൻ” എന്ന പ്രസ്‌താ​വന അവൻ നടത്തി​യത്‌. വിദ്വേ​ഷ​ത്തി​നും മുൻവി​ധി​ക്കു​മുള്ള ഏറ്റവും നല്ല പരിഹാ​ര​മാർഗം ആ ഉദ്‌ബോ​ധ​ന​മാണ്‌, അതാണ്‌ സാധ്യ​മായ ഏക പരിഹാര മാർഗ​വും!

ശത്രു​ക്ക​ളെ സ്‌നേ​ഹി​ക്കുക എന്ന ആശയത്തെ അങ്ങേയറ്റം ആദർശ​പൂർണ​വും അതേസ​മയം അപ്രാ​യോ​ഗി​ക​വു​മാ​യി സന്ദേഹ​വാ​ദി​കൾ തള്ളിക്ക​ള​ഞ്ഞേ​ക്കാം. എന്നാൽ വെറു​ക്കു​ന്ന​തി​നു പഠിക്കാൻ ആളുകൾക്കു കഴിയു​മെ​ങ്കിൽ, വെറു​ക്കാ​തി​രി​ക്കാൻ പഠിക്കാ​നും അവർക്കു കഴിയു​മെന്നു നിഗമനം ചെയ്യു​ന്നത്‌ ന്യായ​മല്ലേ? അതു​കൊണ്ട്‌ യേശു​വി​ന്റെ വാക്കുകൾ മനുഷ്യ​വർഗ​ത്തിന്‌ യഥാർഥ പ്രത്യാശ ഏകുന്നു. ദീർഘ​കാല ശത്രുത പോലും ഇല്ലാതാ​ക്കാൻ സാധി​ക്കു​മെന്ന്‌ അവ പ്രകട​മാ​ക്കു​ന്നു.

യേശു​വി​ന്റെ പ്രസംഗം കേട്ട യഹൂദ​ന്മാ​രു​ടെ സാഹച​ര്യം പരിചി​ന്തി​ക്കുക. ശത്രു​ക്കളെ കണ്ടെത്താൻ അവർക്ക്‌ അകലെ​യൊ​ന്നും പോ​കേ​ണ്ടി​യി​രു​ന്നില്ല. ആ പ്രദേ​ശത്ത്‌ അധീശ​ത്വം പുലർത്തി​യി​രുന്ന റോമൻ സൈന്യ​ങ്ങൾ യഹൂദ​ന്മാ​രിൽനി​ന്നു മർദക​മാ​യി നികുതി പിരി​ക്കു​ക​യും അവർക്കെ​തി​രെ രാഷ്‌ട്രീയ കുത​ന്ത്രങ്ങൾ പ്രയോ​ഗി​ക്കു​ക​യും അവരെ ദ്രോ​ഹി​ക്കു​ക​യും ചൂഷണ​ത്തിന്‌ ഇരകളാ​ക്കു​ക​യും ചെയ്‌തി​രു​ന്നു. (മത്തായി 5:39-42) നിസ്സാ​ര​മായ വിയോ​ജി​പ്പു​കൾ പരിഹ​രി​ക്കാ​തെ വളരാൻ അനുവ​ദി​ച്ചതു നിമിത്തം ചിലർ സഹയഹൂ​ദരെ പോലും ശത്രു​ക്ക​ളാ​യി വീക്ഷി​ച്ചി​രു​ന്നി​രി​ക്കാം. (മത്തായി 5:21-24) തങ്ങളെ ദ്രോ​ഹി​ക്കു​ക​യും വേദനി​പ്പി​ക്കു​ക​യും ചെയ്‌ത വ്യക്തി​കളെ തന്റെ ശ്രോ​താ​ക്കൾ സ്‌നേ​ഹി​ക്ക​ണ​മെന്ന്‌ യേശു​വിന്‌ യഥാർഥ​ത്തിൽ പ്രതീ​ക്ഷി​ക്കാൻ കഴിയു​മാ​യി​രു​ന്നോ?

“സ്‌നേഹ”ത്തിന്റെ അർഥം

‘സ്‌നേഹം’ എന്നതു​കൊണ്ട്‌ യേശു ഇവിടെ പരാമർശി​ച്ചത്‌ രണ്ടു സുഹൃ​ത്തു​ക്കൾക്ക്‌ ഇടയിൽ ഉള്ളതു പോലുള്ള വാത്സല്യ​ത്തെ അല്ല എന്നത്‌ ആദ്യം​തന്നെ മനസ്സി​ലാ​ക്കുക. മത്തായി 5:44-ൽ സ്‌നേഹം എന്നതിന്‌ ഉപയോ​ഗി​ച്ചി​രി​ക്കു​ന്നത്‌ അഗാപെ എന്ന ഗ്രീക്കു​പ​ദ​ത്തി​ന്റെ ഒരു രൂപമാണ്‌. ആ പദത്തിന്‌ തത്ത്വങ്ങ​ളാൽ നയിക്ക​പ്പെ​ടുന്ന അഥവാ ഭരിക്ക​പ്പെ​ടുന്ന സ്‌നേഹം എന്ന അർഥമാ​ണു​ള്ളത്‌. അതിൽ ഊഷ്‌മ​ള​മായ വാത്സല്യം അവശ്യം ഉണ്ടായി​രി​ക്ക​ണ​മെ​ന്നില്ല. നീതി​നി​ഷ്‌ഠ​മായ തത്ത്വങ്ങ​ളാൽ നയിക്ക​പ്പെ​ടു​ന്ന​തി​നാൽ അത്തരം സ്‌നേഹം, മറ്റുള്ളവർ എങ്ങനെ പെരു​മാ​റി​യാ​ലും അവരുടെ ഉത്തമ താത്‌പ​ര്യ​ങ്ങൾ അന്വേ​ഷി​ക്കാൻ ഒരുവനെ പ്രേരി​പ്പി​ക്കു​ന്നു. അതു​കൊണ്ട്‌ വ്യക്തി​പ​ര​മായ ശത്രു​ത​കളെ കവിഞ്ഞു​പോ​കാൻ അഗാപെ സ്‌നേ​ഹ​ത്തി​നു കഴിയും.  തന്നെ ക്രൂശിച്ച റോമൻ പടയാ​ളി​കളെ ശപിക്കു​ന്ന​തി​നു പകരം, ബൈബിൾ പറയു​ന്നതു പോലെ പിൻവ​രുന്ന രീതി​യിൽ പ്രാർഥി​ച്ച​പ്പോൾ അത്തരത്തി​ലുള്ള സ്‌നേഹം യേശു​തന്നെ പ്രകട​മാ​ക്കി: “പിതാവേ, ഇവർ ചെയ്യു​ന്നതു ഇന്നതു എന്നു അറിയാ​യ്‌ക​കൊ​ണ്ടു ഇവരോ​ടു ക്ഷമി​ക്കേ​ണമേ.”—ലൂക്കൊസ്‌ 23:34.

ലോകം വ്യാപ​ക​മായ ഒരു വിധത്തിൽ യേശു​വി​ന്റെ പഠിപ്പി​ക്ക​ലു​കൾ സ്വീക​രി​ക്കു​ക​യും പരസ്‌പരം സ്‌നേ​ഹി​ച്ചു​തു​ട​ങ്ങു​ക​യും ചെയ്യു​മെന്ന്‌ പ്രതീ​ക്ഷി​ക്കു​ന്നത്‌ യാഥാർഥ്യ​ത്തി​നു നിരക്കുന്ന സംഗതി​യാ​ണോ? അല്ല. കാരണം, ഈ ലോകം ഇനിയും നാശത്തി​ലേക്കു കൂപ്പു​കു​ത്തു​മെന്ന്‌ ബൈബിൾ സൂചി​പ്പി​ക്കു​ന്നു. “ദുഷ്ടമ​നു​ഷ്യ​രും മായാ​വി​ക​ളും വഞ്ചിച്ചും വഞ്ചിക്ക​പ്പെ​ട്ടും​കൊ​ണ്ടു മേല്‌ക്കു​മേൽ ദോഷ​ത്തിൽ മുതിർന്നു​വ​രും” എന്ന്‌ 2 തിമൊ​ഥെ​യൊസ്‌ 3:13, 14 മുൻകൂ​ട്ടി പറയുന്നു. എന്നാൽ, ബൈബിൾ പഠിക്കു​ന്ന​തി​ലൂ​ടെ നീതി​നി​ഷ്‌ഠ​മായ തത്ത്വങ്ങൾ സംബന്ധിച്ച നല്ല വിദ്യാ​ഭ്യാ​സം നേടി​ക്കൊണ്ട്‌ വ്യക്തി​കൾക്ക്‌ വിദ്വേ​ഷ​ത്തി​ന്റെ ചങ്ങല പൊട്ടി​ച്ചെ​റി​യാൻ സാധി​ക്കും. ഈ വിധത്തിൽ തങ്ങൾക്കു ചുറ്റും വ്യാപി​ച്ചി​രി​ക്കുന്ന വിദ്വേ​ഷത്തെ ചെറു​ക്കാൻ വ്യക്തി​കൾക്കു കഴിഞ്ഞി​ട്ടു​ണ്ടെന്ന്‌ തെളി​വു​കൾ വ്യക്തമാ​യി സൂചി​പ്പി​ക്കു​ന്നു. ചില യഥാർഥ അനുഭ​വങ്ങൾ പരിചി​ന്തി​ക്കുക.

സ്‌നേ​ഹി​ക്കാൻ പഠിക്കു​ന്നു

പതിമൂന്ന്‌ വയസ്സുള്ള ഹോസേ ഒരു തീവ്ര​വാ​ദി സംഘത്തി​ലെ അംഗമെന്ന നിലയിൽ ഗറില്ലാ യുദ്ധത്തിൽ ഏർപ്പെ​ട്ടി​രു​ന്നു. a തനിക്കു ചുറ്റും കണ്ട അനീതി​കൾക്ക്‌ ഉത്തരവാ​ദി​കൾ എന്നു പറയ​പ്പെ​ട്ട​വരെ വെറു​ക്കാൻ അവൻ പഠിപ്പി​ക്ക​പ്പെട്ടു. അവരെ ഇല്ലായ്‌മ ചെയ്യുക എന്നതാ​യി​രു​ന്നു അവന്റെ ലക്ഷ്യം. തന്റെ സുഹൃ​ത്തു​ക്ക​ളിൽ പലരും മരിച്ചു​വീ​ഴു​ന്നതു കണ്ടപ്പോൾ അവനിൽ കടുത്ത നീരസ​വും പ്രതി​കാ​ര​ചി​ന്ത​യും ഉടലെ​ടു​ത്തു. ബോം​ബു​കൾ ഉണ്ടാക്കു​മ്പോൾ അവൻ തന്നോ​ടു​തന്നെ ഇങ്ങനെ ചോദി​ക്കു​മാ​യി​രു​ന്നു, ‘ഇത്രയ​ധി​കം കഷ്ടപ്പാ​ടു​കൾ ഉള്ളത്‌ എന്തു​കൊ​ണ്ടാണ്‌? ഒരു ദൈവം ഉണ്ടെങ്കിൽ, അവൻ ഇതൊ​ന്നും കാണു​ന്നി​ല്ലേ?’ പലപ്പോ​ഴും ആശയക്കു​ഴ​പ്പ​വും വിഷാ​ദ​വും നിമിത്തം അവൻ കരയു​മാ​യി​രു​ന്നു.

ഹോസേ ഒടുവിൽ സ്ഥലത്തെ യഹോ​വ​യു​ടെ സാക്ഷി​ക​ളു​ടെ സഭയു​മാ​യി സമ്പർക്ക​ത്തിൽ വന്നു. തന്റെ ആദ്യ സഭാ​യോ​ഗ​ത്തിൽത്തന്നെ അവിടത്തെ സ്‌നേ​ഹ​പു​ര​സ്സ​ര​മായ അന്തരീക്ഷം അവൻ ശ്രദ്ധിച്ചു. ഊഷ്‌മ​ള​വും സൗഹാർദ​പ​ര​വു​മായ രീതി​യിൽ എല്ലാവ​രും അവനെ അഭിവാ​ദനം ചെയ്‌തു. പിന്നീട്‌ “ദൈവം ദുഷ്ടത അനുവ​ദി​ച്ചി​രി​ക്കു​ന്നത്‌ എന്തു​കൊണ്ട്‌?” എന്ന വിഷയത്തെ കുറി​ച്ചുള്ള ചർച്ചയിൽ അവന്റെ ചോദ്യ​ങ്ങൾക്കുള്ള ഉത്തരങ്ങൾ ലഭിച്ചു. b

കാല​ക്ര​മ​ത്തിൽ, തന്റെ ജീവി​ത​ത്തി​ലും ചിന്താ​രീ​തി​യി​ലും മാറ്റങ്ങൾ വരുത്താൻ ബൈബി​ളിൽനി​ന്നുള്ള  കൂടു​ത​ലായ അറിവ്‌ ഹോ​സേയെ സഹായി​ച്ചു. “സ്‌നേ​ഹി​ക്കാ​ത്തവൻ മരണത്തിൽ വസിക്കു​ന്നു. . . . ദ്വേഷി​ക്കു​ന്നവൻ കൊല​യാ​ളി​യാണ്‌. കൊല​യാ​ളി​യിൽ നിത്യ​ജീ​വൻ കുടി​കൊ​ള്ളു​ന്നില്ല” എന്ന്‌ അവൻ പഠിച്ചു.—1 യോഹ​ന്നാൻ 3:14, 15, ഓശാന ബൈ.

എന്നാൽ, തീവ്ര​വാ​ദി​ക​ളായ തന്റെ സുഹൃ​ത്തു​ക്ക​ളു​മാ​യുള്ള ബന്ധം വിച്ഛേ​ദി​ക്കു​ന്നത്‌ വളരെ ദുഷ്‌ക​ര​മാ​യി​രു​ന്നു. അവൻ യഹോ​വ​യു​ടെ സാക്ഷി​ക​ളു​ടെ രാജ്യ​ഹാ​ളിൽ പോകുന്ന ഓരോ പ്രാവ​ശ്യ​വും ആളുകൾ അവനെ പിന്തു​ടർന്നു. ഹോ​സേ​യിൽ അത്തര​മൊ​രു പരിവർത്തനം വരുത്തി​യത്‌ എന്താ​ണെന്ന്‌ അറിയാൻ അവന്റെ ചില മുൻസു​ഹൃ​ത്തു​ക്കൾ ഏതാനും യോഗ​ങ്ങ​ളിൽ സംബന്ധി​ക്കുക പോലും ചെയ്‌തു. അവൻ ഒരു ഒറ്റി​ക്കൊ​ടു​പ്പു​കാ​ര​നോ അപകട​കാ​രി​യോ അല്ലെന്നു ബോധ്യ​മാ​യ​തിൽപ്പി​ന്നെ അവർ അവനെ ശല്യം ചെയ്‌തി​ട്ടില്ല. 17-ാമത്തെ വയസ്സിൽ, യഹോ​വ​യു​ടെ സാക്ഷി​ക​ളിൽ ഒരുവ​നാ​യി ഹോസേ സ്‌നാ​പ​ന​മേറ്റു. പെട്ടെ​ന്നു​തന്നെ അവൻ മുഴു​സ​മയം സുവാർത്ത പ്രസം​ഗി​ക്കാൻ തുടങ്ങി. ആളുകളെ വധിക്കാൻ ആസൂ​ത്രണം ചെയ്യു​ന്ന​തി​നു പകരം, ഇപ്പോൾ അവൻ സ്‌നേ​ഹ​ത്തി​ന്റെ​യും പ്രത്യാ​ശ​യു​ടെ​യും സന്ദേശം അവരുടെ പക്കൽ എത്തിക്കു​ന്നു!

വംശീയ അതിർവ​ര​മ്പു​കൾ മറിക​ട​ക്കു​ന്നു

വംശീയ കൂട്ടങ്ങ​ളി​ലെ അംഗങ്ങൾക്ക്‌ തങ്ങളെ വേർതി​രി​ച്ചു നിറു​ത്തുന്ന പ്രതി​ബ​ന്ധങ്ങൾ മറിക​ട​ക്കാൻ കഴിയു​മോ? ഇംഗ്ലണ്ടി​ലെ ലണ്ടനി​ലുള്ള അംഹാ​രിക്‌ സംസാ​രി​ക്കുന്ന ഒരു കൂട്ടം യഹോ​വ​യു​ടെ സാക്ഷി​ക​ളു​ടെ കാര്യം പരിചി​ന്തി​ക്കുക. ഏതാണ്ട്‌ 35 പേർ അടങ്ങി​യ​താണ്‌ ഈ കൂട്ടം—20 എത്യോ​പ്യ​ക്കാ​രും 15 എറി​ട്രി​യ​ക്കാ​രും. അടുത്ത​കാ​ലത്ത്‌ ആഫ്രി​ക്ക​യിൽ എറി​ട്രി​യ​ക്കാ​രും എത്യോ​പ്യ​ക്കാ​രും കടുത്ത യുദ്ധത്തിൽ ഏർപ്പെ​ട്ടെ​ങ്കി​ലും, ഇവർ സമാധാ​ന​പൂർവം ഐക്യ​ത്തിൽ ഒന്നിച്ച്‌ ആരാധി​ക്കു​ന്നു.

എത്യോ​പ്യ​ക്കാ​ര​നായ ഒരു സാക്ഷി​യോട്‌ അയാളു​ടെ കുടും​ബാം​ഗങ്ങൾ ഇങ്ങനെ പറഞ്ഞി​രു​ന്നു: ‘എറി​ട്രി​യ​ക്കാ​രെ ഒരിക്ക​ലും വിശ്വ​സി​ക്ക​രുത്‌!’ എന്നാൽ ഇപ്പോൾ അദ്ദേഹം എറി​ട്രി​യ​ക്കാ​രായ സഹക്രി​സ്‌ത്യാ​നി​കളെ വിശ്വ​സി​ക്കു​ന്നു എന്നു മാത്രമല്ല, അവരെ സഹോ​ദരാ, സഹോ​ദരീ എന്നു വിളി​ക്കു​ക​യും ചെയ്യുന്നു! എറി​ട്രി​യ​ക്കാർ സാധാ​ര​ണ​ഗ​തി​യിൽ ടിഗ്രി​ന്യ ഭാഷയാണ്‌ സംസാ​രി​ക്കു​ന്ന​തെ​ങ്കി​ലും, അവർ എത്യോ​പ്യൻ സഹോ​ദ​ര​ങ്ങ​ളു​ടെ ഭാഷയായ അംഹാ​രിക്‌ പഠിക്കാൻ തീരു​മാ​നി​ച്ചു. തങ്ങൾക്ക്‌ ഒരുമി​ച്ചു ബൈബിൾ പഠിക്കാൻ കഴിയു​ന്ന​തി​നാ​യി​രു​ന്നു അത്‌. “സമ്പൂർണ്ണ​ത​യു​ടെ ബന്ധമായ” ദൈവിക സ്‌നേ​ഹ​ത്തി​ന്റെ ശക്തിയു​ടെ എത്ര വിസ്‌മ​യ​ക​ര​മായ സാക്ഷ്യം!—കൊ​ലൊ​സ്സ്യർ 3:14.

കഴിഞ്ഞ​കാ​ല​ത്തോ​ടു വിട പറയുന്നു

മനുഷ്യ​ത്വ​ര​ഹി​ത​മായ പെരു​മാ​റ്റ​ത്തിന്‌ ഒരുവൻ വിധേ​യ​നാ​യി​രി​ക്കു​ന്നെ​ങ്കി​ലോ? തന്നെ പീഡി​പ്പി​ച്ച​വ​രോ​ടു ശത്രുത പുലർത്തുക സ്വാഭാ​വി​ക​മല്ലേ? ജർമനി​യിൽ നിന്നുള്ള ഒരു സാക്ഷി​യായ മാൻ​ഫ്രേ​റ്റി​ന്റെ കാര്യം പരിചി​ന്തി​ക്കുക. യഹോ​വ​യു​ടെ സാക്ഷി​ക​ളിൽ ഒരുവ​നാ​ണെന്ന ഒറ്റ കാരണ​ത്താൽ അദ്ദേഹ​ത്തിന്‌ ആറു വർഷം കമ്മ്യൂ​ണിസ്റ്റ്‌ ജയിലിൽ കഴി​യേ​ണ്ടി​വന്നു. എന്നാൽ അദ്ദേഹ​ത്തി​നു തന്റെ ശത്രു​ക്ക​ളോട്‌  എപ്പോ​ഴെ​ങ്കി​ലും വിദ്വേ​ഷം തോന്നു​ക​യോ പ്രതി​കാ​രം ചെയ്യണ​മെന്ന ചിന്ത ഉണ്ടാവു​ക​യോ ചെയ്‌തി​രു​ന്നോ? “ഇല്ല” എന്ന്‌ അദ്ദേഹം പറഞ്ഞു. സാർബ്രൂ​യെക്ക റ്റ്‌​സൈ​റ്റുങ്‌ എന്ന ജർമൻ പത്രം പറയു​ന്ന​ത​നു​സ​രിച്ച്‌, മാൻ​ഫ്രേറ്റ്‌ ഇങ്ങനെ വിശദീ​ക​രി​ച്ചു: “അനീതി പ്രവർത്തി​ക്കു​ക​യോ അനീതി​ക്കു പകരം ചെയ്യു​ക​യോ ആണെങ്കിൽ, . . . പുതിയ ഒരു അനീതി​യി​ലേക്കു നയിക്കുന്ന ഒരു പ്രക്രി​യ​യ്‌ക്കു തുടക്ക​മി​ടു​ക​യാ​യി​രി​ക്കും നാം ചെയ്യുക.” മാൻ​ഫ്രേറ്റ്‌ വ്യക്തമാ​യും ബൈബി​ളി​ലെ പിൻവ​രുന്ന വാക്കുകൾ ബാധക​മാ​ക്കി: “ആർക്കും തിന്മെക്കു പകരം, തിന്മ ചെയ്യാതെ . . . കഴിയു​മെ​ങ്കിൽ നിങ്ങളാൽ ആവോളം സകലമ​നു​ഷ്യ​രോ​ടും സമാധാ​ന​മാ​യി​രി​പ്പിൻ.”—റോമർ 12:17, 18.

വിദ്വേ​ഷ​മി​ല്ലാത്ത ഒരു ലോകം!

ഇക്കാര്യ​ത്തിൽ യഹോ​വ​യു​ടെ സാക്ഷികൾ പൂർണ​രാണ്‌ എന്ന്‌ അവകാ​ശ​പ്പെ​ടു​ന്നില്ല. മുൻകാല ശത്രു​ത​യും വിദ്വേ​ഷ​വും മറിക​ട​ക്കുക എളുപ്പ​മ​ല്ലെന്ന്‌ അവർ പലപ്പോ​ഴും കണ്ടെത്തു​ന്നു. ജീവി​ത​ത്തിൽ ബൈബിൾ തത്ത്വങ്ങൾ ബാധക​മാ​ക്കാൻ തുടർച്ച​യായ കഠിന ശ്രമം ആവശ്യ​മാണ്‌. എന്നാൽ പൊതു​വേ, യഹോ​വ​യു​ടെ സാക്ഷികൾ വിദ്വേ​ഷ​ത്തി​ന്റെ ചങ്ങല പൊട്ടി​ച്ചെ​റി​യാ​നുള്ള ബൈബി​ളി​ന്റെ ശക്തിയു​ടെ ജീവി​ക്കുന്ന ഉദാഹ​ര​ണ​ങ്ങ​ളാണ്‌. ഭവന ബൈബിൾ അധ്യയന ക്രമീ​ക​ര​ണ​ത്തി​ലൂ​ടെ, വർഗീ​യ​വാ​ദ​ത്തി​ന്റെ​യും രൂഢമൂ​ല​മായ മുൻവി​ധി​യു​ടെ​യും ചങ്ങല പൊട്ടി​ച്ചെ​റി​യാൻ അവർ ഓരോ വർഷവും ആയിര​ങ്ങളെ സഹായി​ക്കു​ന്നു. c (“വിദ്വേ​ഷത്തെ തരണം ചെയ്യാൻ ബൈബി​ളി​ന്റെ ബുദ്ധി​യു​പ​ദേശം” എന്ന ചതുരം കാണുക.) വിദ്വേ​ഷ​ത്തെ​യും അതിന്റെ കാരണ​ങ്ങ​ളെ​യും പാടേ തുടച്ചു​മാ​റ്റുന്ന, ഉടൻ നടക്കാൻ പോകുന്ന ആഗോള വിദ്യാ​ഭ്യാ​സ പരിപാ​ടി​യു​ടെ ഒരു ചെറിയ പൂർവ​ദൃ​ശ്യം മാത്ര​മാണ്‌ ആ വിജയം. ദൈവ​ത്തി​ന്റെ രാജ്യ​ത്തി​ന്റെ അഥവാ ആഗോള ഗവൺമെ​ന്റി​ന്റെ കീഴി​ലാ​യി​രി​ക്കും ആ ഭാവി വിദ്യാ​ഭ്യാ​സ പരിപാ​ടി നടക്കുക. മാതൃകാ പ്രാർഥ​ന​യിൽ ആ രാജ്യ​ത്തി​നാ​യി “നിന്റെ രാജ്യം വരേണമേ” എന്നു പ്രാർഥി​ക്കാൻ യേശു നമ്മെ പഠിപ്പി​ച്ചു.—മത്തായി 6:9, 10.

ഈ സ്വർഗീയ ഗവൺമെ​ന്റി​ന്റെ കീഴിൽ ‘ഭൂമി യഹോ​വ​യു​ടെ പരിജ്ഞാ​നം​കൊ​ണ്ടു പൂർണ്ണ​മാ​യി​രി​ക്കും’ എന്നു ബൈബിൾ വാഗ്‌ദാ​നം ചെയ്യുന്നു. (യെശയ്യാ​വു 11:9; 54:13) മിക്ക​പ്പോ​ഴും ഉദ്ധരി​ക്ക​പ്പെ​ടുന്ന യെശയ്യാ പ്രവാ​ച​കന്റെ വാക്കു​കൾക്ക്‌ അപ്പോൾ ഒരു ആഗോള നിവൃത്തി ഉണ്ടാകും: “[ദൈവം] ജാതി​ക​ളു​ടെ ഇടയിൽ ന്യായം വിധി​ക്ക​യും ബഹുവം​ശ​ങ്ങൾക്കു വിധി​ക​ല്‌പി​ക്ക​യും ചെയ്യും; അവർ തങ്ങളുടെ വാളു​കളെ കൊഴു​ക്ക​ളാ​യും കുന്തങ്ങളെ വാക്കത്തി​ക​ളാ​യും അടിച്ചു​തീർക്കും; ജാതി ജാതിക്കു നേരെ വാളോ​ങ്ങു​ക​യില്ല; അവർ ഇനി യുദ്ധം അഭ്യസി​ക്ക​യും ഇല്ല.” (യെശയ്യാ​വു 2:4) അങ്ങനെ ദൈവം​തന്നെ വിദ്വേ​ഷ​ത്തി​ന്റെ ചങ്ങല നിത്യ​മാ​യി പൊട്ടിച്ചെറിയും.(g01 8/8)

[അടിക്കു​റി​പ്പു​കൾ]

[11-ാം പേജിലെ ചതുരം]

വിദ്വേഷത്തെ തരണം ചെയ്യാൻ ബൈബി​ളി​ന്റെ ബുദ്ധി​യു​പ​ദേ​ശം

● “നിങ്ങളിൽ ശണ്‌ഠ​യും കലഹവും എവിടെ നിന്നു? നിങ്ങളു​ടെ അവയവ​ങ്ങ​ളിൽ പോരാ​ടുന്ന ഭോ​ഗേ​ച്ഛ​ക​ളിൽ നിന്നല്ല​യോ?” (യാക്കോബ്‌ 4:1) സ്വാർഥ മോഹങ്ങൾ നിയ​ന്ത്രി​ക്കാൻ പഠിച്ചാൽ, പലപ്പോ​ഴും മറ്റുള്ള​വ​രു​മാ​യുള്ള പ്രശ്‌നങ്ങൾ ഇല്ലാതാ​ക്കാൻ കഴിയും.

● “ഓരോ​രു​ത്തൻ സ്വന്തഗു​ണമല്ല മററു​ള്ള​വന്റെ ഗുണവും കൂടെ നോ​ക്കേണം.” (ഫിലി​പ്പി​യർ 2:4) അനാവശ്യ പ്രശ്‌നങ്ങൾ ഒഴിവാ​ക്കാ​നാ​കുന്ന മറ്റൊരു മാർഗം സ്വന്തം താത്‌പ​ര്യ​ങ്ങ​ളെ​ക്കാൾ മറ്റുള്ള​വ​രു​ടെ താത്‌പ​ര്യ​ങ്ങൾക്കു ശ്രദ്ധ കൊടു​ക്കുക എന്നതാണ്‌.

● “കോപം കളഞ്ഞു ക്രോധം ഉപേക്ഷിക്ക; മുഷി​ഞ്ഞു​പോ​ക​രു​തു; അതു ദോഷ​ത്തി​ന്നു ഹേതു​വാ​കേ​യു​ള്ളു.” (സങ്കീർത്തനം 37:8) നാശക​ര​മായ പ്രവണ​തകൾ നമുക്കു നിയ​ന്ത്രി​ക്കാ​നാ​കും, നാം അങ്ങനെ ചെയ്യേ​ണ്ട​തു​മാണ്‌.

● ‘ഭൂതല​ത്തിൽ എങ്ങും കുടി​യി​രി​പ്പാൻ ദൈവം ഒരുത്ത​നിൽനി​ന്നു മനുഷ്യ​ജാ​തി​യെ ഒക്കെയും ഉളവാക്കി.’ (പ്രവൃ​ത്തി​കൾ 17:24, 26) നാമെ​ല്ലാം ഒരേ മനുഷ്യ കുടും​ബ​ത്തി​ലെ അംഗങ്ങൾ ആയതി​നാൽ നമ്മുടെ വർഗം മറ്റൊരു വർഗ​ത്തെ​ക്കാൾ ശ്രേഷ്‌ഠ​മാ​ണെന്നു വിചാ​രി​ക്കു​ന്ന​തിൽ യാതൊ​രു അർഥവു​മില്ല.

● “ശാഠ്യ​ത്താ​ലോ ദുരഭി​മാ​ന​ത്താ​ലോ ഒന്നും ചെയ്യാതെ താഴ്‌മ​യോ​ടെ ഓരോ​രു​ത്തൻ മററു​ള്ള​വനെ തന്നെക്കാൾ ശ്രേഷ്‌ഠൻ എന്നു എണ്ണി​ക്കൊൾവിൻ.” (ഫിലി​പ്പി​യർ 2:3) മറ്റുള്ള​വരെ അവജ്ഞ​യോ​ടെ വീക്ഷി​ക്കു​ന്നത്‌ തെറ്റാണ്‌—കാരണം മറ്റു വ്യക്തി​കൾക്ക്‌ പലപ്പോ​ഴും നമുക്ക്‌ ഇല്ലാത്ത പ്രാപ്‌തി​ക​ളോ കഴിവു​ക​ളോ ഉണ്ടായി​രി​ക്കും. ഏതെങ്കി​ലും ഒരു വർഗത്തി​ലോ സംസ്‌കാ​ര​ത്തി​ലോ പെട്ടവർക്കു നല്ലതായ സകലത്തി​ന്റെ​യും കുത്തകാ​വ​കാ​ശ​മു​ണ്ടെന്നു വിചാ​രി​ക്ക​രുത്‌.

● ‘അവസരം കിട്ടും​പോ​ലെ എല്ലാവർക്കും നന്മചെയ്‌ക.’ (ഗലാത്യർ 6:10) വർഗമോ സംസ്‌കാ​ര​മോ ഏതെന്നു നോക്കാ​തെ മറ്റുള്ള​വ​രോ​ടു സൗഹൃദം പുലർത്താ​നും അവരെ സഹായി​ക്കാ​നും മുൻകൈ എടുക്കു​ന്നെ​ങ്കിൽ, വലി​യൊ​രു അളവു​വരെ ആശയവി​നി​മയ വിടവ്‌ നികത്താ​നും തെറ്റി​ദ്ധാ​ര​ണകൾ ഇല്ലാതാ​ക്കാ​നും നമുക്കു സാധി​ക്കും.

[8, 9 പേജു​ക​ളി​ലെ ചിത്രങ്ങൾ]

എത്യോ​പ്യ​ക്കാ​രും എറി​ട്രി​യ​ക്കാ​രു​മായ സാക്ഷികൾ ഒത്തൊ​രു​മിച്ച്‌ സമാധാ​ന​ത്തോ​ടെ ആരാധി​ക്കു​ന്നു

[10-ാം പേജിലെ ചിത്രം]

കമ്മ്യൂണിസ്റ്റ്‌ ജയിലി​നെ അതിജീ​വിച്ച മാൻ​ഫ്രേറ്റ്‌ വിദ്വേ​ഷ​ത്തിന്‌ അടിമ​പ്പെ​ടാൻ വിസമ്മ​തി​ച്ചു

[10-ാം പേജിലെ ചിത്രം]

ആളുകളെ ഭിന്നി​പ്പി​ച്ചു നിറു​ത്തുന്ന പ്രതി​ബ​ന്ധങ്ങൾ ഇല്ലാതാ​ക്കാൻ ബൈബി​ളി​നു സഹായി​ക്കാ​നാ​കും