ലോകത്തെ വീക്ഷിക്കൽ

സമു​ദ്ര​സ​ഞ്ചാ​രം നടത്തുന്ന പ്ലാസ്റ്റിക്‌ താറാ​വു​കൾ

1992 ജനുവ​രി​യിൽ ഹോ​ങ്കോ​ങ്ങിൽനിന്ന്‌ അമേരി​ക്കൻ ഐക്യ​നാ​ടു​ക​ളി​ലേക്കു പോവു​ക​യാ​യി​രുന്ന ഒരു കപ്പൽ കൊടു​ങ്കാ​റ്റിൽപ്പെട്ട്‌ 29,000 പ്ലാസ്റ്റിക്‌ താറാ​വു​ക​ള​ട​ങ്ങിയ ചരക്ക്‌ കപ്പലിൽനി​ന്നു നഷ്ടപ്പെ​ട്ട​താ​യി ജർമനി​യി​ലെ ഫ്രാങ്ക്‌ഫുർട്ടർ ആൽജെ​മൈന റ്റ്‌​സൈ​റ്റുങ്‌ വിശദീ​ക​രി​ക്കു​ന്നു. 1992 നവംബ​റിൽ അലാസ്‌ക​യി​ലെ ബാര​ണോഫ്‌ ദ്വീപി​ലാണ്‌ ഈ താറാ​വു​ക​ളിൽ ചിലതി​നെ ആദ്യമാ​യി കണ്ടത്‌. അപകട​മു​ണ്ടാ​യി രണ്ടു വർഷത്തി​നു​ശേഷം ബെറിങ്‌ കടലി​ടു​ക്കി​നു വടക്കായി പൊന്തി​ക്കി​ട​ക്കുന്ന ഹിമശ​ക​ല​ങ്ങ​ളിൽ ഇവയിൽ ചിലതി​നെ കണ്ടെത്തി. അസാധാ​ര​ണ​മാം​വി​ധം ഉറപ്പുള്ള ഈ കളിപ്പാ​ട്ടങ്ങൾ വടക്കേ അമേരി​ക്ക​യു​ടെ ന്യൂ ഇംഗ്ലണ്ട്‌ തീരത്തും എത്തി​ച്ചേ​രു​മെന്നു പ്രതീ​ക്ഷി​ക്ക​പ്പെ​ടു​ന്നു. രസകര​മെന്നു പറയട്ടെ, ഈ അപകടം ശാസ്‌ത്ര​ജ്ഞർക്ക്‌ സഹായ​ക​മാ​യി ഭവിച്ചു. “സമു​ദ്ര​ജലം പസിഫി​ക്കിൽനി​ന്നു നേരെ ആർട്ടിക്‌ സമു​ദ്ര​ത്തി​ലേ​ക്കും അറ്റ്‌ലാ​ന്റി​ക്കി​ലേ​ക്കും ഒഴുകു​ന്നു” എന്ന സിദ്ധാ​ന്ത​ത്തി​ന്റെ നിജസ്ഥി​തി ഉറപ്പാ​ക്കാൻ അത്‌ സഹായ​ക​മാ​യി എന്നു പത്രം പറയുന്നു.(g04 5/8)

 നിക്കോ​ട്ടിൻ ആസക്തി—ദ്രുത​ഗ​തി​യിൽ

“ഒരു പ്രാവ​ശ്യം ഉള്ളി​ലേ​ക്കെ​ടു​ക്കുന്ന സിഗററ്റു പുക മാത്രം മതി ഒരു കൗമാ​ര​ക്കാ​ര​നിൽ ആസക്തി ഉളവാ​ക്കാൻ” എന്ന്‌ കാനഡ​യി​ലെ നാഷണൽ പോസ്റ്റ്‌ വർത്തമാ​ന​പ​ത്രം റിപ്പോർട്ടു ചെയ്യുന്നു. “നിരവധി വർഷത്തെ നിരന്തര ഉപയോ​ഗ​ത്തി​നു​ശേഷം സാവധാ​നം മാത്രമേ നിക്കോ​ട്ടിൻ ആസക്തി ഉണ്ടാകൂ എന്ന നിലവി​ലുള്ള ധാരണയെ തകിടം മറിക്കു​ന്ന​താണ്‌ ഈ അസാധാ​രണ കണ്ടെത്തൽ.” 1,200 കൗമാ​ര​ക്കാ​രിൽ ഏകദേശം ആറു വർഷം പഠനം നടത്തി​യ​തി​നു​ശേഷം “അപൂർവ​മാ​യി മാത്രം പുകവ​ലി​ച്ചി​ട്ടു​ള്ള​വ​രിൽ പോലും ജഡിക ആസക്തി​യാണ്‌ സമപ്രാ​യ​ക്കാ​രിൽനി​ന്നുള്ള സമ്മർദ​ത്തെ​ക്കാൾ ഏറെ ശക്തമായ സ്വാധീ​ന​മെന്ന്‌ ഗവേഷകർ കണ്ടെത്തി,” പത്രം പറയുന്നു. “പുകവ​ലി​ക്കുന്ന മിക്ക ചെറു​പ്പ​ക്കാ​രി​ലും ആദ്യമാ​യി പുകവ​ലി​ക്കു​ന്ന​തി​നും ദിവ​സേ​ന​യുള്ള പുകവലി തുടങ്ങു​ന്ന​തി​നും ഇടയി​ലുള്ള കാലയ​ള​വിൽ നിക്കോ​ട്ടിൻ ആസക്തി​യു​ടെ ലക്ഷണങ്ങൾ കണ്ടു തുടങ്ങു​ന്നു” എന്നു പഠനം വെളി​പ്പെ​ടു​ത്തി. പുകവ​ലി​ക്കാ​നുള്ള സമ്മർദത്തെ നേരി​ടാൻ ചെറു​പ്പ​ക്കാ​രെ സഹായി​ക്കാൻ മാത്രമല്ല, പുകവ​ലി​ച്ചി​ട്ടു​ള്ള​വരെ നിക്കോ​ട്ടിൻ ആസക്തി​യിൽനി​ന്നു മോചനം നേടാൻ സഹായി​ക്കാ​നും പുകവ​ലി​വി​രുദ്ധ പ്രചാരണ പരിപാ​ടി​കൾ ലക്ഷ്യം വെക്കേ​ണ്ട​തു​ണ്ടെന്ന്‌ ഗവേഷകർ നിർദേശിച്ചു.(g04 5/22)

തെരു​വിൽ അലയുന്ന കൗമാരം

“മാഡ്രി​ഡി​ലെ തെരു​വു​ക​ളിൽ ജീവി​ക്കുന്ന കൗമാ​ര​പ്രാ​യ​ക്കാ​രു​ടെ എണ്ണം വർധി​ക്കു​ക​യാണ്‌,” സ്‌പാ​നിഷ്‌ വർത്തമാ​ന​പ​ത്ര​മായ എൽ പായി​സി​ന്റെ ഇംഗ്ലീഷ്‌ പതിപ്പ്‌ റിപ്പോർട്ടു ചെയ്യുന്നു. ഒരു സർവക​ലാ​ശാല നടത്തിയ പഠനമ​നു​സ​രിച്ച്‌ “മാഡ്രി​ഡി​ലെ 5,000 ഭവനര​ഹി​ത​രിൽ ഏകദേശം 1,250 പേർ 20-ൽ താഴെ പ്രായ​മു​ള്ള​പ്പോൾ തെരു​വിൽ എത്തിയ​വ​രാണ്‌.” “ഭവനര​ഹി​ത​രായ ചെറു​പ്പ​ക്കാ​രിൽ ബഹുഭൂ​രി​പ​ക്ഷ​വും തകർന്ന കുടും​ബ​ങ്ങ​ളിൽനി​ന്നു​ള്ളവർ ആണെന്നും അത്‌ ഉളവാ​ക്കിയ വൈകാ​രിക പീഡയു​ടെ ഇരകളാ​ണെ​ന്നും” ഗവേഷണം വെളി​പ്പെ​ടു​ത്തി. വാസ്‌ത​വ​ത്തിൽ “മൂന്നിൽ രണ്ടു കുട്ടി​ക​ളു​ടെ​യും മാതാ​പി​താ​ക്കൾ മദ്യത്തി​നോ മയക്കു​മ​രു​ന്നി​നോ അടിമ​ക​ളാ​യി​രു​ന്നു, സമാന​മായ എണ്ണം കുടും​ബാം​ഗ​ങ്ങ​ളാൽ പീഡി​പ്പി​ക്ക​പ്പെ​ട്ടി​രു​ന്നു.” “മെഡി​റ്റ​റേ​നി​യൻ സംസ്‌കാ​ര​ങ്ങ​ളു​ടെ മുഖമു​ദ്ര​യായ കെട്ടു​റ​പ്പുള്ള പരമ്പരാ​ഗത കുടും​ബ​ബ​ന്ധ​ങ്ങൾക്ക്‌ ഇളക്കം​ത​ട്ടി​ത്തു​ട​ങ്ങി​യി​രി​ക്കു​ന്നു,” ഈ റിപ്പോർട്ടി​ന്റെ എഴുത്തു​കാ​രിൽ ഒരാളായ മാൻവെൽ മൂന്യോസ്‌ പറഞ്ഞു. (g04 5/8)

തടിയു​ള്ള​വർക്കാ​യി ഒരു കടൽത്തീ​രം

വണ്ണം കുറഞ്ഞ ആളുകൾ നിറഞ്ഞ കടൽത്തീ​രത്തു പോകാൻ മടിക്കുന്ന ആളുകൾക്കു​വേണ്ടി മെക്‌സി​ക്കോ​യി​ലെ ഒരു ഹോട്ട​ലിൽ ഒരു ഭാഗം നീക്കി​വെ​ച്ചി​രി​ക്കു​ന്നു എന്ന്‌ എൽ ഇക്കൊ​ണോ​മിസ്റ്റ വർത്തമാ​ന​പ​ത്രം റിപ്പോർട്ടു ചെയ്യുന്നു. “വണ്ണമു​ള്ള​വ​രാ​യി​രി​ക്കുക, സന്തുഷ്ട​രാ​യി​രി​ക്കുക” എന്നതാണ്‌ കാൺകൂ​ണി​ലെ കടൽത്തീ​ര​ത്തി​ന​ടു​ത്തുള്ള ഈ ഹോട്ടൽ സ്വീക​രി​ച്ചി​രി​ക്കുന്ന മുദ്രാ​വാ​ക്യം. “തങ്ങളുടെ അമിത​വണ്ണം നിമിത്തം സ്‌നാ​ന​വ​സ്‌ത്രം ധരിച്ച്‌ കടൽത്തീ​രത്തു പോകാൻ മടിയു​ള്ള​വരെ ആകർഷി​ക്കുക”യാണ്‌ ഹോട്ട​ലി​ന്റെ ലക്ഷ്യം. “നിത്യ​ജീ​വി​ത​ത്തിൽ, അല്ലാ​തെ​തന്നെ വലിയ വിവേ​ചനം നേരി​ടുന്ന” ഇക്കൂട്ടർ അവധി​ക്കാ​ലം ചെലവ​ഴി​ക്കാൻ എത്തു​മ്പോൾ യാതൊ​രു വിവേ​ച​ന​വും കൂടാതെ അവരോ​ടു പെരു​മാ​റാൻ ഹോട്ടൽ ജീവന​ക്കാർക്കു (ഇതിൽ വണ്ണം ഉള്ളവരും ഇല്ലാത്ത​വ​രും പെടും) പരിശീ​ലനം നൽകു​ന്നു​വെന്ന്‌ റിപ്പോർട്ടു പറയുന്നു. (g04 5/8)

മെഡി​റ്റ​റേ​നി​യൻ സമു​ദ്ര​ത്തി​നു ചൂടു​കൂ​ടു​ന്നു

“പത്തു വർഷമാ​യി മെഡി​റ്റ​റേ​നി​യ​നി​ലെ താപവർധന . . . ഞങ്ങൾ രേഖ​പ്പെ​ടു​ത്തി​ക്കൊ​ണ്ടി​രി​ക്കു​ക​യാണ്‌,” ഇറ്റലി​യി​ലെ ജനോവ സർവക​ലാ​ശാ​ല​യി​ലെ സമുദ്ര ജീവശാ​സ്‌ത്ര​ജ്ഞ​നായ മൗറി​റ്റ്‌സ്യോ വുയീർറ്റ്‌സ്‌ പറയുന്നു. ചൂടു കൂടു​ത​ലുള്ള വെള്ളം പുതിയ ജലസസ്യ​ങ്ങ​ളെ​യും ജന്തുക്ക​ളെ​യും ആകർഷി​ക്കു​ന്നു എന്ന്‌ ഇറ്റലി​യി​ലെ ലാ റേപൂ​ബ്ലി​കാ വർത്തമാ​ന​പ​ത്ര​ത്തി​ലെ റിപ്പോർട്ട്‌ വിശദീ​ക​രി​ക്കു​ന്നു. “വ്യത്യസ്‌ത ജീവി​വർഗങ്ങൾ ധാരാ​ള​മാ​യി ആഫ്രിക്കൻ തീരത്തു​നിന്ന്‌ മെഡി​റ്റ​റേ​നി​യന്റെ വടക്കു ഭാഗ​ത്തേക്കു നീങ്ങു​ക​യാണ്‌,” വുയീർറ്റ്‌സ്‌ തുടരു​ന്നു. ഈ കുടി​യേ​റ്റ​ക്കാ​രിൽ ഉഷ്‌ണ​മേ​ഖലാ ജലാശ​യ​ങ്ങ​ളിൽ നിന്നുള്ള തത്തമത്സ്യം, അറ്റ്‌ലാ​ന്റി​ക്കി​ലെ ഉഷ്‌ണ​മേ​ഖ​ല​യിൽ നിന്നുള്ള ഡാം​സെൽമ​ത്സ്യം, സാധാ​ര​ണ​മാ​യി ഇന്ത്യൻ മഹാസ​മു​ദ്ര​ത്തി​ലും പസിഫിക്‌ സമു​ദ്ര​ത്തി​ലും ജീവി​ക്കുന്ന ട്രിഗർമ​ത്സ്യം, സൂയസ്‌ കനാലി​ലൂ​ടെ മെഡി​റ്റ​റേ​നി​യ​നി​ലേക്കു വന്നിട്ടുള്ള ഒരു ആൽഗ എന്നിവ​യെ​ല്ലാം ഉൾപ്പെ​ടു​ന്നു. (g04 5/8)

വിപത്‌ക​ര​മായ ഉപദേശം

“1970-കൾ വരെ ബംഗ്ലാ​ദേ​ശി​ലെ​യും പശ്ചിമ ബംഗാ​ളി​ലെ​യും [ഇന്ത്യ] ജനങ്ങൾ വെള്ളം ശേഖരി​ച്ചി​രു​ന്നത്‌ ആഴം കുറഞ്ഞ കിണറു​കൾ, കുളങ്ങൾ, നദികൾ എന്നിവി​ട​ങ്ങ​ളിൽ നിന്നാണ്‌. കോള​റ​യും അതിസാ​ര​വും മറ്റു ജലജന്യ രോഗ​ങ്ങ​ളും ഇവിടെ തുടർക്ക​ഥ​യാ​യി​രു​ന്നു,” ദ ഗാർഡി​യൻ വീക്ക്‌ലി പറയുന്നു. “ശുദ്ധവും രോഗാ​ണു​മു​ക്ത​വു​മായ വെള്ളം കിട്ടാൻ ജലഭര​ങ്ങ​ളിൽ (അധികം സുഷി​രങ്ങൾ ഉള്ള ജലവാ​ഹി​ക​ളായ പാറക​ളു​ടെ കൂട്ടം) കുഴൽ കിണർ നിർമി​ക്കാൻ ഐക്യ​രാ​ഷ്‌ട്രങ്ങൾ ജനങ്ങളെ ഉപദേ​ശി​ച്ചു.” ബംഗ്ലാ​ദേശ്‌, വിയറ്റ്‌നാം, ലാവോസ്‌, ബർമ (ഇപ്പോൾ മ്യാൻമാർ), തായ്‌ലൻഡ്‌, നേപ്പാൾ, ചൈന, പാകി​സ്ഥാൻ, കംബോ​ഡിയ എന്നിവി​ട​ങ്ങ​ളി​ലും പശ്ചിമ ബംഗാ​ളി​ലു​മാ​യി രണ്ടു കോടി​യോ​ളം കുഴൽ കിണറു​ക​ളാണ്‌ നിർമി​ക്ക​പ്പെ​ട്ടത്‌. എന്നാൽ, മിക്ക കിണറു​ക​ളും ഉപരി​ത​ല​ത്തിൽനി​ന്നു വളരെ ആഴത്തിൽ ആഴ്‌സ​നിക്‌ അടങ്ങിയ ഊറൽ നിക്ഷേ​പ​ങ്ങ​ളോ​ളം ചെന്നെത്തി. “ചരി​ത്ര​ത്തി​ലെ ഏറ്റവും വലിയ കൂട്ട വിഷബാധ” എന്നു ലോകാ​രോ​ഗ്യ സംഘടന വിശേ​ഷി​പ്പിച്ച വ്യാപ​ക​മായ ആഴ്‌സ​നിക്‌ വിഷബാ​ധ​യാ​യി​രു​ന്നു ഫലം. കഴിഞ്ഞ രണ്ടു ദശകങ്ങ​ളാ​യി ഏകദേശം 15 കോടി ആളുക​ളാണ്‌ വിഷലി​പ്‌ത​മായ ജലം കുടി​ച്ചു​കൊ​ണ്ടി​രി​ക്കു​ന്നത്‌. ബംഗ്ലാ​ദേ​ശിൽ മാത്രം ഗുരു​ത​ര​മായ ആഴ്‌സ​നിക്‌ വിഷബാ​ധ​യു​ടെ 15,000 കേസുകൾ റിപ്പോർട്ടു ചെയ്യ​പ്പെ​ട്ടി​ട്ടുണ്ട്‌. പ്രാ​ദേ​ശിക സംഘങ്ങ​ളും ഗവൺമെ​ന്റു​ക​ളും ഐക്യ​രാ​ഷ്‌ട്ര​ങ്ങ​ളു​മെ​ല്ലാം പല ഉപാധി​ക​ളും പരിഗ​ണി​ക്കു​ന്നുണ്ട്‌. എന്നാൽ ഒരു പ്രാ​യോ​ഗിക പരിഹാ​രം ഇനിയും കണ്ടെത്തി​യി​ട്ടില്ല. (g04 5/22)

കുട്ടി​ക​ളു​ടെ ആത്മഹത്യാ​പ്ര​വ​ണ​ത​യ്‌ക്ക്‌ എതിരെ ജാഗ്രത

“ആത്മഹത്യ ചെയ്യു​ക​യോ അതിനു ശ്രമി​ക്കു​ക​യോ ചെയ്യുന്ന കുട്ടി​ക​ളിൽ എൺപതു ശതമാ​ന​വും ദിവസ​ങ്ങൾക്കോ മാസങ്ങൾക്കോ മുമ്പേ അതേക്കു​റി​ച്ചു പറയു​ക​യോ എഴുതു​ക​യോ ചെയ്യാ​റുണ്ട്‌,” മെക്‌സി​ക്കോ നഗരത്തി​ലെ ഒരു വർത്തമാ​ന​പ​ത്ര​മായ മിലെ​ന്യോ റിപ്പോർട്ടു ചെയ്യുന്നു. ജീവൻ വെടി​യാൻ അവരെ പ്രേരി​പ്പി​ക്കുന്ന ഘടകങ്ങൾ ശാരീ​രി​ക​മോ വാചി​ക​മോ വൈകാ​രി​ക​മോ ആയ ദുഷ്‌പെ​രു​മാ​റ്റം, ലൈം​ഗിക പീഡനം, കുടും​ബ​ത്ത​കർച്ച, സ്‌കൂ​ളി​ലെ പ്രശ്‌നങ്ങൾ എന്നിവ​യൊ​ക്കെ ആകാം. മെക്‌സി​ക്കൻ ഇൻസ്റ്റി​റ്റ്യൂട്ട്‌ ഓഫ്‌ സോഷ്യൽ സെക്യൂ​രി​റ്റി​യി​ലെ മനശ്ശാ​സ്‌ത്ര വിദഗ്‌ധ​നായ ഹോസേ ലൂയിസ്‌ ബാസ്‌ക്കെ​സി​ന്റെ അഭി​പ്രാ​യ​ത്തിൽ ടെലി​വി​ഷൻ, ചലച്ചി​ത്രങ്ങൾ, വീഡി​യോ ഗെയി​മു​കൾ, പുസ്‌ത​കങ്ങൾ എന്നിവ​യി​ലൂ​ടെ മരണം ഒരു നിത്യ​സം​ഭ​വ​മാ​യി കുട്ടി​ക​ളു​ടെ മുമ്പിൽ പ്രത്യ​ക്ഷ​പ്പെ​ടു​ന്ന​തി​നാൽ ജീവി​ത​ത്തി​ന്റെ മൂല്യം സംബന്ധിച്ച്‌ അവർക്ക്‌ തികച്ചും തെറ്റായ ധാരണ​യാ​ണു​ള്ളത്‌. എട്ടിനും പത്തിനും ഇടയിൽ പ്രായ​മുള്ള 100 കുട്ടി​ക​ളിൽ 15 പേരും ആത്മഹത്യ​യെ കുറിച്ചു ചിന്തി​ക്കു​ന്നു​വെ​ന്നും അവരിൽ അഞ്ചു ശതമാനം ജീവ​നൊ​ടു​ക്കു​ന്ന​തിൽ വിജയി​ക്കു​ന്നു​വെ​ന്നും അദ്ദേഹം കൂട്ടി​ച്ചേർക്കു​ന്നു. കുട്ടികൾ ആത്മഹത്യ​യെ കുറിച്ചു സംസാ​രി​ക്കു​ന്നെ​ങ്കിൽ കേവലം ഭീഷണി​യാ​യോ ശ്രദ്ധ പിടി​ച്ചു​പ​റ്റാ​നുള്ള തന്ത്രമാ​യോ വീക്ഷി​ക്കാ​തെ ജാഗ്ര​ത​യോ​ടെ​യി​രി​ക്കാൻ പത്രം നിർദേ​ശി​ക്കു​ന്നു. അത്‌ ഇങ്ങനെ തുടരു​ന്നു: “മാതാ​പി​താ​ക്കൾ കുട്ടി​ക​ളോ​ടൊ​ത്തു സമയം ചെലവി​ടു​ക​യും അവരോ​ടൊ​ത്തു കളിക്കു​ക​യും വേണം. സദാ സ്‌നേഹം പ്രകടി​പ്പി​ക്കു​ക​യും നിരന്തരം ആശയവി​നി​മയം നടത്തു​ക​യും ചെയ്യണം.” (g04 5/22)

കോപി​ക്കു​ന്നത്‌ നിങ്ങൾക്കു നന്നല്ല

ഇറ്റലി​യി​ലെ പാജുവ സർവക​ലാ​ശാ​ല​യി​ലെ ഒരു മനശ്ശാ​സ്‌ത്ര അധ്യാ​പി​ക​യായ വാലാ​ന്റീ​നാ ഡൂർസോ ഇങ്ങനെ അഭി​പ്രാ​യ​പ്പെ​ടു​ന്നു: “കോപം നമ്മുടെ സമൂഹ​ത്തിൽ എന്നും വർധി​ച്ചു​കൊ​ണ്ടി​രി​ക്കുന്ന ഒരു പ്രതി​ഭാ​സ​മാണ്‌. പക്ഷേ അതു ശരീര​ത്തിൽ ഉളവാ​ക്കുന്ന ഫലം തികച്ചും ദോഷ​ക​ര​മാണ്‌.” പേശി​കൾക്കു​ണ്ടാ​കുന്ന പിരി​മു​റു​ക്കം, വർധിച്ച ഹൃദയ​മി​ടി​പ്പും ശ്വാ​സോ​ച്ഛ്വാ​സ​വും, ശരീര​ത്തിന്‌ അനുഭ​വ​പ്പെ​ടുന്ന സംഘർഷം എന്നിവ അവയിൽ ചിലതാണ്‌. ന്യായ​യു​ക്തത പ്രകടി​പ്പി​ക്കാ​നും തന്റെ പ്രവൃ​ത്തി​കളെ നിയ​ന്ത്രി​ക്കാ​നു​മുള്ള ഒരുവന്റെ പ്രാപ്‌തി​യെ കോപം തകരാ​റി​ലാ​ക്കും. “കോപം ഇളക്കി​വി​ടാൻ സാധ്യ​ത​യുള്ള സാഹച​ര്യ​ങ്ങൾ മുൻകൂ​ട്ടി​ക്കാ​ണുക . . . ‘ഞാൻ യോജി​ക്കു​ന്നില്ല’ എന്നു ശാന്തമാ​യി തുറന്നു​പ​റ​യുക, അതു ജീവിതം മെച്ച​പ്പെ​ടു​ത്തും,” ഡൂർസോ നിർദേ​ശി​ക്കു​ന്നു. (g04 5/22)