മതപരമായ അവകാശങ്ങളെ ഗ്രീസ് പിന്തുണയ്ക്കുന്നു
മതപരമായ അവകാശങ്ങളെ ഗ്രീസ് പിന്തുണയ്ക്കുന്നു
കഴിഞ്ഞവർഷം, ചരിത്രത്തിൽ ആദ്യമായി, ഗ്രീസിലെ ഗവൺമെന്റ് സ്പോർട്സ് ആവശ്യങ്ങൾക്കായി തങ്ങൾ ഉപയോഗിക്കുന്ന സൗകര്യങ്ങളിൽ ഏറ്റവും മികച്ച ഒന്ന് യഹോവയുടെ സാക്ഷികൾക്ക് ഒരു വലിയ കൺവെൻഷൻ നടത്തുന്നതിനായി വിട്ടുകൊടുത്തു. 20,000-ത്തോളം പേർക്ക് ഇരിക്കാവുന്നതും ശീതീകരണ സംവിധാനങ്ങളോടു കൂടിയതുമായ ഈ ഇൻഡോർ ഒളിമ്പിക് സ്പോർട്സ് ഹാൾ ഏഥൻസിൽ നടക്കാനിരിക്കുന്ന 2004-ലെ ഒളിമ്പിക് ഗെയിംസിനായി ഉപയോഗിക്കാൻ പോകുന്ന കോംപ്ലക്സിന്റെ ഭാഗമാണ്.
ഇതിനു മുമ്പ് 1963-ലും 1988-ലും കൺവെൻഷനുകൾക്കായി ഏഥൻസിലെ വലിയ കായിക വേദികൾ ഉപയോഗിക്കാൻ സാക്ഷികൾ ഒരുക്കങ്ങൾ നടത്തിയിട്ടുണ്ട് എന്നതു ശ്രദ്ധാർഹമാണ്. എന്നാൽ ആ രണ്ടു തവണയും അധികാരികൾ ഗ്രീക്ക് ഓർത്തഡോക്സ് സഭയുടെ ഭീഷണികൾക്കു വഴങ്ങി സാക്ഷികൾക്ക് അത് ഉപയോഗിക്കാനുള്ള അനുമതി നിഷേധിച്ചു.
വ്യത്യസ്തമായ ഒരു പ്രതികരണം
രണ്ടായിരത്തൊന്ന് ഫെബ്രുവരിയിൽ സാക്ഷികൾ ഒളിമ്പിക് സ്പോർട്സ് ഹാൾ—അവരുടെ സംഖ്യയെ ഉൾക്കൊള്ളാൻ തക്ക വലിപ്പമുള്ള ഏതാനും ചില ഹാളുകളിൽ ഒന്ന്—ഉപയോഗിക്കാനുള്ള അപേക്ഷ സമർപ്പിച്ചു. എന്നാൽ ചരിത്രം ആവർത്തിക്കപ്പെടുമോ എന്ന ചോദ്യം ഉയർന്നുവന്നു. ഭയപ്പെട്ടിരുന്നതു പോലെതന്നെ തുടക്കത്തിൽ അധികാരികളിൽനിന്നുള്ള പ്രതികരണം അനുകൂലമായിരുന്നില്ല.
ഉടനെ, മുൻവിധി കൂടാതെ ന്യായമായി കാര്യങ്ങൾ ചെയ്യുന്നവരെന്ന് ഖ്യാതിയുള്ള ഉയർന്ന ഉദ്യോഗസ്ഥരെ സാക്ഷികൾ സമീപിക്കുകയുണ്ടായി. ആരാധനയ്ക്കും സമാധാനപരമായ കൂടിവരവിനുമുള്ള ഭരണഘടനാ അവകാശങ്ങളെ ഉയർത്തിപ്പിടിക്കാൻ അവർ സന്നദ്ധരാകുമോ? മതപരമായ സമ്മർദത്തെ അവർ ചെറുത്തുനിൽക്കുമോ? അവർ അങ്ങനെ ചെയ്തു. മുൻ തീരുമാനത്തെ റദ്ദാക്കിക്കൊണ്ട് സാക്ഷികൾക്ക് സ്പോർട്സ് ഹാൾ ഉപയോഗിക്കാനുള്ള അനുമതി നൽകുന്ന പുതിയ തീരുമാനം നിലവിൽവന്നു. അങ്ങനെ 2001 ജൂലൈ 27-29 വരെയുള്ള തീയതികളിൽ അവിടെ തങ്ങളുടെ
കൺവെൻഷൻ നടത്താൻ സാക്ഷികൾ ആസൂത്രണങ്ങൾ ചെയ്തു.അതേസമയം തെസ്സലൊനീക്യയിലുള്ള, ഗവൺമെന്റ് വകയായ മറ്റൊരു ഇൻഡോർ സ്റ്റേഡിയം—പലേ ദെ സ്പോർട്ട്—ഉപയോഗിക്കാനുള്ള അനുവാദവും അധികാരികൾ സാക്ഷികൾക്കു നൽകി.
തീവ്ര സമ്മർദം പരാജയപ്പെടുന്നു
ഏഥൻസിലെ കൺവെൻഷൻ തുടങ്ങാനുള്ള ദിവസം അടുത്തു വന്നുകൊണ്ടിരിക്കെ അസ്വസ്ഥജനകമായ ചോദ്യങ്ങൾ ബാക്കിനിന്നു: ഓർത്തഡോക്സ് പുരോഹിതന്മാരിൽനിന്നുള്ള സമ്മർദത്തിനു മധ്യേയും അധികാരികൾ തങ്ങളുടെ വാക്കു പാലിക്കുമോ? നിയമവിരുദ്ധ ഘടകങ്ങളിൽനിന്നുള്ള ശല്യമൊന്നും കൂടാതെ സാക്ഷികൾക്കു തങ്ങളുടെ കൂടിവരവ് ആസ്വദിക്കാൻ കഴിയുമോ?
കാലങ്ങളായി ചെയ്തു വന്നിരുന്നതു പോലെ, തങ്ങളുടെ സ്വാധീനം ഉപയോഗിച്ച് കൺവെൻഷൻ തടസ്സപ്പെടുത്താൻ ഓർത്തഡോക്സ് സഭ ശ്രമിക്കാതിരുന്നില്ല. കൺവെൻഷനെ കുറിച്ചു പരാമർശിക്കരുതെന്ന് ഓർത്തഡോക്സ് പുരോഹിതന്മാർ ആവശ്യപ്പെട്ടതായി ടിവി സ്റ്റേഷനുകൾ വെളിപ്പെടുത്തി. എന്നാൽ ഒടുവിൽ, സഭയുടെ ശ്രമങ്ങളെല്ലാം പരാജയപ്പെട്ടു.
വൈരുദ്ധ്യമെന്നു പറയട്ടെ, സാക്ഷികൾ ഒരു രഹസ്യ മതമാണെന്ന് ഓർത്തഡോക്സ് സഭ ആരോപിച്ചിട്ടുണ്ട്. എന്നാൽ വാസ്തവത്തിൽ സ്പോർട്സ് ഹാളിൽ നടക്കുന്നത് എന്താണെന്നു പൊതുജനം അറിയരുതെന്നുള്ള നിർബന്ധം ആ സഭയ്ക്കു തന്നെയായിരുന്നു. വാർത്താ മാധ്യമ രംഗത്തു പ്രവർത്തിക്കുന്ന ധീരരായ വ്യക്തികൾ പക്ഷേ, പുരോഹിത സമ്മർദത്തിനു വഴങ്ങിയില്ല എന്നതു സന്തോഷകരമാണ്. അവർ കൺവെൻഷനെ കുറിച്ചു വ്യാപകവും മുൻവിധി വിമുക്തവുമായ വാർത്ത നൽകി.
കൂടാതെ, ആയിരക്കണക്കിനു പ്രതിനിധികൾ കൺവെൻഷനെ കുറിച്ചു പൊതുജനത്തെ അറിയിക്കുന്നതിലും അവരുമായി തങ്ങളുടെ വിശ്വാസങ്ങൾ പങ്കുവെക്കുന്നതിലും ഏർപ്പെട്ടു. പോകുന്നിടത്തെല്ലാം കൺവെൻഷൻ പ്രതിനിധികളെ അവരുടെ മഞ്ഞനിറത്തിലുള്ള ബാഡ്ജുകൾ തിരിച്ചറിയിച്ചു. സാക്ഷികൾ ക്ഷണിച്ച പലരും കൺവെൻഷനു വന്നതിന്റെ ഫലമായി സ്പോർട്സ് ഹാളിലെ അവസാന ദിവസത്തെ ഹാജർ 15,760 ആയി ഉയർന്നു. ജൂലൈയിലെ അവസാന രണ്ടു വാരാന്തങ്ങളിൽ തെസ്സലൊനീക്യയിലെ പലേ ദെ സ്പോർട്ടിൽ നടന്ന കൺവെൻഷനുകളുടെ മൊത്തം ഹാജർ 13,173 ആയിരുന്നു.
നിരീക്ഷകരിൽ മതിപ്പുളവാക്കി
യഹോവയുടെ സാക്ഷികളായ 2,604 സ്വമേധയാ സേവകരുടെ ഒരു വൻ സൈന്യം സ്പോർട്സ് ഹാൾ വൃത്തിയാക്കുന്നതിലും പെയിന്റ് അടിക്കുന്നതിലും കൺവെൻഷനു വേണ്ട ഒരുക്കങ്ങൾ നടത്തുന്നതിലും പങ്കുപറ്റിയപ്പോൾ ഹാൾ ഭാരവാഹികൾ പറഞ്ഞു: “ഇവിടെ ഇതിനു മുമ്പൊരിക്കലും നടന്നിട്ടില്ലാത്ത ഈ സംഗതി സ്വന്തം കണ്ണാൽ കാണാനാണു ഞങ്ങൾ വന്നത്.” ഒരു വ്യക്തി ഇങ്ങനെ അഭിപ്രായപ്പെട്ടു: “നിങ്ങൾ എല്ലാ വർഷവും ഈ ഹാൾ ഉപയോഗിക്കണം, അങ്ങനെയാകുമ്പോൾ ഇതിന് ആകപ്പാടെയൊരു പുതുമ കൈവരും.”
വളരെ മതിപ്പു തോന്നിയ സ്പോർട്സ് ഹാൾ പൊതുകാര്യ ഡയറക്ടർ ആന്ത്രിയാസ് വാർഡാകിസ് പറഞ്ഞു: “നിങ്ങൾ ഈ ഹാളിനെ മനോഹരമാക്കിയിരിക്കുന്നു. ഇവിടത്തെ കാര്യങ്ങൾ നോക്കാൻ വേണ്ടത്ര ജോലിക്കാർ ഞങ്ങൾക്കുണ്ട്. എന്നാൽ നിങ്ങൾ വഹിച്ച പങ്കാണ് ഈ കൺവെൻഷന്റെ വിജയത്തിലേക്കു നയിച്ചത്.”
കൺവെൻഷൻ നടക്കവേ, ശാന്തമായ ജനക്കൂട്ടത്തെ നിയന്ത്രിക്കാൻ ആളുകളെ വിടേണ്ടതില്ലെന്നു മനസ്സിലാക്കിയ പോലീസ് ഡയറക്ടർ അതിശയത്തോടെ പറഞ്ഞു: “ഇത്രയും അച്ചടക്കവും മര്യാദയുമുള്ളൊരു ജനക്കൂട്ടത്തെ ഞാൻ മുമ്പൊരിക്കലും കണ്ടിട്ടില്ല!”
കൺവെൻഷന്റെ ഒരു സവിശേഷത
കൺവെൻഷന്റെ സമാപന പ്രസംഗത്തിൽ, ‘ഗ്രീസിലെ ദേശീയ വിദ്യാഭ്യാസ, മത മന്ത്രാലയം’ യഹോവയുടെ സാക്ഷികളെ “അറിയപ്പെടുന്ന ഒരു മതം” എന്ന നിലയിൽ അംഗീകരിച്ചതായി അറിയിച്ചു. ഏഥൻസിലെ യഹോവയുടെ സാക്ഷികളുടെ ദേശീയ ആസ്ഥാനത്തിനു മന്ത്രാലയം ഔദ്യോഗിക അംഗീകാരം നൽകുകയും ചെയ്തു. ഭാഗികമായി, സർക്കാർ രേഖ ഇങ്ങനെ പറഞ്ഞു:
“ക്രിസ്തീയ യഹോവയുടെ സാക്ഷികളെ അറിയപ്പെടുന്ന ഒരു മതമായി സർക്കാർ കണക്കാക്കുന്നു . . . തത്ഫലമായുള്ള നിയമപരമായ എല്ലാ ആനുകൂല്യങ്ങൾക്കും അവർ അർഹരാണ്. നേരത്തേ പരാമർശിച്ച ഭരണഘടന വകുപ്പ് ആരാധനാ സ്വാതന്ത്ര്യം, ആരാധനാ രീതികളും അതുമായി ബന്ധപ്പെട്ട് ആസ്തികൾ ഉപയോഗിക്കുന്നതും സംബന്ധിച്ച സ്വാതന്ത്ര്യം, ഓരോ സഭയുടെയും മതപരമായ യോഗത്തിന്റെയും ഭരണ, സംഘടനാ രീതികൾ തിരഞ്ഞെടുക്കാനുള്ള സ്വാതന്ത്ര്യം എന്നിവയുടെ സംരക്ഷണം ഉറപ്പുനൽകുന്നു. ദൈവത്തിന്റെ ആരാധനയ്ക്കായി സമർപ്പിക്കപ്പെട്ടിരിക്കുന്ന വിശുദ്ധവും പാവനവുമായ ഒരു സ്ഥലം എന്ന നിലയിൽ മാറൂസിയിലെ സംഘടന ഉപയോഗിക്കുന്ന സ്ഥലത്തിനും അവിടെയുള്ള കെട്ടിടങ്ങൾക്കും മറ്റു സൗകര്യങ്ങൾക്കും [യഹോവയുടെ സാക്ഷികളുടെ ബ്രാഞ്ച് ഓഫീസ്] ഈ സംരക്ഷണം വ്യക്തമായി ബാധകമാകുന്നു. ബെഥേൽ അതായത് ‘ദൈവത്തിന്റെ ഭവനം’ എന്നാണ് അത് അറിയപ്പെടുന്നത്.”
യഹോവയുടെ സാക്ഷികളും മതസ്വാതന്ത്ര്യത്തെ പിന്തുണയ്ക്കുന്ന മറ്റെല്ലാവരും ഈ സംഭവ വികാസങ്ങൾക്കു നന്ദിയുള്ളവരാണ്. “എല്ലാ ഭക്തിയിലും വിശുദ്ധിയിലും ശാന്തവും സമാധാനപർണ്ണവുമായ” ജീവിതം നയിക്കാൻ ഇതു ക്രിസ്ത്യാനികളെ സഹായിക്കട്ടെ എന്നാണ് അവരുടെ പ്രാർഥന.—1 തിമൊഥെയൊസ് 2:1, 2, പി.ഒ.സി. ബൈബിൾ. (g02 2/22)
[26-ാം പേജിലെ ചിത്രങ്ങൾ]
സാക്ഷികൾ ഒളിമ്പിക് സ്പോർട്സ് ഹാളിൽ കൂടിവരുന്നു
[കടപ്പാട്]
Harry Bilios