യുവജ​നങ്ങൾ ചോദി​ക്കു​ന്നു . . .

ചെയ്യു​ന്ന​തെ​ന്തും പരിപൂർണ ആയിരി​ക്ക​ണ​മെന്ന്‌ എനിക്കു തോന്നു​ന്നത്‌ എന്തു​കൊണ്ട്‌?

“എന്റെ ഡാഡി ഒരു അധ്യാ​പകൻ ആയിരു​ന്ന​തു​കൊണ്ട്‌, എല്ലാ വിഷയ​ത്തി​ലും എനിക്ക്‌ ‘എ’ ഗ്രേഡു കിട്ടാൻ എല്ലാവ​രും പ്രതീ​ക്ഷി​ച്ചി​രു​ന്നു. ചില​പ്പോ​ഴൊ​ക്കെ ഞാൻ കരഞ്ഞു കരഞ്ഞാണ്‌ ഉറങ്ങി​യി​രു​ന്നത്‌.”—ലിയ. a

“ഞാനൊ​രു പരിപൂർണ​താ​വാ​ദി​യാണ്‌. ഞാൻ എന്തുതന്നെ ചെയ്‌താ​ലും അത്‌ ഏറ്റവും മികച്ച​താ​വണം, അല്ലെങ്കിൽ മറ്റുള്ളവർ ചെയ്യു​ന്ന​തിൽനി​ന്നു തികച്ചും വ്യത്യ​സ്‌ത​മാ​യി​രി​ക്കണം, അല്ലാത്ത​പക്ഷം അതു ചെയ്യു​ന്ന​തു​കൊണ്ട്‌ യാതൊ​രു അർഥവു​മില്ല എന്നൊ​ക്കെ​യാണ്‌ എനിക്കു തോന്നു​ന്നത്‌.”—കേലബ്‌.

നിങ്ങൾ ചെയ്യു​ന്ന​തെ​ന്തും എല്ലായ്‌പോ​ഴും പരിപൂർണ​മാ​യി​രി​ക്കണം എന്ന ചിന്ത നിങ്ങൾക്കു​ണ്ടോ? എത്ര കഠിന​മാ​യി പരി​ശ്ര​മി​ച്ചി​ട്ടും നിങ്ങളു​ടെ പ്രകടനം ഒട്ടും ശരിയാ​യില്ല എന്നു വിചാ​രിച്ച്‌ നിങ്ങൾ എല്ലായ്‌പോ​ഴും വിഷമി​ക്കാ​റു​ണ്ടോ? ഒരുത​ര​ത്തി​ലുള്ള വിമർശ​ന​ങ്ങ​ളെ​യും നേരി​ടാൻ നിങ്ങൾക്കു കഴിയാ​തെ പോകു​ന്നു​ണ്ടോ? നിങ്ങളു​ടെ പ്രതീ​ക്ഷ​പോ​ലെ കാര്യങ്ങൾ നടക്കാതെ വരു​മ്പോൾ, നിങ്ങ​ളെ​ത്തന്നെ മഠയൻ, കഴിവു​കെ​ട്ടവൻ, ഒന്നിനും കൊള്ളാ​ത്തവൻ എന്നൊക്കെ സ്വയം വിളിച്ചു കുറ്റ​പ്പെ​ടു​ത്താ​റു​ണ്ടോ? കാര്യങ്ങൾ ശരിയാ​യി നടക്കണ​മെ​ങ്കിൽ അതു നിങ്ങൾതന്നെ ചെയ്യണം എന്നു നിങ്ങൾ ചിന്തി​ക്കാ​റു​ണ്ടോ? ശരിയാ​യി​ല്ലെ​ങ്കി​ലോ എന്ന പേടി​കൊ​ണ്ടു ചില​പ്പോൾ കാര്യങ്ങൾ ചെയ്യു​ന്നതു നീട്ടി​വെ​ക്കാ​നോ അതു ചെയ്യാ​തി​രി​ക്കാ​നോ നിങ്ങൾ ശ്രമി​ക്കാ​റു​ണ്ടോ?

മറ്റുള്ള​വ​രു​മാ​യുള്ള നിങ്ങളു​ടെ ബന്ധം എങ്ങനെ​യു​ള്ള​താണ്‌? ചുറ്റു​മു​ള്ള​വ​രൊ​ന്നും നിങ്ങളു​ടെ അത്രയും തികഞ്ഞവർ അല്ലാത്ത​തി​നാൽ ആരെയും കൂട്ടു​കാ​രാ​ക്കാൻ നിങ്ങൾക്കു കഴിയാ​തെ വരുന്നു​ണ്ടോ? മറ്റുള്ള​വ​രു​ടെ പിഴവു​ക​ളും തെറ്റു​ക​ളും നിങ്ങളെ അമിത​മാ​യി വിഷമി​പ്പി​ക്കു​ന്നു​ണ്ടോ? ഈ ചോദ്യ​ങ്ങ​ളിൽ ഏതി​നെ​ങ്കി​ലും ഉള്ള നിങ്ങളു​ടെ ഉത്തരം ഉവ്വ്‌ എന്നാ​ണെ​ങ്കിൽ, പരിപൂർണ​രാ​യി​രി​ക്കാ​നുള്ള ഒരുതരം പ്രവണ​ത​യു​മാ​യി നിങ്ങൾ മല്ലിടു​ന്നു​ണ്ടെ​ന്നാ​യി​രി​ക്കാം അതു കാണി​ക്കു​ന്നത്‌. അങ്ങനെ​യെ​ങ്കിൽ ഇക്കാര്യ​ത്തിൽ നിങ്ങൾ ഒറ്റയ്‌ക്കല്ല. ഇതു യുവജ​ന​ങ്ങ​ളിൽ സാധാ​ര​ണ​മാണ്‌—പ്രത്യേ​കിച്ച്‌, സമർഥ​രോ നേട്ടങ്ങൾ കൊയ്യു​ന്ന​വ​രോ ആയ യുവജ​ന​ങ്ങ​ളിൽ. b

പരിപൂർണ​താ​വാ​ദ​ത്തി​നു കാരണ​മെ​ന്താണ്‌? ഗവേഷ​കർക്ക്‌ ഇതേക്കു​റി​ച്ചു സിദ്ധാ​ന്തങ്ങൾ മാത്രമേ ഉള്ളൂ. പരിപൂർണ​താ​വാ​ദം—പിഴവ​റ്റവർ ആയിരി​ക്കു​ന്ന​തിൽ എന്താണു തെറ്റ്‌? (ഇംഗ്ലീഷ്‌) എന്ന പുസ്‌തകം പറയു​ന്നതു ശ്രദ്ധി​ക്കുക: “പരിപൂർണ​താ​വാ​ദം ഒരു രോഗമല്ല; അതു പകരുന്ന ഒന്നല്ല. അതു പാരമ്പ​ര്യ​മാ​യി കിട്ടു​ന്നതല്ല; ജന്മനാ​ലു​ള്ള​തു​മല്ല. അങ്ങനെ​യെ​ങ്കിൽ നിങ്ങൾ എങ്ങനെ​യാണ്‌ ഒരു പരിപൂർണ​താ​വാ​ദി ആയിത്തീർന്നത്‌? ബാല്യ​കാ​ല​ത്താണ്‌ ഇതു വികാസം പ്രാപി​ക്കു​ന്നത്‌ എന്നാണു ചില വിദഗ്‌ധ​രു​ടെ അഭി​പ്രാ​യം. കുടും​ബ​ത്തിൽനി​ന്നുള്ള സമ്മർദം, സ്വയം അടി​ച്ചേൽപ്പി​ക്കുന്ന സമ്മർദം, സാമൂ​ഹിക സമ്മർദം, മാധ്യ​മ​ങ്ങ​ളിൽനി​ന്നുള്ള സമ്മർദം, യാഥാർഥ്യ​വു​മാ​യി ബന്ധമി​ല്ലാത്ത റോൾ മോഡ​ലു​കൾ ഇവയെ​ല്ലാം ചേർന്നു സൃഷ്ടി​ക്കുന്ന വലിയ സമ്മർദ​ത്തി​ന്റെ തിരത്ത​ള്ള​ലിൽപ്പെട്ട്‌ ചിലയാ​ളു​കൾ ജീവി​ത​കാ​ലം മുഴു​വ​നും വിഷണ്ണ​രും കുറ്റ​ബോ​ധ​മു​ള്ള​വ​രും അമിതാ​ധ്വാ​നി​ക​ളും ആയി മാറുന്നു.”

കാരണം എന്തും ആയി​ക്കൊ​ള്ളട്ടെ, എല്ലായ്‌പോ​ഴും പിഴവ​റ്റവർ ആയിരി​ക്ക​ണ​മെ​ന്നുള്ള വാശി നിങ്ങളു​ടെ ജീവി​തത്തെ തകരാ​റി​ലാ​ക്കും. പരിപൂർണ​താ​വാ​ദം എന്താ​ണെ​ന്നും അതു നിങ്ങൾക്കു ദോഷം ചെയ്യു​ന്നത്‌ എന്തു​കൊ​ണ്ടാ​ണെ​ന്നും നമു​ക്കൊന്ന്‌ അടുത്തു പരിചി​ന്തി​ക്കാം.

 എന്താണ്‌ പരിപൂർണ​താ​വാ​ദം?

പരിപൂർണ​താ​വാ​ദം എന്നു പറയു​ന്നത്‌ കേവലം, ഏറ്റവും നന്നായി കാര്യങ്ങൾ ചെയ്യു​ന്ന​തി​നാ​യി കഠിന​ശ്രമം ചെയ്യു​ന്ന​തോ നന്നായി ചെയ്‌തു​തീർത്ത ഒരു ജോലി​യെ​പ്രതി അഭിമാ​നം കൊള്ളു​ന്ന​തോ അല്ല. കാരണം, സദൃശ​വാ​ക്യ​ങ്ങൾ 22:29-ൽ, “പ്രവൃ​ത്തി​യിൽ സാമർത്ഥ്യ​മുള്ള പുരു​ഷനെ” ബൈബിൾ പ്രകീർത്തി​ക്കു​ന്നുണ്ട്‌. കൂടാതെ, പല മേഖല​ക​ളി​ലും അസാമാ​ന്യ നൈപു​ണ്യം നേടി​യി​രുന്ന ചില വ്യക്തി​കളെ കുറിച്ചു ബൈബിൾ അനുകൂ​ല​മാ​യി സംസാ​രി​ക്കു​ക​യും ചെയ്യുന്നു. (1 ശമൂവേൽ 16:18; 1 രാജാ​ക്ക​ന്മാർ 7:13, 14) അതു​കൊണ്ട്‌, വളരെ ശ്രേയ​സ്‌ക​ര​മാ​യി കാര്യങ്ങൾ ചെയ്യാൻ ശ്രമി​ക്കു​ന്ന​തും ഉന്നതവും അതേസ​മയം എത്തിപ്പി​ടി​ക്കാൻ പറ്റുന്ന​തു​മായ ചില ലക്ഷ്യങ്ങൾ ഉണ്ടായി​രി​ക്കു​ന്ന​തും നല്ലതാണ്‌. അങ്ങനെ ഒരുവന്‌ ‘തന്റെ പ്രയത്‌ന​ത്താൽ സുഖം അനുഭ​വി​ക്കാൻ’ കഴിയും.—സഭാ​പ്ര​സം​ഗി 2:24.

എന്നാൽ, ഒരു പരിപൂർണ​താ​വാ​ദി അത്തരം സംതൃ​പ്‌തി ആസ്വദി​ക്കാൻ പറ്റിയ മനോ​നി​ല​യിൽ ആയിരി​ക്കില്ല. നേട്ടങ്ങളെ കുറി​ച്ചുള്ള ആ വ്യക്തി​യു​ടെ വീക്ഷണം ഒട്ടും ആരോ​ഗ്യ​ക​രമല്ല. പരിപൂർണ​താ​വാ​ദ​ത്തിൽ, “എത്തിപ്പി​ടി​ക്കാൻ കഴിയാത്ത ലക്ഷ്യങ്ങ​ളും (അതായത്‌ പരിപൂർണത) എത്ര നന്നായി പരി​ശ്ര​മി​ച്ചാ​ലും സംതൃ​പ്‌തി​യ​ട​യാ​നാ​കാത്ത മാനസി​കാ​വ​സ്ഥ​യും” ഉൾപ്പെ​ട്ടി​രി​ക്കു​ന്ന​താ​യി ചില വിദഗ്‌ധർ അഭി​പ്രാ​യ​പ്പെ​ടു​ന്നു. ഫലമോ? അത്‌ ഒരു വ്യക്തിയെ “സമ്മർദ​ത്തിന്‌ അടിമ​യാ​ക്കു​ന്നു, താൻ ഒരു സമ്പൂർണ പരാജ​യ​മാ​ണെ​ന്നുള്ള ചിന്തയി​ലേക്ക്‌ അവനെ/അവളെ തള്ളിവി​ടു​ന്നു.” അതു​കൊണ്ട്‌, ഒരു ഉറവിടം പരിപൂർണ​താ​വാ​ദത്തെ ഇപ്രകാ​രം നിർവ​ചി​ക്കു​ന്നു: “നിങ്ങളും ചുറ്റു​പാ​ടു​ക​ളും അല്ലെങ്കിൽ നിങ്ങളോ ചുറ്റു​പാ​ടു​ക​ളോ തികച്ചും പിഴവ​റ്റ​താ​യി​രി​ക്കണം എന്ന യുക്തി​ബോ​ധ​മി​ല്ലാത്ത വിശ്വാ​സം” “ജീവി​ത​ത്തിൽ നിങ്ങൾ ചെയ്യു​ന്നത്‌ എന്തും അണുവിട വ്യതി​ച​ലി​ക്കാ​തെ, പിശകോ ചേർച്ച​യി​ല്ലാ​യ്‌മ​യോ ഒന്നും ഇല്ലാതെ അടിമു​ടി തികവു​റ്റ​താ​യി​രി​ക്കണം എന്നുള്ള പ്രബല​മായ മനോ​ഭാ​വ​മാണ്‌” അത്‌.

അങ്ങനെ​യെ​ങ്കിൽ, “നിങ്ങളു​ടെ സ്വർഗ്ഗീ​യ​പി​താ​വു സൽഗു​ണ​പൂർണ്ണൻ ആയിരി​ക്കു​ന്ന​തു​പോ​ലെ നിങ്ങളും സൽഗു​ണ​പൂർണ്ണ​രാ​കു​വിൻ” എന്ന്‌ യേശു പറഞ്ഞില്ലേ? (മത്തായി 5:48) ഉവ്വ്‌, പക്ഷേ ഒരു വ്യക്തി പരിപൂർണൻ ആയിരി​ക്കണം എന്ന്‌ പറയു​ക​യാ​യി​രു​ന്നില്ല യേശു. വാസ്‌ത​വ​ത്തിൽ “എല്ലാവ​രും പാപം ചെയ്‌തു ദൈവ​തേ​ജസ്സു ഇല്ലാത്ത​വ​രാ​യി​ത്തീർന്നു” എന്നാണു ബൈബിൾ പറയു​ന്നത്‌. (റോമർ 3:23) അങ്ങനെ​യെ​ങ്കിൽ യേശു എന്താണ്‌ അർഥമാ​ക്കി​യത്‌? “പൂർണത” എന്ന പദത്തിന്‌ തികഞ്ഞ​താ​യി​രി​ക്കുക എന്ന അർഥം ബൈബിൾ നൽകുന്നു. (മത്തായി 19:21) സ്‌നേ​ഹത്തെ കുറിച്ചു സംസാ​രി​ക്കു​മ്പോ​ഴാണ്‌ നാം പൂർണ​രാ​യി​രി​ക്കണം എന്ന്‌ യേശു പറഞ്ഞത്‌, സ്‌നേഹം പ്രകട​മാ​ക്കു​ന്ന​തിൽ കൂടുതൽ തികഞ്ഞ​വ​രാ​യി​രി​ക്കാൻ അവൻ തന്റെ അനുഗാ​മി​കളെ പ്രോ​ത്സാ​ഹി​പ്പി​ക്കു​ക​യാ​യി​രു​ന്നു. എങ്ങനെ? ശത്രു​ക്ക​ളെ​പ്പോ​ലും സ്‌നേ​ഹി​ച്ചു​കൊ​ണ്ടു സ്‌നേഹം വ്യാപി​പ്പി​ക്കു​ന്ന​തി​ലൂ​ടെ. ബൈബിൾ എഴുത്തു​കാ​ര​നായ ലൂക്കൊസ്‌ യേശു​വി​ന്റെ ഈ വാക്കുകൾ രേഖ​പ്പെ​ടു​ത്തി: “അങ്ങനെ നിങ്ങളു​ടെ പിതാവു മനസ്സലി​വു​ള്ളവൻ ആകുന്ന​തു​പോ​ലെ നിങ്ങളും മനസ്സലി​വു​ള്ളവർ ആകുവിൻ.”—ലൂക്കൊസ്‌ 6:36.

ചെയ്യുന്ന എന്തിലും പരിപൂർണത കൈവ​രി​ക്കുക സാധ്യ​മാണ്‌ എന്ന മിഥ്യാ​ധാ​ര​ണ​യി​ലാ​ണു പൂർണ​താ​വാ​ദി​കൾ കിണഞ്ഞു ശ്രമി​ക്കു​ന്നത്‌. അതു​കൊണ്ട്‌ അവർ മറ്റുള്ള​വ​രിൽനി​ന്നും അമിത​മാ​യി പ്രതീ​ക്ഷി​ച്ചേ​ക്കാം. ഒരിക്ക​ലും സംതൃ​പ്‌ത​ര​ല്ലാ​ത്തവർ—പരിപൂർണ​താ​വാ​ദ​ത്തി​ന്റെ ബന്ധനത്തിൽനി​ന്നു നിങ്ങ​ളെ​ത്തന്നെ മോചി​ത​രാ​ക്കുക (ഇംഗ്ലീഷ്‌) എന്ന പുസ്‌തകം പറയുന്ന പ്രകാരം, ഇക്കൂട്ടർ “മറ്റുള്ളവർ ചെയ്യുന്ന ജോലി​യു​ടെ നിലവാ​രം കണ്ട്‌ ആകെ നിരാ​ശ​രാ​കു​ന്ന​വ​രാണ്‌ . . . അവരുടെ അഭി​പ്രാ​യ​ത്തിൽ, അവർക്കു ചുറ്റു​മുള്ള ആളുകൾ ജോലി നന്നായി ചെയ്യു​ന്ന​തിൽ ശ്രദ്ധി​ക്കു​ന്നില്ല, ചെയ്‌ത ജോലി​യിൽ അഭിമാ​നം കൊള്ളു​ന്നു​മില്ല.”

കാർലി​യു​ടെ ഉദാഹ​ര​ണ​മെ​ടു​ക്കുക. അവൾ പഠിക്കാൻ മിടു​ക്കി​യാണ്‌, മാത്രമല്ല സമർഥ​രായ കുട്ടി​കൾക്കുള്ള ഒരു പ്രത്യേക പരിപാ​ടി​യിൽ അവൾ ചേർന്നു പ്രവർത്തി​ക്കു​ന്നു​മുണ്ട്‌. എന്നിരു​ന്നാ​ലും, വ്യക്തി​പ​ര​മായ ബന്ധങ്ങൾ വളർത്തി​യെ​ടു​ക്കു​ന്ന​തിൽ അവൾ പിന്നോ​ക്ക​മാണ്‌. എല്ലാം പിഴവറ്റ വിധത്തിൽ ചെയ്യാൻ ആഗ്രഹി​ക്കു​ന്ന​തി​നാൽ അവൾക്കു മിക്ക കൂട്ടു​കാ​രെ​യും നഷ്ടപ്പെട്ടു. “അവർ ചെയ്യു​ന്ന​തൊ​ന്നും ശരിയാ​കു​ന്നില്ല എന്നാണ്‌ എനിക്കു തോന്നു​ന്നത്‌,” അവൾ വിശദീ​ക​രി​ക്കു​ന്നു.

മറ്റുചി​ലർ പൂർണത പ്രതീ​ക്ഷി​ക്കു​ന്നതു മറ്റുള്ള​വ​രിൽനി​ന്നല്ല തങ്ങളിൽനി​ന്നു​ത​ന്നെ​യാണ്‌. ഒരിക്ക​ലും സംതൃ​പ്‌ത​ര​ല്ലാ​ത്തവർ എന്ന പുസ്‌തകം പറയുന്ന പ്രകാരം, ഇത്തരക്കാർ വിചാ​രി​ക്കു​ന്നത്‌ “തങ്ങളും തങ്ങളുടെ പ്രവർത്ത​ന​ങ്ങ​ളും ഒന്നിനും കൊള്ളില്ല എന്നാണ്‌ . . . മറ്റുള്ളവർ തങ്ങളെ​പ്പറ്റി എന്തു വിചാ​രി​ക്കും എന്നതിനെ കുറിച്ച്‌ അവർ അമിത​മാ​യി ഉത്‌ക​ണ്‌ഠ​പ്പെ​ടു​ന്നു.”

പരിപൂർണ​രാ​യി​രി​ക്കാൻ ശ്രമി​ക്കു​ന്ന​തി​ന്റെ കുഴപ്പം

പിഴവ​റ്റവർ ആയിരി​ക്കാ​നുള്ള ത്വര ആരോ​ഗ്യ​ക​ര​മോ ഗുണം ചെയ്യു​ന്ന​തോ അല്ല. മറിച്ച്‌, ഇതു തികച്ചും അനാ​രോ​ഗ്യ​ക​ര​വും ഹാനി​ക​ര​വു​മാണ്‌. ഏറ്റവും മെച്ചമാ​യി കാര്യങ്ങൾ ചെയ്യാൻ പ്രോ​ത്സാ​ഹി​പ്പി​ക്കു​ന്ന​തി​നു  പകരം ഈ വീക്ഷണം പരാജ​യ​ത്തിൽ കൊ​ണ്ടെ​ത്തി​ക്കും. ഒരു ക്രിസ്‌ത്യാ​നി​യായ ഡാനി​യേ​ലി​ന്റെ കാര്യം പരിചി​ന്തി​ക്കുക. യഹോ​വ​യു​ടെ സാക്ഷി​ക​ളു​ടെ പ്രാ​ദേ​ശിക രാജ്യ​ഹാ​ളി​ലെ ഒരു ക്ലാസ്സിൽവെച്ച്‌ നടത്താ​നുള്ള ഒരു പ്രസംഗ നിയമനം അവനു കിട്ടി, കഠിന​ശ്രമം ചെയ്‌ത്‌ മണിക്കൂ​റു​കൾ ചെലവ​ഴി​ച്ചാണ്‌ താൻ അതു തയ്യാറാ​യി അവതരി​പ്പി​ച്ച​തെന്ന്‌ അവൻ ഓർക്കു​ന്നു. സദസ്സി​ലു​ണ്ടാ​യി​രുന്ന പലരും അവന്റെ നല്ല അവതര​ണത്തെ അഭിന​ന്ദി​ച്ചു. പിന്നീട്‌ ഡാനി​യേ​ലിന്‌ പ്രബോ​ധ​ക​നിൽനിന്ന്‌ നയപര​വും സഹായ​ക​വു​മായ ചില നിർദേ​ശ​ങ്ങ​ളും കിട്ടി. ബൈബിൾ നമ്മോടു പറയു​ന്നതു ശ്രദ്ധി​ക്കുക: “ആലോചന കേട്ടു പ്രബോ​ധനം കൈ​ക്കൊൾക.” (സദൃശ​വാ​ക്യ​ങ്ങൾ 19:20) എന്നാൽ, അവന്റെ പുരോ​ഗ​തി​യെ ലക്ഷ്യമാ​ക്കി നൽകിയ ഗുണ​ദോ​ഷങ്ങൾ സ്വീക​രി​ക്കു​ന്ന​തി​നു പകരം, താനൊ​രു ദയനീയ പരാജ​യ​മാ​ണെന്ന്‌ അവനു തോന്നി. “എന്നി​ലേ​ക്കു​തന്നെ ഒതുങ്ങി​ക്കൂ​ടാൻ ഞാൻ ആഗ്രഹി​ച്ചു,” അവൻ പറയുന്നു. ഉറക്കമി​ല്ലാ​തെ അവൻ ആഴ്‌ചകൾ തള്ളിനീ​ക്കി.

പരിപൂർണ​താ​വാ​ദ​ത്തിന്‌ ഒരുവന്റെ പഠന പ്രാപ്‌തി​കൾക്കു വിഘാതം സൃഷ്ടി​ക്കാൻ കഴിയും. യുവജ​ന​ങ്ങൾക്കുള്ള വിവരങ്ങൾ പ്രദാനം ചെയ്യുന്ന ഒരു വെബ്‌​സൈ​റ്റിൽ വന്ന ഒരു ലേഖന​ത്തിൽ റെയ്‌ച്ചൽ എന്നു പേരുള്ള പെൺകു​ട്ടി ഇങ്ങനെ എഴുതി: “ഹൈസ്‌കൂ​ളിൽ പ്രവേ​ശി​ച്ച​പ്പോൾ നന്നായി പഠിക്ക​ണ​മെന്ന്‌ ഞാൻ തീരു​മാ​നി​ച്ചി​രു​ന്നു. എല്ലായ്‌പോ​ഴും എനിക്ക്‌ ഏറ്റവും ഉയർന്ന ഗ്രേഡു​തന്നെ കിട്ടി. തുടർന്നും അത്‌ അങ്ങനെ​ത​ന്നെ​യാ​യി​രി​ക്കും എന്നു ഞാൻ കരുതി.” എന്നാൽ റെയ്‌ച്ച​ലിന്‌ കണക്കിലെ അങ്കഗണി​തം അത്ര എളുപ്പ​മ​ല്ലാ​യി​രു​ന്നു. അതിന്‌ അവൾക്ക്‌ ‘ബി-പ്ലസ്‌’ ഗ്രേഡാ​ണു കിട്ടി​യത്‌. “മറ്റെല്ലാ​വർക്കും ഇത്‌ ഒരു നല്ല ഗ്രേഡ്‌ ആയിരി​ക്കാം, പക്ഷേ എന്നെ സംബന്ധി​ച്ചി​ട​ത്തോ​ളം . . . അത്‌ എത്ര നാണ​ക്കേ​ടാ​യി​രു​ന്നെ​ന്നോ. എനിക്ക്‌ ആകെ പരി​ഭ്ര​മ​വും ആശങ്കയും തോന്നി . . . ടീച്ചറി​ന്റെ സഹായം തേടാ​നും എനിക്കു മടിയാ​യി​രു​ന്നു, കാരണം ഗൃഹപാ​ഠം ചെയ്യാൻ എനിക്കു സഹായം വേണം എന്നു പറഞ്ഞാൽ എനിക്ക്‌ ഒന്നും മനസ്സി​ലാ​യില്ല എന്നല്ലേ ടീച്ചർ കരുതുക . . . തോൽക്കു​ന്ന​തി​നെ​ക്കാൾ ഭേദം ചത്തുക​ള​യു​ന്ന​താണ്‌ എന്നു​പോ​ലും ചില​പ്പോൾ എനിക്കു തോന്നി,” അവൾ അനുസ്‌മ​രി​ക്കു​ന്നു.

പരാജ​യ​ഭീ​തി നിമിത്തം ആത്മഹത്യ​യെ കുറി​ച്ചു​വരെ ചിന്തി​ച്ചി​ട്ടുള്ള യുവജ​ന​ങ്ങ​ളുണ്ട്‌. എന്നിരു​ന്നാ​ലും, അത്തര​മൊ​രു കടും​കൈ ചെയ്യു​ന്ന​തി​നെ കുറിച്ച്‌ ബഹുഭൂ​രി​പക്ഷം യുവജ​ന​ങ്ങ​ളും ചിന്തി​ക്കാ​റില്ല എന്നത്‌ ആശ്വാ​സ​ക​ര​മാണ്‌. എന്നാൽ, മാനസി​കാ​രോ​ഗ്യ വിദഗ്‌ധ​യായ സിൽവിയ റിം പറയു​ന്നത്‌, അത്തരക്കാർ നിയമ​നങ്ങൾ ഒന്നും ഏറ്റെടു​ക്കാ​തി​രു​ന്നേ​ക്കാം എന്നാണ്‌, അപ്പോൾ പിന്നെ പരാജ​യ​ഭീ​തി വേണ്ടല്ലോ. റിം തുടർന്നു പറയുന്ന പ്രകാരം ചില പരിപൂർണ​താ​വാ​ദി​കൾ “തങ്ങൾ ചെയ്‌തു​തീർത്ത നിയമ​നങ്ങൾ തിരികെ ഏൽപ്പി​ക്കാ​റില്ല, അവർ തങ്ങളുടെ ജോലി​യിൽ അഭിമാ​നം കണ്ടെത്തു​ന്നില്ല, അവർ ഗൃഹപാ​ഠങ്ങൾ മറക്കുന്നു. ഓരോ ഒഴിക​ഴി​വു​കൾ നിരത്തു​ന്നു.”

ഇനി ഇതിന്റെ മറുവശം ചിന്തി​ച്ചാൽ, ചില യുവജ​നങ്ങൾ വിജയം ഉറപ്പാ​ക്കാൻ തക്കവണ്ണം അങ്ങേയറ്റം വരെ പോകും. “ഞാൻ രാത്രി വളരെ വൈകി​വരെ ഇരുന്ന്‌ സ്‌കൂ​ളി​ലെ പാഠ്യ​വി​ഷ​യങ്ങൾ കിറു​കൃ​ത്യ​മാ​യി ചെയ്യാൻ ശ്രമി​ക്കും” എന്ന്‌ ഡാനി​യേൽ സമ്മതി​ക്കു​ന്നു. പക്ഷേ, ഇത്തരം അതിരു​ക​വിഞ്ഞ പ്രവൃ​ത്തി​കൾക്ക്‌ അതി​ന്റേ​തായ ഭവിഷ്യ​ത്തു​ക​ളും ഉണ്ട്‌. അതായത്‌, ക്ലാസ്സിൽ ഇരുന്ന്‌ ഉറക്കം തൂങ്ങും, പഠിത്ത​ത്തിൽ പിന്നോ​ക്ക​മാ​കു​ക​യും ചെയ്യും.

പരിപൂർണ​താ​വാ​ദ​ത്തി​ന്റെ കൈപി​ടി​ച്ചെ​ത്തുന്ന മറ്റുചി​ല​തും കൂടി​യുണ്ട്‌. എപ്പോ​ഴു​മുള്ള ദേഷ്യം, വില​കെ​ട്ട​വ​നാ​ണെന്ന തോന്നൽ, കുറ്റ​ബോ​ധം, ശുഭാ​പ്‌തി​വി​ശ്വാ​സ​മി​ല്ലായ്‌മ, ഭക്ഷണ​ക്ര​മ​ക്കേ​ടു​കൾ, വിഷാദം എന്നിവ. പരിപൂർണ​താ​വാ​ദ​ത്തിന്‌ ഒരുവനെ ആത്മീയ​മാ​യി അപകട​ത്തി​ലാ​ക്കാൻ കഴിയും എന്നതാണ്‌ ഇതിൽ ഏറ്റവും ഗുരു​ത​ര​മായ സംഗതി. ഉദാഹ​ര​ണ​ത്തിന്‌, തങ്ങളുടെ വിശ്വാ​സം മറ്റുള്ള​വ​രു​ടെ മുമ്പിൽ പ്രകടി​പ്പി​ക്കാൻ ബൈബിൾ ക്രിസ്‌ത്യാ​നി​ക​ളോ​ടു പറയുന്നു. (റോമർ 10:10; എബ്രായർ 10:24, 25) എന്നിരു​ന്നാ​ലും, വിവിയൻ എന്നു പേരുള്ള ഒരു പെൺകു​ട്ടി ക്രിസ്‌തീയ യോഗ​ങ്ങ​ളിൽ ഉത്തരങ്ങൾ പറയു​ന്ന​തിൽനി​ന്നു വിട്ടു​നി​ന്നു. തനിക്ക്‌ കാര്യങ്ങൾ വ്യക്തമാ​യി പറയാൻ കഴിയാ​തെ പോയാ​ലോ എന്നായി​രു​ന്നു അവളുടെ പേടി. ലിയ എന്ന യുവതി​ക്കും ഇത്തരം ഭയമു​ണ്ടാ​യി​രു​ന്നു. അവൾ പറയുന്നു: “ഞാൻ എന്തെങ്കി​ലും തെറ്റു പറയു​ക​യാ​ണെ​ങ്കിൽ മറ്റുള്ള​വർക്ക്‌ എന്നെപ്പ​റ്റി​യുള്ള ധാരണ​യ്‌ക്ക്‌ മങ്ങലേൽക്കും. അതു​കൊ​ണ്ടു ഞാൻ മിണ്ടാ​തി​രി​ക്കും.”

അതേ, പരിപൂർണ​രാ​കാൻ ശ്രമി​ക്കു​ന്നത്‌ അപകട​ക​ര​വും അനാ​രോ​ഗ്യ​ക​ര​വും ആണെന്നു വ്യക്തമാ​യി​രി​ക്കു​ന്നു. ഈ ലേഖന​ത്തിൽ വിവരിച്ച ഏതെങ്കി​ലും ലക്ഷണങ്ങൾ നിങ്ങൾക്ക്‌ ഉണ്ടെങ്കിൽ നിങ്ങളു​ടെ മനോ​ഭാ​വ​ത്തി​നു ചില മാറ്റങ്ങൾ വരു​ത്തേ​ണ്ട​തു​ണ്ടെന്ന്‌ നിങ്ങൾക്കു തോന്നി​യേ​ക്കാം. അത്‌ എങ്ങനെ സാധി​ക്കും എന്ന്‌ ഒരു ഭാവി ലേഖനം ചർച്ച ചെയ്യു​ന്ന​താ​യി​രി​ക്കും. (g03 7/22)

[അടിക്കു​റി​പ്പു​കൾ]

[12-ാം പേജിലെ ചിത്രം]

പരാജയഭീതി നിമിത്തം ചില യുവജ​നങ്ങൾ തങ്ങളുടെ നിയമ​നങ്ങൾ ചെയ്‌തു തീർക്കാ​റി​ല്ല

[13-ാം പേജിലെ ചിത്രം]

പരിപൂർണതാവാദം വിഷാ​ദ​വും ആത്മാഭി​മാ​ന​ക്കു​റ​വും ഉളവാ​ക്കി​യേ​ക്കാം