ഞങ്ങളുടെ വായനക്കാരിൽനിന്ന്
ഞങ്ങളുടെ വായനക്കാരിൽനിന്ന്
ഷൂസ് “നിങ്ങളുടെ ഷൂസ് ധരിക്കാൻ സുഖപ്രദമാണോ?” (ഏപ്രിൽ 8, 2003) എന്ന ലേഖനത്തിനു നന്ദി. വർഷങ്ങളോളം എനിക്കു പാദത്തിനു പ്രശ്നങ്ങൾ ഉണ്ടായിരുന്നു. കാൽവിരലുകളിൽ പലതവണ ചെറിയ ശസ്ത്രക്രിയകളും നടത്തിയിട്ടുണ്ട്. എന്റെ ഒരു പാദത്തിന് അൽപ്പം വലുപ്പക്കൂടുതൽ ഉണ്ടെന്ന് ഒടുവിൽ ഞാൻ കണ്ടുപിടിച്ചു. വർഷങ്ങളോളം, ശരിക്കും പാകമല്ലാത്ത ഷൂസ് ധരിച്ചതിനാൽ അസ്ഥികൾക്ക് തകരാറ് ഉള്ളവർക്കായി ഉണ്ടാക്കുന്ന ഷൂസുകളേ എനിക്ക് ഇപ്പോൾ ധരിക്കാൻ കഴിയൂ.
ആർ. ജി., ഐക്യനാടുകൾ (g03 11/08)
അത് വളരെ നല്ല ലേഖനം ആയിരുന്നു. എന്നിരുന്നാലും, ഷൂസ് വാങ്ങാൻ ഏറ്റവും പറ്റിയത് പാദം കൂടുതൽ വികസിക്കാൻ സാധ്യതയുള്ള ഉച്ചതിരിഞ്ഞുള്ള സമയമാണെന്ന് നിങ്ങൾ പരാമർശിച്ചു കണ്ടില്ല.
എ. ഡബ്ലിയു., കാനഡ (g03 11/08)
“ഉണരുക!”യുടെ പ്രതികരണം: ആ നിരീക്ഷണത്തിനു നന്ദി. ദയവായി, “ഉണരുക!”യുടെ 1999 ആഗസ്റ്റ് 8 ലക്കത്തിലെ “ലോകത്തെ വീക്ഷിക്കൽ” എന്നതിൻ കീഴിൽ “ഷൂസുകളുമായി ബന്ധപ്പെട്ട ആരോഗ്യ പ്രശ്നങ്ങൾ” എന്ന ഭാഗം കാണുക.
കോപ്പിയടി “യുവജനങ്ങൾ ചോദിക്കുന്നു . . .കോപ്പിയടിക്കുന്നതിൽ എന്താണു തെറ്റ്?” (ഫെബ്രുവരി 8, 2003) എന്ന ലേഖനത്തിന് എന്റെ നന്ദി അറിയിക്കാൻ ആഗ്രഹിക്കുന്നു. ഒരു സർവകലാശാല വിദ്യാർഥിനിയാണു ഞാൻ. അഞ്ചാം ക്ലാസ്സിൽ പഠിക്കുമ്പോൾ മുതൽ എനിക്ക് കോപ്പിയടിക്കുന്ന ശീലം ഉണ്ടായിരുന്നു. അതു ശരിയായിരുന്നോ എന്നതു സംബന്ധിച്ച് എനിക്ക് എല്ലായ്പോഴും സംശയമുണ്ടായിരുന്നെങ്കിലും കൃത്യമായ ഒരു ഉത്തരം കണ്ടെത്താൻ കഴിഞ്ഞില്ല. അതുകൊണ്ട് ഈ ലേഖനം യഥാർഥത്തിൽ ഒരു നിധിതന്നെയായിരുന്നു. അടുത്ത പരീക്ഷ മുതൽ ഞാൻ എന്റെ ശീലങ്ങൾക്കു മാറ്റം വരുത്തുകയാണ്. പരീക്ഷയ്ക്കുവേണ്ടി ഞാൻ ഇപ്പോൾ പഠിച്ചുകൊണ്ടിരിക്കുന്നു.
എസ്. വൈ., യൂക്രെയിൻ (g03 11/08)
ബാലവേശ്യാവൃത്തി “ബാലവേശ്യാവൃത്തി—ഒരു ദാരുണ യാഥാർഥ്യം” (മാർച്ച് 8, 2003) എന്ന ലേഖന പരമ്പരയ്ക്കു നന്ദി. വളരെ വേദന ഉളവാക്കുന്ന ഒരു വിഷയം കൈകാര്യം ചെയ്തപ്പോഴും ഇതിന് ഇരകളായവർക്ക് പ്രത്യാശ പകർന്നതാണ് എനിക്കു വിശേഷാൽ ഹൃദയസ്പർശിയായി തോന്നിയത്. നിങ്ങൾ പരാമർശിച്ച യഥാർഥ ജീവിതാനുഭവങ്ങൾ എന്റെ സ്വന്തം അനുഭവത്തെ പ്രതിഫലിപ്പിക്കുന്നവയായിരുന്നു. യഹോവയുടെ സഹായത്താൽ, ഈ പഴയ വ്യവസ്ഥിതിയിൽപ്പോലും കഠോരമായ വൈകാരികപീഡയുടെ മുറിവുകൾ ഒരു പരിധിവരെ ഉണക്കാനാകും എന്നാണ് അത്തരം ജീവിതാനുഭവങ്ങൾ കാണിക്കുന്നത്.
പി. ആർ., ജർമനി (g03 11/08)
തേങ്ങ “ഭൂമിയിലെ ഏറ്റവും ഉപയോഗപ്രദമായ ഒരു വൃക്ഷഫലം” (ഏപ്രിൽ 8, 2003) എന്ന ലേഖനത്തെ പ്രതി നന്ദി പ്രകടിപ്പിക്കാൻ ഞാൻ ആഗ്രഹിക്കുന്നു. അടുത്തകാലത്ത് ഞാൻ മെക്സിക്കോ സന്ദർശിക്കുകയുണ്ടായി. തേങ്ങയുടെ ബഹുമുഖോപയോഗങ്ങൾ എനിക്ക് അവിടെ നേരിട്ടു കാണാൻ കഴിഞ്ഞു. ലേഖനത്തിൽ പറഞ്ഞിരിക്കുന്ന ഏതാണ്ട് എല്ലാ ഉപയോഗങ്ങളും ഞാൻ അവിടെ കണ്ടു. ഒരു ഉപയോഗം കൂടി ഞാൻ മനസ്സിലാക്കി. ഓലകൾ കീറിക്കളഞ്ഞ 10-ഓ 15-ഓ ഉണങ്ങിയ ഈർക്കിൽ ഒന്നിച്ചു കെട്ടിയാൽ, വഴങ്ങുന്ന നല്ല ഒന്നാന്തരം ഒരു ഈച്ചതല്ലിയായി!
ഡി. എസ്., ഐക്യനാടുകൾ (g03 11/22)
ഈ ലേഖനം വായിച്ചപ്പോൾ എന്റെ ഓർമകൾ 1930-കളിലേക്കു പോയി. അന്ന്, എന്റെ വല്യമ്മച്ചി, ചിരട്ടകൊണ്ട് കപ്പുകൾ ഉണ്ടാക്കുമായിരുന്നു. വല്യമ്മച്ചിയുടെ അയൽക്കാരിൽ പലരും തങ്ങളുടെ പുര പണിയുന്നതിന് തെങ്ങിന്റെ തടിയും മേൽക്കൂര മേയുന്നതിന് ഉണങ്ങിയ തെങ്ങോലകളും ആണ് ഉപയോഗിച്ചിരുന്നത്. ഇത്തരത്തിലുള്ള മനോഹര ലേഖനങ്ങൾക്കായി നന്ദിപറയാൻ ഞാൻ ആഗ്രഹിക്കുന്നു.
എം. ബി., ഐക്യനാടുകൾ (g03 11/22)
മുലയൂട്ടൽ “ലോകത്തെ വീക്ഷിക്കൽ” എന്ന ഭാഗത്ത്, “മുലയൂട്ടുന്നതിന്റെ പ്രയോജനങ്ങൾ” (ഏപ്രിൽ 8, 2003) എന്നതിനു കീഴിൽ വന്ന വിവരങ്ങൾ എന്നെ അമ്പരപ്പിച്ചുകളഞ്ഞു. മുലപ്പാൽ കുടിച്ചിട്ടില്ലാത്തവരുടെ പ്രതിരോധവ്യവസ്ഥ ദുർബലമായിരുന്നേക്കാം എന്നതിനോട് ഞാൻ പൂർണമായും യോജിക്കുന്നു. എനിക്ക് മുലപ്പാൽ കുടിക്കാൻ അവസരം കിട്ടിയില്ല. എന്നെ കൂടെക്കൂടെ ഫ്ളൂ ബാധിക്കാറുണ്ട്. എന്നാൽ മുലപ്പാൽ കുടിക്കാതിരുന്നവരുടെ ബുദ്ധി നിലവാരം മറ്റുള്ളവരെക്കാൾ കുറവാണെന്ന് ഒരു പഠനം വെളിപ്പെടുത്തിയതായി ഉദ്ധരിക്കുകവഴി അങ്ങനെയുള്ളവരുടെ വികാരങ്ങളോടു പരിഗണനയില്ലായ്മ കാണിക്കുകയായിരുന്നു നിങ്ങൾ.
സി. ബി., ഇറ്റലി (g03 11/22)
“ഉണരുക!”യുടെ പ്രതികരണം: ആരെയെങ്കിലും മുറിപ്പെടുത്തണം എന്ന ഉദ്ദേശ്യം ഞങ്ങൾക്കില്ലായിരുന്നു. മുലയൂട്ടൽ സംബന്ധിച്ച് ഒരു ഡാനിഷ് പഠനം വെളിപ്പെടുത്തിയ സംഗതി ഞങ്ങൾ ഉദ്ധരിച്ചുവെന്നേ ഉള്ളൂ. ഇത്തരം വിവരങ്ങൾ പ്രസിദ്ധീകരിക്കുന്നത് ഇന്ന് കുഞ്ഞുങ്ങളെ വളർത്തിക്കൊണ്ടുവരുന്നതിന് അവലംബിക്കുന്ന രീതികൾ സംബന്ധിച്ച് ജ്ഞാനപൂർവം തീരുമാനങ്ങൾ എടുക്കാൻ മാതാപിതാക്കളെ സഹായിക്കും.