കാറ്റി​നൊ​പ്പം

കാനഡയിലെ ഉണരുക! ലേഖകൻ

“കുറച്ചു തുണി​യും കയറും എനിക്കു തരൂ, ലോകത്തെ അമ്പരപ്പി​ക്കുന്ന ഒന്നു ഞാൻ നിങ്ങളെ കാണി​ക്കാം!”—ജോസഫ്‌-മിഷെൽ മോണ്ട്‌ഗോൾഫി​യർ, 1782.

വൂഷ്‌! വർണഭം​ഗി​യാർന്ന ആ ഗോളാ​കാര സഞ്ചിയി​ലേക്കു തീജ്വാല ഉയർന്ന​പ്പോൾ അതു മെല്ലെ ആകാശ​ത്തേക്ക്‌ ഉയരാൻ തുടങ്ങി. മനോ​ഹ​ര​മായ, മഴവിൽവർണ​ത്തി​ലുള്ള ഒരു ഗോളാ​കാര സഞ്ചിയിൽ തൂങ്ങി സഞ്ചരി​ക്കു​ന്നത്‌ ആവേശ​ക​ര​മാണ്‌, ഒപ്പം ജീവി​ത​ത്തി​ര​ക്കിൽനിന്ന്‌ അൽപ്പം ആശ്വാ​സ​വും. ഉഷ്‌ണ​വാ​യു നിറച്ച ബലൂണിൽ സഞ്ചരിച്ചു നല്ല പരിച​യ​മുള്ള ഒരാൾ പറഞ്ഞു: “അതു ശാന്തമാണ്‌, ഒപ്പം ആവേശ​ക​ര​വും.”

മോണ്ട്‌ഗോൾഫി​യർ സഹോ​ദ​ര​ന്മാർ—ജോസഫ്‌-മിഷെ​ലും ഷാക്ക്‌ എയ്‌റ്റ്‌യെ​നും—1780-കളുടെ തുടക്ക​ത്തിൽ ആദ്യമാ​യി വിജയ​പ്ര​ദ​മാ​യി ബലൂൺ പറത്തി​യ​തിൽപ്പി​ന്നെ, ബലൂൺ സഞ്ചാരം മനുഷ്യ​നെ ആവേശം കൊള്ളി​ച്ചി​ട്ടുണ്ട്‌. (താഴത്തെ ചതുരം കാണുക.) എന്നാൽ, അഗ്നി​രോ​ധക തുണി​യും സുരക്ഷി​ത​വും ചെലവു കുറഞ്ഞ​തു​മായ രീതി​യി​ലൂ​ടെ പ്രൊ​പ്പെയ്‌ൻ എന്ന ഇന്ധനം കത്തിച്ച്‌ ബലൂണി​നകം ചൂടാ​ക്കാ​നും താപനില നിയ​ന്ത്രി​ക്കാ​നു​മുള്ള സംവി​ധാ​ന​വും നിലവിൽ വന്ന 1960-കൾ മുതൽ മാത്ര​മാണ്‌ ബലൂൺ സഞ്ചാരം ആളുകളെ ഹരം പിടി​പ്പി​ക്കുന്ന ഒരു വിനോ​ദ​മാ​യി മാറി​യത്‌.

അടുത്ത വീക്ഷണം

മനോ​ഹ​ര​മായ ബലൂൺ അടുത്തു നിരീ​ക്ഷി​ച്ചാൽ, വർണഭം​ഗി​യാർന്ന നീണ്ട തുണി​ക്ക​ഷ​ണങ്ങൾ ചേർത്തു​വെച്ച്‌ മുകളിൽനി​ന്നു താഴെ​വരെ അവ നീള​ത്തോ​ടു നീളം തുന്നി​ച്ചേർത്തി​രി​ക്കു​ന്ന​താ​യി കാണാം. വായു നിറച്ചു​ക​ഴി​യു​മ്പോൾ, ചില ബലൂണു​കൾക്ക്‌ 50 അടി വീതി​യും 80-ലധികം അടി ഉയരവും കാണും.

ബലൂൺ സഞ്ചാരി​കൾ തങ്ങളുടെ ഭാവന​യ്‌ക്കൊത്ത്‌ വ്യത്യസ്‌ത ആകൃതി​യി​ലും വലിപ്പ​ത്തി​ലു​മുള്ള ബലൂണു​കൾ രൂപസം​വി​ധാ​നം ചെയ്യുന്നു. അതിൽ, മൃഗങ്ങ​ളു​ടെ​യും കുപ്പി​ക​ളു​ടെ​യും കോമാ​ളി​ക​ളു​ടെ​യും ഒക്കെ ആകൃതി​യി​ലുള്ള ബലൂണു​കൾ ഉണ്ടാകാം. ആകൃതി എന്തായി​രു​ന്നാ​ലും, ആകാശ​ത്തി​ലെ ഈ നിശ്ശബ്ദ വാഹനങ്ങൾ പറപ്പി​ക്കു​ന്ന​തി​ലെ തത്ത്വങ്ങൾക്കു മാറ്റമില്ല.

കടുപ്പ​മു​ള്ള വസ്‌തു​ക്കൾകൊ​ണ്ടു നെയ്‌തെ​ടുത്ത, ഭാരം കുറഞ്ഞ ഒരു കൂടയി​ലാണ്‌ പൈല​റ്റും യാത്ര​ക്കാ​രും ഇരിക്കു​ന്നത്‌. കേബിൾകൊണ്ട്‌ ബലൂണു​മാ​യി ബന്ധിപ്പി​ച്ചി​രി​ക്കുന്ന ഈ കൂട ബലൂണി​ന്റെ വായ്‌ക്ക്‌ നേരെ കീഴി​ലാ​യി സ്ഥാപി​ച്ചി​രി​ക്കു​ന്നു. ചില കൂടകൾ ഉണ്ടാക്കു​ന്നത്‌ അലൂമി​നി​യം കൊണ്ടാണ്‌. ബലൂണി​ന്റെ വായ്‌ക്ക്‌ തൊട്ടു താഴെ​യാ​യി ഇന്ധനം കത്തിക്കുന്ന ബർണറും അതു നിയ​ന്ത്രി​ക്കുന്ന ഉപകര​ണ​വും ലോഹം​കൊ​ണ്ടുള്ള ഒരു തട്ടിൽ  ഉറപ്പി​ച്ചി​ട്ടുണ്ട്‌. ഇന്ധന ടാങ്കുകൾ കൂടയ്‌ക്ക​ക​ത്താ​ണു സ്ഥാപി​ച്ചി​രി​ക്കു​ന്നത്‌.

ഉയർന്നു​പൊ​ങ്ങാൻ തയ്യാ​റെ​ടു​ക്കു​ക

ഒരു വിമാ​ന​ത്തി​നു പറന്നു​യ​രാൻ നല്ല നീളമുള്ള ഒരു റൺവേ ആവശ്യ​മാണ്‌. എന്നാൽ, ചൂടു വായു നിറച്ച ബലൂണിന്‌ ഉയരാൻ തുറസ്സായ ചെറിയ ഒരു പ്രദേശം മതി. തലയ്‌ക്കു മുകളിൽ സമീപ​ത്തെ​ങ്ങും തടസ്സങ്ങ​ളി​ല്ലെന്ന്‌ ഉറപ്പു വരുത്തു​ന്നതു വളരെ പ്രധാ​ന​മാണ്‌. ഈ നിശ്ശബ്ദ വാഹന​ത്തിൽ യാത്ര ചെയ്യാൻ നിങ്ങൾക്ക്‌ ആകാം​ക്ഷ​യാ​യോ? കൂടയി​ലേക്കു കയറു​ന്ന​തി​നു മുമ്പ്‌ ചില പ്രാഥ​മിക പടികൾ സ്വീക​രി​ക്കേ​ണ്ട​തുണ്ട്‌.

ഒന്നാമത്‌, കൂടയു​ടെ ഏതു ദിശയി​ലേ​ക്കാ​ണോ കാറ്റിന്റെ ഗതി, ആ ദിശയിൽ വായൂ​ര​ഹിത ബലൂൺ നിലത്തു നിവർത്തി​യി​ടു​ന്നു. കൂട ബലൂണി​ന്റെ ഒരു വശത്തായി വരത്തക്ക​വി​ധം വേണം വെക്കാൻ. അതിനു​ശേഷം, മോ​ട്ടോർ ഘടിപ്പിച്ച നല്ല വലിപ്പ​മുള്ള ഒരു ഫാൻ ഉപയോ​ഗിച്ച്‌ ബലൂണി​ന്റെ വായി​ലേക്കു വായു അടിച്ചു​ക​യ​റ്റു​ന്നു. തുടർന്ന്‌, ബലൂൺ ഉയർന്ന്‌ കൂട ലംബമാ​യി നിൽക്കുന്ന അളവോ​ളം ബലൂണി​ലേക്കു ചൂടു​വാ​യു അടിക്കു​ന്നു. അതു കഴിഞ്ഞ്‌ ഉപകരണ-സംവി​ധാ​ന​ങ്ങ​ളെ​ല്ലാം അവസാ​ന​മാ​യി ഒന്നുകൂ​ടെ പരി​ശോ​ധി​ക്കു​ക​യാ​യി. ഇതിൽ ഇന്ധന കണക്ഷനു​കൾ പരി​ശോ​ധി​ക്കു​ന്ന​തും ബലൂണി​ന്റെ വായൂ​നിർഗ​മ​നത്തെ നിയ​ന്ത്രി​ക്കുന്ന കയറു​ക​ളും അതു​പോ​ലെ വീർത്ത ബലൂണിൽനി​ന്നു വായു​നിർഗ​മ​നത്തെ നിയ​ന്ത്രി​ക്കുന്ന കയറു​ക​ളും കൂടയി​ലേക്ക്‌ എത്തിയി​രി​ക്കു​ന്നു എന്ന്‌ ഉറപ്പാ​ക്കു​ന്ന​തും ഉൾപ്പെ​ടു​ന്നു. ഇത്രയും ചെയ്‌തു​ക​ഴി​യു​മ്പോൾ യാത്ര​ക്കാ​രെ​യും​കൊണ്ട്‌ ഉയരാൻ പൈലറ്റ്‌ റെഡി​യാണ്‌. ചില ബലൂൺ സഞ്ചാരി​കൾ ഒരു റേഡി​യോ ട്രാൻസ്‌മി​റ്റർ കരുതു​ക​യും താഴെ​യി​റ​ങ്ങി​ക്ക​ഴി​യു​മ്പോൾ ബലൂണും അതു​പോ​ലെ യാത്ര​ക്കാ​രെ​യും തിരികെ കൊണ്ടു​വ​രാൻ ബലൂണി​ന്റെ പിന്നാലെ നിലത്തു​കൂ​ടി ഒരു വാഹന​ത്തിൽ പോകു​ന്ന​വ​രു​മാ​യി നിരന്തര സമ്പർക്കം പുലർത്തു​ക​യും ചെയ്യുന്നു.

 കാറ്റി​നൊ​പ്പം

നാട്ടിൻപു​റ​ങ്ങൾക്കു മുകളി​ലൂ​ടെ ശാന്തമാ​യി തെന്നി​നീ​ങ്ങാ​നും താഴെ​യുള്ള പ്രവർത്ത​നങ്ങൾ നിരീ​ക്ഷി​ക്കാ​നും കഴിയു​മാറ്‌ മിക്ക ബലൂൺ സഞ്ചാരി​കൾക്കും 100 മീറ്ററിൽ കുറഞ്ഞ ഉയരമാണ്‌ ഏറെ പ്രിയം. താഴെ​യുള്ള ആളുകൾ ചിരി​ക്കു​ന്ന​തും ഒച്ചവെ​ക്കു​ന്ന​തു​മൊ​ക്കെ ആ ഉയരത്തിൽനി​ന്നു കേൾക്കാ​നാ​കും. നിലത്തു​നി​ന്നുള്ള കാഴ്‌ച​യും മനോ​ഹ​ര​മാണ്‌, മൃദു​വായ കാറ്റിൽ തെന്നി​നീ​ങ്ങുന്ന അപ്പൂപ്പൻതാ​ടി പോലെ തോന്നി​ക്കും ഈ ബലൂണു​കൾ. പതിവാ​യി 600-ഓ അതിൽ കൂടു​ത​ലോ മീറ്റർ ഉയരത്തി​ലേക്കു പോകു​ന്ന​വ​രും ഉണ്ട്‌. എന്നാൽ, പ്രാണ​വാ​യു കരുതാ​തെ 3,000 മീറ്ററി​ല​ധി​കം ഉയരത്തി​ലേക്കു പോകു​ന്നത്‌ അഭികാ​മ്യ​മല്ല.—“വളരെ ഉയരത്തി​ലുള്ള പറക്കൽ” എന്ന ചതുരം കാണുക.

മുകളിൽ എത്തിയാൽപ്പി​ന്നെ എങ്ങനെ​യാ​ണു താഴെ ഇറങ്ങുക? ഗുരു​ത്വാ​കർഷ​ണ​ത്താൽ. ബലൂണി​ന്റെ വായ്‌ഭാ​ഗ​ത്തു​നി​ന്നുള്ള ഒരു കയറിൽ പിടിച്ചു വലിച്ച്‌ അൽപ്പാൽപ്പ​മാ​യി അതിന​കത്തെ ചൂടു​വാ​യു പുറത്തു​വി​ട്ടു​കൊണ്ട്‌ ബലൂണി​ന്റെ താഴേ​ക്കുള്ള വരവിനെ നിങ്ങൾക്കു നിയ​ന്ത്രി​ക്കാൻ കഴിയും. എന്നാൽ, തിരശ്ചീ​ന​മായ സഞ്ചാരം അതു​പോ​ലെയല്ല. ഇതിൽ പൈല​റ്റിന്‌ ചുറ്റു​മുള്ള അവസ്ഥകളെ ആശ്രയി​ക്കേ​ണ്ടി​വ​രു​ന്നു. “ഓരോ പറക്കലും വ്യത്യ​സ്‌ത​മാണ്‌, കാരണം സഞ്ചാര​ഗ​തി​യും വേഗവും നിർണ​യി​ക്കു​ന്നതു കാറ്റാണ്‌,” അനുഭ​വ​സ​മ്പ​ന്ന​നായ ഒരു ബലൂൺ സഞ്ചാരി പറയുന്നു. അന്തരീ​ക്ഷ​ത്തി​ലെ ഭിന്ന തലങ്ങളി​ലുള്ള വായൂ​പ്ര​വാ​ഹ​ത്തിന്‌ ബലൂണി​ന്റെ വേഗത്തി​നും സഞ്ചാര​ദി​ശ​യ്‌ക്കും മാറ്റം വരുത്താ​നാ​കും. ഭൗമോ​പ​രി​ത​ല​ത്തിൽനിന്ന്‌ 100 മീറ്റർ ഉയരത്തിൽ കാറ്റ്‌ ഒരു ദിശയി​ലേ​ക്കും 200 മീറ്റർ ഉയരത്തിൽ അതു മറ്റൊരു ദിശയി​ലേ​ക്കും ആയിരി​ക്കു​ന്നത്‌ അസാധാ​ര​ണമല്ല.

കാറ്റിന്റെ വേഗത്തിൽ ബലൂൺ സഞ്ചരി​ക്കു​ന്ന​തി​നാൽ, നിങ്ങൾ നിശ്ചലം തൂങ്ങി കിടക്കു​ക​യാ​ണെ​ന്നും കീഴെ ഭൂമി തിരി​ഞ്ഞു​കൊ​ണ്ടി​രി​ക്കു​ക​യാ​ണെ​ന്നും തോന്നും. “ബലൂൺ സഞ്ചാരി​കൾ കാറ്റിന്റെ അതേ വേഗത്തിൽ സഞ്ചരി​ക്കു​ന്ന​തി​നാൽ, അവർ ഒരു ഭൂപടം നിവർത്തി​പ്പി​ടി​ച്ചാൽ അതു പറന്നു​പോ​കില്ല,” സ്‌മി​ത്ത്‌സോ​ണി​യൻ മാസിക പറയുന്നു.

പറക്കു​ന്ന​തിൽ പരിചയം നേടൽ

പറക്കാൻ ഏറ്റവും പറ്റിയ സമയം വായു​ച​ലനം ഏറ്റവും കുറഞ്ഞി​രി​ക്കു​മ്പോ​ഴാണ്‌. സാധാ​ര​ണ​ഗ​തി​യിൽ ഇതു സൂര്യോ​ദയം കഴിഞ്ഞ്‌ അധികം താമസി​യാ​തെ​യോ സൂര്യാ​സ്‌ത​മ​യ​ത്തി​നു തൊട്ടു​മു​മ്പോ ആയിരി​ക്കും. പ്രഭാ​ത​ങ്ങ​ളാണ്‌ ഏറ്റവും അനു​യോ​ജ്യം. കാരണം, സാധാ​ര​ണ​ഗ​തി​യിൽ അന്തരീ​ക്ഷ​ത്തി​നു തണുപ്പു കൂടു​ത​ലാ​യി​രി​ക്കു​മെ​ന്ന​തി​നാൽ ബലൂൺ ഉയർന്നു​പോ​കാൻ എളുപ്പ​മാണ്‌. വൈകു​ന്നേരം പറക്കു​ന്നത്‌ വെളി​ച്ച​ക്കു​റവ്‌ മൂലമുള്ള പ്രശ്‌ന​ങ്ങൾക്കു കാരണ​മാ​യേ​ക്കാം.

വളരെ​ക്കാ​ലം​കൊ​ണ്ടേ ബലൂൺ സഞ്ചാര​ത്തിൽ വേണ്ടത്ര പരിചയം ലഭിക്കൂ. അഭികാ​മ്യ​മായ ദിശയിൽ സഞ്ചരി​ക്കുന്ന ഒരു വായൂ​പി​ണ്ഡം കണ്ടെത്തി അതിനു​ള്ളിൽ നിൽക്കുക എന്നതാണ്‌ പ്രധാന സംഗതി. നല്ല അനുഭ​വ​പ​രി​ച​യ​മുള്ള  ബലൂൺ സഞ്ചാരി​കൾ ‘സ്റ്റെയർ-സ്റ്റെപ്പിങ്‌’ എന്നു വിളി​ക്ക​പ്പെ​ടുന്ന ഒന്നിൽ വൈദ​ഗ്‌ധ്യം നേടുന്നു. അവർ ഒരു നിശ്ചിത ഉയരത്തി​ലെത്തി ബലൂണി​നെ സ്ഥിരമാ​ക്കി നിറു​ത്തു​ന്നു. തുടർന്ന്‌ ബർണർ കത്തിക്കു​മ്പോൾ ചൂടാ​കുന്ന വായു ബലൂണി​ന്റെ ഏറ്റവും മുകളി​ലേക്ക്‌ ഉയരും. അങ്ങനെ ബലൂണി​നെ കൂടുതൽ ഉയരത്തി​ലേക്ക്‌ എത്തിക്കു​ന്നു.

പൈല​റ്റി​നു ബലൂണി​ന്റെ നിയ​ന്ത്രണം കൈവി​ട്ടു പോകാ​തി​രി​ക്കാൻ ഉചിത​മായ സമയങ്ങ​ളിൽ ബർണർ കത്തിക്കു​ക​യും നിതാന്ത ശ്രദ്ധ പുലർത്തു​ക​യും ചെയ്യു​ന്നത്‌ അനിവാ​ര്യ​മാണ്‌. അൽപ്പം ശ്രദ്ധക്കു​റവു മതി ബലൂൺ അപ്രതീ​ക്ഷി​ത​മാ​യി താഴേക്കു പോരാൻ. താപത്തി​ന്റെ ഉറവ്‌ ബലൂണി​ന്റെ മുകൾഭാ​ഗ​ത്തു​നിന്ന്‌ 50-60 അടി താഴെ​യാ​യ​തി​നാൽ ബർണർ ഉപയോ​ഗിച്ച്‌ ചൂടാ​ക്കു​മ്പോൾ ബലൂൺ മുകളി​ലേക്ക്‌ ഉയരാൻ 15 മുതൽ 30 വരെ സെക്കൻഡ്‌ എടുക്കു​മെ​ന്നും ജാഗ്ര​ത​യുള്ള ഒരു പൈലറ്റ്‌ ഓർത്തി​രി​ക്കും.

നിലത്തി​റ​ങ്ങു​ന്നത്‌ വളരെ ആവേശ​ക​ര​മാ​യി​രി​ക്കാൻ കഴിയും, പ്രത്യേ​കി​ച്ചും നല്ല കാറ്റു​ള്ള​പ്പോൾ പരിമി​ത​മായ ഒരു ഇടത്ത്‌ ഇറങ്ങേ​ണ്ടി​വ​രു​ന്നത്‌! ഒരു ബലൂൺ സഞ്ചാര വിദഗ്‌ധൻ പറയുന്നു, അത്തരം സാഹച​ര്യ​ങ്ങ​ളിൽ “വേഗത്തിൽ നല്ല ഒരു സ്ഥാനത്ത്‌ ഇടിച്ചി​റ​ങ്ങു​ന്ന​താണ്‌ മെല്ലെ ഇറങ്ങു​മ്പോൾ മൃഗശാ​ല​യി​ലെ ഒരു സിംഹ​ക്കൂ​ട്ടിൽ ചെന്നു പെടു​ന്ന​തി​നെ​ക്കാൾ മെച്ചം.” എന്നാൽ, കാറ്റിന്റെ ഗതി അനുകൂ​ല​മാ​യി​രി​ക്കു​മ്പോൾ സാവധാ​നം ഇറങ്ങാ​വു​ന്ന​താണ്‌.

ബലൂൺ സഞ്ചാര​വേഗ മത്സരങ്ങ​ളി​ലും റാലി​ക​ളി​ലും ഉത്സവങ്ങ​ളി​ലു​മൊ​ക്കെ നിരവധി പേർ പങ്കെടു​ക്കു​ക​യും മറ്റുള്ളവർ വെറും ഹരത്തി​നാ​യി ഇതിൽ ഏർപ്പെ​ടു​ക​യും ചെയ്യവേ, ചൂടു​വാ​യു നിറച്ച ബലൂണു​ക​ളിൽ വിനോ​ദാർഥ​മുള്ള സഞ്ചാരം തീർച്ച​യാ​യും തുടർന്നു​പോ​രു​ക​തന്നെ ചെയ്യും. (g02 3/8)

[16, 17 പേജു​ക​ളി​ലെ ചതുരം/ചിത്രങ്ങൾ]

ബലൂൺ പറക്കലി​ന്റെ ആദ്യകാല ചരിത്രം

ഫ്രാൻസി​ലെ ആനോ​നേ​യി​ലെ ഒരു സമ്പന്ന കടലാസ്‌ നിർമാ​താ​വായ മോണ്ട്‌ഗോൾഫി​യ​റു​ടെ പുത്ര​ന്മാ​രായ ജോസഫ്‌-മിഷെ​ലും ഷാക്ക്‌ എയ്‌റ്റ്‌യെ​നും ചൂടു​വാ​യു നിറച്ച ആദ്യത്തെ ബലൂൺ നിർമി​ച്ചു പറപ്പിച്ച വ്യക്തികൾ എന്ന നിലയിൽ ചരി​ത്ര​ത്തിൽ ആദരി​ക്ക​പ്പെ​ടു​ന്നു. കടലാസ്‌ ബലൂണു​ക​ളാണ്‌ 1780-കളുടെ തുടക്ക​ത്തിൽ അവർ പ്രാഥ​മിക പരീക്ഷ​ണ​ങ്ങൾക്കാ​യി ഉപയോ​ഗി​ച്ചത്‌. കച്ചിയും ആട്ടു​രോ​മ​വും കത്തിക്കു​മ്പോൾ ഉണ്ടാകുന്ന പുക മൂലമാണ്‌ അവ ഉയർന്നു​പോ​കു​ന്ന​തെന്ന്‌ അവർ വിശ്വ​സി​ച്ചി​രു​ന്നു. എന്നാൽ, ചൂടു​വാ​യു നിമി​ത്ത​മാണ്‌ അവ ഉയരു​ന്നത്‌ എന്ന്‌ അവർ താമസി​യാ​തെ മനസ്സി​ലാ​ക്കി.

പിന്നീട്‌ തുണി കൊണ്ടുള്ള ബലൂണു​കൾ ഉണ്ടാക്കാൻ തുടങ്ങി​യ​പ്പോൾ, അനു​ക്രമം വലിപ്പം കൂടിയ ബലൂണു​കൾ വിക്ഷേ​പി​ക്കു​ക​വഴി അവ കൂടുതൽ ഉയരത്തിൽ എത്തിക്കാ​നും അവയിൽ കൂടുതൽ ഭാരം കയറ്റാ​നും കഴിയു​മെന്ന്‌ അവർ കണ്ടെത്തി. 1783 ജൂണിൽ ആനോ​നേ​യി​ലെ പൊതു നഗരച​ത്വ​ര​ത്തിൽനി​ന്നു തങ്ങൾ അന്നുവരെ ഉണ്ടാക്കിയ ഏറ്റവും വലിയ ബലൂൺ അവർ പറപ്പിച്ചു. അതു നില​ത്തേക്കു താഴു​ന്ന​തി​നു മുമ്പ്‌ 10 മിനി​ട്ടോ​ളം ആകാശ​ത്തേക്ക്‌ ഉയർന്നു​പോ​യി.

ആ നേട്ട​ത്തോ​ടെ, ആളുകളെ വഹിച്ചു​കൊ​ണ്ടുള്ള ബലൂണു​കൾ വിക്ഷേ​പി​ക്കാ​നുള്ള സമയമാ​യെന്ന്‌ അവർ നിഗമനം ചെയ്‌തു. എന്നാൽ, ആദ്യം വേഴ്‌സാ​യി​യിൽ ആയിര​ക്ക​ണ​ക്കി​നു കാണികൾ കണ്ടുനിൽക്കെ ഒരു പൂവൻ കോഴി​യെ​യും താറാ​വി​നെ​യും ആടി​നെ​യും കയറ്റിയ ബലൂൺ 1783 സെപ്‌റ്റം​ബ​റിൽ അവർ പറപ്പിച്ചു. എട്ടു മിനി​ട്ടു​നേരം പറന്ന​ശേഷം ആ ബലൂൺ നിലത്തി​റങ്ങി. ആ മൂന്നു ജീവി​കൾക്കും പരി​ക്കൊ​ന്നും പറ്റിയില്ല. തുടർന്ന്‌, 1783 നവംബർ 21-ന്‌ മനുഷ്യ​രെ കയറ്റിയ ആദ്യത്തെ ബലൂൺ പറപ്പി​ക്കാ​നുള്ള ശ്രമം നടന്നു. രണ്ടു പ്രഭു​ക്ക​ന്മാർക്ക്‌ ആ പദവി നൽകാൻ ലൂയി പതിനാ​റാ​മനെ പറഞ്ഞു സമ്മതി​പ്പി​ച്ചു. അവരെ ആകാശ​ത്തേക്കു പറത്തി​വി​ട്ടത്‌ ഷാറ്റോ ദെ ലാ മൂയെ​റ്റിൽ നിന്നാ​യി​രു​ന്നു, എട്ട്‌ കിലോ​മീ​റ്റ​റോ​ളം അവർ വായു​വിൽ ഒഴുകി​ന​ടന്നു. ഏകദേശം 25 മിനി​ട്ടി​നു​ശേഷം ബലൂണി​നു തീ പിടി​ച്ച​പ്പോൾ നിലത്തി​റ​ങ്ങാൻ അവർ നിർബ​ന്ധി​ത​രാ​യി.

അക്കാല​ത്താണ്‌ പാരീ​സി​ലെ ശാസ്‌ത്ര അക്കാദമി ഈ പുത്തൻ കണ്ടുപി​ടി​ത്ത​ത്തിൽ താത്‌പ​ര്യം പ്രകട​മാ​ക്കി​യത്‌. അന്നത്തെ വിഖ്യാത ഭൗതിക ശാസ്‌ത്ര​ജ്ഞ​രിൽ ഒരാളായ പ്രൊ​ഫസർ ഷാക്ക്‌ ഷാൾ രണ്ടു വിദഗ്‌ധ മെക്കാ​നി​ക്കു​കൾ ആയിരുന്ന ഷാളി​നോ​ടും എം. എൻ. റോബർട്ടി​നോ​ടും സഹകരിച്ച്‌ ഹൈ​ഡ്രജൻ നിറച്ച ആദ്യത്തെ ബലൂൺ ഉണ്ടാക്കി 1783 ആഗസ്റ്റ്‌ 27-ന്‌ പരീക്ഷണം നടത്തി. 45 മിനി​ട്ടോ​ളം അന്തരീ​ക്ഷ​ത്തിൽ ഒഴുകി​നടന്ന അത്‌ 24 കിലോ​മീ​റ്റ​റോ​ളം സഞ്ചരിച്ചു. ആ ബലൂണിന്‌ ഷാർളി​യർ എന്ന പേരു കിട്ടി. ഇത്തരം ബലൂണു​കൾ ഇന്നും അതിന്റെ ആദ്യ മാതൃ​ക​യിൽ പറയത്തക്ക മാറ്റ​മൊ​ന്നും കൂടാതെ നിലനിൽക്കു​ന്നു.

[19-ാം പേജിലെ ചതുരം]

വളരെ ഉയരത്തി​ലുള്ള പറക്കൽ

ഇംഗ്ലണ്ടു​കാ​ര​നായ ഹെൻട്രി കോക്‌സ്‌വെൽ ഏറ്റവും ഉയരത്തിൽ ബലൂൺ പറപ്പിച്ച പൈലറ്റ്‌ എന്ന പേരു നേടി. 1862 സെപ്‌റ്റം​ബ​റിൽ, ‘ബ്രിട്ടീഷ്‌ മീറ്റി​യൊ​റോ​ള​ജി​ക്കൽ സൊ​സൈറ്റി’യിലെ ജയിംസ്‌ ഗ്ലൈഷർ ശാസ്‌ത്രീയ നിരീ​ക്ഷ​ണ​ങ്ങൾക്കാ​യി വളരെ ഉയരത്തി​ലേക്കു തന്നെ കൊണ്ടു​പോ​കാൻ അദ്ദേഹ​ത്തി​ന്റെ സഹായം തേടി. കൃത്രിമ ശ്വസ​നോ​പാ​ധി​യൊ​ന്നും കൂടാതെ അവർ ഏകദേശം 9 കിലോ​മീ​റ്റർ ഉയരത്തി​ലെത്തി!

അവർ 8,000 മീറ്റർ ഉയരത്തിൽ എത്തിയ​പ്പോൾ തണുപ്പു കൂടു​ക​യും വായു​വി​ലെ ഓക്‌സി​ജന്റെ അളവ്‌ കുറയു​ക​യും ചെയ്‌തതു നിമിത്തം ശ്വാ​സോ​ച്ഛ്വാ​സം ചെയ്യുക ദുഷ്‌ക​ര​മാ​യി​ത്തീർന്നു. തന്മൂലം, കോക്‌സ്‌വെൽ താഴേക്ക്‌ ഇറങ്ങു​ന്ന​തി​നുള്ള ഒരുക്കങ്ങൾ നടത്തി. എന്നാൽ, ബലൂണി​ന്റെ തുടർച്ച​യായ ചുറ്റലി​ന്റെ ഫലമായി വായു പുറത്തു​വി​ടുന്ന വാൽവിൽനി​ന്നു താഴേക്കു കിടന്ന കയർ മറ്റു കയറു​ക​ളിൽ ചുറ്റാൻ തുടങ്ങി. അത്‌ കുരു​ക്കിൽനി​ന്നു മാറ്റാൻ കോക്‌സ്‌വെ​ലി​നു മുകളി​ലേക്കു കയറേ​ണ്ടി​വന്നു. ഗ്ലൈഷർ അപ്പോൾ അബോ​ധാ​വ​സ്ഥ​യിൽ ആയിരു​ന്നു. കൈകൾ തണുത്തു മരവി​ച്ച​തി​നാൽ ആ കയറിൽ കടിച്ചു​പി​ടി​ച്ചാണ്‌ കോക്‌സ്‌വെൽ വലിച്ചത്‌. ഒടുവിൽ അവരുടെ ബലൂൺ താഴാൻ തുടങ്ങി.

കുറച്ചു കഴിഞ്ഞ​പ്പോൾ രണ്ടു പേരു​ടെ​യും ശാരീ​രിക അവസ്ഥ മെച്ച​പ്പെ​ടു​ക​യും ബലൂണി​ന്റെ താഴേ​ക്കുള്ള വരവിന്റെ വേഗം കുറയ്‌ക്കാൻ അവർക്കു സാധി​ക്കു​ക​യും ചെയ്‌തു. ഏകദേശം 10,000 മീറ്റ​റോ​ളം ഉയരത്തിൽ അവർ എത്തിയി​രു​ന്നു. ഒരു നൂറ്റാ​ണ്ടി​ലേ​റെ​ക്കാ​ലം അത്‌ റെക്കോർഡാ​യി നിലനി​ന്നു. ബലൂണി​നോ​ടു ഘടിപ്പിച്ച തുറന്ന കൂടയി​ലുള്ള അവരുടെ സഞ്ചാരം ബലൂൺ-സഞ്ചാര രംഗത്തെ ഏറ്റവും വലിയ നേട്ടങ്ങ​ളിൽ ഒന്നാണ്‌. കാരണം, ഓക്‌സി​ജൻ കരുതാ​തെ, സംരക്ഷ​ണാർഥം അധികം വസ്‌ത്ര​ങ്ങ​ളൊ​ന്നും ഇല്ലാതെ, അന്തരീ​ക്ഷ​ത്തി​ന്റെ മേൽത്ത​ട്ടി​നെ കുറിച്ച്‌ യാതൊ​രു അറിവും ഇല്ലാ​തെ​യാണ്‌ അവർ ആ യാത്ര നടത്തി​യത്‌.

[17-ാം പേജിലെ ചിത്രം]

കാറ്റടിച്ചു വീർപ്പി​ക്കുന്ന സമയത്ത്‌ ഒരു ബലൂണി​ന്റെ അന്തർഭാ​ഗം

[17-ാം പേജിലെ ചിത്രം]

ബലൂൺ ഉയരാ​നും പറക്കാ​നു​മാ​യി ചൂടു​വാ​യു അതി​ലേക്ക്‌ അടിച്ചു​ക​യ​റ്റു​ന്നു

[18-ാം പേജിലെ ചിത്രം]

അസാധാരണ ആകൃതി​ക​ളുള്ള ബലൂണു​കൾ