ഞങ്ങളുടെ വായനക്കാരിൽനിന്ന്‌
ഞങ്ങളുടെ വായനക്കാരിൽനിന്ന്‌
സ്വകാര്യത “നിങ്ങൾക്കു സ്വകാര്യത നഷ്ടമാവുകയാണോ?” എന്ന തലക്കെട്ട്‌ എന്റെ ശ്രദ്ധ പിടിച്ചുപറ്റി. (ഫെബ്രുവരി 8, 2003) കാരണം ഈ വിഷയം സംബന്ധിച്ച, ഏറ്റവുമധികം പ്രതികൾ വിറ്റഴിക്കപ്പെട്ടുകൊണ്ടിരിക്കുന്ന ഒരു പുസ്‌തകത്തിന്റെ രചയിതാവാണ്‌ ഞാൻ. നിങ്ങളുടെ എഴുത്തുകാരൻ മികച്ച ഒരു ജോലിയാണ്‌ ചെയ്‌തിരിക്കുന്നത്‌. കൂടുതലായ ഒരു നിർദേശം തരാൻ ഞാൻ ആഗ്രഹിക്കുന്നു: ആളെ തിരിച്ചറിയിക്കുന്ന എന്തെങ്കിലും കാണിക്കാൻ ആവശ്യപ്പെടുമ്പോൾ ഭവന മേൽവിലാസമോ സോഷ്യൽ സെക്യൂരിറ്റി നമ്പറോ നൽകിയിട്ടില്ലാത്ത പാസ്‌പോർട്ട്‌ ഉപയോഗിക്കുന്നതായിരിക്കും നല്ലത്‌.
ജെ. എൽ., സ്‌പെയിൻ (g03 9/22)
കോപ്പിയടിക്കൽ എനിക്ക്‌ 11 വയസ്സുണ്ട്‌. “യുവജനങ്ങൾ ചോദിക്കുന്നു . . . കോപ്പിയടിക്കുന്നതിൽ എന്താണു തെറ്റ്‌?” എന്ന ലേഖനം എനിക്ക്‌ ഇഷ്ടമായി. (ഫെബ്രുവരി 8, 2003) എനിക്ക്‌ എല്ലായ്‌പോഴും ഉയർന്ന മാർക്കുകൾ കിട്ടാറില്ലെങ്കിലും, എനിക്കു കിട്ടുന്ന മാർക്കുകൾ സത്യസന്ധമായ മാർഗത്തിൽത്തന്നെ ഞാൻ നേടിയതാണെന്ന്‌ എനിക്കറിയാം. വാസ്‌തവത്തിൽ, കോപ്പിയടിക്കാറുള്ള എന്റെ സഹപാഠികളിൽ ചിലർക്ക്‌ എന്നെക്കാൾ കുറവു മാർക്കാണ്‌ കിട്ടുന്നത്‌! ഇനിയും, എനിക്ക്‌ ഒരു നല്ല മനസ്സാക്ഷി കാത്തുസൂക്ഷിക്കാൻ കഴിയുന്നു, അതാണ്‌ ഏറ്റവും പ്രധാനവും.
ഇസഡ്‌. റ്റി., ഓസ്‌ട്രിയ (g03 9/22)
ഞാൻ കോപ്പിയടി എന്ന കെണിയിൽ പെട്ടിരിക്കുകയാണ്‌. ഞാൻ അതിനെ അത്ര ഗൗരവമായി എടുത്തിരുന്നില്ല എന്നതാണ്‌ കാരണമെന്നു തോന്നുന്നു. ഈ ലേഖനം, എബ്രായർ 13:18 പോലുള്ള തിരുവെഴുത്തുകൾ ഓർമിക്കാൻ എന്നെ സഹായിക്കും, അവയാകട്ടെ ഭാവിയിൽ കോപ്പിയടിക്കാനുള്ള പ്രലോഭനമുണ്ടാകുമ്പോഴെല്ലാം അതിനെ ചെറുത്തുനിൽക്കാൻ എന്നെ സഹായിക്കുകയും ചെയ്യും.
എൻ. ഐ., ഇറ്റലി (g03 9/22)
ഞാൻ പത്താം ക്ലാസ്സിലാണു പഠിക്കുന്നത്‌. ചിലപ്പോൾ ഞാൻ പരീക്ഷയ്‌ക്കു കോപ്പിയടിക്കാൻ ശ്രമിച്ചിട്ടുണ്ട്‌, ഇത്‌ മോഷണത്തിനു തുല്യമാണെന്ന്‌ ഞാൻ ഒരിക്കലും തിരിച്ചറിഞ്ഞിരുന്നില്ല! എന്നാൽ ഈ ലേഖനത്തിന്റെ സഹായത്തോടെ, ഇനി ഞാൻ എന്റെ മനസ്സാക്ഷി ശുദ്ധമായി കാത്തുസൂക്ഷിക്കാൻ ശ്രമിക്കും.
കെ. ജി., എസ്‌തോണിയ (g03 9/22)
സുരക്ഷിതമായ ഗർഭകാലം “നിങ്ങളുടെ ഗർഭകാലം സുരക്ഷിതമാക്കുക” എന്ന ലേഖനത്തിനായി നിങ്ങളോടു നന്ദി പറയാൻ ഞാൻ ആഗ്രഹിക്കുന്നു. (ഫെബ്രുവരി 8, 2003) ഗർഭകാലത്ത്‌ ശ്രദ്ധിക്കേണ്ട കാര്യങ്ങൾ സംബന്ധിച്ച്‌ വ്യക്തമായ ഒരു വീക്ഷണം ലഭിക്കാൻ ഈ ലേഖനം എന്നെ സഹായിച്ചു. എനിക്ക്‌ 32 വയസ്സുണ്ട്‌, ഈ ലേഖനം എനിക്ക്‌ തികച്ചും ആവശ്യമായിരുന്നു. ഗർഭകാലം സുരക്ഷിതമാക്കാനും ഈ വിസ്‌മയകരമായ വരദാനത്തോട്‌ വിലമതിപ്പു കാണിക്കാനും ഞാൻ എന്തു ചെയ്യണമെന്ന്‌ എനിക്ക്‌ ഇപ്പോൾ അറിയാം.
ബി. സി., ഇറ്റലി (g03 9/08)
ഒരു സ്‌ത്രീക്ക്‌, ഗർഭധാരണത്തിനു ശേഷം 26-നും 28-നും ഇടയ്‌ക്കുള്ള ആഴ്‌ചയിൽ സ്‌ട്രെപ്‌റ്റോകോക്കസ്‌ ബി നിർണയ പരിശോധന നടത്താനാകുമെന്ന്‌ ലേഖനത്തിൽ പരാമർശിച്ചിരുന്നല്ലോ. എന്നാൽ ഗർഭധാരണത്തിനു ശേഷം 35-നും 37-നും ഇടയ്‌ക്കുള്ള ആഴ്‌ചയിലാണ്‌ ഈ പരിശോധന നടത്തേണ്ടത്‌ എന്നാണ്‌ ഇപ്പോഴത്തെ നിർദേശം. ഈ ലേഖനം വായിക്കുന്നവർ, എന്തുകൊണ്ടാണ്‌ തങ്ങളിൽ 26-നും 28-നും ഇടയ്‌ക്കുള്ള ആഴ്‌ചയിൽ ഈ പരിശോധന നടത്താത്തത്‌ എന്ന്‌ തങ്ങളുടെ ഡോക്ടർമാരോടു ചോദിക്കാൻ സാധ്യതയുണ്ട്‌. ഉണരുക!-യിലെ വിവരങ്ങൾ തങ്ങളുടെ രോഗികളെ സംബന്ധിച്ചിടത്തോളം ആശ്രയയോഗ്യമല്ലെന്ന്‌ പറഞ്ഞ്‌ ഡോക്ടർമാർ ഈ മാസിക തള്ളിക്കളഞ്ഞേക്കാം.
എൽ. എസ്‌., ഐക്യനാടുകൾ (g03 9/08)
“ഉണരുക!”യുടെ പ്രതികരണം: ഞങ്ങളുടെ മാസികയുടെ ലക്കങ്ങൾ 80-ലധികം ഭാഷകളിലേക്കു വിവർത്തനം ചെയ്യേണ്ടതുള്ളതിനാൽ അവയിലെ ലേഖനങ്ങൾ മാസങ്ങൾക്കു മുമ്പേ ഞങ്ങൾക്കു തയ്യാറാക്കേണ്ടതുണ്ട്‌. സുരക്ഷിതമായ ഗർഭകാലത്തെ കുറിച്ചുള്ള ലേഖനം എഴുതുമ്പോൾ പ്രസ്‌തുത പരിശോധനയ്‌ക്കുള്ള ഉചിതമായ സമയമായി പലരും അംഗീകരിച്ചിരുന്ന കാലഘട്ടം ഗർഭധാരണത്തിനു ശേഷം 26-നും 28-നും ഇടയ്‌ക്കുള്ള ആഴ്‌ചയായിരുന്നു. എന്നാൽ 2002 ആഗസ്റ്റിൽ അമേരിക്കൻ ബാലചികിത്സാ അക്കാദമി, രോഗനിയന്ത്രണത്തിനുള്ള യു.എസ്‌. കേന്ദ്രങ്ങൾ നൽകിയ ഏറ്റവും പുതിയ വിവരങ്ങൾ പ്രസിദ്ധീകരിക്കുകയുണ്ടായി. ഇപ്പോൾ, വായനക്കാരൻ പരാമർശിച്ചിരിക്കുന്നതുപോലെ പരിശോധനയ്‌ക്കായി നിർദേശിച്ചിരിക്കുന്ന കാലഘട്ടം ഗർഭധാരണത്തിനു ശേഷം 35-നും 37-നും ഇടയ്‌ക്കുള്ള ആഴ്‌ചയാണ്‌.
കരൾ, അണ്ടിപ്പരിപ്പ്‌ എന്നീ ഭക്ഷ്യവസ്‌തുക്കളിൽ ഇരുമ്പും ഫോളിക്‌ ആസിഡും അടങ്ങിയിട്ടുണ്ടെന്ന്‌ 21-ാം പേജിലെ ഒരു അടിക്കുറിപ്പിൽ പറഞ്ഞിരുന്നു. എന്നാൽ കരളിൽ വിറ്റമിൻ എ ധാരാളമായി അടങ്ങിയിട്ടുണ്ട്‌—അതാകട്ടെ നിങ്ങളുടെ ലേഖനം പറയുന്നതു പോലെ കുഞ്ഞിന്‌ അപകടം ചെയ്‌തേക്കാം.
ബി. ജെ., ബ്രിട്ടൻ (g03 9/08)
“ഉണരുക!”യുടെ പ്രതികരണം: ഇതു ചൂണ്ടിക്കാണിച്ചതിനു നന്ദി.