നമ്മുടെ ഗ്രഹം അതിന്റെ ഭാവി എന്ത്?
നമ്മുടെ ഗ്രഹം അതിന്റെ ഭാവി എന്ത്?
“പ്രളയവും വരൾച്ചയും പോലുള്ള ‘ദൈവത്തിന്റെ വികൃതികളെ’ ഭയന്ന് ആയിരക്കണക്കിനു വർഷങ്ങൾ കഴിഞ്ഞുകൂടിയിട്ടുള്ള മനുഷ്യർ ഇപ്പോൾ ‘മനുഷ്യന്റെ വികൃതികൾ’ മൂലമുള്ള കൂടുതൽ വിനാശകമായ പ്രകൃതിവിപത്തുകളെ ഭയക്കേണ്ടിയിരിക്കുന്നു,” കാനഡയിലെ ഗ്ലോബ് ആൻഡ് മെയ്ൽ എന്ന വർത്തമാനപത്രം റിപ്പോർട്ട് ചെയ്യുന്നു. വൈകിപ്പോകുന്നതിനു മുമ്പ് പാരിസ്ഥിതിക പ്രശ്നങ്ങൾ പരിഹരിക്കാനുള്ള നടപടി കൈക്കൊള്ളേണ്ടതിന്റെ ആവശ്യകത ചൂണ്ടിക്കാണിക്കുന്ന ഒരു സമഗ്ര റിപ്പോർട്ട് ‘ഐക്യരാഷ്ട്ര പരിസ്ഥിതി പരിപാടി’ (യുഎൻഇപി) പ്രസിദ്ധീകരിച്ചു. യുഎൻഇപി-യുടെ എക്സിക്യൂട്ടിവ് ഡയറക്ടർ ക്ലൗസ് ടോപ്ഫെർ പറയുന്നു: “നമ്മൾ ചെയ്യുന്ന അല്ലെങ്കിൽ ചെയ്യാതിരിക്കുന്ന കാര്യങ്ങൾ 2032-ാം ആണ്ടോടെ ഈ അതുല്യ നീല ഗ്രഹത്തിന്റെ പരിസ്ഥിതിയെയും നിവാസികളെയും എങ്ങനെ ബാധിക്കുമെന്നു കാണാൻ മതിയായ അറിവ് ഇന്നു നമുക്കുണ്ട്.”
1972-ൽ യുഎൻഇപി സ്ഥാപിതമായതു മുതൽ പരിസ്ഥിതി സംരക്ഷണ രംഗത്ത് ചില പുരോഗതികളൊക്കെ ഉണ്ടായിട്ടുണ്ട്. ദ ടൊറന്റോ സ്റ്റാർ റിപ്പോർട്ട് ചെയ്തപ്രകാരം, “യൂറോപ്പിലും വടക്കേ അമേരിക്കയിലും വായുവിന്റെയും നദീജലത്തിന്റെയും അവസ്ഥ മെച്ചപ്പെട്ടിട്ടുണ്ട്, രാസവസ്തുക്കൾ പുറന്തള്ളപ്പെടുന്നതിന്മേൽ ഏർപ്പെടുത്തിയിരിക്കുന്ന വിലക്കുകൾ പൂർവസ്ഥിതി കൈവരിക്കാൻ ഓസോൺ പാളിയെ കുറെയൊക്കെ സഹായിക്കുന്നുണ്ട്.” കൂടാതെ ഐക്യനാടുകൾ, കാനഡ, നോർവേ, ഫിൻലൻഡ് തുടങ്ങിയ സ്ഥലങ്ങളിൽ നടക്കുന്ന വനപരിപാലന പദ്ധതികൾ “അമിതമായ മരംമുറിക്കൽ മൂലം ഉണ്ടാകുന്ന പ്രശ്നങ്ങളുടെ രൂക്ഷത ലഘൂകരിക്കപ്പെടുന്നുവെന്ന് ഉറപ്പുവരുത്തുന്നു.” എങ്കിൽപ്പോലും അനിയന്ത്രിതമായ സാമ്പത്തിക വളർച്ചയുടെ ഫലമായി നഗരങ്ങൾ ഭൂമുഖത്തിന്റെ കൂടുതൽ ഭാഗങ്ങൾ കയ്യടക്കുന്നത് വന്യജീവികളെയും ജൈവവൈവിധ്യത്തെയും വിനാശകമായി ബാധിക്കുമെന്ന് യുഎൻഇപി റിപ്പോർട്ട് പറയുന്നു. ഗ്ലോബ് ഇങ്ങനെ പ്രസ്താവിക്കുന്നു: “ലോകത്തിലെ പകുതിയോളം നദികൾ മലീമസമായ അല്ലെങ്കിൽ വറ്റിവരണ്ട അവസ്ഥയിലാണ്. ലോക ജനസംഖ്യയുടെ 40 ശതമാനത്തെ ഉൾക്കൊള്ളുന്ന എൺപത് രാജ്യങ്ങൾ രൂക്ഷമായ ജലക്ഷാമത്തെ നേരിടുന്നു.”
“നിർണായക നടപടി അനുകൂല ഫലം ഉളവാക്കുമെന്ന്” ടോപ്ഫെർ വിശ്വസിക്കുന്നു. അദ്ദേഹം ഇങ്ങനെ കൂട്ടിച്ചേർക്കുന്നു: “സുനിശ്ചിതമായ കർമപരിപാടികളും . . . സുനിശ്ചിതമായ പദ്ധതികളും . . . സർവോപരി സുവ്യക്തമായ ഒരു പ്രഖ്യാപനവും നമുക്ക് ആവശ്യമാണ്.” എന്നാൽ ലോകനേതാക്കൾ നമ്മുടെ ഗ്രഹത്തിന്റെ പ്രയോജനത്തിനായി വേണ്ട നടപടികൾ കൈക്കൊള്ളാൻ സന്നദ്ധരല്ലെങ്കിൽ എന്തു പ്രത്യാശയാണ് ഉള്ളത്?
ഒരു കാര്യത്തിൽ ഉറപ്പുണ്ടായിരിക്കാവുന്നതാണ്: ‘സുവ്യക്തമായ ഒരു പ്രഖ്യാപനം’ നടത്തിയിട്ടുള്ള, “നിർണായക നടപടി” സ്വീകരിക്കാൻ പോകുന്ന ഒരുവൻ ഉണ്ട്—യഹോവയാം ദൈവം. ഭൂമിയെ സംബന്ധിക്കുന്ന കാര്യങ്ങളിൽ താൻ ഇടപെടുമെന്നും ‘ഭൂമിയെ നശിപ്പിക്കുന്നവരെ നശിപ്പിക്കും’ എന്നും യാതൊരു അവ്യക്തതയും കൂടാതെ അവൻ പരസ്യമായി പ്രഖ്യാപിച്ചിരിക്കുന്നു. (വെളിപ്പാടു 11:18) കൂടാതെ, ഭൂമിയുടെ ആവാസവ്യൂഹം പൂർവസ്ഥിതി കൈവരിക്കുമെന്ന് ദൈവം നമുക്ക് ഉറപ്പുനൽകുന്നു. മരഭൂമി പുഷ്പിക്കും. (യെശയ്യാവു 35:1) ആഹാരസാധനങ്ങൾ ധാരാളമായി ലഭ്യമായിരിക്കും. നദികൾ മേലാൽ മലീമസമായിരിക്കുകയില്ല. (സങ്കീർത്തനം 72:16; 98:8) ഭൂമിയിലെ സകല ജീവജാലങ്ങളും അനുഗ്രഹിക്കപ്പെടുമെന്ന് ദൈവം ഉറപ്പുനൽകുന്നു.—സങ്കീർത്തനം 96:11, 12. (g04 2/8)
[29-ാം പേജിലെ ചിത്രങ്ങൾക്ക് കടപ്പാട്]
NASA photo