മാഗ്നാ​കാർട്ട​യും സ്വാത​ന്ത്ര്യ​ത്തി​നാ​യുള്ള മനുഷ്യ​ന്റെ അന്വേ​ഷ​ണ​വും

ബ്രിട്ടനിലെ ഉണരുക! ലേഖകൻ

ഇംഗ്ലണ്ടി​ലെ സറി കൗണ്ടി​യു​ടെ പ്രകൃ​തി​ര​മ​ണീ​യ​മായ നാട്ടിൻ പുറങ്ങ​ളി​ലൂ​ടെ ഒഴുകുന്ന തെംസ്‌ നദി. അതിന്റെ തീരത്തെ വിശാ​ല​മായ പുൽത്ത​കി​ടി​ക​ളിൽ ഒന്നിൽ ഒരു സ്‌മാ​രകം നില​കൊ​ള്ളു​ന്നുണ്ട്‌. 13-ാം നൂറ്റാ​ണ്ടിൽ അരങ്ങേ​റിയ ഒരു സംഭവത്തെ അനുസ്‌മ​രി​പ്പി​ക്കുന്ന ഒരു ആലേഖനം അതിൽ കാണാം. ഇവിടെ, റനിമിഡ്‌ പുൽപ്പു​റത്തു വെച്ചാണ്‌ [1199 മുതൽ 1216 വരെ ഭരണം നടത്തിയ] ഇംഗ്ലണ്ടി​ലെ ജോൺ രാജാ​വിന്‌ സമരം ചെയ്യുന്ന ഇടപ്ര​ഭു​ക്ക​ന്മാ​രെ അഭിമു​ഖീ​ക​രി​ക്കേണ്ടി വന്നത്‌. രാജാ​വി​ന്റെ കെടു​കാ​ര്യ​സ്ഥ​ത​യിൽ അസ്വസ്ഥ​രാ​യി​ത്തീർന്ന പ്രബല​രായ ജന്മികൾ ആയിരു​ന്നു അവർ. ചില അവകാ​ശങ്ങൾ അനുവ​ദി​ച്ചു നൽകി​ക്കൊണ്ട്‌ തങ്ങളുടെ ആവലാ​തി​കൾക്ക്‌ ഒരു പരിഹാ​രം കാണണ​മെന്ന്‌ അവർ രാജാ​വി​നോട്‌ ആവശ്യ​പ്പെട്ടു. ശക്തമായ സമ്മർദ​ത്തി​നു വഴങ്ങി രാജാ​വിന്‌ ഒടുവിൽ ആ രേഖയിൽ മുദ്ര പതി​ക്കേ​ണ്ടി​വന്നു. ഈ അവകാശ പത്രമാണ്‌ പിൽക്കാ​ലത്ത്‌ മാഗ്നാ​കാർട്ട (മഹാരേഖ) എന്ന പേരിൽ അറിയ​പ്പെ​ടാൻ ഇടയാ​യത്‌.

“പാശ്ചാത്യ ചരി​ത്ര​ത്തി​ലെ അദ്വി​തീയ നിയമ​രേഖ” എന്ന്‌ മാഗ്നാ​കാർട്ടയെ വിശേ​ഷി​പ്പി​ക്കു​ന്നത്‌ എന്തു​കൊ​ണ്ടാണ്‌? ഇതിനുള്ള ഉത്തരത്തി​ലൂ​ടെ കണ്ണോ​ടി​ച്ചാൽ സ്വാത​ന്ത്ര്യ​ത്തി​നു വേണ്ടി​യുള്ള മനുഷ്യ​ന്റെ അന്വേ​ഷണം സംബന്ധി​ച്ചു പല വിവര​ങ്ങ​ളും ഇതൾവി​രി​യു​ന്നതു കാണാം.

ഇടപ്ര​ഭു​ക്ക​ന്മാ​രെ സംബന്ധി​ക്കുന്ന വകുപ്പു​കൾ

ജോൺ രാജാവ്‌ റോമൻ കത്തോ​ലി​ക്കാ സഭയു​മാ​യി ഇടഞ്ഞു​നിൽക്കു​ക​യാ​യി​രു​ന്നു. സ്റ്റീവൻ ലാങ്‌ട​ണി​നെ കാന്റർബറി ആർച്ചു​ബി​ഷ​പ്പാ​യി അംഗീ​ക​രി​ക്കാൻ വിസമ്മ​തി​ച്ചു​കൊണ്ട്‌ അദ്ദേഹം ഇന്നസെന്റ്‌ മൂന്നാമൻ പാപ്പായെ ധിക്കരി​ച്ചു. തത്‌ഫ​ല​മാ​യി സഭ അതിന്റെ പിന്തുണ പിൻവ​ലി​ച്ചു. രാജാവ്‌ ഫലത്തിൽ മതഭ്ര​ഷ്ട​നു​മാ​യി. ഗത്യന്ത​ര​മി​ല്ലാ​തെ ജോൺ രാജാവ്‌ ഒരു അനുര​ഞ്‌ജന ശ്രമം നടത്തി. തന്റെ രാജ്യ​ങ്ങ​ളായ ഇംഗ്ലണ്ടും അയർല​ണ്ടും പാപ്പാ​യ്‌ക്ക്‌ അടിയറ വെക്കാൻ അദ്ദേഹം തയ്യാറാ​യി. സഭയോ​ടു കൂറു​പു​ലർത്തി​ക്കൊ​ള്ളാ​മെ​ന്നും ആണ്ടോ​ടാണ്ട്‌ കപ്പം നൽകി​ക്കൊ​ള്ളാ​മെ​ന്നു​മുള്ള രാജാ​വി​ന്റെ സത്യവാ​ങ്‌മൂ​ല​ത്തി​ന്റെ അടിസ്ഥാ​ന​ത്തിൽ ആ രാജ്യങ്ങൾ പാപ്പാ ജോണി​നു തിരിച്ചു നൽകി. അങ്ങനെ ജോൺ പാപ്പാ​യു​ടെ സാമന്ത രാജാ​വാ​യി​ത്തീർന്നു.

വർധി​ച്ചു​വന്ന സാമ്പത്തിക പ്രതി​സന്ധി നിമിത്തം രാജാവ്‌ നട്ടം തിരിഞ്ഞു. തന്റെ 17 വർഷ ഭരണത്തി​നി​ട​യിൽ 11 തവണ അദ്ദേഹം ഭൂവു​ട​മ​ക​ളു​ടെ​മേൽ കൂടു​ത​ലായ കരം ചുമത്തി. സഭയു​ടെ​യും സാമ്പത്തിക കാര്യാ​ദി​ക​ളു​ടെ​യും പേരി​ലു​ണ്ടായ ഒച്ചപ്പാ​ടു​കൾ ജനങ്ങൾക്ക്‌ രാജാ​വി​ലുള്ള വിശ്വാ​സം കെടു​ത്തു​ന്ന​താ​യി​രു​ന്നു. രാജാ​വി​ന്റെ ചെയ്‌തി​ക​ളാ​കട്ടെ, എരിതീ​യിൽ എണ്ണ ഒഴിക്കുന്ന തരത്തി​ലു​ള്ള​തു​മാ​യി​രു​ന്നു.

ഒടുവിൽ, രാജ്യ​ത്തി​ന്റെ വടക്കു​ഭാ​ഗത്തു പാർത്തി​രുന്ന ഇടപ്ര​ഭു​ക്ക​ന്മാർ ഇനിമേൽ യാതൊ​രു കരവും അടയ്‌ക്കി​ല്ലെന്നു തീരു​മാ​നി​ച്ചു. എങ്ങും പ്രക്ഷോ​ഭം ആളിക്കത്തി. രാജഭക്തി പരസ്യ​മാ​യി പരിത്യ​ജി​ച്ചു​കൊണ്ട്‌ ലണ്ടൻ നഗരത്തി​ലേക്ക്‌ അവർ അണിയ​ണി​യാ​യി നീങ്ങി. വിൻഡ്‌സർ കൊട്ടാ​ര​ത്തി​ലെ രാജാ​വും അൽപ്പം കിഴ​ക്കോ​ട്ടു​മാ​റി സ്റ്റേൻസ്‌ പട്ടണത്തിൽ തമ്പടിച്ച ഇടപ്ര​ഭു​ക്ക​ന്മാ​രും തമ്മിൽ ചൂടു​പി​ടിച്ച ഒത്തുതീർപ്പു ചർച്ചകൾ അരങ്ങേറി. അണിയറ ചർച്ചകൾക്ക്‌ ഒടുവിൽ ഇരു നഗരങ്ങൾക്കും മധ്യേ റനിമിഡ്‌ പുൽപ്പു​റത്ത്‌ അവർ മുഖാ​മു​ഖം കണ്ടുമു​ട്ടി. ഇവി​ടെ​വെച്ച്‌, 1215 ജൂൺ 15 തിങ്കളാഴ്‌ച, 49 വകുപ്പു​കൾ അടങ്ങുന്ന ഒരു അവകാ​ശ​പ​ത്ര​ത്തിൽ ജോൺ രാജാവ്‌ മുദ്ര​വെച്ചു. ‘ഇടപ്ര​ഭു​ക്ക​ന്മാർ അനുമതി തേടു​ന്ന​തും രാജാവ്‌ അംഗീ​കാ​രം നൽകു​ന്ന​തു​മായ വകുപ്പു​കൾ’ എന്നു പറഞ്ഞാണ്‌ അതു തുടങ്ങി​യത്‌.

നിയമ​വാ​ഴ്‌ച​യിൻ കീഴിൽ സ്വാത​ന്ത്ര്യം

അധികം വൈകാ​തെ​തന്നെ ജോൺ രാജാ​വി​ന്റെ ഉദ്ദേശ്യ​ശു​ദ്ധി സംബന്ധിച്ച്‌ സംശയങ്ങൾ തലപൊ​ക്കി​ത്തു​ടങ്ങി. രാജവി​രു​ദ്ധ​വും പാപ്പാ​വി​രു​ദ്ധ​വു​മായ വികാ​രങ്ങൾ അലയടി​ക്കവേ, പാപ്പായെ  കാണാൻ രാജാവ്‌ റോമി​ലേക്ക്‌ നയതന്ത്ര പ്രതി​നി​ധി​കളെ അയച്ചു. റനിമിഡ്‌ കരാർ വെറും പൊള്ള​യായ ഒന്നാ​ണെന്ന്‌ വിധി​യെ​ഴു​തി​ക്കൊണ്ട്‌, അതു റദ്ദു​ചെ​യ്‌ത​താ​യി പാപ്പാ ഉടനടി ശാസന പുറ​പ്പെ​ടു​വി​ക്കു​ക​യും ചെയ്‌തു. ഇംഗ്ലണ്ടിൽ ആഭ്യന്ത​ര​യു​ദ്ധം പൊട്ടി​പ്പു​റ​പ്പെട്ടു. പിറ്റേ വർഷം ജോൺ അകാല​ച​രമം പ്രാപി​ച്ചു. അദ്ദേഹ​ത്തി​ന്റെ പുത്ര​നായ ഒമ്പതു വയസ്സു​കാ​രൻ ഹെൻറി സിംഹാ​സ​ന​സ്ഥ​നാ​യി.

റനിമിഡ്‌ കരാർ പുനഃ​പ്ര​ഖ്യാ​പനം ചെയ്യാൻ ഹെൻറി രാജകു​മാ​രന്റെ അനുയാ​യി​കൾ ഏർപ്പാ​ടാ​ക്കി. മാഗ്നാ​കാർട്ട എന്ന പേരി​ലുള്ള ഒരു ലഘു​ഗ്രന്ഥം പറയു​ന്ന​ത​നു​സ​രിച്ച്‌, “സ്വേച്ഛാ​ധി​പ​ത്യ​ത്തെ അമർച്ച ചെയ്യാ​നുള്ള ഒരു നൈയ​മിക ആയുധം എന്ന രൂപത്തിൽ നിന്നും, മിതവാ​ദി​ക​ളായ പൗരജ​ന​ങ്ങളെ അനുന​യി​പ്പിച്ച്‌ രാജാ​വിന്‌ അനുകൂ​ല​മാ​യി അണി​ചേർക്കാൻ സഹായി​ക്കുന്ന ഒരു പ്രകട​ന​പ​ത്രിക എന്ന രൂപത്തി​ലേക്ക്‌” ഈ പരിഷ്‌ക​രിച്ച പതിപ്പ്‌ “തിരക്കി​ട്ടു ഭേദഗ​തി​ചെ​യ്യു​ക​യാ​യി​രു​ന്നു.” ഹെൻറി​യു​ടെ ഭരണകാ​ലത്ത്‌ വീണ്ടും പലതവണ ഈ കരാർ പരിഷ്‌ക​രിച്ച്‌ പ്രസി​ദ്ധ​പ്പെ​ടു​ത്തു​ക​യു​ണ്ടാ​യി. അദ്ദേഹ​ത്തി​ന്റെ പിൻഗാ​മി​യായ എഡ്വേർഡ്‌ ഒന്നാമൻ മാഗ്നാ​കാർട്ടയെ 1297 ഒക്ടോബർ 12-ന്‌ ഒരിക്കൽക്കൂ​ടി പ്രാമാ​ണീ​ക​രി​ച്ചു. ഒടുവിൽ അതിന്റെ ഒരു പ്രതി ഇംഗ്ലണ്ടി​ലെ പാർല​മെന്റു നിയമ​ങ്ങ​ളു​ടെ നിയമ​സം​ഹി​ത​യിൽ ചേർക്കു​ക​യും ചെയ്‌തു—പ്രത്യേക പൊതു​ജന പ്രാധാ​ന്യ​മുള്ള കാര്യ​ങ്ങ​ളാണ്‌ ഈ നിയമ​സം​ഹി​ത​യിൽ ഉൾപ്പെ​ടു​ത്തി​യി​രി​ക്കു​ന്നത്‌.

ഈ പ്രമാണ രേഖ ഏകാധി​പ​തി​യു​ടെ അധികാ​ര​ങ്ങൾക്കു കൂച്ചു​വി​ല​ങ്ങി​ട്ടു. പ്രജക​ളെ​പ്പോ​ലെ രാജാ​വും നിയമങ്ങൾ അനുസ​രി​ക്കാൻ ബാധ്യ​സ്ഥ​നാണ്‌ എന്ന്‌ ഇതു പ്രഖ്യാ​പി​ച്ചു. 20-ാംനൂ​റ്റാ​ണ്ടി​ലെ വിഖ്യാ​ത​നായ ചരി​ത്ര​കാ​ര​നും ബ്രിട്ടീഷ്‌ പ്രധാ​ന​മ​ന്ത്രി​യും ആയിരുന്ന വിൻസ്റ്റൺ ചർച്ചിൽ ഇങ്ങനെ അഭി​പ്രാ​യ​പ്പെ​ടു​ന്നു: “ഏകാധി​പ​ത്യ​ഭ​ര​ണ​കൂ​ട​ത്തിന്‌ നിയ​ന്ത്ര​ണ​വും സമനി​ല​യും അനിവാ​ര്യ​മാ​ക്കുന്ന ഒരു സംവി​ധാ​നം [മാഗ്നാ​കാർട്ട] പ്രദാനം ചെയ്‌തു. അവശ്യം വേണ്ട അധികാ​രങ്ങൾ അത്‌ രാജാ​വി​നു നൽകു​മ്പോൾത്തന്നെ നിഷ്‌ഠു​ര​നോ കോമാ​ളി​യോ ആയ ഒരു സ്വേച്ഛാ​ധി​പതി അധികാര ദുർവി​നി​യോ​ഗം ചെയ്യു​ന്നത്‌ അതു തടയു​ക​യും ചെയ്യു​മാ​യി​രു​ന്നു.” തികച്ചും ഉദാത്ത​മായ ആദർശങ്ങൾ തന്നെ! എന്നാൽ സാധാ​ര​ണ​ക്കാ​രന്‌ ഇതു​കൊണ്ട്‌ എന്തെങ്കി​ലും പ്രയോ​ജനം ലഭിക്കു​മാ​യി​രു​ന്നോ? അന്ന്‌ തുലോം  തുച്ഛമായ പ്രയോ​ജ​ന​ങ്ങളേ ഉണ്ടായി​രു​ന്നു​ള്ളൂ. ഉന്നത​ശ്രേ​ണി​യിൽപ്പെട്ട, വാസ്‌ത​വ​ത്തിൽ വിരലി​ലെ​ണ്ണാ​വുന്ന അന്നത്തെ “സ്വതന്ത്ര പൗരന്മാ”രുടെ പൗരാ​വ​കാ​ശങ്ങൾ മാത്ര​മാ​യി​രു​ന്നു മാഗ്നാ​കാർട്ട ചർച്ച ചെയ്‌തത്‌. a

“മാഗ്നാ​കാർട്ട​യു​ടെ ചരി​ത്ര​ത്തി​ന്റെ ആദ്യഘ​ട്ട​ത്തിൽത്തന്നെ, തലമു​റകൾ അതിനെ ഭീഷണി നേരി​ടുന്ന സ്വാത​ന്ത്ര്യ​ത്തി​ന്റെ പരിപാ​ലകൻ എന്നു വ്യാഖ്യാ​നി​ച്ചു. അങ്ങനെ മാഗ്നാ​കാർട്ട ഒരു പ്രതീ​ക​വും മർദന​ത്തിന്‌ എതിരാ​യുള്ള സമരാ​ഹ്വാ​ന​വും ആയിത്തീർന്നു” എന്ന്‌ ദി എൻ​സൈ​ക്ലോ​പീ​ഡിയ ബ്രിട്ടാ​നിക്ക പ്രസ്‌താ​വി​ക്കു​ന്നു. ഈ പ്രാധാ​ന്യം കണക്കി​ലെ​ടുത്ത്‌ ഇംഗ്ലണ്ടി​ലെ പാർല​മെ​ന്റി​ന്റെ ഓരോ സെഷനും മാഗ്നാ​കാർട്ടയെ ആവർത്തി​ച്ചു സ്ഥിരീ​ക​രി​ച്ചു​കൊ​ണ്ടാണ്‌ ആരംഭി​ച്ചി​രു​ന്നത്‌.

പതി​നേ​ഴാം നൂറ്റാ​ണ്ടിൽ, ഇംഗ്ലണ്ടി​ലെ നിയമജ്ഞർ ചില വിശേ​ഷാ​വ​കാ​ശ​ങ്ങൾക്കുള്ള അടിത്ത​റ​യാ​യി മാഗ്നാ​കാർട്ട​യി​ലെ വകുപ്പു​കൾ ഉപയോ​ഗ​പ്പെ​ടു​ത്തി. ജൂറി​യു​ടെ മുമ്പാകെ വിചാരണ ലഭിക്കാ​നുള്ള അവകാശം, അന്യായ തടങ്കൽ നിരോ​ധി​ക്കുന്ന ഹേബി​യസ്‌ കോർപസ്‌ b ആക്ട്‌, നിയമ​സ​മ​ത്വം, അന്യായ അറസ്റ്റിൽ നിന്നുള്ള സ്വാത​ന്ത്ര്യം, നികുതി പിരിവു പാർല​മെ​ന്റി​ന്റെ അധീന​ത​യിൽ കൊണ്ടു​വരൽ എന്നിവ​യെ​ല്ലാം അവയിൽ ഉൾപ്പെ​ടു​ന്നു. മാഗ്നാ​കാർട്ടയെ ‘ഇംഗ്ലീ​ഷു​കാ​രു​ടെ ഭരണഘ​ട​ന​യു​ടെ വേദപു​സ്‌തകം’ എന്നാണ്‌ ബ്രിട്ടീഷ്‌ ഭരണത​ന്ത്ര​ജ്ഞ​നായ വില്യം പിറ്റ്‌ വിശേ​ഷി​പ്പി​ച്ചത്‌.

അന്വേ​ഷണം തുടരു​ന്നു

1996 മുതൽ 2000 വരെ ഇംഗ്ലണ്ടി​ലെ​യും വെയിൽസി​ലെ​യും ബഹുമാ​ന്യ ചീഫ്‌ ജസ്റ്റിസ്‌ ആയിരുന്ന ബിങ്ങാം പ്രഭു ഇങ്ങനെ തുറന്നു പറയുന്നു: “രേഖയിൽ വാസ്‌ത​വ​ത്തിൽ പറഞ്ഞി​ട്ടുള്ള കാര്യ​ങ്ങ​ളെ​ക്കാൾ പറഞ്ഞി​ട്ടുണ്ട്‌ എന്നു കരുത​പ്പെട്ട കാര്യ​ങ്ങ​ളു​ടെ അടിസ്ഥാ​ന​ത്തി​ലാണ്‌ ചരി​ത്ര​ത്തിൽ പലപ്പോ​ഴും മാഗ്നാ​കാർട്ട​യ്‌ക്ക്‌ ഭരണഘ​ട​നാ​പ​ര​മായ പ്രാധാ​ന്യം നൽകി​യി​രി​ക്കു​ന്നത്‌.” കാര്യങ്ങൾ അങ്ങനെ​യൊ​ക്കെ ആണെങ്കി​ലും, മാഗ്നാ​കാർട്ട​യോ​ടു ബന്ധപ്പെട്ട സ്വാത​ന്ത്ര്യം സംബന്ധിച്ച ആദർശങ്ങൾ കാല​ക്ര​മ​ത്തിൽ ഇംഗ്ലീഷ്‌ സംസാ​രി​ക്കുന്ന ദേശങ്ങ​ളി​ലെ​ങ്ങും വ്യാപി​ക്കു​ക​തന്നെ ചെയ്‌തു.

ഇംഗ്ലണ്ടിൽ നിന്ന്‌ 1620-ൽ, പുനര​ധി​വാ​സ​ത്തി​നാ​യി അമേരി​ക്ക​യി​ലേക്ക്‌ കപ്പൽ കയറി​യവർ മാഗ്നാ​കാർട്ട​യു​ടെ ഒരു പ്രതി​യും കൂടെ കൈയിൽ കരുതി​യി​രു​ന്നു. ഭരണകൂ​ട​ത്തിൽ അർഹമായ പ്രാതി​നി​ധ്യം നൽകാതെ തങ്ങളുടെ കയ്യിൽനി​ന്നു കരംപി​രി​ക്കു​ന്ന​തിന്‌ എതിരെ അമേരി​ക്ക​യി​ലെ ബ്രിട്ടീഷ്‌ കോള​നി​കൾ 1775-ൽ സമരം തുടങ്ങി​യ​പ്പോൾ, ഇന്ന്‌ മസാച്ചു​സെ​റ്റ്‌സ്‌ സംസ്ഥാനം എന്നറി​യ​പ്പെ​ടു​ന്നി​ടത്തെ നിയമ​സ​മി​തി അത്തരം നികു​തി​കൾ മാഗ്നാ​കാർട്ട​യു​ടെ പ്രത്യ​ക്ഷ​ലം​ഘനം ആണെന്ന്‌ വിധി​യെ​ഴു​തി. ഒരു കൈയിൽ വാളും മറു​കൈ​യിൽ മാഗ്നാ​കാർട്ട​യും പിടിച്ച ഒരു ആൾരൂപം അന്ന്‌ മസാച്ചു​സെ​റ്റ്‌സിൽ ഉപയോ​ഗി​ച്ചി​രുന്ന ഔദ്യോ​ഗിക സീലിൽ ആലേഖനം ചെയ്‌തി​രു​ന്നു.

അമേരി​ക്കൻ ഐക്യ​നാ​ടു​കൾക്ക്‌ ഒരു ഭരണഘടന മെനയാൻ ഒരുമി​ച്ചു കൂടിയ പുതു​താ​യി പിറന്ന രാജ്യ​ത്തി​ന്റെ പ്രതി​നി​ധി​കൾ, നിയമ​വാ​ഴ്‌ച​യിൻ കീഴിൽ സ്വാത​ന്ത്ര്യം എന്ന തത്ത്വം ഉയർത്തി​പ്പി​ടി​ച്ചു. ഈ തത്ത്വം സ്വാം​ശീ​ക​രി​ച്ച​തിൽ നിന്നു​മാണ്‌ അമേരി​ക്കൻ മൗലി​കാ​വ​കാശ പത്രിക ഉരുത്തി​രി​ഞ്ഞത്‌. അങ്ങനെ 1957-ൽ മാഗ്നാ​കാർട്ട​യു​ടെ അംഗീ​ക​ര​ണാർഥം റനിമിഡ്‌ പുൽത്ത​കി​ടി​യിൽ അമേരി​ക്കൻ ബാർ അസ്സോ​സി​യേഷൻ ഒരു സ്‌മാ​രകം പണിതു. അതിൽ ഇങ്ങനെ ആലേഖനം ചെയ്‌തി​രു​ന്നു: “മാഗ്നാ​കാർട്ട​യു​ടെ ഓർമ​യ്‌ക്കാ​യി—നിയമ വാഴ്‌ച​യിൻ കീഴിൽ സ്വാത​ന്ത്ര്യ​ത്തി​ന്റെ പ്രതീകം.”

അമേരി​ക്കൻ ഭരണത​ന്ത്ര​ജ്ഞ​യായ എലനർ റൂസ്‌വെൽറ്റ്‌ 1948-ൽ, ഐക്യ​രാ​ഷ്‌ട്ര സംഘട​ന​യു​ടെ സാർവ​ലൗ​കിക മനുഷ്യാ​വ​കാശ പ്രഖ്യാ​പനം എഴുതി​യു​ണ്ടാ​ക്കു​ന്ന​തിൽ സഹായി​ച്ച​പ്പോൾ, അത്‌ “മുഴു മനുഷ്യ​രാ​ശി​ക്കും വേണ്ടി​യുള്ള ഒരു അന്താരാ​ഷ്‌ട്ര മാഗ്നാ​കാർട്ട” ആയിത്തീ​രു​മെന്ന്‌ പ്രത്യാശ പ്രകടി​പ്പി​ച്ചു. തീർച്ച​യാ​യും, മനുഷ്യ​വർഗ​ത്തി​ന്റെ സ്വാത​ന്ത്ര്യ​ദാ​ഹ​ത്തി​ന്റെ തീക്ഷ്‌ണത വെളി​പ്പെ​ടു​ത്തു​ന്ന​താണ്‌ മാഗ്നാ​കാർട്ട​യു​ടെ ചരിത്രം. വിഭാ​വ​നകൾ എത്ര ഉത്‌കൃ​ഷ്ട​മാ​യി​രു​ന്നാ​ലും, ഇന്ന്‌ അനേകം നാടു​ക​ളി​ലും മനുഷ്യ​ന്റെ മൗലി​കാ​വ​കാ​ശങ്ങൾ ഭീഷണി നേരി​ടു​ക​യാണ്‌. സകലർക്കും സ്വാത​ന്ത്ര്യം ഉറപ്പാ​ക്കു​ന്ന​തിൽ മനുഷ്യ ഭരണകൂ​ടങ്ങൾ ആവർത്തി​ച്ചു പരാജ​യ​പ്പെ​ട്ടി​രി​ക്കു​ന്നു. അതു​കൊ​ണ്ടാണ്‌ ദശലക്ഷ​ക്ക​ണ​ക്കി​നു യഹോ​വ​യു​ടെ സാക്ഷികൾ തികച്ചും വിഭി​ന്ന​മായ മറ്റൊരു ഭരണകൂ​ട​ത്തി​ന്റെ നിയമ​ത്തിൻ കീഴി​ലുള്ള ശ്രേഷ്‌ഠ​മായ സ്വാത​ന്ത്ര്യ​ത്തി​നാ​യി ആകാം​ക്ഷ​യോ​ടെ നോക്കി​പ്പാർത്തി​രി​ക്കു​ന്നത്‌. ആ ഭരണകൂ​ടം ദൈവ​രാ​ജ്യ​മാണ്‌.

ദൈവത്തെ സംബന്ധിച്ച്‌ വളരെ ശ്രദ്ധേ​യ​മായ ഒരു കാര്യം ബൈബിൾ ചൂണ്ടി​ക്കാ​ണി​ക്കു​ന്നു: “യഹോ​വ​യു​ടെ ആത്മാവു​ള്ളി​ടത്ത്‌ സ്വാത​ന്ത്ര്യം ഉണ്ട്‌.” (2 കൊരി​ന്ത്യർ 3:17, NW) ദൈവ​രാ​ജ്യം ഏതുതരം സ്വാത​ന്ത്ര്യ​മാണ്‌ മനുഷ്യ​വർഗ​ത്തി​നു വാഗ്‌ദാ​നം ചെയ്യു​ന്നത്‌ എന്ന്‌ അറിയാൻ ആഗ്രഹി​ക്കു​ന്നെ​ങ്കിൽ യഹോ​വ​യു​ടെ സാക്ഷികൾ അടുത്ത തവണ നിങ്ങളെ സന്ദർശി​ക്കു​മ്പോൾ അവരോ​ടു ചോദി​ക്കു​ന്നത്‌ നല്ലതാ​യി​രി​ക്കി​ല്ലേ? വിമോ​ച​ന​ത്തി​ലേക്കു നയിക്കുന്ന സന്തോ​ഷ​ദാ​യ​ക​മായ ഉത്തരങ്ങ​ളാ​യി​രി​ക്കും നിങ്ങൾക്കു ലഭിക്കുക.

(g02 12/22)

[അടിക്കു​റി​പ്പു​കൾ]

[13-ാം പേജിലെ ചതുരം/ചിത്രം]

മഹാരേഖ

“ഇടപ്ര​ഭു​ക്ക​ന്മാ​രെ സംബന്ധി​ക്കുന്ന വകുപ്പു​കൾ” എന്ന നിലയി​ലാ​ണു മാഗ്നാ​കാർട്ട​യു​ടെ (“മഹാരേഖ” എന്നർഥം വരുന്ന ലാറ്റിൻ പ്രയോ​ഗം) തുടക്കം. 49 വകുപ്പു​ക​ളുള്ള ഈ രേഖയി​ലാണ്‌ ജോൺ രാജാവ്‌ ആദ്യം മുദ്ര പതിപ്പി​ച്ചത്‌. ഏതാനും ദിവസ​ങ്ങൾക്കു​ള്ളിൽ വകുപ്പു​ക​ളു​ടെ എണ്ണം 63 ആയി ഉയർന്നു. രാജാവ്‌ വീണ്ടും അതിൽ മുദ്ര പതിച്ചു നൽകി. 1217-ൽ ഭേദഗ​തി​ചെ​യ്‌ത്‌ ഇറക്കിയ പതിപ്പിൽ വനംവ​കുപ്പ്‌ നിയമങ്ങൾ പ്രതി​പാ​ദി​ച്ചി​ട്ടുള്ള മറ്റൊരു ചെറിയ രേഖ കൂടി ചേർത്തി​രു​ന്നു. അന്നുമു​ത​ലാണ്‌ ഈ വകുപ്പു​കൾക്ക്‌ എല്ലാം​കൂ​ടെ മാഗ്നാ​കാർട്ട എന്ന പേരു ലഭിച്ചത്‌.

ഒമ്പത്‌ വിഭാ​ഗ​ങ്ങ​ളി​ലാ​യാണ്‌ 63 വകുപ്പു​കൾ. ഇടപ്ര​ഭു​ക്ക​ന്മാ​രു​ടെ ആവലാ​തി​കൾ; നീതി​ന്യാ​യം, നിയമം എന്നിവ​യി​ലെ പരിഷ്‌കാ​രം; പള്ളിയു​ടെ സ്വാത​ന്ത്ര്യം എന്നിവ​യു​മാ​യി ബന്ധപ്പെ​ട്ട​വ​യെ​ല്ലാം അതിൽ ഉൾപ്പെ​ടു​ന്നു. ഇംഗ്ലീഷ്‌ നിയമ സംഹി​ത​യി​ലെ പൗരസ്വാ​ത​ന്ത്ര്യ​ത്തി​ന്റെ ചരി​ത്ര​പ​ര​മായ അടിസ്ഥാ​നം ഈ അവകാശ പത്രത്തി​ന്റെ 39-ാം വകുപ്പാണ്‌. അത്‌ ഇപ്രകാ​രം പറയുന്നു: “ഒരു സ്വതന്ത്ര വ്യക്തി​യെ​യും അയാളു​ടെ സമസ്ഥാ​നീ​യ​രു​ടെ നിയമാ​നു​സൃത വിധി​ന്യാ​യ​ത്തി​ന്റെ​യോ ദേശീയ നിയമ​ത്തി​ന്റെ​യോ അടിസ്ഥാ​ന​ത്തി​ല​ല്ലാ​തെ പിടി​ച്ചു​കെ​ട്ടാ​നോ തടവിൽ വെക്കാ​നോ പാടില്ല; അതു​പോ​ലെ​തന്നെ അയാളു​ടെ അവകാ​ശങ്ങൾ നിഷേ​ധി​ക്കാ​നോ സ്വത്തു കണ്ടു​കെ​ട്ടാ​നോ പാടില്ല; അയാളെ ഭ്രഷ്ടനാ​ക്കാ​നോ നാടു​ക​ട​ത്താ​നോ പാടില്ല; അയാൾക്കെ​തി​രെ ബലപ്ര​യോ​ഗ​ത്തി​നു മുതി​രാ​നോ അതിനാ​യി ആളുകളെ അയയ്‌ക്കാ​നോ പാടില്ല.”

[ചിത്രം]

പശ്ചാത്തലം: മാഗ്നാ​കാർട്ട​യു​ടെ ഭേദഗ​തി​ചെയ്‌ത മൂന്നാം പതിപ്പ്‌

[കടപ്പാട്‌]

By permission of the British Library, 46144 Exemplification of King Henry III’s reissue of Magna Carta 1225

[12-ാം പേജിലെ ചിത്രം]

ജോൺ രാജാവ്‌

[കടപ്പാട്‌]

From the book Illustrated Notes on English Church History (Vols. I and II)

[12-ാം പേജിലെ ചിത്രം]

ജോൺ രാജാവ്‌ തന്റെ കിരീടം പാപ്പാ​യു​ടെ പ്രതി​നി​ധിക്ക്‌ അടിയ​റ​വെ​ക്കു​ന്നു

[കടപ്പാട്‌]

From the book The History of Protestantism (Vol. I)

[13-ാം പേജിലെ ചിത്രം]

1215-ൽ ജോൺ രാജാ​വിന്‌ നാട്ടിലെ ഇടപ്ര​ഭു​ക്ക​ന്മാ​രെ അഭിമു​ഖീ​ക​രി​ക്കേണ്ടി വരുന്നു, മാഗ്നാ​കാർട്ട​യിൽ മുദ്ര പതിക്കാൻ രാജാവ്‌ നിർബ​ന്ധി​ത​നാ​കു​ന്നു

[കടപ്പാട്‌]

From the book The Story of Liberty, 1878

[14-ാം പേജിലെ ചിത്രം]

ഇംഗ്ലണ്ടിലെ റനിമി​ഡിൽ സ്ഥിതി​ചെ​യ്യുന്ന മാഗ്നാ​കാർട്ട സ്‌മാ​ര​കം

[കടപ്പാട്‌]

ABAJ/Stephen Hyde

[12-ാം പേജിലെ ചിത്ര​ങ്ങൾക്ക്‌ കടപ്പാട്‌]

മുകളിലെ പശ്ചാത്തലം: By permission of the British Library, Cotton Augustus II 106 Exemplification of King John’s Magna Carta 1215; ജോൺ രാജാ​വി​ന്റെ മുദ്ര: Public Record Office, London