ഞങ്ങളുടെ വായനക്കാരിൽനിന്ന്‌
ഞങ്ങളുടെ വായനക്കാരിൽനിന്ന്‌
പച്ചകുത്തൽ “യുവജനങ്ങൾ ചോദിക്കുന്നു . . . ഞാൻ പച്ചകുത്തണമോ?” എന്ന ലേഖനത്തിനു വളരെ നന്ദി. (2003 ഒക്ടോബർ 8) ദേഹത്തു പച്ചകുത്തുന്നതു വളരെ ആകർഷകമാണെന്നാണു ഞാൻ വിചാരിച്ചിരുന്നത്‌. താത്‌കാലികമായി [സ്റ്റിക്കർ ഉപയോഗിച്ച്‌] അങ്ങനെയൊന്നു ചെയ്യാൻ ഞാൻ ആഗ്രഹിച്ചിരുന്നു. എന്നിരുന്നാലും, ദൈവത്തിന്‌ നിന്ദ വരുത്തുന്നതരം അടയാളങ്ങൾ നമ്മുടെ ശരീരത്തിൽ “താത്‌കാലികമായിട്ടാണെങ്കിൽ പോലും” ഉണ്ടാക്കാൻ നാം ആഗ്രഹിക്കുന്നില്ല എന്ന പ്രസ്‌താവന ശരിക്കും എന്റെ ഹൃദയത്തിൽ തട്ടി. ശരീരത്തിൽ പച്ചകുത്തിയിരിക്കുന്നതു മറ്റുള്ളവർ കാണുമ്പോൾ അത്‌ അവരെ ഇടറിക്കുകയും എന്നെ മത്സരമനോഭാവമുള്ള ഒരു വ്യക്തിയായി വീക്ഷിക്കാൻ ഇടവരുകയും ചെയ്‌തേക്കാമെന്നു ചിന്തിച്ചപ്പോൾ അങ്ങനെ ചെയ്യേണ്ടെന്നുതന്നെ ഞാൻ തീരുമാനിച്ചു.
എ. കെ., ജപ്പാൻ (g04 7/8)
ദേഹത്തു പച്ചകുത്താൻ എനിക്ക്‌ അതിയായ ആഗ്രഹമുണ്ടായിരുന്നു. എന്നാൽ പിന്നീട്‌ എനിക്കു ദുഃഖിക്കേണ്ടിവന്നേക്കാമെന്നു മനസ്സിലാക്കാൻ ഈ ലേഖനം എന്നെ സഹായിച്ചു. പച്ചകുത്തൽ ആരോഗ്യത്തിന്‌ അപകടം ചെയ്യുന്നതിനെ കുറിച്ചും നിങ്ങൾ പറഞ്ഞിരുന്നല്ലോ, അതേപ്പറ്റി ഞാൻ മുമ്പു ചിന്തിച്ചിരുന്നതേയില്ല. നന്നായി ബോധ്യംവരുത്തുന്ന രീതിയിലുള്ള ഈ ലേഖനത്തിനു നന്ദി.
ഡി. റ്റി., ഫ്രാൻസ്‌ (g04 7/8)
ശാസ്‌ത്രജ്ഞന്റെ കഥ “ശാസ്‌ത്രം ആയിരുന്നു എന്റെ മതം” എന്ന വിശിഷ്ട ലേഖനത്തിനു വളരെ നന്ദി. (2003 ഒക്ടോബർ 8) വസ്‌തുതകളെ അഭിമുഖീകരിക്കാൻ കെന്നെത്ത്‌ തനാകായ്‌ക്ക്‌ യാതൊരു ഭയവും ഉണ്ടായിരുന്നില്ല. മാത്രമല്ല, വർഷങ്ങളായി താൻ വിശ്വസിച്ചുപോന്നതു തെറ്റായിരുന്നെന്ന്‌ അദ്ദേഹം താഴ്‌മയോടെ സമ്മതിക്കുകയും ചെയ്‌തു. അദ്ദേഹത്തിന്‌ ശരിയായ മനോഭാവമുണ്ട്‌.
എസ്‌. എ., റഷ്യ (g04 7/8)
വിഷാദവുമായി മല്ലിടുന്ന എനിക്ക്‌ മരിക്കണമെന്ന തോന്നൽ ഇടയ്‌ക്കിടെ ഉണ്ടാകാറുണ്ട്‌. കെന്നെത്ത്‌ തനാകായുടെ ജീവിതകഥ വായിച്ചപ്പോൾ ഈ ചോദ്യം എന്റെ ശ്രദ്ധയിൽപ്പെട്ടു: “അസ്‌തിത്വമില്ലായ്‌മയാണ്‌ ആത്യന്തിക യാഥാർഥ്യമെങ്കിൽ പിന്നെ അസ്‌തിത്വത്തിൽ ആയിരിക്കുന്നതിൽ എന്തർഥം?” ഇത്‌ എന്റെ ഹൃദയത്തെ ആഴത്തിൽ സ്‌പർശിച്ചു. “നീ ജീവിച്ചിരിക്കണം!” എന്നു ദൈവം എന്നോടു പറയുന്നതുപോലെയായിരുന്നു അത്‌.
സി. ഐ., ജപ്പാൻ (g04 7/8)
മൊസെയ്‌ക്‌ “മൊസെയ്‌ക്‌—ശിലാശകലങ്ങൾകൊണ്ട്‌ ഒരു ചിത്രവേല” എന്ന ലേഖനത്തിനു നന്ദി. (2003 നവംബർ 8) എന്റെ താമസസ്ഥലത്തിന്‌ അടുത്തുള്ള ഒരു ദേശീയ പാർക്കിൽ പ്രദർശിപ്പിച്ചിരിക്കുന്ന മൊസെയ്‌ക്കിന്റെ ചിത്രം അതിലുണ്ടായിരുന്നു. ഞാൻ അവിടെ ഒരു ദശകത്തിലേറെക്കാലം താമസിച്ചിട്ടും ഒരിക്കലും അതു കണ്ടിരുന്നില്ല. അതുകൊണ്ട്‌ ഞാൻ അതു കാണാൻ പോയി. അതെന്നെ വിസ്‌മയിപ്പിച്ചു. മൊസെയ്‌ക്‌ കലാരൂപത്തെ ഞാൻ ഇപ്പോൾ ഏറെ വിലമതിക്കുന്നു.
ഇ. ഡി., ഐക്യനാടുകൾ (g04 7/22)
മൊസെയ്‌ക്കിനെ കുറിച്ച്‌ കൂടുതൽ അറിയാൻ ഞാൻ എല്ലായ്‌പോഴും ആഗ്രഹിച്ചിരുന്നു. പ്രത്യേകിച്ച്‌, റഷ്യയിൽവെച്ചു നടന്ന, 1993-ലെ യഹോവയുടെ സാക്ഷികളുടെ കൺവെൻഷനു ഞങ്ങൾ പോയതിനു ശേഷം. സെന്റ്‌ പീറ്റേഴ്‌സ്‌ബർഗിലും മോസ്‌കോയിലും മനോഹരങ്ങളായ അനേകം മൊസെയ്‌ക്കുകൾ കണ്ടു ഞങ്ങൾ വിസ്‌മയിച്ചുപോയി. അത്തരം സൃഷ്ടികൾക്കു ജന്മം നൽകാൻ വർഷങ്ങളോളം അധ്വാനിച്ച കലാകാരന്മാർക്കും, ഇത്രയും വിവരസമ്പുഷ്ടമായ ലേഖനം പ്രസിദ്ധീകരിച്ച നിങ്ങൾക്കും ഞങ്ങളുടെ നന്ദി.
ബി. ഇസ്സഡ്‌., ജർമനി (g04 7/22)
ബദൽ ജീവിതരീതികൾ വികൃതമായ ലൈംഗിക വികാരങ്ങൾ ജീവിതത്തിലുടനീളം എന്നെ വേട്ടയാടിയിട്ടുണ്ട്‌. നിങ്ങളുടെ ലേഖനം എന്റെ പ്രശ്‌നത്തെ കുറിച്ചാണു ചർച്ച ചെയ്‌തത്‌. തീരെ ചെറുപ്പത്തിൽത്തന്നെ അശ്ലീലം കാണാനിടയായതും ലൈംഗികമായി ദ്രോഹിക്കപ്പെട്ടതും എന്നെ ആകെ തകർത്തുകളഞ്ഞിരുന്നു. സ്വയം മനസ്സിലാക്കാൻ എന്നെ സഹായിച്ചതിനു നന്ദി.
ജെ. ബി. എം., ഐക്യനാടുകൾ (g04 7/22)
ലൈംഗിക ചായ്‌വുകളെ കുറിച്ചു ചർച്ചചെയ്യുമ്പോൾ ജീനുകൾ, ഹോർമോണുകൾ, വളർന്നുവന്ന സാഹചര്യം തുടങ്ങിയ മറ്റനേകം സംഗതികളുടെ സ്വാധീനത്തെ കുറിച്ചു പറയുന്നതു നല്ലതാണ്‌. സ്വവർഗരതിയോടുള്ള ചായ്‌വുമായി ബന്ധപ്പെട്ടു ബുദ്ധിമുട്ട്‌ അനുഭവിക്കുന്നവർക്ക്‌ ക്രിസ്‌തീയ സഭയിൽ പിന്തുണ കണ്ടെത്താൻ കഴിയുമെന്നതു ശരിയാണ്‌.
ഡി. എൽ., ബ്രിട്ടൻ (g04 7/22)
“ഉണരുക!”യുടെ പ്രതികരണം: തങ്ങളുടെ ലൈംഗിക വികാരങ്ങളോടു മല്ലിടേണ്ടിവരുന്നവർ വളരെ പ്രയാസകരമായ ഒരു സാഹചര്യത്തെയാണ്‌ അഭിമുഖീകരിക്കുന്നതെന്ന്‌ ഞങ്ങൾ മനസ്സിലാക്കുന്നു. ഞങ്ങളുടെ ലേഖനം വ്യക്തമാക്കുന്നതു പോലെ അതിനുള്ള കാരണങ്ങൾ വളരെ സങ്കീർണമായിരുന്നേക്കാം. എന്നാൽ ഒരുവൻ അധാർമിക ഉദ്ദീപനങ്ങളെ മനഃപൂർവം വളർത്തുകയോ ആ ഉദ്ദീപനങ്ങൾക്കനുസൃതമായി പെരുമാറുകയോ ചെയ്യാത്തിടത്തോളം അയാൾക്ക്‌ യഹോവയുടെ ദൃഷ്ടിയിൽ ശുദ്ധനായി നിലകൊള്ളാൻ കഴിയും. ധാർമിക ശുദ്ധിയോടെ നിലകൊള്ളാൻ വ്യക്തികൾ ചെയ്യുന്ന അത്തരം ശ്രമങ്ങളിൽ യഹോവയാം ദൈവം സന്തുഷ്ടനായിരിക്കും എന്ന്‌ ഉറപ്പുണ്ടായിരിക്കുക.—സദൃശവാക്യങ്ങൾ 27:11.