ബ്രിട്ട​നി​ലെ തുരപ്പൻക​രടി—കാട്ടിലെ ജന്മി

ബ്രിട്ടനിലെ ഉണരുക! ലേഖകൻ

കാനന​ത്തി​ന്റെ നിശ്ശബ്ദ​തയെ ഭഞ്‌ജി​ച്ചു​കൊണ്ട്‌ ഒരു കരിങ്കി​ളി പാടി​ത്തു​ടങ്ങി. സൂര്യൻ മെല്ലെ ചക്രവാ​ള​ത്തി​ലേക്കു താണു​കൊ​ണ്ടി​രി​ക്കെ, വീണു കിടക്കുന്ന ഒരു സിൽവർ ബിർച്ച്‌ മരത്തിൽ ഞാനി​രു​ന്നു. മഴയിൽ കുതിർന്ന സസ്യങ്ങ​ളു​ടെ നനുത്ത ഗന്ധം എങ്ങും പരന്നി​രു​ന്നു.

തുരപ്പൻക​ര​ടി​കളെ നിരീ​ക്ഷി​ക്കുക, അതായി​രു​ന്നു എന്റെ വരവിന്റെ ഉദ്ദേശ്യം. അതു​കൊണ്ട്‌ ഇളം കാറ്റേറ്റ്‌ ഇരിക്കാൻ പറ്റിയ ഒരു സ്ഥലം ഞാൻ ശ്രദ്ധാ​പൂർവം തിര​ഞ്ഞെ​ടു​ത്തു. തുരപ്പൻക​ര​ടി​യു​ടെ കണ്ണുകൾ തീരെ ചെറു​താണ്‌, വെളുത്ത അഗ്രമുള്ള ചെവി​ക​ളും അങ്ങനെ​തന്നെ. എങ്കിലും അവയുടെ ശ്രവണ​പ്രാ​പ്‌തി​യും ഘ്രാണ​ശ​ക്തി​യും അപാര​മാണ്‌. ഏതെങ്കി​ലും കാരണ​വ​ശാൽ അവ എന്നെ മണത്തറി​യു​ക​യോ എന്റെ ശബ്ദം കേൾക്കു​ക​യോ ചെയ്‌താൽ പിന്നെ രാത്രി മുഴുവൻ മാളത്തി​നു പുറത്തി​റ​ങ്ങില്ല എന്നുള്ളത്‌ ഉറപ്പാണ്‌.

യൂറോ​പ്പി​ലെ തുരപ്പൻക​ര​ടി​കൾ വലുതാണ്‌. അവയ്‌ക്ക്‌ ഏതാണ്ട്‌ ഒരു മീറ്റർ നീളവും മുപ്പതു സെന്റി​മീ​റ്റർ പൊക്ക​വും ശരാശരി 12 കിലോ​ഗ്രാം തൂക്കവും വരും. നിഗൂഢ സ്വഭാ​വ​മുള്ള ഈ മൃഗത്തിന്‌ ചാരനി​റ​മുള്ള പരുപ​രുത്ത രോമ​ക്കു​പ്പാ​യ​മാ​ണു​ള്ളത്‌. മോന്ത​യ്‌ക്കും ഉടലിന്റെ അടിഭാ​ഗ​ത്തി​നും കറുപ്പു​നി​റ​വും കുറു​കി​ത്ത​ടിച്ച വാലിന്‌ ചാരനി​റ​വു​മാ​ണു​ള്ളത്‌. കാലുകൾ കറുത്തു നീളം കുറഞ്ഞ​വ​യാണ്‌. ഓരോ കാൽപ്പാ​ദ​ത്തി​ലും കരുത്തുറ്റ നഖങ്ങളുള്ള അഞ്ചു വിരലു​ക​ളുണ്ട്‌.

മോന്ത​യിൽ നിന്നു ചെവി​വരെ എത്തുന്ന വീതി​യുള്ള മൂന്നു വെളുത്ത വരകൾ അതിന്റെ വ്യതി​രിക്ത സവി​ശേ​ഷ​ത​യാ​ണെന്നു മാത്രമല്ല, ഒരു തർക്കവി​ഷ​യ​വു​മാണ്‌. കൂരി​രു​ട്ടുള്ള രാത്രി​ക​ളിൽ തുരപ്പൻക​ര​ടി​കൾ സ്വവർഗത്തെ തിരി​ച്ച​റി​യു​ന്നത്‌ ഈ വരകൾ ഉള്ളതു​കൊ​ണ്ടാണ്‌ എന്നു ചിലർ പറയുന്നു—എന്നാൽ ഗന്ധത്താ​ലാണ്‌ ഇവ പരസ്‌പരം തിരി​ച്ച​റി​യു​ന്നത്‌. എന്തായാ​ലും, ഈ വരകൾ തുരപ്പൻക​ര​ടി​യെ സുന്ദര​നാ​ക്കു​ന്നു എന്നതിൽ ആർക്കും തർക്കമു​ണ്ടാ​വില്ല.

ബ്രിട്ട​നി​ലെ നാട്ടിൻ പുറങ്ങൾക്കു സുപരി​ചി​ത​നാണ്‌ ഈ മുഖം​മൂ​ടി​ക്കാ​രൻ. പേരു സൂചി​പ്പി​ക്കു​ന്ന​തു​പോ​ലെ, തുരക്ക​ലാണ്‌ ഇവന്റെ പ്രധാന പരിപാ​ടി. ഇങ്ങനെ തുരന്നു​തു​രന്ന്‌ ഇടനാ​ഴി​ക​ളും അറകളു​മൊ​ക്കെ​യുള്ള ഒരു അസൽ വീടു​തന്നെ ഈ വിരുതൻ ഉണ്ടാക്കും. ഇത്തരം അറകൾക്ക്‌ 30 മീറ്റർവരെ വ്യാസം കണ്ടേക്കാം. അറകൾ മാത്രമല്ല 300 മീറ്റർ നീളമുള്ള, തുരങ്ക​ങ്ങ​ളു​ടെ ഒരു കുഴപ്പി​ക്കുന്ന ശൃംഖല പോലും തുരന്നു​ണ്ടാ​ക്കാ​നുള്ള കഴിവ്‌ ഇവയ്‌ക്കുണ്ട്‌! തുരപ്പൻക​ര​ടി​കൾ നിശാ​ച​ര​ജീ​വി​കൾ ആണ്‌. പകൽസ​മ​യത്ത്‌ ഇവ മാളത്തി​ലെ ഉറക്കറ​യിൽ സുഖനി​ദ്ര​യി​ലാ​യി​രി​ക്കും. പ്രത്യേക അറകളിൽ, പായലും പന്നൽച്ചെ​ടി​ക​ളും കരിയി​ല​ക​ളും കൊണ്ട്‌ ഉണ്ടാക്കിയ പതുപ​തുത്ത പുത്തൻ കിടക്ക​യി​ലാണ്‌ പെൺക​രടി കുഞ്ഞു​ങ്ങളെ പ്രസവി​ക്കു​ന്നത്‌.

ഇവയുടെ മാളങ്ങൾക്ക്‌, പുറ​ത്തേക്കു തുറക്കുന്ന നിരവധി കവാട​ങ്ങ​ളുണ്ട്‌. ആൾഡർ മരങ്ങൾക്കു സമീപ​ത്തും, ഞാറ​ച്ചെ​ടി​ക​ളും മുൾച്ചെ​ടി​ക​ളും വളരുന്ന കുറ്റി​ക്കാ​ടു​ക​ളി​ലു​മൊ​ക്കെ​യാണ്‌  ഇവയുടെ മാളങ്ങൾ കണ്ടുവ​രു​ന്നത്‌. ഇംഗ്ലണ്ടി​ലെ തുരപ്പൻക​ര​ടി​ക​ളു​ടെ മാളങ്ങൾക്കു ചില​പ്പോൾ 50-ലധികം കവാടങ്ങൾ വരെ കാണാ​റുണ്ട്‌. 150-ലധികം വർഷം പഴക്കമുള്ള ചില മാളങ്ങ​ളിൽ ഒരേ കുടും​ബ​ത്തി​ലെ പല തലമു​റ​കൾക്കു​പോ​ലും താമസി​ക്കാം. സാധാരണ തുരപ്പൻ കരടി​ക​ളു​ടെ ആയുസ്സ്‌ രണ്ടോ മൂന്നോ വർഷമാ​ണെ​ങ്കി​ലും ചിലത്‌ പതിന​ഞ്ചോ അതില​ധി​ക​മോ വർഷങ്ങൾ പോലും ജീവി​ച്ചേ​ക്കാം.

തുരപ്പൻക​ര​ടി​യു​ടെ വാസസ്ഥലം തിരി​ച്ച​റി​യുക എളുപ്പ​മാണ്‌, തുരന്നു​നീ​ക്കിയ പാറക്ക​ഷ​ണ​ങ്ങ​ളും കല്ലും മണ്ണു​മൊ​ക്കെ കവാട​ത്തി​നു മുമ്പിൽ കൂനകൂ​ട്ടി വെച്ചി​രി​ക്കും. മാളത്തിൽ നിന്നു പുറത്തു കൊണ്ടു​വ​ന്നി​രി​ക്കുന്ന വസ്‌തു​ക്കൾ കണ്ടാല​റി​യാം ഈ മൃഗം എത്ര കരുത്ത​നാ​ണെന്ന്‌.

മാളത്തിൽ താമസ​മു​ണ്ടോ എന്ന്‌ എങ്ങനെ മനസ്സി​ലാ​ക്കാം? മാളത്തി​നു ചുറ്റും, 15 മുതൽ 23 വരെ സെന്റി​മീ​റ്റർ വ്യാസ​വും 23 സെന്റി​മീ​റ്റർ ആഴവു​മുള്ള കുഴികൾ ഉണ്ടോ​യെന്നു നോക്കുക. ഇത്‌ അവയുടെ വിസർജന സ്ഥലമാണ്‌. ഇവയിലെ കാഷ്‌ഠം ഉണങ്ങി​യി​ട്ടി​ല്ലെ​ങ്കിൽ, തുരപ്പൻ കരടികൾ മാളത്തിൽ താമസ​മുണ്ട്‌ എന്നു മനസ്സി​ലാ​ക്കാം. മാളത്തിൽ നിന്നു പുറ​ത്തേക്ക്‌ വഴിച്ചാൽ ഉണ്ടെങ്കിൽ, വേനൽക്കാ​ലത്ത്‌ സമീപ​ത്തുള്ള പച്ചപ്പു​ല്ലും സസ്യങ്ങ​ളും ചാഞ്ഞ്‌ അമർന്ന്‌ കിടപ്പു​ണ്ടെ​ങ്കിൽ അതെല്ലാം അകത്തു താമസ​മു​ള്ള​തി​ന്റെ ലക്ഷണങ്ങ​ളാണ്‌. ചെളി​പ്ര​ദേ​ശ​ങ്ങ​ളിൽ ഇവയുടെ കാൽപ്പാ​ടു​കൾ ദൃശ്യ​മാ​യി​രി​ക്കും. മാളത്തി​ന​രി​കെ​യുള്ള മരങ്ങളിൽ ചെളി​നി​റഞ്ഞ കാൽപ്പാ​ടു​ക​ളും മാന്തി​ക്കീ​റിയ അടയാ​ള​ങ്ങ​ളും കാണും. പൂച്ചകൾ ചെയ്യു​ന്ന​തു​പോ​ലെ, പിൻകാ​ലിൽ നിന്നു​കൊണ്ട്‌ മുൻകാ​ലു​കൾ വലിച്ചു​നീ​ട്ടി മൂരി​നി​വർക്കു​മ്പോൾ പതിയുന്ന അടയാ​ള​ങ്ങ​ളാ​ണിവ. നിരവധി കവാട​ങ്ങ​ളുള്ള മാളമാ​ണെ​ങ്കിൽ ഇവ അകത്തു​ണ്ടോ എന്നറി​യുക ബുദ്ധി​മു​ട്ടാണ്‌. അതിന്‌, സന്ധ്യക്കു മുമ്പേ​തന്നെ ഓരോ ദ്വാര​ത്തി​നു മുകളി​ലും ചെറിയ കമ്പുകൾ വെക്കുക. അവ അവിടെ താമസ​മു​ണ്ടെ​ങ്കിൽ, അടുത്ത ദിവസം രാവിലെ ചെന്നു​നോ​ക്കു​മ്പോൾ, സാധാരണ അവ പുറ​ത്തേക്ക്‌ ഇറങ്ങാ​റുള്ള കവാട​ങ്ങ​ളി​ലെ കമ്പുകൾ സ്ഥാനം മാറി​ക്കി​ട​ക്കു​ന്നതു കാണാം.

ആഹാരം തേടി തുരപ്പൻക​ര​ടി​കൾ രാത്രി​യിൽ ഏറെ ദൂരം സഞ്ചരി​ക്കാ​റുണ്ട്‌. താഴെ വീണു​കി​ട​ക്കുന്ന കരു​വേ​ല​ക​ക്കു​രു, ബീച്ചു​മ​ര​ത്തി​ന്റെ കായ്‌ എന്നിവ​യൊ​ക്കെ ഇവയുടെ ഭക്ഷണമാണ്‌. ചില​പ്പോൾ അവ മണം പിടിച്ച്‌ മുയലി​ന്റെ മാളത്തിൽ കടന്ന്‌ കുഞ്ഞു​ങ്ങളെ അകത്താ​ക്കാ​റുണ്ട്‌. കടന്നലി​ന്റെ ലാർവ​യും ഇഷ്ടഭോ​ജ്യ​മാണ്‌. കാട്ടു​പ​ഴങ്ങൾ, കോളാ​മ്പി​ച്ചെ​ടി​യു​ടെ കിഴങ്ങ്‌, കൂണുകൾ, വണ്ടുകൾ അങ്ങനെ തുരപ്പൻക​ര​ടി​കൾ തിന്നാ​ത്ത​താ​യി ഒന്നുമില്ല. എങ്കിലും മണ്ണിര​യാണ്‌ പ്രധാ​ന​ഭ​ക്ഷണം. മഴയുള്ള ഒരു രാത്രി​യിൽ ഞാൻ തുരപ്പൻക​ര​ടി​കളെ നിരീ​ക്ഷി​ക്കു​ക​യാ​യി​രു​ന്നു. മാളത്തി​നു പുറത്തു​വന്ന അവ ദൂരെ​യെ​ങ്ങും പോയില്ല. കാരണം എന്തായി​രു​ന്നെ​ന്നോ? അവി​ടെ​ത്തന്നെ അവയ്‌ക്ക്‌ കുശാ​ലായ ശാപ്പാടു തരപ്പെട്ടു, കുന്നിൻപു​റത്തെ പുല്ലു​കൾക്കി​ട​യിൽ നിന്ന്‌ മഴയത്തു പുറത്തു​വന്ന കറുത്ത ഒച്ചുകൾ.

തുരപ്പൻക​ര​ടി​കൾ ജൂലൈ മാസത്തി​ലാണ്‌ ഇണചേ​രു​ന്നത്‌. ഫെബ്രു​വ​രി​യാ​കു​മ്പോൾ നാലോ അഞ്ചോ കുഞ്ഞുങ്ങൾ ജനിക്കും. കുഞ്ഞു​ങ്ങൾക്ക്‌ ഏതാണ്ട്‌ മൂന്നു​മാ​സം പ്രായ​മാ​കു​മ്പോൾ, അവ മാളത്തി​നു പുറത്ത്‌ കവാട​ത്തി​ന​രി​കെ കളിക്കാ​നെ​ത്തും. കുഞ്ഞുങ്ങൾ പുറത്ത്‌ കളിച്ചു​കൊ​ണ്ടി​രി​ക്കു​മ്പോൾ ആൺകര​ടി​യും പെൺക​ര​ടി​യും ചേർന്ന്‌ കിടക്ക​യൊ​ക്കെ മാറ്റി വിരി​ക്കും. തുരപ്പൻക​ര​ടി​കൾ വളരെ വൃത്തി​യുള്ള മൃഗങ്ങ​ളാണ്‌, അവ തങ്ങളുടെ വാസസ്ഥലം ഏറ്റവും വൃത്തി​യാ​യി സൂക്ഷി​ക്കു​ന്നു. സാധാ​ര​ണ​മാ​യി വസന്തത്തി​ലോ ശരത്‌കാ​ല​ത്തോ ആണ്‌ ഇവ കിടക്ക മാറ്റു​ന്നത്‌, എങ്കിലും വർഷത്തി​ന്റെ മറ്റു സമയങ്ങ​ളി​ലും അവ അതു ചെയ്‌തേ​ക്കാം. തന്തയും തള്ളയും മാളത്തിൽ നിന്ന്‌ പഴയ കിടക്ക വലിച്ചു പുറത്തു​കൊ​ണ്ടു​വ​രും. പുല്ലി​ന്റെ​യും പന്നൽച്ചെ​ടി​യു​ടെ​യും മറ്റും മുപ്പ​തോ​ളം പുതിയ കെട്ടുകൾ രാത്രി​യിൽത്തന്നെ ശേഖരി​ക്കും. എന്നിട്ട്‌ അവ താടി​ക്കും മുൻകാൽപ്പാ​ദ​ങ്ങൾക്കും ഇടയിൽ പിടി​ച്ചു​കൊണ്ട്‌ മാളത്തി​ലേക്കു വലിച്ചി​ഴച്ചു കൊണ്ടു​പോ​കും. അത്‌ ഉപയോ​ഗി​ച്ചാണ്‌ പുതിയ കിടക്ക ഉണ്ടാക്കു​ന്നത്‌.

വാലി​ന​ടി​യി​ലുള്ള ഗ്രന്ഥി​യിൽ നിന്ന്‌ ഇവ രൂക്ഷഗ​ന്ധ​മുള്ള ഒരു ദ്രാവകം സ്രവി​പ്പി​ക്കു​ന്നു. പുല്ലി​ലും കല്ലിലും വേലി​ത്തൂ​ണു​ക​ളി​ലു​മൊ​ക്കെ ഈ ദ്രാവകം സ്രവി​പ്പി​ച്ചാണ്‌ ഇവ അതിർത്തി​കൾ വേർതി​രി​ക്കു​ന്നത്‌. പരസ്‌പരം തിരി​ച്ച​റി​യാ​നാ​യി അവ മറ്റു തുരപ്പൻക​ര​ടി​ക​ളു​ടെ​മേൽ പോലും ഈ ദ്രാവകം സ്രവി​പ്പി​ക്കാ​റുണ്ട്‌. ഇരതേടി തിരി​ച്ചെ​ത്തു​മ്പോൾ സ്വന്തം മാളത്തി​ന്റെ പ്രവേ​ശ​ന​ദ്വാ​രം കണ്ടുപി​ടി​ക്കാ​നും ഈ ഗന്ധം അവയെ സഹായി​ക്കു​ന്നു.

കരിങ്കി​ളി​യു​ടെ പാട്ട്‌ നേർത്തു​നേർത്തു വന്നു. ഇരുണ്ടു തുടങ്ങിയ വനപ്ര​ദേ​ശ​മാ​കെ നിശ്ശബ്ദത പരന്നു. ഞാൻ ശ്വാസ​മ​ടക്കി നിശ്ചല​നാ​യി ഇരുന്നു. അപ്പോൾ അതാ, കറുപ്പും വെള്ളയും ഇടകലർന്ന മുഖം​മൂ​ടി​യ​ണിഞ്ഞ തുരപ്പൻക​രടി മാളത്തിൽ നിന്നു മെല്ലെ പുറത്തു​വ​രു​ന്നു. അപകടം പതിയി​രി​ക്കു​ന്നു​ണ്ടോ എന്ന്‌ അൽപ്പസ​മയം നിരീ​ക്ഷി​ച്ച​ശേഷം അതു മെല്ലെ പുറ​ത്തേ​ക്കി​റങ്ങി—പിതൃ​സ്വ​ത്താ​യി കിട്ടിയ ഭൂമി​യിൽ ഉലാത്താ​നി​റ​ങ്ങുന്ന ഒരു ജന്മി​യെ​പ്പോ​ലെ. (g02 11/08)

[12, 13 പേജു​ക​ളി​ലെ ചിത്രം]

പ്രസവ​ശേഷം ഉപയോ​ഗി​ക്കുന്ന അറ

ഉറക്കറ

കിടക്ക

[13-ാം പേജിലെ ചിത്രം]

തുരപ്പൻ കരടി​യു​ടെ കുഞ്ഞുങ്ങൾ

[13-ാം പേജിലെ ചിത്രങ്ങൾ]

കരുവേലകക്കായ്‌കളും കൂണു​ക​ളും മണ്ണിര​യും ഒക്കെയാണ്‌ തുരപ്പൻക​ര​ടി​യു​ടെ ഭക്ഷണം

[13-ാം പേജിലെ ചിത്ര​ങ്ങൾക്ക്‌ കടപ്പാട്‌]

തുരപ്പൻകരടിയുടെ ചിത്രം: © Steve Jackson, www.badgers.org.uk