ചെറിയ നിലക്ക​ട​ല​യു​ടെ വലിയ ലോകം

നിങ്ങൾക്ക്‌ നിലക്കടല ഇഷ്ടമാ​ണോ? ആയിരി​ക്കും, അല്ലേ? പലർക്കും അത്‌ ഇഷ്ടമാണ്‌. മണ്ണിന്‌ അടിയിൽ വളരു​ന്ന​തു​കൊ​ണ്ടാണ്‌ ഇതിന്‌ നിലക്കടല എന്നു പേരു കിട്ടി​യത്‌. മനുഷ്യ കുടും​ബ​ത്തി​ന്റെ വലി​യൊ​രു ഭാഗവും നിലക്കടല ഭക്ഷിക്കു​ന്ന​വ​രാണ്‌. ഭൂമു​ഖത്ത്‌ ഏറ്റവും ജനസാ​ന്ദ്ര​ത​യുള്ള രണ്ടു രാജ്യ​ങ്ങ​ളായ ചൈന​യും ഇന്ത്യയും ചേർന്നാണ്‌ ലോക​ത്താ​കെ​യുള്ള നിലക്ക​ട​ല​യു​ടെ 50 ശതമാ​ന​ത്തി​ല​ധി​ക​വും ഉത്‌പാ​ദി​പ്പി​ക്കു​ന്നത്‌.

ഐക്യ​നാ​ടു​കൾ വർഷം തോറും നൂറു​കോ​ടി​യി​ല​ധി​കം കിലോ​ഗ്രാം നിലക്കടല ഉത്‌പാ​ദി​പ്പി​ക്കു​ന്നു, ലോകത്ത്‌ ആകെയു​ള്ള​തി​ന്റെ ഏതാണ്ട്‌ പത്തു ശതമാനം. അർജന്റീന, ബ്രസീൽ, മലാവി, നൈജീ​രിയ, സെനെഗൽ, ദക്ഷിണാ​ഫ്രിക്ക, സുഡാൻ എന്നീ രാജ്യ​ങ്ങ​ളും നിലക്കടല വൻ തോതിൽ കൃഷി​ചെ​യ്യു​ന്നു. നിലക്കടല ലോക​ത്തിന്‌ ഇത്ര പ്രിയ​ങ്ക​ര​മാ​യി​ത്തീർന്നത്‌ എങ്ങനെയാണ്‌? നിലക്കടല കഴിക്കു​ന്നത്‌ ഒഴിവാ​ക്കേണ്ട വല്ല സാഹച​ര്യ​ങ്ങ​ളും ഉണ്ടോ?

നിലക്ക​ട​ല​യു​ടെ സുദീർഘ​മായ ചരിത്രം

നിലക്ക​ട​ല​യു​ടെ ജന്മദേശം തെക്കേ അമേരി​ക്ക​യാ​ണെന്നു കരുത​പ്പെ​ടു​ന്നു. നിലക്ക​ട​ല​യോ​ടുള്ള മനുഷ്യ​ന്റെ പ്രിയം വെളി​പ്പെ​ടു​ത്തുന്ന, അറിയ​പ്പെ​ടു​ന്ന​തി​ലേ​ക്കും ഏറ്റവും പുരാ​ത​ന​മായ കരകൗ​ശ​ല​വ​സ്‌തു പെറു​വിൽനി​ന്നു കണ്ടെടുത്ത, കൊളം​ബി​യൻ കാലഘ​ട്ട​ത്തി​നു മുമ്പുള്ള ഒരു അലങ്കാര പാത്ര​മാണ്‌. ഈ പാത്ര​ത്തി​നു നിലക്ക​ട​ല​യു​ടെ ആകൃതി​യാണ്‌. മാത്രമല്ല, നിലക്ക​ട​ല​യു​ടേ​തു​പോ​ലുള്ള ഡി​സൈ​നു​കൾകൊണ്ട്‌ അത്‌ അലങ്കരി​ച്ചി​ട്ടു​മുണ്ട്‌. തെക്കേ അമേരി​ക്ക​യിൽ വെച്ച്‌ നിലക്കടല ആദ്യം കണ്ടെത്തിയ സ്‌പാ​നീഷ്‌ പര്യ​വേ​ക്ഷകർ, നാവിക യാത്ര​യ്‌ക്കി​ട​യിൽ അതു തങ്ങൾക്ക്‌ ആവശ്യ​മായ പോഷണം പ്രദാനം ചെയ്യു​മെന്നു മനസ്സി​ലാ​ക്കി. അവർ കുറച്ചു നിലക്കടല യൂറോ​പ്പി​ലേക്കു കൊണ്ടു​വന്നു. യൂറോ​പ്യ​ന്മാർ അതിനു മറ്റു ചില ഉപയോ​ഗ​ങ്ങ​ളും കണ്ടുപി​ടി​ച്ചു. കാപ്പി​ക്കു​രു​വി​നു പകരമാ​യി പോലും അവർ അത്‌ ഉപയോ​ഗി​ക്കു​മാ​യി​രു​ന്നു.

പിന്നീട്‌ പോർച്ചു​ഗീ​സു​കാർ നിലക്ക​ട​ലയെ ആഫ്രി​ക്ക​യ്‌ക്കു പരിച​യ​പ്പെ​ടു​ത്തി. മറ്റു കൃഷികൾ വിളയാത്ത തരിശു​ഭൂ​മി​യിൽപ്പോ​ലും കൃഷി​ചെ​യ്യാൻ വളരെ പ്രയോ​ജ​ന​പ്ര​ദ​മായ ഒരു ഭക്ഷ്യവ​സ്‌തു​വാണ്‌ നിലക്ക​ട​ല​യെന്ന്‌ അവി​ടെ​യു​ള്ള​വർക്കു മനസ്സി​ലാ​യി. തന്നെയു​മല്ല, നിലക്ക​ട​ല​ച്ചെ​ടി​കൾ ഫലഭൂ​യി​ഷ്‌ഠ​മ​ല്ലാത്ത മണ്ണിനെ നൈ​ട്രജൻ സമ്പുഷ്ട​മാ​ക്കു​ന്ന​താ​യും കണ്ടെത്ത​പ്പെട്ടു. അങ്ങനെ​യി​രി​ക്കെ, അടിമ​ക്ക​ച്ച​വ​ട​ത്തി​ന്റെ നാളു​ക​ളിൽ നിലക്ക​ട​ലയെ ആഫ്രി​ക്ക​യിൽ നിന്നു വടക്കേ അമേരി​ക്ക​യി​ലേക്കു കൊണ്ടു​വന്നു.

പിന്നീട്‌, 1530-കളിൽ പോർച്ചു​ഗീ​സു​കാ​രോ​ടൊ​പ്പം നിലക്കടല ഇന്ത്യയി​ലും മക്കാ​വോ​യി​ലും എത്തി. സ്‌പാ​നീ​ഷു​കാർ നിലക്കടല ഫിലി​പ്പീൻസി​ലും എത്തിച്ചു. ഈ ദേശങ്ങ​ളിൽനി​ന്നുള്ള വ്യാപാ​രി​കൾ നിലക്കടല ചൈന​ക്കാർക്കു പരിച​യ​പ്പെ​ടു​ത്തി. ക്ഷാമത്തി​ന്റെ പിടി​യി​ല​മർന്നി​രുന്ന ആ രാഷ്‌ട്രത്തെ സഹായി​ക്കാൻ നിലക്ക​ട​ല​യ്‌ക്കു കഴിഞ്ഞു.

സസ്യശാ​സ്‌ത്ര​ജ്ഞർ 1700-കളിൽ നടത്തിയ പഠനം, നിലക്കടല പന്നികൾക്കുള്ള ഒന്നാം​തരം ഭക്ഷണം ആണെന്നു വെളി​പ്പെ​ടു​ത്തി. 1800-കളുടെ ആരംഭ​ത്തിൽ ഐക്യ​നാ​ടു​ക​ളി​ലെ സൗത്ത്‌ കരോ​ലി​ന​യിൽ നിലക്കടല വാണി​ജ്യാ​ടി​സ്ഥാ​ന​ത്തിൽ കൃഷി ചെയ്യു​ന്നു​ണ്ടാ​യി​രു​ന്നു. 1861-ൽ പൊട്ടി​പ്പു​റ​പ്പെട്ട അമേരി​ക്കൻ ആഭ്യന്തര യുദ്ധ കാലത്ത്‌ ഇരുപ​ക്ഷ​ത്തു​മുള്ള പട്ടാള​ക്കാ​രു​ടെ അന്നമായി മാറി നിലക്കടല.

നിലക്ക​ട​ല​യെ പാവ​പ്പെ​ട്ട​വ​രു​ടെ ഭക്ഷണം ആയിട്ടാണ്‌ അക്കാലത്തു പലരും കരുതി​യത്‌. അന്നൊക്കെ അമേരി​ക്കൻ കൃഷി​ക്കാർ നിലക്കടല മനു​ഷ്യോ​പ​യോ​ഗ​ത്തി​നാ​യി വൻതോ​തിൽ കൃഷി ചെയ്യാ​തി​രു​ന്ന​തി​ന്റെ ഒരു കാരണം ഇതായി​രി​ക്കാം. മാത്രമല്ല, 1900 എന്ന വർഷ​ത്തോ​ട​ടുത്ത്‌ യന്ത്രോ​പ​ക​ര​ണങ്ങൾ കണ്ടുപി​ടി​ക്കു​ന്ന​തി​നു മുമ്പ്‌ നിലക്ക​ട​ല​ക്കൃ​ഷി ചെല​വേ​റി​യ​തും ശ്രമക​ര​വു​മാ​യി​രു​ന്നു.

എന്നാൽ 1903-ൽ അമേരി​ക്കൻ കാർഷിക രസതന്ത്ര രംഗത്തെ മുന്നണി പ്രവർത്ത​ക​നായ ജോർജ്‌ വാഷി​ങ്‌ടൺ കാർവർ നിലക്ക​ട​ല​ച്ചെ​ടി​യു​ടെ പുതിയ ഉപയോ​ഗ​ങ്ങളെ കുറിച്ചു ഗവേഷണം നടത്തി​ത്തു​ടങ്ങി. ക്രമേണ അദ്ദേഹം ഇതിൽനി​ന്നു 300 ഉത്‌പ​ന്നങ്ങൾ വികസി​പ്പി​ച്ചെ​ടു​ത്തു. പാനീ​യങ്ങൾ, സൗന്ദര്യ​വർധക വസ്‌തു​ക്കൾ, ഡൈകൾ, മരുന്നു​കൾ, അലക്കാൻ ഉപയോ​ഗി​ക്കുന്ന സോപ്പ്‌, കീടനാ​ശി​നി​കൾ, അച്ചടി​മഷി എന്നിവ​യെ​ല്ലാം അതിൽ ഉൾപ്പെ​ടു​ന്നു. മണ്ണിന്റെ ഫലഭൂ​യി​ഷ്‌ഠ​തയെ കെടു​ത്തി​ക്ക​ള​യുന്ന പരുത്തി​ക്കൃ​ഷി നിറു​ത്തി​യിട്ട്‌ പകരം നിലക്കടല കൃഷി​ചെ​യ്യാൻ കാർവർ തന്റെ നാട്ടിലെ കർഷകരെ പ്രോ​ത്സാ​ഹി​പ്പി​ച്ചു. ആ സമയത്ത്‌, ബോൾ വീവിൽ എന്ന ഒരു കീടം, പരുത്തി​ക്കൃ​ഷി നശിപ്പി​ച്ചി​രു​ന്ന​തു​കൊണ്ട്‌ കാർവ​റു​ടെ ഉപദേശം ചെവി​ക്കൊ​ള്ളാൻ പല കർഷക​രും തയ്യാറാ​യി.  എന്തായി​രു​ന്നു ഫലം? നിലക്ക​ട​ല​ക്കൃ​ഷി വമ്പിച്ച വിജയ​മാ​യി​രു​ന്നു. അത്‌ തെക്കൻ ഐക്യ​നാ​ടു​ക​ളു​ടെ നാണ്യ​വിള ആയിമാ​റി. ഇന്ന്‌ അലബാ​മ​യി​ലെ ദോഥാ​നിൽ കാർവ​റു​ടെ ഒരു സ്‌മാ​രകം പോലു​മുണ്ട്‌. മാത്രമല്ല, പരുത്തി​ക്കൃ​ഷി നശിപ്പി​ച്ചു​കൊണ്ട്‌ നിലക്കടല കൃഷി​ചെ​യ്യാൻ കർഷകരെ പ്രേരി​പ്പിച്ച ബോൾ വീവിൽ എന്ന കീടത്തി​ന്റെ സ്‌മാ​രകം പടുത്തു​യർത്താ​നും അലബാ​മ​യി​ലെ എന്റർ​പ്രൈസ്‌ നഗരം മറന്നില്ല.

വളരുന്ന നിലക്കടല

നിലക്കടല വാസ്‌ത​വ​ത്തിൽ ഒരു ഫലം അല്ല, മറിച്ച്‌ വിത്താണ്‌. ചെടി വളർന്നു​വ​രവേ, അതിൽ മഞ്ഞനി​റ​മുള്ള പൂക്കൾ ഉണ്ടാകു​ന്നു. ഈ പൂക്കൾ സ്വപരാ​ഗണം നടത്തുന്നു.

പരാഗണം നടന്ന​ശേഷം, നിലക്ക​ട​ല​യു​ടെ ഭ്രൂണത്തെ വഹിക്കുന്ന, ചെടി​യു​ടെ അണ്ഡാശ​യ​ഭാ​ഗ​മായ പെഗ്‌ എന്നറി​യ​പ്പെ​ടുന്ന കാണ്ഡാ​ഗ്രം മണ്ണി​ലേക്ക്‌ ആഴ്‌ന്നി​റ​ങ്ങു​ന്നു. മണ്ണി​ലേക്ക്‌ ഇറങ്ങി​യ​ശേഷം പടർന്നു കിടന്നാണ്‌ നിലക്കടല നമുക്കു സുപരി​ചി​ത​മായ രൂപം കൈവ​രി​ക്കു​ന്നത്‌. ഒരു ചെടി​യിൽ 40 വരെ നിലക്ക​ട​ലകൾ ഉണ്ടാകാ​റുണ്ട്‌.

മിതമായ ചൂടും സൂര്യ​പ്ര​കാ​ശ​വും മഴയു​മൊ​ക്കെ​യാണ്‌ നിലക്ക​ട​ല​യ്‌ക്ക്‌ പഥ്യം. നടീൽ മുതൽ വിള​വെ​ടു​പ്പോ​ളം 120 മുതൽ 160 വരെ ദിവസം വേണ്ടി​വ​ന്നേ​ക്കാം. ഇതു നിലക്ക​ട​ല​യു​ടെ വകഭേ​ദ​ത്തെ​യും കാലാ​വ​സ്ഥ​യെ​യും ആശ്രയി​ച്ചി​രി​ക്കും. വിള​വെ​ടു​പ്പി​ന്റെ സമയത്ത്‌ ചെടി വേരോ​ടെ പിഴു​തെ​ടു​ക്കും. അഴുകി​പ്പോ​കാ​തി​രി​ക്കാൻ മണ്ണിന​ടി​യി​ലാ​യി​രുന്ന ഭാഗം വെയി​ല​ത്തിട്ട്‌ ഉണക്കി സൂക്ഷി​ക്കു​ന്നു. വിള​വെ​ടു​ക്കാൻ ഇന്നു മിക്ക കർഷക​രും ആധുനിക മാർഗങ്ങൾ ഉപയോ​ഗി​ക്കു​ന്നു. അതു​കൊണ്ട്‌ ചെടിയെ വേരോ​ടെ പിഴു​തെ​ടു​ക്കു​ന്ന​തും അതിലെ മണ്ണുകു​ടഞ്ഞു കളഞ്ഞ്‌ തലകീ​ഴാ​യി വെക്കു​ന്ന​തു​മെ​ല്ലാം ഒറ്റയടി​ക്കു​തന്നെ കഴിയും.

നിലക്ക​ട​ല​യു​ടെ ബഹുമു​ഖോ​പ​യോ​ഗങ്ങൾ

പോഷ​ക​ഗു​ണ​ത്തിന്‌ നിലക്കടല പേരു​കേ​ട്ട​താണ്‌. ഇതിൽ നാരുകൾ കൂടാതെ, 13 ജീവക​ങ്ങ​ളും 26 ധാതു ലവണങ്ങ​ളും അടങ്ങി​യി​രി​ക്കു​ന്നു. ഇതാകട്ടെ ആധുനിക ഭക്ഷണരീ​തി​യിൽ ലഭ്യമ​ല്ലാ​ത്ത​വ​യു​മാണ്‌. “ഒരു പൗണ്ട്‌ നിലക്ക​ട​ല​യിൽ അതേ തൂക്കത്തി​ലുള്ള, മാട്ടിൻ കരളി​നെ​ക്കാൾ മാംസ്യ​വും ധാതു​ക്ക​ളും ജീവക​വും അടങ്ങി​യി​രി​ക്കു​ന്നു” എന്ന്‌ എൻ​സൈ​ക്ലോ​പീ​ഡിയ ബ്രിട്ടാ​നിക്ക പറയുന്നു. പക്ഷേ സൂക്ഷി​ക്കുക, വണ്ണം കൂടാ​നി​ട​യുണ്ട്‌! “കൊഴുപ്പ്‌ ധാരാ​ള​മുള്ള ക്രീമി​നെ​ക്കാൾ കൊഴു​പ്പാണ്‌” നിലക്ക​ട​ല​യ്‌ക്ക്‌. അതു​പോ​ലെ, “പഞ്ചസാ​ര​യിൽ ഉള്ളതി​നെ​ക്കാൾ കലോ​റി​യും അടങ്ങി​യി​ട്ടുണ്ട്‌.”

നിലക്കടല പല രാജ്യ​ങ്ങ​ളു​ടെ​യും വിഭവ​ങ്ങ​ളിൽ സ്ഥാനം പിടി​ച്ചി​രി​ക്കു​ന്നു. അതിന്റെ സവിശേഷ രുചി വേർതി​രി​ച്ച​റി​യാൻ ഒരു ബുദ്ധി​മു​ട്ടു​മില്ല. “നിലക്ക​ട​ല​യു​ടെ സ്വാദും മണവും മുന്നി​ട്ടു​നിൽക്കു​ന്ന​തും വ്യതി​രി​ക്ത​വു​മാണ്‌. ഇതു ചേർത്ത്‌  ഉണ്ടാക്കുന്ന ഏതു വിഭവ​ങ്ങൾക്കും ഒരേ രുചി​യാണ്‌” എന്ന്‌ പാചക​ക​ലയെ കുറി​ച്ചുള്ള എഴുത്തു​കാ​രി​യായ ആൻയാ ഫൊൺ ബ്രെം​സെൻ പറയുന്നു. “അതു​കൊണ്ട്‌ ഇൻഡോ​നേ​ഷ്യൻ നിലക്കടല സോസി​നും പടിഞ്ഞാ​റൻ ആഫ്രി​ക്ക​ക്കാ​രു​ടെ സൂപ്പി​നും ചൈനാ​ക്കാ​രു​ടെ നൂഡിൽസി​നും പെറൂ​വി​യ​ക്കാ​രു​ടെ സ്റ്റ്യൂവി​നും പീനട്ട്‌ ബട്ടർ സാൻഡ്‌വി​ച്ചി​നും രുചി​യു​ടെ കാര്യ​ത്തിൽ നല്ല സാമ്യം ഉണ്ട്‌.”

നിലക്കടല ലോക​മെ​മ്പാ​ടും ആളുക​ളു​ടെ പ്രിയ​പ്പെട്ട ലഘുഭ​ക്ഷ​ണ​മാണ്‌. ഉദാഹ​ര​ണ​ത്തിന്‌, നിലക്കടല മറ്റ്‌ ഉണക്കിയ പയറു​വർഗ​ങ്ങ​ളു​മാ​യി കൂട്ടി​ക്ക​ലർത്തി ഇന്ത്യയി​ലെ തെരു​വോ​ര​ങ്ങ​ളിൽ വിൽക്കാ​റുണ്ട്‌. പീനട്ട്‌ ബട്ടർ പുരട്ടിയ സാൻഡ്‌വിച്ച്‌ ചില രാജ്യ​ങ്ങ​ളിൽ വളരെ പ്രിയ​ങ്ക​ര​മാണ്‌. “ഏതാണ്ട്‌ 1890-ൽ യു.എസ്‌.എ.-യിലെ സെന്റ്‌ ലൂയി​സി​ലുള്ള ഒരു ഡോക്ട​റാണ്‌ ഇതു കണ്ടുപി​ടി​ച്ചത്‌ എന്നു പറയ​പ്പെ​ടു​ന്നു. പ്രായ​മാ​യ​വർക്കുള്ള ആരോ​ഗ്യ​ക​ര​മായ ഭക്ഷണം എന്നനി​ല​യി​ലാണ്‌ അദ്ദേഹം ഇതു നിർദേ​ശി​ച്ചത്‌” എന്ന്‌ ദ ഗ്രെയിറ്റ്‌ അമേരി​ക്കൻ പീനട്ട്‌ എന്ന പ്രസി​ദ്ധീ​ക​രണം പറയുന്നു.

ഭക്ഷ്യവ​സ്‌തു​വാണ്‌ എന്നതി​നു​പു​റമേ, നിലക്ക​ട​ല​യ്‌ക്ക്‌ മറ്റനേകം ഉപയോ​ഗ​ങ്ങ​ളുണ്ട്‌. നിലക്ക​ട​ല​യിൽ നിന്നു ലഭിക്കുന്ന പാചക എണ്ണ ഏഷ്യയി​ലെ​മ്പാ​ടും ഉപയോ​ഗി​ച്ചു​വ​രു​ന്നു. നിലക്കടല എണ്ണ ഉപയോ​ഗിച്ച്‌ വളരെ ഉയർന്ന ചൂടിൽ പാചകം ചെയ്യാൻ കഴിയും. മാത്രമല്ല, പാചകം ചെയ്യുന്ന ആഹാര​പ​ദാർഥ​ത്തി​ന്റെ മണം ഇത്‌ വലി​ച്ചെ​ടു​ക്കു​ക​യു​മില്ല.

ബ്രസീ​ലിൽ നിലക്കടല എണ്ണയുടെ ഒരു ഉപോ​ത്‌പന്നം കാലി​ത്തീ​റ്റ​യാ​യി ഉപയോ​ഗി​ക്കു​ന്നു. നിത്യോ​പ​യോഗ സാധന​ങ്ങ​ളു​ടെ പട്ടിക​യി​ലും നിലക്ക​ട​ല​യിൽ നിന്നുള്ള ധാരാളം ഉത്‌പ​ന്നങ്ങൾ കാണാൻ കഴിയും.—മുകളിൽ നൽകി​യി​രി​ക്കുന്ന വിവരങ്ങൾ കാണുക.

സൂക്ഷി​ക്കുക, നിലക്കടല അലർജി​യു​ണ്ടാ​ക്കും!

ശീതീ​ക​ര​ണി​യിൽ വെക്കാ​തെ​തന്നെ നിലക്കടല വളരെ നാളുകൾ സൂക്ഷി​ച്ചു​വെ​ക്കാൻ കഴിയും. എന്നാൽ ശ്രദ്ധി​ക്കേ​ണ്ട​തുണ്ട്‌. പൂപ്പൽ പിടിച്ച നിലക്ക​ട​ല​യിൽ കാൻസ​റിന്‌ ഇടയാ​ക്കുന്ന അഫ്‌ളാ​ടോ​ക്‌സിൻ എന്ന വസ്‌തു ഉണ്ടാകും. മാത്രമല്ല ചില ആളുകൾക്ക്‌ നിലക്കടല അലർജി​യു​മാണ്‌. “മൂക്കൊ​ലിപ്പ്‌, ചൊറി​ഞ്ഞു​പൊ​ട്ടൽ, അപകട​ക​ര​മായ അനാഫി​ലാ​ക്‌ടിക്‌ ഷോക്ക്‌ (പുറമെ നിന്നുള്ള വസ്‌തു​ക്ക​ളോ​ടുള്ള അത്യധിക പ്രതി​ക​രണം) എന്നിവ അലർജി മൂലം ഉണ്ടാകു​ന്ന​വ​യാണ്‌” എന്ന്‌ പ്രി​വെൻഷൻ എന്ന മാസിക പറയുന്നു. കൂടുതൽ കുട്ടികൾ നിലക്ക​ട​ല​യോട്‌ അലർജി​യു​ള്ള​വ​രാ​യി​ത്തീ​രു​ന്നു എന്നു നിരവധി പഠനങ്ങൾ സൂചി​പ്പി​ക്കു​ന്നു.

മാതാ​പി​താ​ക്കൾക്കു രണ്ടു​പേർക്കും ആസ്‌ത്‌മ, സ്ഥായി​യായ മൂക്കൊ​ലിപ്പ്‌ അല്ലെങ്കിൽ വരട്ടു​ചൊ​റി എന്നിവ ഉണ്ടെങ്കിൽ കുട്ടിക്കു നിലക്ക​ട​ല​യോട്‌ അലർജി ഉണ്ടാകാ​നുള്ള വർധിച്ച സാധ്യ​ത​യു​ണ്ടെന്ന്‌ പ്രി​വെൻഷൻ റിപ്പോർട്ടു ചെയ്യുന്നു.

അലർജി​യു​ടെ നീണ്ട ചരി​ത്ര​മുള്ള അമ്മമാ​രു​ടെ കുഞ്ഞു​ങ്ങൾക്കും, ആദ്യവർഷ​ത്തിൽ പാലി​നോട്‌ അലർജി​യുള്ള കുഞ്ഞു​ങ്ങ​ളു​ടെ കാര്യ​ത്തി​ലും ഇതു സത്യമാണ്‌. “പീനട്ട്‌ ബട്ടർ നിങ്ങളു​ടെ കുട്ടി​യു​ടെ കയ്യെത്താ​ത്തി​ടത്ത്‌ വെക്കു​ന്ന​താണ്‌ അഭികാ​മ്യം, മൂന്നു വയസ്സു​വ​രെ​യെ​ങ്കി​ലും അതു കൊടു​ക്കാ​തി​രി​ക്കുക,” എന്ന്‌ യു.എസ്‌.എ.-യിലെ, ജോൺ ഹോപ്‌കിൻസ്‌ യൂണി​വേ​ഴ്‌സി​റ്റി മെഡിക്കൽ സെന്ററി​ലെ, ശിശു​രോ​ഗ​വി​ഭാ​ഗം പ്രൊ​ഫ​സ​റായ ഡോ. ഹ്യൂ സാംസെൻ പറയുന്നു.

നിങ്ങൾക്കു നിലക്കടല ഇഷ്ടമാ​ണെ​ങ്കി​ലും അല്ലെങ്കി​ലും, ഇതിന്റെ ബഹുമു​ഖോ​പ​യോ​ഗ​ങ്ങളെ കുറി​ച്ചുള്ള പരിചി​ന്തനം, ഇത്തിരി​പ്പോന്ന എന്നാൽ വിശ്വ​വി​ഖ്യാ​ത​നായ നിലക്ക​ട​ല​യോ​ടുള്ള നിങ്ങളു​ടെ മതിപ്പു വർധി​പ്പി​ച്ചു​കാ​ണും. (g03 4/22)

[24-ാം പേജിലെ ചതുരം/ചിത്രം]

നിലക്കടലയുടെ ഉപോ​ത്‌പ​ന്നങ്ങൾ നിത്യോ​പ​യോഗ സാധന​ങ്ങ​ളിൽ

• വോൾബോർഡ്‌

• വിറക്‌

• പൂച്ചയു​ടെ വിസർജ്യ​ങ്ങൾ നീക്കം ചെയ്യാ​നുള്ള ക്യാറ്റ്‌ ലിറ്റർ

• കടലാസ്‌

• ശുചീ​കരണ ലായനി​കൾ

• ലേപനം

• ലോഹ​ങ്ങൾക്കുള്ള പോളീഷ്‌

• ബ്ലീച്ച്‌

• മഷി

• ആക്‌സൽ ഗ്രീസ്‌

• ഷേവിങ്‌ ക്രീം

• മുഖത്തു​പ​യോ​ഗി​ക്കുന്ന ക്രീം

• സോപ്പ്‌

• ഒരിനം തറവിരി

• റബ്ബർ

• സൗന്ദര്യ വർധക വസ്‌തു​ക്കൾ

• പെയിന്റ്‌

• സ്‌ഫോ​ടക വസ്‌തു​ക്കൾ

• ഷാംപൂ

• മരുന്നു​കൾ

[കടപ്പാട്‌]

ഉറവിടം: ദ ഗ്രെയിറ്റ്‌ അമേരി​ക്കൻ പീനട്ട്‌

[22-ാം പേജിലെ രേഖാ​ചി​ത്രം/ചിത്രം]

(പൂർണ​രൂ​പ​ത്തിൽ കാണു​ന്ന​തിന്‌ പ്രസി​ദ്ധീ​ക​രണം നോക്കുക)

ഇലകൾ

പെഗ്‌

തറനിരപ്പ്‌

വേരുകൾ നിലക്കടല

[കടപ്പാട്‌]

നിലക്കടല കർഷക മാസിക

[22-ാം പേജിലെ ചിത്രം]

ജോർജ്‌ വാഷി​ങ്‌ടൺ കാർവ​റു​ടെ സ്‌മാ​ര​കം

[23-ാം പേജിലെ ചിത്രം]

ഐക്യനാടുകൾ

[23-ാം പേജിലെ ചിത്രം]

ആഫ്രിക്ക

[23-ാം പേജിലെ ചിത്രം]

ഏഷ്യ

[കടപ്പാട്‌]

FAO photo/R. Faidutti

[23-ാം പേജിലെ ചിത്രം]

നിലക്കടലകൊണ്ടുള്ള ചില ലഘുഭ​ക്ഷ​ണ​ങ്ങൾ

[24-ാം പേജിലെ ചിത്രം]

ചില രാജ്യ​ങ്ങ​ളിൽ ജനപ്രീ​തി​യാർജിച്ച ഭക്ഷണ പദാർഥ​മാണ്‌ നിലക്ക​ട​ല​യിൽ നിന്നു തയ്യാറാ​ക്കുന്ന പീനട്ട്‌ ബട്ടർ