ഒരു അസാധാ​രണ പുനഃ​സം​ഗമം മുപ്പതു വർഷത്തി​നു ശേഷം

രണ്ടു യുവാക്കൾ 1967-ൽ അപ്രതീ​ക്ഷി​ത​മാ​യി കണ്ടുമു​ട്ടി. ഐക്യ​നാ​ടു​ക​ളി​ലെ മിഷിഗൺ സാങ്കേ​തിക സർവക​ലാ​ശാ​ല​യിൽ പഠനത്തി​നെ​ത്തിയ അവർ ഇരുവ​രും താമസി​ച്ചി​രു​ന്ന​തും ഒരുമി​ച്ചാ​യി​രു​ന്നു. ഒഹാ​യോ​യി​ലെ ലൈമ​യിൽ നിന്നും വനസം​രക്ഷണ ശാസ്‌ത്രം പഠിക്കാ​നെ​ത്തിയ പതി​നെ​ട്ടു​കാ​ര​നായ ഡെന്നിസ്‌ ഷീറ്റ്‌സും ന്യൂ​യോർക്കി​ലെ ബഫലോ​യിൽ നിന്നും വന്ന സിവിൽ എഞ്ചിനീ​യ​റിങ്ങ്‌ മൂന്നാം വർഷ വിദ്യാർഥി​യാ​യി​രുന്ന ഇരുപ​തു​കാ​രൻ മാർക്കും ആയിരു​ന്നു ആ യുവാക്കൾ.

വളരെ ചുരു​ങ്ങിയ കാലത്തെ സൗഹൃ​ദമേ അവർക്ക്‌ ആസ്വദി​ക്കാ​നാ​യു​ള്ളൂ. സർവക​ലാ​ശാല വിദ്യാ​ഭ്യാ​സം പൂർത്തി​യാ​ക്കാ​തെ ഇരുവ​രും ഓരോ വഴിക്കു പോയി. മൂന്നി​ല​ധി​കം ദശാബ്ദങ്ങൾ കടന്നു പോയി. അങ്ങനെ​യി​രി​ക്കെ, ഒരു ദിവസം ഡൊമി​നി​ക്കൻ റിപ്പബ്ലി​ക്കിൽ വെച്ച്‌ അവർ വീണ്ടും കണ്ടുമു​ട്ടി. അതിശ​യ​ക​ര​മായ ഈ പുനഃ​സം​ഗമം ഒരു പരിധി​വരെ യാദൃ​ച്ഛി​ക​മാ​യി​രു​ന്നു, എന്നാൽ ഈ കൂടി​ക്കാ​ഴ്‌ച​യി​ലേക്കു നയിച്ച മറ്റൊരു സംഗതി​യും ഉണ്ടായി​രു​ന്നു. എന്തായി​രു​ന്നു അത്‌? ഉത്തരം കണ്ടെത്തു​ന്ന​തി​നു മുമ്പ്‌, അവർ പിന്തു​ടർന്ന വ്യത്യസ്‌ത ജീവിത പാതക​ളി​ലേക്കു നമു​ക്കൊ​ന്നു കണ്ണോ​ടി​ക്കാം.

ഡെന്നിസ്‌ യുദ്ധത്തി​നു പോകു​ന്നു

ഒരു വർഷത്തെ കലാലയ ജീവി​ത​ത്തി​നു ശേഷം ഡെന്നിസ്‌ വീട്ടി​ലേക്കു തിരി​ച്ചു​പോ​ന്നു. 1967 ഡിസം​ബ​റിൽ, നിർബ​ന്ധിത സൈനിക സേവന​ത്തി​നാ​യി യു.എസ്‌. സേനയി​ലേക്ക്‌ അദ്ദേഹത്തെ തിര​ഞ്ഞെ​ടു​ത്തു, 1968 ജൂണിൽ വിയറ്റ്‌നാ​മി​ലേക്ക്‌ അയയ്‌ക്കു​ക​യും ചെയ്‌തു. അവിടെ അദ്ദേഹം യുദ്ധത്തി​ന്റെ ഭീകര​തകൾ നേരിൽ കണ്ടു. 1969-ൽ തന്റെ സൈനിക സേവനം അവസാ​നി​ച്ച​പ്പോൾ അദ്ദേഹം ഐക്യ​നാ​ടു​ക​ളിൽ മടങ്ങി​യെത്തി. കാലാ​ന്ത​ര​ത്തിൽ, ഒഹാ​യോ​യി​ലുള്ള ഒരു വലിയ കമ്പനി​യിൽ ഒരു ജോലി​യും തരപ്പെട്ടു. എങ്കിലും, അദ്ദേഹം അസംതൃ​പ്‌ത​നാ​യി​രു​ന്നു.

ഡെന്നിസ്‌ ഇപ്രകാ​രം പറയുന്നു: “അലാസ്‌ക​യിൽ കുറച്ചു സ്ഥലം വാങ്ങി അവിടെ എന്തെങ്കി​ലും കൃഷി​യൊ​ക്കെ ചെയ്‌തു ജീവി​ക്കണം എന്നുള്ളത്‌ എന്റെ ഒരു ബാല്യ​കാല സ്വപ്‌നം ആയിരു​ന്നു.” 1971-ൽ അദ്ദേഹ​വും ഒരു വിദ്യാ​ലയ സുഹൃ​ത്തും കൂടി ഈ സ്വപ്‌ന സാക്ഷാ​ത്‌കാ​ര​ത്തി​നുള്ള ഒരുക്കങ്ങൾ ആരംഭി​ച്ചു. എന്നാൽ ഒരു കൃഷി​സ്ഥലം വാങ്ങു​ന്ന​തി​നു പകരം, അദ്ദേഹം കിട്ടുന്ന അല്ലറചി​ല്ലറ ജോലി​യൊ​ക്കെ ചെയ്യാൻ തുടങ്ങി. കുറച്ചു​നാൾ ഒരു കൂടാ​ര​ത്തിൽ താമസിച്ച്‌ കാട്ടുതീ പടരാതെ കാവൽ നോക്കുന്ന ജോലി​യും ചെയ്‌തു. അദ്ദേഹം താടി​യും മുടി​യു​മൊ​ക്കെ വളർത്തി, മരിജ്വാ​ന​യും വലിച്ചു തുടങ്ങി​യി​രു​ന്നു.

നൊയ​മ്പു​കാ​ല​വു​മാ​യി ബന്ധപ്പെട്ട പ്രശസ്‌ത ഉത്സവമായ മാർഡി ഗ്രാസിൽ പങ്കെടു​ക്കു​ന്ന​തി​നാ​യി 1972-ൽ ഡെന്നിസ്‌ ആങ്കറിജ്‌ നഗരത്തിൽനിന്ന്‌ ലൂസി​യാ​ന​യി​ലുള്ള ന്യൂ ഓർലി​യൻസി​ലെത്തി. അതുക​ഴിഞ്ഞ്‌, അർക്കൻസ​സി​ലെ വൃക്ഷനി​ബി​ഡ​മായ ഒരിടത്ത്‌ ഒരു കൊച്ചു വീടു കെട്ടി താമസം ആരംഭി​ച്ചു. അവിടെ വീടു​ക​ളു​ടെ ഉത്തരം നിർമി​ക്കു​ക​യും കോൺക്രീറ്റ്‌ ഇടുക​യും ചെയ്യുന്ന ജോലി നോക്കി. തുടർന്ന്‌, 1973 ജൂണിൽ, ജീവി​ത​ത്തി​ന്റെ അർഥം തേടി, കിട്ടുന്ന വാഹന​ങ്ങ​ളി​ലൊ​ക്കെ കയറി രാജ്യ​മൊ​ട്ടാ​കെ സഞ്ചരി​ക്കാൻ തുടങ്ങി.

മാർക്ക്‌ യുദ്ധവി​രുദ്ധ പ്രസ്ഥാ​ന​ത്തിൽ ഏർപ്പെ​ടു​ന്നു

ഡെന്നിസ്‌ പോയ​തി​നു​ശേഷം കുറച്ചു​നാൾ കൂടി മാർക്ക്‌ സർവക​ലാ​ശാ​ല​യിൽ തുടർന്നു. എന്നാൽ, യുദ്ധത്തെ പിന്തു​ണ​യ്‌ക്കുന്ന ഒരു വ്യവസ്ഥി​തി​യു​ടെ ഭാഗമാ​യി​രി​ക്കാൻ അദ്ദേഹം ആഗ്രഹി​ച്ചില്ല. പഠനം നിറുത്തി ബഫലോ​യി​ലേക്കു തിരിച്ചു പോയ അദ്ദേഹം കുറച്ചു​കാ​ലം ഒരു ഉരുക്കു ഫാക്ടറി​യിൽ ഫോർമാ​നാ​യി ജോലി​നോ​ക്കി. യുദ്ധ​ശ്ര​മ​ങ്ങ​ളിൽ അസന്തു​ഷ്ട​നാ​യി​രുന്ന അദ്ദേഹം ജോലി ഉപേക്ഷിച്ച്‌, ഒരു മോ​ട്ടോർ​സൈ​ക്കിൾ വാങ്ങി കാലി​ഫോർണി​യ​യി​ലെ സാൻഫ്രാൻസി​സ്‌കോ​യി​ലേക്കു പോയി. ഡെന്നി​സും മാർക്കും ഒരേ സമയത്തു കുറച്ചു​കാ​ലം സാൻഫ്രാൻസി​സ്‌കോ​യിൽ ഉണ്ടായി​രു​ന്നു, പരസ്‌പരം അറിയാ​തെ​യാ​ണെ​ങ്കി​ലും.

ഡെന്നി​സി​നെ​പ്പോ​ലെ മാർക്കും, താടി​യും മുടി​യും വളർത്തി, മരിജ്വാ​ന​യും ഉപയോ​ഗി​ച്ചു തുടങ്ങി​യി​രു​ന്നു. എങ്കിലും പ്രതി​ഷേധ പ്രകട​ന​ങ്ങ​ളി​ലും ജാഥക​ളി​ലും ഒക്കെ പങ്കെടു​ത്തു​കൊ​ണ്ടു മാർക്ക്‌, യുദ്ധവി​രുദ്ധ പ്രസ്ഥാ​ന​ത്തിൽ സജീവ​മാ​യി ഉൾപ്പെ​ട്ടി​രു​ന്നു. നിർബ​ന്ധിത സൈനി​ക​സേ​വ​ന​ത്തിൽ നിന്നു സൂത്ര​ത്തിൽ ഒഴിഞ്ഞു നടക്കു​ക​യാ​യി​രു​ന്ന​തി​നാൽ, എഫ്‌ബി​ഐ മാർക്കി​നെ തിരഞ്ഞു​കൊ​ണ്ടി​രി​ക്കു​ക​യാ​യി​രു​ന്നു. തിരി​ച്ച​റി​യാ​തി​രി​ക്കാൻ  ചില വർഷങ്ങ​ളാ​യി കള്ളപ്പേ​രി​ലാണ്‌ അദ്ദേഹം അറിയ​പ്പെ​ട്ടി​രു​ന്നത്‌. സാൻഫ്രാൻസി​സ്‌കോ​യിൽ ഒരു ഹിപ്പി​യാ​യി​ട്ടാണ്‌ അദ്ദേഹം ജീവി​ച്ചത്‌. അങ്ങനെ​യി​രി​ക്കെ, 1970-ൽ യഹോ​വ​യു​ടെ സാക്ഷി​ക​ളിൽപ്പെട്ട രണ്ടു പേർ മാർക്കി​ന്റെ വീട്ടു​വാ​തിൽക്കൽ എത്തി.

മാർക്ക്‌ ഇങ്ങനെ പറയുന്നു: “ഞാൻ അൽപ്പം താത്‌പ​ര്യം കാണിച്ചു എന്ന്‌ തോന്നി​യി​ട്ടാ​യി​രി​ക്കണം, അവർ പിന്നെ​യും വന്നു. അപ്പോൾ ഞാൻ വീട്ടിൽ ഇല്ലായി​രു​ന്നു, എന്നാൽ അവർ പച്ച നിറത്തി​ലുള്ള ഒരു ബൈബി​ളും മൂന്നു പുസ്‌ത​ക​ങ്ങ​ളും വെച്ചി​ട്ടു​പോ​യി.” രാഷ്‌ട്രീയ പ്രവർത്ത​ന​ങ്ങ​ളിൽ പൂർണ​മാ​യും മുഴു​കി​യി​രുന്ന മാർക്കിന്‌ ആ പുസ്‌ത​കങ്ങൾ വായി​ച്ചു​നോ​ക്കാ​നൊ​ന്നും സമയമി​ല്ലാ​യി​രു​ന്നു. മാത്രമല്ല, എഫ്‌ബി​ഐ അദ്ദേഹ​ത്തി​ന്റെ തൊട്ടു​പി​ന്നാ​ലെ ഉണ്ടായി​രു​ന്നു. അതു​കൊണ്ട്‌ മറ്റൊരു കള്ളപ്പേ​രിൽ അദ്ദേഹം വാഷി​ങ്‌ടൺ ഡി.സി.യിലെത്തി. അവിടെ, സർവക​ലാ​ശാ​ല​യിൽ വെച്ച്‌ അദ്ദേഹം കണ്ടുമു​ട്ടിയ കാമുകി, കാത്തി യാനി​സ്‌കി​വിസ്‌ അദ്ദേഹ​ത്തോ​ടു ചേർന്നു.

ഒടുവിൽ, 1971-ൽ എഫ്‌ബി​ഐ മാർക്കി​നെ പിടി​കൂ​ടി. രണ്ട്‌ എഫ്‌ബി​ഐ ഉദ്യോ​ഗ​സ്ഥ​ന്മാ​രു​ടെ അകമ്പടി​യോ​ടെ മാർക്കി​നെ വിമാ​ന​ത്തിൽ വാഷി​ങ്‌ടൺ ഡി.സി.യിൽ നിന്നു ന്യൂ​യോർക്കി​ലേക്കു കൊണ്ടു​വന്നു. എന്നിട്ട്‌, അവി​ടെ​നിന്ന്‌ അദ്ദേഹത്തെ കാനഡ​യി​ലെ ടൊറ​ന്റോ​യി​ലേക്കു വിട്ടു. അദ്ദേഹം ആഭ്യന്തര ക്രമസ​മാ​ധാ​ന​ത്തിന്‌ ഒരു ഭീഷണി​യാ​ണെന്ന്‌ എഫ്‌ബി​ഐ വിചാ​രി​ച്ചില്ല, അദ്ദേഹം രാജ്യം വിട്ടു​പോ​യാൽ മാത്രം മതിയാ​യി​രു​ന്നു അവർക്ക്‌. തൊട്ട​ടുത്ത വർഷം മാർക്കും കാത്തി​യും വിവാ​ഹി​ത​രാ​യി, പിന്നെ അവർ കാനഡ​യി​ലുള്ള ബ്രിട്ടീഷ്‌ കൊളം​ബി​യ​യി​ലെ ഗാബ്രി​യോ​ലാ ദ്വീപി​ലേക്കു പോയി. സമൂഹ​ത്തിൽ നിന്ന്‌ ഓടി​യൊ​ളി​ക്കാൻ അവർ ആഗ്രഹി​ച്ചു. എന്നിരു​ന്നാ​ലും, ജീവി​ത​ത്തി​നു മറ്റെ​ന്തൊ​ക്കെ​യോ ഉദ്ദേശ്യ​ങ്ങ​ളും കൂടി​യു​ണ്ടെന്ന്‌ അവർക്കു തോന്നി.

അവർ സാക്ഷി​ക​ളാ​യി​ത്തീ​രു​ന്നു

ഡെന്നിസ്‌, ജീവി​ത​ത്തി​ന്റെ അർഥമ​ന്വേ​ഷി​ച്ചു രാജ്യ​മൊ​ട്ടാ​കെ അലയു​ക​യാ​യി​രു​ന്നെന്ന കാര്യം ഓർക്കു​ന്നു​ണ്ടാ​കു​മ​ല്ലോ. ഡെന്നി​സി​ന്റെ യാത്ര അവസാ​നി​ച്ചതു മൊൺടാ​ന​യി​ലാണ്‌. അവിടെ, ഷനുക്ക്‌ പട്ടണത്തി​നു പുറത്ത്‌ അദ്ദേഹ​ത്തിന്‌ ഒരു പണി തരപ്പെട്ടു, ഒരു കൃഷി​ക്കാ​രനെ വിള​വെ​ടു​പ്പി​നു സഹായി​ക്കുക. കൃഷി​ക്കാ​രന്റെ ഭാര്യ​യും മകളും യഹോ​വ​യു​ടെ സാക്ഷികൾ ആയിരു​ന്നു. അവർ അദ്ദേഹ​ത്തിന്‌ ഒരു ഉണരുക! മാസിക വായി​ക്കാൻ കൊടു​ത്തു. താമസി​യാ​തെ, സാക്ഷി​ക​ളാണ്‌ സത്യമതം ആചരി​ക്കു​ന്നവർ എന്ന്‌ അദ്ദേഹ​ത്തി​നു ബോധ്യ​മാ​യി.

ഒരു ബൈബി​ളു​മെ​ടുത്ത്‌ ഡെന്നിസ്‌ ആ കൃഷി​ഭൂ​മി​യിൽ നിന്നു മൊൺടാ​ന​യി​ലെ കാലി​സ്‌പെൽ നഗരത്തി​ലേക്കു പോയി. അവിടെ, യഹോ​വ​യു​ടെ സാക്ഷി​ക​ളു​ടെ യോഗ​ത്തിൽ അദ്ദേഹം ആദ്യമാ​യി സംബന്ധി​ച്ചു. ആ യോഗ​ത്തിൽവെ​ച്ചു​തന്നെ ഡെന്നിസ്‌ ഒരു ബൈബിൾ അധ്യയനം ആവശ്യ​പ്പെട്ടു. അധികം താമസി​യാ​തെ, അദ്ദേഹം തന്റെ മുടി മുറിച്ചു, താടി വടിച്ചു. 1974 ജനുവ​രി​യിൽ ആദ്യമാ​യി പ്രസം​ഗ​വേ​ല​യിൽ പങ്കുപറ്റി. 1974 മാർച്ച്‌ 3-ാംതീ​യതി മൊൺടാ​ന​യി​ലെ പോൾസൺ നഗരത്തിൽ വെച്ച്‌ സ്‌നാ​പ​ന​മേൽക്കു​ക​യും ചെയ്‌തു.

ഇതിനി​ട​യിൽ, ഗാബ്രി​യോ​ലാ ദ്വീപിൽ താമസ​മാ​ക്കിയ മാർക്കും കാത്തി​യും, തങ്ങൾക്ക്‌ അപ്പോൾ വേണ്ടത്ര സമയമു​ള്ള​തി​നാൽ ബൈബി​ളൊ​ന്നു പരി​ശോ​ധി​ച്ചു നോക്കി​യാ​ലോ എന്നു ചിന്തിച്ചു. അങ്ങനെ അവർ ജയിംസ്‌ രാജാ​വി​ന്റെ ഭാഷാ​ന്തരം വായി​ക്കാൻ ആരംഭി​ച്ചു, പക്ഷേ അതിലെ പഴയ ശൈലി​യി​ലുള്ള ഇംഗ്ലീഷ്‌ മനസ്സി​ലാ​ക്കാൻ പ്രയാസം തോന്നി. അപ്പോ​ഴാണ്‌, വർഷങ്ങൾക്കു മുമ്പു സാക്ഷികൾ തന്നിട്ടു​പോയ ബൈബി​ളും പുസ്‌ത​ക​ങ്ങ​ളും തന്റെ കൈയിൽ ഇപ്പോ​ഴു​മു​ണ്ട​ല്ലോ എന്നു മാർക്ക്‌ ഓർത്തത്‌. ബൈബി​ളി​നോ​ടൊ​പ്പം, നിത്യ​ജീ​വ​നി​ലേക്കു നയിക്കുന്ന സത്യം, ബൈബിൾ യഥാർഥ​ത്തിൽ ദൈവ​ത്തി​ന്റെ വചനമോ? (ഇംഗ്ലീഷ്‌) എന്നീ പുസ്‌ത​ക​ങ്ങ​ളും അവർ വായിച്ചു. തങ്ങൾ മനസ്സി​ലാ​ക്കിയ കാര്യ​ങ്ങ​ളിൽ മാർക്കി​നും കാത്തി​ക്കും ആഴമായ മതിപ്പു തോന്നി.

മാർക്ക്‌ ഇങ്ങനെ പറയുന്നു: “യാതൊ​രു കാരണ​വ​ശാ​ലും യുദ്ധത്തിൽ ഏർപ്പെ​ടു​ക​യി​ല്ലാത്ത ഒരു കൂട്ടം ക്രിസ്‌ത്യാ​നി​കൾ ഉണ്ടെന്ന്‌ സത്യം പുസ്‌ത​ക​ത്തിൽനി​ന്നു വായി​ച്ച​താണ്‌ എന്നെ ഏറ്റവും ആകർഷി​ച്ചത്‌, ഇത്തരം ആളുക​ളാണ്‌ യഥാർഥ ക്രിസ്‌ത്യാ​നി​ത്വം ആചരി​ക്കു​ന്നവർ എന്ന്‌ എനിക്കു തോന്നി.” താമസി​യാ​തെ, അറസ്റ്റിന്റെ ഭീഷണി ഉണ്ടായി​ട്ടും കാത്തി​യു​ടെ കുടും​ബത്തെ സന്ദർശി​ക്കാ​നാ​യി, മാർക്കും കാത്തി​യും മിഷി​ഗ​ണി​ലെ ഹോട്ട​ണിൽ തിരി​ച്ചെത്തി. അവിടെ വെച്ച്‌, ഹിപ്പി​വേ​ഷ​ത്തിൽത്തന്നെ, അവർ സാക്ഷി​ക​ളു​ടെ ഒരു യോഗ​ത്തിൽ സംബന്ധി​ച്ചു. അവർ ഒരു ബൈബിൾ അധ്യയനം സ്വീക​രി​ച്ചു, മിഷി​ഗ​ണിൽ ഉണ്ടായി​രുന്ന ആ മാസം അവർ കുറെ കാര്യങ്ങൾ പഠിച്ചു.

ഗാബ്രി​യോ​ലാ ദ്വീപിൽ മടങ്ങി​യെ​ത്തിയ ശേഷം, ബ്രിട്ടീഷ്‌ കൊളം​ബി​യ​യി​ലെ നനൈ​മോ നഗര​ത്തെ​രു​വിൽ വെച്ച്‌ അവർ ഒരു സഹോ​ദ​രി​യെ കണ്ടുമു​ട്ടി. തങ്ങൾക്കൊ​രു ബൈബിൾ അധ്യയനം വേണ​മെന്ന്‌ അപ്പോൾത്തന്നെ അവർ ആവശ്യ​പ്പെട്ടു. അന്നുതന്നെ, ഒരു കാർ നിറയെ സാക്ഷികൾ ഒരു കടത്തു ബോട്ടിൽ അവരെ കാണാ​നെത്തി. അങ്ങനെ ബൈബിൾ അധ്യയനം ആരംഭി​ച്ചു. മൂന്നു മാസത്തി​നു ശേഷം, മാർക്കും കാത്തി​യും പ്രസം​ഗ​വേ​ല​യിൽ ഏർപ്പെ​ടാൻ തുടങ്ങി. പിന്നെ​യും മൂന്നു മാസം കഴിഞ്ഞ്‌, 1974 മാർച്ച്‌ 10-ാം തീയതി ഇരുവ​രും സ്‌നാ​പ​ന​മേറ്റു. ഇതു ഡെന്നിസ്‌ സ്‌നാ​പ​ന​മേറ്റ്‌ ഒരാഴ്‌ചക്കു ശേഷമാ​യി​രു​ന്നു!

 ഡെന്നിസ്‌ മുഴു​സമയ ശുശ്രൂ​ഷ​യിൽ

ഡെന്നിസ്‌ 1974 സെപ്‌റ്റം​ബർ മുതൽ ഒരു പയനിയർ അഥവാ മുഴു​സമയ ശുശ്രൂ​ഷകൻ ആയി സേവി​ക്കാൻ തുടങ്ങി. അദ്ദേഹം ഇപ്രകാ​രം പറയുന്നു: “പയനി​യ​റി​ങ്ങിൽ ഞാൻ സന്തുഷ്ട​നാ​യി​രു​ന്നു, എങ്കിലും എന്റെ ശുശ്രൂഷ വിപു​ല​പ്പെ​ടു​ത്താൻ ഞാനാ​ഗ്ര​ഹി​ച്ചു; തന്മൂലം 1975 ജൂ​ലൈ​യിൽ, ന്യൂ​യോർക്കി​ലെ ബ്രുക്ലി​നി​ലുള്ള, യഹോ​വ​യു​ടെ സാക്ഷി​ക​ളു​ടെ ലോക ആസ്ഥാനത്തു സേവി​ക്കാൻ ആഗ്രഹം പ്രകടി​പ്പി​ച്ചു​കൊണ്ട്‌ ഞാനൊ​രു അപേക്ഷ അയച്ചു. ഡിസം​ബ​റിൽ എന്നെ അവി​ടേക്കു ക്ഷണിച്ചു.”

ലോക ആസ്ഥാന​ത്തുള്ള അംഗങ്ങൾക്കു താമസി​ക്കാ​നാ​യി, ടവേഴ്‌സ്‌ എന്ന ഹോട്ടൽ പുതു​ക്കി​പ്പ​ണി​യു​ന്ന​തിൽ സഹായി​ക്കാ​നാ​യി​രു​ന്നു ഡെന്നി​സി​ന്റെ ആദ്യ നിയമനം. അവിടെ കുറേ വർഷങ്ങൾ അദ്ദേഹം ജോലി ചെയ്‌തു, ടൈൽസ്‌ ഇടുന്ന പണിക്ക്‌ മേൽനോ​ട്ടം വഹിച്ചി​രു​ന്നത്‌ അദ്ദേഹ​മാണ്‌. പിന്നീട്‌, വിവാ​ഹി​ത​നാ​കാൻ ആഗ്രഹി​ച്ച​പ്പോൾ ഡെന്നിസ്‌ കാലി​ഫോർണി​യ​യി​ലേക്കു പോയി. 1984-ൽ കത്തീഡ്രൽ സിറ്റി സഭയിൽ ഒരു മൂപ്പനാ​യി സേവി​ച്ചു​കൊ​ണ്ടി​രി​ക്കു​മ്പോൾ ഒരു പയനിയർ സഹോ​ദ​രി​യായ കാത്തി എൻസിനെ അദ്ദേഹം വിവാഹം ചെയ്‌തു.

ജീവിതം ലളിത​മാ​ക്കി​ക്കൊ​ണ്ടു രാജ്യ​താ​ത്‌പ​ര്യ​ങ്ങൾ പിന്തു​ട​രാൻ ഡെന്നി​സും കാത്തി​യും ദൃഢചി​ത്ത​രാ​യി​രു​ന്നു. അതു​കൊണ്ട്‌, ദക്ഷിണ കാലി​ഫോർണി​യ​യി​ലെ തഴച്ചു​വ​ള​രുന്ന നിർമാണ വ്യവസാ​യ​ത്തി​ലൂ​ടെ പണം വാരാ​നുള്ള അവസര​ങ്ങ​ളെ​ല്ലാം ഡെന്നിസ്‌ തള്ളിക്ക​ളഞ്ഞു. 1988-ൽ ഡെന്നി​സും കാത്തി​യും യഹോ​വ​യു​ടെ സാക്ഷി​ക​ളു​ടെ അന്താരാ​ഷ്‌ട്ര നിർമാ​ണ​വേ​ലയെ സഹായി​ക്കാ​നാ​യി അപേക്ഷ സമർപ്പി​ച്ചു. ആ വർഷം ഡിസം​ബ​റിൽ, അർജന്റീ​ന​യി​ലുള്ള ബ്യൂനസ്‌ ഐറി​സി​ലെ ബ്രാഞ്ച്‌ നിർമാണ പദ്ധതി​യിൽ സേവി​ക്കാ​നുള്ള നിയമനം അവർക്കു ലഭിച്ചു.

പിന്നീട്‌ 1989-ൽ, യഹോ​വ​യു​ടെ സാക്ഷി​ക​ളു​ടെ നിർമാ​ണ​വേ​ല​യിൽ സ്ഥിരമാ​യി സേവി​ക്കു​ന്ന​തിന്‌, ഡെന്നി​സി​നെ​യും കാത്തി​യെ​യും ക്ഷണിക്കു​ക​യു​ണ്ടാ​യി. ഈ പ്രത്യേക മുഴു​സമയ ശുശ്രൂ​ഷ​യു​ടെ ഭാഗമാ​യി അവർ സുരി​നാ​മി​ലും കൊളം​ബി​യ​യി​ലും രണ്ടുതവണ വീതം സേവനം അനുഷ്‌ഠി​ച്ചു. ഇക്വ​ഡോ​റി​ലും മെക്‌സി​ക്കോ​യി​ലും ഡൊമി​നി​ക്കൻ റിപ്പബ്ലി​ക്കി​ലും ബ്രാഞ്ചു നിർമാ​ണ​ത്തിൽ ഇവർ പങ്കെടു​ത്തി​ട്ടുണ്ട്‌.

മാർക്ക്‌ മുഴു​സമയ ശുശ്രൂ​ഷ​യിൽ

നിർബ​ന്ധിത സൈനിക സേവന​ത്തിൽനി​ന്നു രക്ഷപ്പെ​ടാൻ, കാനഡ​യി​ലേക്കു പലായനം ചെയ്‌ത ആയിര​ക്ക​ണ​ക്കിന്‌ അമേരി​ക്കൻ യുവാ​ക്ക​ളോ​ടൊ​പ്പം മാർക്കി​നും, യു.എസ്‌. ഭരണകൂ​ടം 1976-ൽ പൊതു​മാ​പ്പു നൽകി. തങ്ങളുടെ ജീവിതം ലളിത​മാ​ക്കി​ക്കൊ​ണ്ടു ശുശ്രൂ​ഷ​യിൽ കൂടുതൽ സമയം ചെലവ​ഴി​ക്കാൻ മാർക്കും കാത്തി​യും ആഗ്രഹി​ച്ചു. മാർക്ക്‌ ഒരു സർവേയർ ആയി അംശകാല ജോലി നോക്കി. അങ്ങനെ, സ്‌നാ​പ​ന​മേൽക്കു​ന്ന​തി​നു മുമ്പ്‌ തങ്ങൾ വരുത്തി​വെച്ച കടങ്ങ​ളെ​ല്ലാം അവർ ക്രമേണ വീട്ടി​ത്തീർത്തു.

കാനഡ​യി​ലെ സാക്ഷികൾ 1978-ൽ ഒൺടേ​റി​യോ​യി​ലെ ടൊ​റൊ​ന്റോ​ക്കു സമീപം ഒരു ബ്രാഞ്ചു സമുച്ചയം പണിയാൻ പദ്ധതി​യി​ട്ട​പ്പോൾ, തങ്ങളുടെ സേവനം ലഭ്യമാ​ക്കാൻ പറ്റിയ അവസ്ഥയി​ലാ​യി​രു​ന്നു മാർക്കും കാത്തി​യും. മാർക്കി​നു സർവേ ജോലി​യിൽ പരിചയം ഉണ്ടായി​രു​ന്ന​തി​നാൽ, നിർമാ​ണ​ത്തിൽ പങ്കെടു​ക്കാൻ അവരെ ക്ഷണിച്ചു. 1981 ജൂണിൽ ജോർജ്‌ടൗ​ണി​ലെ പദ്ധതി പൂർത്തി​യാ​കു​ന്ന​തു​വരെ അവർ അവി​ടെ​ത്തന്നെ സേവിച്ചു. അതിനു​ശേഷം, അവർ ബ്രിട്ടീഷ്‌ കൊളം​ബി​യ​യി​ലേക്കു മടങ്ങി​ച്ചെന്ന്‌, യഹോ​വ​യു​ടെ സാക്ഷി​ക​ളു​ടെ ഒരു സമ്മേള​ന​ഹാൾ നിർമാ​ണത്തെ സഹായി​ച്ചു​കൊ​ണ്ടു നാലു വർഷം അവിടെ ചെലവ​ഴി​ച്ചു. അതു പൂർത്തി​യാ​യ​പ്പോൾ, കാനഡ​യി​ലെ ബ്രാഞ്ച്‌ സൗകര്യ​ങ്ങൾ വിപു​ലീ​ക​രി​ക്കുന്ന ജോലി​യിൽ സഹായി​ക്കാ​നാ​യി അവരെ തിരികെ വിളിച്ചു.

ജോർജ്‌ടൗ​ണിൽ വന്ന്‌ ഏതാനും മാസങ്ങൾക്കു ശേഷം, അതായത്‌ 1986-ൽ, മാർക്കി​നെ​യും കാത്തി​യെ​യും കാനഡാ ബ്രാഞ്ചി​ലേക്ക്‌ സ്ഥിര അംഗങ്ങ​ളാ​യി ക്ഷണിച്ചു. അന്നുമു​തൽ ബ്രാഞ്ച്‌ അംഗങ്ങ​ളാ​യി സേവി​ക്കുന്ന അവർക്കു നിരവധി രാജ്യ​ങ്ങ​ളിൽ നിർമാ​ണ​പ്ര​വർത്ത​ന​ങ്ങ​ളിൽ പങ്കെടു​ക്കാ​നുള്ള അവസരങ്ങൾ ലഭ്യമാ​യി​ട്ടുണ്ട്‌. സർവേ ജോലി​യി​ലെ പരിച​യ​സ​മ്പത്തു നിമിത്തം, തെക്കേ അമേരി​ക്ക​യി​ലും മധ്യ അമേരി​ക്ക​യി​ലും കരീബി​യൻ ദ്വീപ​സ​മൂ​ഹ​ങ്ങ​ളി​ലും യഹോ​വ​യു​ടെ സാക്ഷി​ക​ളു​ടെ സമ്മേള​ന​ഹാ​ളു​ക​ളു​ടെ​യും ബ്രാഞ്ചു​കെ​ട്ടി​ട​ങ്ങ​ളു​ടെ​യും നിർമാണ വേലയിൽ മാർക്കി​നെ ഉപയോ​ഗി​ക്കാൻ തുടങ്ങി.

വർഷങ്ങ​ളി​ലു​ട​നീ​ളം മാർക്കും കാത്തി​യും വെന​സ്വേല, നിക്കരാ​ഗ്വ, ഹെയ്‌റ്റി, ഗയാന, ബാർബ​ഡോസ്‌, ബഹാമാസ്‌, ഡൊമി​നിക്ക, ഐക്യ​നാ​ടു​കൾ (ഫ്‌ളോ​റിഡ), ഡൊമി​നി​ക്കൻ റിപ്പബ്ലിക്ക്‌ എന്നീ രാജ്യ​ങ്ങ​ളി​ലെ​ല്ലാം സേവനം അനുഷ്‌ഠി​ച്ചി​ട്ടുണ്ട്‌. മുഴു​സമയ ശുശ്രൂ​ഷ​യു​ടെ ഈ പ്രത്യേക വശമാണ്‌ മാർക്കും ഡെന്നി​സും വീണ്ടും കണ്ടുമു​ട്ടാൻ ഇടയാ​ക്കി​യത്‌.

ഡൊമി​നി​ക്കൻ റിപ്പബ്ലി​ക്കിൽ വെച്ചുള്ള പുനഃ​സം​ഗ​മം

പരസ്‌പരം അറിയാ​തെ, മാർക്കും ഡെന്നി​സും ഡൊമി​നി​ക്കൻ റിപ്പബ്ലി​ക്കി​ലെ ഒരേ നിർമാ​ണ​പ​ദ്ധ​തി​യിൽ ജോലി  ചെയ്യു​ക​യാ​യി​രു​ന്നു. ഒരു ദിവസം യഹോ​വ​യു​ടെ സാക്ഷി​ക​ളു​ടെ, സാന്റോ ഡൊമി​ങ്കോ​യി​ലെ ബ്രാഞ്ചിൽ വെച്ച്‌ ഇരുവ​രും അപ്രതീ​ക്ഷി​ത​മാ​യി കണ്ടുമു​ട്ടി. പരിചയം പുതു​ക്കി​യ​പ്പോ​ഴുള്ള അവരുടെ ആഹ്ലാദം ഒന്നു വിഭാവന ചെയ്‌തു നോക്കൂ! നീണ്ട 33 വർഷത്തി​നു​ശേഷം കണ്ടുമു​ട്ടിയ അവർക്കു പരസ്‌പരം പങ്കു​വെ​ക്കാൻ ഒരുപാ​ടു കാര്യ​ങ്ങ​ളു​ണ്ടാ​യി​രു​ന്നു. അത്ഭുത​പ​ര​ത​ന്ത്ര​രായ അവർ, നിങ്ങൾ മുകളിൽ വായിച്ച കാര്യ​ങ്ങ​ളി​ല​ധി​ക​വും പങ്കു​വെച്ചു. അവർക്കും അതു​പോ​ലെ അവരുടെ അനുഭ​വങ്ങൾ കേട്ടി​ട്ടു​ള്ള​വർക്കും ഏറ്റവും ശ്രദ്ധേ​യ​മാ​യി തോന്നി​യി​ട്ടു​ള്ളത്‌ അവർ ഇരുവ​രു​ടെ​യും ജീവി​ത​ത്തി​ലെ സമാന​ത​ക​ളാ​യി​രു​ന്നു.

രണ്ടു പേരും ഹിപ്പി​ക​ളാ​യി ജീവിച്ചു, ഭൗതി​ക​ത്വം നിറഞ്ഞ ആധുനിക ജീവി​ത​രീ​തി​യിൽനി​ന്നും അതിന്റെ ഉത്‌ക​ണ്‌ഠ​ക​ളിൽ നിന്നും അകന്നു​മാ​റി വിദൂര ഇടങ്ങളിൽ പോയി താമസി​ച്ചു. ഡെന്നിസ്‌ വിവാഹം ചെയ്‌തത്‌ കാത്തി എന്നു പേരുള്ള ഒരു പെൺകു​ട്ടി​യെ ആയിരു​ന്നു; മാർക്ക്‌ വിവാഹം ചെയ്‌ത​തും കാത്തി എന്നു പേരുള്ള ഒരു പെൺകു​ട്ടി​യെ​ത്തന്നെ. യഹോ​വ​യു​ടെ സാക്ഷി​ക​ളു​ടെ യോഗ​ത്തിൽ സംബന്ധിച്ച ആദ്യ ദിവസം​തന്നെ ഇരുവ​രും ബൈബി​ള​ധ്യ​യനം സ്വീക​രി​ച്ചു. രണ്ടു​പേ​രും സ്‌നാ​പ​ന​മേ​റ്റ​തോ, 1974 മാർച്ചി​ലും. ഇരുവ​രും യഹോ​വ​യു​ടെ സാക്ഷി​ക​ളു​ടെ ബ്രാഞ്ച്‌ കുടും​ബാം​ഗ​ങ്ങ​ളാ​യി—ഡെന്നിസ്‌ ഐക്യ​നാ​ടു​ക​ളി​ലും മാർക്ക്‌ കാനഡ​യി​ലും. ആത്മീയ ലക്ഷ്യങ്ങൾ പിന്തു​ട​രാൻ രണ്ടു​പേ​രും തങ്ങളുടെ ജീവിതം ലളിത​മാ​ക്കി. (മത്തായി 6:22, NW) രണ്ടു​പേ​രും അന്താരാ​ഷ്‌ട്ര നിർമാ​ണ​വേ​ല​യിൽ പങ്കെടു​ത്തു​കൊ​ണ്ടു നിരവധി രാജ്യ​ങ്ങ​ളിൽ തങ്ങളുടെ നിയമ​നങ്ങൾ നിറ​വേറ്റി. ഡൊമി​നി​ക്കൻ റിപ്പബ്ലി​ക്കിൽ വെച്ച്‌ ആകസ്‌മി​ക​മാ​യി ഇവർ ഒത്തു​ചേ​രു​ന്ന​തു​വരെ, ബൈബിൾ സത്യം സ്വീക​രിച്ച ഒരു മുൻ സുഹൃ​ത്തി​നെ​പ്പോ​ലും ഇരുവ​രും കണ്ടുമു​ട്ടി​യി​ട്ടി​ല്ലാ​യി​രു​ന്നു.

ആശ്ചര്യ​ക​ര​മാ​യ ഈ യാദൃ​ച്ഛിക സമാഗമം വിധി​യാ​ണെ​ന്നാ​ണോ ഡെന്നി​സും മാർക്കും കരുതു​ന്നത്‌? തീർച്ച​യാ​യു​മല്ല. ബൈബിൾ പറയു​ന്ന​തു​പോ​ലെ, “എല്ലാം യാദൃ​ച്ഛി​ക​മാ​യി സംഭവി​ക്കു​ന്ന​താണ്‌” എന്ന്‌ അവർ തിരി​ച്ച​റി​യു​ന്നു—ചില​പ്പോൾ വളരെ രസകര​മായ വിധങ്ങ​ളി​ലാ​വാം. (സഭാ​പ്ര​സം​ഗി 9:11, പി.ഒ.സി.ബൈ.) എന്നിരു​ന്നാ​ലും, തങ്ങളുടെ പുനഃ​സം​ഗ​മ​ത്തി​നു കാരണ​മായ മറ്റൊരു ഘടക​ത്തെ​ക്കൂ​ടെ അവർ തിരി​ച്ച​റി​യു​ന്നു; ജീവി​ത​ത്തി​ന്റെ ഉദ്ദേശ്യം അറിയാ​നുള്ള അവരുടെ അതിയായ വാഞ്‌ഛ​യും, യഹോ​വ​യാം ദൈവ​ത്തോ​ടുള്ള സ്‌നേ​ഹ​വും.

ബൈബിൾ സത്യം പഠിക്കുന്ന ആത്മാർഥ​ഹൃ​ദ​യ​രായ സകലരു​ടെ​യും കാര്യ​ത്തിൽ പൊതു​വാ​യി നിരീ​ക്ഷി​ക്കാൻ കഴിയുന്ന ചില സംഗതി​കൾ ഡെന്നി​സി​ന്റെ​യും മാർക്കി​ന്റെ​യും അനുഭ​വകഥ വ്യക്തമാ​ക്കു​ന്നു. ഡെന്നിസ്‌ ഇങ്ങനെ പറയുന്നു: “യഹോവ ആളുക​ളു​ടെ ജീവിത സാഹച​ര്യ​ങ്ങ​ളെ​പ്പറ്റി ബോധ​വാ​നാണ്‌ എന്ന്‌ എന്റെയും മാർക്കി​ന്റെ​യും അനുഭവം വ്യക്തമാ​ക്കു​ന്നു, അവർക്കു ശരിയായ ഹൃദയ​നി​ല​യു​ണ്ടാ​കു​മ്പോൾ, അവൻ തീർച്ച​യാ​യും അവരെ തന്നി​ലേക്ക്‌ ആകർഷി​ക്കു​ന്നു.”—2 ദിനവൃ​ത്താ​ന്തം 16:9; യോഹ​ന്നാൻ 6:44; പ്രവൃ​ത്തി​കൾ 13:48, NW.

മാർക്ക്‌ പിൻവ​രു​ന്ന​പ്ര​കാ​രം കൂട്ടി​ച്ചേർക്കു​ന്നു: “ഞങ്ങളുടെ അനുഭവം മറ്റൊരു കാര്യം​കൂ​ടെ ഞങ്ങളെ പഠിപ്പി​ച്ചി​രി​ക്കു​ന്നു. ഒരുവൻ യഹോ​വ​യു​ടെ നിലവാ​ര​ങ്ങ​ളു​മാ​യി പൊരു​ത്ത​പ്പെ​ടു​ക​യും തന്റെ ജീവിതം അവനു സമർപ്പി​ക്കു​ക​യും അവന്റെ സേവന​ത്തി​നാ​യി തന്നെത്തന്നെ ലഭ്യമാ​ക്കു​ക​യും ചെയ്യു​മ്പോൾ, തന്റെ ജനത്തിനു പ്രയോ​ജ​ന​ക​ര​മാം വിധത്തിൽ സത്യാ​രാ​ധന ഉന്നമി​പ്പി​ക്കു​ന്ന​തിൽ, യഹോ​വ​യ്‌ക്ക്‌ ആ വ്യക്തി​യു​ടെ പ്രാപ്‌തി​ക​ളും കഴിവു​ക​ളും ഉപയോ​ഗി​ക്കാൻ കഴിയും.”—എഫെസ്യർ 4:8, NW.

തന്റെ ജനത്തിന്റെ മുഴു​ഹൃ​ദ​യ​ത്തോ​ടെ​യുള്ള സേവനത്തെ യഹോവ അനു​ഗ്ര​ഹി​ക്കു​ന്നു എന്നും അവരുടെ അനുഭവം വ്യക്തമാ​ക്കു​ന്നു. ഡെന്നി​സും മാർക്കും ഈ അനു​ഗ്രഹം അനുഭ​വി​ച്ച​റി​ഞ്ഞു. ഡെന്നിസ്‌ പറയുന്നു: “രാജ്യ​താ​ത്‌പ​ര്യ​ങ്ങൾ ഉന്നമി​പ്പി​ക്കാ​നാ​യി മുഴു​സമയ ശുശ്രൂ​ഷ​യു​ടെ ഈ പ്രത്യേക വശത്ത്‌ ആയിരി​ക്കു​ന്നത്‌ ഒരു പദവി തന്നെയാണ്‌. കാരണം, ഗോള​മെ​മ്പാ​ടു​നി​ന്നു​മുള്ള സഹോ​ദ​രീ​സ​ഹോ​ദ​ര​ന്മാ​രോ​ടൊ​പ്പം വേല ചെയ്യവേ പരസ്‌പരം പ്രോ​ത്സാ​ഹി​പ്പി​ക്കാൻ അതു ഞങ്ങൾക്ക്‌ അവസരം തന്നിരി​ക്കു​ന്നു.”

മാർക്ക്‌ ഇങ്ങനെ കൂട്ടി​ച്ചേർക്കു​ന്നു: “ദൈവ​രാ​ജ്യ താത്‌പ​ര്യ​ങ്ങൾ ഒന്നാമതു വെക്കു​ന്ന​വരെ യഹോവ നിശ്ചയ​മാ​യും അനു​ഗ്ര​ഹി​ക്കും. കാനഡാ ബ്രാഞ്ച്‌ കുടും​ബ​ത്തി​ലെ ഒരംഗ​മാ​യി സേവി​ച്ചു​കൊണ്ട്‌ അന്താരാ​ഷ്‌ട്ര നിർമാണ പ്രവർത്ത​ന​ത്തിൽ പങ്കുപ​റ്റാൻ കഴിയു​ന്നത്‌ ഒരു മഹത്തായ അനു​ഗ്ര​ഹ​മാ​യി ഞാൻ കണക്കാ​ക്കു​ന്നു.”

എത്ര അനുപ​മ​മായ ഒരു പുനഃ​സം​ഗമം അല്ലേ? തീർച്ച​യാ​യും. മാർക്ക്‌ പറയുന്നു: “വീണ്ടു​മുള്ള ഈ കൂടി​ക്കാഴ്‌ച ഞങ്ങളെ ഇത്രമാ​ത്രം പുളകി​ത​രാ​ക്കി​യ​തി​ന്റെ യഥാർഥ കാരണം, അതുല്യ​നായ യഹോ​വ​യാം ദൈവത്തെ അറിയാ​നും സ്‌നേ​ഹി​ക്കാ​നും സേവി​ക്കാ​നും ഇടയായതാണ്‌.”(g02 10/22)

[21-ാം പേജിലെ ചിത്രം]

ഡെന്നിസ്‌, 1966-ൽ

[21-ാം പേജിലെ ചിത്രം]

മാർക്ക്‌, 1964-ൽ

[23-ാം പേജിലെ ചിത്രം]

ഡെന്നിസ്‌ സൗത്ത്‌ ഡക്കോ​ട്ട​യിൽ, 1974-ൽ

[23-ാം പേജിലെ ചിത്രം]

മാർക്ക്‌ ഒൺടേ​റി​യോ​യിൽ, 1971-ൽ

[24-ാം പേജിലെ ചിത്രം]

ഡെന്നിസും മാർക്കും ഭാര്യ​മാ​രോ​ടൊ​പ്പം, 2001-ൽ യാദൃ​ച്ഛി​ക​മാ​യി വീണ്ടും കണ്ടുമു​ട്ടി​യ​ശേഷം