മുൻകൈയെടുത്തു പ്രവർത്തിച്ചതിന് പ്രതിഫലം
മുൻകൈയെടുത്തു പ്രവർത്തിച്ചതിന് പ്രതിഫലം
യഹോവയുടെ സാക്ഷികൾക്കിടയിലെ അനേകം യുവജനങ്ങളും തങ്ങളുടെ വിശ്വാസത്തെ കുറിച്ചു മറ്റുള്ളവരോടു ധൈര്യപൂർവം സംസാരിക്കുന്നതിൽ നല്ല ദൃഷ്ടാന്തം വെക്കുന്നു. ഗ്രീസിലെ സലോനിക്കയിലുള്ള കൗമാരപ്രായക്കാരിയായ സ്റ്റെല്ലയുടെ കാര്യം എടുക്കുക. അവൾ പറയുന്നു: “യഹോവയെ അറിയാൻ മറ്റുള്ളവരെ സഹായിക്കാനായി നമ്മുടെ വീഡിയോകൾ എങ്ങനെ ഉപയോഗിക്കാം എന്നതിനെ കുറിച്ച് ഒരു ക്രിസ്തീയ യോഗത്തിൽ ചർച്ച ചെയ്യപ്പെട്ടു. യഹോവയുടെ സാക്ഷികൾ—ആ പേരിനു പിമ്പിലെ സ്ഥാപനം (ഇംഗ്ലീഷ്) എന്ന വീഡിയോ ഉപയോഗിക്കാൻ കഴിയുന്ന ഒരു വിധത്തെ കുറിച്ചു ഞാൻ ചിന്തിച്ചു. പിറ്റേന്ന് ഞാൻ എന്റെ സ്കൂളിലെ പ്രിൻസിപ്പാളിനെ ചെന്നു കണ്ട് ആ വീഡിയോ സ്കൂളിൽ പ്രദർശിപ്പിക്കാൻ അനുവാദം ചോദിച്ചു. അധ്യാപകർ സമ്മതിക്കുന്ന പക്ഷം, തനിക്ക് യാതൊരു വിരോധവുമില്ല എന്ന് അദ്ദേഹം പറഞ്ഞപ്പോൾ ഞാൻ അതിശയിച്ചുപോയി.
“പിറ്റേ ആഴ്ച വീഡിയോ കാണിക്കാമെന്ന് അന്നുതന്നെ കുറച്ചുകഴിഞ്ഞപ്പോൾ പ്രിൻസിപ്പാൾ എന്നോടു പറഞ്ഞു. പക്ഷേ അതു സ്കൂൾ വിട്ടശേഷം മാത്രമേ സാധിക്കുമായിരുന്നുള്ളൂ. എനിക്കു നിരാശ തോന്നി. കാരണം, തങ്ങളുടെ ഒഴിവുസമയത്ത് എന്റെ സഹപാഠികളിൽ ആരെങ്കിലും വീഡിയോ കാണാൻ വരുമെന്ന് ഞാൻ പ്രതീക്ഷിച്ചില്ല. എന്തായിരുന്നാലും, പിറ്റേ ദിവസം ഞാൻ എല്ലാവരെയും അതിനായി ക്ഷണിച്ചു. അവരെല്ലാം വന്നെന്നു മാത്രമല്ല മറ്റു ക്ലാസ്സുകളിൽ നിന്നുള്ള കുട്ടികളെ കൂടെ അതിനായി ക്ഷണിക്കുകയും ചെയ്തു. അതുപോലെ ആറ് അധ്യാപകരും—ഒരു ദൈവശാസ്ത്രജ്ഞൻ ഉൾപ്പെടെ—വീഡിയോ കാണാൻ വന്നു.
“എല്ലാവരും വീഡിയോ സശ്രദ്ധം വീക്ഷിച്ചു. അതിനുശേഷം ഒരു ചോദ്യോത്തര ചർച്ചയ്ക്ക് ആധ്യക്ഷ്യം വഹിക്കാൻ പ്രിൻസിപ്പാൾ എന്നെ ക്ഷണിച്ചു. വീഡിയോയിൽ കണ്ട, യഹോവയുടെ സാക്ഷികളുടെ ലോകാസ്ഥാനത്തു ചെയ്യപ്പെടുന്ന സ്വമേധയാ സേവനം പല വിദ്യാർഥികളിലും വലിയ മതിപ്പുളവാക്കി. ‘ശമ്പളമൊന്നും ലഭിക്കാഞ്ഞിട്ടും എത്ര സന്തോഷത്തോടെയാണ് അവർ ജോലി ചെയ്യുന്നത്!’ എന്ന് ഒരു കുട്ടി പറഞ്ഞു.
“കൂടിവന്ന എല്ലാവരോടും ഞാൻ നമ്മുടെ ബൈബിളധിഷ്ഠിത പ്രസിദ്ധീകരണങ്ങളെ കുറിച്ചു പറഞ്ഞു. കൂടാതെ, ‘പുതിയ സഹസ്രാബ്ദം—നിങ്ങളുടെ ഭാവി ശോഭനമായിരിക്കുമോ?’ എന്ന രാജ്യവാർത്ത നമ്പർ 36 ഞാൻ വിതരണം ചെയ്തു. വീഡിയോ കാണാൻ വരാഞ്ഞ അധ്യാപകർക്കു നൽകാനായി പ്രിൻസിപ്പാൾ അതിന്റെ കൂടുതൽ പ്രതികൾ ചോദിച്ചു വാങ്ങി.
“പിന്നീടു പല വിദ്യാർഥികളും തങ്ങളുടെ സുഹൃത്തുക്കളോട് ആ വീഡിയോയെ കുറിച്ചു പറഞ്ഞു. ഒരു സാക്ഷ്യം നൽകാനായി ആ അവസരം ഉപയോഗിച്ചതിൽ എനിക്കു വലിയ സന്തോഷം തോന്നി. എന്റെ സഹപാഠികൾ ഇപ്പോൾ എന്നോടു കൂടുതൽ ആദരവു കാണിക്കുന്നു; അതിലുപരി ഞാൻ ആരാധിക്കുന്ന ദൈവത്തെ അവർ ആദരിക്കുന്നു!”(g02 5/8)