പുരു​ഷ​ന്മാർ സ്‌ത്രീ​കളെ മർദി​ക്കു​ന്നത്‌ എന്തു​കൊണ്ട്‌?

സ്‌ത്രീ തന്റെ ഇണയാൽ കൊല്ല​പ്പെ​ടാ​നുള്ള സാധ്യത മറ്റ്‌ അക്രമി​ക​ളാൽ കൊല്ല​പ്പെ​ടാ​നുള്ള സാധ്യത ഒരുമിച്ച്‌ എടുത്താ​ലു​ള്ള​തി​നെ​ക്കാൾ കൂടു​ത​ലാണ്‌ എന്നു ചില വിദഗ്‌ധർ പറയുന്നു. ഭാര്യാ​മർദനം എന്ന പ്രശ്‌ന​ത്തി​നു പരിഹാ​രം കാണു​ക​യെന്ന ലക്ഷ്യത്തിൽ നിരവധി പഠനങ്ങൾ നടത്ത​പ്പെ​ട്ടി​ട്ടുണ്ട്‌. ഏതു തരം പുരു​ഷ​നാണ്‌ ഭാര്യയെ മർദി​ക്കു​ന്നത്‌? അയാളു​ടെ ബാല്യം എങ്ങനെ​യു​ള്ളത്‌ ആയിരു​ന്നു? വിവാ​ഹ​ത്തി​നു മുമ്പ്‌, കോർട്ടി​ങ്ങിൽ ഏർപ്പെ​ട്ടി​രുന്ന സമയത്ത്‌ അയാൾ അക്രമ​വാ​സന പ്രകടി​പ്പി​ച്ചി​രു​ന്നോ? അയാൾ ചികി​ത്സ​യോട്‌ എങ്ങനെ​യാ​ണു പ്രതി​ക​രി​ക്കു​ന്നത്‌?

ഭാര്യയെ മർദി​ക്കുന്ന എല്ലാ പുരു​ഷ​ന്മാ​രും ഒരേ തരക്കാർ അല്ല എന്നതാണ്‌ വിദഗ്‌ധർ മനസ്സി​ലാ​ക്കി​യി​രി​ക്കുന്ന ഒരു സംഗതി. വല്ലപ്പോ​ഴും മാത്രം ഭാര്യയെ ഉപദ്ര​വി​ക്കു​ന്നവർ മുതൽ സ്ഥിരമാ​യി ഭാര്യയെ മർദി​ക്കു​ന്നവർ വരെയുണ്ട്‌. ആദ്യ വിഭാ​ഗ​ത്തിൽ പെടുന്ന വ്യക്തി ആയുധം ഉപയോ​ഗി​ക്കു​ന്നില്ല, അയാൾ മുമ്പ്‌ ഭാര്യയെ ഉപദ്ര​വി​ച്ചി​രു​ന്ന​വ​നു​മല്ല. നടന്ന അക്രമ സംഭവം അയാളു​ടെ സാധാരണ പ്രകൃ​ത​ത്തി​നു വിപരീ​ത​മായ ഒന്നായി​രു​ന്നു. ബാഹ്യ ഘടകങ്ങൾ ആയിരി​ക്കാം അയാളെ അതിനു പ്രേരി​പ്പി​ച്ചത്‌. എന്നാൽ രണ്ടാമത്തെ വിഭാ​ഗ​ത്തിൽ പെടുന്ന വ്യക്തിയെ സംബന്ധി​ച്ചി​ട​ത്തോ​ളം ഇണയെ മർദി​ക്കു​ന്നത്‌ ഒരു നിത്യ സംഭവ​മാണ്‌. പശ്ചാത്താ​പ​ത്തി​ന്റെ ലക്ഷണങ്ങ​ളൊ​ന്നും അയാൾ പ്രകട​മാ​ക്കു​ന്ന​തു​മില്ല.

എന്നിരു​ന്നാ​ലും, വ്യത്യസ്‌ത രീതി​ക​ളി​ലാണ്‌ പുരു​ഷ​ന്മാർ ഭാര്യയെ മർദി​ക്കു​ന്നത്‌ എന്നതി​നാൽ മർദന​ത്തി​ന്റെ ചില രൂപങ്ങൾ മറ്റുള്ള​വയെ അപേക്ഷിച്ച്‌ ഗൗരവം കുറഞ്ഞ​താ​ണെന്നു വരുന്നില്ല. വാസ്‌ത​വ​ത്തിൽ, ഏതു തരത്തി​ലുള്ള ശാരീ​രിക ഉപദ്ര​വ​വും പരിക്കി​ലോ മരണത്തിൽ പോലു​മോ കലാശി​ച്ചേ​ക്കാം. അതിനാൽ, ഒരു വ്യക്തി മറ്റൊ​രാ​ളു​ടെ അത്രയും കൂടെ​ക്കൂ​ടെ അല്ലെങ്കിൽ അത്രയും കടുത്ത രീതി​യി​ലുള്ള അക്രമം നടത്തു​ന്നില്ല എന്നത്‌ അയാളു​ടെ പ്രവൃ​ത്തി​യെ യാതൊ​രു വിധത്തി​ലും ന്യായീ​ക​രി​ക്കു​ന്നില്ല. “സ്വീകാ​ര്യ​മായ” മർദനം എന്ന ഒന്നില്ല. എന്നാൽ ശേഷിച്ച കാലം മുഴുവൻ താൻ പരിപാ​ലി​ക്കു​മെന്ന്‌ പ്രതിജ്ഞ ചെയ്‌ത ഒരു സ്‌ത്രീ​യെ ശാരീ​രി​ക​മാ​യി ഉപദ്ര​വി​ക്കാൻ ഒരു പുരു​ഷനെ പ്രേരി​പ്പി​ക്കുന്ന ഘടകങ്ങൾ എന്തൊ​ക്കെ​യാ​യി​രി​ക്കും?

കുടുംബ സ്വാധീ​നം

ഇണയെ ശാരീ​രി​ക​മാ​യി ഉപദ്ര​വി​ക്കുന്ന പുരു​ഷ​ന്മാ​രിൽ വലി​യൊ​രു പങ്കും തങ്ങളുടെ കുടും​ബ​ങ്ങ​ളിൽ അത്തരം ഉപദ്രവം നടക്കു​ന്നതു കണ്ടു വളർന്ന​വ​രാണ്‌ എന്നുള്ള​തിൽ യാതൊ​രു അതിശ​യ​വു​മില്ല. കുടും​ബ​ത്തിൽ നടക്കുന്ന മർദനത്തെ കുറിച്ചു ഗവേഷണം ചെയ്യു​ന്ന​തി​നു രണ്ടില​ധി​കം ദശാബ്ദ​ക്കാ​ലം ചെലവ​ഴിച്ച മൈക്കൾ ഗ്രൂച്ച്‌ എഴുതു​ന്നു: “ഇണയെ ഉപദ്ര​വി​ക്കുന്ന സ്വഭാ​വ​ക്കാ​രിൽ മിക്കവ​രും വളർന്നു വന്നത്‌ ‘യുദ്ധഭൂ​മി’കളോടു സദൃശ​മായ ഭവനങ്ങ​ളി​ലാണ്‌. വൈകാ​രി​ക​വും ശാരീ​രി​ക​വു​മായ അക്രമത്തെ ‘സാധാ​രണം’ ആയി വീക്ഷി​ച്ചി​രുന്ന ശത്രുത നിറഞ്ഞ ചുറ്റു​പാ​ടു​ക​ളി​ലാണ്‌ അവർ ശൈശ​വ​വും കുട്ടി​ക്കാ​ല​വും ചെലവ​ഴി​ച്ചത്‌.” ഒരു വിദഗ്‌ധ പറയു​ന്നത്‌ അനുസ​രിച്ച്‌ അത്തര​മൊ​രു ചുറ്റു​പാ​ടിൽ വളർന്നു​വ​രുന്ന ഒരു ആൺകുട്ടി “വളരെ ചെറു​പ്രാ​യ​ത്തിൽത്തന്നെ സ്‌ത്രീ​ക​ളോ​ടുള്ള  തന്റെ പിതാ​വി​ന്റെ അവജ്ഞ അതേപടി ഒപ്പി​യെ​ടു​ക്കു​ന്നു. പുരുഷൻ എപ്പോ​ഴും സ്‌ത്രീ​യെ തന്റെ ചൊൽപ്പ​ടി​യിൽ നിറു​ത്ത​ണ​മെ​ന്നും അതിനുള്ള മാർഗം അവളെ ഭയപ്പെ​ടു​ത്തു​ക​യും ഉപദ്ര​വി​ക്കു​ക​യും തരംതാ​ഴ്‌ത്തു​ക​യും ചെയ്യു​ക​യാ​ണെ​ന്നും കുട്ടി പഠിക്കു​ന്നു. അതു​പോ​ലെ പിതാ​വി​ന്റെ അംഗീ​കാ​രം ലഭിക്കാ​നുള്ള ഏറ്റവും നല്ല വിധം അദ്ദേഹ​ത്തെ​പ്പോ​ലെ​തന്നെ പെരു​മാ​റു​ക​യാണ്‌ എന്നും അവൻ മനസ്സി​ലാ​ക്കു​ന്നു.”

മാതാ​പി​താ​ക്ക​ളു​ടെ നടത്തയ്‌ക്കു കുട്ടി​ക​ളു​ടെ​മേ​ലുള്ള സ്വാധീ​നം വളരെ വലുതാ​ണെന്നു ബൈബിൾ വ്യക്തമാ​ക്കു​ന്നു. അതിന്‌ കുട്ടിയെ നല്ല രീതി​യി​ലോ മോശ​മായ രീതി​യി​ലോ സ്വാധീ​നി​ക്കാ​നാ​കും. (സദൃശ​വാ​ക്യ​ങ്ങൾ 22:6; കൊ​ലൊ​സ്സ്യർ 3:21) തീർച്ച​യാ​യും, കുടുംബ പശ്ചാത്തലം ഒരിക്ക​ലും അത്തരം ഉപദ്ര​വ​ത്തിന്‌ ന്യായീ​ക​രണം ആകുന്നില്ല. എന്നിരു​ന്നാ​ലും അക്രമ പ്രവണ​ത​യു​ടെ വിത്തുകൾ വിതയ്‌ക്ക​പ്പെ​ട്ടത്‌ എവി​ടെ​യാ​ണെന്നു മനസ്സി​ലാ​ക്കു​ന്ന​തിന്‌ അത്‌ ഒരുപക്ഷേ സഹായി​ച്ചേ​ക്കാം.

സാംസ്‌കാ​രിക സ്വാധീ​നം

ചില രാജ്യ​ങ്ങ​ളിൽ സ്‌ത്രീ​കളെ തല്ലുന്നത്‌ സ്വീകാ​ര്യ​മായ, സാധാ​രണം പോലു​മായ ഒരു സംഗതി​യാ​യി കണക്കാ​ക്കു​ന്നു. “സ്വന്തം ഭാര്യയെ തല്ലാനോ ദേഹോ​പ​ദ്ര​വ​ത്തി​ലൂ​ടെ ഭയപ്പെ​ടു​ത്താ​നോ ഉള്ള അവകാശം ഭർത്താ​വിന്‌ ഉണ്ടെന്ന്‌ പല സമൂഹ​ങ്ങ​ളും അടിയു​റച്ചു വിശ്വ​സി​ക്കു​ന്നു” എന്ന്‌ ഐക്യ​രാ​ഷ്‌ട്ര​ങ്ങ​ളു​ടെ ഒരു റിപ്പോർട്ടു പറയുന്നു.

ഇത്തരം ഉപദ്രവം സ്വീകാ​ര്യ​മാ​യി കണക്കാ​ക്കാത്ത രാജ്യ​ങ്ങ​ളിൽപ്പോ​ലും അക്രമാ​സ​ക്ത​മായ രീതികൾ അവലം​ബി​ക്കുന്ന വ്യക്തികൾ കുറവല്ല. ഈ വിഷയത്തെ സംബന്ധിച്ച ചില പുരു​ഷ​ന്മാ​രു​ടെ യുക്തി​ഹീ​ന​മായ ചിന്താ​രീ​തി ഞെട്ടി​ക്കു​ന്ന​താണ്‌. ദക്ഷിണാ​ഫ്രി​ക്ക​യി​ലെ വീക്ക്‌ലി മെയ്‌ൽ ആൻഡ്‌ ഗാർഡി​യൻ പറയു​ന്ന​ത​നു​സ​രിച്ച്‌ കേപ്‌ ഉപദ്വീ​പിൽ നടത്തിയ ഒരു പഠനം തങ്ങൾ ഭാര്യ​മാ​രെ ഉപദ്ര​വി​ക്കാ​റില്ല എന്നു പറഞ്ഞ പുരു​ഷ​ന്മാ​രിൽ ഭൂരി​പ​ക്ഷ​വും സ്‌ത്രീ​യെ തല്ലുന്ന​തിൽ കുഴപ്പ​മി​ല്ലെ​ന്നും അതിനെ അക്രമ​ത്തി​ന്റെ ഗണത്തിൽ പെടു​ത്താ​നാ​വി​ല്ലെ​ന്നും വിശ്വ​സി​ച്ച​താ​യി കണ്ടെത്തി.

തെളി​വ​നു​സ​രിച്ച്‌ അത്തരം വികല​മായ ഒരു വീക്ഷണം രൂപം​കൊ​ള്ളു​ന്നത്‌ പലപ്പോ​ഴും കുട്ടി​ക്കാ​ല​ത്താണ്‌. ഉദാഹ​ര​ണ​ത്തിന്‌, 11-ഉം 12-ഉം വയസ്സുള്ള ആൺകു​ട്ടി​ക​ളിൽ 75 ശതമാ​ന​വും, പ്രകോ​പി​പ്പി​ക്ക​പ്പെ​ട്ടാൽ പുരുഷൻ സ്‌ത്രീ​യെ അടിക്കു​ന്ന​തിൽ തെറ്റില്ല എന്നു കരുതു​ന്ന​താ​യി ബ്രിട്ട​നിൽ നടത്തിയ ഒരു പഠനം കാണിച്ചു.

 മർദന​ത്തിന്‌ ഒരു ന്യായീ​ക​ര​ണ​വു​മില്ല

മുകളിൽ പരാമർശിച്ച ഘടകങ്ങൾ ഭാര്യാ​മർദ​ന​ത്തി​ന്റെ കാരണങ്ങൾ മനസ്സി​ലാ​ക്കാൻ സഹായി​ച്ചേ​ക്കാം. എന്നാൽ അവ ഒരിക്ക​ലും അതിനെ ന്യായീ​ക​രി​ക്കു​ന്നില്ല. വ്യക്തമാ​യി പറഞ്ഞാൽ, ഒരുവന്റെ ഇണയെ ഉപദ്ര​വി​ക്കു​ന്നത്‌ ദൈവ​ദൃ​ഷ്ടി​യിൽ കൊടിയ പാപമാണ്‌. അവന്റെ വചനമായ ബൈബി​ളിൽ നാം ഇപ്രകാ​രം വായി​ക്കു​ന്നു: “ഭർത്താ​ക്ക​ന്മാ​രും തങ്ങളുടെ ഭാര്യ​മാ​രെ സ്വന്ത ശരീര​ങ്ങ​ളെ​പ്പോ​ലെ സ്‌നേ​ഹി​ക്കേ​ണ്ട​താ​കു​ന്നു. ഭാര്യയെ സ്‌നേ​ഹി​ക്കു​ന്നവൻ തന്നെത്താൻ സ്‌നേ​ഹി​ക്കു​ന്നു. ആരും തന്റെ ജഡത്തെ ഒരുനാ​ളും പകെച്ചി​ട്ടി​ല്ല​ല്ലോ; ക്രിസ്‌തു​വും സഭയെ ചെയ്യു​ന്ന​തു​പോ​ലെ അതിനെ പോററി പുലർത്തു​ക​യ​ത്രേ ചെയ്യു​ന്നതു.”—എഫെസ്യർ 5:28, 29.

ഈ വ്യവസ്ഥി​തി​യു​ടെ “അന്ത്യകാ​ലത്തു” അനേകർ “വാത്സല്യ​മി​ല്ലാ​ത്ത​വ​രും,” “ഉഗ്രന്മാ​രും,” “ദ്രോ​ഹി​ക​ളും” ആയിരി​ക്കു​മെന്ന്‌ ബൈബിൾ വളരെ​ക്കാ​ലം മുമ്പു​തന്നെ മുൻകൂ​ട്ടി പറഞ്ഞി​രു​ന്നു. (2 തിമൊ​ഥെ​യൊസ്‌ 3:1-4) വ്യാപ​ക​മായ അളവിൽ ഭവനങ്ങ​ളിൽ അരങ്ങേ​റുന്ന ദ്രോഹം അഥവാ മർദനം, നാം ഈ പ്രവച​ന​ത്തിൽ പരാമർശി​ച്ചി​രി​ക്കുന്ന കാലഘ​ട്ട​ത്തി​ലാ​ണു ജീവി​ക്കു​ന്നത്‌ എന്നുള്ള​തി​നു തെളിവു നൽകുന്നു. എന്നാൽ ശാരീ​രിക പീഡന​ത്തിന്‌ ഇരയാ​കു​ന്ന​വരെ സഹായി​ക്കാൻ എന്തു ചെയ്യാൻ കഴിയും? ഭാര്യ​മാ​രെ ഉപദ്ര​വി​ക്കു​ന്ന​വർക്ക്‌ തങ്ങളുടെ പെരു​മാറ്റ രീതി​യിൽ മാറ്റം വരുത്താൻ കഴിയും എന്നതിന്‌ എന്തെങ്കി​ലും പ്രതീക്ഷയുണ്ടോ?(g01 11/8)

[5-ാം പേജിലെ ആകർഷ​ക​വാ​ക്യം]

“ഭാര്യാ​മർദനം ഒരു അപരി​ചി​തനെ കയ്യേറ്റം ചെയ്യു​ന്ന​തി​നോ​ളം​തന്നെ ഗൗരവ​മുള്ള കുറ്റമാണ്‌.”—പുരു​ഷ​ന്മാർ സ്‌ത്രീ​കളെ മർദി​ക്കു​മ്പോൾ

[6-ാം പേജിലെ ചതുരം]

വീട്ടിനുള്ളിലെ അക്രമം—ഒരു ആഗോള പ്രശ്‌നം

സ്‌ത്രീ​കളെ ഉപദ്ര​വി​ക്കാൻ ചായ്‌വുള്ള ദുരഭി​മാ​നി​ക​ളായ പുരു​ഷ​ന്മാർ ഒരു ലോക​വ്യാ​പക പ്രശ്‌ന​മാ​ണെന്നു തെളി​യി​ക്കുന്ന ചില റിപ്പോർട്ടു​കൾ താഴെ കൊടു​ക്കു​ന്നു.

ഈജി​പ്‌ത്‌: അലക്‌സാൻഡ്രി​യ​യിൽ നടന്ന മൂന്നു മാസത്തെ ഒരു പഠനം സ്‌ത്രീ​കൾക്ക്‌ ഏൽക്കുന്ന പരിക്കു​ക​ളു​ടെ മുഖ്യ കാരണം വീട്ടി​നു​ള്ളി​ലെ അക്രമം ആണെന്നു കാണിച്ചു. പ്രാ​ദേ​ശിക ചികി​ത്സാ​ല​യങ്ങൾ സന്ദർശി​ക്കുന്ന സ്‌ത്രീ​ക​ളിൽ 27.9 ശതമാ​ന​ത്തിന്‌ അങ്ങനെ ചെയ്യേണ്ടി വരുന്ന​തി​ന്റെ കാരണ​വും അതുതന്നെ.—വനിത​കളെ കുറി​ച്ചുള്ള നാലാം ലോക സമ്മേളനം, സംഗ്രഹം 5.

തായ്‌ലൻഡ്‌: ബാങ്കോ​ക്കി​ന്റെ പ്രാന്ത​പ്ര​ദേ​ശ​ങ്ങ​ളി​ലെ ഏറ്റവും ജനപ്പാർപ്പുള്ള മേഖല​യിൽ, വിവാ​ഹി​ത​രായ സ്‌ത്രീ​ക​ളിൽ 50 ശതമാ​ന​വും സ്ഥിരമാ​യി പ്രഹരി​ക്ക​പ്പെ​ടു​ന്ന​വ​രാണ്‌.—സ്‌ത്രീ ക്ഷേമത്തി​നാ​യുള്ള പസഫിക്‌ ഇൻസ്റ്റി​റ്റ്യൂട്ട്‌.

ഹോ​ങ്കോംഗ്‌: “ഇണ തന്നെ ശാരീ​രി​ക​മാ​യി ഉപദ്ര​വി​ച്ചു​വെന്നു പറയുന്ന സ്‌ത്രീ​ക​ളു​ടെ എണ്ണത്തിൽ കഴിഞ്ഞ വർഷം 40 ശതമാ​ന​ത്തി​ല​ധി​കം വർധനവ്‌ ഉണ്ടായി.”—സൗത്ത്‌ ചൈന മോർണിങ്‌ പോസ്റ്റ്‌, ജൂലൈ 21, 2000.

ജപ്പാൻ: അഗതി​മ​ന്ദി​ര​ങ്ങ​ളിൽ അഭയം തേടുന്ന സ്‌ത്രീ​ക​ളു​ടെ എണ്ണം 1995-ൽ 4,843 ആയിരു​ന്നത്‌ 1998-ൽ 6,340 ആയി ഉയർന്നു. “അവരിൽ ഏതാണ്ട്‌ മൂന്നി​ലൊ​ന്നു പേർ ഭർത്താ​വി​ന്റെ അക്രമാ​സ​ക്ത​മായ പെരു​മാ​റ്റ​ത്തിൽനി​ന്നു രക്ഷപ്പെ​ടു​ന്ന​തി​നാണ്‌ തങ്ങൾ അഭയം തേടി​യ​തെന്നു പറഞ്ഞു.”—ദ ജപ്പാൻ ടൈംസ്‌, സെപ്‌റ്റം​ബർ 10, 2000.

ബ്രിട്ടൻ: “ഓരോ ആറു സെക്കൻഡി​ലും ബ്രിട്ട​നി​ലെ ഏതെങ്കി​ലു​മൊ​രു ഭവനത്തിൽ ഒരു ബലാത്സം​ഗ​മോ ദേഹോ​പ​ദ്ര​വ​മോ കത്തിക്കു​ത്തോ നടക്കുന്നു.” സ്‌കോ​ട്ട്‌ലൻഡ്‌യാർഡി​ന്റെ ഒരു റിപ്പോർട്ട്‌ അനുസ​രിച്ച്‌ “ഓരോ ദിവസ​വും, വീടു​ക​ളിൽ അക്രമ​ത്തിന്‌ ഇരയാ​കുന്ന 1,300 പേരിൽനി​ന്നുള്ള ഫോൺകോ​ളു​കൾ പോലീ​സി​നു ലഭിക്കു​ന്നു—ഒരു വർഷം 5,70,000-ത്തിലും അധികം. അവരിൽ എൺപ​ത്തൊന്ന്‌ ശതമാ​ന​വും പുരു​ഷ​ന്മാ​രാൽ ആക്രമി​ക്ക​പ്പെ​ടുന്ന സ്‌ത്രീ​ക​ളാണ്‌.”—ദ ടൈംസ്‌, ഒക്‌ടോ​ബർ 25, 2000.

പെറു: പോലീ​സിൽ റിപ്പോർട്ടു ചെയ്യ​പ്പെ​ടുന്ന കുറ്റകൃ​ത്യ​ങ്ങ​ളിൽ എഴുപതു ശതമാ​ന​വും ഭാര്യാ​മർദനം ഉൾപ്പെ​ടുന്ന കേസു​ക​ളാണ്‌.—സ്‌ത്രീ ക്ഷേമത്തി​നാ​യുള്ള പസഫിക്‌ ഇൻസ്റ്റി​റ്റ്യൂട്ട്‌.

റഷ്യ: “ഒരു വർഷം 14,500 റഷ്യൻ സ്‌ത്രീ​കൾ തങ്ങളുടെ ഭർത്താ​ക്ക​ന്മാ​രാൽ കൊല്ല​പ്പെട്ടു. വേറെ 56,400 പേർക്ക്‌ വീട്ടി​നു​ള്ളി​ലെ അക്രമ​ത്തി​ന്റെ ഫലമായി വൈക​ല്യം സംഭവി​ക്കു​ക​യോ സാരമാ​യി പരി​ക്കേൽക്കു​ക​യോ ചെയ്‌തു.”—ദ ഗാർഡി​യൻ.

ചൈന: “ഇത്‌ ഒരു പുതിയ പ്രശ്‌ന​മാണ്‌. വളരെ വേഗം പടർന്നു​പി​ടി​ച്ചു​കൊ​ണ്ടി​രി​ക്കുന്ന ഒന്നാണ്‌ ഇത്‌, പ്രത്യേ​കി​ച്ചും നഗര പ്രദേ​ശ​ങ്ങ​ളിൽ” എന്ന്‌ ജിങ്‌ലൂൻ കുടുംബ കേന്ദ്ര​ത്തി​ന്റെ ഡയറക്ടർ ചെൻ യിയൂൻ പറയുന്നു. “വീടു​ക​ളിൽ നടക്കുന്ന അക്രമത്തെ തടയാൻ അയൽക്കാ​രു​ടെ ഇടപെ​ട​ലു​കൾക്ക്‌ ഇപ്പോൾ കഴിയു​ന്നില്ല.”—ദ ഗാർഡി​യൻ.

നിക്കരാ​ഗ്വ: “നിക്കരാ​ഗ്വ​യിൽ സ്‌ത്രീ​കൾക്കു നേരെ​യുള്ള അക്രമങ്ങൾ കുതി​ച്ചു​യ​രു​ക​യാണ്‌. ഒരു സർവേ അനുസ​രിച്ച്‌ കഴിഞ്ഞ വർഷം മാത്രം നിക്കരാ​ഗ്വ​യി​ലെ സ്‌ത്രീ​ക​ളിൽ 52 ശതമാനം തങ്ങളുടെ പങ്കാളി​ക​ളിൽനി​ന്നുള്ള ഏതെങ്കി​ലും തരത്തി​ലുള്ള ഉപദ്ര​വ​ത്തിന്‌ ഇരകളാ​യി​ട്ടുണ്ട്‌.”—ബിബിസി വാർത്ത.

[7-ാം പേജിലെ ചതുരം]

അപകട സൂചനകൾ

യു.എസ്‌.എ.-യിലെ റോഡ്‌ ഐലന്റ്‌ സർവക​ലാ​ശാ​ല​യിൽനി​ന്നുള്ള റിച്ചർഡ്‌ ജെ. ജെൽസി​ന്റെ നേതൃ​ത്വ​ത്തിൽ നടന്ന ഒരു പഠനം ഭവനത്തിൽ ശാരീ​രി​ക​മോ വൈകാ​രി​ക​മോ ആയ പീഡനം ഉണ്ടാ​യേ​ക്കാം എന്നതിന്റെ സൂചന​ക​ളാ​യി പിൻവ​രുന്ന ഘടകങ്ങളെ ചൂണ്ടി​ക്കാ​ണി​ക്കു​ന്നു:

1.പുരുഷൻ മുമ്പും വീട്ടി​നു​ള്ളി​ലെ അക്രമ​ത്തിൽ ഏർപ്പെ​ട്ടി​ട്ടുണ്ട്‌.

2.അയാൾ തൊഴിൽര​ഹി​ത​നാണ്‌.

3.വർഷത്തിൽ ഒരിക്ക​ലെ​ങ്കി​ലും അയാൾ നിയമ​വി​രുദ്ധ മയക്കു​മ​രുന്ന്‌ ഉപയോ​ഗി​ക്കു​ന്നു.

4.സ്വന്തം വീട്ടിൽ അച്ഛൻ അമ്മയെ തല്ലുന്നത്‌ അയാൾ കണ്ടിരു​ന്നു.

5.സ്‌ത്രീ​യും പുരു​ഷ​നും വിവാ​ഹി​ത​രാ​കാ​തെ ഒരുമി​ച്ചു ജീവി​ക്കു​ന്ന​വ​രാണ്‌.

6.തൊഴിൽ ഉണ്ടെങ്കി​ലും വളരെ തുച്ഛമായ ശമ്പളമാണ്‌ ലഭിക്കു​ന്നത്‌.

7.അയാൾ ഹൈസ്‌കൂൾ പാസാ​യി​ട്ടില്ല.

8.18-നും 30-നും ഇടയ്‌ക്കാണ്‌ അയാളു​ടെ പ്രായം.

9.വീട്ടിൽ മാതാ​പി​താ​ക്ക​ളിൽ ആരെങ്കി​ലും അല്ലെങ്കി​ലും ഇരുവ​രും കുട്ടി​കളെ ശാരീ​രി​ക​മാ​യി ഉപദ്ര​വി​ക്കാ​റുണ്ട്‌.

10.വരുമാ​നം ദാരി​ദ്ര്യ​രേ​ഖ​യ്‌ക്കു താഴെ​യാണ്‌.

11.പുരു​ഷ​നും സ്‌ത്രീ​യും വ്യത്യസ്‌ത സാംസ്‌കാ​രിക പശ്ചാത്ത​ല​ങ്ങ​ളിൽനി​ന്നു​ള്ള​വ​രാണ്‌.

[7-ാം പേജിലെ ചിത്രം]

കുടുംബത്തിനുള്ളിലെ അക്രമ​ത്തിന്‌ കുട്ടി​കളെ സാരമാ​യി ബാധി​ക്കാൻ കഴിയും