വിയറ്റ്‌നാമിലെ അറിയപ്പെടാത്ത മൃഗങ്ങൾ
വിയറ്റ്‌നാമിലെ അറിയപ്പെടാത്ത മൃഗങ്ങൾ
“നൂറ്റാണ്ടിലെ ഏറ്റവും ആവേശകരമായ മൃഗകണ്ടെത്തലിന്റെ കാലഘട്ടം,” ലണ്ടൻ മൃഗശാലയിലെ സസ്‌തനികളുടെ ചുമതല വഹിക്കുന്ന ഡഗ്ലസ്‌ റിച്ചാർഡ്‌സൺ ഉത്സാഹപൂർവം പറഞ്ഞു. കഴിഞ്ഞ പത്തു-വർഷ കാലയളവിൽ വിയറ്റ്‌നാമിലെ വിദൂര വനങ്ങളിൽ വലിയ ചില മൃഗങ്ങളെ കണ്ടെത്തിയതിനെ കുറിച്ചാണ്‌ അദ്ദേഹം അങ്ങനെ അഭിപ്രായപ്പെട്ടത്‌.
ഘോരയുദ്ധം മൂലം പതിറ്റാണ്ടുകളോളം ഈ വനങ്ങളിൽ ശാസ്‌ത്രജ്ഞർക്കു പ്രവേശിക്കാൻ കഴിഞ്ഞിരുന്നില്ല. എന്നാൽ ഇപ്പോൾ അവിടെ പ്രവർത്തിക്കുന്ന മൃഗഗവേഷകർ മൃഗങ്ങളുടെ ചിത്രങ്ങളെടുക്കാൻ സ്വയംപ്രവർത്തക ക്യാമറകൾ ഉപയോഗിച്ചിരിക്കുന്നു. അങ്ങനെ കണ്ടെത്തിയ മൃഗങ്ങളിലൊന്ന്‌ ജാവൻ കാണ്ടാമൃഗത്തിന്റെ ഒരു ഉപവർഗവും ലോകത്തിൽ ഏറ്റവുമധികം വംശനാശഭീഷണി നേരിടുന്നതുമായ വിയറ്റ്‌നാമിസ്‌ കാണ്ടാമൃഗമാണ്‌.
വിയറ്റ്‌നാമിലെ അറിയപ്പെടാത്ത മൃഗങ്ങളിൽ മറ്റൊന്ന്‌ മാനിനെ പോലെ തോന്നിക്കുന്ന ഒരുതരം കാളയാണ്‌. വൂ ക്വാങ്‌ കാള എന്നാണ്‌ ഇതിന്റെ പേര്‌. വൂ ക്വാങ്‌ പ്രകൃതി സംരക്ഷണ മേഖലയിൽ 1992-ൽ കണ്ടെത്തപ്പെട്ട ഈ ജീവിക്ക്‌ ഏതാണ്ട്‌ 100 കിലോഗ്രാം തൂക്കവും തോൾഭാഗത്ത്‌ ഒരു മീറ്റർ ഉയരവും ഉണ്ട്‌. അത്‌ കാളയോടോ മാനിനോടോ ആടിനോടോ ബന്ധമുള്ള ഒരു ജീവി ആയിരിക്കാം. അതേ സംരക്ഷണ മേഖലയിൽ മൂന്നുതരം മാനുകളെയും കണ്ടെത്തുകയുണ്ടായി—1993-ൽ കണ്ടെത്തിയ വൻ മൺജാക്ക്‌, 1997-ൽ കണ്ടെത്തിയ ട്രൂവോങ്‌ സോൺ മൺജാക്ക്‌, 1998-ൽ കണ്ടെത്തിയ ലീഫ്‌ മൺജാക്ക്‌ എന്നിവ.
ശാസ്‌ത്രജ്ഞർ 1996-ൽ വിയറ്റ്‌നാമിലെ ടൈൻവെൻ പീഠഭൂമിയിൽ മാംസഭുക്കായ ഒരു ചെറിയ നിശാജീവിയെ കണ്ടെത്തി. ടൈൻവെൻ വെരുക്‌ എന്നാണ്‌ ഇതിന്റെ പേര്‌. 3 കിലോയ്‌ക്കും 7.5 കിലോയ്‌ക്കും ഇടയിൽ തൂക്കമുള്ള ഈ ജീവി ഈർപ്പമുള്ള ഉഷ്‌ണമേഖലാ വനത്തിലാണ്‌ വസിക്കുന്നത്‌.
ചെറിയ ജീവികളെ നിരന്തരം കണ്ടെത്തുന്നുണ്ട്‌—ഉദാഹരണത്തിന്‌, ഒരു വർഷം 20-ഓളം വ്യത്യസ്‌ത ഇനം തവളകളെ കണ്ടെത്തിയേക്കാം—എന്നാൽ ഈ വലിയ മൃഗങ്ങളുടെ കണ്ടെത്തൽ അപ്രതീക്ഷിതമായിരുന്നു എന്ന്‌ റിച്ചാർഡ്‌സൺ വിശദീകരിച്ചതായി ലണ്ടനിലെ ദി ഇൻഡിപെൻഡന്റ്‌ പത്രം റിപ്പോർട്ടു ചെയ്യുന്നു.(g01 10/22)
[31-ാം പേജിലെ ചിത്രങ്ങൾ]
ടൈൻവെൻ വെരുക്‌
വൂ ക്വാങ്‌ കാള
ട്രൂവോങ്‌ സോൺ മൺജാക്ക്‌
വിയറ്റ്‌നാമിസ്‌ കാണ്ടാമൃഗം
[കടപ്പാട്‌]
വനം: © Wildside Photography
വിയറ്റ്‌നാമിസ്‌ കാണ്ടാമൃഗം: AP Photo/World Wildlife Fund, Mike Baltzer; മറ്റ്‌ മൂന്നു മൃഗങ്ങൾ: Courtesy EC-SFNC/Acknowledging the European Commission’s support of the photo-trapping program