ജോർജി​യ​യി​ലെ മതപീ​ഡനം—എത്ര കാലം കൂടി?

സുഖക​ര​മായ കാലാ​വ​സ്ഥ​യുള്ള കരിങ്കടൽതീരം മുതൽ മഞ്ഞുറഞ്ഞ കോക്ക​സസ്‌ പർവത​നി​ര​വരെ വ്യാപി​ച്ചു കിടക്കുന്ന ജോർജിയ പ്രകൃതി സൗന്ദര്യം വഴി​ഞ്ഞൊ​ഴു​കുന്ന ഒരു നാടാണ്‌. നിബി​ഡ​വ​ന​ങ്ങ​ളും അരുവി​ക​ളും ഹരിതാ​ഭ​മായ താഴ്‌വ​ര​ക​ളു​മുള്ള ഈ പർവത​പ്ര​ദേശം യൂറോ​പ്പി​ന്റെ​യും ഏഷ്യയു​ടെ​യും അതിർത്തി​യു​ടെ ഇരുവ​ശ​ത്തു​മാ​യി വ്യാപി​ച്ചു​കി​ട​ക്കു​ന്നു. ജോർജി​യ​യു​ടെ തലസ്ഥാ​ന​മായ ടിബി​ലി​സി ആധുനിക കെട്ടി​ട​ങ്ങ​ളും പുരാതന വാസ്‌തു​ശിൽപ്പ സ്‌മാ​ര​ക​ങ്ങ​ളും ഉള്ള തിര​ക്കേ​റിയ ഒരു നഗരമാണ്‌. എന്നാൽ ജോർജി​യ​യു​ടെ ഏറ്റവും വലിയ സമ്പത്ത്‌ അവിടത്തെ ജനങ്ങളാണ്‌. ഈടുറ്റ കുടുംബ ബന്ധങ്ങൾക്കും ഊഷ്‌മ​ള​മായ അതിഥി​സ​ത്‌കാ​ര​ത്തി​നും പേരു​കേ​ട്ട​വ​രാണ്‌ അവർ.

ചരി​ത്ര​ത്തി​ലു​ട​നീ​ളം ജോർജി​യ​യി​ലെ ജനങ്ങൾ മർദന​ത്തിന്‌ ഇരകളാ​യി​ട്ടുണ്ട്‌. റോമാ​ക്കാർ, പേർഷ്യ​ക്കാർ, ബൈസാ​ന്റി​യം​കാർ, അറബികൾ, തുർക്കി​കൾ, മംഗോ​ളി​യ​ക്കാർ, റഷ്യക്കാർ എന്നിവ​രും മറ്റുള്ള​വ​രു​മൊ​ക്കെ ആ രാജ്യത്തെ ആക്രമി​ച്ചി​ട്ടുണ്ട്‌. ഒരു കണക്ക്‌ അനുസ​രിച്ച്‌, ടിബി​ലി​സി 29 തവണ നശിപ്പി​ക്ക​പ്പെ​ട്ടി​ട്ടുണ്ട്‌! a എന്നാൽ അപ്പോൾ പോലും, ജീവിതം, കല, സംഗീതം, നൃത്തം എന്നിവ​യോ​ടുള്ള ജോർജി​യൻ നിവാ​സി​ക​ളു​ടെ പ്രിയ​ത്തി​നു തെല്ലും മങ്ങലേ​റ്റില്ല. മാത്രമല്ല, സഹിഷ്‌ണു​ത​യുള്ള ഒരു സമൂഹം എന്ന നിലയി​ലുള്ള തങ്ങളുടെ ഖ്യാതി കാത്തു​കൊ​ള്ളു​ന്ന​തി​നും അവർക്കു സാധിച്ചു.

ദുഃഖ​ക​ര​മെ​ന്നു പറയട്ടെ, ജോർജി​യ​യി​ലെ എല്ലാ ആളുകളെ കുറി​ച്ചും മേലാൽ ഇതു പറയാ​നാ​വില്ല. കഴിഞ്ഞ രണ്ടു വർഷത്തി​നി​ട​യിൽ ഒരു ചെറിയ സംഘം ജോർജി​യ​ക്കാർ നൂറു​ക​ണ​ക്കി​നു വരുന്ന തങ്ങളുടെ സഹ പൗരന്മാ​രെ ആക്രമി​ച്ചു​കൊണ്ട്‌ തങ്ങളുടെ രാജ്യ​ത്തി​ന്റെ കീർത്തി നശിപ്പി​ച്ചി​രി​ക്കു​ന്നു. കോപാ​ക്രാ​ന്ത​രായ ആക്രമ​ണ​കാ​രി​കൾ നിർദോ​ഷി​ക​ളായ പുരു​ഷ​ന്മാ​രെ​യും സ്‌ത്രീ​ക​ളെ​യും കുട്ടി​ക​ളെ​യും അതു​പോ​ലെ വൃദ്ധ​രെ​യും ശാരീ​രിക വൈക​ല്യം ഉള്ളവ​രെ​യും തല്ലിച്ച​ത​ച്ചി​രി​ക്കു​ന്നു. ഈ ആക്രമ​ണ​കാ​രി​കൾ ആണികൾ തറച്ച വടികൾകൊ​ണ്ടും ഇരുമ്പു​ദ​ണ്ഡു​കൾകൊ​ണ്ടും അവരെ പരി​ക്കേൽപ്പി​ക്കു​ക​യും മുഖവും തലയു​മെ​ല്ലാം പിച്ചി​ച്ചീ​ന്തു​ക​യും ചെയ്‌തി​രി​ക്കു​ന്നു. ജോർജി​യ​യി​ലെ നിർദോ​ഷി​ക​ളായ ഈ പൗരന്മാർ ഇത്ര മൃഗീ​യ​മാ​യി പീഡി​പ്പി​ക്ക​പ്പെ​ടു​ന്നത്‌ എന്തു​കൊ​ണ്ടാണ്‌? അവർ യഹോ​വ​യു​ടെ സാക്ഷികൾ ആയതു​കൊണ്ട്‌, ആക്രമ​ണ​കാ​രി​ക​ളിൽ പലരും ജനിക്കു​ന്ന​തി​നു മുമ്പു​തന്നെ  ജോർജി​യ​യിൽ ഉണ്ടായി​രുന്ന ഒരു ക്രിസ്‌തീയ സമൂഹ​ത്തി​ന്റെ ഭാഗമാ​യി​രി​ക്കു​ന്ന​തു​കൊണ്ട്‌.

അപലപ​ന​ത്തിൽനിന്ന്‌ ആക്രമ​ണ​ത്തി​ലേക്ക്‌

ജോർജിയ മതസ്വാ​ത​ന്ത്ര്യം ഉറപ്പു നൽകുന്ന ഒരു രാജ്യ​മാ​ണെ​ങ്കി​ലും, അവിടെ യഹോ​വ​യു​ടെ സാക്ഷി​ക​ളു​ടെ സാഹി​ത്യ​ങ്ങൾ അധികാ​രി​കൾ കൂടെ​ക്കൂ​ടെ കണ്ടു​കെ​ട്ടി​യി​ട്ടുണ്ട്‌. ജോർജി​യൻ ഓർത്ത​ഡോ​ക്‌സ്‌ സഭാ അധിപ​നായ പാത്രി​യാർക്കീ​സി​ന്റെ അനുമതി ഉണ്ടെങ്കി​ലേ സാഹി​ത്യ​ങ്ങൾ വിട്ടു​കൊ​ടു​ക്കൂ എന്ന്‌ 1999 ഏപ്രി​ലിൽ കസ്റ്റംസ്‌ അധികൃ​തർ പ്രസ്‌താ​വി​ച്ചു. b പിറ്റേ മാസം, ഓർത്ത​ഡോ​ക്‌സ്‌ സഭ വീണ്ടും പരാമർശ​വി​ധേ​യ​മാ​യി—ഇത്തവണ ജോർജി​യ​യി​ലെ ഇസാനി-സാം​ഗോ​റി ജില്ലാ കോട​തി​യിൽ. അവിടെ പാർല​മെ​ന്ററി അംഗവും “സർവോ​പരി ജോർജിയ!” എന്ന രാഷ്‌ട്രീയ പ്രസ്ഥാ​ന​ത്തി​ന്റെ നേതാ​വു​മായ ഗുരാം ഷാരാ​ഡ്‌സെ, യഹോ​വ​യു​ടെ സാക്ഷികൾ ഉപയോ​ഗി​ക്കുന്ന നിയമ​പ​ര​മായ കോർപ്പ​റേ​ഷ​നു​കൾ പിരി​ച്ചു​വി​ടു​ന്ന​തി​നാ​യി കേസു കൊടു​ത്തു. സാക്ഷികൾ രാജ്യ​ദ്രോ​ഹി​ക​ളും അപകട​കാ​രി​ക​ളും ആണെന്ന്‌ അദ്ദേഹം ആരോ​പി​ച്ചു. ഷാരാ​ഡ്‌സെ​യു​ടെ ആരോ​പ​ണത്തെ ആരാണു പിന്താ​ങ്ങി​യത്‌? അഖില-ജോർജിയ കാതോ​ലി​ക്കോസ്‌ പാത്രി​യാർക്കീ​സി​ന്റെ സെക്ര​ട്ട​റി​യു​ടെ ഒരു കത്ത്‌ അദ്ദേഹം നൽകിയ പരാതി​യു​ടെ കൂട്ടത്തിൽ ഉണ്ടായി​രു​ന്നു.

ജോർജി​യ 1999 മേയ്‌ 20-ന്‌ ‘മനുഷ്യാ​വ​കാ​ശ​ങ്ങ​ളു​ടെ​യും അടിസ്ഥാന സ്വാത​ന്ത്ര്യ​ങ്ങ​ളു​ടെ​യും സംരക്ഷ​ണ​ത്തി​നാ​യുള്ള യൂറോ​പ്യൻ ഉടമ്പടി’ അംഗീ​ക​രി​ക്കു​ക​യും അങ്ങനെ അതിലെ വ്യവസ്ഥകൾ ഉയർത്തി​പ്പി​ടി​ക്കാ​നുള്ള ബാധ്യ​സ്ഥ​ത​യിൻ കീഴിൽ വരിക​യും ചെയ്‌തു. പ്രസ്‌തുത ഉടമ്പടി​യി​ലെ 10-ാമത്തെ വ്യവസ്ഥ ഇങ്ങനെ പ്രസ്‌താ​വി​ക്കു​ന്നു: “ആശയ​പ്ര​ക​ട​ന​ത്തി​നുള്ള സ്വാത​ന്ത്ര്യം ഏവരു​ടെ​യും അവകാ​ശ​മാണ്‌. പൊതു​ജന അധികാ​രി​ക​ളിൽനി​ന്നുള്ള തടസ്സങ്ങ​ളി​ല്ലാ​തെ​യും രാജ്യാ​തിർത്തി​കൾ ഗണ്യമാ​ക്കാ​തെ​യും അഭി​പ്രാ​യങ്ങൾ വെച്ചു​പു​ലർത്താ​നും വിവര​ങ്ങ​ളും ആശയങ്ങ​ളും സ്വീക​രി​ക്കാ​നും മറ്റുള്ള​വർക്കു നൽകാ​നു​മുള്ള സ്വാത​ന്ത്ര്യം പ്രസ്‌തുത അവകാ​ശ​ത്തിൽ ഉൾപ്പെ​ടു​ന്നു.” മതസാ​ഹി​ത്യ​ങ്ങൾ നിരോ​ധി​ക്കാ​നുള്ള തങ്ങളുടെ ശ്രമങ്ങൾ നിറു​ത്താൻ യഹോ​വ​യു​ടെ സാക്ഷി​ക​ളു​ടെ ശത്രു​ക്കളെ ഇതു പ്രേരി​പ്പി​ച്ചോ? തീർച്ച​യാ​യും ഇല്ല!

അഖില-ജോർജിയ പാത്രി​യാർക്കീ​സി​ന്റെ ഓഫീ​സിൽനിന്ന്‌ 1999 ജൂൺ 21-ന്‌ കസ്റ്റംസ്‌ പരി​ശോ​ധനാ വിഭാ​ഗ​ത്തി​ന്റെ തലവന്‌ അയച്ച ഒരു കത്തിൽ “വിദേശ മതസാ​ഹി​ത്യ​ങ്ങ​ളു​ടെ വിതരണം നിരോ​ധി​ക്കണം” എന്നു നിഷ്‌കർഷി​ച്ചി​രു​ന്നു. മാത്രമല്ല, യഹോ​വ​യു​ടെ സാക്ഷികൾ അപകട​കാ​രി​ക​ളാ​ണെ​ന്നും അവരെ നിരോ​ധി​ക്ക​ണ​മെ​ന്നും ജോർജി​യൻ ഓർത്ത​ഡോ​ക്‌സ്‌ സഭയുടെ ഔദ്യോ​ഗിക വക്താവായ ഗിയോർഗി ആൻഡ്രി​യാ​ഡ്‌സെ പ്രഖ്യാ​പി​ച്ചു. ഈ അപലപ​ന​ങ്ങ​ളു​ടെ ഫലം എന്തായി​രു​ന്നു? കഴിഞ്ഞ കാലത്ത്‌ യഹോ​വ​യു​ടെ സാക്ഷി​ക​ളു​ടെ സാഹി​ത്യ​ങ്ങൾ അഗ്നിക്കി​ര​യാ​ക്കി​യി​രുന്ന മതഭ്രാ​ന്ത​ന്മാർക്കു സാക്ഷി​കളെ ആക്രമി​ക്കാ​മെ​ന്നും അതിന്റെ പേരിൽ തങ്ങൾ ശിക്ഷി​ക്ക​പ്പെ​ടു​ക​യി​ല്ലെ​ന്നു​മുള്ള അവസ്ഥ വന്നു. 1999 ഒക്ടോബർ 17 ഞായറാഴ്‌ച അവർ വീണ്ടും സാക്ഷി​ക​ളു​ടെ​മേൽ ആക്രമണം അഴിച്ചു​വി​ട്ടു.

അധികാ​രി​കൾ കൂട്ട ആക്രമ​ണ​ങ്ങൾക്കു​നേരെ കണ്ണടയ്‌ക്കു​ന്നു

ആ ഞായറാഴ്‌ച പുരു​ഷ​ന്മാ​രും സ്‌ത്രീ​ക​ളും കുട്ടി​ക​ളു​മ​ടക്കം യഹോ​വ​യു​ടെ സാക്ഷി​ക​ളായ 120-ഓളം പേർ ടിബി​ലി​സി​യിൽ ഒരു മതയോ​ഗ​ത്തിൽ സംബന്ധി​ക്കു​ക​യാ​യി​രു​ന്നു. ഔദ്യോ​ഗിക സ്ഥാനത്തു​നി​ന്നു നീക്കപ്പെട്ട മുൻ ഓർത്ത​ഡോ​ക്‌സ്‌ പുരോ​ഹി​തൻ വാസിലി മ്‌കാ​ലാ​വി​ഷ്‌വി​ലി​യും 200 അനുയാ​യി​ക​ളും പെട്ടെന്നു യോഗ​സ്ഥ​ല​ത്തേക്ക്‌ ഇരച്ചു​ക​യറി. c അവർ സാക്ഷി​കളെ വളഞ്ഞ്‌ മരവടി​ക​ളും ഇരുമ്പു കുരി​ശു​ക​ളും​കൊണ്ട്‌ തല്ലിച്ച​തച്ചു. അക്രമി​ക​ളിൽ നാലു പേർ ഒരാളു​ടെ കൈയി​ലും കഴുത്തി​ലും കടന്നു പിടിച്ച്‌ ബലമായി തല കുനി​ച്ചു​നി​റു​ത്തി മുടി വടിച്ചു​ക​ളഞ്ഞു. ശേഷം അക്രമി​കൾ അദ്ദേഹം ഈ രീതി​യിൽ അപമാ​നി​ക്ക​പ്പെ​ടു​ന്നതു നോക്കി​നിന്ന്‌ ആസ്വദി​ച്ചു. ഒടുവിൽ ആ ഭ്രാന്തൻ ജനക്കൂട്ടം അവി​ടെ​നി​ന്നു പോയ​പ്പോൾ, 16 സാക്ഷി​കളെ ആശുപ​ത്രി​യിൽ എത്തി​ക്കേ​ണ്ടി​വന്നു. ഒരാളു​ടെ മൂന്നു വാരി​യെ​ല്ലു​കൾ ഒടിഞ്ഞി​രു​ന്നു. 40 വയസ്സുള്ള പാറ്റി എന്ന സഹോ​ദരി പിന്നീട്‌ ഇപ്രകാ​രം പറഞ്ഞു: “അവർ എന്റെ നേരെ അലറാൻ തുടങ്ങി, അവരിൽ ഒരാൾ സർവശ​ക്തി​യു​മെ​ടുത്ത്‌ എന്നെ ഇടിച്ചു. അയാൾ എന്റെ മുഖത്തി​നിട്ട്‌, കണ്ണിനി​ട്ടാണ്‌ ഇടിച്ചത്‌. ഞാൻ കൈകൾകൊണ്ട്‌ എന്റെ മുഖം മറയ്‌ക്കാൻ ശ്രമിച്ചു. എന്റെ വിരലു​ക​ളി​ലൂ​ടെ രക്തം ഒഴുകു​ന്നു​ണ്ടാ​യി​രു​ന്നു.” ക്രൂര​മായ ആ മർദന​ത്തിൽ പാറ്റി​യു​ടെ ഇടതു  കണ്ണിനു ക്ഷതമേറ്റു. അങ്ങനെ കണ്ണിനു​ണ്ടായ കേടു​പാട്‌ ഇന്നും നിലനിൽക്കു​ന്നു.

കിരാ​ത​മാ​യ ഈ അക്രമം ടെലി​വി​ഷ​നിൽ കണ്ട പ്രസി​ഡന്റ്‌ എഡ്വേർഡ്‌ ഷെവർഡ്‌നാ​ഡ്‌സെ അതിനെ നിശി​ത​മാ​യി വിമർശി​ച്ചു. പിറ്റേന്ന്‌ അദ്ദേഹം ഇങ്ങനെ പ്രസ്‌താ​വി​ച്ചു: “ഈ സംഭവത്തെ ഞാൻ അപലപി​ക്കു​ന്നു. നിയമ​പാ​ലകർ ക്രിമി​നൽ കുറ്റം ചാർജു ചെയ്യേ​ണ്ട​താ​ണെന്നു ഞാൻ വിശ്വ​സി​ക്കു​ന്നു.” സംഘ​നേ​താ​വും ഉൾപ്പെ​ട്ടി​രുന്ന മറ്റുള്ള​വ​രും ആരൊ​ക്കെ​യാ​ണെന്നു വീഡി​യോ​യിൽ വളരെ വ്യക്തമാ​യി​രു​ന്ന​തി​നാൽ അവരെ കുറ്റക്കാ​രെന്നു സ്ഥാപി​ക്കുക വളരെ എളുപ്പ​മാ​യി​രു​ന്നു. എന്നാൽ, രണ്ടു വർഷത്തി​നു ശേഷവും ആ ആക്രമ​ണ​കാ​രി​ക​ളിൽ ആരെയും അധികാ​രി​കൾ കുറ്റക്കാ​രാ​യി പ്രഖ്യാ​പി​ച്ചി​ട്ടില്ല.

ശിക്ഷി​ക്ക​പ്പെ​ടാ​ത്ത​തിൽനിന്ന്‌ പ്രോ​ത്സാ​ഹനം ഉൾക്കൊണ്ട്‌

സർക്കാർ ഉദ്യോ​ഗ​സ്ഥ​രു​ടെ​യും സഭാ അധികാ​രി​ക​ളു​ടെ​യും ഭാഗത്തു​നി​ന്നു നടപടി​യൊ​ന്നും ഉണ്ടാകാ​തി​രു​ന്ന​പ്പോൾ അക്രമ​പ്ര​വൃ​ത്തി​കൾക്കു തങ്ങൾ ശിക്ഷി​ക്ക​പ്പെ​ടു​ക​യി​ല്ലെന്ന്‌ അവർക്കു തോന്നി​യ​തിൽ അതിശ​യ​മില്ല. കൂടുതൽ വീറോ​ടെ അവർ യഹോ​വ​യു​ടെ സാക്ഷി​കളെ സ്വകാര്യ ഭവനങ്ങ​ളി​ലും തെരു​വു​ക​ളി​ലും ആരാധനാ സ്ഥലങ്ങളി​ലും വെച്ച്‌ കവർച്ച ചെയ്യാ​നും ഉപദ്ര​വി​ക്കാ​നും തുടങ്ങി. 1999 ഒക്ടോ​ബ​റി​നും 2001 ആഗസ്റ്റി​നും ഇടയിൽ 1,000-ത്തിലധി​കം യഹോ​വ​യു​ടെ സാക്ഷികൾ ഉൾപ്പെ​ടുന്ന, രേഖാ​മൂ​ലം തെളി​വുള്ള 80 അക്രമ​പ്ര​വൃ​ത്തി​കൾ അരങ്ങേറി. എന്നിട്ടും, 2001 ഫെബ്രു​വരി 9-ന്‌ ടിബി​ലി​സി​യി​ലുള്ള ഒരു സിറ്റി പ്രോ​സി​ക്യൂ​ട്ടർ റിപ്പോർട്ടർമാ​രോ​ടു പറഞ്ഞത്‌ വാസിലി മ്‌കാ​ലാ​വി​ഷ്‌വി​ലിക്ക്‌ എതി​രെ​യുള്ള അന്വേ​ഷണം “ഇപ്പോ​ഴും നടന്നു​കൊ​ണ്ടി​രി​ക്കു​ക​യാണ്‌” എന്നാണ്‌. ദുഃഖ​ക​ര​മെന്നു പറയട്ടെ, ഈ ലേഖനം എഴുതുന്ന സമയത്തും ജോർജി​യ​യി​ലെ അധികാ​രി​കൾ തങ്ങളുടെ വിദ്വേ​ഷ​പൂ​രി​ത​മായ കുറ്റകൃ​ത്യ​ങ്ങ​ളിൽ തുടരാൻ യഹോ​വ​യു​ടെ സാക്ഷി​ക​ളു​ടെ ശത്രു​ക്കളെ അനുവ​ദി​ക്കു​ന്നു.—“കൂട്ട ആക്രമണം തുടരു​ന്നു” എന്ന ചതുരം കാണുക.

പോലീ​സി​ന്റെ പങ്ക്‌ എന്താണ്‌? അവർ യഹോ​വ​യു​ടെ സാക്ഷി​കൾക്ക്‌ എതി​രെ​യുള്ള ആക്രമ​ണങ്ങൾ അനുവ​ദി​ക്കുക മാത്രമല്ല, അവയിൽ ഏർപ്പെ​ടുക പോലും ചെയ്‌ത​താ​യി വാർത്താ റിപ്പോർട്ടു​ക​ളും വീഡി​യോ ചിത്ര​ങ്ങ​ളും കാണി​ക്കു​ന്നു! ഉദാഹ​ര​ണ​ത്തിന്‌, സുഗ്‌ദി​ദി നഗരത്തിൽ 2000 സെപ്‌റ്റം​ബർ 8-ന്‌ 700 യഹോ​വ​യു​ടെ സാക്ഷികൾ സമാധാ​ന​പ​ര​മാ​യി  ഒരു കൺ​വെൻ​ഷൻ നടത്തി​ക്കൊ​ണ്ടി​രി​ക്കെ, ലാത്തി​ക​ളേ​ന്തിയ പോലീ​സു​കാർ അതു പിരി​ച്ചു​വി​ട്ടു. മുഖം​മൂ​ടി ധരിച്ച പോലീസ്‌ ഉദ്യോ​ഗസ്ഥർ 50-ലധികം സാക്ഷി​കളെ തല്ലിച്ച​ത​ച്ചു​കൊണ്ട്‌ “നാശത്തി​ന്റെ ഒരു പാത വെട്ടി​ത്തെ​ളി​ച്ചു” എന്ന്‌ ദൃക്‌സാ​ക്ഷി​കൾ പറഞ്ഞു. ടാങ്കു​കൾക്കെ​തി​രെ ഉപയോ​ഗി​ക്കുന്ന, തിര​യൊ​ഴിഞ്ഞ ഷെല്ലുകൾ തലയ്‌ക്കു മീതെ പൊട്ടി​യ​പ്പോൾ കുട്ടി​ക​ളു​ടെ മുഖത്തെ ഭീതി കാണുക “ഹൃദയ​ഭേ​ദ​ക​മാ​യി​രു​ന്നു” എന്ന്‌ ആ കൺ​വെൻ​ഷൻ സ്ഥലത്തിന്റെ ഉടമ പറഞ്ഞു. പോലീസ്‌ ആ സ്ഥലം തല്ലിത്ത​കർക്കു​ക​യും തീ വെക്കു​ക​യും ചെയ്‌തു. എന്നിട്ടും, അവരാ​രും നാളി​തു​വരെ ശിക്ഷി​ക്ക​പ്പെ​ട്ടി​ട്ടില്ല.

ഈ ഹീന സംഭവം ഒറ്റപ്പെട്ട ഒന്നല്ലാ​ത്ത​തി​നാൽ (“പോലീ​സി​ന്റെ പങ്ക്‌” എന്ന ചതുരം കാണുക) ‘പീഡന​ത്തിന്‌ എതി​രെ​യുള്ള ഐക്യ​രാ​ഷ്‌ട്ര കമ്മിറ്റി’ “നിയമ​പാ​ലകർ ജോർജി​യ​യിൽ തുടർന്നു​പോ​രുന്ന പീഡന​ത്തെ​യും ക്രൂര​വും മനുഷ്യ​ത്വ​ഹീ​ന​വും അധമവു​മായ പെരു​മാ​റ്റ​ത്തെ​യും അല്ലെങ്കിൽ ശിക്ഷ​യെ​യും” അതു​പോ​ലെ​തന്നെ “പീഡന​ത്തി​ന്റെ നിരവധി ആരോ​പ​ണങ്ങൾ സംബന്ധിച്ച്‌ അടിയ​ന്തി​ര​വും പക്ഷപാ​ത​ര​ഹി​ത​വും സമഗ്ര​വു​മായ അന്വേ​ഷ​ണങ്ങൾ നടത്തു​ന്ന​തി​ലുള്ള തുടർച്ച​യായ പരാജ​യ​ത്തെ​യും” കുറിച്ച്‌ ഉചിത​മാ​യി​ത്തന്നെ ആകുലത പ്രകടി​പ്പി​ച്ചു. d കുറ്റവാ​ളി​കൾ ആരെന്ന്‌ അറിയാ​മാ​യി​രു​ന്നി​ട്ടും യഹോ​വ​യു​ടെ സാക്ഷികൾ പോലീ​സി​നു നൽകി​യി​ട്ടുള്ള 400-ലധികം പരാതി​ക​ളിൽ ഒന്നി​നോ​ടു പോലും ബന്ധപ്പെട്ട്‌ പ്രതി​കളെ അറസ്റ്റു ചെയ്‌തി​ട്ടില്ല! അതു​കൊണ്ട്‌, പാർല​മെന്റ്‌ തിര​ഞ്ഞെ​ടു​ത്തു നിയമിച്ച ജോർജി​യ​യു​ടെ പബ്ലിക്‌ ഡിഫന്റർ (സർക്കാർ ഉദ്യോ​ഗ​സ്ഥർക്കെ​തി​രെ​യുള്ള കേസു​ക​ളു​ടെ അന്വേഷണ ചുമതല വഹിക്കുന്ന അധികാ​രി) ഇങ്ങനെ അഭി​പ്രാ​യ​പ്പെട്ടു: “മനുഷ്യാ​വ​കാ​ശങ്ങൾ സംരക്ഷി​ക്കാൻ നിയമി​ക്ക​പ്പെ​ട്ട​വർതന്നെ അവ ലംഘി​ക്കു​ന്നു. അവരെ സംബന്ധി​ച്ചി​ട​ത്തോ​ളം, മനുഷ്യാ​വ​കാ​ശ​ങ്ങൾക്ക്‌ ഒരു കടലാസു തുണ്ടിന്റെ അത്രയും വിലയേ ഉള്ളൂ.”

സുപ്രീം കോടതി വിധി ആശയക്കു​ഴപ്പം സൃഷ്ടി​ക്കു​ന്നു

ജനങ്ങളും പോലീ​സും നടത്തുന്ന നിയമ​വി​രുദ്ധ ആക്രമ​ണങ്ങൾ മതിയാ​കാ​ഞ്ഞി​ട്ടെ​ന്ന​പോ​ലെ,  യഹോ​വ​യു​ടെ സാക്ഷി​ക​ളു​ടെ അവകാ​ശങ്ങൾ സംബന്ധിച്ച്‌ ആശയക്കു​ഴപ്പം സൃഷ്ടി​ക്കുന്ന ഒരു വിധി​ന്യാ​യം ജോർജി​യ​യി​ലെ സുപ്രീം കോടതി അടുത്ത​യി​ടെ പുറ​പ്പെ​ടു​വി​ച്ചു.

നമുക്ക്‌ അതു സംബന്ധിച്ച ചില പശ്ചാത്തല വിവരങ്ങൾ പരിചി​ന്തി​ക്കാം. യഹോ​വ​യു​ടെ സാക്ഷി​ക​ളു​ടെ നിയമ​പ​ര​മായ കോർപ്പ​റേ​ഷ​നു​കൾ പിരി​ച്ചു​വി​ടാ​നാ​യി രാഷ്‌ട്രീയ പ്രവർത്ത​ക​നായ ഗൂരാം ഷാരാ​ഡ്‌സെ കേസു കൊടു​ത്തു. 2000 ഫെബ്രു​വരി 29-ന്‌ കോടതി അദ്ദേഹ​ത്തി​ന്റെ കേസു തള്ളിക്ക​ള​ഞ്ഞെ​ങ്കി​ലും, അപ്പീൽ കൊടുത്ത ഷാരാ​ഡ്‌സെ കേസിൽ വിജയി​ച്ചു. അതേത്തു​ടർന്ന്‌ യഹോ​വ​യു​ടെ സാക്ഷികൾ സുപ്രീം കോട​തി​യിൽ അപ്പീൽ നൽകി. 2001 ഫെബ്രു​വരി 22-ന്‌ സുപ്രീം കോടതി സാക്ഷി​കൾക്കു പ്രതി​കൂ​ല​മാ​യി വിധി പുറ​പ്പെ​ടു​വി​ച്ചു, മുഖ്യ​മാ​യും ഇത്‌ നിയമ​പ​ര​മായ സാങ്കേ​തിക കാരണ​ങ്ങളെ പ്രതി ആയിരു​ന്നു. ഭരണഘടന അനുസ​രിച്ച്‌, മതസം​ഘ​ട​നകൾ നിയമ​പ​ര​മാ​യി രജിസ്റ്റർ ചെയ്‌തി​രി​ക്ക​ണ​മെ​ന്നും എന്നാൽ അത്തര​മൊ​രു നിയമം ഇനിയും നിലവിൽ വന്നിട്ടി​ല്ലെ​ന്നും സുപ്രീം കോടതി വ്യക്തമാ​ക്കി. ഈ നിയമ​ത്തി​ന്റെ അഭാവ​ത്തിൽ യഹോ​വ​യു​ടെ സാക്ഷി​കൾക്കു മറ്റൊരു രൂപത്തി​ലും രജിസ്റ്റർ ചെയ്യാൻ സാധി​ക്കില്ല എന്നു കോടതി നിഗമനം ചെയ്‌തു. എന്നാൽ, മതപര​മായ പ്രവർത്ത​നത്തെ പിന്താ​ങ്ങുന്ന 15-ഓളം മറ്റു സംഘട​നകൾ ജോർജി​യ​യിൽ നിയമ​പ​ര​മാ​യി രജിസ്റ്റർ ചെയ്‌തി​ട്ടുണ്ട്‌.

 സുപ്രീം കോട​തി​യു​ടെ തീരു​മാ​ന​ത്തോ​ടു പ്രതി​ക​രി​ച്ചു​കൊണ്ട്‌ ജോർജി​യ​യി​ലെ നിയമ​കാ​ര്യ മന്ത്രി മിഖെ​യിൽ സാക്കാ​ഷ്‌വി​ലി ഒരു ടെലി​വി​ഷൻ അഭിമു​ഖ​ത്തിൽ ഇങ്ങനെ പറഞ്ഞു: “നിയമ​പ​ര​മായ ഒരു നിലപാ​ടിൽനി​ന്നു നോക്കു​മ്പോൾ, ഈ തീരു​മാ​നം ചോദ്യം ചെയ്യത്ത​ക്ക​താണ്‌. സുപ്രീം കോട​തി​യു​ടെ ചരി​ത്ര​ത്തി​ലെ ഏറ്റവും വിജയ​പ്ര​ദ​മായ ഒരു അധ്യാ​യ​മാണ്‌ ഇതെ​ന്നൊ​ന്നും ഞാൻ കരുതു​ന്നില്ല.” പ്രസ്‌തുത വിധി​ന്യാ​യം “മതന്യൂ​ന​പ​ക്ഷ​ങ്ങളെ അടിച്ച​മർത്താൻ നമ്മുടെ [ജോർജി​യൻ ഓർത്ത​ഡോ​ക്‌സ്‌] സഭയിലെ തീവ്ര​വാദ ശക്തികളെ പ്രോ​ത്സാ​ഹി​പ്പി​ക്കുന്ന”തിനാൽ അതു സംബന്ധിച്ച്‌ താൻ “വളരെ ആശങ്കയു​ള്ളവൻ” ആണെന്ന്‌ ജോർജി​യ​യി​ലെ പാർല​മെ​ന്ററി നിയമ​കാ​ര്യ കമ്മിറ്റി​യു​ടെ താത്‌കാ​ലിക അധ്യക്ഷ​നായ സുരാബ്‌ ആഡയി​ഷ്‌വി​ലി, കെസ്റ്റൺ വാർത്താ സർവീ​സി​നോ​ടു പറഞ്ഞു. ദുഃഖ​ക​ര​മെന്നു പറയട്ടെ, ആഡയി​ഷ്‌വി​ലി ഭയപ്പെ​ട്ടതു പോ​ലെ​തന്നെ കാര്യങ്ങൾ സംഭവി​ച്ചു. കോടതി ആ വിധി​ന്യാ​യം പുറ​പ്പെ​ടു​വിച്ച്‌ ഏതാനും ദിവസ​ങ്ങൾക്കകം യഹോ​വ​യു​ടെ സാക്ഷി​കൾക്കു നേരെ​യുള്ള അക്രമം വീണ്ടും പൊട്ടി​പ്പു​റ​പ്പെട്ടു. 2001-ാം ആണ്ടിൽ, ജനക്കൂ​ട്ട​വും പോലീ​സും ഓർത്ത​ഡോ​ക്‌സ്‌ പുരോ​ഹി​ത​ന്മാ​രും ഫെബ്രു​വരി 27, മാർച്ച്‌ 5, മാർച്ച്‌ 6, മാർച്ച്‌ 27, ഏപ്രിൽ 1, ഏപ്രിൽ 7, ഏപ്രിൽ 29, ഏപ്രിൽ 30, മേയ്‌ 7, മേയ്‌ 20, ജൂൺ 8, ജൂൺ 17, ജൂലൈ 11, ആഗസ്റ്റ്‌ 12, സെപ്‌റ്റം​ബർ 28, സെപ്‌റ്റം​ബർ 30 എന്നീ തീയതി​ക​ളിൽ സാക്ഷി​കളെ ആക്രമി​ച്ചു. ആ പട്ടിക ഇനിയും തുടരു​ന്നു.

പീഡന​ത്തി​ന്റെ ഈ പുതിയ അല ആഞ്ഞടി​ക്കാൻ തുടങ്ങി​യ​തി​ന്റെ വെളി​ച്ച​ത്തിൽ, സുപ്രീം കോടതി അസാധാ​ര​ണ​മായ ഒരു നടപടി കൈ​ക്കൊ​ണ്ടു. കോട​തി​യു​ടെ തീരു​മാ​നം പരസ്യ​മാ​യി വ്യക്തമാ​ക്കി​ക്കൊണ്ട്‌ അത്‌ ഇങ്ങനെ പ്രസ്‌താ​വി​ച്ചു: “യഹോ​വ​യു​ടെ സാക്ഷി​ക​ളു​ടെ യൂണി​യന്റെ രജിസ്‌​ട്രേഷൻ സുപ്രീം കോടതി റദ്ദാക്കി​യ​തി​നെ പൊതു​ജനം തെറ്റായി വ്യാഖ്യാ​നി​ച്ചി​രി​ക്കു​ന്നതു നിർഭാ​ഗ്യ​ക​ര​മാണ്‌ . . . സ്വകാര്യ നിയമ​പ്ര​കാ​ര​മുള്ള നിയമാ​നു​സൃത സംഘടന എന്ന നിലയിൽ പ്രതി​ഭാ​ഗ​ത്തി​ന്റെ രജിസ്‌​ട്രേഷൻ കോടതി റദ്ദാക്കി​യെ​ങ്കി​ലും, ചിന്താ​സ്വാ​ത​ന്ത്ര്യ​വും മനസ്സാക്ഷി സ്വാത​ന്ത്ര്യ​വും മതസ്വാ​ത​ന്ത്ര്യ​വും പുലർത്താ​നുള്ള അവരുടെ അവകാ​ശത്തെ പ്രത്യ​ക്ഷ​മാ​യോ പരോ​ക്ഷ​മാ​യോ തടസ്സ​പ്പെ​ടു​ത്തു​ക​യോ നിയ​ന്ത്രി​ക്കു​ക​യോ ചെയ്‌തി​ട്ടില്ല. പരസ്യ​മാ​യി അല്ലെങ്കിൽ സ്വകാ​ര്യ​മാ​യി, ഒരാൾക്കോ ഒന്നില​ധി​കം പേർക്കോ തങ്ങളുടെ മതം മാറാ​നുള്ള അവരുടെ സ്വാത​ന്ത്ര്യം നിയ​ന്ത്രി​ക്ക​പ്പെ​ട്ടി​ട്ടില്ല. . . . ആശയങ്ങ​ളും വിവര​ങ്ങ​ളും സ്വീക​രി​ക്കാ​നും അവ പ്രചരി​പ്പി​ക്കാ​നു​മുള്ള പ്രതി​ക​ളു​ടെ അവകാ​ശ​ത്തെ​യും കോട​തി​യു​ടെ തീരു​മാ​നം നിയ​ന്ത്രി​ക്കു​ന്നില്ല. സമാധാ​ന​പ​ര​മാ​യി യോഗങ്ങൾ നടത്താ​നുള്ള അവരുടെ അവകാ​ശ​ത്തെ​യും അതു നിരോ​ധി​ക്കു​ന്നില്ല.”

ആയിര​ക്ക​ണ​ക്കി​നു ജോർജി​യ​ക്കാർ പീഡന​ത്തോ​ടു പ്രതി​ക​രി​ക്കു​ന്നു

സുപ്രീം കോട​തി​യു​ടെ പ്രസ്‌താ​വ​ന​യ്‌ക്ക്‌ അക്രമി​ക​ളു​ടെ​മേൽ കാര്യ​മായ എന്തെങ്കി​ലും ഫലം  ഉണ്ടായി​ട്ടു​ള്ള​താ​യി തോന്നു​ന്നി​ല്ലെ​ങ്കി​ലും, ജോർജി​യ​യി​ലെ ആയിര​ക്ക​ണ​ക്കി​നു പൗരന്മാർ ഈ പീഡനത്തെ ഇപ്പോൾത്തന്നെ കുറ്റം വിധി​ച്ചി​രി​ക്കു​ന്നു എന്നതു സന്തോ​ഷ​ക​ര​മാണ്‌. കൂട്ട ആക്രമ​ണ​ങ്ങ​ളിൽനി​ന്നു തങ്ങളെ സംരക്ഷി​ക്ക​ണ​മെ​ന്നും ജോർജി​യൻ പൗരന്മാർക്കെ​തി​രെ​യുള്ള അക്രമ​ങ്ങ​ളിൽ പങ്കെടു​ക്കു​ന്ന​വരെ ശിക്ഷി​ക്ക​ണ​മെ​ന്നും ആവശ്യ​പ്പെ​ടുന്ന ഒരു പരാതി യഹോ​വ​യു​ടെ സാക്ഷികൾ 2001 ജനുവരി 8 മുതൽ പൊതു​ജ​ന​ങ്ങ​ളു​ടെ ഇടയിൽ പ്രചരി​പ്പി​ച്ചു. രണ്ടാഴ്‌ച​യ്‌ക്കകം ജോർജി​യ​യു​ടെ എല്ലാ ഭാഗങ്ങ​ളിൽ നിന്നു​മുള്ള പ്രായ​പൂർത്തി​യായ 1,33,375 പൗരന്മാർ ആ പരാതി​യിൽ ഒപ്പു​വെച്ചു. ജോർജി​യ​യി​ലെ യഹോ​വ​യു​ടെ സാക്ഷി​ക​ളു​ടെ എണ്ണം വെറും 15,000 ആണെന്നതു പരിചി​ന്തി​ക്കു​മ്പോൾ, ആ പരാതി​യിൽ ഒപ്പിട്ട ബഹുഭൂ​രി​പ​ക്ഷ​വും ജോർജി​യൻ ഓർത്ത​ഡോ​ക്‌സ്‌ സഭയിലെ അംഗങ്ങൾ ആയിരി​ക്കാ​നാ​ണു സാധ്യത. എന്നാൽ 2001 ജനുവരി 22-ന്‌ ആ പരാതി അപ്രത്യ​ക്ഷ​മാ​യി. എന്താണു സംഭവി​ച്ചത്‌?

അന്ന്‌, ആ പരാതി ഔദ്യോ​ഗി​ക​മാ​യി പ്രസി​ദ്ധീ​ക​രി​ക്കു​ന്ന​തിന്‌ ജോർജി​യ​യി​ലെ പബ്ലിക്‌ ഡിഫന്റ​റായ നാനാ ദെവ്‌ദാ​റി​യാ​നി​യു​ടെ ഓഫീ​സിൽ ഒരു പത്രസ​മ്മേ​ളനം വിളി​ച്ചു​കൂ​ട്ടി. സമ്മേളനം നടന്നു​കൊ​ണ്ടി​രി​ക്കെ വാസിലി മ്‌കാ​ലാ​വി​ഷ്‌വി​ലി​യും മറ്റു പത്തു പേരും പെട്ടെന്ന്‌ ആ ഓഫീ​സി​ലേക്ക്‌ ഇടിച്ചു​ക​യറി പരാതി​യ​ട​ങ്ങിയ 14 വാല്യ​ങ്ങ​ളും തട്ടി​യെ​ടു​ക്കാൻ ശ്രമിച്ചു. സമാധാ​ന​ത്തി​നും ജനാധി​പ​ത്യ​ത്തി​നും വേണ്ടി നില​കൊ​ള്ളുന്ന കോ​ക്കേ​ഷ്യൻ ഇൻസ്റ്റി​റ്റ്യൂ​ട്ടി​ന്റെ ഒരു പ്രതി​നി​ധി ആ പരാതി സംരക്ഷി​ക്കാൻ ഒരു ശ്രമം നടത്തി. എന്നാൽ അക്രമി​കൾ അവരെ​യും ആക്രമി​ച്ചു. മ്‌കാ​ലാ​വി​ഷ്‌വി​ലി അസഭ്യ വർഷം നടത്തി​ക്കൊ​ണ്ടി​രി​ക്കെ, അയാളു​ടെ അനുയാ​യി​കൾ ആ സംഘാ​ട​ക​രിൽനിന്ന്‌ 14-ൽ 12 വാല്യ​ങ്ങ​ളും ബലപ്ര​യോ​ഗ​ത്തി​ലൂ​ടെ കരസ്ഥമാ​ക്കി. ഇതു കണ്ട ഒരു വിദേശ നയത​ന്ത്രജ്ഞൻ “ഇത്‌ അവിശ്വ​സ​നീ​യം!” എന്നു പറഞ്ഞു. സന്തോ​ഷ​ക​ര​മെന്നു പറയട്ടെ, ഫെബ്രു​വരി 6-ന്‌ ആ പരാതി വീണ്ടും സാക്ഷി​ക​ളു​ടെ കസ്റ്റഡി​യിൽ വന്നു. 2001 ഫെബ്രു​വരി 13-ന്‌ അത്‌ ജോർജി​യ​യു​ടെ പ്രസി​ഡ​ന്റി​നു സമർപ്പി​ക്ക​പ്പെട്ടു.

“എല്ലാ വി​ദ്രോഹ പ്രവ​ത്തി​കൾക്കും . . . എതിരെ നടപടി സ്വീക​രി​ക്കു​ന്ന​താണ്‌”

ജോർജി​യ​യി​ലും അതു​പോ​ലെ ലോക​ത്തി​ന്റെ മറ്റെല്ലാ ഭാഗങ്ങ​ളി​ലു​മുള്ള യഹോ​വ​യു​ടെ സാക്ഷികൾ ഈ പരാതി സംബന്ധിച്ച്‌ ജോർജി​യ​യു​ടെ പ്രസി​ഡന്റ്‌ നടപടി കൈ​ക്കൊ​ള്ളു​ന്നതു കാണാൻ ആകാം​ക്ഷാ​പൂർവം കാത്തി​രി​ക്കു​ക​യാണ്‌. കഴിഞ്ഞ കാലത്ത്‌ പ്രസി​ഡന്റ്‌ ഷെവർഡ്‌നാ​ഡ്‌സെ യഹോ​വ​യു​ടെ സാക്ഷി​ക​ളു​ടെ നേർക്കുള്ള പീഡനത്തെ ആവർത്തി​ച്ചാ​വർത്തി​ച്ചു കുറ്റം വിധി​ച്ചി​ട്ടുണ്ട്‌. ഉദാഹ​ര​ണ​ത്തിന്‌, യഹോ​വ​യു​ടെ സാക്ഷി​ക​ളു​ടെ മേലുള്ള ആക്രമ​ണ​ങ്ങളെ “വെച്ചു​പൊ​റു​പ്പി​ക്കാ​നാ​വാത്ത” “സംഘടിത കൂട്ട​ക്കൊല” എന്ന്‌ 1999 ഒക്ടോബർ 18-ന്‌ പ്രസി​ഡന്റ്‌ വിളിച്ചു. 2000 ഒക്ടോബർ 20-ന്‌ യഹോ​വ​യു​ടെ സാക്ഷി​ക​ളു​ടെ ഭരണസം​ഘ​ത്തി​ലെ ഒരു അംഗത്തിന്‌ അയച്ച കത്തിൽ പ്രസി​ഡന്റ്‌ ഷെവർഡ്‌നാ​ഡ്‌സെ ഇങ്ങനെ പറഞ്ഞു: “അക്രമം അവസാ​നി​പ്പി​ക്കു​ന്ന​തിന്‌ ഞങ്ങൾ പരമാ​വധി പ്രവർത്തി​ക്കും.” അദ്ദേഹം ഇങ്ങനെ കൂട്ടി​ച്ചേർത്തു: “ജോർജി​യ​യി​ലെ അധികാ​രി​കൾ മനുഷ്യാ​വ​കാ​ശ​ങ്ങ​ളു​ടെ​യും മനസ്സാക്ഷി സ്വാത​ന്ത്ര്യ​ത്തി​ന്റെ​യും സംരക്ഷ​ണ​ത്തി​നാ​യി തികച്ചും പ്രതി​ജ്ഞാ​ബ​ദ്ധ​രാ​യി നില​കൊ​ള്ളു​മെന്നു ഞാൻ നിങ്ങൾക്ക്‌ ഉറപ്പു നൽകുന്നു.” തുടർന്ന്‌, 2000 നവംബർ 2-ന്‌ യൂറോ​പ്പി​ലെ സുരക്ഷാ-സഹകരണ കമ്മീഷന്‌ അയച്ച ഒരു കത്തിൽ പ്രസി​ഡന്റ്‌ ഷെവർഡ്‌നാ​ഡ്‌സെ ഇങ്ങനെ പ്രസ്‌താ​വി​ച്ചു: “[ജോർജി​യ​യി​ലെ ന്യൂനപക്ഷ മതങ്ങളു​ടെ സ്ഥാനം സംബന്ധിച്ച] ഈ പ്രശ്‌നം ഞങ്ങളുടെ ജനങ്ങളു​ടെ​യും ഗവൺമെ​ന്റി​ന്റെ​യും ഗൗരവ​മായ ശ്രദ്ധ പിടി​ച്ചു​പ​റ്റി​യി​ട്ടുള്ള ഒന്നായി തീർന്നി​രി​ക്കു​ന്നു.” അദ്ദേഹം കമ്മീഷന്‌ ഈ ഉറപ്പു നൽകി: “എല്ലാ വി​ദ്രോഹ പ്രവൃ​ത്തി​കൾക്കും ശാരീ​രിക അക്രമ​ത്തി​നും എതിരെ നടപടി സ്വീക​രി​ക്കു​ന്ന​താണ്‌, അതിന്‌ ഉത്തരവാ​ദി​കൾ ആയവർ നിയമ​ത്തി​ന്റെ മുന്നിൽ കണക്കു ബോധി​പ്പി​ക്കേ​ണ്ടി​വ​രും.”

പ്രസി​ഡന്റ്‌ ഷെവർഡ്‌നാ​ഡ്‌സെ​യു​ടെ വാക്കുകൾ പെട്ടെ​ന്നു​തന്നെ സത്യമാ​യി​ത്തീ​രും എന്നാണ്‌ യൂറോ​പ്പി​ലും ലോക​ത്തി​ന്റെ മറ്റു ഭാഗങ്ങ​ളി​ലു​മുള്ള തത്‌പ​ര​ക​ക്ഷി​ക​ളായ നിരീ​ക്ഷ​ക​രു​ടെ പ്രത്യാശ. അതിനി​ടെ, ഇവിടത്തെ ധീര സാക്ഷികൾ കടുത്ത പീഡന​ത്തി​ന്മ​ധ്യേ യഹോ​വയെ സേവി​ക്കു​ന്ന​തിൽ തുടരവേ, ലോക​മെ​മ്പാ​ടു​മുള്ള യഹോ​വ​യു​ടെ സാക്ഷികൾ തങ്ങളുടെ ഈ സഹവി​ശ്വാ​സി​കൾക്കാ​യി പ്രാർഥി​ക്കു​ന്ന​തിൽ തുടരു​ന്നു.—സങ്കീർത്തനം 109:3, 4; സദൃശ​വാ​ക്യ​ങ്ങൾ 15:29. (g02 1/22)

[അടിക്കു​റി​പ്പു​കൾ]

[28-ാം പേജിലെ ആകർഷക വാക്യം]

“എല്ലാ വി​ദ്രോഹ പ്രവൃ​ത്തി​കൾക്കും ശാരീ​രിക അക്രമ​ത്തി​നും എതിരെ നടപടി സ്വീക​രി​ക്കു​ന്ന​താണ്‌, അതിന്‌ ഉത്തരവാ​ദി​ക​ളാ​യവർ നിയമ​ത്തി​ന്റെ മുന്നിൽ കണക്കു ബോധി​പ്പി​ക്കേ​ണ്ടി​വ​രും.”—ജോർജി​യൻ പ്രസി​ഡന്റ്‌ എഡ്വേർഡ്‌ ഷെവർഡ്‌നാ​ഡ്‌സെ, നവംബർ 2, 2000

[28-ാം പേജിലെ ആകർഷക വാക്യം]

“[മതന്യൂ​ന​പ​ക്ഷ​ങ്ങൾക്ക്‌ എതി​രെ​യുള്ള അക്രമം] അവസാ​നി​ക്കു​മെ​ന്നും ജോർജി​യ​യി​ലെ എല്ലാ മതവി​ഭാ​ഗ​ങ്ങൾക്കും തങ്ങളുടെ മതവി​ശ്വാ​സങ്ങൾ പ്രകടി​പ്പി​ക്കു​ന്ന​തി​നുള്ള പൂർണ സ്വാത​ന്ത്ര്യം ആസ്വദി​ക്കാൻ കഴിയു​മെ​ന്നും ഞങ്ങൾ പ്രത്യാ​ശി​ക്കു​ന്നു.”—ദാവിദ്‌ സുംബാ​ഡ്‌സെ, ഐക്യ​നാ​ടു​ക​ളി​ലെ വാഷി​ങ്‌ടൺ ഡി.സി.-യിലുള്ള ജോർജിയ എംബസി​യി​ലെ സീനിയർ ഉപദേ​ഷ്ടാവ്‌, ജൂലൈ 3, 2001

[24-ാം പേജിലെ ചതുരം/ചിത്രം]

കൂട്ട ആക്രമണം തുടരു​ന്നു

യഹോ​വ​യു​ടെ സാക്ഷി​കളെ ആക്രമി​ച്ച​വർക്കെ​തി​രെ നടപടി എടുക്കു​ന്ന​തിൽ ജോർജി​യ​യി​ലെ അധികാ​രി​കൾ വീഴ്‌ച വരുത്തി​യ​തി​ന്റെ ഫലമായി സാക്ഷി​കൾക്കു കൂടുതൽ പീഡനം സഹി​ക്കേ​ണ്ടി​വ​ന്നി​രി​ക്കു​ന്നു.

ഉദാഹ​ര​ണ​ത്തിന്‌, 2001 ജനുവരി 22-ന്‌ ടിബി​ലി​സി​യി​ലെ സ്വാ​നെ​റ്റിസ്‌ ഉബാനി പ്രദേ​ശത്ത്‌ 70 സാക്ഷികൾ മതപര​മായ ഒരു യോഗം നടത്തി​ക്കൊ​ണ്ടി​രി​ക്കെ, മുൻ ഓർത്ത​ഡോ​ക്‌സ്‌ പുരോ​ഹി​ത​നായ വാസിലി മ്‌കാ​ലാ​വി​ഷ്‌വി​ലി​യും കൂട്ടരും അവിടെ അതി​ക്ര​മി​ച്ചു കയറി. അവർ സാക്ഷി​കളെ ഇടിക്കു​ക​യും തൊഴി​ക്കു​ക​യും മരം​കൊ​ണ്ടും ഇരുമ്പു​കൊ​ണ്ടും ഉള്ള കുരി​ശു​കൾ ഉപയോ​ഗി​ച്ചു പ്രഹരി​ക്കു​ക​യും ചെയ്‌തു. ഒരാൾ ഒരു വലിയ മരക്കു​രി​ശു​കൊണ്ട്‌ ഒരു സാക്ഷി​യു​ടെ തലയ്‌ക്കിട്ട്‌ അടിച്ച അടിയു​ടെ ശക്തിയിൽ ആ കുരി​ശി​ന്റെ തിരശ്ചീ​ന​മായ തണ്ട്‌ ഒടിഞ്ഞു​പോ​യി. ചില സാക്ഷി​കളെ ഒരു ഇരുട്ടു​മു​റി​യി​ലേക്കു വലിച്ചി​ഴച്ചു കൊണ്ടു​പോ​യി പലർ ചേർന്ന്‌ അവരെ പ്രഹരി​ച്ചു. പ്രായം​ചെന്ന സാക്ഷി​കളെ രണ്ടുനിര ആളുക​ളു​ടെ ഇടയി​ലൂ​ടെ ഓടിച്ചു, ഓടി​ക്കവേ ആ സാക്ഷി​കളെ മുഷ്ടി​കൊ​ണ്ടും കുരി​ശു​കൊ​ണ്ടും ഇടിച്ചു. രണ്ടു പുരു​ഷ​ന്മാർ 14 വയസ്സുള്ള നിസ്സഹാ​യ​നായ ഒരു ബാലനെ ഓടി​ച്ചിട്ട്‌ ഇടിക്കു​ക​യും തൊഴി​ക്കു​ക​യും ചെയ്‌തു. 30 വയസ്സുള്ള ഒരു അക്രമി ഒരു 12 വയസ്സു​കാ​രന്റെ പിന്നാലെ ഓടി​ച്ചെന്ന്‌ വലിയ ഒരു ജോർജി​യൻ ബൈബിൾകൊണ്ട്‌ അവന്റെ തലയ്‌ക്കി​ട്ട​ടി​ച്ചു. ഒരു സാക്ഷി പോലീ​സി​നെ വിളി​ക്കാൻ ആ വീട്ടിൽനി​ന്നു പുറ​ത്തേക്ക്‌ ഓടി​യ​പ്പോൾ അക്രമി​കൾ അദ്ദേഹത്തെ പിടി​കൂ​ടി മുഖത്തു ശക്തിയാ​യി ഇടിക്കാൻ തുടങ്ങി. വായിൽ രക്തം നിറഞ്ഞ അദ്ദേഹം ഛർദി​ക്കാൻ തുടങ്ങി. ഒടുവിൽ നിർദ​യ​രായ ആ അക്രമി​കൾ അവിടം വിട്ടു. അവർ ഇപ്പോ​ഴും ശിക്ഷി​ക്ക​പ്പെ​ടാ​തെ കഴിയു​ന്നു.

വീണ്ടും 2001 ഏപ്രിൽ 30-ന്‌ യഹോ​വ​യു​ടെ സാക്ഷി​ക​ളു​ടെ അതേ സഭ ഒരു യോഗം നടത്തി​ക്കൊ​ണ്ടി​രു​ന്ന​പ്പോൾ, മ്‌കാ​ലാ​വി​ഷ്‌വി​ലി​യു​ടെ അനുഗാ​മി​കൾ യോഗ​സ്ഥ​ല​ത്തേക്ക്‌ അതി​ക്ര​മി​ച്ചു​ക​യറി. അവർ ആ സാക്ഷി​കളെ പുറ​ത്തേക്കു വലിച്ചി​ഴ​ച്ചു​കൊ​ണ്ടു​പോ​യി ആണികൾ തറച്ച വടി​കൊണ്ട്‌ പ്രഹരി​ച്ചു. താമാസ്‌ എന്നു പേരുള്ള ഒരു സാക്ഷി​യു​ടെ വലതു​ക​യ്യും ഇടതു കൈത്ത​ണ്ട​യും ഇടത്തെ പാദവും ഇടത്തെ കവിളും ആണി​കൊണ്ട്‌ കീറി. മാത്രമല്ല, അദ്ദേഹ​ത്തി​ന്റെ തലയി​ലേറ്റ ആഴമായ ഒരു മുറി​വിന്‌ അഞ്ചു തുന്നി​ക്കെ​ട്ടു​കൾ ഇടേണ്ടി​വന്നു. ആ അക്രമി​കൾ യോഗം നടന്ന വീട്ടി​ലും നാശം വിതച്ചു, ഫർണി​ച്ച​റും വൈദ്യു​ത ഉപകര​ണ​ങ്ങ​ളും ജനാല​ക​ളു​മൊ​ക്കെ തല്ലിയു​ടച്ചു. തുടർന്ന്‌ അവർ യഹോ​വ​യു​ടെ സാക്ഷികൾ പ്രസി​ദ്ധീ​ക​രിച്ച സാഹി​ത്യ​ങ്ങൾ ഒരു വലിയ തീ കൂട്ടി അതിലിട്ട്‌ കത്തിച്ചു​ക​ളഞ്ഞു. 2001 ജൂൺ 7-ന്‌, ‘മനുഷ്യാ​വ​കാശ നിരീക്ഷണ സംഘടന’ ഈ അക്രമ​വും അടുത്ത കാലത്തെ മറ്റ്‌ അക്രമ​ങ്ങ​ളും അഴിച്ചു​വി​ട്ട​വരെ ശിക്ഷി​ക്കാൻ കൈ​ക്കൊണ്ട നടപടി​കളെ കുറിച്ച്‌ ജോർജി​യ​യി​ലെ ആഭ്യന്തര മന്ത്രി കാഹാ താർഗാ​മാ​ഡ്‌സെ​യോ​ടും ജോർജി​യ​യി​ലെ പ്രോ​സി​ക്യൂ​ട്ടർ ജനറലായ ഗിയാ മെപ്പാ​രി​ഷ്‌വി​ലി​യോ​ടും വിശദീ​ക​രണം ആവശ്യ​പ്പെട്ടു. ഇതുവ​രെ​യും ആ അക്രമി​ക​ളിൽ ആരും ശിക്ഷി​ക്ക​പ്പെ​ട്ടി​ട്ടില്ല.

[25-ാം പേജിലെ ചതുരം]

പോലീസിന്റെ പങ്ക്‌

യഹോ​വ​യു​ടെ സാക്ഷികൾ കയറിയ 19 ബസ്സുകൾ 2000 സെപ്‌റ്റം​ബർ 16-ന്‌ ഒരു കൺ​വെൻ​ഷൻ സ്ഥലത്ത്‌ എത്താതി​രി​ക്കാൻ മാർനെ​യു​ളി നഗരത്തിൽ നിന്നുള്ള പോലീ​സു​കാർ വഴി തടഞ്ഞു. വഴിതടഞ്ഞ ഒരിടത്ത്‌ അക്രമി​കൾ സാക്ഷി​ക​ളു​ടെ ബസ്സിനു നേരെ കല്ലെറി​ഞ്ഞു. ഒരു സഹോ​ദ​രി​യു​ടെ തലയ്‌ക്ക്‌ ഏറു കൊണ്ടു. കുറെ അക്രമി​കൾ നിരവധി സാക്ഷി​കളെ ബസ്സിൽനി​ന്നു വലിച്ചി​റക്കി പ്രഹരി​ച്ചു, അതേസ​മയം മറ്റ്‌ അക്രമി​കൾ ബസ്സിലുള്ള യാത്ര​ക്കാ​രു​ടെ സാധനങ്ങൾ കവർച്ച ചെയ്‌തു. എന്നാൽ കൺ​വെൻ​ഷൻ സ്ഥലം നശിപ്പി​ക്കാ​നാ​യി ഇറങ്ങി​പു​റ​പ്പെട്ട മ്‌കാ​ലാ​വി​ഷ്‌വി​ലി​യു​ടെ അനുയാ​യി​കൾ കയറിയ ബസ്സുകൾ ഒരു തടസ്സവും കൂടാതെ കടന്നു​പോ​കാൻ പോലീസ്‌ അനുമതി നൽകി. ആ അക്രമി​കൾ ഒന്നര ടൺ മതസാ​ഹി​ത്യ​ങ്ങൾ കത്തിച്ചു​ക​ളഞ്ഞു. അവിടെ ഉണ്ടായി​രുന്ന പോലീ​സു​കാർ സാക്ഷി​കളെ തല്ലുന്ന​തിൽ പങ്കെടു​ത്തു.

ആഭ്യന്തര മന്ത്രാ​ലയം ഈ അക്രമത്തെ കുറിച്ച്‌ അന്വേ​ഷിച്ച്‌ “ഉചിത​മായ നടപടി​കൾ” സ്വീക​രി​ക്കു​മെന്ന്‌ കോക്ക​സസ്‌ പ്രസ്‌ റിപ്പോർട്ടു ചെയ്‌തു. അക്രമി​കൾക്കെ​തി​രെ നടപടി എടുക്കു​ന്ന​തിന്‌ അധികാ​രി​കൾക്കു മതിയായ കാരണ​മുണ്ട്‌. കാരണം, ജോർജി​യ​യു​ടെ ഭരണഘ​ട​ന​യു​ടെ 25-ാം വകുപ്പ്‌ എല്ലാ ആളുകൾക്കും പരസ്യ​യോ​ഗം നടത്താ​നുള്ള അവകാശം ഉറപ്പു നൽകു​ന്നുണ്ട്‌. എന്നാൽ, ഇതുവരെ ആ അക്രമി​ക​ളിൽ ആരും ശിക്ഷി​ക്ക​പ്പെ​ട്ടി​ട്ടില്ല. രണ്ടു കൺ​വെൻ​ഷ​നു​കൾ നടത്തു​ന്ന​തിൽനി​ന്നു യഹോ​വ​യു​ടെ സാക്ഷി​കളെ തടയാൻ മാർനെ​യൂ​ളി​യി​ലെ​യും സുഗ്‌ദി​ദി​യി​ലെ​യും അധികാ​രി​കളെ “സർവോ​പരി ജോർജിയ!” എന്ന രാഷ്‌ട്രീയ പ്രസ്ഥാ​ന​ത്തി​ന്റെ നേതാ​വായ ഗൂരാം ഷാരാ​ഡ്‌സെ സ്വാധീ​നി​ച്ചി​രു​ന്ന​താ​യി പ്രസ്‌തുത ആക്രമണം നടന്ന്‌ അഞ്ചു മാസങ്ങൾക്കു ശേഷം അദ്ദേഹ​ത്തി​ന്റെ ഒരു വക്കീൽ സമ്മതിച്ചു പറഞ്ഞതാ​യി കെസ്റ്റൺ ന്യൂസ്‌ സർവീസ്‌ റിപ്പോർട്ടു ചെയ്‌തു.

[25-ാം പേജിലെ ചതുരം]

ജോർജിയയുടെ ഭരണഘടന സംരക്ഷണം ഉറപ്പു നൽകുന്നു

പിൻവ​രു​ന്നതു സൂചി​പ്പി​ക്കു​ന്നതു പോലെ, 1995 ആഗസ്റ്റ്‌ 24-ന്‌ നിലവിൽവന്ന ജോർജി​യ​യു​ടെ ഭരണഘടന മതസ്വാ​ത​ന്ത്ര്യ​വും മൃഗീ​യ​മായ ആക്രമ​ണ​ങ്ങ​ളിൽ നിന്നുള്ള സംരക്ഷ​ണ​വും ഉറപ്പേ​കു​ന്നു:

വകുപ്പ്‌ 17—(1) ഒരു വ്യക്തി​യു​ടെ അന്തസ്സും മാന്യ​ത​യും ലംഘി​ക്ക​പ്പെ​ടാൻ പാടില്ല. (2) പീഡന​വും മനുഷ്യ​ത്വ​ഹീ​ന​മോ മൃഗീ​യ​മോ അധമമോ ആയ പെരു​മാ​റ്റ​വും/ശിക്ഷയും അനുവ​ദ​നീ​യമല്ല.

വകുപ്പ്‌ 19—(1) ഏതൊരു വ്യക്തി​ക്കും സംസാരം, അഭി​പ്രാ​യം, മനസ്സാക്ഷി, മതം, വിശ്വാ​സം എന്നീ കാര്യ​ങ്ങ​ളി​ലുള്ള സ്വാത​ന്ത്ര്യം ആസ്വദി​ക്കു​ന്ന​തിന്‌ അവകാ​ശ​മുണ്ട്‌. (2) ഒരു വ്യക്തിയെ തന്റെ ആശയങ്ങ​ളു​ടെ​യോ വിശ്വാ​സ​ങ്ങ​ളു​ടെ​യോ മതത്തി​ന്റെ​യോ പേരിൽ പീഡി​പ്പി​ക്കാൻ പാടില്ല.

വകുപ്പ്‌ 24—(1) ഏതൊ​രാൾക്കും വിവരങ്ങൾ സ്വത​ന്ത്ര​മാ​യി സ്വീക​രി​ക്കാ​നും പ്രചരി​പ്പി​ക്കാ​നും വാചി​ക​മാ​യോ എഴുത്തി​ലൂ​ടെ​യോ മറ്റേ​തെ​ങ്കി​ലും രൂപത്തി​ലോ തന്റെ അഭി​പ്രാ​യം പ്രകടി​പ്പി​ക്കാ​നും പ്രചരി​പ്പി​ക്കാ​നു​മുള്ള സ്വാത​ന്ത്ര്യ​മുണ്ട്‌.

വകുപ്പ്‌ 25—(1) സൈന്യ​ത്തി​ലോ പോലീ​സി​ലോ സുരക്ഷാ വിഭാ​ഗ​ങ്ങ​ളി​ലോ അല്ലാത്ത ഏതൊ​രാൾക്കും മുൻകൂർ അനുവാ​ദ​മി​ല്ലാ​തെ നിരാ​യു​ധ​രാ​യി ഒരു കെട്ടി​ട​ത്തി​ന​ക​ത്തു​വെ​ച്ചോ പുറത്തു​വെ​ച്ചോ പരസ്യ യോഗങ്ങൾ നടത്താ​നുള്ള അവകാ​ശ​മുണ്ട്‌.

[26-ാം പേജിലെ ചതുരം]

ലോകം നിരീ​ക്ഷി​ക്കു​ക​യാണ്‌

യഹോ​വ​യു​ടെ സാക്ഷി​ക​ളു​ടെ നേർക്കുള്ള പീഡനം തടയു​ന്ന​തി​ലുള്ള ജോർജി​യ​യു​ടെ പരാജ​യത്തെ അന്താരാ​ഷ്‌ട്ര സമൂഹം എങ്ങനെ​യാ​ണു വീക്ഷി​ക്കു​ന്നത്‌?

ഐക്യ​നാ​ടു​ക​ളു​ടെ​യും ഗ്രേറ്റ്‌ ബ്രിട്ട​ന്റെ​യും ഗവൺമെ​ന്റു​കൾ സംയു​ക്ത​മാ​യി ഇങ്ങനെ പ്രഖ്യാ​പി​ച്ചു: “യഹോ​വ​യു​ടെ സാക്ഷി​ക​ളു​ടെ ഒരു യോഗം അലങ്കോ​ല​പ്പെ​ടു​ത്ത​പ്പെട്ടു. നിരവധി ആളുകൾ മൃഗീ​യ​മായ പെരു​മാ​റ്റ​ത്തിന്‌ ഇരകളാ​യി, മറ്റുള്ള​വർക്കു യോഗ​സ്ഥ​ല​ത്തേ​ക്കുള്ള പ്രവേ​ശനം നിഷേ​ധി​ക്ക​പ്പെട്ടു. അമേരി​ക്കൻ ഐക്യ​നാ​ടു​ക​ളു​ടെ​യും ഗ്രേറ്റ്‌ ബ്രിട്ട​ന്റെ​യും എംബസി​കൾ ഈ സംഭവ​ത്തി​ലും ജോർജി​യ​യിൽ മതസ്വാ​ത​ന്ത്ര്യ​ത്തി​നുള്ള അവകാശം ഉള്ളവർക്ക്‌ എതിരെ സമീപ​കാ​ലത്തു നടന്ന മറ്റു ഗുരു​ത​ര​മായ പ്രവർത്ത​ന​ങ്ങ​ളി​ലും ആകുല​രാണ്‌. . . . ഈ സംഭവ​ങ്ങളെ കുറിച്ച്‌ അന്വേ​ഷണം നടത്താ​നും സകലരു​ടെ​യും മതപര​മായ അവകാ​ശങ്ങൾ ആദരി​ക്ക​പ്പെ​ടു​ന്നു എന്ന്‌ ഉറപ്പു വരുത്തു​ന്ന​തിൽ ശുഷ്‌കാ​ന്തി കാണി​ക്കാ​നും ജോർജി​യ​യി​ലെ ഗവൺമെ​ന്റി​നോ​ടു ഞങ്ങൾ ആവശ്യ​പ്പെ​ടു​ന്നു.”

യൂറോ​പ്യൻ യൂണിയൻ—ജോർജിയ പാർല​മെ​ന്ററി സഹകരണ കമ്മിറ്റി​യി​ലേ​ക്കുള്ള പ്രതി​നി​ധി സംഘത്തി​ന്റെ അധ്യക്ഷ​യായ ഉർസൂല ഷ്‌​ലൈ​ഹെർ ഇപ്രകാ​രം പ്രസ്‌താ​വി​ച്ചു: “അടുത്ത​കാ​ലത്ത്‌ പത്ര​പ്ര​വർത്ത​ക​രു​ടെ​യും മനുഷ്യാ​വ​കാശ പ്രവർത്ത​ക​രു​ടെ​യും യഹോ​വ​യു​ടെ സാക്ഷി​ക​ളു​ടെ​യും നേർക്കു​ണ്ടായ അക്രമ പരമ്പര​യി​ലെ ഒടുവി​ലത്തെ സംഭവം സംബന്ധിച്ച്‌ യൂറോ​പ്യൻ പാർല​മെന്റ്‌ പ്രതി​നി​ധി​സം​ഘ​ത്തി​ന്റെ പേരിൽ എന്റെ ഉത്‌കണ്‌ഠ പ്രകട​മാ​ക്കാൻ ഞാൻ ആഗ്രഹി​ക്കു​ന്നു . . . ‘മനുഷ്യാ​വ​കാ​ശ​ങ്ങ​ളും അടിസ്ഥാന സ്വാത​ന്ത്ര്യ​ങ്ങ​ളും സംരക്ഷി​ക്കു​ന്ന​തി​നാ​യുള്ള യൂറോ​പ്യൻ ഉടമ്പടി’യിൽ ഒപ്പു​വെ​ച്ചു​കൊണ്ട്‌ ഏതു മൗലിക മനുഷ്യാ​വ​കാ​ശങ്ങൾ സംരക്ഷി​ക്കാ​നുള്ള പ്രതി​ബ​ദ്ധ​ത​യാ​ണോ ജോർജിയ ഏറ്റെടു​ത്തി​രി​ക്കു​ന്നത്‌ അവയ്‌ക്കു നേരെ​യുള്ള കടുത്ത ആക്രമ​ണ​മാ​യി ഞാൻ ഇത്തരം പ്രവർത്ത​നത്തെ കണക്കാ​ക്കു​ന്നു.”

യഹോ​വ​യു​ടെ സാക്ഷി​ക​ളു​ടെ മേലുള്ള ആക്രമ​ണത്തെ കുറിച്ച്‌ യൂറോ​പ്പി​ലെ യു.എസ്‌. സുരക്ഷാ-സഹകരണ കമ്മീഷൻ പ്രസി​ഡന്റ്‌ ഷെവർഡ്‌നാ​ഡ്‌സെ​യ്‌ക്ക്‌ ഇപ്രകാ​രം എഴുതി: “അടുത്ത​കാ​ലത്തെ സംഭവങ്ങൾ അങ്ങേയറ്റം ആകുല​പ്പെ​ടു​ത്തു​ന്ന​താണ്‌, ജോർജി​യ​യി​ലെ സംഭവങ്ങൾ നിയ​ന്ത്ര​ണാ​തീ​ത​മാ​കു​ക​യാ​ണോ എന്ന ഭയാശങ്ക അവ ഉയർത്തു​ന്നു. അതി​നെ​തി​രെ നടപടി സ്വീക​രി​ക്കാ​ത്ത​പക്ഷം, മതന്യൂ​ന​പ​ക്ഷ​ങ്ങൾക്കു നേരെ അക്രമം അഴിച്ചു​വി​ടു​ന്ന​വർക്ക്‌ അതു തങ്ങളുടെ അക്രമ​ങ്ങ​ളിൽ തുടരാ​നുള്ള ഒരു പ്രോ​ത്സാ​ഹനം ആകും. രാഷ്‌ട്ര​ത്ത​ലവൻ എന്ന നിലയിൽ, താങ്കൾ പൊതു​ജ​ന​ങ്ങൾക്കും ജോർജി​യ​യി​ലെ ഉദ്യോ​ഗ​സ്ഥർക്കും മാതൃക വെക്കു​ക​യും ശക്തവും വ്യക്തവു​മായ രണ്ടു സന്ദേശങ്ങൾ അവരെ അറിയി​ക്കു​ക​യും ചെയ്യു​മെന്നു ഞങ്ങൾ പ്രത്യാ​ശി​ക്കു​ന്നു: മറ്റു മതങ്ങളെ സംബന്ധിച്ച ഒരുവന്റെ കാഴ്‌ച​പ്പാട്‌ എന്തുതന്നെ ആയിരു​ന്നാ​ലും, അത്‌ ആചരി​ക്കു​ന്ന​വർക്കെ​തി​രെ യാതൊ​രു​വിധ അക്രമ​വും അവലം​ബി​ക്കു​ന്നത്‌ അനുവ​ദ​നീ​യമല്ല; അത്തരം അക്രമ​ത്തിൽ ഏർപ്പെ​ടു​ന്ന​വർക്ക്‌—ഈ നിന്ദാ​ക​ര​മായ പ്രവൃ​ത്തി​കളെ സഹായി​ക്കു​ക​യോ വാസ്‌ത​വ​ത്തിൽ അവയിൽ പങ്കെടു​ക്കു​ക​യോ ചെയ്യുന്ന പോലീ​സു​കാർക്ക്‌ പ്രത്യേ​കി​ച്ചും—നിയമം അനുവ​ദി​ക്കുന്ന പരമാ​വധി ശിക്ഷ ലഭിക്കും.” യു.എസ്‌. കോൺഗ്ര​സി​ലെ ഏഴ്‌ അംഗങ്ങൾ ആ കത്തിൽ ഒപ്പിട്ടി​രു​ന്നു.

യൂറോ​പ്പി​ലെ സുരക്ഷാ-സഹകരണ കമ്മീഷന്റെ സഹ-അധ്യക്ഷ​നായ യു.എസ്‌. കോൺഗ്രസ്‌ അംഗമായ ക്രിസ്റ്റഫർ എച്ച്‌. സ്‌മിത്ത്‌ ഇങ്ങനെ പ്രസ്‌താ​വി​ച്ചു: “തങ്ങൾ ചെയ്യു​മെന്നു പറഞ്ഞതു​പോ​ലെ, ജോർജിയ എന്തു​കൊ​ണ്ടാ​ണു മതസ്വാ​ത​ന്ത്ര്യ​വും മനുഷ്യാ​വ​കാ​ശ​ങ്ങ​ളും ഉയർത്തി​പ്പി​ടി​ക്കാ​ത്തത്‌? . . . സാഹി​ത്യ​ങ്ങൾ കത്തിക്കു​ന്നത്‌ ഹെൽസി​ങ്കി ഉടമ്പടി​ക്കു കടകവി​രു​ദ്ധ​മാണ്‌, അതു നാസി ഭരണകാ​ലത്ത്‌ പുസ്‌ത​കങ്ങൾ കത്തിച്ച സംഭവ​ങ്ങ​ളെ​യാ​ണു കമ്മീഷ​നി​ലെ ഞങ്ങളിൽ ചിലരു​ടെ മനസ്സി​ലേക്കു കൊണ്ടു​വ​രു​ന്നത്‌.”

‘മനുഷ്യാ​വ​കാശ നിരീക്ഷണ സംഘടന’യുടെ യൂറോപ്പ്‌-മധ്യേ​ഷ്യാ വിഭാ​ഗ​ത്തി​ന്റെ താത്‌കാ​ലിക എക്‌സി​ക്യൂ​ട്ടീവ്‌ ഡയറക്ടർ ഇപ്രകാ​രം എഴുതി: “മതന്യൂ​ന​പ​ക്ഷ​ങ്ങൾക്കു നേരെ മുമ്പു നടന്ന കടുത്ത ആക്രമ​ണ​ങ്ങൾക്ക്‌ ഉത്തരവാ​ദി​ക​ളാ​യ​വരെ ശിക്ഷി​ക്കാൻ ജോർജി​യ​യി​ലെ ഗവൺമെന്റ്‌ പരാജ​യ​പ്പെട്ടു എന്ന സംഗതി കണക്കി​ലെ​ടു​ക്കു​മ്പോൾ, കൂടു​ത​ലായ അത്തരം അക്രമങ്ങൾ ഉണ്ടാകാ​നുള്ള സാധ്യത സംബന്ധിച്ച്‌ ‘മനുഷ്യാ​വ​കാശ നിരീക്ഷണ സംഘടന’ വളരെ ആകുല​പ്പെ​ടു​ന്നു. ഉടനടി ആക്രമ​ണങ്ങൾ അവസാ​നി​പ്പി​ക്കു​ന്ന​തിന്‌ ഉത്തരവി​ടാ​നും അതിനു കാരണ​ക്കാ​രാ​യ​വരെ ശിക്ഷി​ക്കാ​നും ഞങ്ങൾ നിങ്ങ​ളോട്‌ അടിയ​ന്തി​ര​മാ​യി ആവശ്യ​പ്പെ​ടു​ക​യാണ്‌.”

ലോകം നിരീ​ക്ഷി​ച്ചു​കൊ​ണ്ടി​രി​ക്കു​ക​യാണ്‌. ജോർജിയ അതിന്റെ അന്താരാ​ഷ്‌ട്ര പ്രതി​ബ​ദ്ധ​ത​കൾക്കു ചേർച്ച​യിൽ പ്രവർത്തി​ക്കു​മോ? ജോർജി​യ​യു​ടെ സത്‌കീർത്തി അപകട​ത്തി​ലാണ്‌.

[27-ാം പേജിലെ ചതുരം]

യൂറോപ്യൻ കോട​തി​യിൽ ഒരു അപ്പീൽ

ജോർജി​യ​യി​ലെ നിയമ​പാ​ലകർ തുടർന്നു​പോ​രുന്ന നിഷ്‌ക്രി​യ​ത്വ​ത്തിന്‌ എതിരാ​യി 2001 ജൂൺ 29-ന്‌ യഹോ​വ​യു​ടെ സാക്ഷികൾ ‘യൂറോ​പ്യൻ മനുഷ്യാ​വ​കാശ കോടതി’യിൽ ഒരു ഔദ്യോ​ഗിക അപേക്ഷ സമർപ്പി​ച്ചു. ഏതാനും ദിവസ​ങ്ങൾക്കു ശേഷം, അതായത്‌ 2001 ജൂലൈ 2-ന്‌, അതു സംബന്ധിച്ച്‌ യൂറോ​പ്യൻ കോടതി മറുപടി നൽകി. ഈ കേസിനു “മുൻഗണന കൊടു​ക്കണം” എന്ന അഭി​പ്രാ​യ​മാണ്‌ ജുഡീ​ഷ്യൽ ചേംബ​റി​ന്റെ പ്രസി​ഡ​ന്റിന്‌ ഉള്ളതെന്നു കോടതി രജിസ്‌ട്രാർ എഴുതി.

[22-ാം പേജിലെ മാപ്പ്‌]

(പൂർണ​രൂ​പ​ത്തിൽ കാണു​ന്ന​തിന്‌ പ്രസി​ദ്ധീ​ക​രണം നോക്കുക)

റഷ്യ

ജോർജിയ

കരിങ്കടൽ

ടർക്കി

[22-ാം പേജിലെ ചിത്രം]

മേയ്‌ 13, 2001-ഒരു മതതീ​വ്ര​വാ​ദി തീവെ​ച്ച​തി​ന്റെ ഫലമായി ഷാമോ​യാൻ കുടും​ബ​ത്തി​നു വീടു നഷ്ടപ്പെട്ടു

[22-ാം പേജിലെ ചിത്രം]

ജൂൺ 17, 2001-യഹോ​വ​യു​ടെ സാക്ഷി​ക​ളു​ടെ യോഗ​ത്തിൽ സംബന്ധി​ക്കവേ, ക്രൂര​മായ അക്രമ​ത്തിന്‌ ഇരയായ ഗിയോർഗി ബാഗി​ഷ്‌വി​ലി

[23-ാം പേജിലെ ചിത്രം]

ജൂലൈ 11, 2001-യഹോ​വ​യു​ടെ സാക്ഷി​ക​ളു​ടെ ഒരു യോഗ​ത്തിൽ സംബന്ധി​ക്കവേ, ഡേവിഡ്‌ സാലാ​റി​ഡ്‌സെ​യ്‌ക്ക്‌ തലയിൽ വടി​കൊ​ണ്ടു പ്രഹര​മേറ്റു, അക്രമി​കൾ അദ്ദേഹ​ത്തി​ന്റെ പുറത്തും നെഞ്ചി​ലും അടിച്ചു

[27-ാം പേജിലെ ചിത്രം]

ജൂൺ 28, 2000-ടിബി​ലി​സി​യിൽ യഹോ​വ​യു​ടെ സാക്ഷി​ക​ളു​ടെ ഒരു സാഹിത്യ ഡിപ്പോ അക്രമി​കൾ തീവെച്ചു നശിപ്പി​ച്ചു

[27-ാം പേജിലെ ചിത്രം]

ആഗസ്റ്റ്‌ 16, 2000-ഗ്‌ല്‌ദാ​നി നാഡ്‌സാ​ലാ​ഡെവി കോട​തി​മു​റി​യിൽവെച്ച്‌ മ്‌കാ​ലാ​വി​ഷ്‌വി​ലി​യു​ടെ ഒരു അനുയാ​യി കനേഡി​യൻ സാക്ഷി​യായ വോറെൻ ഷൂഫെൽറ്റി​നെ ആക്രമി​ച്ചു

[28-ാം പേജിലെ ചിത്ര​ങ്ങൾക്ക്‌ കടപ്പാട്‌]

AP Photo/Shakh Aivazov