ലോകത്തെ വീക്ഷിക്കൽ

അവിശ്വാ​സി​കൾ വിശ്വാ​സി​കളെ നയിക്കു​ന്നു

ചർച്ച്‌ ഓഫ്‌ ഇംഗ്ലണ്ടി​ന്റെ പുരോ​ഹി​തകൾ “പുരോ​ഹി​ത​ന്മാ​രെ​ക്കാൾ കൂടു​ത​ലാ​യി പ്രമുഖ ക്രൈ​സ്‌തവ ഉപദേ​ശ​ങ്ങളെ സംശയ​ത്തോ​ടെ വീക്ഷി​ക്കു​ന്നു” എന്ന്‌ ലണ്ടനിലെ ദ ടൈംസ്‌ റിപ്പോർട്ടു ചെയ്യുന്നു. ചർച്ച്‌ ഓഫ്‌ ഇംഗ്ലണ്ടി​ന്റെ വൈദി​ക​സ​മൂ​ഹ​ത്തി​ലെ 2,000-ത്തോളം പേരിൽ നടത്തിയ ഒരു സർവേ വെളി​പ്പെ​ടു​ത്തുന്ന പ്രകാരം, “പത്തിൽ 8 പുരോ​ഹി​ത​ന്മാർ, ലോക​ത്തി​ന്റെ പാപം നീക്കാ​നാണ്‌ യേശു മരിച്ചത്‌ എന്നു വിശ്വ​സി​ക്കു​മ്പോൾ,” പത്തിൽ 6 പുരോ​ഹി​ത​കളേ അതു വിശ്വ​സി​ക്കു​ന്നു​ള്ളൂ. പത്തിൽ 7 പുരു​ഷ​ന്മാർ യേശു​വി​ന്റെ പുനരു​ത്ഥാ​ന​ത്തിൽ വിശ്വ​സി​ക്കു​മ്പോൾ, പത്തിൽ 5 സ്‌ത്രീ​കൾ മാത്ര​മാണ്‌ അതു വിശ്വ​സി​ക്കു​ന്നത്‌. സർവേ ഏർപ്പെ​ടു​ത്തിയ കോസ്റ്റ്‌ ഓഫ്‌ കോൺഷ്യൻസി​ന്റെ വക്താവായ റോബി ലോ ഇങ്ങനെ പറഞ്ഞു: “ചർച്ച്‌ ഓഫ്‌ ഇംഗ്ലണ്ടിൽ രണ്ടു വൈദി​ക​കൂ​ട്ട​ങ്ങ​ളാണ്‌ ഉള്ളത്‌: വിശ്വാ​സി​ക​ളായ വൈദി​ക​രും അവിശ്വാ​സി​ക​ളായ വൈദി​ക​രും. അത്‌ അപകീർത്തി​ക​ര​മാണ്‌. വിശ്വാ​സം ലവലേശം പോലു​മി​ല്ലാ​ത്ത​വരെ കൂടു​ത​ലാ​യി അധികാ​ര​സ്ഥാ​ന​ങ്ങ​ളി​ലേക്കു നിയമി​ക്കു​ക​യാണ്‌. വിശ്വാ​സി​കളെ നയിക്കാൻ അവിശ്വാ​സി​കൾ കയറി​ക്കൂ​ടി​ക്കൊ​ണ്ടി​രി​ക്കുന്ന ഈ സ്ഥിതി വെച്ചു​പൊ​റു​പ്പി​ക്കാൻ പാടി​ല്ലാ​ത്ത​താണ്‌.” (g03 4/08)

 ആൾക്കു​ര​ങ്ങു​കൾ ഭീഷണി​യിൽ

“മനുഷ്യൻ സത്വര നടപടി​യെ​ടു​ക്കാത്ത പക്ഷം 30 വർഷത്തി​നു​ള്ളിൽ ആൾക്കു​ര​ങ്ങു​ക​ളു​ടെ സ്വാഭാ​വിക വാസസ്ഥ​ലങ്ങൾ മിക്കവാ​റും അപ്രത്യ​ക്ഷ​മാ​കും” എന്ന്‌ റോയി​റ്റേ​ഴ്‌സ്‌ വാർത്താ ഏജൻസി റിപ്പോർട്ടു ചെയ്യുന്നു. ദക്ഷിണാ​ഫ്രി​ക്ക​യി​ലെ ജോഹാ​ന​സ്‌ബർഗിൽ അടുത്ത​യി​ടെ നടന്ന ഭൗമ ഉച്ചകോ​ടി​യിൽ ഐക്യ​രാ​ഷ്‌ട്ര സംഘടനാ ഉദ്യോ​ഗസ്ഥർ ഇങ്ങനെ പ്രസ്‌താ​വി​ച്ചു: “റോഡു നിർമാ​ണം, ഖനന​പ്ര​വർത്ത​നങ്ങൾ, ഗതാഗത-വാർത്താ​വി​നി​മയ സൗകര്യ​ങ്ങ​ളു​ടെ​യും മറ്റും വികസനം എന്നിവ ഇന്നത്തെ തോതിൽ മുന്നോ​ട്ടു​പോ​യാൽ 2030 ആകു​മ്പോ​ഴേ​ക്കും ആഫ്രി​ക്ക​യിൽ ആൾക്കു​ര​ങ്ങു​ക​ളു​ടെ ആവാസ പ്രദേ​ശ​ത്തി​ന്റെ 10 ശതമാ​ന​ത്തി​ലും താഴെ മാത്രമേ ബാക്കി​യു​ണ്ടാ​വൂ.” ആവാസ കേന്ദ്രം നഷ്ടമാ​കു​ന്ന​തു​നി​മി​ത്തം ഇപ്പോൾത്തന്നെ ആൾക്കു​ര​ങ്ങു​ക​ളു​ടെ എണ്ണം കുത്തനെ കുറഞ്ഞി​രി​ക്കു​ക​യാണ്‌. ഒരു നൂറ്റാ​ണ്ടു​മുമ്പ്‌ 20,00,000 ചിമ്പാൻസി​കൾ ഉണ്ടായി​രു​ന്നി​ടത്ത്‌ ഇന്നത്‌ വെറും 2,00,000 ആയി കുറഞ്ഞി​രി​ക്കു​ന്നു. താഴ്‌വ​ര​ക​ളിൽ കാണ​പ്പെ​ടുന്ന ഗൊറി​ല്ല​ക​ളു​ടെ എണ്ണം ഏതാനും ആയിര​മേ​യു​ള്ളു, മലകളിൽ ജീവി​ക്കുന്ന ഗൊറി​ല്ല​ക​ളാ​കട്ടെ ആയിര​ത്തിൽ താഴെ​യും. റോയി​റ്റേ​ഴ്‌സ്‌ പറയുന്ന പ്രകാരം “ആൾക്കു​ര​ങ്ങു​കൾ ഉള്ള 24-ഓളം രാജ്യ​ങ്ങ​ളിൽ അവയെ രക്ഷിക്കാ​നുള്ള പദ്ധതികൾ തയ്യാറാ​ക്കു​ന്ന​തി​നാ​യി ഗവേഷ​ക​രോ​ടും പരിസ്ഥി​തി​സം​ര​ക്ഷ​ണ​വാ​ദി​ക​ളോ​ടും ഗവണ്മെ​ന്റു​ക​ളോ​ടും നാട്ടു​കാ​രോ​ടും ഒപ്പം യുഎൻ പ്രവർത്തി​ച്ചു​വ​രി​ക​യാണ്‌.” (g03 4/22)

ആഗോള ആയുധ ശേഖരം വർധി​ക്കു​ന്നു

രണ്ടായി​ര​ത്തൊ​ന്നിൽ, ലോക​വ്യാ​പ​ക​മാ​യി പോലീ​സി​ന്റെ​യും പട്ടാള​ത്തി​ന്റെ​യും വിമത സേനക​ളു​ടെ​യും സ്വകാര്യ വ്യക്തി​ക​ളു​ടെ​യും കൈവ​ശ​മു​ണ്ടാ​യി​രുന്ന ചെറി​യ​തരം വെടി​ക്കോ​പ്പു​ക​ളു​ടെ എണ്ണം 639 ദശലക്ഷം ആയിരു​ന്നു എന്ന്‌ കണക്കാ​ക്ക​പ്പെ​ടു​ന്ന​താ​യി യുഎൻ പിന്തു​ണ​യോ​ടു​കൂ​ടി നടത്തിയ ഒരു പഠനമായ സ്‌മോൾ ആർമ്‌സ്‌ സർവേ 2002 റിപ്പോർട്ടു ചെയ്യുന്നു. “ഇത്‌ മുൻ കണക്കു​കളെ അപേക്ഷിച്ച്‌ 16 ശതമാ​ന​മെ​ങ്കി​ലും കൂടു​ത​ലാണ്‌” എന്ന്‌ സർവേ കണ്ടെത്തി. പുതു​താ​യി നിർമി​ക്കുന്ന ആയുധങ്ങൾ നിമിത്തം ചെറിയ ആയുധ​ങ്ങ​ളു​ടെ ആഗോള ശേഖരം ഓരോ വർഷവും ഏകദേശം ഒരു ശതമാനം വീതം വർധി​ക്കു​ന്നു​മുണ്ട്‌. ഇന്ന്‌ ലോക​വ്യാ​പ​ക​മാ​യി, 98 രാജ്യ​ങ്ങ​ളി​ലാ​യി കുറഞ്ഞത്‌ 1,000 കമ്പനികൾ കൈ​ത്തോ​ക്കു​കൾ, റൈഫി​ളു​കൾ, മോർട്ടാ​റു​കൾ, തോള​ത്തു​വെച്ച്‌ പ്രവർത്തി​പ്പി​ക്കാ​വുന്ന റോക്കറ്റ്‌ വിക്ഷേ​പ​ണാ​യു​ധങ്ങൾ തുടങ്ങി​യവ നിർമി​ക്കു​ന്നുണ്ട്‌. റിപ്പോർട്ടു പറയു​ന്ന​ത​നു​സ​രിച്ച്‌, “തിരക​ളും മറ്റും ഉൾപ്പെടെ ആഗോ​ള​മാ​യി നിർമി​ക്ക​പ്പെ​ടുന്ന ചെറി​യ​തരം വെടി​ക്കോ​പ്പു​ക​ളു​ടെ രണ്ടായി​രാ​മാ​ണ്ടി​ലെ മതിപ്പു മൂല്യം . . . 700 കോടി അമേരി​ക്കൻ ഡോള​റെ​ങ്കി​ലും വരുമാ​യി​രു​ന്നു.” ചെറി​യ​തരം വെടി​ക്കോ​പ്പു​ക​ളു​ടെ ആഗോള വ്യാപാ​ര​ത്തിൽ 80 മുതൽ 90 വരെ ശതമാനം നിയമാ​നു​സൃ​ത​മാണ്‌. ഏറ്റവും കൂടുതൽ വെടി​ക്കോ​പ്പു​കൾ (59 ശതമാനം) വാങ്ങി​ക്കൂ​ട്ടു​ന്നതു സൈനി​കേതര പൗരന്മാ​രാണ്‌. (g03 2/22)

പള്ളികൾ അല്ലാതാ​കുന്ന പള്ളികൾ

“മാർക്ക്‌ ട്വെയ്‌ൻ 1881-ൽ മോൺട്രി​യോൾ സന്ദർശി​ച്ച​പ്പോൾ, ‘ഒരു പള്ളിജ​നാ​ല​യെ​ങ്കി​ലും തകർക്കാ​തെ നിങ്ങൾക്ക്‌ ഒരു ഇഷ്ടിക​പോ​ലും എറിയാൻ കഴിയു​ക​യില്ല’ എന്ന്‌ അദ്ദേഹം അഭി​പ്രാ​യ​പ്പെട്ടു. ഇന്നാകട്ടെ പള്ളികൾ പരിഷ്‌ക​രി​ച്ചു നിർമി​ച്ചി​രി​ക്കുന്ന താമസ​സ്ഥ​ല​ങ്ങ​ളു​ടെ ജനാല​ക​ളാ​യി​രി​ക്കും തകരുക,” മോൺട്രി​യോ​ളി​ലെ വർത്തമാ​ന​പ​ത്ര​മായ ദ ഗസറ്റ്‌ പറയുന്നു. ആ നഗരത്തിൽ 600-ഓളം ആരാധന സ്ഥലങ്ങൾ ഇപ്പോ​ഴും അവശേ​ഷി​ക്കു​ന്നു​ണ്ടെ​ങ്കി​ലും അടുത്ത പത്തു വർഷത്തി​നു​ള്ളിൽ അവയിൽ നൂറോ​ളം പള്ളികൾ, മുഖ്യ​മാ​യും കത്തോ​ലി​ക്ക​പ്പ​ള്ളി​കൾ, വിൽക്കേണ്ടി വന്നേക്കാം എന്നാണ്‌ പത്രം പറയു​ന്നത്‌. “മോൺട്രി​യോൾ അതിരൂ​പ​ത​യു​ടെ കണക്കനു​സ​രിച്ച്‌ 1960 മുതൽ 25 കത്തോ​ലിക്ക ഇടവക​ക​ളാണ്‌ പൂട്ടേ​ണ്ടി​വ​ന്നത്‌.” കാനഡ​യി​ലെ കത്തോ​ലി​ക്ക​രു​ടെ എണ്ണം 1871-ൽ ഉണ്ടായി​രുന്ന 15 ലക്ഷത്തിൽനിന്ന്‌ 1971 ആയപ്പോ​ഴേ​ക്കും ഒരു കോടി​യോ​ളം ആയി ഉയർന്നു. എന്നിട്ടും, “പള്ളിയിൽ ഹാജരാ​കു​ന്ന​വ​രു​ടെ എണ്ണം കുത്തനെ താണു, വിശേ​ഷി​ച്ചും ക്വി​ബെക്‌ പ്രവി​ശ്യ​യിൽ,” ദ ഗസറ്റ്‌ പറയുന്നു. മോൺട്രി​യോ​ളിൽ പള്ളിക​ളി​ലെ ഹാജർനില 1970-ലെ 75 ശതമാ​ന​ത്തിൽനിന്ന്‌ ഇന്ന്‌ വെറും 8 ശതമാ​ന​ത്തോ​ള​മാ​യി കുറഞ്ഞി​രി​ക്കു​ന്നു എന്ന്‌ മോൺട്രി​യോൾ അതിരൂ​പ​ത​യിൽ ഇടയവേല ആസൂ​ത്രണം ചെയ്യുന്ന ബെർനാർ ഫൊർറ്റാൻ പത്ര​ത്തോ​ടു പറഞ്ഞു. (g03 2/22)

സമ്പത്തും ആരോ​ഗ്യ​വും ഉണ്ടെങ്കി​ലും ശുഭ​പ്ര​തീ​ക്ഷ​യി​ല്ലാ​തെ

രണ്ടായി​ര​ത്തൊ​ന്നിൽ “തുടർച്ച​യായ മൂന്നാം വർഷവും സാമൂ​ഹിക-സാമ്പത്തിക സ്ഥിതി അഭിവൃ​ദ്ധി പ്രാപി​ച്ചു” എന്ന്‌ റിപ്പോർട്ടു​കൾ സൂചി​പ്പി​ക്കു​ന്നെ​ങ്കി​ലും കാനഡ​ക്കാർക്ക്‌ ഇപ്പോ​ഴും ഭാവി സംബന്ധിച്ച്‌ യാതൊ​രു ശുഭ​പ്ര​തീ​ക്ഷ​യു​മില്ല എന്ന്‌ ദ ടൊറ​ന്റോ സ്റ്റാർ പ്രസ്‌താ​വി​ച്ചു. കനേഡി​യൻ സമൂഹ വികസന സമിതി​യി​ലെ ഗവേഷകർ കണ്ടെത്തിയ പ്രകാരം, “കാനഡ​ക്കാ​രു​ടെ സാമ്പത്തിക സുരക്ഷി​ത​ത്വ​ബോ​ധം കുറഞ്ഞി​രി​ക്കു​ന്നു, ജോലി സ്ഥലങ്ങളിൽ അവർ കൂടുതൽ സമ്മർദം അനുഭ​വി​ക്കു​ന്നു, സാമൂ​ഹിക-സാമ്പത്തിക സുരക്ഷാ സംവി​ധാ​ന​ങ്ങ​ളിൽ അവർക്കു വിശ്വാ​സം നഷ്ടപ്പെ​ട്ടു​കൊ​ണ്ടി​രി​ക്കു​ന്നു, തങ്ങൾ അക്രമ​ങ്ങൾക്കി​ര​യാ​കാൻ കൂടുതൽ സാധ്യ​ത​യു​ള്ള​താ​യി അവർ ഭയക്കുന്നു.” ഉത്‌ക​ണ്‌ഠ​യു​ടെ കാരണ​ങ്ങ​ളാ​യി പരാമർശി​ച്ചി​രി​ക്കു​ന്ന​വ​യിൽ “പണപ്പെ​രു​പ്പ​ത്തിന്‌ ആനുപാ​തി​ക​മ​ല്ലാത്ത ശമ്പളം, വ്യക്തി​പ​ര​മായ കടബാ​ധ്യ​ത​ക​ളു​ടെ വർധന, . . . ചിലതരം ചികിത്സ ലഭിക്കു​ന്ന​തിന്‌ നാളുകൾ കാത്തു​കെ​ട്ടി​ക്കി​ട​ക്കേണ്ട അവസ്ഥ, കുതി​ച്ചു​യ​രുന്ന മരുന്നു​വില, വർധി​ച്ചു​വ​രുന്ന വാഹനാ​പ​ക​ടങ്ങൾ, കൊടിയ കുറ്റകൃ​ത്യ​ങ്ങൾ പെരു​കി​വ​രി​ക​യാണ്‌ എന്ന അനാവശ്യ ഭയം” എന്നിവ​യെ​ല്ലാം പെടുന്നു. വാർത്താ​ലേ​ഖകർ ഇപ്രകാ​രം പ്രസ്‌താ​വി​ക്കു​ന്നു: “സുരക്ഷി​ത​ത്വ​ത്തെ മനസ്സിന്റെ ഒരു അവസ്ഥാ​വി​ശേ​ഷ​മാ​യി നാം നിർവ​ചി​ച്ചാൽ നാം അധഃപ​ത​ന​ത്തി​ലേക്കു നീങ്ങു​ക​യാണ്‌ എന്നാണ്‌ അതിനർഥം.” (g03 4/08)

അപര്യാ​പ്‌ത​മായ വിവാഹ പരിശീ​ല​നം

വിവാ​ഹ​ത്തി​നു​മു​മ്പേ ഒരുമി​ച്ചു താമസി​ച്ചു തുടങ്ങുന്ന ദമ്പതി​ക​ളിൽ 40 ശതമാ​ന​ത്തി​ല​ധി​ക​വും വിവാ​ഹ​ത്തി​നു​ശേഷം പത്താം വാർഷി​കം എത്തും മുമ്പ്‌ വിവാ​ഹ​മോ​ചനം നേടുന്നു എന്ന്‌ ന്യൂ​യോർക്കി​ലെ ഡെയ്‌ലി ന്യൂസ്‌ വർത്തമാ​ന​പ​ത്രം റിപ്പോർട്ടു ചെയ്യുന്നു. നാഷണൽ സെന്റർ ഫോർ ഹെൽത്ത്‌ സ്റ്റാറ്റി​സ്റ്റി​ക്‌സി​ന്റെ കണക്കനു​സ​രിച്ച്‌, വിവാ​ഹ​ത്തി​നു​മുമ്പ്‌ ഒരുമി​ച്ചു താമസി​ച്ചി​രു​ന്ന​വ​രും വിവാഹം കഴിഞ്ഞ്‌ പത്തുവർഷം പിന്നി​ട്ടി​രി​ക്കു​ന്ന​വ​രു​മായ ദമ്പതികൾ ഒടുവിൽ വിവാ​ഹ​മോ​ചനം നേടാ​നുള്ള സാധ്യത ഇരട്ടി​യാണ്‌. “വിവാഹം കൂടാതെ ഒരുമി​ച്ചു പാർക്കു​ന്നത്‌ അനുചി​ത​മാ​ണെന്നു വിശ്വ​സി​ക്കു​ക​യും വിവാഹം കഴിക്കു​ന്ന​തി​നെ കുറിച്ചു ചിന്തി​ക്കു​ക​യും ചെയ്യുന്ന ഒരു പുരു​ഷ​നും സ്‌ത്രീ​യും ഭാവി​യിൽ വിവാ​ഹ​മോ​ചനം നടത്താൻ സാധ്യ​ത​യി​ല്ലാത്ത കൂട്ടത്തി​ലാ​യി​രി​ക്കും” എന്ന്‌ റിപ്പോർട്ടി​ന്റെ മുഖ്യ ലേഖക​നായ മാത്യു ബ്രാം​ലെറ്റ്‌ പറയുന്നു. കൂടാതെ, വിവാഹ ഉപദേ​ശ​ക​യായ ആലിസ്‌ സ്റ്റീഫെൻസി​ന്റെ നിരീ​ക്ഷ​ണ​ത്തിൽ വിവാ​ഹ​ത്തി​നു മുമ്പ്‌ ഒരുമി​ച്ചു പാർത്തി​രു​ന്നവർ “വിവാഹ ബന്ധത്തിലെ വൈകാ​രിക സമ്മർദ​ങ്ങ​ളു​മാ​യി പൊരു​ത്ത​പ്പെ​ടാൻ അത്ര തയ്യാറ​ല്ലാ​ത്ത​വ​രാ​യാണ്‌ കാണ​പ്പെ​ടു​ന്നത്‌.” (g03 4/08)

തലവേദന സംഹാ​രി​കൾ തലവേ​ദ​ന​യാ​കു​മ്പോൾ

“നാഡീ​രോ​ഗ​വി​ദ​ഗ്‌ധ​നായ മൈക്കൾ ആന്തണി​യു​ടെ കണക്കു പ്രകാരം, തലവേദന നിമിത്തം ക്ലേശി​ക്കുന്ന 10 ശതമാ​ന​ത്തോ​ളം ആളുകൾക്ക്‌ ‘വേദന സംഹാ​രി​ക​ളു​ടെ ദുരു​പ​യോ​ഗ​ത്തിൽനിന്ന്‌’ ഉണ്ടാകു​ന്ന​താണ്‌ അത്‌” എന്ന്‌ ഓസ്‌​ട്രേ​ലി​യ​യി​ലെ സിഡ്‌നി​യിൽ പ്രസി​ദ്ധീ​ക​രി​ക്കുന്ന ദ ഡെയ്‌ലി ടെല​ഗ്രാഫ്‌ പ്രസ്‌താ​വി​ക്കു​ന്നു. “ആഴ്‌ച​യിൽ ഒരിക്ക​ലോ മറ്റോ ഉണ്ടാകുന്ന തലവേദന, ഡോക്ട​റു​ടെ കുറിപ്പു കൂടാതെ ലഭിക്കുന്ന വേദന സംഹാ​രി​ക​ളു​ടെ അമിത ഉപയോ​ഗം നിമിത്തം ദിവസ​വു​മുള്ള തലവേ​ദ​ന​യാ​യി പരിണ​മി​ച്ചേ​ക്കാം.” രക്തക്കു​ഴ​ലു​ക​ളു​ടെ വികാസം നിയ​ന്ത്രി​ക്കുന്ന ഒരു വസ്‌തു​വായ “സിറോ​റ്റോ​നിൻ തലവേ​ദ​ന​യ്‌ക്കുള്ള ഗുളി​കകൾ ദുരു​പ​യോ​ഗം ചെയ്യു​ന്ന​വ​രിൽ കുറഞ്ഞു​പോ​കു​ന്ന​താ​യി” ന്യൂ സൗത്ത്‌ വെയ്‌ൽസ്‌ സർവക​ലാ​ശാ​ല​യി​ലെ പ്രൊ​ഫ​സ​റായ ആന്തണി കണ്ടെത്തി. “സിറോ​റ്റോ​നി​ന്റെ അളവു കുറഞ്ഞു​പോ​കു​ന്നത്‌ ധമനികൾ അനിയ​ന്ത്രി​ത​മാ​യി വികസി​ക്കു​ന്ന​തിന്‌ ഇടയാ​ക്കു​ന്നു, ഫലമോ കടുത്ത തലവേ​ദ​ന​യും,” അദ്ദേഹം നിരീ​ക്ഷി​ക്കു​ന്നു. കൊടി​ഞ്ഞി​യു​ടെ ഉപദ്ര​വ​മു​ള്ളവർ ഓടി​ച്ചെന്ന്‌ കടയിൽനി​ന്നു ഗുളിക വാങ്ങി കഴിക്കു​ന്ന​തി​നു പകരം ഡോക്ട​റു​ടെ നിർദേ​ശ​പ്ര​കാ​ര​മുള്ള ഔഷധങ്ങൾ വേണം ഉപയോ​ഗി​ക്കാൻ എന്ന്‌ പ്രൊ​ഫസർ ആന്തണി ശുപാർശ ചെയ്യുന്നു. അദ്ദേഹം ഇങ്ങനെ തുടരു​ന്നു: “ഒരു രോഗി പല ഡോസ്‌ വേദന സംഹാരി ആഴ്‌ച​യിൽ മൂന്നു പ്രാവ​ശ്യ​ത്തിൽ കൂടുതൽ ഉപയോ​ഗി​ക്കു​ന്നെ​ങ്കിൽ, അല്ലെങ്കിൽ ഒരു ഡോസ്‌ ആഴ്‌ച​യിൽ മൂന്നു പ്രാവ​ശ്യം ഉപയോ​ഗി​ക്കു​ന്നെ​ങ്കിൽപ്പോ​ലും ഏതാനും മാസങ്ങൾക്കു​ള്ളിൽ അയാളു​ടെ തലവേദന മൂർച്ഛി​ച്ചി​രി​ക്കും.” (g03 4/22)

ഗർഭി​ണി​കൾക്ക്‌ രാവി​ലെ​യു​ണ്ടാ​കുന്ന മനംപി​രട്ടൽ ശമിപ്പി​ക്കൽ

“ഗർഭി​ണി​ക​ളിൽ 70 മുതൽ 80 വരെ ശതമാ​ന​ത്തി​നും രാവിലെ മനംപി​രട്ടൽ അനുഭ​വ​പ്പെ​ടു​ന്ന​താ​യി കണക്കാ​ക്ക​പ്പെ​ടു​ന്നു” എന്ന്‌ ഓസ്‌​ട്രേ​ലി​യ​യി​ലെ സൺ-ഹെറാൾഡ്‌ ദിനപ്പ​ത്രം പ്രസ്‌താ​വി​ക്കു​ന്നു. ഗർഭകാ​ല​ത്തി​ന്റെ ആരംഭ​ത്തിൽ സ്‌ത്രീ​കൾക്ക്‌ രാവിലെ എഴു​ന്നേൽക്കു​മ്പോൾ മിക്ക​പ്പോ​ഴും ഓക്കാ​ന​വും ഛർദി​യും ഉണ്ടാകാ​റുണ്ട്‌. പ്രൊ​ജ​സ്റ്റ​റോൺ എന്ന ഹോർമോ​ണി​ന്റെ അളവ്‌ ഗർഭകാ​ലത്ത്‌ വർധി​ക്കു​ന്ന​തു​നി​മി​ത്തം അത്‌ കൂടുതൽ ദഹന രസം ഉത്‌പാ​ദി​പ്പി​ക്കു​ന്ന​താ​യി​രി​ക്കാം ഈ സ്ഥിതി​വി​ശേ​ഷ​ത്തി​നു കാരണ​മെന്നു കരുത​പ്പെ​ടു​ന്നു. കൂടാതെ, “ഗർഭകാ​ലത്ത്‌ സ്‌ത്രീ​ക​ളു​ടെ ഘ്രാണ ശക്തി വർധി​ക്കു​ന്ന​തു​നി​മി​ത്തം അവർക്ക്‌ പെട്ടെന്ന്‌ ഓക്കാനം വരുന്നു.” ഗർഭകാല മനംപി​ര​ട്ട​ലിന്‌ ഒറ്റമൂ​ലി​കൾ ഒന്നുമി​ല്ലെ​ങ്കി​ലും പത്രം ശുപാർശ ചെയ്യുന്ന പ്രകാരം ചൂടുള്ള സ്ഥലങ്ങൾ ഒഴിവാ​ക്കു​ന്നതു നല്ലതാണ്‌, കാരണം ആവിയു​ള്ള​പ്പോൾ മനംപി​രട്ടൽ വർധി​ക്കു​ന്നു; കൂടാതെ ആവശ്യ​ത്തിന്‌ ഉറങ്ങു​ന്ന​തും പകൽ ഇടയ്‌ക്കൊ​ക്കെ ഒന്നു മയങ്ങു​ന്ന​തും മുറിച്ച നാരങ്ങ മണക്കു​ന്ന​തും ഒക്കെ ആശ്വാസം നൽകി​യേ​ക്കാം. “[പാലോ മറ്റുപാ​നീ​യ​ങ്ങ​ളോ ഇല്ലാതെ] സിരി​യ​ലോ റസ്‌ക്കോ പോലെ കറുമു​റാ തിന്നാ​വുന്ന എന്തെങ്കി​ലും കിടക്ക​യിൽനിന്ന്‌ എഴു​ന്നേൽക്കും മുമ്പ്‌ കഴിച്ചു​നോ​ക്കുക. എല്ലായ്‌പോ​ഴും സാവധാ​നം മാത്രം കിടക്ക​യിൽനിന്ന്‌ എഴു​ന്നേ​റ്റു​പോ​കുക,” പത്രം തുടരു​ന്നു. “പ്രൊ​ട്ടീൻ സമൃദ്ധ​മായ ലഘുഭ​ക്ഷണം കൂടെ​ക്കൂ​ടെ കഴിക്കുക.” “എന്നാൽ ഗർഭകാല മനംപി​ര​ട്ട​ലിന്‌ ഒരു നല്ല വശം കൂടി​യുണ്ട്‌, അതായത്‌ ഇത്തരം അസ്വാ​സ്ഥ്യ​ങ്ങൾ ഉണ്ടാകുന്ന അമ്മമാ​രിൽ ഗർഭം അലസി​പ്പോ​കാ​നുള്ള സാധ്യത കുറവാണ്‌ എന്ന്‌ അടുത്ത​കാ​ലത്തെ പഠനങ്ങൾ സൂചി​പ്പി​ക്കു​ക​യു​ണ്ടാ​യി,” പത്രം പറഞ്ഞു. (g03 4/22)