ഒരു ഹിംസാ​ത്മക നൂറ്റാണ്ട്‌

രാഷ്‌ട്ര​ങ്ങ​ളു​ടെ കൈവശം മാരകാ​യു​ധങ്ങൾ ഉണ്ടെങ്കിൽ സമാധാ​നം നിലനി​റു​ത്താ​നാ​കു​മെന്ന്‌ ആൽഫ്രഡ്‌ നോബൽ വിശ്വ​സി​ച്ചു. അങ്ങനെ​യാ​കു​മ്പോൾ രാഷ്‌ട്ര​ങ്ങൾക്കെ​ല്ലാം ഒന്നിച്ചു​കൂ​ടി ഏത്‌ അക്രമി​യെ​യും ഉന്മൂലനം ചെയ്യാൻ കഴിയും. “അത്‌ യുദ്ധം അസാധ്യ​മാ​ക്കുന്ന ഒരു ശക്തിയാ​യി ഉതകും” എന്ന്‌ അദ്ദേഹം എഴുതി. നോബ​ലി​ന്റെ അഭി​പ്രാ​യ​ത്തിൽ, സുബോ​ധ​മുള്ള ഒരു രാഷ്‌ട്ര​വും സ്വന്തം നാശത്തിന്‌ ഇടയാ​ക്കുന്ന ഒരു പോരാ​ട്ട​ത്തി​നാ​യി ഇറങ്ങി​ത്തി​രി​ക്കു​ക​യില്ല. എന്നാൽ കഴിഞ്ഞ നൂറ്റാണ്ട്‌ എന്തു വെളി​പ്പെ​ടു​ത്തി​യി​രി​ക്കു​ന്നു?

നോബൽ മരിച്ച്‌ 20 വർഷം പോലും തികയു​ന്ന​തി​നു മുമ്പ്‌, ഒന്നാം ലോക​മ​ഹാ​യു​ദ്ധം പൊട്ടി​പ്പു​റ​പ്പെട്ടു. ഈ പോരാ​ട്ടം പുതിയ പല മാരകാ​യു​ധ​ങ്ങ​ളു​ടെ​യും രംഗ​പ്ര​വേ​ശ​ന​ത്തി​നു സാക്ഷ്യം വഹിച്ചു. യന്ത്ര​ത്തോക്ക്‌, വിഷവാ​തകം, അഗ്നിവി​ക്ഷേപണ ആയുധങ്ങൾ, ടാങ്കുകൾ, പോർവി​മാ​നങ്ങൾ, അന്തർവാ​ഹി​നി​കൾ എന്നിവ അവയിൽ ചിലതാണ്‌. ഏകദേശം ഒരു കോടി സൈനി​കർ യുദ്ധത്തിൽ മരണമ​ടഞ്ഞു. പരി​ക്കേ​റ്റ​വ​രു​ടെ എണ്ണം അതിന്റെ ഇരട്ടി​യി​ല​ധി​ക​മാ​യി​രു​ന്നു. ഒന്നാം ലോക​മ​ഹാ​യു​ദ്ധ​ത്തി​ന്റെ കിരാ​ത​ത്വം സമാധാന ശ്രമങ്ങൾ പുനരാ​രം​ഭി​ക്കു​ന്ന​തി​നു കാരണ​മാ​യി. ഇത്‌ സർവരാ​ജ്യ​സ​ഖ്യ​ത്തി​ന്റെ സ്ഥാപന​ത്തി​നു വഴി​തെ​ളി​ച്ചു. അതിൽ പ്രമുഖ പങ്കു വഹിച്ച യു.എസ്‌. പ്രസി​ഡന്റ്‌ വുഡ്രോ വിൽസൺ 1919-ൽ സമാധാ​ന​ത്തി​നുള്ള നോബൽ സമ്മാനം നേടി.

എന്നാൽ യുദ്ധം എന്നേക്കു​മാ​യി അവസാ​നി​ക്കു​മെന്ന പ്രതീ​ക്ഷ​ക​ളെ​യെ​ല്ലാം തച്ചുട​ച്ചു​കൊണ്ട്‌ 1939-ൽ രണ്ടാം ലോക​മ​ഹാ​യു​ദ്ധം പൊട്ടി​പ്പു​റ​പ്പെട്ടു. പല വിധങ്ങ​ളി​ലും ഒന്നാം ലോക​മ​ഹാ​യു​ദ്ധ​ത്തെ​ക്കാൾ ഭീകര​മാ​യി​രു​ന്നു അത്‌. ഈ സമയത്ത്‌ അഡോൾഫ്‌  ഹിറ്റ്‌ലർ ക്രു​യെ​മെ​ലി​ലെ നോബ​ലി​ന്റെ ഫാക്ടറി വിപു​ലീ​ക​രിച്ച്‌ അതിനെ 9,000-ത്തിലധി​കം തൊഴി​ലാ​ളി​ക​ളുള്ള ജർമനി​യി​ലെ ഏറ്റവും വലിയ ആയുധ​ശാ​ല​യാ​ക്കി മാറ്റി. എന്നാൽ യുദ്ധത്തി​ന്റെ ഒടുവിൽ സഖ്യക​ക്ഷി​കൾ നടത്തിയ വ്യോ​മാ​ക്ര​മ​ണ​ത്തിൽ നോബ​ലി​ന്റെ ഫാക്ടറി തരിപ്പ​ണ​മാ​ക്ക​പ്പെട്ടു, അതിന്മേൽ ആയിര​ത്തി​ല​ധി​കം ബോം​ബു​ക​ളാണ്‌ അവർ വർഷി​ച്ചത്‌. വൈരു​ദ്ധ്യ​മെന്നു പറയട്ടെ, നോബ​ലി​ന്റെ സ്വന്തം കണ്ടുപി​ടി​ത്ത​ങ്ങ​ളു​ടെ സഹായ​ത്തോ​ടെ​യാ​യി​രു​ന്നു ആ ബോം​ബു​കൾ നിർമി​ക്ക​പ്പെ​ട്ടത്‌.

നോബ​ലി​ന്റെ മരണത്തെ തുടർന്നുള്ള നൂറ്റാണ്ട്‌ രണ്ടു ലോക​മ​ഹാ​യു​ദ്ധ​ങ്ങൾക്കു മാത്രമല്ല അതി​നെ​ക്കാൾ ചെറിയ അസംഖ്യം പോരാ​ട്ട​ങ്ങൾക്കും സാക്ഷ്യം വഹിച്ചു. ആ കാലഘ​ട്ട​ത്തിൽ ആയുധങ്ങൾ വൻതോ​തിൽ നിർമി​ക്ക​പ്പെട്ടു. കൂടാതെ അവ ഏറെ ബീഭത്സ​വും ആയിത്തീർന്നു. നോബ​ലി​ന്റെ കാല​ശേഷം വ്യാപ​ക​മാ​യി ഉപയോ​ഗി​ക്ക​പ്പെ​ട്ടി​ട്ടുള്ള ചില സൈനിക ഉപകര​ണ​ങ്ങളെ കുറിച്ചു ചിന്തി​ക്കുക.

ലഘു ആയുധങ്ങൾ. ഇവയിൽ കൈ​ത്തോ​ക്കു​കൾ, റൈഫ​ളു​കൾ, ഗ്രനേ​ഡു​കൾ, യന്ത്ര​ത്തോ​ക്കു​കൾ, മോർട്ടാ​റു​കൾ എന്നിവ​യും കൊണ്ടു​ന​ട​ക്കാ​വുന്ന മറ്റ്‌ ആയുധ​ങ്ങ​ളും ഉൾപ്പെ​ടു​ന്നു. ലഘു ആയുധങ്ങൾ അധികം ചെല​വേ​റി​യവ അല്ല. മാത്രമല്ല, അവ പരിര​ക്ഷി​ക്കാ​നും ഉപയോ​ഗി​ക്കാ​നും എളുപ്പ​വു​മാണ്‌.

ഈ ആയുധ​ങ്ങ​ളും പൊതു​ജ​ന​ത്തിന്‌ അവ ഉയർത്തുന്ന ഭീഷണി​യും യുദ്ധം അവസാ​നി​പ്പി​ക്കു​ന്ന​തിൽ വിജയി​ച്ചി​ട്ടു​ണ്ടോ? തീർച്ച​യാ​യു​മില്ല! “ശീതയു​ദ്ധാ​നന്തര കാലഘ​ട്ട​ത്തി​ലെ ബഹുഭൂ​രി​പക്ഷം പോരാ​ട്ട​ങ്ങ​ളി​ലും മുഖ്യ​മാ​യും ഉപയോ​ഗി​ക്ക​പ്പെ​ട്ടി​ട്ടു​ള്ളത്‌” ലഘു ആയുധങ്ങൾ ആണെന്ന്‌ ബുള്ളറ്റിൻ ഓഫ്‌ ആറ്റോ​മിക്‌ സയന്റി​സ്റ്റ്‌സിൽ മൈക്കൾ ക്ലാർ എഴുതു​ന്നു. വാസ്‌ത​വ​ത്തിൽ, സമീപ​കാല യുദ്ധങ്ങ​ളിൽ 90 ശതമാനം മരണങ്ങൾക്കും പരിക്കു​കൾക്കും കാരണം ലഘു ആയുധങ്ങൾ ഉപയോ​ഗി​ച്ചുള്ള ആക്രമണം ആയിരു​ന്നു. 1990-കളിൽ മാത്രം ഈ ഉപകര​ണ​ങ്ങ​ളാൽ 40 ലക്ഷത്തി​ല​ധി​കം ആളുകൾ കൊല്ല​പ്പെട്ടു. പലപ്പോ​ഴും യാതൊ​രു സൈനിക പരിശീ​ല​ന​വും ലഭിച്ചി​ട്ടി​ല്ലാത്ത, പരമ്പരാ​ഗത യുദ്ധ ചട്ടങ്ങൾ ലംഘി​ക്കാൻ യാതൊ​രു മടിയും ഇല്ലാത്ത യുവജ​ന​ങ്ങ​ളാണ്‌ ഈ ലഘു ആയുധങ്ങൾ ഉപയോ​ഗി​ക്കു​ന്നത്‌.

കുഴി​ബോം​ബു​കൾ. 20-ാം നൂറ്റാ​ണ്ടി​ന്റെ അവസാനം ആയപ്പോ​ഴേ​ക്കും ദിവസ​വും ശരാശരി 70 ആളുകൾ കുഴി​ബോം​ബു​ക​ളാൽ അംഗഹീ​ന​രാ​ക്ക​പ്പെ​ടു​ക​യോ കൊല്ല​പ്പെ​ടു​ക​യോ ചെയ്യു​ന്നു​ണ്ടാ​യി​രു​ന്നു! അവരിൽ മിക്കവ​രും സൈനി​കരല്ല, സാധാ​ര​ണ​ക്കാ​രാ​യി​രു​ന്നു. പലപ്പോ​ഴും ആളുകളെ കൊല്ലാ​നല്ല മറിച്ച്‌ അംഗഭം​ഗം വരുത്തി​ക്കൊണ്ട്‌ അതിന്റെ ക്രൂര ഫലങ്ങൾക്ക്‌ ഇരയാ​കു​ന്ന​വർക്കി​ട​യിൽ സംഭ്രാ​ന്തി​യും ഭീതി​യും പരത്താ​നാ​ണു കുഴി​ബോം​ബു​കൾ ഉപയോ​ഗി​ക്കു​ന്നത്‌.

അടുത്ത​കാ​ലത്ത്‌ കുഴി​ബോം​ബു​കൾ നീക്കം ചെയ്യാ​നാ​യി വലിയ ശ്രമങ്ങൾ നടത്ത​പ്പെ​ട്ടി​ട്ടുണ്ട്‌ എന്നുള്ളതു ശരിയാണ്‌. എന്നാൽ ചില കണക്കു​ക​ള​നു​സ​രിച്ച്‌, ഒരു കുഴി​ബോം​ബു നീക്കം ചെയ്യു​മ്പോൾ പകരം 20 എണ്ണമാണു പാകു​ന്നത്‌. ലോക​മെ​മ്പാ​ടു​മാ​യി ആറു കോടി​യോ​ളം കുഴി​ബോം​ബു​കൾ പാകി​യി​രി​ക്കു​ന്ന​താ​യി പറയ​പ്പെ​ടു​ന്നു. പാടത്തു  കളിക്കുന്ന ഒരു കുഞ്ഞി​ന്റെ​യും ഒരു സൈനി​ക​ന്റെ​യും കാലടി​ശബ്ദം വേർതി​രി​ച്ച​റി​യാ​നുള്ള കഴിവ്‌ കുഴി​ബോം​ബു​കൾക്കില്ല എന്നത്‌ ഈ ക്രൂര ഉപകര​ണങ്ങൾ നിർമി​ക്കു​ന്ന​തിൽനി​ന്നും ഉപയോ​ഗി​ക്കു​ന്ന​തിൽനി​ന്നും ആളുകളെ പിന്തി​രി​പ്പി​ച്ചി​ട്ടില്ല.

അണ്വാ​യു​ധ​ങ്ങൾ. അണ്വാ​യു​ധങ്ങൾ കണ്ടുപി​ടി​ക്ക​പ്പെ​ട്ട​തോ​ടെ ചരി​ത്ര​ത്തിൽ ആദ്യമാ​യി സൈനി​കർ തമ്മിലുള്ള ചെറി​യൊ​രു ഏറ്റുമു​ട്ട​ലി​ന്റെ പോലും ആവശ്യ​മി​ല്ലാ​തെ മുഴു നഗരങ്ങ​ളെ​ത്തന്നെ നിമി​ഷ​ങ്ങൾക്കു​ള്ളിൽ തകർത്തു​ത​രി​പ്പ​ണ​മാ​ക്കാ​മെന്ന അവസ്ഥ നിലവിൽവന്നു. ഉദാഹ​ര​ണ​ത്തിന്‌, 1945-ൽ ഹിരോ​ഷി​മാ, നാഗസാ​ക്കി നഗരങ്ങ​ളിൽ അണു​ബോം​ബു വീണ​പ്പോൾ ഉണ്ടായ അതിഭ​യങ്കര നാശ​ത്തെ​ക്കു​റി​ച്ചു ചിന്തി​ക്കുക. ബോംബു വിസ്‌ഫോ​ട​ന​ത്തി​ന്റെ ഫലമാ​യുള്ള അസഹനീയ പ്രകാശം നിമിത്തം ചിലർക്കു കാഴ്‌ച​ശക്തി നഷ്ടപ്പെട്ടു. അനേക​മാ​ളു​ക​ളു​ടെ​യും ശരീരം അണു​പ്ര​സ​ര​ണ​ത്താൽ വിഷലി​പ്‌ത​മാ​ക്ക​പ്പെട്ടു. അഗ്നിയും ചൂടും പലരു​ടെ​യും ജീവൻ അപഹരി​ച്ചു. രണ്ടു നഗരങ്ങ​ളി​ലും കൂടെ ഏകദേശം 3,00,000 ആളുകൾ മരിച്ച​താ​യി കണക്കാ​ക്ക​പ്പെ​ടു​ന്നു!

എന്നാൽ ആ നഗരങ്ങ​ളിൽ ബോംബ്‌ ഇട്ടില്ലാ​യി​രു​ന്നെ​ങ്കിൽ, പരമ്പരാ​ഗത ആയുധങ്ങൾ ഉപയോ​ഗി​ച്ചുള്ള പോരാ​ട്ടം തുടരു​ക​യും തത്‌ഫ​ല​മാ​യി കുറേ​ക്കൂ​ടെ ആളുകൾ മരിക്കു​ക​യും ചെയ്യു​മാ​യി​രു​ന്നു എന്നു ചിലർ പറഞ്ഞേ​ക്കാം. എന്നിരു​ന്നാ​ലും, അതിഭീ​മ​മായ ജീവനഷ്ടം ഉളവാ​ക്കിയ ഞെട്ടലി​ന്റെ ഫലമായി ഈ ഭീകരാ​യു​ധ​ത്തി​ന്റെ ഉപയോ​ഗ​ത്തി​ന്മേൽ ലോക​വ്യാ​പ​ക​മായ നിയ​ന്ത്രണം ഏർപ്പെ​ടു​ത്തു​ന്ന​തി​നാ​യി ചിലർ ശ്രമി​ക്കാൻ തുടങ്ങി. മനുഷ്യൻ സ്വയം നശിപ്പി​ക്കാ​നുള്ള പ്രാപ്‌തി നേടി​യ​താ​യി പലരും ഭയപ്പെട്ടു.

അണ്വാ​യു​ധ​ങ്ങ​ളു​ടെ രംഗ​പ്ര​വേശം സമാധാന സാധ്യത വർധി​പ്പി​ച്ചി​ട്ടു​ണ്ടോ? ഉണ്ടെന്നു ചിലർ പറയുന്നു. അര നൂറ്റാ​ണ്ടി​ലേ​റെ​യാ​യിട്ട്‌ ശക്തി​യേ​റിയ ഈ ആയുധം  യുദ്ധങ്ങ​ളിൽ പ്രയോ​ഗി​ക്ക​പ്പെ​ട്ടി​ട്ടില്ല എന്ന വസ്‌തു​ത​യി​ലേക്ക്‌ അവർ വിരൽ ചൂണ്ടുന്നു. എന്നിരു​ന്നാ​ലും, വൻ നാശം വിതയ്‌ക്കാൻ കഴിയുന്ന ആയുധ​ങ്ങ​ളു​ടെ ആവിർഭാ​വം യുദ്ധത്തിന്‌ അറുതി വരുത്തു​മെന്ന നോബ​ലി​ന്റെ വിശ്വാ​സം ശരിയാ​ണെന്നു തെളി​ഞ്ഞി​ട്ടില്ല. കാരണം, പരമ്പരാ​ഗത ആയുധങ്ങൾ ഉപയോ​ഗി​ച്ചുള്ള യുദ്ധങ്ങൾ ഇപ്പോ​ഴും തുടരു​ന്നു. മാത്രമല്ല, ഏതു സമയത്തും പ്രയോ​ഗി​ക്കാൻ പാകത്തിന്‌ ആയിര​ക്ക​ണ​ക്കിന്‌ അണ്വാ​യു​ധങ്ങൾ സജ്ജമാക്കി വെച്ചി​ട്ടു​ള്ള​താ​യി ‘അണ്വാ​യു​ധനയ കമ്മിറ്റി’ പറയുന്നു. ഇനി, ഭീകര​പ്ര​വർത്തനം കടുത്ത ആശങ്കയ്‌ക്ക്‌ ഇടയാ​ക്കി​യി​രി​ക്കുന്ന ഇക്കാലത്ത്‌ ന്യൂക്ലി​യർ ബോം​ബു​ക​ളു​ടെ നിർമാ​ണ​ത്തി​നാ​വ​ശ്യ​മായ പദാർഥങ്ങൾ “ഭദ്രമ​ല്ലാത്ത” കരങ്ങളിൽ എത്തിയാ​ലുള്ള സ്ഥിതിയെ കുറി​ച്ചും അനേകർ ഭയപ്പെ​ടു​ന്നു. “ഭദ്രമായ” കരങ്ങളിൽ ആയിരി​ക്കു​മ്പോൾ പോലും ആരു​ടെ​യെ​ങ്കി​ലും പക്ഷത്തെ ഒരു അബദ്ധം ഒരു ആഗോള ആണവ വിപത്തി​നി​ട​യാ​ക്കി​യേ​ക്കാം എന്ന ആശങ്കയും നിലവി​ലുണ്ട്‌. വ്യക്തമാ​യും വിനാശക ആയുധ​ങ്ങൾക്ക്‌ നോബൽ സ്വപ്‌നം കണ്ട സമാധാ​നം കൈവ​രു​ത്താൻ കഴിഞ്ഞി​ട്ടില്ല.

ജൈവ, രാസ ആയുധങ്ങൾ. ജൈവ​യു​ദ്ധ​ത്തിൽ ആന്ത്രാ​ക്‌സ്‌ പോലുള്ള മാരക ബാക്ടീ​രി​യ​യു​ടെ​യും വസൂരി വൈറസ്‌ പോലുള്ള വൈറ​സു​ക​ളു​ടെ​യും ഉപയോ​ഗം ഉൾപ്പെ​ടു​ന്നു. വളരെ പെട്ടെന്നു പടരു​ന്ന​തി​നാൽ വസൂരി പ്രത്യേ​കി​ച്ചും അപകട​ക​ര​മാണ്‌. കൂടാതെ വിഷവാ​തകം പോലുള്ള രാസ ആയുധ​ങ്ങ​ളു​ടെ ഭീഷണി​യും ഉണ്ട്‌. ഈ വിഷവ​സ്‌തു​ക്കൾ പല രൂപത്തിൽ വരുന്നു. ദശകങ്ങ​ളാ​യി നിലവി​ലി​രി​ക്കുന്ന നിരോ​ധ​ന​ത്തിന്‌ അവയുടെ ഉപയോ​ഗത്തെ തടയാൻ കഴിഞ്ഞി​ട്ടില്ല.

ഈ ഭീകര ആയുധ​ങ്ങ​ളും അവ ഉയർത്തുന്ന ഭീഷണി​യും നോബ​ലി​ന്റെ പ്രവചനം പോലെ പ്രവർത്തി​ക്കാൻ, അതായത്‌ ‘ഭീതി​പൂണ്ട്‌ തങ്ങളുടെ സൈന്യ​ങ്ങളെ പിരി​ച്ചു​വി​ടാൻ,’ രാഷ്‌ട്ര​ങ്ങളെ പ്രേരി​പ്പി​ച്ചി​ട്ടു​ണ്ടോ? നേരെ മറിച്ച്‌, പ്രത്യേക പരിശീ​ല​ന​മൊ​ന്നും ലഭിക്കാ​ത്തവർ പോലും ഒരിക്കൽ ഈ ആയുധങ്ങൾ പ്രയോ​ഗി​ച്ചേ​ക്കാം എന്ന വർധിച്ച ഭയം ഉളവാ​ക്കുക മാത്രമേ ഇവ ചെയ്‌തി​ട്ടു​ള്ളൂ. ഒരു പതിറ്റാ​ണ്ടി​നു മുമ്പ്‌ ‘യു.എസ്‌. ആയുധ​നി​യ​ന്ത്രണ-നിരാ​യു​ധീ​കരണ ഏജൻസി’യുടെ ഡയറക്ടർ ഇങ്ങനെ പറഞ്ഞു: “ഹൈസ്‌കൂ​ളിൽ അൽപ്പം രസതന്ത്രം പഠിച്ചി​ട്ടുള്ള ഏതൊ​രാൾക്കും  സ്വന്തം വീട്ടിൽവെ​ച്ചു​തന്നെ രാസാ​യു​ധങ്ങൾ ഉത്‌പാ​ദി​പ്പി​ക്കാ​വു​ന്ന​തേ​യു​ള്ളൂ.”

മറ്റേ​തൊ​രു കാലഘ​ട്ട​ത്തി​ലും ഉണ്ടായി​ട്ടു​ള്ള​തി​നെ​ക്കാൾ വിനാ​ശ​ക​മായ യുദ്ധങ്ങൾ 20-ാം നൂറ്റാ​ണ്ടിൽ നടന്നി​ട്ടുണ്ട്‌ എന്നതിനു സംശയ​മില്ല. ഇപ്പോൾ നാം 21-ാം നൂറ്റാ​ണ്ടി​ലേക്കു കാലെ​ടു​ത്തു വെച്ചി​രി​ക്കുന്ന ഈ സമയത്ത്‌ സമാധാ​ന​ത്തി​നുള്ള സാധ്യ​ത​യ്‌ക്കു കൂടുതൽ മങ്ങലേ​റ്റി​രി​ക്കു​ന്ന​താ​യാണ്‌ കാണ​പ്പെ​ടു​ന്നത്‌—പ്രത്യേ​കി​ച്ചും 2001 സെപ്‌റ്റം​ബർ 11-ന്‌ ന്യൂ​യോർക്ക്‌ നഗരത്തി​ലും വാഷി​ങ്‌ടൺ ഡി. സി.-യിലും ഭീകര​പ്ര​വർത്തകർ നടത്തിയ ആക്രമ​ണ​ത്തി​നു ശേഷം. “നൂതന സാങ്കേ​തിക വിദ്യകൾ നല്ല ഉദ്ദേശ്യ​ങ്ങൾക്ക്‌ ഉപയോ​ഗി​ക്കു​ന്ന​തി​നു പകരം ദുഷ്ട ശക്തിക​ളു​ടെ വളർച്ച​യ്‌ക്കാ​യി ഉപയോ​ഗി​ക്ക​പ്പെ​ടു​മോ എന്നു ചോദി​ക്കാൻ ആരും​തന്നെ ധൈര്യ​പ്പെ​ടു​ന്നില്ല” എന്ന്‌ ന്യൂസ്‌വീക്ക്‌ മാസി​ക​യിൽ സ്റ്റീവൻ ലീവി എഴുതി. അദ്ദേഹം ഇങ്ങനെ കൂട്ടി​ച്ചേർത്തു: “അത്തര​മൊ​രു സ്ഥിതി​വി​ശേഷം സംജാ​ത​മാ​യാൽ അതിനെ എങ്ങനെ നേരി​ടാ​മെന്ന്‌ ആർക്കാണ്‌ അറിയാ​വു​ന്നത്‌? പുരോ​ഗതി എന്നു തങ്ങൾ വിചാ​രി​ക്കു​ന്ന​തി​നു പിന്നാലെ പായു​ക​യും അതിന്റെ വരും​വ​രാ​യ്‌ക​കളെ കുറിച്ചു പിന്നീടു മാത്രം ചിന്തി​ക്കു​ക​യും ചെയ്യുന്ന ഒരു ചരി​ത്ര​മാണ്‌ മനുഷ്യർക്കു​ള്ളത്‌. ഒരു അതി​ഘോര വിപത്ത്‌ യഥാർഥ​ത്തിൽ സംഭവി​ച്ചേ​ക്കും എന്നു ചിന്തി​ക്കാൻ വിസമ്മ​തി​ക്കുന്ന നാം അതു സംഭവി​ക്കു​ന്ന​തി​നുള്ള സാഹച​ര്യ​ങ്ങൾ സൃഷ്ടി​ക്കു​ന്നു.”

ഇതുവരെയുള്ള ചരിത്രം കാണി​ക്കു​ന്നത്‌ ഘോര​മായ സ്‌ഫോ​ടക വസ്‌തു​ക്ക​ളു​ടെ​യും മാരകാ​യു​ധ​ങ്ങ​ളു​ടെ​യും കണ്ടുപി​ടി​ത്തം ഒരു വിധത്തി​ലും ഈ ലോകത്തെ സമാധാ​ന​ത്തോട്‌ അടുപ്പി​ച്ചി​ട്ടില്ല എന്നാണ്‌. അപ്പോൾ ലോക​സ​മാ​ധാ​നം എന്നതു വെറു​മൊ​രു സ്വപ്‌ന​മാ​ണോ? (g02 5/8)

[8-ാം പേജിലെ ചതുരം/ചിത്രങ്ങൾ]

നൈട്രൊഗ്ലിസറിനെ നിയ​ന്ത്ര​ണാ​ധീ​ന​മാ​ക്കു​ന്നു

ഇറ്റാലി​യൻ രസത​ന്ത്രജ്ഞൻ ആസ്‌കാ​നി​യോ സോ​ബ്രേ​റോ 1846-ൽ നൈ​ട്രൊ​ഗ്ലി​സ​റിൻ കണ്ടുപി​ടി​ച്ചു. എണ്ണക്കൊ​ഴു​പ്പുള്ള ഘനമേ​റിയ ആ ദ്രാവകം സ്‌ഫോ​ടക ശക്തിയു​ള്ള​താ​യി​രു​ന്നു. അത്‌ അപകട​ക​ര​മായ ഒരു പദാർഥ​മാ​ണെന്നു തെളിഞ്ഞു. ഒരു സ്‌ഫോ​ട​ന​ത്തിൽ പൊട്ടി​ച്ചി​ത​റിയ ചില്ലു​ക​ഷ​ണങ്ങൾ സോ​ബ്രേ​റോ​യു​ടെ മുഖത്തി​നു സാരമായ പരി​ക്കേൽപ്പി​ച്ചു. ഒടുവിൽ ഈ പദാർഥം ഉപയോ​ഗി​ച്ചുള്ള പരീക്ഷ​ണങ്ങൾ അദ്ദേഹം അവസാ​നി​പ്പി​ച്ചു. കൂടാതെ, ഈ ദ്രാവ​ക​ത്തിന്‌ ഒരു പ്രശ്‌നം ഉണ്ടായി​രു​ന്നു: അത്‌ ഒരു പ്രതല​ത്തിൽ ഒഴിച്ചിട്ട്‌ ഒരു ചുറ്റി​ക​കൊണ്ട്‌ അടിക്കു​ക​യാ​ണെ​ങ്കിൽ അടി കൊള്ളുന്ന ഭാഗം മാത്രമേ പൊട്ടി​ത്തെ​റി​ക്കു​മാ​യി​രു​ന്നു​ള്ളൂ. ബാക്കി ദ്രാവ​ക​ത്തിന്‌ ഒരു മാറ്റവും സംഭവി​ക്കു​മാ​യി​രു​ന്നില്ല. ഇതിന്‌ ഒരു പരിഹാ​രം കാണാൻ സോ​ബ്രേ​റോ​യ്‌ക്കു കഴിഞ്ഞില്ല.

ഒരു സ്‌ഫോ​ടക വസ്‌തു​വി​ന്റെ ചെറി​യൊ​രു അംശം ഉപയോ​ഗിച്ച്‌ വലിയ അളവി​ലുള്ള മറ്റൊരു സ്‌ഫോ​ടക വസ്‌തു​വി​നെ ജ്വലി​പ്പി​ക്കാൻ കഴിയുന്ന പ്രാ​യോ​ഗി​ക​മായ ഒരു സ്‌ഫോ​ട​ക​മാ​ധ്യ​മം (detonator) കണ്ടുപി​ടി​ച്ചു​കൊണ്ട്‌ നോബൽ പ്രസ്‌തുത പ്രശ്‌നം പരിഹ​രി​ച്ചു. പിന്നീട്‌, 1865-ൽ നോബൽ സ്‌ഫോ​ടക കൂട്‌—മെർക്കു​റി ഫൾമി​നേറ്റ്‌ അടങ്ങിയ ഒരു ചെറിയ കാപ്‌സ്യൂൾ കണ്ടുപി​ടി​ച്ചു. അത്‌ നൈ​ട്രൊ​ഗ്ലി​സ​റിൻ അടങ്ങിയ ഒരു പാത്ര​ത്തി​ലേക്കു കടത്തി​വെച്ച്‌ ഒരു ഫ്യൂസ്‌ ഉപയോ​ഗിച്ച്‌ കത്തിക്കു​ക​യും ചെയ്‌തു.

എന്നാൽ, നൈ​ട്രൊ​ഗ്ലി​സ​റിൻ കൈകാ​ര്യം ചെയ്യു​ന്നത്‌ അപ്പോ​ഴും സുരക്ഷി​ത​മാ​യി​രു​ന്നില്ല. ഉദാഹ​ര​ണ​ത്തിന്‌, 1864-ൽ സ്റ്റോക്ക്‌ഹോ​മി​നു വെളി​യി​ലുള്ള നോബ​ലി​ന്റെ പണിശാ​ല​യിൽ ഉണ്ടായ ഒരു സ്‌ഫോ​ട​ന​ത്തിൽ അദ്ദേഹ​ത്തി​ന്റെ ഇളയ അനുജൻ എമിൽ ഉൾപ്പെടെ അഞ്ചു പേർ മരിച്ചു. ജർമനി​യി​ലെ ക്രു​യെ​മെ​ലി​ലുള്ള നോബ​ലി​ന്റെ ഫാക്ടറി രണ്ടു തവണ സ്‌ഫോ​ട​ന​ത്തിൽ തകർന്നു. അപ്പോൾ പോലും, ചിലയാ​ളു​കൾ ഈ ദ്രാവകം വിള​ക്കെ​ണ്ണ​യാ​യും ഷൂപോ​ളി​ഷാ​യും വണ്ടി ചക്രങ്ങ​ളിൽ ഒഴിക്കാ​നുള്ള എണ്ണയാ​യും മറ്റും ഉപയോ​ഗി​ക്കു​ന്നു​ണ്ടാ​യി​രു​ന്നു. ഇതു ഗുരു​ത​ര​മായ പ്രത്യാ​ഘാ​ത​ങ്ങ​ളി​ലേക്കു നയിച്ചു. പാറ​പൊ​ട്ടി​ക്കു​മ്പോൾപ്പോ​ലും കൂടു​ത​ലാ​യുള്ള ദ്രാവകം വിള്ളലു​കൾക്കി​ട​യി​ലേക്ക്‌ ഒഴുകി​വീണ്‌ പിന്നീട്‌ അപകട​ങ്ങൾക്ക്‌ ഇടയാ​ക്കു​മാ​യി​രു​ന്നു.

സ്‌ഫോ​ടക സ്വഭാവം ഇല്ലാത്ത കീസൽഗുർ എന്ന സരന്ധ്ര പദാർഥ​ത്തോ​ടൊ​പ്പം നൈ​ട്രൊ​ഗ്ലി​സ​റിൻ ചേർക്കു​ക​വഴി ആ ദ്രാവ​കത്തെ ഖരരൂ​പ​ത്തി​ലേക്കു മാറ്റാ​മെന്ന്‌ 1867-ൽ നോബൽ കണ്ടെത്തി. അതിനെ അദ്ദേഹം ഡൈന​മൈറ്റ്‌ എന്നു വിളിച്ചു. അദ്ദേഹ​ത്തിന്‌ ആ പേര്‌ കിട്ടി​യത്‌ “ശക്തി” എന്നർഥ​മുള്ള ഡൈന​മൈസ്‌ എന്ന ഗ്രീക്കു പദത്തിൽനി​ന്നാ​യി​രു​ന്നു. പിന്നീട്‌ നോബൽ കുറെ​ക്കൂ​ടെ ശക്തി കൂടിയ സ്‌ഫോ​ടക വസ്‌തു​ക്കൾ നിർമി​ച്ചെ​ങ്കി​ലും ഡൈന​മൈ​റ്റി​നെ അദ്ദേഹ​ത്തി​ന്റെ ഏറ്റവും പ്രധാ​ന​പ്പെട്ട കണ്ടുപി​ടി​ത്ത​ങ്ങ​ളിൽ ഒന്നായാ​ണു കണക്കാ​ക്കു​ന്നത്‌.

നോബ​ലി​ന്റെ സ്‌ഫോ​ടക വസ്‌തു​ക്കൾക്ക്‌ യുദ്ധേതര ഉപയോ​ഗ​ങ്ങ​ളും ഉണ്ടായി​രു​ന്നി​ട്ടുണ്ട്‌. ഉദാഹ​ര​ണ​ത്തിന്‌, സെന്റ്‌ ഗോട്ട്‌ഹാർട്ട്‌ തുരങ്ക​ങ്ങ​ളു​ടെ നിർമാ​ണ​ത്തി​ലും (1872-82) ന്യൂ​യോർക്കി​ലെ ഈസ്റ്റ്‌ നദിയി​ലെ പാറ പൊട്ടി​ക്കു​ന്ന​തി​ലും (1876, 1885) ഗ്രീസി​ലെ കൊരിന്ത്‌ കനാൽ കുഴി​ക്കു​ന്ന​തി​ലും (1881-93) അതു വഹിച്ച പങ്കു വലുതാണ്‌. എന്നിരു​ന്നാ​ലും, കണ്ടുപി​ടി​ക്ക​പ്പെ​ട്ടതു മുതൽ നാശവും മരണവും വിതയ്‌ക്കാൻ കഴിയുന്ന ഒരു ഉപകരണം എന്ന നിലയിൽ ഡൈന​മൈറ്റ്‌ പെട്ടെന്നു തന്നെ പ്രശസ്‌തി​യാർജി​ച്ചു.

[ചിത്രം]

ഡൈനമൈറ്റ്‌ ഘടിപ്പിച്ച സ്‌ഫോ​ടക വസ്‌തു​ക്ക​ളാൽ തകർക്ക​പ്പെട്ട കൊളം​ബി​യ​യി​ലെ ഒരു പോലീസ്‌ സ്റ്റേഷൻ

[കടപ്പാട്‌]

© Reuters NewMedia Inc./CORBIS

[4-ാം പേജിലെ ചിത്രം]

നോബൽ മരിച്ച്‌ 20 വർഷം പോലും തികയു​ന്ന​തി​നു മുമ്പ്‌ നടന്ന ഒന്നാം ലോക​മ​ഹാ​യു​ദ്ധ​ത്തിൽ പുതിയ മാരകാ​യു​ധങ്ങൾ പ്രയോ​ഗി​ക്ക​പ്പെട്ടു

[കടപ്പാട്‌]

U.S. National Archives photo

[6-ാം പേജിലെ ചിത്രങ്ങൾ]

കംബോഡിയ, ഇറാഖ്‌, അസർ​ബൈ​ജാൻ എന്നിവി​ട​ങ്ങ​ളിൽ കുഴി​ബോംബ്‌ സ്‌ഫോ​ട​ന​ത്തിന്‌ ഇരകളാ​യ​വർ

[കടപ്പാട്‌]

UN/DPI Photo 186410C by P.S. Sudhakaran ▼

UN/DPI Photo 158198C by J. Isaac

UN/DPI Photo by Armineh Johannes

[6-ാം പേജിലെ ചിത്രം]

ഏതു സമയത്തും പ്രയോ​ഗി​ക്കാൻ പാകത്തിന്‌ ആയിര​ക്ക​ണ​ക്കിന്‌ അണ്വാ​യു​ധങ്ങൾ സജ്ജമാക്കി വെച്ചി​ട്ടു​ള്ള​താ​യി ‘അണ്വാ​യു​ധനയ കമ്മിറ്റി’ പറയുന്നു

[കടപ്പാട്‌]

UNITED NATIONS/PHOTO BY SYGMA ▸

[7-ാം പേജിലെ ചിത്രങ്ങൾ]

1995-ൽ ടോക്കി​യോ​യി​ലെ ഭൂഗർഭ റെയിൽ പാതയിൽ സാറിൻ ഗ്യാസ്‌ പ്രയോ​ഗി​ക്ക​പ്പെ​ട്ട​പ്പോൾ രാസാ​യു​ധ​ങ്ങ​ളു​ടെ ഭീകരത പൊതു​ജന ശ്രദ്ധ പിടി​ച്ചു​പ​റ്റി

[കടപ്പാട്‌]

Asahi Shimbun/Sipa Press

[5-ാം പേജിലെ ചിത്ര​ങ്ങൾക്ക്‌ കടപ്പാട്‌]

UN/DPI Photo 158314C by J. Isaac