ലോകത്തെ വീക്ഷിക്കൽ

അധഃപ​തി​ക്കുന്ന പെരു​മാറ്റ മര്യാ​ദ​കൾ

“ജപ്പാൻ ജനതയു​ടെ പെരു​മാറ്റ മര്യാ​ദകൾ അധഃപ​തി​ച്ചി​രി​ക്കു​ന്നു.” ദ യോമി​യു​രി ഷിംബുൻ വർത്തമാ​ന​പ​ത്രം അടുത്ത​കാ​ലത്തു നടത്തിയ ഒരു സർവേ​യിൽ പങ്കെടുത്ത 2,000-ത്തോളം പേരിൽ ഏതാണ്ട്‌ 90 ശതമാ​ന​വും പ്രതി​ക​രി​ച്ചത്‌ അങ്ങനെ​യാ​യി​രു​ന്നു. അസഹ്യ​പ്പെ​ടു​ത്തു​ന്ന​താ​യി അവർ കണ്ടെത്തി​യത്‌ എന്താണ്‌? “സിഗരറ്റു കുറ്റികൾ, ച്യൂയിങ്‌ ഗം, പാനീ​യങ്ങൾ വരുന്ന കാനുകൾ തുടങ്ങി​യവ ആളുകൾ അലക്ഷ്യ​മാ​യി വലി​ച്ചെ​റി​യു​ന്നത്‌” തങ്ങളെ അസ്വസ്ഥ​രാ​ക്കു​ന്ന​താ​യി 68 ശതമാനം പേർ അഭി​പ്രാ​യ​പ്പെട്ടു. ബഹളം വെക്കുന്ന കുട്ടി​കളെ അച്ചടക്കം ശീലി​പ്പി​ക്കു​ന്ന​തിൽ മാതാ​പി​താ​ക്കൾ പരാജ​യ​പ്പെ​ടു​ന്ന​താ​യി പകുതി​യി​ല​ധി​കം പേരും ചൂണ്ടി​ക്കാ​ണി​ച്ചു. പൊതു​സ്ഥ​ലത്തെ സെല്ലു​ലാർ ഫോൺ ഉപയോ​ഗ​വും ഓമന​മൃ​ഗ​ങ്ങ​ളു​ടെ വിസർജ്യം കോരി​ക്ക​ള​യാ​ത്ത​തും അനുചി​ത​മാ​യി കാറും സൈക്കി​ളും പാർക്കു ചെയ്യു​ന്ന​തും പരാതി​യു​ടെ പട്ടിക​യിൽപ്പെ​ടു​ന്നു. അപമര്യാ​ദ​യു​ടെ കാര്യ​ത്തിൽ ഏറ്റവും അധികം വിമർശി​ക്ക​പ്പെ​ട്ടത്‌ യുവജ​ന​ങ്ങ​ളാണ്‌. “സർവേ​യിൽ പങ്കെടുത്ത 20-നും 40-നും മധ്യേ പ്രായ​മു​ള്ള​വ​രിൽ 66 ശതമാനം പേർ മിഡിൽ സ്‌കൂൾ-ഹൈസ്‌കൂൾ വിദ്യാർഥി​ക​ളു​ടെ ഇടയിലെ മോശ​മായ പെരു​മാറ്റ മര്യാ​ദ​കളെ അപലപി​ച്ചു.” (g03 2/08)

 ‘തലച്ചോ​റിന്‌ നുണപ​റ​ച്ചിൽ ബുദ്ധി​മു​ട്ടു​പി​ടിച്ച പണിയാണ്‌’

സത്യം പറയു​ന്ന​തി​നെ​ക്കാൾ നുണപ​റ​യു​മ്പോൾ തലച്ചോ​റിന്‌ നന്നേ ക്ലേശി​ക്കേണ്ടി വരുന്നു എന്ന്‌ പെൻസിൽവേ​നിയ സർവക​ലാ​ശാ​ല​യി​ലെ ഗവേഷകർ കണ്ടെത്തി​യി​രി​ക്കു​ന്നു. ഒരാൾ നുണ പറയു​മ്പോൾ മസ്‌തി​ഷ്‌ക​ത്തി​ലെ ഏതെല്ലാം ഭാഗങ്ങ​ളാ​ണു സജീവ​മാ​കു​ന്നത്‌ എന്നു തിരി​ച്ച​റി​യാൻ ഫങ്‌ഷണൽ മാഗ്നറ്റിക്‌ റെസൊ​ണൻസ്‌ ഇമേജിങ്‌ (fMRI) മെഷീൻ ഉപയോ​ഗിച്ച്‌ ഡോക്ടർ ഡാനി​യേൽ ലാങ്‌ലേബൻ ഈ പ്രതി​ഭാ​സത്തെ പഠിച്ചു​വ​രി​ക​യാ​യി​രു​ന്നു. ഒരു ചോദ്യ​ത്തെ അഭിമു​ഖീ​ക​രി​ക്കു​മ്പോൾ നമ്മുടെ മസ്‌തി​ഷ്‌ക​ത്തിന്‌ ആദ്യം അതിനെ വിശക​ലനം ചെയ്യേ​ണ്ട​തുണ്ട്‌. അതേത്തു​ടർന്ന്‌, “നുണ കെട്ടി​ച്ച​മ​യ്‌ക്കു​ന്ന​തി​നോ പറയു​ന്ന​തി​നോ മുമ്പ്‌ ഒരു നുണയൻ ആദ്യം ചിന്തി​ക്കു​ന്നത്‌ സ്വാഭാ​വി​ക​മാ​യും സത്യസ​ന്ധ​മായ ഉത്തരത്തെ കുറി​ച്ചാ​യി​രി​ക്കും” എന്ന്‌ മെക്‌സി​ക്കോ സിറ്റി​യി​ലെ വർത്തമാ​ന​പ​ത്ര​മായ ദ ന്യൂസ്‌ റിപ്പോർട്ടു ചെയ്യുന്നു. “ശ്രമം കൂടാതെ തലച്ചോ​റിൽ നിന്ന്‌ ഒരിക്ക​ലും ഒരു ഉത്തരം പ്രതീ​ക്ഷി​ക്കേണ്ട,” ലാങ്‌ലേബൻ പറയുന്നു. “സത്യം പറയു​ന്ന​തി​നെ​ക്കാൾ നുണ പറയുന്ന പ്രക്രി​യ​യാണ്‌ കൂടുതൽ സങ്കീർണം, അതിന്‌ നാഡീ​കോ​ശങ്ങൾ കൂടു​ത​ലാ​യി പ്രവർത്തി​ക്കേ​ണ്ടി​വ​രു​ന്നു.” വർധിച്ച ഈ പ്രവർത്തനം fMRI മെഷീ​നിൽ കൂടി നിരീ​ക്ഷി​ച്ചാൽ തലച്ചോ​റി​ന്റെ ചില ഭാഗങ്ങൾ ഒരു ബൾബു​പോ​ലെ പ്രകാ​ശി​ക്കു​ന്നതു കാണാം. “എത്ര വാചാ​ല​നായ നുണയ​ന്റെ​യും തലച്ചോ​റിന്‌ നുണപ​റ​ച്ചിൽ ബുദ്ധി​മു​ട്ടു​പി​ടിച്ച പണിത​ന്നെ​യാണ്‌,” പത്രം പറയുന്നു. (g03 2/22)

തൊഴിൽ സ്ഥലത്തെ “പീഡനം”

സ്‌പെ​യി​നിൽ ആളുകൾ ജോലി​ക്കു ഹാജരാ​കു​ന്ന​തിൽ വീഴ്‌ച വരുത്തു​ന്ന​തി​ന്റെ പ്രധാന കാരണം “മാനസിക പീഡനം” ആണെന്ന്‌ എൽ പായിസ്‌ സേമാ​നാൽ എന്ന മാസിക റിപ്പോർട്ടു ചെയ്യുന്നു. സ്‌പെ​യി​നിൽ 20 ലക്ഷത്തി​ല​ധി​കം തൊഴി​ലാ​ളി​കൾ തൊഴിൽ സ്ഥലത്തെ നിരന്തര പീഡനം സഹിക്കു​ന്നു. മനഃശാ​സ്‌ത്ര​ജ്ഞ​നായ ഇന്യാക്കി പിനി​വെൽ പറയു​ന്ന​ത​നു​സ​രിച്ച്‌ പീഡന​ത്തിന്‌ ഇരയാ​കു​ന്നവർ ഏറെയും തൊഴി​ലിൽ മിടു​ക്ക​രാണ്‌. തൊഴി​ലി​ലെ അവരുടെ പ്രാവീ​ണ്യം മറ്റുള്ള​വ​രിൽ അസൂയ ജനിപ്പി​ക്കു​ന്ന​താ​ണു പ്രശ്‌നം. അങ്ങനെ​യു​ള്ള​വരെ അവമതി​ക്കാ​നാ​യി സഹപ്ര​വർത്തകർ അവരുടെ ജോലി പിടി​ച്ചു​വെ​ക്കു​ക​യും സംഭാ​ഷ​ണ​ങ്ങ​ളിൽനിന്ന്‌ അവരെ ഒഴിവാ​ക്കു​ക​യും കണ്ടില്ലെന്ന മട്ടിൽ കടന്നു പോകു​ക​യും മറ്റും ചെയ്യാ​റുണ്ട്‌. അതുമ​ല്ലെ​ങ്കിൽ അവരെ നിരന്തരം വിമർശി​ക്കു​ക​യോ അവരുടെ ആത്മാഭി​മാ​ന​ത്തി​നു ക്ഷതമേൽപ്പി​ക്കും​വി​ധം അപശ്രു​തി​കൾ പ്രചരി​പ്പി​ക്കു​ക​യോ ചെയ്യുന്നു. “യൂറോ​പ്പി​ലെ ഇരുപതു ശതമാനം ആത്മഹത്യ​ക​ളും ഇതുമാ​യി ബന്ധപ്പെ​ട്ടി​രി​ക്കു​ന്ന​താ​യി കണക്കാ​ക്ക​പ്പെ​ടു​ന്നു” എന്ന്‌ റിപ്പോർട്ടു പ്രസ്‌താ​വി​ക്കു​ന്നു. എന്താണി​തി​നു പ്രതി​വി​ധി? മാസിക ഇങ്ങനെ നിർദേ​ശി​ക്കു​ന്നു: “അങ്ങനെ സംഭവി​ക്കു​ന്നെ​ങ്കിൽ ഒരിക്ക​ലും നിശ്ശബ്ദ​രാ​യി​രി​ക്ക​രുത്‌. ദൃക്‌സാ​ക്ഷി​ക​ളു​ണ്ടോ​യെന്നു നോക്കുക. കമ്പനി അധികൃ​തരെ വിവര​മ​റി​യി​ക്കുക. പീഡന​ത്തി​നു വിധേ​യ​നാ​കു​ന്ന​തി​നു നിങ്ങ​ളെ​ത്തന്നെ കുറ്റ​പ്പെ​ടു​ത്താ​തി​രി​ക്കുക. തീർത്തും അസഹനീ​യ​മാ​ണെ​ങ്കിൽ ഡിപ്പാർട്ടു​മെ​ന്റോ ജോലി​യോ മാറു​ന്ന​താണ്‌ നല്ലത്‌.” (g03 2/08)

കുട്ടി​ക​ളി​ലെ മാനസിക പ്രശ്‌ന​ങ്ങൾ

“ലോക​ത്തി​ലെ ഇരുപതു ശതമാനം കുട്ടി​ക​ളും മാനസിക പ്രശ്‌ന​ങ്ങ​ളോ പെരു​മാറ്റ വൈക​ല്യ​ങ്ങ​ളോ ഉള്ളവരാണ്‌. ഇത്‌ അവരുടെ ശേഷിച്ച ജീവി​തത്തെ ബാധി​ച്ചേ​ക്കാം” എന്ന്‌ ലണ്ടൻ ദിനപ​ത്ര​മായ ദി ഇൻഡി​പെൻഡന്റ്‌ പ്രസ്‌താ​വി​ക്കു​ന്നു. യുവജ​ന​ങ്ങൾക്കി​ട​യിൽ വിഷാ​ദ​വും ആത്മഹത്യ​യും സ്വയം ദ്രോ​ഹി​ക്കാ​നുള്ള പ്രവണ​ത​യും “ഞെട്ടി​ക്കും​വി​ധം” വർധി​ച്ചി​രി​ക്കു​ന്ന​താ​യി ലോകാ​രോ​ഗ്യ സംഘട​ന​യു​ടെ​യും ഐക്യ​രാ​ഷ്‌ട്ര ശിശു ക്ഷേമ നിധി​യു​ടെ​യും ഒരു സംയുക്ത റിപ്പോർട്ടിൽ മുന്നറി​യി​പ്പു നൽകി​യി​രി​ക്കു​ന്നു. യുദ്ധ കലുഷി​ത​മായ പ്രദേ​ശ​ങ്ങ​ളി​ലും ദ്രുത​ഗ​തി​യി​ലുള്ള സാമൂ​ഹിക-സാമ്പത്തിക മാറ്റങ്ങൾക്കു വിധേ​യ​മാ​കുന്ന രാജ്യ​ങ്ങ​ളി​ലും ജീവി​ക്കു​ന്ന​വ​രാണ്‌ ഏറ്റവും അധികം ബാധി​ക്ക​പ്പെ​ടു​ന്നത്‌. വിഷാ​ദ​മ​ഗ്ന​രായ കുട്ടി​ക​ളിൽ “മറ്റു രോഗ​ങ്ങൾക്കും അപകട​ക​ര​മായ ശീലങ്ങൾക്കും ഉള്ള പ്രവണത കൂടു​ത​ലാണ്‌. ഇത്‌ അവരുടെ ജീവൻ കുരു​ന്നി​ലേ നുള്ളി​ക്ക​ള​ഞ്ഞേ​ക്കാം” എന്ന്‌ റിപ്പോർട്ടു പറഞ്ഞതാ​യി ദി ഇൻഡി​പെൻഡന്റ്‌ പ്രസ്‌താ​വി​ക്കു​ന്നു. “മുതിർന്ന​വ​രു​ടെ ഇടയിലെ അകാല മരണങ്ങ​ളിൽ ഏതാണ്ട്‌ 70 ശതമാ​ന​ത്തി​നും കാരണം കൗമാര പ്രായ​ത്തിൽ തുടങ്ങുന്ന പുകവലി, മദ്യപാ​നം, മയക്കു​മ​രുന്ന്‌ ദുരു​പ​യോ​ഗം എന്നിവ പോലുള്ള ദുശ്ശീ​ല​ങ്ങ​ളാണ്‌” എന്നും അതു ചൂണ്ടി​ക്കാ​ട്ടി. (g03 2/08)

ആരോ​ഗ്യം നിലനി​റു​ത്തൽ

“കായിക പ്രവർത്ത​നങ്ങൾ ശരീര​ത്തി​ന്റെ തൂക്കം നിയ​ന്ത്രി​ക്കാൻ സഹായി​ക്കു​ന്നു, പ്രമേഹം, അസ്ഥി​ദ്ര​വീ​ക​രണം തുടങ്ങിയ രോഗ​ങ്ങൾക്കെ​തി​രെ സംരക്ഷണം നൽകുന്നു, മാനസി​കാ​വസ്ഥ മെച്ച​പ്പെ​ടു​ത്തു​ന്നു, രാത്രി​യിൽ സുഖനി​ദ്ര പ്രദാനം ചെയ്യുന്നു” എന്ന്‌ ടഫ്‌റ്റ്‌സ്‌ യൂണി​വേ​ഴ്‌സി​റ്റി ഹെൽത്ത്‌ ആൻഡ്‌ ന്യു​ട്രീ​ഷൻ ലെറ്റർ ചൂണ്ടി​ക്കാ​ണി​ക്കു​ന്നു. എന്നാൽ ഇതി​നെ​ല്ലാം പുറമേ, “ആരോ​ഗ്യ​നില നിങ്ങളു​ടെ ആയുർ​ദൈർഘ്യ​ത്തി​ന്റെ ഒരു നിർണാ​യക ഘടകമാണ്‌.” സ്റ്റാൻഫോർഡ്‌ സർവക​ലാ​ശാ​ല​യി​ലെ​യും യു.എസ്‌. വെറ്റെ​റൻസ്‌ അഫയേ​ഴ്‌സ്‌ ഹെൽത്ത്‌ കെയർ സിസ്റ്റത്തി​ലെ​യും ഗവേഷകർ 6,000-ത്തിലധി​കം മധ്യവ​യ​സ്‌ക​രിൽ 13 വർഷം നീണ്ട ഒരു പഠനം നടത്തു​ക​യു​ണ്ടാ​യി. ക്ഷീണിച്ചു തളർന്നു​പോ​കാ​തെ ഒരു വ്യക്തിക്ക്‌ എത്ര​ത്തോ​ളം വ്യായാ​മം ചെയ്യാൻ കഴിയും എന്നതിന്റെ അടിസ്ഥാ​ന​ത്തിൽ അയാൾ ദീർഘ​കാ​ലം ജീവി​ച്ചി​രി​ക്കു​മോ എന്നു പറയാ​നാ​കും എന്നായി​രു​ന്നു അവരുടെ കണ്ടെത്തൽ. വ്യായാ​മം ചെയ്യാ​നുള്ള പ്രാപ്‌തി​യെ ജനിതക ഘടകങ്ങൾ സ്വാധീ​നി​ക്കു​ന്നു​ണ്ടെന്ന്‌ മറ്റു ഗവേഷ​ണങ്ങൾ സൂചി​പ്പി​ക്കു​ന്നു. എന്നുവ​രി​കി​ലും ചുറു​ചു​റു​ക്കോ​ടെ​യുള്ള നടത്തം പോലുള്ള “ലഘു” വ്യായാ​മം ദിവസ​വും ചെയ്യു​ന്ന​തു​പോ​ലും ആരോ​ഗ്യം നിലനി​റു​ത്തു​ന്ന​തിൽ വളരെ സഹായ​ക​മാണ്‌. (g03 2/08)

യുവജ​ന​ങ്ങൾക്കി​ട​യിൽ മദ്യം പ്രചരി​പ്പി​ക്കു​ന്നു

“ഓസ്‌​ട്രേ​ലി​യ​യി​ലെ യുവജ​ന​ങ്ങ​ളിൽ ഏതാണ്ടു പത്തി​ലൊന്ന്‌ മദ്യത്തിന്‌ അടിമ​ക​ളാണ്‌” എന്ന്‌ ഓസ്‌​ട്രേ​ലി​യ​യി​ലെ സൺഡേ ടെലി​ഗ്രാഫ്‌ റിപ്പോർട്ടു ചെയ്യുന്നു. നല്ല ഒരു വാരാന്തം എന്നു പറഞ്ഞാൽ “ശരി​ക്കൊ​ന്നു പൂസാ​കു​ന്ന​താണ്‌” എന്ന മനോ​ഭാ​വം യുവാ​ക്കൾക്കി​ട​യിൽ ഉടലെ​ടു​ത്തി​രി​ക്കു​ന്നു എന്നാണ്‌ ഓസ്‌​ട്രേ​ലി​യ​യി​ലെ ആൽക്ക​ഹോൾ ആൻഡ്‌ അതർ ഡ്രഗ്‌സ്‌ കൗൺസിൽ അധ്യക്ഷ​നായ പ്രൊ​ഫസർ ഈയാൻ വെബ്‌സ്റ്റർ പറയു​ന്നത്‌. ദ സിഡ്‌നി മോർണിങ്‌ ഹെറാൾഡ്‌ റിപ്പോർട്ടു ചെയ്യു​ന്ന​ത​നു​സ​രിച്ച്‌, യുവജ​ന​ങ്ങൾക്കി​ട​യി​ലെ മദ്യ പ്രചാ​രണം എന്ന “തഴച്ചു വളരുന്ന ആഗോള വ്യവസാ​യം” ചില വിദഗ്‌ധരെ അസ്വസ്ഥ​രാ​ക്കു​ന്നു. ലഹരി​പാ​നീ​യ​ങ്ങ​ളു​ടെ വിപണനം നടത്തുന്ന മിക്കവാ​റും എല്ലാ കമ്പനി​കൾക്കും യുവജ​ന​ങ്ങളെ ഉന്നം​വെ​ച്ചു​കൊ​ണ്ടുള്ള വെബ്‌ സൈറ്റു​കൾ ഉള്ളതായി ഗവേഷകർ കണ്ടെത്തു​ക​യു​ണ്ടാ​യി. “ഇത്തരം വെബ്‌ സൈറ്റു​കൾ സംഗീത മേളകൾക്കുള്ള ടിക്കറ്റ്‌ വാഗ്‌ദാ​നം ചെയ്യു​ക​യും ചലച്ചി​ത്ര​ങ്ങളെ കുറി​ച്ചുള്ള നിരൂ​പണം ഉൾപ്പെ​ടു​ത്തു​ക​യും ഒപ്പം തങ്ങളുടെ ഉത്‌പ​ന്നത്തെ കുറി​ച്ചുള്ള വിവരങ്ങൾ നൽകു​ക​യും ചെയ്യുന്നു.” “മദ്യത്തെ യുവജ​ന​ങ്ങ​ളു​ടെ ജീവി​ത​ത്തി​ലെ ഒഴിച്ചു​കൂ​ടാ​നാ​വാത്ത ഒന്നാക്കി മാറ്റാ​നുള്ള ശ്രമത്തി​ന്റെ ഭാഗമാ​യി നടക്കുന്ന” ഈ പ്രചാ​ര​ണ​ത​ന്ത്രങ്ങൾ സംബന്ധിച്ച്‌ ലോകാ​രോ​ഗ്യ സംഘട​ന​യ്‌ക്ക്‌ ഉത്‌ക​ണ്‌ഠ​യു​ള്ള​താ​യി റിപ്പോർട്ടു പറഞ്ഞു. (g03 2/08)

സമൂഹ​ത്തിൽനി​ന്നും ഉൾവലി​യൽ

പ്രമു​ഖ​മാ​യി കൗമാ​ര​ക്കാ​രെ​യും പ്രായ​പൂർത്തി​യെ​ത്തിയ ചെറു​പ്പ​ക്കാ​രെ​യും ബാധി​ക്കുന്ന, പ്രത്യ​ക്ഷ​ത്തിൽ പുതു​താ​യി തോന്നുന്ന ഒരു പ്രതി​ഭാ​സം ജപ്പാനിൽ ഉരുത്തി​രി​ഞ്ഞി​രി​ക്കു​ന്നു. സമൂഹ​ത്തിൽനിന്ന്‌ ഒറ്റപ്പെട്ടു ജീവി​ക്കുന്ന യുവജ​നങ്ങൾ ചെയ്‌ത ക്രൂര​മായ ചില കുറ്റകൃ​ത്യ​ങ്ങൾ സംബന്ധിച്ച്‌ അന്വേ​ഷണം നടത്ത​വേ​യാണ്‌ ഹികി​കോ​മോ​റീ (സമൂഹ​ത്തിൽനി​ന്നുള്ള ഉൾവലി​യൽ രൂക്ഷമാ​കുന്ന അവസ്ഥ) എന്നു വിളി​ക്ക​പ്പെ​ടുന്ന ഈ പ്രതി​ഭാ​സം പൊതു​ജന ശ്രദ്ധ പിടി​ച്ചു​പ​റ്റി​യത്‌. “കൂട്ടിന്‌ ഒരു കമ്പ്യൂ​ട്ട​റും വീഡി​യോ ഗെയി​മു​ക​ളു​മാ​യി, ബാഹ്യ​ലോ​ക​വു​മാ​യി യാതൊ​രു സമ്പർക്ക​വു​മി​ല്ലാ​തെ മാസങ്ങ​ളോ​ളം മുറി​ക്കു​ള്ളിൽ ചടഞ്ഞു​കൂ​ടുന്ന ജീവി​ത​രീ​തി അവരു​ടെ​യി​ട​യിൽ അസാധാ​ര​ണ​മ​ല്ലെന്ന്‌ ഈ കുറ്റവാ​ളി​ക​ളു​ടെ ജീവി​ത​രീ​തി സംബന്ധി​ച്ചു നടത്തിയ ഗവേഷണം വെളി​പ്പെ​ടു​ത്തി” എന്ന്‌ വൈദ്യ​ശാ​സ്‌ത്ര ജേർണ​ലായ ദ ലാൻസെറ്റ്‌ റിപ്പോർട്ടു ചെയ്യുന്നു. മറ്റു തെളി​വു​കൾ സൂചി​പ്പി​ക്കുന്ന പ്രകാരം അക്രമ​ത്തെ​ക്കാൾ ഉദാസീ​ന​ത​യാണ്‌ ഹികി​കോ​മോ​റീ​യു​ടെ കൂടുതൽ സാധാ​ര​ണ​മാ​യി കണ്ടുവ​രുന്ന ലക്ഷണം. എന്നിരു​ന്നാ​ലും, “സമൃദ്ധി​യു​ടെ​യും സാങ്കേ​തി​ക​വി​ദ്യ​യു​ടെ​യും ആധുനിക ജാപ്പനീസ്‌ ജീവി​ത​ത്തി​ലെ സുഖസൗ​ക​ര്യ​ങ്ങ​ളു​ടെ​യും ഉത്‌പ​ന്ന​മാണ്‌ ഈ പ്രതി​ഭാ​സം എന്നതി​നോട്‌ ആളുകൾ പരക്കെ യോജി​ക്കു​ന്നു” എന്ന്‌ ജേർണൽ പ്രസ്‌താ​വി​ക്കു​ന്നു. “ഇതുള്ളവർ, വീട്ടി​ലെ​ത്തി​ച്ചു കൊടു​ക്കുന്ന ഭക്ഷണപാ​നീ​യങ്ങൾ തിന്നും കുടി​ച്ചും​കൊണ്ട്‌, ഉണർന്നി​രി​ക്കുന്ന സമയത്തി​ല​ധി​ക​വും ഇന്റർനെറ്റ്‌ ഉപയോ​ഗി​ച്ചും വീഡി​യോ ഗെയിം കളിച്ചും ചെലവ​ഴി​ക്കു​ന്നു.” സമൂഹ​ത്തിൽനിന്ന്‌ ഉൾവലി​ഞ്ഞു ജീവി​ക്കുന്ന യുവജ​നങ്ങൾ ജപ്പാനിൽ പത്തു ലക്ഷത്തോ​ളം വരു​മെ​ന്നാണ്‌ ചില കണക്കുകൾ സൂചി​പ്പി​ക്കു​ന്നത്‌. (g03 2/08)