ഞാൻ മ്യൂസിക്‌ വീഡിയോകൾ കാണണമോ?
യുവജനങ്ങൾ ചോദിക്കുന്നു . . .
ഞാൻ മ്യൂസിക്‌ വീഡിയോകൾ കാണണമോ?
“മ്യൂസിക്‌ വീഡിയോകൾ ഗംഭീരമാണ്‌. ചിലതു കൊച്ചു സിനിമകൾ പോലെയാണ്‌, അതിൽ അവർ ഒരു കഥ പറയുന്നു. അതിലെ നൃത്താവിഷ്‌കാരം എന്നെ അതിശയിപ്പിക്കാറുണ്ട്‌.”—കെയ്‌സി.
“നൂതന സംഗീത ധാരയുടെ സ്‌പന്ദനങ്ങൾ അറിയാനുള്ള നല്ലൊരു മാർഗമാണ്‌ അവ. ഏറ്റവും ജനപ്രീതി നേടുന്ന 40 സൂപ്പർഹിറ്റ്‌ സംഗീത രചനകൾക്കും അപ്പുറത്തുള്ള സംഗീത ലോകത്തേക്ക്‌ അവ നിങ്ങളെ കൊണ്ടുപോകുന്നു. മാത്രമല്ല, മ്യൂസിക്‌ വീഡിയോകൾ സംഭാഷണത്തിൽ വിളമ്പാനുള്ള രസകരമായ നുറുങ്ങുകൾ കൂടിയാണ്‌.”—ജോഷ്‌.
“മ്യൂസിക്‌ വീഡിയോയിലെ വിശദാംശങ്ങൾ എനിക്കു പ്രധാനമാണ്‌—ആരാണു പാടുന്നത്‌, അവളുടെ വേഷവിധാനം, അവളുടെ ചേഷ്ടകൾ എന്നിവയൊക്കെത്തന്നെ. ഇവയെല്ലാം ചേരുമ്പോഴാണ്‌ ഈരടികളുടെ അർഥം ഇതൾവിരിയുന്നത്‌.” —കിംബെർലി.
“എന്റെ ഏറ്റവും പ്രിയപ്പെട്ട സംഗീതവൃന്ദങ്ങൾ ഇത്തവണ എന്താണു ചെയ്യാൻ പോകുന്നതെന്നു കാണാൻ ഞാൻ ആഗ്രഹിക്കുന്നു. ആധുനിക സാങ്കേതിക വിദ്യയിലൂടെ വികസിപ്പിച്ചെടുത്ത അതിലെ അസാധാരണ ദൃശ്യ സവിശേഷതകൾ എനിക്ക്‌ ഏറെ പ്രിയപ്പെട്ടവയാണ്‌. ചില വീഡിയോകൾ ചിരിയുണർത്തുന്നവയാണ്‌. പക്ഷേ നിങ്ങൾ ജാഗ്രത പാലിക്കേണ്ടതുണ്ട്‌.”—സാം.
മ്യൂസിക്‌ വീഡിയോകൾ കാണുന്നത്‌ ഒരുപക്ഷേ നിങ്ങളും ആസ്വദിക്കുന്നുണ്ടാവാം. ആദ്യമൊക്കെ ടെലിവിഷൻ സ്‌ക്രീനിൽ പ്രത്യക്ഷപ്പെട്ട മ്യൂസിക്‌ വീഡിയോകൾ താരതമ്യേന കുറഞ്ഞ ചെലവിൽ ലളിതമായി നിർമിച്ചവയായിരുന്നു. എന്നാൽ ഇവ തകൃതിയായി വിറ്റഴിക്കപ്പെടുകയും ആളുകൾക്ക്‌ അതിനോടു താത്‌കാലികമായ കമ്പമല്ല ഉള്ളത്‌ എന്നു വ്യക്തമാകുകയും ചെയ്‌തതോടെ, അവ കലാപരമായും സാങ്കേതികമായും ഒന്നിനൊന്നു സങ്കീർണതകൾ നിറഞ്ഞതായി മാറാൻ പിന്നെ അധികനാൾ വേണ്ടിവന്നില്ല. അവ ഇന്ന്‌ സംഗീത ലോകത്തിന്റെ ഒരു അവിഭാജ്യഘടകമാണ്‌. മാത്രമല്ല, യുവജനങ്ങൾക്ക്‌ ഇതൊരു ഹരമായി മാറിയിരിക്കുന്നു. ചില രാജ്യങ്ങളിൽ മ്യൂസിക്‌ വീഡിയോകൾ പ്രക്ഷേപണം ചെയ്യാനായി മാത്രം ടിവി സ്റ്റേഷനുകൾ പ്രവർത്തിക്കുന്നുണ്ട്‌!
എന്നാൽ ഇവ കാണുന്നതിൽ ജാഗ്രത പാലിക്കേണ്ടതുണ്ടെന്ന്‌ ഇവിടെ പരാമർശിച്ച സാമിനെപ്പോലെയുള്ള ചെറുപ്പക്കാർ പറയുന്നത്‌ എന്തുകൊണ്ടാണ്‌? ചില മ്യൂസിക്‌ വീഡിയോകൾ ഒരുപക്ഷേ നിങ്ങളുടെ ചിന്തകളെയും ധാർമിക മൂല്യങ്ങളെയും ദുഷിപ്പിക്കുകയും സ്രഷ്ടാവുമായുള്ള നിങ്ങളുടെ ബന്ധത്തെ തകരാറിലാക്കുകപോലും ചെയ്‌തുകൊണ്ട്‌ നിങ്ങളിൽ മോശമായ ഫലം ഉളവാക്കിയേക്കും എന്നതിനാലാണോ അത്‌? ഓ, ഇത്രത്തോളമൊക്കെ കടന്നു ചിന്തിക്കേണ്ടതുണ്ടോ എന്ന്‌ ഒരുപക്ഷേ നിങ്ങൾ വിചാരിച്ചേക്കാം. എന്നാൽ ഒരു നിമിഷം ചിന്തിക്കുക. നിങ്ങൾ ഒരു തടാകത്തിലോ സമുദ്രത്തിലോ നീന്താൻ പോകുമ്പോൾ, അവിടെ നീന്തുന്നത്‌ അപകടമാണ്‌ എന്ന്‌ എഴുതി വെച്ചിരിക്കുന്ന ബോർഡുകൾ നിങ്ങൾ കാണുന്നു എന്നിരിക്കട്ടെ. ആ മുന്നറിയിപ്പുകൾ അവഗണിക്കുന്നതു ബുദ്ധിയായിരിക്കുമോ? ഒരിക്കലുമല്ല. അതുപോലെതന്നെ മ്യൂസിക്‌ വീഡിയോകൾ വീക്ഷിക്കുന്നതു സംബന്ധിച്ചുള്ള ചില മുന്നറിയിപ്പുകൾക്കു ചെവികൊടുക്കുന്നതും നിങ്ങളുടെ ഭാഗത്തു ബുദ്ധിയായിരിക്കും.
അപകട മേഖലകൾ
കാണുന്നതും കേൾക്കുന്നതുമായ കാര്യങ്ങൾക്ക്‌ നിങ്ങളെ ബാധിക്കാൻ കഴിയും എന്ന വസ്‌തുത നിങ്ങൾ തിരിച്ചറിയേണ്ടതുണ്ട്‌. ഇസ്രായേലിലെ ആദ്യത്തെ രാജാവായ ശൗൽ സംഗീതം പ്രയോജനകരമായ വിധത്തിൽ ഉപയോഗിച്ചെന്നു ബൈബിൾ പറയുന്നു. സംഗീതം അവന്റെ വികാരങ്ങളെ ശാന്തമാക്കി. (1 ശമൂവേൽ 16:14-23) സംഗീതത്തിനു ദൂഷ്യഫലങ്ങളും ഉണ്ടോ? റോക്ക്‌ ആൻഡ്‌ റോൾ—അതിന്റെ ചരിത്രവും ശൈലിയിൽ വന്ന വികാസവും (ഇംഗ്ലീഷ്‌) എന്ന പുസ്‌തകം പിൻവരുന്ന പ്രകാരം പറയുന്നു: “സംഗീതത്തിന്‌ ചില സമയങ്ങളിൽ ശക്തമായ സ്വാധീനം ചെലുത്താൻ കഴിയുമെന്നും എന്നാൽ ചിലപ്പോൾ അതിന്‌ ഒരു സ്വാധീനവും ചെലുത്താൻ കഴിയില്ല എന്നും ഒരുവനു പറയാനാവില്ല. റോക്ക്‌ സംഗീതത്തിന്‌ നല്ല ഫലങ്ങൾ ഉണ്ടെന്നു നമ്മൾ സമ്മതിക്കുന്നുണ്ടെങ്കിൽ അതിനു ദൂഷ്യഫലങ്ങളും ഉണ്ടെന്നു നമ്മൾ സമ്മതിക്കേണ്ടിയിരിക്കുന്നു. ‘ഞാൻ സംഗീതമൊക്കെ കേൾക്കുന്നുണ്ടെങ്കിലും അത്‌ എന്നെ ഒരു തരത്തിലും ബാധിക്കുന്നില്ല’ എന്ന്‌ അഹംഭാവത്തോടെ പറയുന്ന ഒരു വ്യക്തി ഒന്നുകിൽ തീർത്തും ബുദ്ധിശൂന്യനാണ്‌ അല്ലെങ്കിൽ കാര്യങ്ങളെ കുറിച്ചു തികച്ചും അജ്ഞനാണ്‌.”
കണ്ണിനു നമ്മുടെ ചിന്തകളുടെയും വികാരങ്ങളുടെയുംമേൽ സ്വാധീനം ചെലുത്താൻ കഴിയും എന്നു ബൈബിൾ ആവർത്തിച്ചു വ്യക്തമാക്കുന്നു. (സദൃശവാക്യങ്ങൾ 27:20; 1 യോഹന്നാൻ 2:16) വളരെ സ്വാധീന ശക്തിയുള്ള ദൃശ്യങ്ങൾ സംഗീതത്തോടു കൂട്ടിച്ചേർത്തുകൊണ്ട്‌ വീഡിയോ നിർമാതാക്കൾ ശ്രോതാക്കളിൽ സംഗീതത്തിനുള്ള സ്വാധീനം ശ്രദ്ധേയമാം വിധം വർധിപ്പിക്കുകയാണു ചെയ്യുന്നത്‌. ഏതുതരം ദൃശ്യങ്ങളാണു സാധാരണ ഉപയോഗിക്കുന്നത്‌?
ഒരു പഠനം വെളിപ്പെടുത്തുന്ന പ്രകാരം, ഏതാണ്ട്‌ 57 ശതമാനം റോക്ക്‌ വീഡിയോകളും അക്രമങ്ങൾ നിറഞ്ഞവയാണ്‌. ആ വീഡിയോകളുടെ ഏതാണ്ട്‌ 76 ശതമാനത്തിലും ലൈംഗിക ക്രിയകൾ പ്രദർശിപ്പിക്കുന്നു. അടുത്തകാലത്തെ മറ്റൊരു പഠനം അനുസരിച്ച്‌, കഥ പറയുന്ന വീഡിയോകളിൽ 75 ശതമാനത്തിലും ലൈംഗിക ദൃശ്യങ്ങളുടെ അവതരണം ഉൾപ്പെടുന്നു. ഈ വീഡിയോകളുടെതന്നെ പകുതിയിലധികവും പ്രധാനമായും സ്‌ത്രീകൾക്ക്‌ എതിരെയുള്ള അക്രമത്തെ ചിത്രീകരിക്കുന്നവയാണ്‌. ഈ സംഗതികളെല്ലാം പരിചിന്തിച്ച സ്ഥിതിക്ക്‌ നിങ്ങൾക്ക്‌ എന്തു തോന്നുന്നു, ഇത്തരത്തിലുള്ള വീഡിയോകൾ വീക്ഷിക്കുന്നത്‌ നിങ്ങൾക്കു ദോഷം ചെയ്യുമോ? ഒരു മാസിക ഇപ്രകാരം റിപ്പോർട്ടു ചെയ്യുന്നു: “മ്യൂസിക്‌ വീഡിയോകൾ കാണുന്നത്‌ വളരെ ചെറിയ പ്രായത്തിൽത്തന്നെയുള്ള ലൈംഗികത, അപകടകരമായ ലൈംഗികത ഇവ സംബന്ധിച്ചുള്ള കൗമാരപ്രായക്കാരുടെ മനോഭാവങ്ങളെ സ്വാധീനിക്കാൻ ഇടയുണ്ടെന്ന്‌ പരീക്ഷണാർഥം നടത്തിയ പഠനങ്ങൾ തെളിയിക്കുന്നു.” തങ്ങളുടെ മുൻഗാമികളെയും സമകാലികരെയും മറികടന്നുകൊണ്ട്‌ കൂടുതൽ ഞെട്ടിക്കുന്ന രീതിയിൽ സംഗീതം അവതരിപ്പിക്കാൻ സംഗീതജ്ഞർ ശ്രമിക്കുമ്പോൾ മ്യൂസിക്‌ വീഡിയോകൾ കൂടുതൽ കൂടുതൽ വർണനകൾ നിറഞ്ഞതായി മാറുന്നു.
വിദ്യാഭ്യാസ മേഖലയിലെ ഒരു വിദഗ്‌ധൻ ഇങ്ങനെ അഭിപ്രായപ്പെടുന്നു: “തങ്ങൾ കേൾക്കുകയും മ്യൂസിക്‌ വീഡിയോകളിൽക്കൂടി കാണുകയും ചെയ്യുന്ന സംഗീതം, കഴിഞ്ഞ തലമുറകളെ സ്വാധീനിച്ചിരുന്ന സംഗീതത്തിൽനിന്ന്‌ ഒട്ടും വ്യത്യസ്‌തമല്ല എന്നു ചിലർ വാദിക്കുന്നു . . . എന്നാൽ ഇന്നത്തെ മിക്ക കലാകാരന്മാരും തങ്ങളുടെ ഉത്‌പന്നങ്ങൾ വിറ്റഴിക്കാനുള്ള ശ്രമത്തിന്റെ ഭാഗമായി ധിക്കാരപൂർവം അധാർമികതയും ഘോരതയും അവയിൽ കുത്തിനിറയ്‌ക്കുന്നതായി കാണുന്നു.” ഒരു പ്രത്യേക മ്യൂസിക്‌ വീഡിയോ ചാനൽ വീക്ഷിക്കുന്നവരെ കുറിച്ച്‌ ഷിക്കാഗോ മാസിക ഇപ്രകാരം പറയുന്നു: “തീർത്തും പച്ചയല്ലെങ്കിലും കാര്യമായ മറയില്ലാത്ത അശ്ലീലത്തിന്റെ തോരാത്ത ഒരു പെയ്‌ത്താണ്‌ അവർക്കു കിട്ടുന്നത്‌.”
ഷിക്കാഗോ മാസിക ഒരു മ്യൂസിക്‌ വീഡിയോയുടെ ഉള്ളടക്കത്തെ ഇപ്രകാരം വിവരിക്കുന്നു: “ഒരു റെസ്റ്ററന്റിൽ ഇരിക്കുന്ന ചെറുപ്പക്കാരൻ പിന്നിലേക്കു തലചായ്‌ക്കുമ്പോൾ രക്തവർണത്തിലുള്ള ആഴത്തിലുള്ള ഒരു വലിയ മുറിവ്‌ അവന്റെ കഴുത്തിൽ പ്രത്യക്ഷപ്പെടുന്നു, അവന്റെ തല മുറിഞ്ഞു താഴെ വീഴുന്നു.” മറ്റൊരു വീഡിയോയിൽ രക്തം നിറഞ്ഞ ഒരു വിവസ്‌ത്രീകരണ രംഗം കാണിക്കുകയുണ്ടായി. അതിൽ ഒരാൾ തന്റെ വസ്‌ത്രങ്ങൾ ഒന്നൊന്നായി അഴിച്ചു മാറ്റുന്നു. തുടർന്ന്‌ അയാൾ തന്റെ മാംസവും പേശികളും കൂടെ നീക്കം ചെയ്യുന്നു. മറ്റു ചില കാര്യങ്ങൾ ഇവിടെ പരാമർശിക്കാൻപോലും പറ്റാത്തവിധം ബീഭത്സമാണ്‌.
ഇവിടെ വർണിച്ചിരിക്കുന്ന ഈ വീഡിയോകൾ അങ്ങേയറ്റം അതിരുകടന്നവയാണെന്നും എന്നാൽ ഒട്ടുമിക്കവയും വലിയ കുഴപ്പമില്ലാത്തവയാണെന്നും പറഞ്ഞുകൊണ്ട്‌ ചിലർ ഈ വസ്‌തുതകൾ അവഗണിച്ചു കളഞ്ഞേക്കാം. എന്തിന്‌, മ്യൂസിക്‌ വീഡിയോകൾ പ്രത്യേകിച്ച്‌ ഞെട്ടിപ്പിക്കുന്നവയോ വെറുപ്പുളവാക്കുന്നവയോ ആയി തങ്ങൾക്കു തോന്നുന്നില്ലെന്നുപോലും ചിലർ വാദിച്ചേക്കാം. എന്നാൽ, ഇത്തരം വീഡിയോകൾ തുടർച്ചയായി വീക്ഷിച്ചതുമൂലം ആളുകളുടെ മനസ്സു തഴമ്പിച്ചുപോയി എന്നല്ലേ അതു കാണിക്കുന്നത്‌? തുടക്കത്തിൽ പരാമർശിച്ച കെയ്‌സി എന്ന യുവാവ്‌ ഇങ്ങനെ സമ്മതിക്കുന്നു: “നിങ്ങൾ വീക്ഷിക്കുന്ന കാര്യങ്ങൾക്കു പരിധികൾ വെക്കുന്നില്ലെങ്കിൽ ആദ്യമൊക്കെ വളരെ നികൃഷ്ടമെന്നു നിങ്ങൾക്കു തോന്നിയിരുന്ന കാര്യങ്ങൾ ക്രമേണ വളരെ സാധാരണമായി തോന്നും. അറിയാതെതന്നെ, നിങ്ങൾ ഒരു പടി കൂടി അതിരുകടന്നവയ്‌ക്കായി കാംക്ഷിക്കുന്നു. ഞെട്ടിക്കുന്നതായി മുമ്പ്‌ കരുതിയവയെ നിങ്ങൾ മെല്ലെ അംഗീകരിച്ചു തുടങ്ങുന്നു.”
ഇതിന്റെ ഫലം എന്തായിരിക്കും? ധാർമിക കാര്യങ്ങളിൽ ശരിയായ തീരുമാനങ്ങൾ എടുക്കാനുള്ള നിങ്ങളുടെ കഴിവ്‌ ഗുരുതരമായി തകരാറിലാകുന്നു. നമ്മുടെ മനസ്സ്‌ മോശമായി സ്വാധീനിക്കപ്പെടാൻ വളരെ എളുപ്പമായതുകൊണ്ട്‌ ബൈബിൾ നമ്മെ ഇങ്ങനെ ഉദ്‌ബോധിപ്പിക്കുന്നു: “പ്രായോഗിക ജ്ഞാനവും ചിന്താപ്രാപ്‌തിയും കാത്തുസൂക്ഷിക്കുക.” (സദൃശവാക്യങ്ങൾ 3:21, NW; 5:2, NW) യഹോവയാം ദൈവവുമായുള്ള നിങ്ങളുടെ സൗഹൃദത്തിനു കോട്ടം തട്ടും എന്നതാണ്‌ മറ്റൊരു ദൂഷ്യഫലം. അതല്ലേ നിങ്ങൾക്കുള്ള ഏറ്റവും വിലപ്പെട്ട സ്വത്ത്‌? അതുകൊണ്ട്‌ അനുചിതമായ ഏതുതരം വിനോദവും ഒഴിവാക്കാനായി നടപടികൾ സ്വീകരിച്ചുകൊണ്ട്‌ യഹോവയുമായുള്ള സുഹൃദ്‌ബന്ധം നിങ്ങൾ കാത്തുസൂക്ഷിക്കേണ്ടതുണ്ട്‌. നിങ്ങൾക്ക്‌ അത്‌ എങ്ങനെ ചെയ്യാൻ കഴിയും?
നിങ്ങളെത്തന്നെ സംരക്ഷിക്കുക
ബൈബിൾ വ്യക്തമായി കുറ്റം വിധിക്കുന്ന സംഗതികളെ ചിത്രീകരിക്കുന്ന രംഗങ്ങൾ വീക്ഷിക്കുന്നതു തെറ്റാണ്‌ എന്ന വസ്‌തുത ആദ്യം തന്നെ ദയവായി അംഗീകരിക്കുക. (സങ്കീർത്തനം 11:5, NW; ഗലാത്യർ 5:19-21; വെളിപ്പാടു 21:8) ‘വിശുദ്ധരായ ആളുകൾക്കു ചേരാത്ത’ കാര്യങ്ങളാണ്‌ ഒരു വീഡിയോയിൽ ഉള്ളതെങ്കിൽ അതു കാണുന്നതു നിറുത്താൻ നിങ്ങൾ ദൃഢനിശ്ചയം ഉള്ളവരായിരിക്കണം. (എഫെസ്യർ 5:3, 4) വളരെ ആവേശകരമായ ഒരു വീഡിയോ കണ്ടുകൊണ്ടിരിക്കുമ്പോൾ ചാനൽ മാറ്റാനോ ടിവി നിറുത്താനോ അത്ര എളുപ്പമല്ല എന്നതു ശരിതന്നെ. അതുകൊണ്ട്‌ “വ്യർത്ഥതകളിൽനിന്ന്‌ എന്റെ ദൃഷ്ടി തിരിക്കണമേ” എന്ന്‌ എഴുതിയ സങ്കീർത്തനക്കാരനെപ്പോലെ നിങ്ങളും പ്രാർഥിക്കേണ്ടതുണ്ടായിരിക്കാം: —സങ്കീർത്തനം 119:37, പി.ഒ.സി. ബൈബിൾ.
മുമ്പ്‌ വിവരിച്ചവയുടെ അത്രയും ഞെട്ടിക്കുന്ന രംഗങ്ങളുള്ള വീഡിയോകൾ കാണുന്നതിൽ നിന്നു സ്വാഭാവികമായിത്തന്നെ നിങ്ങൾ പിന്തിരിഞ്ഞേക്കാം. എന്നിരുന്നാലും, ചില വീഡിയോകളുടെ അവതരണരീതി വളരെ തന്ത്രപരമാണ്‌. അതിലെ ലൈംഗിക രംഗങ്ങൾ ക്ഷണികമോ നൊടിയിടയിൽ മാഞ്ഞുപോകുന്നതോ ആയിരിക്കാം. അവയിലെ ഈരടികളും ദൃശ്യങ്ങളുമൊക്കെ ദൈവികമല്ലാത്ത ചില വീക്ഷണങ്ങൾ ഉന്നമിപ്പിക്കുന്നതിനായി, വിദഗ്‌ധമായി മെനഞ്ഞെടുത്തവ ആയിരിക്കാമെങ്കിലും ആ വീക്ഷണങ്ങളെ കുറിച്ച്‌ സ്‌പഷ്ടമായി യാതൊന്നും പറയുകയോ കാണിക്കുകയോ ചെയ്‌തെന്നു വരില്ല. ഒരു പ്രത്യേക വീഡിയോ വീക്ഷിച്ചശേഷം നിങ്ങൾക്ക്‌ അൽപ്പമെങ്കിലും കുറ്റബോധം തോന്നുന്നെങ്കിൽ നിങ്ങൾ കണ്ട കാര്യങ്ങൾ ഏതെങ്കിലും വിധത്തിൽ അനാരോഗ്യകരമോ ക്രിസ്‌തീയവിരുദ്ധമോ ആയിരുന്നിരിക്കാനാണു സാധ്യത. ഔചിത്യത്തിന്റെ മാനദണ്ഡങ്ങൾ വ്യക്തമല്ലാത്തപ്പോൾ ഏതു വീക്ഷിക്കണം ഏത്‌ ഒഴിവാക്കണം എന്നതു സംബന്ധിച്ച്‌ നിങ്ങൾക്ക്‌ എങ്ങനെയാണ്‌ ഒരു തീരുമാനമെടുക്കാൻ കഴിയുക?
തീർച്ചയായും, നിങ്ങൾ മ്യൂസിക്‌ വീഡിയോകൾ കാണേണ്ടതുണ്ടോ എന്നത്‌ നിങ്ങളുടെയും മാതാപിതാക്കളുടെയും വ്യക്തിപരമായ തീരുമാനമാണ്‌. നിങ്ങൾ എന്തു കാണണം എന്തു കാണരുത്‌ എന്നീ കാര്യങ്ങളിൽ തീരുമാനങ്ങൾ എടുക്കാൻ മാതാപിതാക്കൾക്ക്‌ ഉത്തരവാദിത്വമുണ്ട്‌. (എഫെസ്യർ 6:1-3) എന്നാൽ മ്യൂസിക്‌ വീഡിയോകൾ കാണാൻ മാതാപിതാക്കൾ നിങ്ങൾക്ക്‌ അനുമതി നൽകുന്നെങ്കിൽത്തന്നെ നിങ്ങൾക്ക്‌ ഒരു കാര്യം ശരിയായി തോന്നുന്നു എന്നതുകൊണ്ടു മാത്രം അതു ചെയ്യരുത്‌. പകരം, ‘നന്മതിന്മകളെ വേർതിരിച്ചറിയാൻ തക്കവണ്ണം നമ്മുടെ ഗ്രഹണപ്രാപ്‌തികളെ പരിശീലിപ്പിക്കാൻ’ എബ്രായർ 5:14 നമ്മെ പ്രോത്സാഹിപ്പിക്കുന്നു. യഹോവയുടെ വീക്ഷണത്തിൽ നന്മയേത്‌ തിന്മയേത്‌ എന്നു തീരുമാനിക്കാനുള്ള ഒരു അടിസ്ഥാനം പ്രദാനം ചെയ്യുന്ന ബൈബിൾ തത്ത്വങ്ങളുടെ പഠനത്താൽ നമ്മുടെ ഗ്രഹണപ്രാപ്‌തികൾ പരിശീലിപ്പിക്കപ്പെടുന്നു. അത്തരം ബൈബിൾ തത്ത്വങ്ങളെ കുറിച്ചു ധ്യാനിക്കുന്നതു മുഖേന, ഒരു പ്രത്യേക സന്ദർഭത്തിൽ നിങ്ങളെ നയിക്കാൻ നിശ്ചിത ബൈബിൾ മാർഗനിർദേശം ഇല്ലെങ്കിൽപ്പോലും നിങ്ങളുടെ ആത്മീയ ആരോഗ്യത്തിനു വിപത്‌കരമായത്‌ എന്താണെന്നു തിരിച്ചറിയാൻ നിങ്ങൾക്കു കഴിയും.
അങ്ങനെയെങ്കിൽ, മ്യൂസിക്‌ വീഡിയോകൾ കാണുന്നതു സംബന്ധിച്ച്‌ ഏതു ബൈബിൾ തത്ത്വങ്ങൾക്കു നിങ്ങളെ നയിക്കാൻ കഴിയും? ഒരു ഭാവിലേഖനത്തിൽ ഇതു ചർച്ച ചെയ്യുന്നതായിരിക്കും. (g03 2/22)
[22-ാം പേജിലെ ആകർഷക വാക്യം]
“‘ഞാൻ സംഗീതമൊക്കെ കേൾക്കുന്നുണ്ടെങ്കിലും അത്‌ എന്നെ ഒരുതരത്തിലും ബാധിക്കുന്നില്ല’ എന്ന്‌ അഹംഭാവത്തോടെ പറയുന്ന ഒരു വ്യക്തി ഒന്നുകിൽ തീർത്തും ബുദ്ധിശൂന്യനാണ്‌ അല്ലെങ്കിൽ കാര്യങ്ങളെ കുറിച്ചു തികച്ചും അജ്ഞനാണ്‌”
[23-ാം പേജിലെ ചിത്രങ്ങൾ]
അനാരോഗ്യകരമായ എന്തെങ്കിലും വീക്ഷിച്ചിട്ട്‌ യഥാർഥത്തിൽ അതിനാൽ ബാധിക്കപ്പെടാതിരിക്കാൻ നിങ്ങൾക്കു കഴിയുമോ?