നിങ്ങൾ സദാ നിരീ​ക്ഷ​ണ​ത്തിൻ കീഴി​ലോ?

ജോലി​സ്ഥ​ലത്ത്‌ എലിസ​ബെത്ത്‌ എല്ലായ്‌പോ​ഴും ക്യാമ​റ​യു​ടെ കണ്ണു​വെ​ട്ട​ത്താണ്‌. ഓഫീസ്‌ കെട്ടി​ട​ത്തി​ലേക്കു കടന്നാ​ലു​ടൻ ക്യാമറ തുറിച്ചു നോക്കു​ക​യാ​യി. ജോലി​ക്കി​ട​യിൽ എങ്ങോട്ടു തിരി​ഞ്ഞാ​ലും ഉണ്ട്‌ ക്യാമ​റ​യു​ടെ കഴുകൻ കണ്ണുകൾ. അവൾ ജോലി ചെയ്യു​ന്നത്‌ പ്രതി​ദി​നം ദശലക്ഷ​ക്ക​ണ​ക്കി​നു ഡോളർ കൈകാ​ര്യം ചെയ്യുന്ന ഒരു കമ്പനി​യിൽ ആയതി​നാൽ കർശന​മായ ഈ നിരീക്ഷണ സംവി​ധാ​ന​ങ്ങ​ളു​ടെ ഉദ്ദേശ്യം മനസ്സി​ലാ​ക്കാ​വു​ന്ന​തേ​യു​ള്ളൂ.

താൻ സദാ സൂക്ഷ്‌മ നിരീ​ക്ഷ​ണ​ത്തിൻ കീഴി​ലാണ്‌ എന്ന്‌ എലിസ​ബെ​ത്തി​നും അറിയാം. കാരണം അതെല്ലാം നന്നായി വിശദീ​ക​രി​ച്ചു കൊടു​ത്തി​ട്ടാണ്‌ അവളെ ജോലിക്ക്‌ എടുത്തി​രി​ക്കു​ന്നത്‌. എന്നാൽ കോടി​ക്ക​ണ​ക്കിന്‌ മറ്റാളു​ക​ളോട്‌, ദിവസ​വും അവർ ഏതെല്ലാം വിധത്തി​ലാ​ണു നിരീക്ഷണ വിധേ​യ​രാ​യി​രി​ക്കു​ന്നത്‌ എന്ന്‌ അത്ര എളുപ്പം വിശദീ​ക​രി​ച്ചു കൊടു​ക്കാ​നാ​യെന്നു വരില്ല.

 തുറന്ന കണ്ണുക​ളുള്ള ഒരു സമൂഹ​ത്തിൽ കഴിഞ്ഞു​കൂ​ടൽ

ജോലി സ്ഥലത്ത്‌ നിങ്ങൾ എല്ലായ്‌പോ​ഴും സൂക്ഷ്‌മ നിരീ​ക്ഷ​ണ​ത്തിൻ കീഴി​ലാ​ണോ? ലോക​വ്യാ​പ​ക​മാ​യി, ദശലക്ഷ​ക്ക​ണ​ക്കി​നു തൊഴി​ലാ​ളി​കൾ ജോലി​സ്ഥ​ലത്ത്‌ ഇന്റർനെ​റ്റും ഇ-മെയി​ലും ഉപയോ​ഗി​ക്കു​ന്നത്‌ സൂക്ഷ്‌മ​മാ​യി നിരീ​ക്ഷി​ക്ക​പ്പെ​ടു​ന്നു. “യു.എസ്‌.-ലെ പ്രമുഖ കമ്പനി​ക​ളിൽ മുക്കാൽ പങ്കും (73.5%) തങ്ങളുടെ ജോലി​ക്കാർ നടത്തുന്ന ഫോൺകോ​ളു​ക​ളും അവരുടെ ഇ-മെയിൽ, ഇന്റർനെറ്റ്‌ ഉപയോ​ഗ​വും മറ്റു പ്രവർത്ത​ന​ങ്ങ​ളും നിരന്തരം നിരീ​ക്ഷി​ക്കു​ന്നു, ജോലി​ക്കാ​രു​ടെ കമ്പ്യൂട്ടർ ഫയലു​ക​ളും അവർ പരി​ശോ​ധി​ക്കാ​റുണ്ട്‌” എന്ന്‌ അമേരി​ക്കൻ മാനേ​ജ്‌മെന്റ്‌ അസ്സോ​സി​യേ​ഷന്റെ 2001-ലെ സർവേ കണ്ടെത്തു​ക​യു​ണ്ടാ​യി.

നിരീക്ഷണ സാമ​ഗ്രി​കൾക്കാ​യി ഗവൺമെ​ന്റു​കൾ കോടി​ക്ക​ണ​ക്കി​നു രൂപയാ​ണു ചെലവി​ടു​ന്നത്‌. 2001 ജൂലൈ 11-ന്‌ യൂറോ​പ്യൻ പാർല​മെ​ന്റി​നു മുമ്പാകെ സമർപ്പിച്ച ഒരു റിപ്പോർട്ടു പറയുന്ന പ്രകാരം, “സംഭാ​ഷ​ണ​ങ്ങ​ളും മറ്റും ചോർത്താ​നുള്ള ഒരു ഗോളാ​ന്തര സംവി​ധാ​നം നിലവി​ലുണ്ട്‌. . . . അമേരിക്ക, ബ്രിട്ടൻ, കാനഡ, ഓസ്‌​ട്രേ​ലിയ, ന്യൂസി​ലൻഡ്‌ എന്നീ രാജ്യ​ങ്ങ​ളു​ടെ സഹകര​ണ​ത്തി​ലൂ​ടെ​യാണ്‌ ഈ ‘ടാപ്പിങ്‌’ സംവി​ധാ​നം പ്രവർത്തി​ക്കു​ന്നത്‌.” ഉപഗ്ര​ഹങ്ങൾ മുഖാ​ന്തരം റിലെ ചെയ്യ​പ്പെ​ടുന്ന ടെലി​ഫോൺ, ഫാക്‌സ്‌, ഇന്റർനെറ്റ്‌, ഇ-മെയിൽ സന്ദേശങ്ങൾ, ‘എഷലോൺ’ (ECHELON) എന്നറി​യ​പ്പെ​ടുന്ന സാറ്റ​ലൈറ്റ്‌ റിസീവർ സ്റ്റേഷനു​ക​ളു​ടെ ഒരു ഗോളാ​ന്തര നെറ്റ്‌വർക്ക്‌ സംവി​ധാ​നം ഉപയോ​ഗിച്ച്‌, ഈ ഗവണ്മെ​ന്റു​കൾ ചോർത്തു​ക​യും നിരീ​ക്ഷി​ക്കു​ക​യും ചെയ്യു​ന്ന​താ​യി റിപ്പോർട്ടു ചെയ്യ​പ്പെ​ടു​ന്നു. ഈ സംവി​ധാ​നം മുഖാ​ന്തരം ഗവണ്മെ​ന്റു​കൾക്ക്‌ “പ്രത്യേക ഫാക്‌സ്‌ സന്ദേശ​ങ്ങ​ളും ഇ-മെയി​ലു​ക​ളും തിരഞ്ഞു​പി​ടി​ക്കാ​നാ​വും. വ്യക്തി​ക​ളു​ടെ ശബ്ദം തിരി​ച്ച​റി​യുന്ന പ്രോ​ഗാം ഉപയോ​ഗിച്ച്‌ ഏതെങ്കി​ലും ഒരു പ്രത്യേക വ്യക്തി ചെയ്യുന്ന ഫോൺകോ​ളു​കൾ എല്ലാം വേർതി​രി​ക്കാ​നാ​കും” എന്ന്‌ ഓസ്‌​ട്രേ​ലി​യൻ വർത്തമാ​ന​പ്പ​ത്രം അവകാ​ശ​പ്പെ​ടു​ന്നു.

നിയമ​പാ​ല​ക​രും ഇത്തരം അത്യാ​ധു​നിക നിരീക്ഷണ സാങ്കേ​തി​ക​വി​ദ്യ​കളെ ആശ്രയി​ച്ചു പ്രവർത്തി​ക്കു​ന്നു. “ഇ-മെയി​ലു​കൾ, തത്‌ക്ഷണ സന്ദേശങ്ങൾ, ഡിജിറ്റൽ ഫോൺകോ​ളു​കൾ എന്നിവ നിരീ​ക്ഷി​ക്കാൻ സഹായി​ക്കുന്ന” ‘കാർണി​വർ’ എന്നറി​യ​പ്പെ​ടുന്ന ഒരു സാങ്കേ​തി​ക​വി​ദ്യ അമേരി​ക്ക​യി​ലെ എഫ്‌ബി​ഐ ഉപയോ​ഗി​ച്ചു വരുന്ന​താ​യി ബിസി​ന​സ്‌വീക്ക്‌ മാസിക റിപ്പോർട്ടു ചെയ്യുന്നു. അതിനി​ടെ, ബ്രിട്ട​നി​ലെ ഒരു പുതിയ നിയമം “ഫോൺ, ഫാക്‌സ്‌ മെഷീൻ, ഇന്റർനെറ്റ്‌ എന്നിവ ഉപയോ​ഗി​ക്കുന്ന ആയിര​ങ്ങളെ രഹസ്യ​മാ​യി നിരീ​ക്ഷി​ക്കു​ന്ന​തിന്‌” നിയമ​പാ​ല​കരെ അനുവ​ദി​ക്കും എന്ന്‌ ബിബിസി ന്യൂസ്‌ റിപ്പോർട്ടു ചെയ്യു​ക​യു​ണ്ടാ​യി.

മറഞ്ഞി​രി​ക്കുന്ന ക്യാമ​റ​ക​ളും വിവര​ങ്ങ​ളു​ടെ പ്രളയ​വും

ഫോൺ, ഫാക്‌സ്‌, ഇ-മെയിൽ തുടങ്ങി​യവ ഉപയോ​ഗി​ക്കാ​ത്ത​പ്പോൾ പോലും ആളുകൾ നിരീ​ക്ഷ​ണ​ത്തി​നു വിധേ​യ​രാ​യി​രു​ന്നേ​ക്കാം. ഓസ്‌​ട്രേ​ലി​യ​യി​ലെ ന്യൂ സൗത്ത്‌ വേൽസ്‌ സംസ്ഥാ​നത്ത്‌, 5,500 ക്യാമ​റ​ക​ളാണ്‌ തീവണ്ടി യാത്ര​ക്കാ​രു​ടെ ചലനങ്ങൾ നിരീ​ക്ഷി​ക്കു​ന്ന​തി​നാ​യി സ്ഥാപി​ച്ചി​രി​ക്കു​ന്നത്‌. അതേ സംസ്ഥാ​ന​ത്തു​തന്നെ 1,900 സർക്കാർ ബസുക​ളി​ലും നിരീക്ഷണ ക്യാമ​റകൾ ഘടിപ്പി​ച്ചി​ട്ടുണ്ട്‌.

നിരീക്ഷണ ക്യാമ​റ​ക​ളു​ടെ എണ്ണത്തിന്റെ ആളോ​ഹരി നോക്കി​യാൽ ബ്രിട്ട​നാണ്‌ മുന്നിൽ. അവിടെ 55 പേർക്ക്‌ ഒരു ക്യാമറ വീതം ഉണ്ടെന്നാണ്‌ ഒരു പഠനം വെളി​പ്പെ​ടു​ത്തു​ന്നത്‌. 1996-ൽ, പൊതു​സ്ഥ​ല​ങ്ങ​ളിൽ നിരീക്ഷണ ക്യാമ​റകൾ സ്ഥാപിച്ച 74 പട്ടണങ്ങൾ അല്ലെങ്കിൽ നഗരങ്ങൾ മാത്ര​മാണ്‌ ബ്രിട്ട​നിൽ ഉണ്ടായി​രു​ന്നത്‌. 1999 ആയപ്പോ​ഴേ​ക്കും അവയുടെ എണ്ണം 500 ആയി. നിരീക്ഷണ ക്യാമ​റ​ക​ളു​മാ​യി ബന്ധപ്പെ​ടു​ത്തി പുതിയ കമ്പ്യൂട്ടർ പ്രോ​ഗ്രാ​മു​കൾ ഉപയോ​ഗി​ക്കാൻ തുടങ്ങി​യ​തോ​ടെ ആളെ തിരി​ച്ച​റി​യാ​നുള്ള കഴിവു പോലും ക്യാമ​റ​കൾക്കു കൈവ​ന്നി​രി​ക്കു​ക​യാണ്‌. വിമാ​ന​ത്താ​വ​ള​ങ്ങ​ളി​ലും പൊതു​ച​ത്വ​ര​ങ്ങ​ളി​ലും മറ്റും എത്ര ആൾത്തി​ര​ക്കു​ണ്ടാ​യി​രു​ന്നാ​ലും ശരി, അന്വേ​ഷി​ക്കുന്ന ആളെ ക്യാമറ തപ്പി​യെ​ടു​ത്തു​കൊ​ള്ളും.

നിങ്ങൾ അറിയാ​തെ നിങ്ങളു​ടെ സ്വകാര്യ ജീവിതം പോലും ഒപ്പി​യെ​ടു​ക്കാൻ കഴിയും എന്ന നിലയി​ലാ​യി​രി​ക്കു​ന്നു. പ്രൈ​വസി ഇന്റർനാ​ഷണൽ എന്ന മനുഷ്യാ​വ​കാശ സംഘട​ന​യു​ടെ ഡയറക്ട​റായ സൈമൺ ഡേവീസ്‌ ഇങ്ങനെ പറയുന്നു: “പൊതു​ജ​ന​ങ്ങ​ളെ​പ്പറ്റി ഇത്രയ​ധി​കം വിവരങ്ങൾ ശേഖരിച്ച ഒരു കാലഘട്ടം ചരി​ത്ര​ത്തിൽ മുമ്പെ​ങ്ങും ഉണ്ടായി​ട്ടില്ല. വികസിത രാജ്യ​ങ്ങ​ളിൽ ഏതെങ്കി​ലും വിധത്തിൽ പണം കൈകാ​ര്യം ചെയ്യുന്ന ഏതൊരു സാധാ​ര​ണ​ക്കാ​രനെ സംബന്ധി​ച്ചു​മുള്ള വിശദാം​ശങ്ങൾ പ്രധാ​ന​പ്പെട്ട 400-ഓളം ഡേറ്റാ​ബേ​സു​ക​ളി​ലാ​യി സൂക്ഷി​ച്ചി​രി​ക്കു​ന്നു. ഓരോ​രു​ത്ത​രെ​യും സംബന്ധിച്ച്‌ ബൃഹത്തായ ഓരോ ഗവേഷണ ഗ്രന്ഥം രചിക്കാൻ മാത്ര​മുള്ള വിവരങ്ങൾ അവയി​ലുണ്ട്‌.”

സ്വകാ​ര്യ​ത നിലനി​റു​ത്താൻ നമുക്ക്‌ എന്തെല്ലാം നടപടി​കൾ സ്വീക​രി​ക്കാൻ കഴിയും? (g03 1/22)