വിശുദ്ധ പത്രൊ​സി​ന്റെ മത്സ്യം

നിങ്ങൾ ഇസ്രാ​യേ​ലി​ലെ ഗലീല​ക്ക​ട​ലി​നു സമീപ​ത്തുള്ള ഒരു റെസ്റ്ററന്റ്‌ സന്ദർശി​ക്കു​ന്നു​വെ​ന്നി​രി​ക്കട്ടെ. അവിടത്തെ വിഭവ​ങ്ങ​ളു​ടെ പട്ടിക​യി​ലെ ഒരു ഇനം നിങ്ങളു​ടെ പ്രത്യേക ശ്രദ്ധ ആകർഷി​ക്കാൻ ഇടയുണ്ട്‌. അത്‌ “വിശുദ്ധ പത്രൊ​സി​ന്റെ മത്സ്യം” (“St. Peter’s fish”) ആണ്‌. എല്ലാവ​രു​ടെ​യും, പ്രത്യേ​കിച്ച്‌ വിനോ​ദ​സ​ഞ്ചാ​രി​ക​ളു​ടെ, ഇഷ്ടപ്പെട്ട വിഭവ​മാണ്‌ അതെന്ന്‌ വെയ്‌റ്റർ നിങ്ങ​ളോ​ടു പറഞ്ഞേ​ക്കാം. വറു​ത്തെ​ടുത്ത ആ മീൻ ചൂടോ​ടെ കഴിക്കു​മ്പോ​ഴത്തെ രുചി​യൊ​ന്നു വേറെ​ത​ന്നെ​യാണ്‌. എന്നാൽ അപ്പൊ​സ്‌ത​ല​നായ പത്രൊ​സു​മാ​യി ഈ മത്സ്യത്തിന്‌ എന്തു ബന്ധമാ​ണു​ള്ളത്‌?

മത്തായി 17:24-27-ലെ ബൈബിൾ വിവരണം ഉത്തരം നൽകുന്നു. ഒരിക്കൽ പത്രൊസ്‌ ഗലീല​ക്ക​ട​ലിന്‌ അടുത്തുള്ള കഫർന്ന​ഹൂം പട്ടണം സന്ദർശി​ച്ച​പ്പോൾ യേശു ആലയ നികുതി അടയ്‌ക്കാ​റു​ണ്ടോ എന്നു ചിലർ അവനോ​ടു ചോദി​ച്ചു. ദൈവ​പു​ത്ര​നായ താൻ അത്തരം നികുതി അടയ്‌ക്കാൻ ബാധ്യ​സ്ഥ​ന​ല്ലെന്നു യേശു പിന്നീടു വിശദീ​ക​രി​ച്ചു. എന്നിരു​ന്നാ​ലും മറ്റുള്ള​വരെ ഇടറി​ക്കാ​തി​രി​ക്കു​ന്ന​തിന്‌, കടലിൽ ചെന്നു ചൂണ്ടൽ ഇട്ട്‌ ആദ്യം കിട്ടുന്ന മീനിന്റെ വായിൽ കാണുന്ന നാണയം നികു​തി​യാ​യി കൊടു​ക്കാൻ യേശു പത്രൊ​സി​നോ​ടു പറഞ്ഞു.

ബൈബി​ളിൽ രേഖ​പ്പെ​ടു​ത്തി​യി​രി​ക്കുന്ന ഈ സംഭവ​ത്തിൽനി​ന്നാണ്‌ “വിശുദ്ധ പത്രൊ​സി​ന്റെ മത്സ്യം” എന്ന പേരു വന്നിരി​ക്കു​ന്നത്‌. എന്നാൽ ഏതുതരം മത്സ്യ​ത്തെ​യാ​ണു പത്രൊസ്‌ പിടി​ച്ചത്‌?

 ധാരാളം മത്സ്യമുള്ള ഗലീല​ക്ക​ടൽ

ഗലീല​ക്ക​ട​ലിൽ കാണുന്ന ഏതാണ്ട്‌ 20 മത്സ്യവർഗ​ങ്ങ​ളിൽ പത്തെണ്ണം മാത്രമേ പത്രൊസ്‌ പിടി​ച്ച​തരം മത്സ്യം ആയിരി​ക്കാൻ സാധ്യ​ത​യു​ള്ള​താ​യി കണക്കാ​ക്ക​പ്പെ​ടു​ന്നു​ള്ളൂ. ഈ പത്തെണ്ണത്തെ വ്യാവ​സാ​യിക പ്രാധാ​ന്യ​മുള്ള മൂന്നു കൂട്ടങ്ങ​ളാ​യി തിരി​ച്ചി​രി​ക്കു​ന്നു.

ഏറ്റവും വലിയ കൂട്ടത്തി​ന്റെ പേര്‌ മുഷ്‌റ്റ്‌ എന്നാണ്‌. “ചീപ്പ്‌” എന്നാണ്‌ അറബി​യിൽ ഈ വാക്കിന്റെ അർഥം. ഈ കൂട്ടത്തിൽ പെടുന്ന അഞ്ച്‌ വർഗങ്ങൾക്ക്‌ ചീപ്പു പോലുള്ള മുതു​ച്ചി​റക്‌ ഉള്ളതി​നാ​ലാണ്‌ ഇത്‌. ഇതിലെ ഒരു വർഗം ഏകദേശം 45 സെന്റി​മീ​റ്റർ നീളവും രണ്ടു കിലോ​ഗ്രാം തൂക്കവും വെക്കുന്നു.

രണ്ടാമത്തെ കൂട്ടം ചെറു മത്തി പോ​ലെ​യി​രി​ക്കുന്ന കിന്നേ​രെത്ത്‌ (ഗലീല​ക്കടൽ) മത്തിയാണ്‌. നല്ല സീസണിൽ ഓരോ രാത്രി​യി​ലും ഇവയെ ടൺ കണക്കി​നാ​ണു പിടി​ക്കു​ന്നത്‌, അതായത്‌ ഒരു വർഷം ഏതാണ്ട്‌ ആയിരം ടണ്ണോളം. പുരാ​ത​ന​കാ​ലം മുതൽ ഈ മത്തി അച്ചാറി​ടു​ന്ന​തിന്‌ ഉപയോ​ഗി​ച്ചു വന്നിരി​ക്കു​ന്നു.

‘മീശ​ത്തൊ​ങ്ങൽ മത്സ്യം’ (barbel) എന്നും അറിയ​പ്പെ​ടുന്ന ബിന്നി​യാണ്‌ മൂന്നാ​മത്തെ കൂട്ടം. ഇതിലെ മൂന്ന്‌ വർഗങ്ങൾക്ക്‌ വായുടെ ഭാഗത്തു മീശ​പോ​ലുള്ള ഉപാം​ഗ​ങ്ങ​ളുണ്ട്‌. അതു​കൊ​ണ്ടു​തന്നെ അതിന്‌ “രോമം” എന്നർഥ​മുള്ള ബിന്നി എന്ന എബ്രായ പേരു ലഭിച്ചി​രി​ക്കു​ന്നു. കക്കാ​പ്രാ​ണി​കൾ, ഒച്ചുകൾ, ചെറു മത്സ്യങ്ങൾ എന്നിവ​യൊ​ക്കെ​യാണ്‌ ഇതിന്റെ ആഹാരം. നീണ്ട തലയുള്ള മീശ​ത്തൊ​ങ്ങൽ മത്സ്യത്തിന്‌ ഏതാണ്ട്‌ 75 സെന്റി​മീ​റ്റർ നീളവും ഏഴു കിലോ​ഗ്രാ​മി​ല​ധി​കം തൂക്കവും വെക്കും. നല്ല ദശയുള്ള ഈ മത്സ്യം യഹൂദ​ന്മാർ ശബത്തു​നാ​ളു​ക​ളി​ലും ഉത്സവദി​ന​ങ്ങ​ളി​ലും പാകം ചെയ്യുന്ന ഒരു ഇഷ്ടപ്പെട്ട വിഭവ​മാണ്‌.

വ്യാവ​സാ​യി​ക പ്രാധാ​ന്യ​മുള്ള ഈ മൂന്നു കൂട്ടങ്ങ​ളി​ലും പെടാ​ത്ത​താണ്‌ ഗലീല​ക്ക​ട​ലി​ലെ ഏറ്റവും വലിയ മീനായ പൂച്ചമ​ത്സ്യം. ഇതിന്‌ 1.20 മീറ്റർ വരെ നീളവും ഏതാണ്ട്‌ 11 കിലോ​ഗ്രാം തൂക്കവും വരും. എന്നാൽ പൂച്ചമ​ത്സ്യ​ത്തി​നു ചെതുമ്പൽ ഇല്ല. അതു​കൊണ്ട്‌ മോ​ശൈക ന്യായ​പ്ര​മാ​ണം അനുസ​രിച്ച്‌ അത്‌ അശുദ്ധ​മാ​യി​രു​ന്നു. (ലേവ്യ​പു​സ്‌തകം 11:9-12) തന്മൂലം യഹൂദ​ന്മാർ അതു കഴിക്കാ​റില്ല, പത്രൊസ്‌ പിടിച്ച മത്സ്യം അതായി​രി​ക്കാ​നും ഇടയില്ല.

പത്രൊസ്‌ പിടിച്ച മത്സ്യം ഏതായി​രു​ന്നു?

“വിശുദ്ധ പത്രൊ​സി​ന്റെ മത്സ്യം” ആയി പൊതു​വേ കണക്കാ​ക്ക​പ്പെ​ടു​ന്നത്‌ മുഷ്‌റ്റ്‌ മത്സ്യമാണ്‌. ഗലീല​ക്ക​ട​ലി​ന​ടു​ത്തുള്ള റെസ്റ്ററ​ന്റു​ക​ളിൽ ആ പേരിൽ വിളമ്പു​ന്ന​തും ഇതുതന്നെ. മുള്ളു കുറവാ​യ​തി​നാൽ ഇതു പാകം ചെയ്യാ​നും കഴിക്കാ​നും എളുപ്പ​മാണ്‌. എന്നാൽ വാസ്‌ത​വ​ത്തിൽ പത്രൊസ്‌ പിടിച്ച മീൻ ഇതുതന്നെ ആണോ?

അമ്പതി​ലേ​റെ വർഷമാ​യി ഗലീല​ക്കടൽ തീരത്തു താമസി​ക്കുന്ന മുക്കു​വ​നായ മെൻഡൽ നൂൻ പ്രാ​ദേ​ശിക മത്സ്യങ്ങളെ സംബന്ധിച്ച്‌ നല്ല അറിവു​ള്ള​യാൾ എന്ന നിലയിൽ ആദരി​ക്ക​പ്പെ​ടു​ന്നു. അദ്ദേഹം പറയുന്നു: “മുഷ്‌റ്റി​ന്റെ ഭക്ഷണം പ്ലവകങ്ങ​ളാണ്‌. മറ്റു ഭക്ഷണം അവയെ ആകർഷി​ക്കാ​റില്ല. അതു​കൊണ്ട്‌ ഇവയെ ചൂണ്ടൽ ഇട്ടല്ല, മറിച്ച്‌ വല വീശി​യാ​ണു പിടി​ക്കാറ്‌.” അങ്ങനെ​യാ​കു​മ്പോൾ പത്രൊസ്‌ പിടിച്ച മത്സ്യം ഇതാകാൻ വഴിയില്ല. അപ്പോൾപ്പി​ന്നെ അതു കിന്നേ​രത്ത്‌ മത്തി ആയിരി​ക്കു​മോ? ഈ മത്സ്യം തീരെ ചെറു​താ​യ​തി​നാൽ അതിനുള്ള സാധ്യത ഒട്ടും​ത​ന്നെ​യില്ല.

പിന്നെ ബാക്കി​യു​ള്ളത്‌ മീശ​ത്തൊ​ങ്ങൽ മത്സ്യം മാത്ര​മാണ്‌. “വിശുദ്ധ പത്രൊ​സി​ന്റെ മത്സ്യം” എന്ന പേരിന്‌ ഏറ്റവും അർഹമാ​യത്‌ ഈ മത്സ്യമാ​ണെന്നു ചിലർ കരുതു​ന്നു. നൂൻ പറഞ്ഞു: “കാലങ്ങ​ളാ​യി [ഗലീല​ക്ക​ട​ലി​ലെ] മുക്കു​വ​ന്മാർ തടാക​ത്തി​ന്റെ അടിത്ത​ട്ടി​ലെ ജലജീ​വി​കളെ തിന്നു ജീവി​ക്കുന്ന മീശ​ത്തൊ​ങ്ങൽ മത്സ്യത്തെ പിടി​ക്കാൻ മത്തി കൊളു​ത്തിയ ചൂണ്ടകൾ ഉപയോ​ഗി​ച്ചു പോന്നി​ട്ടുണ്ട്‌.” അദ്ദേഹം ഇങ്ങനെ ഉപസം​ഹ​രി​ക്കു​ന്നു: “പത്രൊസ്‌ പിടി​ച്ചത്‌ മീശ​ത്തൊ​ങ്ങൽ മത്സ്യത്തെ ആയിരു​ന്നു എന്ന്‌ ഏതാണ്ട്‌ ഉറപ്പിച്ചു പറയാ​നാ​കും.”

അങ്ങനെ​യെ​ങ്കിൽ, “വിശുദ്ധ പത്രൊ​സി​ന്റെ മത്സ്യം” എന്ന പേരിൽ മുഷ്‌റ്റ്‌ മത്സ്യം വിളമ്പു​ന്നത്‌ എന്തു​കൊ​ണ്ടാണ്‌? നൂൻ ഉത്തരം നൽകുന്നു: “കുഴപ്പി​ക്കുന്ന ഈ പേരു മാറ്റത്തിന്‌ ഒരു വിശദീ​ക​ര​ണമേ നൽകാ​നാ​വൂ. അത്‌ വിനോ​ദ​സ​ഞ്ചാര വ്യവസാ​യ​ത്തി​നു നല്ലതാ​യി​രു​ന്നു എന്നതു​തന്നെ! . . . വിദൂര ദിക്കു​ക​ളിൽനി​ന്നു പോലും തീർഥാ​ടകർ എത്തിത്തു​ട​ങ്ങി​യ​പ്പോൾ തടാക​ക്ക​ര​യിൽ പണ്ടുമു​തൽ പ്രവർത്തി​ച്ചു​വ​രുന്ന ഭോജ​ന​ശാ​ല​ക​ളിൽ വിളമ്പുന്ന മുഷ്‌റ്റിന്‌ ‘വിശുദ്ധ പത്രൊ​സി​ന്റെ മത്സ്യം’ എന്ന പേരു നൽകു​ന്നത്‌ ബിസി​ന​സ്സി​നു ഗുണം ചെയ്യു​മെന്നു കാണ​പ്പെട്ടു എന്നതിനു സംശയ​മില്ല. ആളുകൾക്ക്‌ ഏറ്റവും ഇഷ്ടപ്പെ​ട്ട​തും എളുപ്പം തയ്യാറാ​ക്കാൻ കഴിയു​ന്ന​തു​മായ മത്സ്യത്തിന്‌ ഏറ്റവും ജനശ്ര​ദ്ധ​യാ​കർഷി​ക്കുന്ന പേരു ലഭിച്ചു!”

പത്രൊസ്‌ പിടിച്ച മത്സ്യം ഏതാ​ണെന്നു തീർത്തു പറയാൻ നമുക്കാ​വി​ല്ലെ​ങ്കി​ലും, “വിശുദ്ധ പത്രൊ​സി​ന്റെ മത്സ്യം” എന്ന പേരിൽ നിങ്ങളു​ടെ മുമ്പിൽ എത്തുന്ന വിഭവം അത്യന്തം രുചി​ക​ര​മാ​യി​രി​ക്കാ​നാണ്‌ ഏറെ സാധ്യത. (g02 2/22)

[25-ാം പേജിലെ ചിത്രം]

“മുഷ്‌റ്റ്‌”

[25-ാം പേജിലെ ചിത്രം]

മീശത്തൊങ്ങൽ മത്സ്യം

[25-ാം പേജിലെ ചിത്ര​ങ്ങൾക്ക്‌ കടപ്പാട്‌]

Garo Nalbandian