കടലിലെ ദുരന്തം കരയി​ലെ​യും

സ്‌പെയിനിലെ ഉണരുക! ലേഖകൻ

പാരി​സ്ഥി​തി​ക​വും സാമ്പത്തി​ക​വു​മായ ഒരു വിപത്തിന്‌ തുടക്കം കുറിച്ച ദിവസ​മാ​യി​രു​ന്നു 2002 നവംബർ 13. ഇളകി​മ​റി​യുന്ന കടലിൽ വെച്ച്‌ പ്രെസ്റ്റിജ്‌ എന്ന എണ്ണക്കപ്പൽ ചോരാൻ തുടങ്ങി​യത്‌ അന്നാണ്‌. കേടു​പ​റ്റിയ കപ്പലിനെ രക്ഷിക്കാ​നുള്ള ശ്രമങ്ങൾ പരാജ​യ​മ​ടഞ്ഞു. ആറു ദിവസ​ങ്ങൾക്കു ശേഷം—അപ്പോ​ഴേ​ക്കും ഏതാണ്ട്‌ 20,000 ടൺ എണ്ണ ഒലിച്ചു​പോ​യി​രു​ന്നു—എണ്ണക്കപ്പൽ രണ്ടായി പിളർന്ന്‌ ആഴിയു​ടെ ആഴങ്ങളി​ലേക്കു താണു. സ്‌പെ​യി​നി​ന്റെ തീരത്തു​നിന്ന്‌ ഏതാണ്ട്‌ 200 കിലോ​മീ​റ്റർ മാറി​യാ​യി​രു​ന്നു സംഭവം.

കപ്പൽ 50,000 ടണ്ണി​ലേറെ എണ്ണയും​കൊ​ണ്ടാണ്‌ കടലിന്റെ അടിത്ത​ട്ടി​ലേക്കു താണത്‌. അതിൽനിന്ന്‌ ദിവസേന 125 ടണ്ണോളം എണ്ണ പിന്നെ​യും ചോർന്നു​കൊ​ണ്ടി​രു​ന്നു. പുതിയ എണ്ണപ്പാ​ടകൾ രൂപം​കൊ​ണ്ടു. അവ തീര​ത്തേക്ക്‌ അപ്രതി​രോ​ധ്യ​മാം വിധം നീങ്ങി. ഇന്ധന എണ്ണ ശ്യാന​ത​യും (viscosity) വിഷസ്വ​ഭാ​വ​വും ഉള്ളതാ​യി​രു​ന്ന​തി​നാൽ അത്‌ പരിസ്ഥി​തിക്ക്‌ ഏൽപ്പിച്ച ആഘാതം വിശേ​ഷി​ച്ചും വിനാ​ശ​ക​മാ​യി​രു​ന്നു.

അടിഞ്ഞു​കൂ​ടി​യ എണ്ണയിൽനിന്ന്‌ അന്തരീ​ക്ഷ​ത്തിൽ വ്യാപിച്ച രൂക്ഷഗ​ന്ധ​മുള്ള ബാഷ്‌പ​ക​ണങ്ങൾ, തീരങ്ങൾ ശുചി​യാ​ക്കാൻ വന്ന നിരവധി സന്നദ്ധ​സേ​വ​കർക്കു തടസ്സം സൃഷ്ടിച്ചു. മാത്രമല്ല, ഇന്ധന എണ്ണ ടാറിന്റെ വൻ ശേഖരം രൂപം​കൊ​ള്ളാൻ ഇടയാക്കി. അത്‌ കറുത്ത ചൂയിങ്‌ ഗം പോലെ പാറക​ളിൽ പറ്റിപ്പി​ടി​ച്ചു. “ഇത്‌ ചരി​ത്ര​ത്തി​ലെ ഏറ്റവും വലിയ എണ്ണ ദുരന്ത​ങ്ങ​ളിൽ ഒന്നാണ്‌,” ആകസ്‌മിക ജല മലിനീ​ക​ര​ണത്തെ പറ്റിയുള്ള ഡോക്യു​മെ​ന്റേഷൻ, ഗവേഷണ, പരീക്ഷണ സെന്ററി​ന്റെ ഡയറക്ട​റായ മിഷെൽ ഗിരെൻ ദുഃഖ​ത്തോ​ടെ പറഞ്ഞു.

സാഹസിക ശ്രമങ്ങൾ

തങ്ങളുടെ ഉപജീ​വ​ന​മാർഗ​ത്തിന്‌ ഭീഷണി ഉയർത്തുന്ന എണ്ണപ്പാ​ടകൾ നീക്കം​ചെ​യ്യാ​നാ​യി നൂറു​ക​ണ​ക്കിന്‌ മുക്കുവർ കടലിൽ കഠിനാ​ധ്വാ​നം ചെയ്‌തു, അതും ആഴ്‌ച​ക​ളോ​ളം. എണ്ണ, തീരങ്ങളെ മലീമ​സ​മാ​ക്കു​ക​യും ലോക​ത്തി​ലെ ഏറ്റവും സമ്പുഷ്ട​മായ മത്സ്യബന്ധന മേഖല​ക​ളിൽ ഒന്ന്‌ നശിപ്പി​ച്ചു​ക​ള​യു​ക​യും ചെയ്യും മുമ്പേ അതു നീക്കം ചെയ്യാ​നാ​യി മുക്കുവർ ഒരു സാഹസിക പോരാ​ട്ടം തന്നെ നടത്തി. ചിലരാ​ണെ​ങ്കിൽ എണ്ണയിൽ കുഴഞ്ഞ ചെളി കൈ​കൊ​ണ്ടു​തന്നെ വെള്ളത്തിൽനിന്ന്‌ കോരി​യെ​ടു​ത്തു. “നടു​വൊ​ടി​ക്കുന്ന പണിയാ​യി​രു​ന്നു അത്‌. പക്ഷേ ചെറിയ ബോട്ടു​ക​ളി​ലുള്ള ഞങ്ങൾക്ക്‌ അതല്ലാതെ വേറെ മാർഗ​മി​ല്ലാ​യി​രു​ന്നു,” സ്ഥലത്തെ ഒരു മുക്കു​വ​നായ ആന്റോ​ണി​യോ പറഞ്ഞു.

മുക്കുവർ കടലിൽനിന്ന്‌ എണ്ണ നീക്കം​ചെ​യ്യാ​നുള്ള ശ്രമത്തിൽ ഏർപ്പെ​ട്ട​പ്പോൾ, തീരങ്ങൾ ശുചി​യാ​ക്കുന്ന തിരക്കി​ലാ​യി​രു​ന്നു സ്‌പെ​യി​നി​ലെ​മ്പാ​ടു​നി​ന്നു​മെ​ത്തിയ ആയിര​ക്ക​ണ​ക്കിന്‌ സന്നദ്ധ​സേ​വകർ. ഉപയോ​ഗ​ശേഷം കളയാ​വുന്ന വെള്ള പുറങ്കു​പ്പാ​യ​ങ്ങ​ളും മാസ്‌ക്കു​ക​ളും ധരിച്ച അവരെ  കണ്ടാൽ അവർ ജൈവാ​ണു​യു​ദ്ധ​ത്തിൽ ഏർപ്പെ​ട്ടി​രി​ക്കു​ക​യാ​ണെന്നു തോന്നി​പ്പോ​കു​മാ​യി​രു​ന്നു. എന്നാൽ കോരി​ക​കൊണ്ട്‌ എണ്ണ കോരി​യെ​ടുത്ത്‌ തൊട്ടി​യിൽ ആക്കുക​യെന്ന ആയാസ​ക​ര​മായ ജോലി​യാ​യി​രു​ന്നു അവരു​ടേത്‌. ഇതു പിന്നീട്‌ അവി​ടെ​നിന്ന്‌ ചുമന്നു​കൊ​ണ്ടു​പോ​കു​മാ​യി​രു​ന്നു. മുക്കു​വരെ പോ​ലെ​തന്നെ, തീരങ്ങ​ളിൽ വന്നടിഞ്ഞ എണ്ണ കൈ​കൊ​ണ്ടു നീക്കം ചെയ്‌ത​വ​രു​മുണ്ട്‌.

ദാരു​ണ​മായ ഫലങ്ങൾ

“മൂച്ചി​യാ​യി​ലെ കപ്പൽത്തു​റ​യി​ലേക്ക്‌ എണ്ണ ചുഴറ്റി​യെ​റി​യുന്ന കറുത്ത തിരമാ​ലകൾ ആദ്യം കണ്ടപ്പോൾ എനിക്ക്‌ ദുഃഖം അടക്കാ​നാ​യില്ല” എന്ന്‌ വടക്കൻ ഗലിഷ​യി​ലെ കോർകൂ​ബ്യോ​നി​ലെ മേയറായ റാഫാ​യെൽ മൂസോ പറഞ്ഞു. അവിടത്തെ തീരരേഖ താറു​മാ​റാ​യി​പ്പോ​യി​രു​ന്നു. “എണ്ണച്ചോർച്ച ഞങ്ങളുടെ പട്ടണത്തി​ലെ ഒട്ടേറെ പേരുടെ ഉപജീ​വ​നത്തെ ബാധി​ച്ചി​രി​ക്കു​ന്നു.”

സങ്കടക​ര​മെ​ന്നു പറയട്ടെ, സ്‌പെ​യി​നി​ലെ മനോ​ഹ​ര​മായ പുതിയ ദേശീയ പാർക്കായ ലാസ്‌ ഇസ്ലാസ്‌ ആറ്റ്‌ലാ​ന്റി​ക്കാ​സിൽ (അറ്റ്‌ലാ​ന്റിക്‌ ദ്വീപു​കൾ) ഒരു എണ്ണപ്പാട വൻ വിനാശം വിതച്ചു. എണ്ണച്ചോർച്ച വിനാശം വിതയ്‌ക്കു​ന്ന​തി​നു മുമ്പ്‌, കടൽപ്പ​ക്ഷി​ക​ളു​ടെ വൻ പറ്റങ്ങൾ ഗലിഷ​യു​ടെ തീരത്തി​ന​ടു​ത്തു സ്ഥിതി​ചെ​യ്യുന്ന ഈ അഞ്ചു ദ്വീപു​ക​ളിൽ കൂടു​കൂ​ട്ടി​യി​രു​ന്നു. ചുറ്റു​മുള്ള ജലാശ​യ​ഭാ​ഗം സമുദ്ര ജീവി​വർഗ​ങ്ങ​ളാൽ വിശേ​ഷി​ച്ചും സമ്പന്നമാ​യി​രു​ന്നു.

ഡിസംബർ ആരംഭ​മാ​യ​പ്പോ​ഴേ​ക്കും പാർക്കി​ന്റെ തീര​രേ​ഖ​യു​ടെ 95 ശതമാനം എണ്ണയാൽ മലീമ​സ​മാ​യി​ത്തീർന്നി​രു​ന്നു. ഇത്‌ 1,00,000-ത്തോളം പക്ഷികളെ പ്രതി​കൂ​ല​മാ​യി ബാധി​ക്കു​മെ​ന്നാ​യി​രു​ന്നു പക്ഷിശാ​സ്‌ത്ര​ജ്ഞ​രു​ടെ കണക്ക്‌. കടലിൽ ഡൈവ്‌ ചെയ്യു​ന്നവർ, എണ്ണ വലിയ ഉരുള​ക​ളാ​യി കട്ടപി​ടിച്ച്‌ കടൽത്ത​ട്ടിൽ കിടന്ന്‌ മുകളി​ലേ​ക്കും താഴേ​ക്കും ചലിക്കു​ന്നതു കാണു​ക​യു​ണ്ടാ​യി. ലോല​മായ സാമു​ദ്രീയ പരിസ്ഥി​തി വ്യവസ്ഥയെ താറു​മാ​റാ​ക്കി കൊണ്ടി​രി​ക്കു​ക​യാ​യി​രു​ന്നു അവ.

ഒരു പക്ഷി-രക്ഷാ​കേ​ന്ദ്രം സ്ഥാപിച്ച ജേ ഹോൽകൊം ഇങ്ങനെ റിപ്പോർട്ടു ചെയ്‌തു: “സാധാ​ര​ണ​ഗ​തി​യിൽ പക്ഷികൾ ചാകു​ന്നത്‌ വെള്ളത്തിൽ മുങ്ങു​ക​യോ ശരീ​രോ​ഷ്‌മാവ്‌ താഴു​ക​യോ ചെയ്യു​ന്നതു നിമി​ത്ത​മാണ്‌. തൂവലു​കൾ എണ്ണയിൽ കുതിർന്നു പോകു​ന്ന​തു​കൊണ്ട്‌ അവയുടെ താപ​രോ​ധക, ജലരോ​ധക ഗുണങ്ങൾ നഷ്ടമാ​കു​ന്നു. കൂടാതെ, നനഞ്ഞു കുതിർന്ന വസ്‌ത്രങ്ങൾ ഒരു നീന്തൽക്കാ​രനെ അപകട​ത്തി​ലാ​ക്കു​ന്ന​തു​പോ​ലെ കൊഴുത്ത എണ്ണ, പക്ഷികൾ വെള്ളത്തിൽ മുങ്ങി​പ്പോ​കാൻ ഇടയാ​ക്കു​ന്നു. പക്ഷികളെ രക്ഷപെ​ടു​ത്തു​ന്നത്‌ വളരെ​യേറെ സംതൃ​പ്‌തി നൽകി​ത്ത​രുന്ന ഒരു കാര്യ​മാണ്‌, താരത​മ്യേന കുറ​ച്ചെ​ണ്ണ​ത്തി​നെയേ രക്ഷപെ​ടു​ത്താൻ കഴിയു​ന്നു​ള്ളു എങ്കിൽക്കൂ​ടി.”

‘പതിയി​രുന്ന അപകടം’

ലോകം ഊർജ​ത്തി​നാ​യി എണ്ണയെ ആശ്രയി​ക്കു​ന്നു. എന്നാൽ ചെലവു ചുരു​ക്കാ​നാ​യി എണ്ണ മിക്ക​പ്പോ​ഴും കടത്തി​ക്കൊ​ണ്ടു പോകു​ന്നത്‌ അപകട​ക​ര​മായ നിലയിൽ ആയിരി​ക്കുന്ന കപ്പലു​ക​ളി​ലാണ്‌. അതു​കൊണ്ട്‌, ന്യൂ​യോർക്ക്‌ ടൈംസ്‌ ആ സ്ഥിതി​വി​ശേ​ഷത്തെ “പതിയി​രി​ക്കുന്ന അപകടം” എന്നാണു വിശേ​ഷി​പ്പി​ച്ചത്‌.

കഴിഞ്ഞ 26 വർഷത്തി​നു​ള്ളിൽ ഗലിഷ​യു​ടെ തീരത്തി​ന​ടു​ത്താ​യി മുങ്ങുന്ന മൂന്നാ​മത്തെ എണ്ണക്കപ്പ​ലാണ്‌ പ്രെസ്റ്റിജ്‌. ഏതാണ്ട്‌ പത്തു വർഷം മുമ്പ്‌ ഇജിയൻ സീ എന്ന എണ്ണക്കപ്പൽ വടക്കൻ ഗലിഷ​യി​ലെ ലാ കോറൂ​ന്യാ​യ്‌ക്ക്‌ സമീപം കടലിൽ താണ്‌ 40,000 ടൺ അസംസ്‌കൃത എണ്ണ ഒലിച്ചു​പോ​യി. സമീപ​ത്തുള്ള തീര​രേ​ഖ​യു​ടെ ചില ഭാഗങ്ങൾ ആ ദുരന്ത​ത്തിൽനിന്ന്‌ ഇപ്പോ​ഴും മുക്തമാ​യി​ട്ടില്ല. 1976-ൽ ഉർക്കി​യോള എന്ന കപ്പൽ അതേ അഴിമു​ഖത്തു തന്നെ മുങ്ങു​ക​യും 1,00,000 ടണ്ണി​ലേറെ എണ്ണ കടലി​ലേക്കു പ്രവഹി​ക്കു​ക​യും ചെയ്‌തു.

ഏറ്റവും അടുത്ത കാലത്തു​ണ്ടായ വിപത്ത്‌ കണക്കി​ലെ​ടുത്ത്‌, ഇരട്ട പള്ളയി​ല്ലാത്ത എല്ലാ ഇന്ധന-എണ്ണക്കപ്പ​ലു​ക​ളും നിരോ​ധി​ക്കാൻ യൂറോ​പ്യൻ യൂണിയൻ തീരു​മാ​നി​ച്ചി​രി​ക്കു​ക​യാണ്‌. എങ്കിലും, അടിക്കടി ആഘാത​ത്തി​നി​ര​യായ യൂറോ​പ്പി​ന്റെ തീര​രേ​ഖയെ സംരക്ഷി​ക്കാൻ ആ നടപടി മതിയാ​കു​മോ എന്ന്‌ കാത്തി​രു​ന്നു കാണേ​ണ്ടി​യി​രി​ക്കു​ന്നു.

എണ്ണപ്പാ​ട​ക​ളിൽനി​ന്നും വിഷമാ​ലി​ന്യ​ങ്ങ​ളിൽനി​ന്നും അന്തരീക്ഷ മലിനീ​ക​ര​ണ​ത്തിൽനി​ന്നും ഒക്കെ മുക്തമായ ഒരു ലോകം ഉറപ്പു നൽകാൻ മാനുഷ ഗവൺമെ​ന്റു​കൾക്കു കഴിഞ്ഞി​ട്ടില്ല എന്നു വ്യക്തം. എന്നാൽ ക്രിസ്‌ത്യാ​നി​കൾ, ദൈവ​രാ​ജ്യ ഭരണത്തിൻ കീഴിൽ നമ്മുടെ ഗ്രഹം ഒരിക്ക​ലും മലിനീ​ക​രി​ക്ക​പ്പെ​ടു​ക​യി​ല്ലാത്ത ഒരു പറുദീ​സ​യാ​യി മാറുന്ന കാലത്തി​നാ​യി നോക്കി​പ്പാർത്തി​രി​ക്കു​ന്നു.—യെശയ്യാ​വു 11:1, 9; വെളി​പ്പാ​ടു 11:18. (g03 8/22)

[18, 19 പേജു​ക​ളി​ലെ ചിത്രം]

പ്രെസ്റ്റിജ്‌ 50,000 ടൺ എണ്ണയും​കൊ​ണ്ടാണ്‌ കടലിന്റെ അടിത്ത​ട്ടി​ലേക്കു താണത്‌

[കടപ്പാട്‌]

AFP PHOTO/DOUANE FRANCAISE