അമിത കുടി—അതിൽ എന്താണ് തെറ്റ്?
യുവജനങ്ങൾ ചോദിക്കുന്നു . . .
അമിത കുടി—അതിൽ എന്താണ് തെറ്റ്?
“മണിക്കൂറുകളോളം കുടിക്കുകയായിരുന്നിട്ടും, കയ്യിൽ ഓരോ വിസ്കിക്കുപ്പിയുമായിട്ടാണ് ഞാനും സുഹൃത്തും വെളുപ്പിനെ ഒരു മണിക്ക് പാർട്ടി കഴിഞ്ഞിറങ്ങിയത്. വീട്ടിലേക്കു നടക്കുന്നതിനിടയിലും ഞങ്ങൾ കുടി തുടർന്നു. പിന്നെ ഞാൻ ഓർക്കുന്നത് സൂര്യൻ ഉദിച്ചുവരുന്ന കാഴ്ചയാണ്. ഞങ്ങൾക്കു വഴി തെറ്റിയിരുന്നു എന്നു ഞാൻ മനസ്സിലാക്കി. വാസ്തവത്തിൽ, ഒരു പ്രധാന ഹൈവേയിൽ കൂടിയായിരുന്നു ഞങ്ങൾ നടന്നത്. ഞങ്ങളെ വണ്ടി ഇടിക്കാതിരുന്നത് അത്ഭുതം തന്നെ.”—ക്ലേ. a
അമിത കുടി. b കേവലം ഉന്മാദത്തിനു വേണ്ടിയുള്ള കുടി എന്ന് ചിലർ അതിനെ നിർവചിക്കുന്നു. എന്നാൽ അതിന്റെ കൂടുതൽ വ്യക്തമായ ഒരു നിർവചനം, ദി യു.എസ്. നാഷണൽ ഇൻസ്റ്റിറ്റ്യൂട്ട് ഓൺ ആൽക്കഹോൾ അബ്യൂസ് ആന്റ് ആൽക്കഹോളിസം അവതരിപ്പിച്ച ഒരു റിപ്പോർട്ടിൽ കാണപ്പെടുന്നു. അതു പറയുന്നതനുസരിച്ച്, സാധാരണഗതിയിൽ അമിത കുടി എന്നാൽ “പുരുഷന്മാർ അഞ്ചോ അതിലധികമോ ഡ്രിങ്ക്സും സ്ത്രീകൾ നാലോ അതിലധികമോ ഡ്രിങ്ക്സും തുടർച്ചയായി എടുക്കുന്നതാണ്.” c
ഐക്യനാടുകളിലെ ആരോഗ്യ വിദഗ്ധർ അമിത കുടിയെ “ഗുരുതരമായ ഒരു പൊതുജനാരോഗ്യ പ്രശ്നം” എന്നു വിളിക്കുന്നു. ഇംഗ്ലണ്ടിലും സ്കോട്ട്ലൻഡിലും വെയിൽസിലും ഉള്ള സെക്കൻഡറി സ്കൂൾ വിദ്യാർഥികളുടെ ഇടയിൽ നടത്തിയ ഒരു പഠനം അനുസരിച്ച് “13-ഉം 14-ഉം വയസ്സുള്ളവരിൽ കാൽഭാഗവും ഒറ്റയിരുപ്പിൽ, കുറഞ്ഞത് അഞ്ച് പ്രാവശ്യമെങ്കിലും മദ്യപിച്ചിട്ടു”ള്ളതായി അവകാശപ്പെട്ടു. 15-ഉം 16-ഉം വയസ്സുള്ള കുട്ടികളിൽ ഏതാണ്ട് പകുതിപ്പേരും അങ്ങനെ തന്നെ ചെയ്തതായി സർവേ വെളിപ്പെടുത്തി.
കോളേജു വിദ്യാർഥികളെ ഉൾക്കൊള്ളിച്ചു നടത്തിയ ഒരു യു.എസ്. പഠനത്തിൽ, അഞ്ചുപേരിൽ രണ്ടുപേർ വീതം സർവേക്കു മുമ്പുള്ള രണ്ടാഴ്ചയ്ക്കുള്ളിൽ ഒരു പ്രാവശ്യം എങ്കിലും അമിത കുടിയിൽ ഏർപ്പെട്ടിരുന്നതായി
വെളിപ്പെട്ടു. യു.എസ്. ആരോഗ്യ വകുപ്പ് ഇപ്രകാരം പറയുന്നു: “12-നും 20-നും ഇടയ്ക്കുള്ള പ്രായക്കാരിൽ ഏകദേശം 1 കോടി 4 ലക്ഷം പേർ മദ്യം ഉപയോഗിക്കുന്നതായി റിപ്പോർട്ടു ചെയ്തു. അവരിൽ 51 ലക്ഷം പേർ അമിത മദ്യപാനികൾ ആയിരുന്നു, മാസത്തിൽ അഞ്ചു പ്രാവശ്യം എങ്കിലും അമിതമായി കുടിച്ചിരുന്ന 23 ലക്ഷം മുഴുക്കുടിയന്മാരും ഇതിൽ ഉൾപ്പെട്ടിരുന്നു.” ഓസ്ട്രേലിയയിൽ നടത്തിയ ഒരു പഠനം, ആ നാട്ടിൽ ആൺകുട്ടികളെക്കാൾ ഏറെ പെൺകുട്ടികൾ അമിത കുടിയിൽ ഏർപ്പെടുന്നു എന്നു വെളിപ്പെടുത്തി, അവർ ഒറ്റയിരുപ്പിൽ 13 മുതൽ 30 വരെ പ്രാവശ്യം കുടിക്കുംപോലും!
അധികവും മറ്റു ചെറുപ്പക്കാരുടെ പ്രേരണയാലാണ് അവർ ഈ രീതിയിൽ കുടിക്കുന്നത്. ഗവേഷകയായ കാരൾ ഫാൾകോവ്സ്കി ഇപ്രകാരം പറഞ്ഞു: “ലഹരിപിടിക്കുന്നതു വരെ കുടിക്കുക എന്ന ലക്ഷ്യത്തിൽ സംഘം ചേർന്നു നടത്തുന്ന, മുമ്പൊന്നും കേട്ടിട്ടില്ലാത്തതും സാഹസപൂർണവുമായ മദ്യപാന മത്സരക്കളികൾ വ്യാപകമാവുകയാണ്. ഉദാഹരണത്തിന്, ടിവി കാണുകയോ കൂട്ടം ചേർന്നു സംസാരിച്ചിരിക്കുകയോ ചെയ്യുന്നതിനിടയിലുള്ള ഓരോ നിശ്ചിത സമയത്തും, അതിൽ ഉൾപ്പെട്ടിരിക്കുന്ന എല്ലാവരും 30 മില്ലിലിറ്റർ വെള്ളം ചേർക്കാത്ത മദ്യം കുടിക്കാൻ ചില കളികൾ വ്യവസ്ഥചെയ്യുന്നു.”
അമിത കുടിയുടെ അപകടങ്ങൾ
അമിത കുടി വെറും ഒരു തമാശ ആണെന്നു ചിലർ പറഞ്ഞേക്കാമെങ്കിലും അത് യഥാർഥത്തിൽ ഒരു തീക്കളി ആണ്! അമിതമായി മദ്യം അകത്തേക്കു ചെല്ലുന്നത്, തലച്ചോറിന് ആവശ്യമായ ഓക്സിജൻ ലഭിക്കുന്നതിനെ തടസ്സപ്പെടുത്തുന്നു. ജീവത്പ്രധാനമായ ശാരീരിക പ്രവർത്തനങ്ങൾ നിലയ്ക്കാൻ തുടങ്ങുകയും ചെയ്തേക്കാം. മന്ദഗതിയിലുള്ളതോ ക്രമരഹിതമോ ആയ ശ്വാസോച്ഛ്വാസവും ഛർദിയും ബോധക്ഷയവും അതിന്റെ ലക്ഷണങ്ങൾ ആയിരുന്നേക്കാം. ചില കേസുകളിൽ മരണവും സംഭവിച്ചേക്കാം. ഹൈസ്കൂൾ പാസ്സായി ഏതാണ്ട് ഒരു മാസം കഴിഞ്ഞ് 17 വയസ്സുള്ള കിം, നിശ്ചിത തുകയ്ക്ക് “ഇഷ്ടം പോലെ കുടിക്കാൻ കഴിയുന്ന” ഒരു പാർട്ടിയിൽ പങ്കെടുത്തു. 17 പ്രാവശ്യം കുടിച്ചുകഴിഞ്ഞപ്പേൾ അവൾ ബോധംകെട്ടുവീണു. മൂത്ത സഹോദരി വന്ന് അവളെ വീട്ടിലേക്കു കൊണ്ടുപോയി. അടുത്ത ദിവസം, കിം മരിച്ചുകിടക്കുന്നതാണ് അവളുടെ അമ്മ കണ്ടത്.
അമിത കുടിയുടെ ഫലമായി മരണം സംഭവിക്കുന്നത് അപൂർവം ആയിരുന്നേക്കാം എങ്കിലും അത് നിങ്ങളുടെ ആരോഗ്യത്തിന് ഒരു യഥാർഥ വെല്ലുവിളി തന്നെയാണ്. മാനസിക ആരോഗ്യ വിദഗ്ധനായ ജെറോം ലെവിൻ ഇപ്രകാരം പറയുന്നു: “നിങ്ങളുടെ ശരീരത്തിലെ ഏതൊരു അവയവത്തിനും സാരമായ തകരാറു വരുത്താനുള്ള കഴിവ് മദ്യത്തിനുണ്ട്. നാഡീവ്യവസ്ഥ, കരൾ, ഹൃദയം എന്നിവയാണ് മിക്കപ്പോഴും ബാധിക്കപ്പെടുന്നത്.” ഡിസ്കവർ മാസികയിലെ ഒരു ലേഖനം പറയുന്നു: “മദ്യപിക്കുന്ന ചെറുപ്പക്കാർ അനർഥം ക്ഷണിച്ചുവരുത്തുകയാണ് എന്ന് ആധുനിക ഗവേഷണം സൂചിപ്പിക്കുന്നു. ഒരു വ്യക്തിയുടെ തലച്ചോറ് അയാളുടെ 20-കളിലും വളർച്ച പ്രാപിച്ചുകൊണ്ടിരിക്കുന്നതിനാൽ, അമിതമായി കുടിക്കുന്ന കൗമാരപ്രായക്കാർ തങ്ങളുടെ മാനസിക പ്രാപ്തികൾക്കു കാര്യമായ ഹാനി വരുത്തിവെക്കുകയായിരിക്കും ചെയ്യുന്നത്.” വർധിച്ച മുഖക്കുരു, അകാലത്തിൽ ചുക്കിച്ചുളിയുന്ന ത്വക്ക്, വണ്ണം വെക്കൽ, ആന്തര അവയവങ്ങൾക്ക് ഉണ്ടാകുന്ന തകരാറ്, മദ്യാസക്തി, മയക്കുമരുന്നാസക്തി എന്നിവയും സ്ഥിരമായ മദ്യപാനവുമായി ബന്ധപ്പെട്ടിരിക്കുന്നു.
അമിത കുടി മറ്റ് അപകടങ്ങളും വരുത്തിവെക്കുന്നു. കുടിച്ചു ലക്കുകെട്ടാൽ നിങ്ങൾ ദുഷ്പെരുമാറ്റത്തിനു വിധേയരായേക്കാം. വളരെ എളുപ്പത്തിൽ നിങ്ങൾ കയ്യേറ്റത്തിന്റെയോ ബലാത്സംഗത്തിന്റെയോ പോലും ഇരയായിത്തീർന്നേക്കാം. അതേസമയം, സുബോധമുള്ള അവസ്ഥയിൽ ചിന്തിക്കുക പോലും ചെയ്യാത്ത കാര്യങ്ങൾ തെല്ലും സങ്കോചം കൂടാതെ ചെയ്തുകൊണ്ട് നിങ്ങൾതന്നെയും മറ്റുള്ളവർക്ക് ഒരു അപകടകാരി ആയിത്തീർന്നേക്കാം. അതുകൊണ്ടാണ്, അമിതമായി മദ്യപിച്ചാൽ “നിന്റെ കണ്ണു പരസ്ത്രീകളെ നോക്കും; നിന്റെ ഹൃദയം വക്രത പറയും” എന്ന് ബൈബിൾ മുന്നറിയിപ്പു നൽകുന്നത്. (സദൃശവാക്യങ്ങൾ 23:33) തകർന്ന സുഹൃദ്ബന്ധങ്ങൾ, സ്കൂളിലും ജോലിസ്ഥലത്തും പ്രകടമാകുന്ന കഴിവുകേട്, ഒരു കുറ്റപ്പുള്ളി എന്ന പേർ, ദാരിദ്ര്യം എന്നിവയും അതിന്റെ വേദനാകരമായ പരിണതഫലങ്ങളിൽ ഉൾപ്പെട്ടേക്കാം. d—സദൃശവാക്യങ്ങൾ 23:21.
കുടിക്കാൻ പ്രേരിപ്പിക്കപ്പെടുന്നു
ഇത്തരം അപകടങ്ങൾ പതിയിരിക്കുമ്പോൾത്തന്നെ മദ്യപാനം ശക്തമായി പ്രോത്സാഹിപ്പിക്കപ്പെടുന്നു, അനേകം നാടുകളിലും മദ്യം സുലഭവുമാണ്. യഥാർഥത്തിൽ, ടെലിവിഷനും മാസികകളും പരസ്യങ്ങളിലൂടെ മദ്യപാനത്തിന് ഗ്ലാമറിന്റെ പരിവേഷം നൽകുന്നു. എന്നിരുന്നാലും, യുവജനങ്ങൾ മിക്കപ്പോഴും അമിത കുടിക്കു വശംവദരാകുന്നത് സമപ്രായക്കാരിൽ നിന്നുള്ള സമ്മർദം നിമിത്തമാണ്.
മദ്യത്തിന്റെ ഉപഭോഗം സംബന്ധിച്ച സ്ഥിതിവിവരക്കണക്കുകൾക്കായി ഓസ്ട്രേലിയയിൽ ഒരു സർവേ നടത്തുകയുണ്ടായി. ഉൾപ്പെട്ട ചെറുപ്പക്കാരിൽ 36 ശതമാനവും “സാമൂഹിക കൂടിവരവുകളിൽ ഒറ്റപ്പെടാതിരിക്കാൻ വേണ്ടി ആയിരുന്നു” തങ്ങൾ മദ്യപിച്ചത് എന്നു പറഞ്ഞു. യാതൊരു നിയന്ത്രണവും ഇല്ലാതെ “മദ്യം വിളമ്പുന്ന” ഒരു പാർട്ടിയിൽ, സ്വതവേ നാണംകുണുങ്ങിയായ ഒരു വ്യക്തി സമപ്രായക്കാരുടെ പ്രോത്സാഹനത്തിനു വഴങ്ങി മൂക്കറ്റം കുടിച്ചുകൊണ്ട് അവരുടെ ഇടയിലെ ഏറ്റവും രസികൻ ആയിത്തീർന്നേക്കാം. ഇപ്രകാരം മദ്യപിച്ച് ബോധം മറഞ്ഞ അവസ്ഥയിൽ ആയിരുന്നു കെയ്റ്റി എന്ന ചെറുപ്പക്കാരിയെ വീട്ടിൽ എത്തിച്ചത്. “കെയ്റ്റി, നീ എന്താ കൊച്ചുകുട്ടി ആണോ? മദ്യം നുണഞ്ഞുകുടിക്കുകയല്ല വേണ്ടത്, ഒറ്റവലിക്ക് അകത്താക്കാൻ പഠിക്കണം” എന്നൊക്കെ പറഞ്ഞുകൊണ്ട് ആയിരുന്നു അവളുടെ “കൂട്ടുകാരൻ” അവൾക്കു മദ്യം വിളമ്പിയത്.
സന്തോഷിക്കാനും മറ്റുള്ളവരെപ്പോലെ ആയിരിക്കാനുമുള്ള വ്യക്തികളുടെ ആഗ്രഹം വളരെ ശക്തമാണ്. അമിത കുടി അപകടകരം ആണെന്നതിനുള്ള പ്രബലമായ തെളിവുകൾ ഉണ്ടായിരുന്നിട്ടും അതിന്റെ പ്രചാരം വർധിച്ചുവരുന്നു എന്നത് ഈ ആഗ്രഹം എത്ര ശക്തമാണെന്നു കാണിക്കുന്നു.
നിങ്ങൾ എന്തു തീരുമാനിക്കും?
ഈ ചോദ്യങ്ങൾ പരിചിന്തിക്കുക: മദ്യപാനത്തിന്റെ കാര്യത്തിൽ നിങ്ങൾ എന്തു തീരുമാനങ്ങൾ കൈക്കൊള്ളും? സമപ്രായക്കാർ ചെയ്യുന്നത് അതേപടി നിങ്ങളും ചെയ്യുമോ? റോമർ 6:16-ൽ ബൈബിൾ പറയുന്നത് എന്താണെന്നു ഓർക്കുക: “നിങ്ങൾ ദാസന്മാരായി അനുസരിപ്പാൻ നിങ്ങളെത്തന്നേ സമർപ്പിക്കയും നിങ്ങൾ അനുസരിച്ചു പോരുകയും ചെയ്യുന്നവന്നു ദാസന്മാർ ആകുന്നു എന്നു അറിയുന്നില്ലയോ?” സമപ്രായക്കാർ നിങ്ങളുടെ ഓരോ ചലനങ്ങളെയും നിയന്ത്രിക്കാൻ അനുവദിച്ചാൽ നിങ്ങൾ യഥാർഥത്തിൽ അവരുടെ ദാസർ അഥവാ അടിമകൾ ആയിത്തീരുന്നു. സ്വയമായി ചിന്തിച്ചു പ്രവർത്തിക്കാൻ ബൈബിൾ നിങ്ങളെ പ്രോത്സാഹിപ്പിക്കുന്നു. (സദൃശവാക്യങ്ങൾ 1:4) ഗുരുതരമായ പിഴവുകൾ വരുത്താതിരിക്കാൻ നിങ്ങളെ സഹായിക്കുന്ന ബുദ്ധിയുപദേശങ്ങളും അതിൽ അടങ്ങിയിരിക്കുന്നു. മദ്യം സംബന്ധിച്ച് അതിനു പറയാനുള്ളതു പരിചിന്തിക്കുക.
മദ്യം കഴിക്കുന്നതിനെ ബൈബിൾ കുറ്റപ്പെടുത്തുന്നില്ല, ചെറുപ്പക്കാർ സന്തോഷിക്കുന്നതിലും അത് തടസ്സം നിൽക്കുന്നില്ല. എന്നാൽ അമിത കുടി തെറ്റു തന്നെ ആണെന്ന് അതു മുന്നറിയിപ്പു നൽകുന്നു. “വീഞ്ഞു പരിഹാസിയും മദ്യം കലഹക്കാരനും ആകുന്നു; അതിനാൽ ചാഞ്ചാടി നടക്കുന്ന ആരും ജ്ഞാനിയാകയില്ല” എന്ന് സദൃശവാക്യങ്ങൾ 20:1 പറയുന്നു. അതേ, ബഹളമുണ്ടാക്കിക്കൊണ്ട് മാനക്കേടു വരുത്തിവെക്കുന്ന വിധത്തിൽ ഒരു മദ്യപാനി പ്രവർത്തിച്ചേക്കാം! മദ്യം തത്കാലത്തേക്ക് നിങ്ങൾക്കു സന്തോഷം പകർന്നേക്കാം എന്നത് സത്യമാണെങ്കിലും അമിതമായി കുടിക്കുന്ന പക്ഷം, ശാരീരികവും വൈകാരികവും ആയ ഒട്ടേറെ കെടുതികൾ വരുത്തിക്കൊണ്ട് അതു നിങ്ങളെ “സർപ്പംപോലെ കടിക്കും.”—സദൃശവാക്യങ്ങൾ 23:32.
ഒരു നിശ്ചിത പ്രായം കഴിഞ്ഞവരേ മദ്യപിക്കാൻ പാടുള്ളു എന്ന് പല രാജ്യങ്ങളും നിഷ്കർഷിക്കുന്നു എന്ന വസ്തുതയും ശ്രദ്ധാർഹമാണ്. ക്രിസ്ത്യാനികൾ അത്തരം നിയമങ്ങൾ അനുസരിക്കുന്നു. (തീത്തൊസ് 3:1) അവ നിങ്ങൾക്ക് ഒരു സംരക്ഷണമാണ്.
സർവോപരി, ഏറ്റവും ഗൗരവം അർഹിക്കുന്ന മറ്റൊരു സംഗതിയുണ്ട്—അമിത കുടിയുടെ ആത്മീയ അപകടങ്ങൾ. നിങ്ങൾ യഹോവയെ ‘പൂർണ്ണമനസ്സോടെ’—അമിത കുടി മൂലം തകരാറുവന്ന ഒരു മനസ്സോടെ അല്ല—സേവിക്കണം എന്ന് അവൻ ആഗ്രഹിക്കുന്നു! (മത്തായി 22:37) ‘[അമിത] വീഞ്ഞുകുടി’ മാത്രമല്ല ‘മദ്യപാന മത്സരങ്ങളും’ ദൈവവചനം കുറ്റം വിധിക്കുന്നു. (1 പത്രൊസ് 4:3, NW) അതുകൊണ്ട് അമിത കുടിയിൽ ഏർപ്പെടുന്നത് നമ്മുടെ സ്രഷ്ടാവിന്റെ ഇഷ്ടത്തിനു വിരുദ്ധമാണ്. ദൈവവുമായി ഒരു ഉറ്റ ബന്ധം ആസ്വദിക്കുന്നതിന് അത് തടസ്സം സൃഷ്ടിച്ചേക്കാം.
നിങ്ങൾ അമിത കുടിയുടെ കെണിയിൽ അകപ്പെട്ടിരിക്കുന്നു എങ്കിൽ എന്താണു ചെയ്യേണ്ടത്? മാതാപിതാക്കളോടോ പക്വതയുള്ള ഒരു ക്രിസ്ത്യാനിയോടോ സംസാരിച്ചുകൊണ്ട് ഉടനടി സഹായം സ്വീകരിക്കുക. e പ്രാർഥനയിൽ യഹോവയെ സമീപിച്ചുകൊണ്ട് അവന്റെ സഹായം അപേക്ഷിക്കുക. “കഷ്ടങ്ങളിൽ അവൻ ഏററവും അടുത്ത തുണയായിരിക്കുന്നു” എന്നത് മറക്കരുത്. (സങ്കീർത്തനം 46:1) അമിത കുടിയും ചെറുപ്രായത്തിലുള്ള മദ്യപാനവും ആരംഭിക്കുന്നത് മിക്കപ്പോഴും സമപ്രായക്കാരുടെ സമ്മർദംകൊണ്ട് ആയതിനാൽ, കൂട്ടുകാരുടെയും വിനോദങ്ങളുടെയും തിരഞ്ഞെടുപ്പിൽ നിങ്ങൾ കാര്യമായ മാറ്റം വരുത്തേണ്ടത് ആവശ്യമായിരുന്നേക്കാം. അത് എളുപ്പമായിരിക്കുകയില്ല, എന്നാൽ യഹോവയുടെ സഹായത്താൽ നിങ്ങൾക്കു വിജയിക്കാനാകും. (g04 9/22)
[അടിക്കുറിപ്പുകൾ]
a ചില പേരുകൾക്കു മാറ്റം വരുത്തിയിരിക്കുന്നു.
b അമേരിക്കയിൽ ഒരു സ്റ്റാൻഡേർഡ് ഡ്രിങ്ക് എന്നു പറയുന്നത്, 360 മില്ലിലിറ്റർ ബിയറോ 150 മില്ലിലിറ്റർ വീഞ്ഞോ 45 മില്ലിലിറ്റർ വീര്യം കൂടിയ മദ്യമോ ആണ്.
c “ബിഞ്ച് ഡ്രിങ്കിങ്” എന്ന പേരിൽ അറിയപ്പെടുന്ന മദ്യപാനത്തെയാണ് ഈ ലേഖനം പരാമർശിക്കുന്നത്.
d “പതിവായി അമിത കുടിയിൽ ഏർപ്പെടുന്നവർ, ക്ലാസ്സുകൾ മുടക്കാനും പഠനകാര്യങ്ങളിൽ വീഴ്ച വരുത്താനും അപകടത്തിൽ പെടാനും വസ്തുവകകൾ നശിപ്പിക്കാനും മിതമായി കുടിക്കുന്നവരെ അപേക്ഷിച്ച് എട്ടു മടങ്ങ് സാധ്യത ഉള്ളവരായിരുന്നു” എന്ന് ഒരു യു.എസ്. പഠനം വെളിപ്പെടുത്തി.
e ചില കേസുകളിൽ, സഹാനുഭൂതിയുള്ള ഒരു ഡോക്ടറുടെ സഹായം ആവശ്യമായിരുന്നേക്കാം.
[15-ാം പേജിലെ ചതുരം/ചിത്രം]
അമിത കുടിയുടെ ദാരുണ ചിത്രം
താഴെ കൊടുത്തിരിക്കുന്ന സ്ഥിതിവിവര കണക്കുകൾ, ഐക്യനാടുകളിലെ കോളേജു വിദ്യാർഥികളുടെ ഇടയിലുള്ള അമിത കുടിയുടെ ദാരുണമായ പരിണതഫലങ്ങൾ വെളിപ്പെടുത്തുന്നു:
മരണം: വാഹനാപകടങ്ങൾ ഉൾപ്പെടെയുള്ള, അവിചാരിതവും മദ്യപാനത്തോടു ബന്ധപ്പെട്ടതും ആയ പരിക്കുകളുടെ ഫലമായി 18-നും 24-നും ഇടയ്ക്കുള്ള 1,400 കോളേജു വിദ്യാർഥികൾ ഓരോ വർഷവും മരണമടയുന്നു
പരിക്കേൽക്കുന്നവർ: മദ്യം തലയ്ക്കു പിടിച്ചിരിക്കുമ്പോൾ, 18-നും 24-നും ഇടയിലുള്ള 5,00,000 വിദ്യാർഥികൾക്ക് അവിചാരിതമായി പരിക്കേൽക്കുന്നു
അക്രമം: 18-നും 24-നും ഇടയിലുള്ള 6,00,000 വിദ്യാർഥികൾ, മദ്യപിച്ചുകൊണ്ടിരിക്കുന്ന മറ്റൊരു വിദ്യാർഥിയാൽ ആക്രമിക്കപ്പെടുന്നു
ലൈംഗിക പീഡനം: 18-നും 24-നും ഇടയ്ക്കുള്ള 70,000-ത്തിലധികം വിദ്യാർഥികൾ മദ്യപാനവുമായി ബന്ധപ്പെട്ട ലൈംഗിക കടന്നാക്രമണത്തിനോ ഡേറ്റിങ്ങിനിടയിലുള്ള ബലാത്സംഗത്തിനോ ഇരയാകുന്നു
[കടപ്പാട്]
ഉറവിടം: ദി യു.എസ്. നാഷണൽ ഇൻസ്റ്റിറ്റ്യൂട്ട് ഓൺ ആൽക്കഹോൾ അബ്യൂസ് ആന്റ് ആൽക്കഹോളിസം
[13-ാം പേജിലെ ചിത്രം]
അമിത കുടിയിൽ പങ്കുചേരാൻ സമപ്രായക്കാർ നിങ്ങളെ പ്രേരിപ്പിച്ചേക്കാം