വന്യജീ​വി​കൾ സൂക്ഷ്‌മ നിരീ​ക്ഷ​ണ​ത്തിൽ

നിങ്ങളു​ടെ ഓരോ നീക്കവും നിരീ​ക്ഷിച്ച്‌ അപഗ്ര​ഥി​ക്കാൻ കഴി​യേ​ണ്ട​തിന്‌ നിങ്ങളു​ടെ പുറത്ത്‌ ഒരു ചെറിയ റേഡി​യോ ട്രാൻസ്‌മി​റ്റർ ഘടിപ്പി​ച്ചി​രി​ക്കു​ന്ന​താ​യി സങ്കൽപ്പി​ക്കുക. മിസ്സിസ്‌ ഗിബ്‌സൺ എന്നു പേരുള്ള, വാണ്ടറിങ്‌ ആൽബ​ട്രോസ്‌ പക്ഷിയു​ടെ അവസ്ഥ അതാണ്‌. അതിന്റെ ദേഹത്തു ഘടിപ്പി​ച്ചി​രി​ക്കുന്ന ട്രാൻസ്‌മി​റ്റർ അയയ്‌ക്കുന്ന സംജ്ഞകൾ—അതു​പോ​ലെ ഇത്തരം ഉപകര​ണങ്ങൾ ഘടിപ്പിച്ച മറ്റു പക്ഷിക​ളിൽനി​ന്നു ലഭിക്കുന്ന സംജ്ഞക​ളും—കൃത്രിമ ഉപഗ്ര​ഹങ്ങൾ പിടി​ച്ചെ​ടുത്ത്‌ ഭൂമി​യി​ലേക്കു മടക്കി അയയ്‌ക്കു​ന്നു. അങ്ങനെ ഗവേഷ​കർക്ക്‌ അതിനെ കുറിച്ചു സുസൂ​ക്ഷ്‌മം പഠിക്കാൻ കഴിയു​ന്നു. അതിന്റെ ഫലമായി ലഭിച്ച വിവരങ്ങൾ, പ്രൗഢി​യാർന്ന ഈ പക്ഷികളെ കുറിച്ചു വിസ്‌മ​യി​പ്പി​ക്കുന്ന കാര്യ​ങ്ങ​ളാ​ണു വെളി​പ്പെ​ടു​ത്തി​യി​രി​ക്കു​ന്നത്‌. പ്രസ്‌തുത വിവരങ്ങൾ അവയുടെ പരിര​ക്ഷ​ണ​ത്തി​നു സഹായി​ക്കു​മെന്നു കരുത​പ്പെ​ടു​ന്നു.

വാണ്ടറിങ്‌ ആൽബ​ട്രോസ്‌ പക്ഷികൾ ദിവസം ശരാശരി 300 കിലോ​മീ​റ്റർ—ചില ദിവസ​ങ്ങ​ളിൽ 1,000 കിലോ​മീ​റ്റ​റിൽ കൂടുതൽ പോലും—സഞ്ചരി​ക്കാ​റു​ള്ള​താ​യി ഓസ്‌​ട്രേ​ലി​യ​യി​ലെ വിക്ടോ​റി​യ​യി​ലുള്ള ലാ ട്രോബ്‌ യൂണി​വേ​ഴ്‌സി​റ്റി​യിൽ നിന്നുള്ള ഒരു റിപ്പോർട്ടു പറയുന്നു. 11 അടിയി​ല​ധി​കം ചിറകു​വി​രി​വുള്ള ഈ മനോഹര പക്ഷികൾ—ഏറ്റവും ചിറകു​വി​രി​വുള്ള പക്ഷി ഇതാണ്‌—പല ഘട്ടങ്ങളാ​യി പറന്ന്‌ നിരവധി മാസങ്ങൾകൊണ്ട്‌ സമു​ദ്ര​ങ്ങ​ളു​ടെ മുകളി​ലൂ​ടെ 30,000 കിലോ​മീ​റ്റ​റി​ല​ധി​കം താണ്ടുന്നു. ഒരു ലേയ്‌സാൻ ആൽബ​ട്രോസ്‌, ഹൊ​ണോ​ലു​ലു​വി​നു വടക്കു​പ​ടി​ഞ്ഞാ​റുള്ള റ്റേൺ ദ്വീപിൽനിന്ന്‌ അലൂഷൻ ദ്വീപു​ക​ളി​ലേക്ക്‌—അങ്ങോ​ട്ടും ഇങ്ങോ​ട്ടു​മുള്ള ദൂരം 6,000 കിലോ​മീ​റ്റർ വരും—നാലു യാത്രകൾ നടത്തി​യ​താ​യി ഐക്യ​നാ​ടു​ക​ളിൽ നടത്തിയ സമാന​മായ പഠനങ്ങൾ വെളി​പ്പെ​ടു​ത്തു​ന്നു, തന്റെ കുഞ്ഞിനു ഭക്ഷണം കൊണ്ടു​വ​രാ​നാ​യി​രു​ന്നു ഇത്‌.

ഉന്നത സാങ്കേ​തി​ക​വി​ദ്യ ഉപയോ​ഗി​ച്ചുള്ള ഈ പഠനങ്ങൾ, വാണ്ടറിങ്‌ ആൽബ​ട്രോ​സു​ക​ളിൽ ആൺപക്ഷി​ക​ളെ​ക്കാൾ എന്തു​കൊണ്ട്‌ പെൺപ​ക്ഷി​ക​ളു​ടെ എണ്ണം കുറയു​ന്നു എന്ന്‌ ഒരുപക്ഷേ വ്യക്തമാ​ക്കു​ന്നു. പ്രജനനം നടത്തുന്ന ആൺപക്ഷി​കൾ അന്റാർട്ടി​ക്ക​യോ​ടു ചേർന്നുള്ള ഇടങ്ങളിൽ തീറ്റി തേടു​മ്പോൾ, പ്രജനനം നടത്തുന്ന പെൺപ​ക്ഷി​കൾ കൂടുതൽ വടക്കോ​ട്ടു മാറി മത്സ്യബ​ന്ധ​ന​ത്തി​നാ​യി ആയിരം​ചൂണ്ട ഘടിപ്പിച്ച ബോട്ടു​കൾ ഉള്ള ഇടങ്ങളിൽ തീറ്റി അന്വേ​ഷി​ക്കു​ന്ന​താ​യി അവയുടെ സഞ്ചാര​പ​ഥങ്ങൾ വെളി​പ്പെ​ടു​ത്തി. ഈ ബോട്ടു​ക​ളു​ടെ പിന്നിൽ ഇട്ടിരുന്ന ചൂണ്ടയി​ലെ ഇര കൊത്തി​യെ​ടു​ക്കാൻ ചെന്ന ആ പക്ഷികൾ അതിൽ കുടു​ങ്ങു​ക​യും അങ്ങനെ മുങ്ങി​ച്ചാ​കു​ക​യും ചെയ്‌തു. പ്രജനനം നടത്തുന്ന ഈ പക്ഷിക​ളു​ടെ ചില കൂട്ടങ്ങ​ളിൽ, ആൺപക്ഷി​ക​ളു​ടെ എണ്ണം പെൺപ​ക്ഷി​ക​ളു​ടെ എണ്ണത്തിന്റെ ഇരട്ടി വരും. മറ്റ്‌ ഇനം ആൽബ​ട്രോ​സു​ക​ളും പ്രതി​കൂ​ല​മാ​യി ബാധി​ക്ക​പ്പെ​ട്ടി​ട്ടുണ്ട്‌. ഓസ്‌​ട്രേ​ലി​യ​യു​ടെ​യും ന്യൂസി​ലൻഡി​ന്റെ​യും തീരങ്ങ​ളിൽനിന്ന്‌ അകലെ​യുള്ള സമു​ദ്ര​ങ്ങ​ളി​ലെ അത്തരം ബോട്ടു​ക​ളു​ടെ പിന്നിൽ കുടുങ്ങി ഒരു വർഷം ഏകദേശം 50,000 ആൽബ​ട്രോസ്‌ പക്ഷികൾ മുങ്ങി​ച്ചാ​കു​ക​യു​ണ്ടാ​യി. അങ്ങനെ അതിന്റെ വിവിധ ഇനങ്ങൾക്കു വംശനാ​ശ​ഭീ​ഷണി നേരിട്ടു. വാസ്‌ത​വ​ത്തിൽ, വാണ്ടറിങ്‌ ആൽബ​ട്രോ​സി​നെ ഓസ്‌​ട്രേ​ലി​യ​യിൽ വംശനാ​ശ​ഭീ​ഷണി നേരി​ടുന്ന പക്ഷിയാ​യി പ്രഖ്യാ​പി​ച്ചി​രി​ക്കു​ക​യാണ്‌. ഈ കണ്ടെത്ത​ലു​ക​ളു​ടെ ഫലമായി മത്സ്യബന്ധന രീതി​കൾക്കു മാറ്റം വരുത്തു​ക​യും തന്മൂലം വാണ്ടറിങ്‌ ആൽബ​ട്രോ​സി​ന്റെ മരണനി​രക്കു കുറയു​ക​യും ചെയ്‌തി​ട്ടുണ്ട്‌. എന്നാൽ, ഈ പക്ഷിയു​ടെ നിരവധി പ്രമുഖ പ്രജനന ഇടങ്ങളിൽ അതിന്റെ എണ്ണം തുടർന്നും കുറഞ്ഞു​വ​രു​ന്നു.

പക്ഷികൾക്ക്‌ വളയമി​ടൽ

ചില വർഗത്തി​ലുള്ള പക്ഷികളെ നിരീ​ക്ഷി​ച്ചു വിവരങ്ങൾ ശേഖരി​ക്കാൻ സൂക്ഷ്‌മ ഇലക്‌​ട്രോ​ണിക്‌ ഉപകര​ണങ്ങൾ ഗവേഷ​കരെ സഹായി​ക്കു​ന്നുണ്ട്‌. എന്നാൽ, അതി​നെ​ക്കാൾ ചെലവു​കു​റഞ്ഞ ലളിത​മായ രീതികൾ നിരവധി വർഷങ്ങ​ളാ​യി ഉപയോ​ഗ​ത്തി​ലുണ്ട്‌. പക്ഷിക​ളു​ടെ കാലിൽ വളയമി​ടു​ന്ന​താണ്‌ അതി​ലൊന്ന്‌. കനംകു​റഞ്ഞ ഒരു ലോഹ​ത്ത​കി​ടോ പ്ലാസ്റ്റിക്ക്‌ കഷണമോ ശ്രദ്ധാ​പൂർവം ഒരു പക്ഷിയു​ടെ കാലിൽ തളപോ​ലെ ചുറ്റുന്നു.

ഒരു ഔദ്യോ​ഗിക ഗവേഷണ ഉപാധി എന്ന നിലയിൽ, പക്ഷികൾക്ക്‌ വളയമി​ടുന്ന രീതിക്ക്‌ 1899-ൽ ഡെൻമാർക്കു​കാ​ര​നായ ഹാൻസ്‌ ക്രിസ്റ്റ്യൻ മോർട്ടൻസൺ എന്ന സ്‌കൂൾ അധ്യാ​പ​ക​നാണ്‌ തുടക്ക​മി​ട്ട​തെന്ന്‌ സ്‌മി​ത്‌സോ​ണി​യൻ മാസിക പറയുന്നു. അദ്ദേഹം “സ്വന്തമാ​യി ലോഹ​ത്ത​കി​ടു​കൾകൊണ്ട്‌ വളയങ്ങൾ ഉണ്ടാക്കി, അതിൽ സ്വന്തം പേരും വിലാ​സ​വും ആലേഖനം ചെയ്‌ത്‌ പ്രായം  കുറഞ്ഞ 165 സ്റ്റാർളിങ്‌ പക്ഷികൾക്ക്‌ ഇടുക​യു​ണ്ടാ​യി.” ഇക്കാലത്ത്‌ പക്ഷിക​ളു​ടെ കാലിൽ വളയമി​ട്ടു വിടുന്ന രീതി ലോക​മെ​ങ്ങും പ്രാബ​ല്യ​ത്തി​ലുണ്ട്‌. ഏതു പക്ഷികൾ എവിടെ കാണ​പ്പെ​ടു​ന്നു, അവയുടെ ദേശാടന സ്വഭാ​വങ്ങൾ, പെരു​മാ​റ്റം, സാമൂ​ഹിക ഘടന, എണ്ണം, അതിജീ​വന, പുനരു​ത്‌പാ​ദന നിരക്കു​കൾ എന്നിവ സംബന്ധി​ച്ചുള്ള വില​യേ​റിയ വിവരങ്ങൾ അതുവഴി ലഭിക്കു​ന്നു. വേട്ടയാ​ടൽ അനുവ​ദി​ച്ചി​രി​ക്കുന്ന ഇടങ്ങളിൽ, വേട്ടയാ​ട​പ്പെ​ടുന്ന പക്ഷിക​ളു​ടെ ദീർഘ​കാല പരിപാ​ല​നാർഥം നിയമ​ങ്ങ​ളു​ണ്ടാ​ക്കാൻ വളയമി​ടുന്ന ഈ രീതി ഗവൺമെ​ന്റു​കളെ സഹായി​ക്കു​ന്നു. രോഗ​ങ്ങ​ളും അതു​പോ​ലെ വിഷമുള്ള രാസപ​ദാർഥ​ങ്ങ​ളും പക്ഷികളെ എങ്ങനെ ബാധി​ക്കു​ന്നു എന്നു മനസ്സി​ലാ​ക്കാ​നും ഇതു സഹായി​ക്കു​ന്നു. വാസ്‌ത​വ​ത്തിൽ, മനുഷ്യർക്ക്‌ ഉണ്ടാകുന്ന മസ്‌തി​ഷ്‌ക​വീ​ക്ക​വും ലൈം രോഗ​വും പോലുള്ള അസുഖങ്ങൾ ചില പക്ഷികൾക്കും ഉണ്ടാകു​ന്ന​തി​നാൽ, അവയുടെ ജീവശാ​സ്‌ത്ര​വും സ്വഭാ​വ​ങ്ങ​ളും സംബന്ധിച്ച വിവരങ്ങൾ നമ്മുടെ ആരോഗ്യ സംരക്ഷ​ണ​ത്തി​നും ഉപകാ​ര​പ്ര​ദ​മാ​യി​രി​ക്കാൻ കഴിയും.

വളയമി​ടു​ന്നത്‌ ക്രൂര​മോ?

പക്ഷികളെ വളയമി​ട്ടു വിടുന്ന രീതി​യുള്ള രാജ്യ​ങ്ങ​ളിൽ, അതിനു നിയ​ന്ത്ര​ണങ്ങൾ ഉണ്ട്‌. വളയമി​ടു​ന്ന​വർക്കു സാധാ​ര​ണ​ഗ​തി​യിൽ ലൈസൻസ്‌ ആവശ്യ​മാണ്‌. ഓസ്‌​ട്രേ​ലി​യ​യിൽ “പക്ഷികൾക്കു ഹാനി വരാതെ അവയെ പിടിച്ച്‌ വളയമി​ടാൻ അതു ചെയ്യു​ന്ന​വർക്കു നല്ല പരിശീ​ലനം നൽകാ​റുണ്ട്‌. ഇതിനു സാധാരണ രണ്ടു വർഷ​മെ​ടു​ക്കും, വളരെ​യ​ധി​കം പരിശീ​ലനം നേടേ​ണ്ടത്‌ ആവശ്യ​മാണ്‌” എന്ന്‌ ‘ഓസ്‌​ട്രേ​ലി​യൻ പ്രകൃതി സംരക്ഷണ ഏജൻസി’ പറയുന്നു. സമാന​മായ നിയ​ന്ത്ര​ണങ്ങൾ യൂറോ​പ്പി​ലും അതു​പോ​ലെ കാനഡ​യി​ലും ഐക്യ​നാ​ടു​ക​ളി​ലും മറ്റു രാജ്യ​ങ്ങ​ളി​ലും ഉണ്ട്‌.

വളയങ്ങ​ളു​ടെ ആകൃതി​യും വലിപ്പ​വും നിറവും അതിന്‌ ഉപയോ​ഗി​ക്കുന്ന പദാർഥ​വും വ്യത്യാ​സ​പ്പെ​ട്ടി​രി​ക്കും. മിക്കതി​നും ഉപയോ​ഗി​ക്കു​ന്നത്‌ അലൂമി​നി​യ​മോ പ്ലാസ്റ്റി​ക്കോ പോലെ ഭാരം കുറഞ്ഞ എന്തെങ്കി​ലും ആയിരി​ക്കും. എന്നാൽ, കൂടുതൽ ആയുസ്സുള്ള അല്ലെങ്കിൽ ലവണജല പ്രദേ​ശ​ങ്ങ​ളിൽ കഴിയുന്ന പക്ഷികൾക്കു സ്റ്റെയിൻലെസ്‌ സ്റ്റീലോ ദ്രവി​ച്ചു​പോ​കാത്ത മറ്റെ​ന്തെ​ങ്കി​ലും പദാർഥ​മോ കൊണ്ടുള്ള വളയമാണ്‌ ഉപയോ​ഗി​ക്കു​ന്നത്‌. വ്യത്യസ്‌ത വർണങ്ങ​ളി​ലുള്ള വളയങ്ങൾ അകലെ​നി​ന്നു​തന്നെ പക്ഷിയെ തിരി​ച്ച​റി​യാൻ സഹായി​ക്കു​ന്നു. വ്യത്യസ്‌ത തരത്തി​ലുള്ള വളയങ്ങൾ ഇട്ടു​കൊ​ടു​ക്കേ​ണ്ടത്‌ ആവശ്യ​മാ​യി​രി​ക്കു​ന്നെ​ങ്കി​ലും, തിരി​ച്ച​റി​യാ​നാ​യി പക്ഷിയെ വീണ്ടും പിടി​ക്കു​മ്പോ​ഴുള്ള ബുദ്ധി​മു​ട്ടു​കൾ അതിന്‌ അനുഭ​വി​ക്കേണ്ടി വരുന്നില്ല.

ഏതു തരത്തി​ലുള്ള വളയമി​ടൽ, അടയാ​ള​മി​ടൽ രീതികൾ ഉപയോ​ഗി​ച്ചാ​ലും, പക്ഷികൾക്ക്‌ അസ്വസ്ഥ​ത​യു​ണ്ടാ​ക്കുന്ന അല്ലെങ്കിൽ അവയുടെ പെരു​മാ​റ്റ​ത്തെ​യോ ജൈവ​ഘ​ട​ന​യെ​യോ ആയുസ്സി​നെ​യോ സാമൂ​ഹിക ജീവി​ത​ത്തെ​യോ പരിസ്ഥി​തി​യെ​യോ അതിജീ​വ​ന​ത്തെ​യോ ബാധി​ച്ചേ​ക്കാ​വുന്ന യാതൊ​ന്നും അവയ്‌ക്കു സംഭവി​ക്കാ​തി​രി​ക്കാൻ ഗവേഷകർ ശ്രദ്ധി​ക്കു​ന്നു. ഉദാഹ​ര​ണ​ത്തിന്‌, തീവ്ര​വർണ​ത്തി​ലുള്ള ഒരു അടയാളം ചിറകിൽ പിടി​പ്പി​ച്ചാൽ, അതു പക്ഷിയെ ഇരപി​ടി​യ​ന്മാർക്ക്‌ എളുപ്പ​ത്തിൽ ദൃശ്യ​മാ​ക്കി​ത്തീർക്കു​ക​യോ ഇണചേ​രു​ന്ന​തി​ലുള്ള അതിന്റെ വിജയത്തെ സ്വാധീ​നി​ക്കു​ക​യോ ചെയ്‌തേ​ക്കാം. ചില വർഗത്തിൽ പെട്ട പക്ഷികൾ അവയുടെ കാലി​ലാണ്‌ കാഷ്‌ഠി​ക്കു​ന്നത്‌. അതിനാൽ അവയുടെ കാലിൽ വളയം ഇടുന്നത്‌ അവയ്‌ക്ക്‌ അണുബാധ ഉണ്ടാകു​ന്ന​തിന്‌ ഇടയാ​ക്കി​യേ​ക്കാം. തണുപ്പുള്ള പ്രദേ​ശ​ങ്ങ​ളിൽ വളയങ്ങ​ളിൽ ഐസ്‌ പൊതി​യു​ന്നത്‌ പക്ഷികൾക്ക്‌, അപകട​കരം ആയേക്കാം. നീർപ്പ​ക്ഷി​ക​ളു​ടെ കാര്യ​ത്തിൽ ഇതു പ്രത്യേ​കി​ച്ചും സത്യമാണ്‌. പക്ഷികൾക്ക്‌ അടയാ​ള​മി​ടു​ന്ന​തിൽ ഉൾപ്പെ​ട്ടി​രി​ക്കുന്ന ചില സംഗതി​കൾ മാത്ര​മാണ്‌ ഇവ. ഈ പരിപാ​ടി ഫലപ്ര​ദ​വും അതേസ​മയം പക്ഷികൾക്കു ഹാനി​ക​ര​മ​ല്ലാ​ത്ത​തു​മായ രീതി​യിൽ നടപ്പാ​ക്ക​ണ​മെ​ങ്കിൽ, പക്ഷിക​ളു​ടെ ജൈവ​ശാ​സ്‌ത്ര​വും പെരു​മാ​റ്റ​വും സംബന്ധിച്ച്‌ ഉണ്ടായി​രി​ക്കേണ്ട ശാസ്‌ത്രീയ അറിവി​ന്റെ വ്യാപ്‌തി ഇതു വെളി​പ്പെ​ടു​ത്തു​ന്നു.

അടയാ​ള​മുള്ള ഒരു പക്ഷി​യെ​യോ മൃഗ​ത്തെ​യോ നിങ്ങൾ കണ്ടാലോ?

ചില​പ്പോൾ അടയാ​ള​ത്തിൽ ഒരു ടെല​ഫോൺ നമ്പരോ വിലാ​സ​മോ ആലേഖനം ചെയ്‌തി​രി​ക്കും. അടയാ​ള​മിട്ട ആളുമാ​യി ബന്ധപ്പെ​ടാൻ അതു നിങ്ങളെ സഹായി​ക്കും. a എപ്പോൾ, എവി​ടെ​വെച്ച്‌ നിങ്ങൾക്ക്‌ ആ അടയാളം കിട്ടി​യെന്ന കാര്യ​വും ഒരുപക്ഷേ അതിലെ മറ്റു വിശദാം​ശ​ങ്ങ​ളും ആ വ്യക്തിയെ അറിയി​ക്കാൻ സാധി​ക്കും. ഉദാഹ​ര​ണ​ത്തിന്‌, ഒരു മത്സ്യത്തി​ന്റെ കാര്യ​ത്തിൽ അടയാ​ള​മിട്ട്‌ സ്വത​ന്ത്ര​മാ​ക്ക​പ്പെട്ട ശേഷം അത്‌ എത്ര ദൂരം, എത്ര വേഗത്തിൽ സഞ്ചരിച്ചു എന്ന്‌ ഒരു ജീവശാ​സ്‌ത്ര​ജ്ഞനു നിർണ​യി​ക്കാൻ സാധി​ക്കും.

ലോക​മെ​മ്പാ​ടു​മുള്ള ഗവേഷ​ക​രു​ടെ​യും കിട്ടുന്ന വളയങ്ങ​ളെ​യും മറ്റ്‌ അടയാ​ള​ങ്ങ​ളെ​യും കുറിച്ചു റിപ്പോർട്ടു ചെയ്യുന്ന മനസ്സാ​ക്ഷി​ബോ​ധ​മുള്ള ആളുക​ളു​ടെ​യും ശ്രമഫ​ല​മാ​യി വന്യജീ​വി​കളെ കുറി​ച്ചുള്ള വിസ്‌മ​യി​പ്പി​ക്കുന്ന വിശദാം​ശങ്ങൾ ശേഖരി​ക്കാൻ സാധി​ച്ചി​ട്ടുണ്ട്‌. നീർക്കാ​ട​യു​ടെ കുടും​ബ​ത്തിൽ പെട്ട, 100-200 ഗ്രാം തൂക്കമുള്ള ‘റെഡ്‌ നോട്ട്‌’ പക്ഷിയു​ടെ കാര്യം നോക്കുക. ചില ‘റെഡ്‌ നോട്ടു​കൾ’ ഓരോ വർഷവും കാനഡ​യു​ടെ ഏറ്റവും വടക്കു​നി​ന്നു തെക്കേ അമേരി​ക്ക​യു​ടെ അങ്ങേയ​റ്റ​ത്തേക്കു ദേശാ​ടനം ചെയ്യു​ന്ന​താ​യും തുടർന്ന്‌ തിരിച്ചു പോകു​ന്ന​താ​യും ശാസ്‌ത്ര​ജ്ഞർക്ക്‌ ഇപ്പോൾ അറിയാം. ആ ദൂരം ഏകദേശം 30,000 കിലോ​മീ​റ്റർ വരും!

പ്രായം ചെന്ന​തെ​ങ്കി​ലും ആരോ​ഗ്യ​മുള്ള ഒരു റെഡ്‌ നോട്ടി​ന്റെ വളയം അതു 15 വർഷമാ​യി ഈ സഞ്ചാരം നടത്തു​ന്ന​താ​യി വെളി​പ്പെ​ടു​ത്തി. അതേ, ഈ കൊച്ചു​പക്ഷി 4,00,000 കിലോ​മീ​റ്റർ സഞ്ചരി​ച്ചി​രി​ക്കാൻ ഇടയുണ്ട്‌, അതായത്‌ ഭൂമി​യും ചന്ദ്രനും തമ്മിലുള്ള ശരാശരി അകല​ത്തെ​ക്കാൾ കൂടുതൽ! തികച്ചും ശ്രദ്ധേ​യ​മായ ഈ കൊച്ചു​പ​ക്ഷി​യെ ഉള്ള​ങ്കൈ​യിൽ പിടി​ച്ചു​കൊണ്ട്‌ പ്രകൃതി ലേഖക​നായ സ്‌കോട്ട്‌ വൈഡൻസോൾ ഇങ്ങനെ പറഞ്ഞു: “ആദരവും വിസ്‌മ​യ​വും പ്രകടി​പ്പി​ക്കാ​നേ എന്നെ​ക്കൊ​ണ്ടാ​വൂ.” അതേ, ഭൂമി​യി​ലെ നിരവധി ജീവജാ​ല​ങ്ങളെ കുറിച്ച്‌ നാം എത്രയ​ധി​കം പഠിക്കു​ന്നു​വോ, ‘ആകാശ​വും ഭൂമി​യും അവയി​ലുള്ള സകലവും ഉണ്ടാക്കിയ’ യഹോ​വ​യാം ദൈവ​ത്തോ​ടുള്ള ഭയാദ​രവ്‌ നമ്മുടെ ഉള്ളിൽ അത്രയ​ധി​കം നിറയു​ന്നു.—സങ്കീർത്തനം 146:5, 6. (g02 3/22)

[അടിക്കു​റിപ്പ്‌]

 [15-ാം പേജിലെ ചതുരം/ചിത്രങ്ങൾ]

അടയാളമിടുകയും നിരീ​ക്ഷണം നടത്തു​ക​യും ചെയ്യുന്ന വിധങ്ങൾ

ഗവേഷണം നടത്തു​ന്ന​തി​നാ​യി പക്ഷികൾക്കു മാത്രമല്ല, മറ്റു ജീവി​കൾക്കും അടയാ​ള​മി​ടാ​റുണ്ട്‌. ഇതിന്‌ ഉപയോ​ഗി​ക്കുന്ന രീതികൾ, അതിന്റെ ശാസ്‌ത്രീയ ലക്ഷ്യങ്ങ​ളെ​യും ഉൾപ്പെ​ട്ടി​രി​ക്കുന്ന ജീവി​ക​ളു​ടെ ശാരീ​രിക പ്രത്യേ​ക​ത​ക​ളെ​യും സ്വഭാ​വ​ത്തെ​യും ആശ്രയി​ച്ചി​രി​ക്കു​ന്നു. കാൽവ​ള​യ​ങ്ങൾക്കു പുറമേ, കൊടി​കൾ, റിബണു​കൾ, ടാഗുകൾ, പെയിന്റ്‌, പച്ചകുത്ത്‌, ഡൈകൾ, ചൂടട​യാ​ളങ്ങൾ, കോള​റു​കൾ, റേഡി​യോ സം​പ്രേക്ഷണ ഉപകര​ണങ്ങൾ, അതിസൂക്ഷ്‌മ കമ്പ്യൂ​ട്ട​റു​കൾ, സ്റ്റെയിൻലെസ്‌ സ്റ്റീൽ ശരങ്ങൾ (കോഡ്‌ എഴുത്തുള്ള ടാഗുകൾ അതിൽ ബന്ധിച്ചി​രി​ക്കും), കൂടാതെ കാൽവി​രൽ, കാത്‌, വാൽ എന്നിവ​യു​ടെ അഗ്രം മുറി​ക്കുന്ന രീതി​ക​ളും മറ്റു വിദ്യ​ക​ളും രീതി​ക​ളും ഗവേഷകർ ഉപയോ​ഗി​ക്കാ​റുണ്ട്‌. ഇവയിൽ ചിലതി​നു ചെലവു കുറവാണ്‌, മറ്റു ചിലവ വളരെ ചെല​വേ​റി​യ​തും. നീർനാ​യു​ടെ ഡൈവിങ്‌ ശീലങ്ങളെ കുറിച്ചു പഠിക്കാൻ ഉപയോ​ഗി​ക്കുന്ന ചെറിയ വീഡി​യോ പോലുള്ള ഒരു സൂക്ഷ്‌മ ഇലക്‌​ട്രോ​ണിക്‌ ഉപകര​ണ​ത്തിന്‌ 6,90,000 രൂപ​യോ​ളം വിലവ​രും.

‘പാസിവ്‌ ഇന്റ​ഗ്രേ​റ്റഡ്‌ ട്രാൻസ്‌പോ​ണ്ടർ’ എന്നു വിളി​ക്ക​പ്പെ​ടുന്ന ഒരു ഇലക്‌​ട്രോ​ണിക്‌ ഉപകരണം, മരുന്നു കുത്തി​വെച്ചു മയക്കിയ ഒരു ജീവി​യു​ടെ ത്വക്കി​ന​ടി​യി​ലോ ശരീര​ത്തി​നു​ള്ളി​ലോ സ്ഥാപി​ക്കാ​വു​ന്ന​താണ്‌. എന്നിട്ട്‌ ഒരു പ്രത്യേക ഉപകരണം ഉപയോ​ഗിച്ച്‌ പുറത്തു​നി​ന്നു​തന്നെ അതിലെ വിവരങ്ങൾ വായി​ച്ചെ​ടു​ക്കാൻ കഴിയും. നീല ചിറകുള്ള ചൂരമ​ത്സ്യ​ത്തെ കുറിച്ചു പഠിക്കാൻ ‘ആർ​ക്കൈവൽ ടാഗ്‌’ അല്ലെങ്കിൽ ‘സ്‌മാർട്ട്‌ ടാഗ്‌’ എന്നു വിളി​ക്ക​പ്പെ​ടുന്ന ഒരു ചെറിയ കമ്പ്യൂട്ടർ അതി​ന്റെ​യു​ള്ളിൽ സ്ഥാപി​ക്കു​ന്നു. ഈ അതിസൂക്ഷ്‌മ കമ്പ്യൂ​ട്ട​റു​കൾ താപനില, മത്സ്യം ജലത്തി​ന​ടി​യി​ലേക്കു പോകു​ന്ന​തി​ന്റെ ആഴം, പ്രകാശ തീവ്രത, സമയം എന്നിവ സംബന്ധി​ച്ചുള്ള വിവരങ്ങൾ ഒമ്പതു വർഷം​വരെ ശേഖരി​ച്ചു​വെ​ക്കു​ന്നു. ആ ടാഗ്‌ തിരികെ എടുത്തു​ക​ഴി​യു​മ്പോൾ പ്രസ്‌തുത മത്സ്യത്തി​ന്റെ സഞ്ചാരത്തെ കുറി​ച്ചുള്ള വിവരങ്ങൾ—ഓരോ ദിവസ​ത്തെ​യും പ്രകാ​ശ​ത്തി​ന്റെ അളവും സമയവും സംബന്ധിച്ച രേഖകൾ താരത​മ്യ​പ്പെ​ടു​ത്തുക വഴി ഇതു കണക്കാ​ക്കാം—ഉൾപ്പെടെ അതിൽനി​ന്നു വിലപ്പെട്ട ധാരാളം വിവരങ്ങൾ ലഭിക്കു​ന്നു.

പാമ്പു​ക​ളു​ടെ ത്വക്കിലെ ഏതാനും ശൽക്കങ്ങൾ നീക്കം ചെയ്‌തു​കൊണ്ട്‌ അവയ്‌ക്ക്‌ അടയാ​ള​മി​ടാൻ കഴിയും; ആമകളു​ടെ തോടിൽ ചെറിയ വെട്ടുകൾ വരുത്തി​ക്കൊണ്ട്‌ അടയാ​ള​മി​ടാ​നാ​കും; പല്ലിക​ളിൽ, അവയുടെ ഒരു കാൽവി​രൽ മുറി​ച്ചു​കൊണ്ട്‌; ചീങ്കണ്ണി​ക​ളി​ലും മുതല​ക​ളി​ലും അവയുടെ വാലി​ലുള്ള കൂർത്ത ഭാഗങ്ങൾ നീക്കം ചെയ്‌തു​കൊണ്ട്‌ ഇതു സാധി​ക്കും. ചില ജീവി​കൾക്കു സ്വാഭാ​വി​ക​മാ​യി​ത്തന്നെ തനത്‌ ആകാര​സ​വി​ശേ​ഷ​തകൾ ഉള്ളതി​നാൽ ഫോട്ടോ മാത്രം നോക്കി അവയിൽ ഓരോ​ന്നി​നെ​യും തിരി​ച്ച​റി​യാൻ സാധി​ക്കും.

[ചിത്രങ്ങൾ]

ഒരു കരിങ്ക​ര​ടി​യു​ടെ കാതിൽ അടയാ​ള​മി​ടു​ന്നു; ഡാംസെൽ മത്സ്യത്തി​ന്മേൽ നീണ്ട, നേർത്ത ഒരു അടയാളം; ചീങ്കണ്ണി​ക​ളു​ടെ വാലിൽ അടയാളം

സാറ്റലൈറ്റ്‌ ട്രാൻസ്‌മി​റ്റർ ഘടിപ്പിച്ച ഒരു കായൽ പുള്ള്‌

ആന്തരിക വിവരങ്ങൾ സമാഹ​രിച്ച്‌ ദൂരേക്ക്‌ അയയ്‌ക്കുന്ന ടെലി​മെ​ട്രി ഉപകരണം ഘടിപ്പിച്ച മഴവിൽ മത്സ്യം

[കടപ്പാട്‌]

കരടി: © Glenn Oliver/Visuals Unlimited; ഡാംസെൽ മത്സ്യം: Dr. James P. McVey, NOAA Sea Grant Program; ചീങ്കണ്ണി: Copyright © 2001 by Kent A. Vliet; 2, 15 പേജു​ക​ളി​ലെ കായൽ പുള്ള്‌: Photo by National Park Service; മനുഷ്യർ മത്സ്യത്തോടൊപ്പം: © Bill Banaszewski/Visuals Unlimited

[13-ാം പേജിലെ ചിത്രം]

ഒരു ‘ഷാർപ്പ്‌-ഷിൻഡ്‌’ ഇനം പരുന്തി​നെ വളയം അണിയി​ക്കു​ന്നു

[കടപ്പാട്‌]

© Jane McAlonan/Visuals Unlimited