പടച്ചട്ട​യ​ണിഞ്ഞ കടലിലെ കൊച്ചു​വീ​ര​ന്മാർ

ഓസ്‌ട്രേലിയയിലെ ഉണരുക! ലേഖകൻ

തിമിം​ഗ​ലങ്ങൾ, ഡോൾഫി​നു​കൾ, സ്രാവു​കൾ—കടലിലെ ഈ വമ്പന്മാരെ കണ്ട്‌ നിങ്ങൾ അമ്പരക്കും എന്നതിനു സംശയ​മില്ല. എന്നിരു​ന്നാ​ലും, കടലുകൾ “ചെറി​യ​തും വലിയ​തു​മായ” ജീവി​ക​ളു​ടെ വാസഗൃ​ഹ​മാണ്‌. (സങ്കീർത്തനം 104:25) ഒന്നു സൂക്ഷ്‌മ​നി​രീ​ക്ഷണം നടത്തു​ന്ന​വർക്ക്‌ കടലിലെ കൊച്ചു​കൊ​ച്ചു​ജീ​വി​ക​ളും നമ്മിൽ വിസ്‌മ​യ​മു​ണർത്താൻ പോന്ന​വ​യാ​ണെന്നു മനസ്സി​ലാ​കും.

ഉദാഹ​ര​ണ​ത്തിന്‌, “കടലിലെ പടച്ചട്ട​യ​ണിഞ്ഞ പടയാ​ളി​കൾ” എന്നു വർണി​ച്ചി​രി​ക്കുന്ന ജീവികൾ കടൽത്ത​ട്ടി​ലാ​ക​മാ​നം പാഞ്ഞു​ന​ട​ക്കു​ന്നതു കാണാം. ഇവയുടെ രൂപം മധ്യകാ​ല​ഘ​ട്ട​ത്തി​ലെ പടച്ചട്ട​യ​ണിഞ്ഞ ചില പടയാ​ളി​കളെ (knights) അനുസ്‌മ​രി​പ്പി​ക്കു​ന്ന​തി​നാ​ലാണ്‌ ഇവയെ അങ്ങനെ വർണി​ച്ചി​രി​ക്കു​ന്നത്‌. എന്നാൽ ഇവയ്‌ക്ക്‌ ആ പടയാ​ളി​ക​ളിൽനിന്ന്‌ ഒരു വ്യത്യാ​സ​മുണ്ട്‌. ഈ കൊച്ചു ‘പടയാ​ളി​ക​ളിൽ’ പലതി​ന്റെ​യും പടച്ചട്ടകൾ വിസ്‌മയം ജനിപ്പി​ക്കും​വി​ധം വൈവി​ധ്യ​മാർന്ന വർണങ്ങ​ളോ​ടും ഡി​സൈ​നു​ക​ളോ​ടും കൂടി​യ​വ​യാണ്‌. ആഴിക​ളി​ലെ, ചെമ്മീൻപോ​ലെ​യുള്ള ഈ കൊച്ചു​നി​വാ​സി​കൾ ക്രസ്റ്റേ​ഷ്യൻസ്‌ എന്ന ജീവി​ഗ​ണ​ത്തിൽപ്പെ​ടു​ന്നു. ഷ്രിം​പ്‌സ്‌ എന്നാണ്‌ പൊതു​വേ ഇവ അറിയ​പ്പെ​ടു​ന്നത്‌.

പ്ലവകങ്ങ​ളിൽനി​ന്നു നിങ്ങളു​ടെ പ്ലേറ്റി​ലേക്ക്‌

ഷ്രിം​പു​ക​ളെ​ക്കു​റി​ച്ചു കേൾക്കു​മ്പോൾ രുചി​ക​ര​മായ കടൽവി​ഭ​വങ്ങൾ എന്നതി​ലു​പ​രി​യൊ​ന്നും നിങ്ങൾ ചിന്തി​ക്കാ​നി​ട​യില്ല. * എന്നിരു​ന്നാ​ലും, നിങ്ങളു​ടെ തീൻമേ​ശ​യി​ലെ വിഭവ​മാ​കു​ന്ന​തി​നു​മുമ്പ്‌ ഇവ അത്യന്തം വൈവി​ധ്യ​മാർന്ന ജീവി​ത​ഘ​ട്ട​ങ്ങ​ളി​ലൂ​ടെ കടന്നു​പോ​കു​ന്നു. ഇവയിൽ ചിലതി​ന്റെ പെൺവർഗം ബീജസ​ങ്ക​ലനം നടന്ന മുട്ടകൾ വിരി​യു​ന്ന​തു​വരെ ഉദര​ത്തോ​ടു ചേർത്തു​പി​ടി​ക്കു​ന്നു. മറ്റു ചിലതാ​കട്ടെ വെള്ളത്തിൽ മുട്ടകൾ നിക്ഷേ​പി​ക്കു​ന്നു, അവിടെ അവ സ്വത​ന്ത്ര​മാ​യി വിരി​യു​ന്നു.

ഷ്രിം​പി​ന്റെ മുട്ടവി​രി​ഞ്ഞു പുറത്തു​വ​രു​ന്ന​വയെ സോയിയ എന്നാണു വിളി​ക്കു​ന്നത്‌. ഇവ തുടർന്ന്‌ പല ലാർവാ​ഘ​ട്ട​ങ്ങ​ളി​ലൂ​ടെ കടന്നു​പോ​കു​ന്നു. ആ സമയത്ത്‌ ഇവയുടെ രൂപം പൂർണ​വ​ളർച്ച​യെ​ത്തിയ ജീവി​യു​ടേ​തിൽനി​ന്നു വളരെ വ്യത്യ​സ്‌ത​മാ​യി​രി​ക്കും. വലിയ പ്ലവകക്കൂ​ട്ട​ങ്ങൾക്കി​ട​യിൽ കഴിഞ്ഞ​ശേഷം സോയിയ ഒടുവിൽ കടലിന്റെ അടിത്ത​ട്ടി​ലേക്കു പോകു​ന്നു, അവിടെ ഇവ തനതായ രൂപം കൈവ​രി​ക്കു​ക​യും ക്രമേണ പൂർണ​വ​ളർച്ച​യി​ലെ​ത്തു​ക​യും ചെയ്യുന്നു.

പടച്ചട്ട മാറ്റുന്നു

ശരീരം ഒരു കട്ടിയുള്ള പടച്ചട്ട​യ്‌ക്ക​കത്ത്‌ ആയതി​നാൽ പ്രായ​പൂർത്തി​യെ​ത്തിയ ഷ്രിം​പു​കൾ പിന്നെ വലുപ്പം വെക്കു​ന്നത്‌ എങ്ങനെ​യാണ്‌? ഇവയുടെ, “(തോടി​ളക്കൽ എന്നും വിളി​ക്ക​പ്പെ​ടുന്ന) ഈ പ്രക്രി​യ​യിൽ, പഴയ പുറം​തോ​ടി​നു​ള്ളിൽ മൃദു​വായ ഒരു പുതിയ പുറം​തോ​ടു രൂപം​കൊ​ള്ളു​ന്നത്‌ ഉൾപ്പെ​ടു​ന്നു” എന്ന്‌ എ ഫീൽഡ്‌ ഗൈഡ്‌ റ്റു ക്രസ്റ്റേ​ഷ്യൻസ്‌ ഓഫ്‌ ഓസ്‌​ട്രേ​ലി​യൻ വാട്ടേ​ഴ്‌സ്‌ എന്ന പുസ്‌തകം പറയുന്നു. “പഴയ പുറം​തോ​ടു പൊഴി​ക്കു​ന്ന​താണ്‌ അടുത്ത പടി. തുടർന്ന്‌ ജീവി ജലം ആഗിരണം ചെയ്യു​ന്ന​തി​ന്റെ ഫലമായി വഴക്കമുള്ള പുതിയ പുറം​തോട്‌ വീർക്കു​ന്നു, അങ്ങനെ വലുപ്പം വെക്കാൻ സ്ഥലം ഉണ്ടാകു​ന്നു.” ഓസ്‌​ട്രേ​ലി​യൻ കടൽത്തീ​രങ്ങൾ (ഇംഗ്ലീഷ്‌) എന്ന പുസ്‌തകം ഇങ്ങനെ വിശദീ​ക​രി​ക്കു​ന്നു: “ഈ ജീവിക്ക്‌ അതിന്റെ ശരീരം മുഴു​വ​നും, അതായത്‌ വലുതും ബലമു​ള്ള​തു​മോ ചെറു​തും ലോല​മാ​യ​തു​മോ ആയ (ഒട്ടനവധി വരുന്ന) ശരീര​ഭാ​ഗങ്ങൾ കട്ടിയുള്ള ആ പഴയ പുറം​കു​പ്പാ​യ​ത്തിൽനി​ന്നു വലിച്ചൂ​രി​യെ​ടു​ക്കേ​ണ്ട​തുണ്ട്‌. കയ്യുറ​യ്‌ക്ക​ക​ത്തു​നിന്ന്‌ ഒരാൾ വിരലു​കൾ വലി​ച്ചെ​ടു​ക്കു​ന്ന​തു​പോ​ലെ​യാണ്‌ ഇവ ഉപാം​ഗങ്ങൾ വലി​ച്ചെ​ടു​ക്കു​ന്നത്‌.”

സന്ധിക​ളു​ടെ ഭാഗത്ത്‌ രൂപം​കൊ​ള്ളുന്ന ഇടുങ്ങിയ വിള്ളലു​ക​ളി​ലൂ​ടെ ഇറുക്കു​കാ​ലു​ക​ളു​ടെ പേശി​കൾപോ​ലെ​യുള്ള വലിയ ഉപാം​ഗങ്ങൾ എങ്ങനെ​യാണ്‌ ക്രസ്റ്റേ​ഷ്യ​നു​കൾ പുറ​ത്തേക്കു വലി​ച്ചെ​ടു​ക്കു​ന്നത്‌? ഗ്രന്ഥകാ​ര​നായ ഡബ്ലിയു. ജെ. ഡേകിൻ പറയുന്നു: “[തോടി​നു​ള്ളി​ലെ] ഇവയുടെ ശരീര​ഭാ​ഗങ്ങൾ വളരെ മൃദു​വും ഇടുങ്ങിയ വിള്ളലു​ക​ളി​ലൂ​ടെ പുറ​ത്തേക്കു വലി​ച്ചെ​ടു​ക്കാൻ പറ്റിയ​തും ആയതു​കൊ​ണ്ടു മാത്ര​മാണ്‌ ഇതു സാധ്യ​മാ​കു​ന്നത്‌. വാസ്‌ത​വ​ത്തിൽ, തോടി​ളക്കൽ പ്രക്രി​യ​യു​ടെ സമയത്ത്‌ ഇവ കാലു​ക​ളിൽനിന്ന്‌ രക്തത്തെ ശരീര​ത്തി​ന്റെ മറ്റു ഭാഗങ്ങ​ളി​ലേക്കു ഗതിമാ​റ്റി​വി​ടു​ന്നു, ആ അവയവങ്ങൾ എളുപ്പ​ത്തിൽ വലി​ച്ചെ​ടു​ക്കാൻ കഴിയു​ന്ന​തി​നു​വേ​ണ്ടി​യാ​ണിത്‌.” പുതി​യ​താ​യി രൂപം​കൊ​ള്ളുന്ന പുറം​ച​ട്ട​യിൽ പഴയ കുപ്പാ​യ​ത്തി​ലെ അതേ ചുഴി​ക​ളും വരകളും നിറപ്പ​കർച്ച​ക​ളും ഉണ്ടായി​രി​ക്കും, നല്ല കാരണ​ത്തോ​ടെ​തന്നെ.

നിറങ്ങ​ളിൽ ഒളിക്കു​ന്ന​വ​യും നിറങ്ങ​ളിൽ ഒരുങ്ങി​യ​വ​യും

സീ അനി​മോ​ണി അഥവാ കടൽപ്പൂ എന്നറി​യ​പ്പെ​ടുന്ന ഒരുതരം കടൽജീ​വി​ക​ളു​ടെ ഗ്രാഹി​കൾക്കി​ട​യിൽ താവള​മു​റ​പ്പി​ക്കുന്ന ചില ഷ്രിം​പു​കൾക്ക്‌ ഭാഗി​ക​മാ​യി സുതാ​ര്യ​മായ ശരീര​മോ ആതി​ഥേ​യ​രു​ടെ അതേ നിറത്തി​ലുള്ള പുറം​ച​ട്ട​യോ ആണുള്ളത്‌. ശത്രു​ക്ക​ളു​ടെ കണ്ണിൽപ്പെ​ടാ​തി​രി​ക്കാൻ പരിസ​ര​ത്തിന്‌ ഇണങ്ങുന്ന വേഷവും ധരിച്ചു കഴിയുന്ന ഈ വിരു​ത​ന്മാർക്ക്‌ കടൽപ്പൂ​ക്ക​ളു​ടെ ‘കരങ്ങളാണ്‌’ സംരക്ഷണം നൽകു​ന്നത്‌. ഈ ഉപകാ​ര​ത്തി​നു പകരമാ​യി ഇക്കൂട്ടർ അവയ്‌ക്കു ചില വീട്ടു​ജോ​ലി​കൾ ചെയ്‌തു​കൊ​ടു​ക്കാ​റുണ്ട്‌. ആതി​ഥേ​യ​രു​ടെ ശരീര​ത്തിൽ കാണുന്ന മാലി​ന്യ​ങ്ങൾ ഇവ വെടി​പ്പാ​ക്കും.

മറ്റുചി​ലവ കടും​നി​റ​ങ്ങ​ളിൽ അണി​ഞ്ഞൊ​രു​ങ്ങി​യ​വ​രാണ്‌. ക്ലീനർ ഷ്രിം​പാണ്‌ ഉദാഹ​രണം. മിക്ക​പ്പോ​ഴും കടലിലെ പവിഴ​പ്പാ​റ​ക​ളു​ടെ തട്ടുകൾക്ക​ടി​യിൽ കൂട്ട​ത്തോ​ടെ​യാണ്‌ ഇവയുടെ താമസം. ഇവയുടെ കടും​നി​റം ‘കസ്റ്റമേ​ഴ്‌സിന്‌’ ഇവ ലഭ്യമാ​ക്കുന്ന സേവനം പരസ്യ​പ്പെ​ടു​ത്താൻ ഉതകുന്നു. പരാദ​ങ്ങ​ളു​ടെ ശല്യമുള്ള മത്സ്യങ്ങൾ ഈ ജീവി​ക​ളു​ടെ ‘വീട്ടു​പ​ടി​ക്കൽ’ കാത്തു​നിൽക്കു​ക​യാ​യി. വൃത്തി​യാ​ക്കാൻ എത്തുന്ന ഇക്കൂട്ടർ ദേഹപ​രി​ശോ​ധന നടത്തു​മ്പോൾ മത്സ്യങ്ങൾ യാതൊ​രു ഉപദ്ര​വ​വും ചെയ്യില്ല. ഇവ ഒട്ടും​പേ​ടി​ക്കാ​തെ മത്സ്യങ്ങ​ളു​ടെ വായ്‌ക്കു​ള്ളി​ലും ചെകി​ള​ക​ളിൽപ്പോ​ലും കയറി​യി​റ​ങ്ങു​ന്നു. മത്സ്യങ്ങ​ളു​ടെ ശരീര​ത്തി​ലുള്ള ഏതൊരു പരാദ​ത്തെ​യും നീക്കം​ചെ​യ്‌തു ഭക്ഷിക്കുന്ന ഈ “ഷ്രിംപ്‌ വൈദ്യ​ന്മാർ” അവയുടെ വഴുവ​ഴുത്ത പുറം​കു​പ്പാ​യ​ത്തിൽനി​ന്നും കുശാ​ലായ ശാപ്പാട്‌ തരപ്പെ​ടു​ത്തു​ന്നു.

ഇവയുടെ നിറവും ജോലി​യും എന്തുതന്നെ ആയി​ക്കൊ​ള്ളട്ടെ ഒരു കാര്യ​ത്തിൽ സംശയ​മില്ല; ജീവനുള്ള ഈ കൊച്ചു​ര​ത്‌ന​ങ്ങ​ളു​ടെ പടച്ചട്ട പുരാ​ത​ന​കാ​ലത്തെ ഏതൊരു പടയാ​ളി​യു​ടെ പടച്ചട്ട​യെ​ക്കാ​ളും അത്യന്തം കമനീ​യ​മാണ്‌.

[അടിക്കു​റിപ്പ്‌]

 [17-ാം പേജിലെ ചിത്രം]

ഹിൻജ്‌ബീക്ക്‌ ഷ്രിംപ്‌

[17-ാം പേജിലെ ചിത്രം]

സുതാര്യമായ കടൽപ്പൂ ഷ്രിംപ്‌

[17-ാം പേജിലെ ചിത്രം]

ചക്രവർത്തി ഷ്രിംപ്‌

[17-ാം പേജിലെ ചിത്രം]

കടൽപ്പൂ ഷ്രിംപ്‌

[17-ാം പേജിലെ ചിത്രം]

ക്ലീനർ ഷ്രിംപ്‌

[17-ാം പേജിലെ ചിത്രം]

ക്ലീനർ ഷ്രിം​പി​ന്റേത്‌ ഒഴി​കെ​യുള്ള എല്ലാ ചിത്രങ്ങളും: © J and V Stenhouse