ഞങ്ങളുടെ വായനക്കാരിൽനിന്ന്‌
ഞങ്ങളുടെ വായനക്കാരിൽനിന്ന്‌
കുട്ടികൾ “കുട്ടിയുടെ ആദ്യവർഷങ്ങൾ—മാതാപിതാക്കൾ ചെയ്യേണ്ടത്‌” (2004 നവംബർ 8) എന്ന ലേഖനപരമ്പര ഞാൻ അടുത്തകാലത്തു വായിക്കാനിടയായി. അത്‌ എന്നിൽ അത്രയധികം മതിപ്പുളവാക്കിയതിനാലാണ്‌ ഞാനിതു നിങ്ങൾക്ക്‌ എഴുതുന്നത്‌. എന്റെ മകൾക്ക്‌ അഞ്ചുവയസ്സ്‌ ആകാറായി. ഉണർന്നിരിക്കുന്ന സമയം മുഴുവനും അവൾക്കു ചെയ്യാൻ എന്തെങ്കിലുമൊക്കെ പട്ടികപ്പെടുത്തണമെന്നായിരുന്നു എന്റെ വിചാരം. എന്നാൽ, സ്വതഃസിദ്ധമായ കളികൾ കുട്ടികളുടെ സർഗാത്മകതയെ ഉണർത്തുകയും അവരുടെ സാമൂഹികവും മാനസികവും വൈകാരികവുമായ പ്രാപ്‌തികളെ വികസിപ്പിക്കുകയും ചെയ്യുന്നതിനാൽ അത്‌ അവർക്ക്‌ ആവശ്യമാണെന്ന ചില വിദ്യാഭ്യാസവിദഗ്‌ധരുടെ അഭിപ്രായം മാസിക ചൂണ്ടിക്കാട്ടി. വളരെ നന്ദി! ഇത്തരം വിഷയങ്ങളെക്കുറിച്ചുള്ള ലേഖനങ്ങൾ തുടർന്നും പ്രസിദ്ധീകരിക്കുമല്ലോ!
ഐ. കെ., റഷ്യ
ഈ ലേഖനങ്ങൾ വായിച്ചു ഞാൻ കരഞ്ഞുപോയി. 29 വർഷം മുമ്പ്‌ എനിക്കൊരു കുഞ്ഞു പിറന്ന സമയത്തെക്കുറിച്ചു ഞാൻ ചിന്തിച്ചു. അന്നു ഞാൻ തീരെ ചെറുപ്പമായിരുന്നു, യഹോവയെ സേവിക്കുന്നുമില്ലായിരുന്നു. ഞാൻ ഒരുപാടു പിശകുകൾ വരുത്തി. എന്നാൽ ഖേദത്തിന്റെ കണ്ണീർ ഇന്ന്‌ ആനന്ദാശ്രുക്കളായി മാറിയിരിക്കുന്നു. ഒരാഴ്‌ചമുമ്പാണ്‌ എന്റെ മകൾക്ക്‌ അവളുടെ ആദ്യത്തെ കുഞ്ഞുണ്ടായത്‌. എന്റെ പേരക്കിടാവിന്‌ യഹോവയെ സേവിക്കുന്ന മാതാപിതാക്കൾ ഉണ്ടല്ലോയെന്നും അവർക്ക്‌ ഇത്തരം ലേഖനങ്ങളിൽനിന്നു പ്രയോജനം നേടാനാകുമല്ലോയെന്നും ഓർക്കുമ്പോൾ ഞാൻ യഹോവയ്‌ക്ക്‌ അകമഴിഞ്ഞ നന്ദിപറയുന്നു.
ഇ. എച്ച്‌., ഐക്യനാടുകൾ
യുവജനങ്ങൾ ചോദിക്കുന്നു “യുവജനങ്ങൾ ചോദിക്കുന്നു . . . എനിക്കിഷ്ടമാണെന്ന്‌ ഞാൻ എങ്ങനെ പറയും?” (2004 നവംബർ 8) എന്ന ലേഖനത്തിനു വളരെ നന്ദി. ഞങ്ങളുടെ കോർട്ടിങ്‌ ബന്ധം അവസാനിച്ചത്‌ അടുത്തകാലത്താണ്‌, അവൾതന്നെ അതു വേണ്ടെന്നുവെച്ചു. എന്നാൽ, എനിക്കപ്പോഴും അവളെ ഇഷ്ടമായിരുന്നതിനാൽ അവൾ തിരിച്ചുവരും എന്നു ഞാൻ പ്രത്യാശിച്ചു. പക്ഷേ, ഈ ലേഖനം വായിച്ചുകഴിഞ്ഞപ്പോൾ, എന്റെ തോന്നൽ വെറും സ്വപ്‌നമാണെന്നു ഞാൻ തിരിച്ചറിഞ്ഞു. യാഥാർഥ്യം അംഗീകരിക്കാൻ എനിക്കു കഴിയുമെന്ന്‌ ആദ്യമായി എനിക്കു തോന്നിത്തുടങ്ങി. ഈ പ്രായോഗിക വിഷയം ചർച്ച ചെയ്‌തതിനു നന്ദി. ബൈബിൾ തത്ത്വങ്ങൾ സഹായത്തിനെത്തുന്നത്‌ ഒരിക്കൽക്കൂടെ എനിക്കു കാണാൻ കഴിഞ്ഞു.
വൈ. കെ., ജപ്പാൻ
വിവാഹം കഴിക്കാനായി ആരെയെങ്കിലും അടുത്തറിയാനുള്ള ഉദ്ദേശ്യമൊന്നും തത്‌കാലം എനിക്കില്ല. എങ്കിലും ജാഗ്രതപാലിക്കാൻ ഈ ലേഖനം എന്നെ സഹായിക്കുന്നു. ഞങ്ങൾ, യുവജനങ്ങൾ സാത്താന്റെ ആക്രമണങ്ങൾക്ക്‌ ഇരയാകാനുള്ള സാധ്യത കൂടുതലാണെന്നുള്ളതു ശരിയാണ്‌. എന്നാൽ ഞങ്ങൾക്കു സഹായത്തിനായി യഹോവയുണ്ട്‌ എന്നതും സത്യമാണ്‌. ഇത്തരം ലേഖനങ്ങൾ തുടർന്നും പ്രസിദ്ധീകരിക്കുമല്ലോ!
സി. ഡി., റൊമാനിയ
കാര്യങ്ങൾ യാഥാർഥ്യബോധത്തോടെ നോക്കിക്കാണാൻ ഈ ലേഖനം എന്നെ സഹായിച്ചു. വേണ്ടത്ര സമയമെടുത്തശേഷമേ ഹൃദയം തുറക്കാവൂ എന്ന തീരുമാനത്തിലെത്താൻ ഈ ലേഖനം സഹായകമായിരുന്നു. എല്ലാറ്റിലുമുപരി, സഭയോടൊത്തു കാര്യങ്ങൾ ശുഷ്‌കാന്തിയോടെ ചെയ്‌തുകൊണ്ട്‌ എന്നെക്കുറിച്ചുള്ള മതിപ്പു വർധിപ്പിക്കുന്നതിനും യഹോവയുമായുള്ള ബന്ധം മെച്ചപ്പെടുത്തുന്നതിനും ഇത്‌ എന്നെ പ്രേരിപ്പിച്ചു. എല്ലാവർക്കും ആകർഷകമായ വ്യക്തിത്വമുള്ളവനാകാൻ ഇതെല്ലാം എന്നെ സഹായിക്കും. ഇത്തരം ലേഖനങ്ങൾ പ്രസിദ്ധീകരിച്ചുകൊണ്ട്‌ യുവജനങ്ങളോടു താത്‌പര്യവും കരുതലും പ്രകടമാക്കുന്നതിനു നന്ദി!
ഡി. കെ., ഹോളണ്ട്‌
എന്റെ ഒരു സുഹൃത്ത്‌, അവൾ ഇഷ്ടപ്പെടുന്ന ഒരാളെക്കുറിച്ച്‌ എന്നോടു സംസാരിച്ചു. മുന്നോട്ടുപോകുന്നതു സംബന്ധിച്ച്‌ അവൾ എന്റെ ഉപദേശം തേടി. ഞങ്ങൾ ബൈബിൾ തത്ത്വങ്ങളെക്കുറിച്ചു ചിന്തിക്കാൻ ശ്രമിച്ചു. അടുത്ത ദിവസംതന്നെ ഈ മാസിക കിട്ടിയപ്പോൾ ഞങ്ങൾ എത്ര വിസ്‌മയിച്ചുപോയെന്നോ! ഇത്തരം ലേഖനങ്ങൾ പ്രസിദ്ധീകരിക്കുന്നതിനു വളരെ നന്ദി!
ജെ. എസ്‌., അയർലൻഡ്‌
എനിക്ക്‌ 14 വയസ്സുണ്ട്‌. എന്റെ ക്ലാസ്സിൽ പ്രേമവും പ്രേമബന്ധങ്ങളും പലപ്പോഴും ഒരു സംഭാഷണവിഷയമാണ്‌. ഈ ലേഖനം വായിച്ചപ്പോൾ, ഭാവിയിൽ ഒരു വിവാഹഇണയെ തിരഞ്ഞെടുക്കേണ്ട വിധം സംബന്ധിച്ച ഒട്ടനവധി കാര്യങ്ങൾ ഞാൻ മനസ്സിലാക്കി. യഹോവ ഞങ്ങൾക്കുവേണ്ടി എത്ര നന്നായി കരുതുകയും നല്ല ബുദ്ധിയുപദേശങ്ങൾ നൽകുകയും ചെയ്യുന്നുവെന്നും ഞാൻ തിരിച്ചറിഞ്ഞു. എതിർലിംഗവർഗത്തിൽപ്പെട്ടവരോട്‌ ദൈവമുമ്പാകെ അംഗീകാരമുള്ള രീതിയിൽ, ജ്ഞാനപൂർവം പെരുമാറാൻ ഞാൻ ആഗ്രഹിക്കുന്നു. ഇതുപോലെയുള്ള ഒന്നാന്തരം ലേഖനങ്ങൾ തുടർന്നും പ്രസിദ്ധീകരിക്കുമല്ലോ.
കെ. ഐ., ജപ്പാൻ