നീരാ​വി​ക്കു​ളി—അന്നും ഇന്നും

നൂറ്റാ​ണ്ടു​ക​ളോ​ളം നിരവധി സംസ്‌കാ​രങ്ങൾ നീരാ​വി​ക്കു​ളി ആസ്വദി​ച്ചി​ട്ടുണ്ട്‌. ഉത്തര അമരി​ന്ത്യ​രു​ടെ ഈനീപീ, റഷ്യക്കാ​രു​ടെ ബാന്യാ, തുർക്കി​ക​ളു​ടെ ഹാമാൻ, ജപ്പാൻകാ​രു​ടെ മുഷി​ബൂ​റോ എന്നിവ​യാണ്‌ പലതരം നീരാ​വി​ക്കു​ളി​ക​ളിൽ ചിലത്‌.

ചൂടേൽക്കാ​നു​ള്ള ഒരു മുറി​യും ഒരു നീരാ​വി​പ്പു​ര​യും അടങ്ങുന്ന കുളി​പ്പു​രകൾ പുരാതന റോമി​ലും ഉണ്ടായി​രു​ന്നു. റോമിൽ പുരാ​വ​സ്‌തു ഗവേഷ​ണ​ത്തി​ന്റെ ഭാഗമാ​യി കുഴി​ച്ചെ​ടു​ത്തി​ട്ടുള്ള കുളി​പ്പു​ര​ക​ളിൽ വെച്ച്‌ ഏറ്റവും മനോ​ഹ​ര​വും ആർഭാടം നിറഞ്ഞ​തു​മാണ്‌ കാരക്കാല കുളി​പ്പു​രകൾ. ഇവ 28 ഏക്കർ സ്ഥലത്തു വ്യാപി​ച്ചു കിടക്കു​ന്ന​തും 1,600 പേർക്കു കുളി​ക്കാ​വു​ന്ന​തും ആയിരു​ന്നു.

അതിരി​ക്ക​ട്ടെ, ഇന്നുവരെ പ്രയോ​ഗ​ത്തി​ലി​രി​ക്കുന്ന രണ്ടുതരം നീരാ​വി​ക്കു​ളി​കളെ കുറിച്ചു പരിചി​ന്തി​ക്കു​ന്ന​തിന്‌ ഞങ്ങൾ നിങ്ങളെ ക്ഷണിക്കു​ക​യാണ്‌. ഒന്ന്‌, മെക്‌സി​ക്കോ​ക്കാ​രു​ടെ ടെമെ​സ്‌കാൾ ആണ്‌. മറ്റൊന്ന്‌ ഫിന്നി​ഷു​കാ​രു​ടെ സോണ​യും. ഇതേക്കു​റി​ച്ചു വായിച്ചു കഴിയു​മ്പോൾ ഇതൊന്നു പരീക്ഷി​ച്ചു നോക്കാൻ മിക്കവാ​റും നിങ്ങൾക്കും തോന്നും!

ടെമെ​സ്‌കാൾ

സ്‌പാ​നീ​ഷു​കാർ മെക്‌സി​ക്കോ​യെ തങ്ങളുടെ അധീന​ത​യി​ലാ​ക്കു​ന്ന​തി​നു മുമ്പ്‌, ആസ്‌ടെ​ക്കു​കൾ, സാപോ​ടെ​ക്കു​കൾ, മിക്‌സ്‌ടെ​ക്കു​കൾ, മായകൾ എന്നിവർ ചികി​ത്സ​യ്‌ക്കും ശുദ്ധീ​ക​ര​ണ​ത്തി​നും ടെമെ​സ്‌കാൾ ഉപയോ​ഗി​ച്ചി​രു​ന്നു. പ്രായ​പൂർത്തി ആകുന്ന​തി​നോട്‌ അനുബ​ന്ധി​ച്ചുള്ള ആചാരങ്ങൾ, പ്രസവം, ബന്ധുവി​ന്റെ ശവസം​സ്‌കാ​രം, മറ്റു ഗോത്ര ചടങ്ങുകൾ എന്നിവ​യോ​ടു ബന്ധപ്പെ​ട്ടാണ്‌ ഇത്തരം കുളി നടത്തി​യി​രു​ന്നത്‌. ടെമെ​സ്‌കാൾ എന്നത്‌ നഹുവാറ്റ്‌ൽ ജനതയു​ടെ ഭാഷയി​ലെ ടെമാ​സ്‌കാ​ളി എന്ന വാക്കിൽനി​ന്നും വന്നതാണ്‌, “കുളി​പ്പുര” എന്നാണ്‌ അതിന്റെ അർഥം. വെയി​ലത്ത്‌ ഉണക്കിയ ഇഷ്ടിക​കൊണ്ട്‌ നിർമി​ച്ചി​രുന്ന ഇവ ദീർഘ​ച​തു​രാ​കൃ​തി​യി​ലോ വൃത്താ​കൃ​തി​യി​ലോ ഉള്ളവയാ​യി​രു​ന്നു. ഇവയുടെ മേൽക്കൂ​ര​യ്‌ക്ക്‌ കമാനാ​കൃ​തി​യാ​യി​രു​ന്നു. ഇതിൽ അഗ്നിപർവത ശിലകൾ ഇട്ട്‌ ചൂടു​പി​ടി​പ്പി​ച്ചി​രു​ന്നു. നീരാവി ഉത്‌പാ​ദി​പ്പി​ക്കു​ന്ന​തി​നാ​യി റോസ്‌മേരി, യൂക്കാ​ലി​പ്‌റ്റസ്‌ തുടങ്ങിയ ഔഷധ ഇലകൾ ശിലകൾക്കു മീതെ എറിയു​മാ​യി​രു​ന്നു. കുളി​ക്കുന്ന വ്യക്തിയെ ആചാര​പ​ര​മാ​യി ഔഷധ  ചെടി​കൾകൊണ്ട്‌ മൃദു​വാ​യി തല്ലുക​യും ചെയ്‌തി​രു​ന്നു. തണുത്ത വെള്ളം തളിച്ചു​കൊ​ണ്ടാണ്‌ ഈ ആചാരം അവസാ​നി​പ്പി​ച്ചി​രു​ന്നത്‌.

വൈ​സ്രോ​യി​യു​ടെ ഭരണകാ​ലത്ത്‌ സ്‌പാ​നിഷ്‌ സന്ന്യാ​സി​മാർ ഈ ആചാര​ത്തി​നെ​തി​രെ പോരാ​ടി, കാരണം സ്‌ത്രീ​പു​രു​ഷ​ന്മാർ ഒന്നിച്ചു കുളി​ക്കു​ന്നത്‌ അനുചി​ത​മാ​ണെന്ന്‌ അവർ കരുതി. പക്ഷേ, ടെമെ​സ്‌കാൾ അതി​നെ​യെ​ല്ലാം അതിജീ​വി​ച്ചു, ഇന്നും മെക്‌സി​ക്കോ​യു​ടെ ചില ഭാഗങ്ങ​ളിൽ ഇതു നിലവി​ലുണ്ട്‌. കുളി നടത്തു​ന്ന​തി​നും രോഗ​നി​വാ​ര​ണ​ത്തി​നും പ്രസവ​ര​ക്ഷ​യ്‌ക്കും വേണ്ടി​യാണ്‌ മുഖ്യ​മാ​യും ഇതുപ​യോ​ഗി​ക്കു​ന്നത്‌. എന്നിരു​ന്നാ​ലും, രാജ്യ​ത്തി​ന്റെ പൈതൃ​ക​ത്തി​ന്റെ ഭാഗം എന്നനി​ല​യിൽ ടെമെ​സ്‌കാ​ളി​ന്റെ മതപര​മായ പ്രാധാ​ന്യം സംബന്ധിച്ച പരമ്പരാ​ഗത വിശ്വാ​സങ്ങൾ പുനരു​ദ്ധ​രി​ക്കാ​നുള്ള താത്‌പ​ര്യം ഉയരു​ന്നുണ്ട്‌.

ഫിന്നിഷ്‌ സോണ

സാധ്യ​ത​യ​നു​സ​രിച്ച്‌ ഏറ്റവും പ്രസി​ദ്ധി​യാർജി​ച്ചി​ട്ടുള്ള നീരാ​വി​ക്കു​ളി ഫിന്നിഷ്‌ സോണ​ത​ന്നെ​യാണ്‌. വാസ്‌ത​വ​ത്തിൽ “സോണ” എന്നത്‌ ഒരു ഫിന്നിഷ്‌ പദമാണ്‌. സോണ​യ്‌ക്ക്‌ ഏകദേശം 2,000 വർഷം പഴക്കമുണ്ട്‌. നന്നായി മൂടാത്ത ഒരു കുഴി​യും അതിന്റെ നടുവി​ലോ കോണി​ലോ ഒരു അടുപ്പും ചേർന്ന​താ​യി​രു​ന്നു ഏറ്റവും പഴയ സോണ. പിന്നീട്‌, പൊ.യു. 12-ാം നൂറ്റാ​ണ്ടോ​ടെ വീടു​കൾക്കു വെളി​യിൽ, ക്യാബിൻ-സോണകൾ പ്രത്യ​ക്ഷ​പ്പെട്ടു തുടങ്ങി.

ഇന്ന്‌, ഫിൻലൻഡിൽ മിക്ക വീടു​ക​ളി​ലും ഒരു സോണ​യുണ്ട്‌—പലകയ​ടിച്ച, വൈദ്യു​തി​കൊ​ണ്ടോ വിറകി​ട്ടു കത്തിച്ചോ ചൂടു​പി​ടി​പ്പി​ക്കു​ന്നവ. ക്യാബിൻ-സോണ​ക​ളി​ലും ഗ്രാമ​പ്ര​ദേ​ശ​ത്തു​ള്ള​വ​യി​ലും വിറകി​ട്ടു കത്തിക്കു​ന്നതു വളരെ സാധാ​ര​ണ​മാണ്‌. വിറകാ​ണെ​ങ്കി​ലും വൈദ്യു​തി​യാ​ണെ​ങ്കി​ലും അടുപ്പി​നു മുകളിൽ കല്ലുകൾ നിരത്താ​റുണ്ട്‌. കുളി​ക്കാർ ഒരു തവി​കൊ​ണ്ടു കല്ലുക​ളിൽ വെള്ളം കോരി​യൊ​ഴിച്ച്‌ ഈർപ്പം വർധി​പ്പി​ക്കു​ന്നു. റോമാ​ക്കാ​രു​ടെ​യും തുർക്കി​ക​ളു​ടെ​യും കുളി​പ്പു​ര​യും ഫിന്നിഷ്‌ സോണ​യും തമ്മിലുള്ള ഒരു പ്രധാന വ്യത്യാ​സം, സോണകൾ സാധാ​ര​ണ​ഗ​തി​യിൽ പലകയ​ടി​ച്ച​വ​യും തടി​കൊ​ണ്ടുള്ള സജ്ജീക​ര​ണ​ങ്ങ​ളോ​ടു കൂടി​യ​വ​യും ആയിരി​ക്കും എന്നതാണ്‌. തടി വേഗം ചൂടു​പി​ടി​ക്കി​ല്ലാ​ത്ത​തി​നാൽ ഉയർന്ന ചൂടിൽപ്പോ​ലും ഇരിപ്പി​ട​ങ്ങ​ളിൽനി​ന്നോ അഴിക​ളിൽനി​ന്നോ ഭിത്തി​യിൽനി​ന്നോ കുളി​ക്കാർക്കു പൊള്ള​ലേൽക്കു​ക​യില്ല.

സോണ ഫിന്നിഷ്‌ സംസ്‌കാ​ര​ത്തി​ന്റെ അവിഭാ​ജ്യ ഘടകമാണ്‌. 3 ഫിന്നി​ഷ്‌കാർക്ക്‌ ഒരു സോണ​വീ​തം ഉണ്ടെന്നു കണക്കുകൾ കാണി​ക്കു​ന്നു. ഫിന്നിഷ്‌ ജനതയിൽ മിക്കവ​രും ആഴ്‌ച​യിൽ ഒരിക്ക​ലെ​ങ്കി​ലും നീരാ​വി​ക്കു​ളി ആസ്വദി​ക്കു​ന്ന​വ​രാണ്‌. വേനൽ അവധികൾ തടാക​ക്ക​ര​യിൽ ചെലവ​ഴി​ക്കാൻ എത്തുന്ന​വ​രിൽ അനേക​രും മിക്കവാ​റും എല്ലാ ദിവസ​വും നീരാ​വി​ക്കു​ളി നടത്തുന്നു! അവർ നീരാ​വി​ക്കു​ളി കഴിഞ്ഞ്‌ തടാക​ത്തി​ലെ തണുത്ത വെള്ളത്തിൽ നീന്തുന്നു. ഇങ്ങനെ മാറി​മാ​റി​യുള്ള കുളി വർഷത്തിൽ ഏതു സമയത്തും ആസ്വദി​ക്കാൻ ആഗ്രഹി​ക്കു​ന്ന​വർക്കു വേണ്ടി, തണുത്തു​റഞ്ഞ തടാക​ങ്ങ​ളു​ടെ കരയിൽ ധാരാളം സോണകൾ സ്ഥാപി​ച്ചി​ട്ടുണ്ട്‌. നീരാ​വി​ക്കു​ളി കഴിഞ്ഞ്‌ തണുത്ത വെള്ളത്തി​ലേക്ക്‌ ഊളി​യി​ടു​ന്ന​തി​നാ​യി ഐസിൽ ഒരു ദ്വാരം ഇട്ടിട്ടുണ്ട്‌.

നീരാ​വി​ക്കു​ളി​യും ആരോ​ഗ്യ​വും

നീരാ​വി​ക്കു​ളി ആരോ​ഗ്യ​ത്തി​നു നല്ലതാ​യ​തി​നാൽ ഫിന്നി​ഷു​കാർ ദീർഘ​കാ​ല​മാ​യി ഇതിന്റെ വക്താക്കൾ ആയിരു​ന്നി​ട്ടുണ്ട്‌. ഒരു ഫിന്നിഷ്‌ പഴമൊ​ഴി ശ്രദ്ധി​ക്കുക: “സോണ പാവ​പ്പെ​ട്ട​വന്റെ ചികി​ത്സാ​വി​ധി​യാണ്‌.” അതേ, 19-ാം നൂറ്റാ​ണ്ടു​വരെ സോണ ഒരു കുളി​പ്പുര എന്നതിൽ ഉപരി ഒരുതരം ആശുപ​ത്രി​യും പ്രസവ​വാർഡും കൂടി ആയിരു​ന്നു.

അസ്സൽ ഒരു നീരാ​വി​ക്കു​ളി, 80 മുതൽ 100 വരെ ഡിഗ്രി സെൽഷ്യസ്‌ ചൂടിൽ 10 മുതൽ 15 വരെ മിനിട്ടു നേര​ത്തേ​ക്കു​ള്ള​താണ്‌. ഇടയ്‌ക്ക്‌ ഒന്നു വിശ്ര​മി​ക്കു​ക​യോ തണുത്ത വെള്ളത്തിൽ കുളി​ക്കു​ക​യോ ചെയ്‌ത​തി​നു ശേഷം പലരും ഇത്‌ ആവർത്തി​ക്കാൻ ഇഷ്ടപ്പെ​ടു​ന്നു. ശരീര​ത്തിൽ ചൂടു തട്ടു​മ്പോൾ രക്തപ്ര​വാ​ഹം വർധി​ക്കു​ന്നു. ത്വക്കിലെ ചെറു സുഷി​രങ്ങൾ തുറക്കു​ന്നു, ലാക്ടിക്‌ ആസിഡു​പോ​ലെ​യുള്ള മാലി​ന്യ​ങ്ങൾ പുറന്ത​ള്ള​പ്പെ​ടു​ന്നു, അങ്ങനെ വിഷാം​ശങ്ങൾ നീക്കം ചെയ്യ​പ്പെ​ടു​ക​യും ശുചി​ത്വം കൈവ​രു​ക​യും ചെയ്യുന്നു. വ്യായാ​മം ചെയ്‌ത​തി​നു ശേഷമു​ണ്ടാ​കുന്ന കഴപ്പും വേദന​യും ശമിക്കാ​നും അലർജി​കൾ, ജലദോ​ഷം, സന്ധിവാ​തം എന്നിവ​യിൽനിന്ന്‌ ആശ്വാസം ലഭിക്കാ​നു​മാണ്‌ മിക്ക​പ്പോ​ഴും നീരാ​വി​ക്കു​ളി നടത്തു​ന്നത്‌. ആരോ​ഗ്യ​ക​ര​മായ ഇത്തരം പ്രയോ​ജ​ന​ങ്ങളെ കുറിച്ച്‌ പല അഭി​പ്രാ​യങ്ങൾ ഉണ്ടെങ്കി​ലും നീരാ​വി​ക്കു​ളി പ്രസരി​പ്പും ക്ഷമതയും ശുചി​ത്വ​വും പ്രദാനം ചെയ്യുന്നു എന്നാണ്‌ ഇതു പ്രിയ​പ്പെ​ടു​ന്നവർ പറയു​ന്നത്‌. ശരീര​ത്തി​നും മനസ്സി​നും അയവു​കി​ട്ടു​ന്ന​തി​നു ചിലർ ദിവസ​ത്തി​ന്റെ ഒടുവിൽ നീരാ​വി​ക്കു​ളി ആസ്വദി​ക്കു​ന്നു. ചൂടും തണുപ്പും ഇടകലർന്ന കുളി നവോ​ന്മേഷം നൽകു​ന്ന​തി​നാൽ പകൽസ​മ​യത്തു നീരാ​വി​ക്കു​ളി നടത്താ​നാണ്‌ മറ്റു ചിലർ താത്‌പ​ര്യ​പ്പെ​ടു​ന്നത്‌. a

സോണ​കൾക്ക്‌ ലോക​മെ​മ്പാ​ടും മുമ്പെ​ന്ന​ത്തെ​ക്കാൾ പ്രചാരം ഏറി​ക്കൊ​ണ്ടി​രി​ക്കു​ക​യാണ്‌, പ്രത്യേ​കി​ച്ചും ഹോട്ട​ലു​ക​ളി​ലും സ്‌പോർട്‌സ്‌ നടത്തുന്ന സ്ഥലങ്ങളി​ലും മറ്റും. എന്നാൽ ഒരു മുന്നറി​യി​പ്പുണ്ട്‌: ചില രാജ്യ​ങ്ങ​ളിൽ “സോണ” എന്ന പദം ചില വേശ്യാ​ല​യ​ങ്ങളെ കുറി​ക്കാൻ ഉപയോ​ഗി​ക്കു​ന്നു. അതു​കൊണ്ട്‌ നിങ്ങൾ സന്ദർശി​ക്കുന്ന സോണ മാന്യ​മായ ഉദ്ദേശ്യ​ത്തിന്‌ ഉപയോ​ഗി​ക്കുന്ന യഥാർഥ സോണ​യാ​ണെന്ന്‌ ഉറപ്പു​വ​രു​ത്തുക.

ചില സ്ഥലങ്ങളിൽ സോണ ശരിയായ വിധത്തിൽ അല്ല പ്രവർത്തി​പ്പി​ക്കു​ന്നത്‌. ഉദാഹ​ര​ണ​ത്തിന്‌, ആവശ്യ​ത്തി​നു കല്ലുകൾ ഉപയോ​ഗി​ക്കാത്ത അടുപ്പി​ന്മേൽ വെള്ളം തളിച്ചാൽ നീരാവി പെട്ടെന്ന്‌ ഉയരു​ക​യും അത്‌ അസ്വസ്ഥത ഉളവാ​ക്കു​ക​യും ചെയ്യും. മാത്രമല്ല, വെള്ളം തീയി​ലേക്ക്‌ അരിച്ചി​റ​ങ്ങു​ക​യും ചെയ്യും. വൈദ്യു​ത അടുപ്പാ​ണെ​ങ്കിൽ അതിന്റെ കോയി​ലു​കൾക്കും കേടു​വ​രും. അതു​കൊണ്ട്‌, നിർമാ​താ​വി​ന്റെ നിർദേ​ശങ്ങൾ പിൻപ​റ്റു​ന്നു എന്നും സോണ വൃത്തി​യു​ള്ള​തും നന്നായി വായു​ക​ട​ക്കു​ന്ന​തും ആക്കി സൂക്ഷി​ക്കു​ന്നു എന്നും ഉറപ്പു​വ​രു​ത്തുക. ഈ നിർദേ​ശങ്ങൾ എല്ലാം പാലി​ക്ക​പ്പെ​ടുന്ന ഒരു സോണ​യിൽ പോകാൻ നിങ്ങൾക്കു സാധി​ക്കു​മെ​ങ്കിൽ, പുരാ​ത​ന​മെ​ങ്കി​ലും നവീന​മായ ഈ നീരാ​വി​ക്കു​ളി ഒന്നു പരീക്ഷി​ച്ചു നോക്കാൻ നിങ്ങൾ ആഗ്രഹി​ച്ചേ​ക്കും. (g03 7/22)

[അടിക്കു​റിപ്പ്‌]

 [23-ാം പേജിലെ ചതുരം/ചിത്രങ്ങൾ]

നീരാവിക്കുളിക്കുള്ള ചില നിർദേ​ശ​ങ്ങൾ

● നീരാ​വി​ക്കു​ളി​ക്കു മുമ്പ്‌ മദ്യവും അമിത ഭക്ഷണവും ഒഴിവാ​ക്കുക.

● ഒരു കുളി​യോ​ടെ തുടങ്ങുക.

● കട്ടിയുള്ള ഒരു തോർത്തിൽ ഇരിക്കുക.

● ഇരിപ്പി​ടം എത്ര താഴെ​യാ​ണോ അത്രയും കുറവാ​യി​രി​ക്കും താപനില.

● അടുപ്പി​നു മുകളിൽ വെച്ചി​രി​ക്കുന്ന കല്ലുക​ളിൽ വെള്ളം അൽപ്പാൽപ്പ​മാ​യി കോരി​യൊ​ഴി​ച്ചു​കൊണ്ട്‌ ഈർപ്പ​ത്തി​ന്റെ അളവു ക്രമീ​ക​രി​ക്കുക.

● അങ്ങേയ​റ്റത്തെ ചൂടു സഹിക്കാ​നോ അപകട​ക​ര​മാം​വി​ധം കൂടുതൽ സമയം സോണ​യിൽ ഒറ്റയി​രിപ്പ്‌ ഇരിക്കാ​നോ കുളി​ക്കാർ തമ്മിൽ നടത്തുന്ന മത്സരങ്ങ​ളിൽ പങ്കു​കൊ​ള്ള​രുത്‌.

● തണുത്ത വെള്ളത്തിൽ കുളി അവസാ​നി​പ്പി​ക്കുക.

[21-ാം പേജിലെ ചിത്രം]

ഒരു “ടെമെ​സ്‌കാൾ” നീരാ​വി​ക്കു​ളി

[കടപ്പാട്‌]

Courtesy of James Grout/Soprintendenza Archeologica di Roma

[21-ാം പേജിലെ ചിത്രം]

റോമിലെ കാരക്കാല കുളി​പ്പു​ര​കൾ