നിങ്ങളുടെ ആരോഗ്യത്തെ ബാധിക്കുന്ന തിരഞ്ഞെടുപ്പുകൾ
നിങ്ങളുടെ ആരോഗ്യത്തെ ബാധിക്കുന്ന തിരഞ്ഞെടുപ്പുകൾ
നല്ല ആഹാരം കഴിച്ച് നല്ല ആരോഗ്യത്തോടിരിക്കുക എന്നത് മിക്കപ്പോഴും ഒരു വെല്ലുവിളിയാണ്. ഇന്നത്തെ സമ്മർദം നിറഞ്ഞ ചുറ്റുപാടിൽ, അപ്പപ്പോൾ ഭക്ഷണം ഉണ്ടാക്കി കഴിക്കുന്നതിനു പകരം, നേരത്തേ പാകം ചെയ്തു സംസ്കരിച്ചു വെച്ചിരിക്കുന്ന “കംഫർട്ട് ഫുഡ്” കഴിക്കുന്നത് കൂടുതൽ സൗകര്യപ്രദമായി പലരും കരുതുന്നു. അതുപോലെ കായിക പ്രവർത്തനങ്ങളിൽ ഏർപ്പെടുന്നതിനെക്കാൾ ടെലിവിഷന്റെയോ കമ്പ്യൂട്ടറിന്റെയോ മുമ്പിൽ സമയം ചെലവഴിക്കാൻ അവർ ഇഷ്ടപ്പെടുന്നു. എന്നാൽ ഇത്തരം തിരഞ്ഞെടുപ്പുകൾ ഒട്ടനവധി കുട്ടികളെയും മുതിർന്നവരെയും ഗുരുതരമായ ആരോഗ്യ പ്രശ്നങ്ങളിൽ കൊണ്ടെത്തിച്ചേക്കാം.
ഏഷ്യയിൽ, “കൊഴുപ്പേറിയ ഭക്ഷണം കഴിക്കുന്നതും കൂടുതൽ കൂടുതൽ പേർ കായികാധ്വാനം കുറഞ്ഞ ജീവിതരീതി പിൻപറ്റുന്നതും പ്രമേഹരോഗം വളരെ വ്യാപകമായിത്തീരുന്നതിന് കാരണമായിരിക്കുന്നു” എന്ന് ഏഷ്യാവീക്ക് മാസിക പറയുന്നു. ഈ രോഗം സമൂഹത്തിലെ തീരെ പ്രായം കുറഞ്ഞവരെ പോലും പിടികൂടിക്കൊണ്ടിരിക്കുകയാണ് എന്നത് ആശങ്കയുണർത്തുന്നു. കാനഡയിൽ, “കൗമാരപ്രായത്തിനു താഴെയുള്ള കുട്ടികളിൽ ഏഴുപേരിൽ ഒരാൾ മാത്രമാണ് വേണ്ടത്ര അളവിൽ പഴങ്ങളും പച്ചക്കറികളും കഴിക്കുന്നത് എന്നു ഗവേഷകർ കണ്ടെത്തി. [മാത്രമല്ല,] ഈ കുട്ടികളിൽ വിയർക്കുന്ന അളവോളം കളികളിലും മറ്റും ഏർപ്പെടുന്നവരുടെ എണ്ണം പകുതിയിലും അൽപ്പംകൂടുതൽ മാത്രമേ വരുന്നുള്ളൂ” എന്നും ദ ഗ്ലോബ് ആൻഡ് മെയിൽ റിപ്പോർട്ടു ചെയ്യുന്നു. ഇത്തരം ജീവിതരീതി ഈ കുട്ടികൾ “അവരുടെ 30-കളിൽ എത്തുമ്പോൾത്തന്നെ ഹൃദ്രോഗം പിടിപെടുന്നതിനുള്ള സാധ്യത അങ്ങേയറ്റം വർധിപ്പിക്കുന്നു” എന്നും റിപ്പോർട്ടു പറയുന്നു.
ഇനി, ഉറക്കത്തിന്റെ ആവശ്യകത സംബന്ധിച്ചു ഗവേഷണം നടത്തുന്നവർ പറയുന്നത്, മുതിർന്നവർക്ക് ഓരോ രാത്രിയിലും ഏതാണ്ട് എട്ടു മണിക്കൂർ ഉറക്കം ആവശ്യമായേക്കാം എന്നും കുട്ടികൾക്ക് അതിലും കൂടുതൽ ഉറക്കം വേണ്ടിവന്നേക്കാം എന്നുമാണ്. ഷിക്കാഗോ സർവകലാശാലയുടെ ഒരു പഠനം വെളിപ്പെടുത്തുന്നത്, തുടർച്ചയായ ആറു രാത്രികളിൽ നാലു മണിക്കൂർ വീതം മാത്രം ഉറങ്ങിയ ആരോഗ്യമുള്ള യുവാക്കൾ സാധാരണഗതിയിൽ വാർധക്യം ചെന്നവരിൽ കാണപ്പെടുന്ന ചില ആരോഗ്യ പ്രശ്നങ്ങളുടെ ലക്ഷണങ്ങൾ കാണിച്ചുതുടങ്ങി എന്നാണ്. ജോലി, പഠനം, വിനോദം എന്നിവയ്ക്കു വേണ്ടിയാണു പലരും തങ്ങളുടെ വിലപ്പെട്ട ഉറക്കത്തെ ബലിചെയ്യുന്നതെങ്കിലും അതിനു ദോഷകരമായ പരിണത ഫലങ്ങളിൽ കൊണ്ടെത്തിക്കാൻ കഴിയും. “വെറുതെ ഒരു കൃത്യം നിർവഹിക്കുന്നതുപോലെയല്ല ഉണർവോടെ, ഫലപ്രദമായി അതു നിർവഹിക്കുന്നതും ഉറക്കം തൂങ്ങാതെ വാഹനം ഓടിച്ചുപോകുന്നതും” എന്ന് ന്യൂയോർക്കിലെ കോർണൽ സർവകലാശാലയിൽ ഉറക്കത്തെ കുറിച്ചു ഗവേഷണം നടത്തുന്ന ജെയിംസ് മാസ്സ് പറയുന്നു.
മറ്റു ചില ഘടകങ്ങളും നമ്മുടെ ശാരീരിക ക്ഷേമത്തെ ബാധിക്കുന്നു. ഉദാഹരണത്തിന്, ശുഭാപ്തിവിശ്വാസം വെച്ചുപുലർത്തുന്നത് നമ്മുടെ ആരോഗ്യത്തിനു പ്രയോജനം ചെയ്യും. ജീവിതത്തിന് യഥാർഥ ഉദ്ദേശ്യം ഉണ്ടെങ്കിൽ ആരോഗ്യമുള്ളവരായി നിലകൊള്ളാൻ സഹായിക്കുന്നതരം തിരഞ്ഞെടുപ്പുകൾ നടത്താൻ അതു നമ്മെ പ്രചോദിപ്പിക്കും. (g03 8/22)