അതിർത്തി രേഖ കടക്കൽ

പോയ​കാ​ലത്ത്‌ വീണ്ടും ജീവി​ക്കുക അല്ലെങ്കിൽ ഭാവി​കാ​ലം മുൻകൂ​ട്ടി കാണാൻ കഴിയുക എന്നത്‌ മനുഷ്യ​ന്റെ ദീർഘ​നാ​ളാ​യുള്ള മോഹ​മാണ്‌. അതു​കൊണ്ട്‌, ആളുകൾ ദിവസ​വും ഒരർഥ​ത്തിൽ ഇതു ചെയ്യു​ന്നുണ്ട്‌ എന്നു പറഞ്ഞാൽ നിങ്ങൾക്ക്‌ അത്ഭുതം തോന്നു​മോ? ഒരു യോഗ​ത്തിൽ പങ്കെടു​ക്കാൻ ടോക്കി​യോ​യിൽ നിന്ന്‌ ന്യൂ​യോർക്കി​ലേക്കു പറക്കുന്ന ഒരു ബിസി​ന​സ്സു​കാ​രന്റെ കാര്യ​മെ​ടു​ക്കാം. അദ്ദേഹ​ത്തി​ന്റെ വിമാനം ഉച്ചയ്‌ക്കാണ്‌ പുറ​പ്പെ​ടു​ന്ന​തെ​ങ്കിൽ, ലോക​ത്തി​ന്റെ പകുതി​യോ​ളം നിറു​ത്താ​തെ പറന്ന​ശേഷം അത്‌ അന്നു രാവിലെ—പ്രത്യ​ക്ഷ​ത്തിൽ, അദ്ദേഹം പുറപ്പെട്ട സമയ​ത്തെ​ക്കാൾ നേരത്തേ—ലക്ഷ്യസ്ഥാ​നത്ത്‌ എത്തി​ച്ചേ​രും.

ഒരു ദീർഘ​യാ​ത്ര നടത്തി​യ​ശേഷം യാത്ര പുറപ്പെട്ട സമയത്തി​നു മുമ്പ്‌ ലക്ഷ്യസ്ഥാ​നത്ത്‌ എത്തി​ച്ചേ​രുക എന്നതു സാധ്യ​മാ​ണോ? തീർച്ച​യാ​യും അല്ല. എന്നാൽ വിദൂര നഗരങ്ങൾ വ്യത്യസ്‌ത സമയ മേഖല​ക​ളി​ലാ​ണു സ്ഥിതി ചെയ്യു​ന്നത്‌. ഭൂഗോ​ള​ത്തി​ലെ ഒരു അദൃശ്യ​രേ​ഖ​യായ അന്തർദേ​ശീയ ദിനാ​ങ്ക​രേഖ മുറി​ച്ചു​ക​ട​ക്കു​മ്പോൾ അതിന്റെ അർഥം, കലണ്ടർ തീയതി​ക​ളിൽ മാറ്റം വരുത്തുന്ന ഒരു അംഗീ​കൃത അതിർത്തി മുറി​ച്ചു​ക​ട​ക്കു​ന്നു എന്നാണ്‌. ശരിക്കും കുഴപ്പി​ക്കുന്ന ഒരു സംഗതി​തന്നെ! ഏതു ദിശയിൽ യാത്ര ചെയ്യുന്നു എന്നതിന്റെ അടിസ്ഥാ​ന​ത്തിൽ നൊടി​യി​ട​കൊണ്ട്‌ നിങ്ങൾക്ക്‌ ഒരു ദിവസം ലാഭമോ നഷ്ടമോ ഉണ്ടാകും.

മുമ്പു പറഞ്ഞ ബിസി​ന​സ്സു​കാ​രൻ ചൊവ്വാഴ്‌ച വൈകി​യാണ്‌ ന്യൂ​യോർക്കിൽനി​ന്നു തിരി​ക്കു​ന്നത്‌ എന്നു വിചാ​രി​ക്കുക. ഏതാണ്ട്‌ 14 മണിക്കൂർ യാത്ര ചെയ്‌ത ശേഷം അദ്ദേഹം ജപ്പാനിൽ വന്നിറ​ങ്ങു​മ്പോൾ അവിടെ വ്യാഴാ​ഴ്‌ച​യാ​യി​ക്ക​ഴി​ഞ്ഞി​രി​ക്കും. എത്ര വിചി​ത്രം! ഒരു മുഴു ദിവസം​തന്നെ അദ്ദേഹ​ത്തി​നു നഷ്ടമാ​യി​രി​ക്കു​ന്നു! അന്തർദേ​ശീയ ദിനാ​ങ്ക​രേഖ മുറിച്ചു കടന്ന തന്റെ ആദ്യ യാത്രയെ കുറിച്ച്‌ പരിച​യ​സ​മ്പ​ന്ന​യായ ഒരു യാത്ര​ക്കാ​രി ഇങ്ങനെ പറഞ്ഞു: “ആ ദിവസം നഷ്ടമാ​യത്‌ എങ്ങനെ​യാണ്‌ എന്ന്‌ എനിക്ക്‌ ഒരു പിടി​യും കിട്ടി​യില്ല. അത്‌ എന്നെ ശരിക്കും കുഴപ്പി​ച്ചു.”

ദിനാ​ങ്ക​രേഖ യാത്ര​ക്കാ​രെ ഇങ്ങനെ ആശയക്കു​ഴ​പ്പ​ത്തി​ലാ​ക്കു​ന്ന​തു​കൊണ്ട്‌, ഇങ്ങനെ​യൊ​രു അതിർവ​ര​മ്പി​ന്റെ ആവശ്യം എന്താണ്‌ എന്നു ചിലർ ചിന്തി​ച്ചേ​ക്കാം.

സമു​ദ്ര​യാ​ത്രി​ക​രു​ടെ കണ്ടെത്തൽ

ഒരു ദിനാ​ങ്ക​രേ​ഖ​യു​ടെ ആവശ്യം എന്തായി​രു​ന്നു​വെന്ന്‌ 1522 എന്ന വർഷത്തി​ലേക്കു പിന്തി​രി​ഞ്ഞു നോക്കി​യാൽ വ്യക്തമാ​കും. ഫെർഡി​നാൻഡ്‌ മഗല്ല​നോ​ടൊ​പ്പം യാത്ര​തി​രിച്ച സമു​ദ്ര​യാ​ത്രി​കർ ഭൂമിക്കു ചുറ്റു​മുള്ള ആദ്യത്തെ കപ്പൽ യാത്ര പൂർത്തി​യാ​ക്കിയ വർഷമാണ്‌ അത്‌. മൂന്നു വർഷം കടലി​ലൂ​ടെ യാത്ര ചെയ്‌ത​ശേഷം സെപ്‌റ്റം​ബർ 7-ാം തീയതി ഞായറാഴ്‌ച അവർ സ്‌പെ​യി​നിൽ എത്തി​ച്ചേർന്നു. എന്നാൽ അവർ കപ്പലിൽ സൂക്ഷിച്ച രേഖ പ്രകാരം അന്ന്‌ സെപ്‌റ്റം​ബർ 6-ാം തീയതി ശനിയാഴ്‌ച ആയിരു​ന്നു. ഈ വ്യത്യാ​സ​ത്തി​നു കാരണം? ഭൂമിക്കു ചുറ്റും സൂര്യന്റെ അതേ ദിശയിൽ യാത്ര ചെയ്‌തി​രു​ന്ന​തി​നാൽ സ്‌പെ​യി​നി​ലെ ആളുകളെ അപേക്ഷിച്ച്‌ അവർ ഒരു സൂര്യോ​ദയം കുറവാണ്‌ കണ്ടത്‌.

ഗ്രന്ഥകാ​ര​നാ​യ ജൂൽസ്‌ വേൺ എൺപതു ദിവസം​കൊണ്ട്‌ ലോക​ത്തി​നു ചുറ്റും എന്ന തന്റെ ഇംഗ്ലീഷ്‌ നോവ​ലിൽ ഇതിനു നേർവി​പ​രീ​ത​മായ പ്രതി​ഭാ​സത്തെ കുറിച്ചു  പ്രതി​പാ​ദി​ച്ചു. ഒരു വലിയ തുക സമ്മാന​മാ​യി നേടാൻ പുസ്‌ത​ക​ത്തി​ലെ പ്രധാന കഥാപാ​ത്രം 80 ദിവസം​കൊണ്ട്‌ ഭൂമിയെ വലം​വെ​ക്കാൻ ഇറങ്ങി​ത്തി​രി​ക്കു​ന്നു. ഒറ്റയൊ​രു ദിവസം വൈകി​പ്പോ​യ​തു​കൊണ്ട്‌ സമ്മാനം നഷ്ടമായ ദുഃഖ​ത്തിൽ അയാൾ തിരി​ച്ചെ​ത്തു​ന്നു. എന്നാൽ, വാസ്‌ത​വ​ത്തിൽ കൃത്യ​ദി​വ​സം​ത​ന്നെ​യാണ്‌ താൻ തിരി​ച്ചെ​ത്തി​യി​രി​ക്കു​ന്നത്‌ എന്നു മനസ്സി​ലാ​ക്കി​യ​പ്പോൾ അയാൾ അതിശ​യി​ച്ചു പോയി. പുസ്‌ത​ക​ത്തിൽ ഇങ്ങനെ പറയുന്നു: “അറിയാ​തെ​യാ​ണെ​ങ്കി​ലും ഫിലി​യസ്‌ ഫോഗ്‌ തന്റെ യാത്ര​യിൽ ഒരു ദിവസം കൂടുതൽ നേടി​യി​രു​ന്നു. കാരണം, അയാൾ യാത്ര​യിൽ ഉടനീളം കിഴ​ക്കോ​ട്ടാണ്‌ സഞ്ചരി​ച്ചത്‌.”

അന്തർദേ​ശീ​യ ദിനാ​ങ്ക​രേഖ വേണിന്റെ കഥയ്‌ക്ക്‌ ഒരു ശുഭപ​ര്യ​വ​സാ​നം നൽകി​യ​താ​യി തോന്നി​യേ​ക്കാ​മെ​ങ്കി​ലും, 1873-ൽ വിഖ്യാ​ത​മായ ഈ നോവൽ പ്രസി​ദ്ധീ​ക​രി​ക്കു​മ്പോൾ പ്രസ്‌തുത രേഖ സ്ഥാപി​ക്ക​പ്പെ​ട്ടി​ട്ടു​ണ്ടാ​യി​രു​ന്നില്ല. ശാന്തസ​മു​ദ്രം മുറിച്ചു കടക്കു​മ്പോൾ അന്നത്തെ കപ്പിത്താ​ന്മാർ കലണ്ടറിൽ ഒരു ദിവസത്തെ പൊരു​ത്ത​പ്പെ​ടു​ത്തൽ വരുത്തു​ക​യാ​യി​രു​ന്നു പതിവ്‌. എന്നാൽ അവരുടെ ഭൂപട​ങ്ങ​ളിൽ ഇന്നത്തെ ദിനാ​ങ്ക​രേഖ ഉണ്ടായി​രു​ന്നില്ല. സമയ മേഖല​ക​ളു​ടെ ഒരു ആഗോള സംവി​ധാ​നം സ്ഥാപി​ക്കു​ന്ന​തി​നു മുമ്പാ​യി​രു​ന്നു അത്‌. അതു​കൊണ്ട്‌, അലാസ്‌ക റഷ്യയു​ടെ അധീന​ത​യി​ലാ​യി​രുന്ന കാലത്ത്‌ അവിടത്തെ ജനങ്ങൾ മോസ്‌കോ​ക്കാ​രു​ടെ അതേ കലണ്ടറാ​ണു പിൻപ​റ്റി​യി​രു​ന്നത്‌. എന്നാൽ 1867-ൽ അലാസ്‌ക ഐക്യ​നാ​ടു​ക​ളു​ടെ ഭാഗം ആയപ്പോൾ അവർ ഐക്യ​നാ​ടു​ക​ളു​ടെ കലണ്ടർ സ്വീക​രി​ച്ചു.

ചരി​ത്ര​പ​ര​മായ സംഭവ​വി​കാ​സ​ങ്ങൾ

സമയവു​മാ​യി ബന്ധപ്പെട്ട ഈ ആശയക്കു​ഴ​പ്പ​ങ്ങൾക്കി​ട​യിൽ 1884-ൽ, ‘അന്താരാ​ഷ്‌ട്ര പ്രധാന രേഖാം​ശ​രേഖ കോൺഫ​റൻസിൽ’ സംബന്ധി​ക്കാ​നാ​യി 25 രാഷ്‌ട്ര​ങ്ങ​ളി​ലെ പ്രതി​നി​ധി​കൾ വാഷി​ങ്‌ടൺ ഡി.സി.-യിൽ എത്തി​ച്ചേർന്നു. അവർ 24 സമയ മേഖല​ക​ളു​ടെ ഒരു ആഗോള സംവി​ധാ​ന​ത്തി​നു രൂപം കൊടു​ത്തു. കൂടാതെ, ഇംഗ്ലണ്ടി​ലെ ഗ്രീനി​ച്ചി​ലൂ​ടെ കടന്നു​പോ​കുന്ന രേഖാം​ശ​രേ​ഖയെ പ്രധാന രേഖാം​ശ​രേ​ഖ​യാ​യി അംഗീ​ക​രി​ക്കു​ക​യും ചെയ്‌തു. a അത്‌, ഭൂഗോ​ള​ത്തി​ലെ കിഴക്കു-പടിഞ്ഞാ​റു സ്ഥാനങ്ങൾ അളക്കു​ന്ന​തി​നുള്ള ആരംഭ​സ്ഥാ​ന​മാ​യി മാറി.

ഗ്രീനി​ച്ചിൽനിന്ന്‌ ഭൂമി​യു​ടെ പാതി​ദൂ​ര​ത്തുള്ള സ്ഥാനം—കിഴക്കു​നിന്ന്‌ അല്ലെങ്കിൽ പടിഞ്ഞാ​റു​നിന്ന്‌ 12 സമയ മേഖലകൾ അകലെ​യുള്ള സ്ഥാനം—ഒരു അന്തർദേ​ശീയ ദിനാ​ങ്ക​രേ​ഖ​യ്‌ക്കു പറ്റിയ​താ​ണെന്നു കാണ​പ്പെട്ടു. 1884-ലെ കോൺഫ​റൻസിൽ ഔദ്യോ​ഗി​ക​മാ​യി അംഗീ​ക​രി​ക്ക​പ്പെ​ട്ടി​ല്ലെ​ങ്കി​ലും, 180-ഡിഗ്രി ധ്രുവ​രേഖ വിശേ​ഷി​ച്ചും അനു​യോ​ജ്യ​മായ ഒരു സ്ഥാനമാ​യി കണക്കാ​ക്ക​പ്പെട്ടു. കാരണം, ദിനാ​ങ്ക​രേഖ അപ്പോൾ ഒരു ഭൂഖണ്ഡ​ത്തി​ലൂ​ടെ കടന്നു​പോ​കി​ല്ലെ​ന്നു​ള്ളതു തീർച്ച​യാ​യി​രു​ന്നു. നിങ്ങൾ താമസി​ക്കുന്ന രാജ്യ​ത്തി​ന്റെ ഒരു പകുതി​യിൽ ഞായറാ​ഴ്‌ച​യും മറ്റേ പകുതി​യിൽ തിങ്കളാ​ഴ്‌ച​യും ആണെങ്കിൽ ഉണ്ടാ​യേ​ക്കാ​വുന്ന ആശയക്കു​ഴപ്പം സങ്കൽപ്പി​ച്ചു നോക്കൂ!

ഒരു ലോക​ഭൂ​പടം അല്ലെങ്കിൽ ഗ്ലോബ്‌ പരി​ശോ​ധി​ച്ചാൽ, ഹവായ്‌ക്കു പടിഞ്ഞാ​റാ​യി 180-ഡിഗ്രി ധ്രുവ​രേഖ നിങ്ങൾക്കു കാണാൻ സാധി​ക്കും. അന്തർദേ​ശീയ ദിനാ​ങ്ക​രേഖ ധ്രുവ​രേ​ഖ​യി​ലൂ​ടെ കൃത്യ​മാ​യി കടന്നു​പോ​കു​ന്നില്ല എന്നു ശ്രദ്ധി​ക്കുക. കരയെ പൂർണ​മാ​യും ഒഴിവാ​ക്കാൻ ശാന്തസ​മു​ദ്ര​ത്തി​ലൂ​ടെ, പോകുന്ന ഈ രേഖയിൽ അൽപ്പസ്വൽപ്പം ക്രമീ​ക​ര​ണങ്ങൾ വരുത്തി​യി​ട്ടുണ്ട്‌. ദിനാ​ങ്ക​രേഖ സ്ഥാപി​ക്ക​പ്പെ​ട്ടത്‌ പൊതു ധാരണ പ്രകാ​ര​മാ​യ​തി​നാ​ലും അന്താരാ​ഷ്‌ട്ര കരാറി​ന്റെ അടിസ്ഥാ​ന​ത്തിൽ അല്ലായി​രു​ന്ന​തി​നാ​ലും ഓരോ രാജ്യ​ത്തി​ന്റെ​യും അഭി​പ്രാ​യം അനുസ​രിച്ച്‌ അതിനു മാറ്റം വരുത്തുക സാധ്യ​മാണ്‌. ഉദാഹ​ര​ണ​ത്തിന്‌, 1995-ൽ കിരി​ബാ​റ്റി ദ്വീപ​ശൃം​ഖ​ല​യി​ലൂ​ടെ കടന്നു​പോ​കുന്ന അന്തർദേ​ശീയ ദിനാ​ങ്ക​രേ​ഖ​യു​ടെ പാതയ്‌ക്ക്‌, ഏറ്റവും കിഴക്കുള്ള ദ്വീപി​നെ കൂടെ ഉൾപ്പെ​ടു​ത്ത​ത്ത​ക്ക​വി​ധം മാറ്റം വരുത്തു​മെന്ന്‌ കിരി​ബാ​റ്റി പ്രഖ്യാ​പി​ച്ചു. അതു​കൊണ്ട്‌, ഏറ്റവും പുതിയ ഭൂപട​ങ്ങ​ളിൽ കിരി​ബാ​റ്റി ദ്വീപു​കൾ എല്ലാം രേഖയു​ടെ ഒരേ വശത്താണു സ്ഥിതി ചെയ്യു​ന്നത്‌ എന്നു കാണാൻ കഴിയും. അതു​കൊണ്ട്‌ ദ്വീപു​ക​ളി​ലെ​ല്ലാം തീയതി ഒന്നുത​ന്നെ​യാ​യി​രി​ക്കും.

അതു പ്രവർത്തി​ക്കുന്ന വിധം

ദിനാ​ങ്ക​രേഖ കടക്കു​മ്പോൾ ഒരു ദിവസം നഷ്ടപ്പെ​ടു​ക​യോ നേടു​ക​യോ ചെയ്യു​ന്ന​തി​ന്റെ കാരണം മനസ്സി​ലാ​ക്കാൻ ഒരു ദൃഷ്ടാന്തം പരിചി​ന്തി​ക്കാം. നിങ്ങൾ ഭൂമിക്കു ചുറ്റും കപ്പലിൽ യാത്ര ചെയ്യു​ക​യാ​ണെന്നു കരുതുക. നിങ്ങൾ കിഴ​ക്കോ​ട്ടാണ്‌ പോകു​ന്നത്‌. നിങ്ങൾ തിരി​ച്ച​റി​യു​ന്നി​ല്ലെ​ങ്കി​ലും, ഓരോ സമയ മേഖല​യി​ലൂ​ടെ യാത്ര ചെയ്യു​മ്പോ​ഴും നിങ്ങൾ ഒരു മണിക്കൂർ വീതം നേടു​ക​യാണ്‌. ഭൂമിക്കു ചുറ്റു​മുള്ള യാത്ര പൂർത്തി​യാ​കു​മ്പോൾ നിങ്ങൾ 24 സമയ മേഖല​ക​ളി​ലൂ​ടെ സഞ്ചരി​ച്ചി​ട്ടു​ണ്ടാ​കും. ഒരു അന്തർദേ​ശീയ ദിനാ​ങ്ക​രേഖ ഇല്ലായി​രു​ന്നെ​ങ്കിൽ, പ്രാ​ദേ​ശിക സമയത്തിന്‌ ഒരു ദിവസം മുമ്പ്‌ നിങ്ങൾ എത്തി​ച്ചേർന്ന​താ​യി കണക്കാ​ക്ക​പ്പെ​ടും. അന്തർദേ​ശീയ ദിനാ​ങ്ക​രേഖ ഈ പ്രശ്‌നം പരിഹ​രി​ക്കു​ന്നു. ഇത്‌ അൽപ്പം ആശയക്കു​ഴപ്പം ഉണ്ടാക്കു​ന്നു​ണ്ടല്ലേ? മഗല്ലന്റെ സഹയാ​ത്രി​ക​രും ഫിലി​യസ്‌ ഫോഗ്‌ എന്ന കഥാപാ​ത്ര​വും ലോക​ത്തി​നു ചുറ്റു​മുള്ള തങ്ങളുടെ യാത്ര പൂർത്തി​യാ​ക്കിയ ദിവസം കണക്കാ​ക്കി​യ​പ്പോൾ പിശകു വരുത്തി​യ​തിൽ അത്ഭുത​പ്പെ​ടാ​നില്ല!

ദിനാ​ങ്ക​രേഖ മുറിച്ചു കടന്നി​ട്ടു​ള്ള​വർക്ക്‌, പെട്ടെന്ന്‌ ഒരു ദിവസം നഷ്ടപ്പെ​ടു​ക​യോ നേടു​ക​യോ ചെയ്യു​മ്പോൾ ഉണ്ടാകുന്ന വിചി​ത്ര​മായ അനുഭവം അറിയാം. എന്നാൽ അന്തർദേ​ശീയ ദിനാ​ങ്ക​രേഖ ഇല്ലായി​രു​ന്നെ​ങ്കിൽ യാത്രകൾ ഇതിലും ആശയക്കു​ഴപ്പം സൃഷ്ടി​ച്ചേനെ. (g01 12/22)

[അടിക്കു​റി​പ്പു​കൾ]

[21-ാം പേജിലെ രേഖാ​ചി​ത്രം/മാപ്പ്‌]

(പൂർണ​രൂ​പ​ത്തിൽ കാണു​ന്ന​തിന്‌ പ്രസി​ദ്ധീ​ക​രണം നോക്കുക)

മാർച്ച്‌ | മാർച്ച്‌

2 | 1

[22-ാം പേജിലെ ചിത്രങ്ങൾ]

മുകളിൽ: ഗ്രീനിച്ച്‌ റോയൽ ഒബ്‌സർവേ​റ്റ​റി

വലത്ത്‌: ഈ കൽപ്പാത പ്രധാന രേഖാംശ രേഖയെ കുറി​ക്കു​ന്നു