എങ്ങനെ​യുള്ള ഒരു പിതാ​വി​നെ​യാണ്‌ കുട്ടി​കൾക്കു വേണ്ടത്‌?

കുട്ടി​കൾക്കു വേണ്ടത്‌ അവരെ സ്‌നേ​ഹി​ക്കുന്ന ഒരു പിതാ​വി​നെ​യാണ്‌, അവരുടെ സുഹൃ​ത്തും വഴികാ​ട്ടി​യു​മാ​യി പിന്തു​ണ​യു​ടെ പുഞ്ചി​രി​യു​മാ​യി എപ്പോ​ഴും കൂടെ​യുള്ള ഒരു പിതാ​വി​നെ; ഉത്തരവാ​ദി​ത്വ​ബോ​ധ​മുള്ള, ആശ്രയ​യോ​ഗ്യ​രായ വ്യക്തി​ക​ളാ​യി വളർന്നു​വ​രാൻ തങ്ങളെ സഹായി​ക്കാൻ തന്നാൽ കഴിയു​ന്ന​തെ​ല്ലാം ചെയ്യുന്ന ഒരു പിതാ​വി​നെ. എന്നാൽ പിതാ​വി​നെ കുറി​ച്ചുള്ള കുട്ടി​ക​ളു​ടെ ഈ സ്വപ്‌നം പൂവണി​യി​ക്കാൻ പല പിതാ​ക്ക​ന്മാ​രും തക്കതായ ഗൗരവ​ത്തോ​ടെ ശ്രമി​ക്കു​ന്നില്ല.

കുഞ്ഞു​ങ്ങ​ളെ ഈ ലോക​ത്തി​ലേക്ക്‌ ആനയി​ക്കു​ന്നത്‌ അമ്മമാ​രാണ്‌ എന്നതു ശരിതന്നെ. അമ്മയുടെ വാത്സല്യം കുഞ്ഞു​ങ്ങൾക്ക്‌ ഒഴിച്ചു​കൂ​ടാ​നാ​വാ​ത്ത​താണ്‌ എന്നു പറയേ​ണ്ട​തി​ല്ല​ല്ലോ. എന്നാൽ പിതാ​ക്ക​ന്മാർക്കും തത്തുല്യ​മായ സുപ്ര​ധാന പങ്ക്‌ നിർവ​ഹി​ക്കാ​നുണ്ട്‌ എന്ന വസ്‌തു​തയെ പരാമർശി​ച്ചു​കൊണ്ട്‌ ദ വിൽസൺ ക്വാർട്ടേർലി ഇപ്രകാ​രം പറയു​ക​യു​ണ്ടാ​യി: “അമേരി​ക്കൻ സമൂഹത്തെ കാർന്നു​തി​ന്നുന്ന ഏറ്റവും രൂക്ഷമായ മിക്ക പ്രശ്‌ന​ങ്ങ​ളു​ടെ​യും മുഖ്യ കാരണം പിതാ​ക്ക​ന്മാർ തങ്ങളുടെ ഭാഗ​ധേയം നിർവ​ഹി​ക്കു​ന്ന​തിൽ വരുത്തുന്ന വീഴ്‌ച​യാണ്‌.” ലോക​മൊ​ട്ടാ​കെ പടർന്നി​രി​ക്കുന്ന പ്രശ്‌ന​ങ്ങ​ളു​ടെ ഒരു മുഖ്യ​ഹേ​തു​വും ഇതുത​ന്നെ​യാണ്‌ എന്നു പറയേ​ണ്ടി​യി​രി​ക്കു​ന്നു.

യുവജ​ന​ങ്ങ​ളു​ടെ പെരു​മാറ്റ വൈക​ല്യ​ങ്ങ​ളിൽ അനേക​വും—അക്രമ​സ്വ​ഭാ​വം, അച്ചടക്ക​മി​ല്ലായ്‌മ, മോശ​മായ പഠന നിലവാ​രം, ഉദാസീ​നത എന്നിവ—പലപ്പോ​ഴും അവരുടെ പിതാ​ക്ക​ന്മാർ “ഉത്തരവാ​ദി​ത്വ​ത്തിൽനിന്ന്‌ ഒളി​ച്ചോ​ടുന്ന”തിന്റെ പ്രതി​ഫ​ല​ന​മാ​ണെന്ന്‌ ഒരു പഠനത്തെ ഉദ്ധരി​ച്ചു​കൊണ്ട്‌ ബ്രസീ​ലി​യൻ പത്രമായ ഷൂർണാൽ ഡാ റ്റാർഡെ റിപ്പോർട്ടു ചെയ്യു​ക​യു​ണ്ടാ​യി. കുട്ടി​ക​ളു​ടെ വിജയ​ക​ര​മായ വളർച്ച​യ്‌ക്ക്‌ മാതാ​വും പിതാ​വും ആവശ്യ​മാണ്‌ എന്ന വസ്‌തു​തയെ മാർഷെ​ല്ലോ ബെർനാർഡി​യു​ടെ ഇറ്റാലി​യൻ പുസ്‌ത​ക​മായ ലീ ഇംപെർഫെറ്റി ജേനി​റ്റൊ​റീ (അപൂർണ​രായ മാതാ​പി​താ​ക്കൾ) ഊന്നി​പ്പ​റ​യു​ന്നു.

കുടും​ബ​ജീ​വി​തം മെച്ച​പ്പെ​ടു​ത്താ​നാ​കും

ഇനി, പിതാ​വി​ന്റെ അനാസ്ഥ കുടും​ബ​പ്ര​ശ്‌ന​ങ്ങൾക്കു വഴിമ​രു​ന്നി​ടു​ക​യോ അല്ലെങ്കിൽ പ്രശ്‌ന​ങ്ങൾക്ക്‌ അധിക​പ​ങ്കും അദ്ദേഹം കാരണ​മാ​യി​രി​ക്കു​ക​യോ ചെയ്യു​ന്നെ​ങ്കിൽ പോലും, കാര്യങ്ങൾ നേരെ​യാ​ക്കാ​നും കുടും​ബ​ജീ​വി​തം മെച്ച​പ്പെ​ടു​ത്താ​നും കഴിയും. എങ്ങനെ? പിതാവ്‌ ഇതിന്‌ എന്താണു ചെയ്യേ​ണ്ടത്‌?

ഒരു കാര്യം വ്യക്തമാണ്‌: അടുക്കും ചിട്ടയു​മുള്ള ഒരു കുടും​ബ​വ്യ​വ​സ്ഥ​യി​ലാണ്‌ കുട്ടികൾ വളരേ​ണ്ടത്‌. അവരുടെ ക്ഷേമത്തിൽ അതീവ താത്‌പ​ര്യ​മുള്ള ഒരാളാണ്‌ കുടും​ബ​സാ​ര​ഥ്യം വഹിക്കു​ന്നത്‌ എന്ന്‌ അവർക്കു തോന്നണം. ഇന്നത്തെ മിക്ക കുടും​ബ​ങ്ങ​ളി​ലും സംഭവി​ക്കു​ന്നതു പോലെ, ആ തോന്നൽ കുട്ടി​കൾക്കു ലഭിക്കു​ന്നി​ല്ലെ​ങ്കിൽ അത്‌ അവരുടെ ജീവി​തത്തെ പ്രതി​കൂ​ല​മാ​യി ബാധി​ക്കും. എന്നാൽ ഇങ്ങനെ​യുള്ള ഭവനങ്ങ​ളി​ലെ കുട്ടി​ക​ളു​ടെ സാഹച​ര്യം—പിതാവ്‌ ഇല്ലെങ്കി​ലും പിതാവ്‌ വേണ്ടവി​ധ​ത്തിൽ ഉത്തരവാ​ദി​ത്വ​ങ്ങൾ നിറ​വേ​റ്റു​ന്നി​ല്ലെ​ങ്കി​ലും—ആശയറ്റതല്ല. ‘ദൈവം തന്റെ വിശു​ദ്ധ​നി​വാ​സ​ത്തിൽ അനാഥ​ന്മാർക്കു പിതാവ്‌’ ആയിരി​ക്കു​ന്നു എന്ന്‌ സങ്കീർത്തനം 68:5-ൽ ബൈബിൾ പറയുന്നു. a

സഹായം നേടാ​നാ​കുന്ന വിധം

ഇക്കാര്യ​ത്തിൽ വിജയം​വ​രി​ക്കു​ന്ന​തിന്‌ ദൈവം നൽകുന്ന സഹായം അതി​പ്ര​ധാ​ന​മാ​ണെ​ന്നും ആ സഹായം  നേടി​യെ​ടു​ക്കാൻ സാധി​ക്കു​ന്ന​താ​ണെ​ന്നും വ്യക്തമാ​ക്കുന്ന ഒരു അനുഭ​വ​മാണ്‌ മുൻ ലേഖന​ത്തിൽ പരാമർശിച്ച, പോള​ണ്ടിൽനി​ന്നുള്ള ലിഡിയ എന്ന പെൺകു​ട്ടി​യു​ടേത്‌. അവളുടെ കുടും​ബ​ത്തി​ലെ ജീവിത സാഹച​ര്യം എങ്ങനെ​യു​ള്ള​താ​യി​രു​ന്നു? ആ കുടും​ബം എങ്ങനെ​യാണ്‌ ദൈവ​ത്തി​ന്റെ സഹായം സ്വീക​രി​ച്ചത്‌?

തന്റെ മക്കൾ കൊച്ചു​കു​ട്ടി​കൾ ആയിരു​ന്ന​പ്പോൾ താൻ കുടും​ബത്തെ അവഗണി​ച്ചി​രു​ന്നെന്ന്‌ മകൾ ലിഡി​യ​യു​ടെ വാക്കുകൾ ശരി​വെ​ച്ചു​കൊണ്ട്‌ പിതാവ്‌ ഫ്രാൻചി​ഷെക്ക്‌ സമ്മതി​ക്കു​ന്നു. അദ്ദേഹം പറയുന്നു: “ഞങ്ങളുടെ കുട്ടികൾ ചെയ്യു​ന്നത്‌ എന്താണ്‌ എന്നതിനെ കുറി​ച്ചൊ​ന്നും എനിക്കു യാതൊ​രു ചിന്തയു​മി​ല്ലാ​യി​രു​ന്നു. ഞാൻ അവരോ​ടു വാത്സല്യം കാണി​ച്ചി​രു​ന്നില്ല. എനിക്കും കുട്ടി​കൾക്കും തമ്മിൽ ഒരു അടുപ്പ​വും ഇല്ലായി​രു​ന്നു.” ലിഡി​യ​യ്‌ക്ക്‌ 14 വയസ്സു​ള്ള​പ്പോൾ അവളും ഇളയ അനുജ​നും അനുജ​ത്തി​യും കൂടി പാർട്ടി​ക​ളിൽ കുടി​ച്ചു​കൂ​ത്താ​ടു​ക​യും പുകവ​ലി​ക്കു​ക​യും മറ്റുള്ള​വ​രു​മാ​യി അടിപി​ടി​ക​ളിൽ ഏർപ്പെ​ടു​ക​യും ചെയ്‌തി​രു​ന്നു​വെന്ന്‌ അദ്ദേഹം അറിഞ്ഞ​തേ​യില്ല.

തന്റെ കുട്ടികൾ എത്ര വലിയ ആപത്തി​ലാ​ണു ചെന്നു​പെ​ട്ടി​രി​ക്കു​ന്നത്‌ എന്ന്‌ ഒടുവിൽ തിരി​ച്ച​റിഞ്ഞ ഫ്രാൻചി​ഷെക്ക്‌ ഞെട്ടി​പ്പോ​യി. അവരെ രക്ഷിക്കാൻ എന്തെങ്കി​ലും ചെയ്യാൻ അദ്ദേഹം തീരു​മാ​നി​ച്ചു. “സഹായ​ത്തി​നാ​യി ഞാൻ ദൈവ​ത്തോ​ടു പ്രാർഥി​ച്ചു,” അദ്ദേഹം പറയുന്നു. രസാവ​ഹ​മെന്നു പറയട്ടെ, താമസി​യാ​തെ​തന്നെ യഹോ​വ​യു​ടെ സാക്ഷികൾ അദ്ദേഹ​ത്തി​ന്റെ വീടു സന്ദർശി​ച്ചു. അദ്ദേഹ​വും ഭാര്യ​യും ഒരു ബൈബി​ള​ധ്യ​യ​ന​ത്തി​നു സമ്മതിച്ചു. ക്രമേണ മാതാ​പി​താ​ക്കൾ ബൈബിൾ പഠിപ്പി​ക്ക​ലു​കൾ തങ്ങളുടെ ജീവി​ത​ത്തിൽ പ്രാവർത്തി​ക​മാ​ക്കാൻ തുടങ്ങി. അത്‌ കുട്ടി​ക​ളിൽ എന്തു ഫലമാണ്‌ ഉളവാ​ക്കി​യത്‌?

ഫ്രാൻചി​ഷെക്ക്‌ ഇപ്രകാ​രം വിശദീ​ക​രി​ക്കു​ന്നു: “ഞാൻ കുടി​നി​റു​ത്തി ഒരു നല്ല ഡാഡി​യാ​യി മാറു​ന്നത്‌ കുട്ടികൾ ശ്രദ്ധി​ക്കാൻ തുടങ്ങി. യഹോ​വ​യു​ടെ സാക്ഷി​കളെ കുറിച്ചു കൂടുതൽ അറിയാൻ അവർ ആഗ്രഹി​ച്ചു. അവരും യഹോ​വ​യു​ടെ സാക്ഷി​ക​ളോ​ടൊത്ത്‌ ബൈബിൾ പഠിച്ചു തുടങ്ങു​ക​യും ചീത്ത കൂട്ടു​കെ​ട്ടു​കൾ ഉപേക്ഷി​ക്കു​ക​യും ചെയ്‌തു.” അദ്ദേഹ​ത്തി​ന്റെ മകൻ റാഫോ തന്റെ ഡാഡിയെ കുറിച്ചു പറയു​ന്നതു ശ്രദ്ധി​ക്കുക: “ഞാൻ ഡാഡിയെ സ്‌നേ​ഹി​ച്ചു തുടങ്ങി, ഒരു കൂട്ടു​കാ​ര​നെ​യെ​ന്ന​പോ​ലെ.” അവൻ തുടരു​ന്നു: “പെട്ടെ​ന്നു​തന്നെ സാമൂ​ഹി​ക​വി​രുദ്ധ തെരു​വു​സം​ഘ​ങ്ങ​ളെ​യൊ​ക്കെ ഞങ്ങൾ മറന്നു. ഞങ്ങളുടെ കുടും​ബം ആത്മീയ പ്രവർത്ത​ന​ങ്ങ​ളിൽ തിര​ക്കോ​ടെ ഏർപ്പെ​ടാൻ തുടങ്ങി.”

ഫ്രാൻചി​ഷെക്ക്‌ ഇപ്പോൾ യഹോ​വ​യു​ടെ സാക്ഷി​ക​ളു​ടെ ഒരു സഭയിൽ മൂപ്പനാ​യി സേവി​ക്കു​ക​യാണ്‌. അദ്ദേഹം ഇപ്പോ​ഴും കുടും​ബാം​ഗ​ങ്ങ​ളു​ടെ കാര്യാ​ദി​ക​ളിൽ ഉൾപ്പെ​ടു​ക​യും ഓരോ​രു​ത്ത​രു​ടെ​യും ആത്മീയ വളർച്ച​യിൽ ശ്രദ്ധി​ക്കു​ക​യും ചെയ്യുന്നു. അദ്ദേഹ​ത്തി​ന്റെ ഭാര്യ​യും മകൾ ലിഡി​യ​യും പയനി​യർമാർ അഥവാ മുഴു​സമയ സുവി​ശേ​ഷകർ ആണ്‌. റാഫോ​യും അനുജത്തി സിൽവി​യ​യും ബൈബി​ള​ധ്യ​യ​ന​ത്തിൽ മുഴു​ഹൃ​ദ​യ​ത്തോ​ടെ പങ്കുപ​റ്റു​ന്നു. കൂടാതെ, ക്രിസ്‌തീയ യോഗ​ങ്ങ​ളിൽ അഭി​പ്രാ​യം പറയു​ക​യും തങ്ങളുടെ വിശ്വാ​സം മറ്റുള്ള​വ​രു​മാ​യി പങ്കു​വെ​ക്കു​ക​യും ചെയ്യുന്നു.

പഠിപ്പി​ച്ചി​രുന്ന കാര്യങ്ങൾ സ്വന്തജീ​വി​ത​ത്തിൽ അദ്ദേഹം പ്രാവർത്തി​ക​മാ​ക്കി

മാകാ​റേ​ന​യു​ടെ പിതാവ്‌ ലൂയി​സി​ന്റെ കാര്യ​ത്തിൽ എന്തു സംഭവി​ച്ചു എന്നും കാണുക. പ്രാരംഭ ലേഖന​ത്തിൽ പരാമർശിച്ച, സ്‌പെ​യി​നിൽ നിന്നുള്ള ആ 21 വയസ്സു​കാ​രി​യു​ടെ വാക്കുകൾ ഓർക്കു​ന്നു​ണ്ടാ​കു​മ​ല്ലോ. ലൂയി​സി​ന്റെ ജീവിതം മദ്യപാ​നി​യാ​യി​രുന്ന അദ്ദേഹ​ത്തി​ന്റെ പിതാ​വി​ന്റെ ജീവി​ത​രീ​തി​യു​ടെ തനിപ്പ​കർപ്പാ​യി​രു​ന്നു. സുഹൃ​ത്തു​ക്ക​ളോ​ടൊ​പ്പം പോയി​ക്ക​ഴി​ഞ്ഞാൽ പിന്നെ ലൂയി​സി​നെ ഏതാനും ദിവസ​ത്തേക്കു കാണു​കയേ ഇല്ലായി​രു​ന്നു എന്ന്‌ മാകാ​റേന പറഞ്ഞു. മാത്രമല്ല, അദ്ദേഹം ഭാര്യയെ തന്റെ വിലപ്പെട്ട ജീവി​ത​സ​ഖി​യാ​യി കരുതു​ന്ന​തി​നു പകരം വെറും ഒരു വേലക്കാ​രി​യാ​യി​ട്ടാണ്‌ കണക്കാ​ക്കി​യി​രു​ന്നത്‌. അവരുടെ വിവാ​ഹ​ജീ​വി​തം തകർച്ച​യു​ടെ വക്കിലാ​യി​രു​ന്നു. മാകാ​റേ​ന​യും അവളുടെ ഇളയ കൂടപ്പി​റ​പ്പു​ക​ളും അങ്ങേയ​റ്റത്തെ വൈകാ​രി​ക​വ്യഥ അനുഭ​വി​ച്ചി​രു​ന്നു.

അങ്ങനെ​യി​രി​ക്കെ, ലൂയിസ്‌ യഹോ​വ​യു​ടെ സാക്ഷി​ക​ളോ​ടൊത്ത്‌ ബൈബിൾ പഠിക്കാൻ തുടങ്ങി. അദ്ദേഹം പറയുന്നു: “ഞാൻ ഭാര്യ​യോ​ടും കുട്ടി​ക​ളോ​ടും ഒപ്പം സമയം ചെലവി​ടാൻ തുടങ്ങി. ഞങ്ങൾ ഒരുമി​ച്ചി​രു​ന്നു സംസാ​രി​ച്ചു, ഒന്നിച്ച്‌ ആഹാരം കഴിച്ചു, ഒരുമിച്ച്‌ ബൈബിൾ പഠിച്ചു. വീട്ടു​ജോ​ലി​ക​ളി​ലും വിനോ​ദ​ത്തി​ലും ഞങ്ങൾ ഒന്നിച്ച്‌ ഏർപ്പെട്ടു.” മാകാ​റേ​ന​യു​ടെ വാക്കുകൾ ശ്രദ്ധി​ക്കുക: “കുടും​ബ​ത്തോട്‌ ആത്മാർഥ താത്‌പ​ര്യം കാണി​ക്കുന്ന സ്‌നേ​ഹ​ധ​ന​നായ ഒരു പിതാ​വി​ന്റെ സാന്നി​ധ്യം എനിക്ക്‌ അനുഭ​വ​പ്പെ​ടാൻ തുടങ്ങി.”

ദൈവത്തെ സേവി​ക്കാൻ ലൂയിസ്‌ തന്റെ കുടും​ബത്തെ പ്രോ​ത്സാ​ഹി​പ്പി​ക്കുക മാത്രമല്ല ചെയ്‌തത്‌. മറിച്ച്‌ കുടും​ബത്തെ പഠിപ്പി​ച്ചി​രുന്ന കാര്യങ്ങൾ സ്വന്തജീ​വി​ത​ത്തിൽ അദ്ദേഹം പ്രാവർത്തി​ക​മാ​ക്കി. “നല്ല വരുമാ​നം ലഭിച്ചു​കൊ​ണ്ടി​രുന്ന ഒരു ബിസി​നസ്‌” അദ്ദേഹം ഉപേക്ഷി​ച്ചു. മാകാ​റേന വിശദീ​ക​രി​ക്കു​ന്നു: “കാരണം അത്‌ അദ്ദേഹ​ത്തി​ന്റെ സമയത്തി​ന്റെ സിംഹ​ഭാ​ഗ​വും അപഹരി​ച്ചി​രു​ന്നു. കുടും​ബ​കാ​ര്യ​ങ്ങൾക്കു കൂടുതൽ ശ്രദ്ധ​കൊ​ടു​ക്കാൻ അദ്ദേഹം ആഗ്രഹി​ച്ചു.” അതിന്റെ ഫലം വിസ്‌മ​യാ​വ​ഹ​മാ​യി​രു​ന്നു. “അദ്ദേഹ​ത്തി​ന്റെ ദൃഷ്ടാന്തം, കണ്ണ്‌ ലളിത​മാ​യി സൂക്ഷി​ക്കാ​നും ആത്മീയ കാര്യ​ങ്ങൾക്ക്‌ ഒന്നാം സ്ഥാനം നൽകാ​നും എന്നെ പഠിപ്പി​ച്ചു” എന്ന്‌ മാകാ​റേന പറയുന്നു. അവൾ ഇന്ന്‌ ഒരു പയനി​യ​റാ​യി സേവി​ക്കു​ന്നു. അവളുടെ അമ്മയും ഇളയ കൂടപ്പി​റ​പ്പു​ക​ളും ക്രിസ്‌തീയ സഭയിലെ സജീവ അംഗങ്ങ​ളാണ്‌.

റെയിൽവേ എക്‌സി​ക്യൂ​ട്ടീ​വി​ന്റെ തീരു​മാ​നം

തന്റെ കുട്ടി​ക​ളു​ടെ ക്ഷേമം മുൻനി​റു​ത്തി തീരു​മാ​നങ്ങൾ കൈ​ക്കൊ​ള്ളുന്ന ഒരു പിതാ​വി​നെ​യാണ്‌ കുട്ടി​കൾക്കു വേണ്ടത്‌. മുൻലേ​ഖ​ന​ത്തിൽ പരാമർശിച്ച ജാപ്പനീസ്‌ എക്‌സി​ക്യൂ​ട്ടീവ്‌ ടാകേഷി ടാമു​റ​യു​ടെ കൗമാ​ര​പ്രാ​യ​ത്തി​ലുള്ള മകൻ ചീത്ത കൂട്ടു​കെ​ട്ടിൽ ഉൾപ്പെ​ട്ടി​രു​ന്നു. അവൻ വലിയ അപകട​ത്തി​ലേക്കു നീങ്ങി​ക്കൊ​ണ്ടി​രി​ക്കു​ന്ന​താ​യും കാണ​പ്പെട്ടു. ആ സമയത്താണ്‌, അതായത്‌ 1986-ൽ, ജാപ്പനീസ്‌ നാഷണൽ റെയിൽവേ​യ്‌സി​യി​ലെ തന്റെ ഉന്നതപ​ദവി ഉപേക്ഷി​ക്കാൻ ടാകേഷി തീരു​മാ​നി​ച്ചത്‌. 18 വർഷത്തി​നു ശേഷം ഇന്ന്‌ അദ്ദേഹ​ത്തിന്‌ തന്റെ തീരു​മാ​നത്തെ പ്രതി എന്തു തോന്നു​ന്നു?

“ഒരുപക്ഷേ ഞാൻ എടുത്തി​ട്ടു​ള്ള​തിൽവെച്ച്‌ ഏറ്റവും നല്ല തീരു​മാ​നം ആയിരി​ക്കണം ഇത്‌” എന്ന്‌ അടുത്ത​കാ​ലത്ത്‌ അദ്ദേഹം പറയു​ക​യു​ണ്ടാ​യി. “എന്റെ മകനോ​ടൊ​പ്പം കൂടുതൽ സമയം ചെലവ​ഴി​ക്കു​ക​യും ബൈബിൾ പഠനം ഉൾപ്പെടെ കാര്യങ്ങൾ ഒന്നിച്ചു ചെയ്യു​ക​യും ചെയ്‌ത​തിന്‌ വിസ്‌മ​യ​ക​ര​മായ ഫലമു​ണ്ടാ​യി. ഞങ്ങൾ കൂട്ടു​കാ​രാ​യി, അവൻ ചീത്ത കൂട്ടു​കെ​ട്ടും മോശ​മായ പെരു​മാ​റ്റ​വും ഉപേക്ഷി​ച്ചു.”

ടാകേ​ഷി​യു​ടെ ഭാര്യ ഏതാനും വർഷങ്ങൾക്കു മുമ്പു​തന്നെ യഹോ​വ​യു​ടെ സാക്ഷി​ക​ളിൽ ഒരാളാ​യി മാറി​യി​രു​ന്നു. അവരുടെ മാതൃ​കാ​യോ​ഗ്യ​മായ പെരു​മാ​റ്റ​മാണ്‌ ബൈബിൾ പരി​ശോ​ധി​ക്കാ​നും കുടും​ബ​ത്തി​ന്റെ കാര്യ​ത്തിൽ കൂടുതൽ ഉൾപ്പെ​ടാ​നും അദ്ദേഹത്തെ പ്രചോ​ദി​പ്പി​ച്ചത്‌. കാലാ​ന്ത​ര​ത്തിൽ അദ്ദേഹ​വും മകനും മകളും യഹോ​വ​യു​ടെ സാക്ഷികൾ ആയിത്തീർന്നു. ടാകേ​ഷി​യും മകനും ഇപ്പോൾ തങ്ങളുടെ സഭകളിൽ  മൂപ്പന്മാ​രാ​യി സേവി​ക്കു​ന്നു. അദ്ദേഹ​ത്തി​ന്റെ ഭാര്യ​യും മകളും പയനി​യർമാ​രാണ്‌.

പിതാ​ക്ക​ന്മാർക്ക്‌ സഹായം ആവശ്യം

സ്വന്തം കുട്ടി​കളെ തങ്ങൾ അവഗണി​ക്കു​ക​യാ​ണെന്നു തിരി​ച്ച​റി​യുന്ന അനേകം പിതാ​ക്ക​ന്മാർക്കും പക്ഷേ കുട്ടി​കൾക്കു​വേണ്ടി എന്തു ചെയ്യണം എന്ന്‌ അറിയില്ല. സ്‌പാ​നീഷ്‌ പത്രമായ ലാ വാൻഗ്വാർഡ്യ​യിൽ വന്ന ഒരു തലക്കെട്ടു ശ്രദ്ധി​ക്കുക: “കൗമാ​ര​പ്രാ​യ​ക്കാ​രായ മക്കളെ വളർത്തേ​ണ്ടത്‌ എങ്ങനെ​യെന്ന്‌ അറിയി​ല്ലെന്ന്‌ [സ്‌പാ​നീഷ്‌] മാതാ​പി​താ​ക്ക​ളിൽ 42 ശതമാനം പേർ സമ്മതി​ക്കു​ന്നു.” കൗമാ​ര​ത്തി​ന്റെ പടി കയറി തുടങ്ങി​യി​ട്ടി​ല്ലാത്ത കുട്ടി​ക​ളെ​യും പിച്ച​വെ​ച്ചു​ന​ട​ക്കുന്ന പ്രായ​ത്തി​ലുള്ള കുട്ടി​ക​ളെ​യും വളർത്തി​ക്കൊ​ണ്ടു​വ​രു​ന്നതു സംബന്ധി​ച്ചുള്ള ചില പിതാ​ക്ക​ന്മാ​രു​ടെ അറിവും ഇങ്ങനെ​തന്നെ ആണെന്നു പറയാൻ കഴിയും. കൊച്ചു​കു​ഞ്ഞു​ങ്ങൾക്ക്‌ തങ്ങളുടെ സാമീ​പ്യ​വും ശ്രദ്ധയു​മൊ​ന്നും അത്ര ആവശ്യ​മി​ല്ലെ​ന്നാണ്‌ പല പിതാ​ക്ക​ന്മാ​രും ധരിച്ചു​വെ​ച്ചി​രി​ക്കു​ന്നത്‌. എന്നാൽ അവർക്കും വാത്സല്യ​മുള്ള പിതാ​ക്ക​ന്മാ​രു​ടെ സാമീ​പ്യ​വും ശ്രദ്ധയും ഒഴിച്ചു​കൂ​ടാ​നാ​വാ​ത്ത​താണ്‌.

കുട്ടി​ക​ളു​ടെ ഹൃദയ​ത്തിൽ സ്ഥാനം നേടാൻ പിതാ​ക്ക​ന്മാർക്ക്‌ എങ്ങനെ കഴിയും എന്നതിനെ കുറിച്ച്‌ ഇനി എന്താണു പഠിക്കാ​നു​ള്ളത്‌? പിതാ​ക്ക​ന്മാർക്കുള്ള ഏറ്റവും നല്ല മാതൃ​കകൾ ആരെല്ലാ​മാണ്‌? അവരിൽനിന്ന്‌ എന്തു പഠിക്കാൻ കഴിയും? ഈ ലേഖന പരമ്പര​യി​ലെ ഞങ്ങളുടെ ഒടുവി​ലത്തെ ലേഖനം ഈ ചോദ്യ​ങ്ങൾ പരിചി​ന്തി​ക്കു​ന്ന​താ​യി​രി​ക്കും. (g04 8/22)

[അടിക്കു​റിപ്പ്‌]

[7-ാം പേജിലെ ചിത്രങ്ങൾ]

കുട്ടികൾക്ക്‌ വേണ്ടതു നൽകിയ പിതാ​ക്ക​ന്മാർ

ഫ്രാൻചിഷെക്കും കുടും​ബ​വും

ലൂയിസും കുടും​ബ​വും

ടാകേഷിയും കുടും​ബ​വും